Febrero

Nu̱ú Biblia, ña̱ keʼéyó ña̱ nda̱kú, kúni̱ kachiña ña̱ keʼéyó ña̱ káʼa̱n Ndióxi̱ ta va̱ása kotoyó ndáana keʼéyóña xíʼin. ¿Nda̱chun káʼa̱nyó ña̱ nda̱kú íyo ley ta̱ Cristo? Ná ka̱ʼa̱nyó nda̱saa ni̱na̱ʼa̱ ta̱ Jesús ña̱ nda̱kú íyo inira xíʼin ña̱ kéʼéra. Tá tiempo saá, na̱ níʼi yichi̱ nu̱ú na̱ veʼe-ñu̱ʼu ku̱ndasí nu̱úna xi̱nina na̱ inka ñuu xíʼin na̱ ndáʼvi ta saátu va̱ása ní ixato̱ʼóna ná ñaʼá. Soo ta̱ Jesús nda̱kú ni̱xi̱yo inira xíʼin ndiʼina, ta keʼéra ña̱ va̱ʼa xíʼin ndiʼina. Va̱ása níkundasíra na̱ yiví na̱ inka ñuu na̱ ka̱ndíxañaʼá (Mat. 8:5-10, 13). Kǒo níxitora nda̱saa íyona á na̱ ku̱i̱ká kúúna á na̱ ndáʼvi kúúna, ndiʼivana na̱túʼunra xíʼin xa̱ʼa̱ Ndióxi̱ (Mat. 11:5; Luc. 19:2, 9). Ta ni va̱ása níkundasíra ná ñaʼá ta vií sa̱náʼa̱raná. I̱xato̱ʼóraná ta vií xi̱ka̱ʼa̱nra xíʼinná nda̱a̱ ná ku̱ndasí inkana xi̱nina (Luc. 7:37-39, 44-50). Kivi kundiku̱nyó yichi̱ ta̱ Cristo tá nátúʼunyó xa̱ʼa̱ Ndióxi̱ xíʼin ndiʼina ta va̱ása xítoyó ndáana kúúna á ndáa veʼe-ñu̱ʼu ndíku̱nna. w19.05 2 párr. 1; 5 párr. 15-17

Na̱ anciano, na̱ ndáa na̱ congregación tiempo vitin, viíní káʼa̱nna xíʼin na̱ hermano ta náʼa̱na ña̱ kúni̱nínana tá xíniñúʼuna Biblia ña̱ sándi̱kona-inina. Su̱ví nda̱saa na̱ anciano kuití kivi sandi̱ko-ini na̱ ke̱ʼéna ña̱ kini xíʼin. Ndiʼivayó xíniñúʼu kundiku̱n consejo yóʼo: “Chika̱a̱kandó ndee̱ ña̱ sandi̱kondó-ini táʼanndó” (1 Tes. 4:18). Ná hermana ná nda̱kú íyo ini xíʼin Ndióxi̱ kivi sandíkoná-ini inka ná hermana. Nda̱a̱ mií Jehová íyora táki̱ʼva íyo iin ñaʼá ñá sándi̱ko-ini se̱ʼe (Is. 66:13). Ña̱ Biblia káʼa̱nña xa̱ʼa̱ ku̱a̱ʼá ná ñaʼá ná chi̱ndeétáʼan xíʼin inka na̱ kúsuchí-ini (Job 42:11). Jehová kúsi̱í-inira xíʼin ná ñaʼá ná chíndeétáʼan xíʼin inkaka ná xóʼvi̱-ini. Sava yichi̱, na̱ anciano kivi nda̱ka̱tu̱ʼunna iin ñá hermana ñá íyo nda̱kú-ini xíʼin Ndióxi̱, á kivi chindeétáʼanñá xíʼin inkaka ná hermana ná xóʼvi̱. Ña̱ ndixa kúúña, tá chíndeétáʼanyó xíʼin iin na̱ hermano, xíniñúʼu kiʼinyó kuenta ña̱ va̱ása nda̱ka̱tu̱ʼunyóna xa̱ʼa̱ iin ña̱ʼa ña̱ sana va̱ása kúni̱na ka̱ʼa̱nna xa̱ʼa̱ (1 Tes. 4:11). w19.05 16, 17 párr. 10-12

Ti̱xin congregación, ¿nda̱chun xíniñúʼu koo u̱vi̱ na̱ testigo na̱ xi̱ni ña̱kán va̱ʼa tiin na̱ anciano ku̱a̱chi xíʼin na̱ ke̱ʼé iin ña̱ va̱ása va̱ʼa? Saáchi saá káʼa̱n Biblia, chi Ndióxi̱ nina ña̱ nda̱kú kúú ña̱ kéʼéra. Tá iin na̱ ke̱ʼé ña̱ va̱ása va̱ʼa va̱ása nátúʼunna xa̱ʼa̱ ña̱ ke̱ʼéna, xíniñúʼu koo u̱vi̱ na̱ testigo na̱ xi̱ni ña̱ ku̱u ña̱kán va̱ʼa tiin na̱ anciano ku̱a̱chi xíʼinna (Deut. 19:15; 1 Tim. 5:19). Ta tá na̱ ni̱ki̱ʼvi ku̱a̱chi yóʼo va̱ása ndákunina ku̱a̱chi ña̱ ke̱ʼéna, na̱ anciano kuniso̱ʼona ña̱ ka̱ʼa̱n na̱ testigo na̱ xi̱ni ña̱ ku̱u. Kiviva ndataka iin comité judicial na̱ tiin ku̱a̱chi xíʼinna chi ni̱xi̱yo iin na̱ ni̱ka̱ʼa̱n ku̱a̱chi xa̱ʼa̱na ta inka na̱ xi̱ni ña̱ ndixa ke̱ʼéna ña̱ kini xíʼin na̱ va̱lí yóʼo á inkakana. Tá kǒo u̱vi̱ na̱ testigo íyo ña̱ ka̱ʼa̱n ku̱a̱china xa̱ʼa̱na, kǒo kúni̱ kachi ña̱yóʼo ña̱ kúúña ña̱ vatá. Sava yichi̱ ni íyo u̱vi̱ na̱ testigo na̱ káʼa̱n kuití xi̱ni ña̱ ku̱u, na̱ anciano va̱ása kívi kunda̱a̱ va̱ʼa inina á ña̱ ndixa kúúña, ni saá ndákanixi̱nína ña̱ sana ña̱ ndixa kúúña, ta ña̱yóʼo sáxo̱ʼvi̱ña inkakana. Ña̱kán ndákundeéna chíka̱a̱na ndee̱ ña̱ chindeétáʼanna xíʼin na̱ ke̱ʼéna ña̱ kini xíʼin ta ndáana na̱ congregación (Hech. 20:28). w19.05 11 párr. 15, 16

Soo saátu xíniñúʼu sanáʼa̱na se̱ʼena ndáaña keʼéna ña̱ vií kaʼvina. Xíniñúʼu sakuaʼa na̱ va̱lí yóʼo ña̱ vií kaʼvina xa̱ʼa̱ ña̱ ya̱ʼa ti̱xin reunión, á ña̱ nandukú va̱ʼana xa̱ʼa̱ iin ña̱ ni̱ka̱ʼa̱nna xa̱ʼa̱ escuela (Heb. 5:14). Tá ná nandukú va̱ʼana xa̱ʼa̱ iin ña̱ káʼa̱n Biblia xa̱ʼa̱ ti̱xin veʼena, va̱ása ixayo̱ʼvi̱ña xíʼinna ña̱ vií kuniso̱ʼona ña̱ yáʼa ti̱xin reunión á asamblea. Ña̱ nda̱a̱ kúúña, mií na̱ íyo se̱ʼe koto nda̱saa tiempo sakuaʼana xíʼin se̱ʼena ta ndáaña xíniñúʼu sakuaʼana. Saátu na̱ káʼviyó xíʼin, xíniñúʼu sakuaʼana vií kaʼvina tu̱ʼun Ndióxi̱. Kúsi̱í-iniyó ña̱ va̱ʼaní káʼyína respuesta nu̱ú tutu ña̱ káʼviyó xíʼinna xa̱ʼa̱ Ndióxi̱ á nu̱ú tutu ña̱ káʼviyó ti̱xin reunión. Soo saátu xíniñúʼu sanáʼa̱yóna ña̱ vií kaʼvina ta nandukú va̱ʼana xa̱ʼa̱ iin ña̱ʼa ña̱ kúni̱na kunda̱a̱-inina. Ña̱kán tá ná ya̱ʼana nu̱ú iin tu̱ndóʼo, kunda̱a̱-inina nandukúna xa̱ʼa̱ña nu̱ú tutu ña̱ tává na̱ ñuu Ndióxi̱. w19.05 26 párr. 2; 28 párr. 10, 11

Ta̱ Ndi̱va̱ʼa chíka̱a̱níra ndee̱ ña̱ nasamara ña̱ ndákanixi̱níyó. Xíniñúʼura nda̱a̱ ndáaka ña̱ʼa ña̱ kasira nu̱úyó ña̱ va̱ása keʼékayó ña̱ káʼa̱n tu̱ʼun Ndióxi̱. Ta̱ Ndi̱va̱ʼa xíniñúʼukara táʼan pregunta ña̱ xi̱niñúʼura ña̱ sa̱ndáʼvira ñá Eva nu̱ú jardín ña̱ Edén nda̱a̱ tiempo vitin: “¿Á ña̱ nda̱a̱ kúú ña̱ ni̱ka̱ʼa̱n Ndióxi̱ xíʼinndó?” (Gén. 3:1). Nu̱ú ñuyǐví ta̱ Ndi̱va̱ʼa yóʼo, ku̱a̱ʼánína ndáka̱tu̱ʼunna miíyó xa̱ʼa̱ sava ña̱ kivi kaka-iniyó xíʼin, tá kúú ña̱ va̱xi yóʼo: “¿Á ña̱ nda̱a̱ kúú ña̱ va̱ása kútóo Ndióxi̱ ña̱ tindaʼa̱ ta̱a xíʼin ta̱a á ñaʼá xíʼin ñaʼá? ¿Á ña̱ nda̱a̱ kúú ña̱ va̱ása táxi Ndióxi̱ ña̱ keʼéndó vikó ña̱ navidad xíʼin ña̱ cumpleaño? ¿Á ña̱ nda̱a̱ kúú ña̱ káʼa̱n Ndióxi̱ xíʼinndó ña̱ va̱ása nde̱e ni̱i̱ ndóʼó? ¿Á ña̱ nda̱a̱ kúú ña̱ káʼa̱n Ndióxi̱ ta̱ kúʼvi̱-ini xíni ndóʼó ña̱ va̱ása kutáʼankandó xíʼin na̱ táʼanndó na̱ ke̱e ti̱xin congregación?”. Xíniñúʼu ndinuʼu-iniyó ná kandíxayó Ndióxi̱. Saáchi tá íyo sava pregunta ña̱ va̱ása xíni̱yó xa̱ʼa̱, sana kixáʼayó kaka-iniyó xíʼinña ta nda̱a̱ kivi ndiʼi-xa̱ʼa̱ ña̱ kándíxayó Ndióxi̱. w19.06 12, 13 párr. 15-17

Jehová kúʼvi̱ní-inira xínira miíyó (Juan 3:16). Xa̱ʼa̱ ña̱ kúni̱yó kundiku̱nyó yichi̱ra, ña̱kán chíka̱a̱yó ndee̱ ña̱ inkáchi kítáʼanyó xíʼin táʼanyó, kúndáʼvi-iniyó xínitáʼanyó ta kúʼvi̱-iniyó xínitáʼanyó (Gál. 6:10). Tá yáʼa na̱ hermano nu̱ú ña̱ sándi̱ʼi̱ní-inina kúni̱yó chindeétáʼanyó xíʼinna. ¿Nda̱saa kivi sandíkoyó-ini iin na̱ ni̱xi̱ʼi̱ yií á ñá síʼí? Ña̱ nu̱ú xíniñúʼu keʼéyó kúú ña̱ ka̱ʼa̱nyó xíʼinna, ni tá va̱ása kúni̱yó ka̱ʼa̱nyó xíʼinna xa̱ʼa̱ ña̱ ndóʼona á ni tá va̱ása xíni̱yó ndáaña ka̱ʼa̱nyó. Ñá Paula, ñá kamaní ni̱xi̱ʼi̱ yií, káʼa̱nñá: “Kúnda̱a̱-inii̱ ña̱ tá xíʼi̱ iin na̱ táʼan iin na̱ yiví va̱ása va̱ʼa kúnina. Ndíʼi̱-inina ña̱ sana va̱ása va̱ʼa ka̱ʼa̱nna. Soo va̱ʼaka kúúña ña̱ ná ka̱ʼa̱nna nu̱úka ña̱ va̱ása ka̱ʼa̱nna”. Iin na̱ kúsuchí-ini, sana va̱ása ndátuna ña̱ ka̱ʼa̱nyó xíʼinna iin tu̱ʼun ña̱ xa̱a̱ nda̱a̱ níma̱na. Ñá Paula káchiñá: “Nda̱a̱ va̱ʼa xi̱kuni̱i̱ tá xi̱ka̱ʼa̱n na̱ migoi̱ xíʼi̱n ña̱ kúsuchíní-inina xa̱ʼa̱ ña̱ ndóʼi̱”. w19.06 20 párr. 1; 23 párr. 14

Tá ná va̱ása taxikana ndasakáʼnuyó Ndióxi̱, na̱ anciano kúú na̱ ka̱ʼa̱n ama ta ndáa míí koo reunión ña̱kán va̱ása kunda̱a̱-ini inkana xa̱ʼa̱ña. Sana ka̱ʼa̱nna xíʼinyó ña̱ loʼo tá loʼo kuitíyó ndakutáʼan, ta xa̱a̱ síín síín hora xíʼin lugar kooña. Ta, ¿á kivika natúʼunyó xa̱ʼa̱ Ndióxi̱? Xa̱a̱ síínva kundoʼo iin iinyó. Soo xa̱ʼa̱ ña̱ kúʼvi̱-iniyó xíniyó Jehová ta kútóoyó natúʼunyó xa̱ʼa̱ra, ndukúyó nda̱saa ka̱ʼa̱nyó xíʼin inkana xa̱ʼa̱ra (Luc. 8:1). Ñá historiadora Emily Baran ni̱ka̱ʼa̱nñá xa̱ʼa̱ na̱ testigo Jehová na̱ ni̱xi̱yo chí ñuu ña̱ xi̱naní Unión Soviética: “Tá ni̱ka̱ʼa̱n na̱ chíñu xíʼinna ña̱ va̱ása kivika natúʼunna xa̱ʼa̱ ña̱ kándíxana xíʼin inkana, ki̱xáʼana nátúʼunna xíʼin na̱ íyo yatin xíʼinna, na̱ káchíñu xíʼinna xíʼin na̱ migona. Tá nda̱kiʼinnana ku̱a̱ʼa̱n xíʼinna veʼeka̱a, na̱túʼunna xa̱ʼa̱ Ndióxi̱ xíʼin na̱ ñúʼu kán”. Na̱ hermano nda̱kundeéna na̱túʼunna xa̱ʼa̱ Ndióxi̱ ni sa̱sina nu̱úna. Ta saátu miíyó ná chika̱a̱yó ndee̱ ña̱ natúʼunyó xa̱ʼa̱ Ndióxi̱ ni ná kasina nu̱úyó ña̱ ndasakáʼnuyóra. w19.07 11 párr. 12, 13

¿Nda̱saa kivi chindeétáʼanyó xíʼin na̱ va̱ása ndíku̱n ni iin veʼe-ñu̱ʼu xíʼin na̱ va̱ása kándíxa Ndióxi̱ ña̱ va̱ʼa kuʼvi̱-inina kuninara ta kundiku̱nna ta̱ Cristo? Xíniñúʼu kunda̱a̱-iniyó ña̱ xa̱a̱ síín ndákuiin iin iin na̱ yiví na̱ nátúʼunyó xíʼin, saáchi xa̱a̱ síín ñuu nu̱ú xa̱ʼnuna. Tá kúú, na̱ xa̱ʼnu chí Europa sana síínva ndakuiinna nu̱ú na̱ xa̱ʼnu chí Asia. Chí Europa, ku̱a̱ʼání na̱ yiví xa̱a̱ xíni̱na loʼo xa̱ʼa̱ ña̱ káʼa̱n Biblia ta xíniso̱ʼona ña̱ mií Ndióxi̱ i̱xava̱ʼa ndiʼi ña̱ʼa. Soo chí Asia, ku̱a̱ʼání na̱ yiví va̱ása xíni̱na xa̱ʼa̱ ña̱ káʼa̱n Biblia á loʼo kuití xíni̱na ta sana va̱ása kándíxana ña̱ íyo iin ta̱ i̱xava̱ʼa ndiʼi ña̱ʼa. Ná kandíxayó ña̱ kivi nasa̱ma na̱ yiví. Ndiʼi ku̱i̱ya̱, ku̱a̱ʼá na̱ yiví na̱ va̱ása ndíku̱n ni iin veʼe-ñu̱ʼu á na̱ va̱ása kándíxa Ndióxi̱ xáa̱na kúúna testigo Jehová. Ku̱a̱ʼána xi̱keʼévana ña̱ va̱ʼa, soo va̱ása níxikutóona ña̱ kéʼé na̱ veʼe-ñu̱ʼu, inkatuna xi̱keʼéna ña̱ kini, soo ku̱a̱ʼána sa̱ndákoonaña. Mií Jehová kúú ta̱ chindeétáʼan xíʼinyó ña̱ va̱ʼa ndani̱ʼíyó na̱ yiví na̱ kúni̱ kutaku ndiʼi tiempo (Hech. 13:48; 1 Tim. 2:3, 4). w19.07 20, 21 párr. 3, 4

Xíniñúʼu chika̱a̱yó ndee̱ ña̱ xa̱a̱yó nda̱a̱ nu̱ú ndíʼi ña̱ va̱ʼa ndakiʼinyó ña̱ kutakuyó nu̱ú ñuʼú yóʼo á chí ndiví. Ni nda̱a̱ ndáaka ña̱ ná ndoʼoyó, ná va̱ása ndakanixi̱níyó xa̱ʼa̱ ña̱ʼa ña̱ xa̱a̱ ni̱ndo̱o chí sa̱tá, ta ná va̱ása taxiyó ña̱ kasi inkaka ña̱ʼa nu̱úyó ña̱ ndasakáʼnuyó Jehová (Filip. 3:16). Á xa̱ʼa̱ ña̱ kuáchi̱ní xi̱nunu̱ú ña̱ kúni̱yó á xa̱ʼa̱ ña̱ kǒoka ndee̱ kúúmiíyó nda̱a̱ táki̱ʼva ni̱xi̱yoyó tá ya̱chi̱, á xa̱ʼa̱ ña̱ ni̱ya̱ʼayó nu̱ú tu̱ndóʼo ku̱a̱ʼání ku̱i̱ya̱. Nda̱a̱ ndáaka ña̱ ná kundoʼoyó, ná va̱ása kundi̱ʼi̱-iniyó xa̱ʼa̱ ni iin ña̱ʼa, ta ná ka̱ʼa̱nyó xíʼin Ndióxi̱ xa̱ʼa̱ ndiʼi ña̱ kúni̱yó. Ta miíra taxi ña̱ táxi̱n koo iniyó (Filip. 4:6, 7). Nda̱a̱ táki̱ʼva kéʼé iin na̱ xínu ña̱ chíka̱a̱na ndee̱ ña̱ xa̱a̱na nda̱a̱ nu̱ú ndíʼi, saátu miíyó ná chika̱a̱níyó ndee̱ ña̱ xa̱a̱yó nda̱a̱ nu̱ú ndíʼi ña̱ va̱ʼa ndakiʼinyó ña̱ kutakuyó. Tá kuchiñu keʼéyó ña̱yóʼo, ná ndakundeéyó chika̱a̱yó ndee̱ ña̱ ndakiʼinyó ña̱ va̱ʼa chí nu̱únínu. w19.08 7 párr. 16, 17

Sana ni va̱ása xíni̱yó ndáaña ka̱ʼa̱nyó xíʼin iin na̱ xáku xa̱ʼa̱ na̱ táʼanna na̱ ni̱xi̱ʼi̱. Soo ná ndakaʼányó chi ndáyáʼvika ña̱ kuakuyó xíʼinna nu̱úka ña̱ ka̱ʼa̱nyó tu̱ʼun xíʼinna. Tá ni̱xi̱ʼi̱ ta̱ Lázaro, ñá María xíʼin ñá Marta xíʼin inkaka na̱ yiví xa̱kuna xa̱ʼa̱ra. Ta̱ Jesús ki̱xaa̱ra tá xa̱a̱ ni̱ya̱ʼa ku̱mí ki̱vi̱ ña̱ ni̱xi̱ʼi̱ ta̱ Lázaro, tasaá ki̱xáʼara xákura, ni xíni̱ra ña̱ sandátakurara (Juan 11:17, 33-35). Xíʼin ña̱ xa̱kura ni̱na̱ʼa̱ra nda̱saa kúni Jehová xa̱ʼa̱ ña̱ ni̱xi̱ʼi̱ ta̱ Lázaro. Saátu ni̱na̱ʼa̱ra ña̱ kúni̱níra xi̱nira na̱ veʼe ta̱ Lázaro, ña̱yóʼo sa̱ndíkoña-ini ñá María xíʼin ñá Marta. Ki̱ʼva saá ndóʼo na̱ hermano ki̱vi̱ náʼa̱yó ña̱ kúʼvi̱-iniyó xíniyóna ta ndíʼi̱-iniyó xa̱ʼa̱na, saátu kúnda̱a̱-inina ña̱ va̱ása íyo miína chi íyoyó xíʼinna. Sava yichi̱ xíniñúʼu kuniso̱ʼo kuitíyó ña̱ káʼa̱nna xíʼinyó. Ná taxiyó ka̱ʼa̱nna ndiʼi ña̱ kúni̱ miína xíʼinyó, ta va̱ása sa̱a̱yó tá ni̱ka̱ʼa̱nna iin ña̱ va̱ása va̱ʼa (Job 6:2, 3). Saáchi sana na̱ táʼanna na̱ va̱ása kúú testigo Jehová íxanduxana xíʼinna ña̱ ná keʼéna ña̱ va̱ása kútóo Ndióxi̱. Ña̱kán, ná ka̱ʼa̱nyó xíʼin Ndióxi̱ xa̱ʼa̱na ña̱ ná taxira ndee̱ ndaʼa̱na ña̱ va̱ʼa ndi̱ko-inina (Sal. 65:2). w19.04 19 párr. 18, 19

Ni kúúyó na̱ káchíñu Betel á na̱ kéʼé inkaka chiñu nu̱ú Jehová, xáa̱yó kúʼvi̱-iniyó xíniyó na̱ yiví ta saátu ñuu nu̱ú káchíñuyó. Xa̱ʼa̱ ña̱kán, tá sándakooyó chiñuyó xa̱ʼa̱ sava ña̱ʼa, kúsuchíní-iniyó. Tá ndákaʼányó xa̱ʼa̱ na̱ sa̱ndákooyó ndíʼi̱-iniyó xa̱ʼa̱na, kachikaví tá sa̱ndákooyó ñuu kán xa̱ʼa̱ ña̱ va̱ása táxikana ña̱ natúʼunyó xa̱ʼa̱ Ndióxi̱ (Mat. 10:23; 2 Cor. 11:28, 29). Ta tá ndákiʼinyó inka chiñu kivi ixayo̱ʼvi̱ña xíʼinyó ña̱ sakuaʼayó ndáa ki̱ʼva íyo na̱ yiví inka ñuu, ta saátu tá nda̱ndikóyó veʼeyó. Ta saátu sana nda̱a̱ kivi kuma̱ní xu̱ʼún ndaʼa̱yó. Ña̱ kaka-iniyó xa̱ʼa̱ ña̱ kuu chí nu̱únínu ta nda̱a̱ kivitu ndakava-iniyó. ¿Ndáaña kivi chindeétáʼan xíʼinyó? Yatin ná kooyó nu̱ú Jehová (Sant. 4:8). ¿Ndáa ki̱ʼva keʼéyóña? Kandíxayóra, chi ta̱kán kúú ta̱ xíniso̱ʼo tá káʼa̱nyó xíʼinra (Sal. 65:2). Jehová kivi keʼéra ndiʼi ña̱ káʼa̱nyó xíʼinra á ña̱ ndákanixi̱níyó xa̱ʼa̱ (Efes. 3:20). Su̱ví nda̱saa ña̱ káʼa̱n kuitíyó xa̱ʼa̱ xíʼin Jehová kéʼéra, chi saátu kivi ndasaviíra ku̱a̱chi ña̱ kúúmiíyó, ta kivitu keʼéra ña̱ʼa ña̱ ni kǒo ndákanixi̱níyó xa̱ʼa̱. w19.08 20, 21 párr. 5, 6

Sava na̱ yiví chítáʼanna ña̱ Armagedón xíʼin iin guerra káʼnuní ña̱ sándiʼi-xa̱ʼa̱ iníísaá nu̱ú ñuʼú. Soo ña̱ káʼa̱n ña̱ Biblia xa̱ʼa̱ ña̱ Armagedón iin ña̱ va̱ʼava kúúña chi sákusi̱íña-iniyó (Rev. 1:3). Guerra ña̱ Armagedón va̱ása sandiʼi-xa̱ʼa̱ña na̱ yiví chi ña̱ sakǎku miívayó kúúña. ¿Ndáa ki̱ʼva kooña? Ña̱ Armagedón sandíʼi-xa̱ʼa̱ña ndiʼi na̱ chíñu na̱ íyo nu̱ú ñuʼú yóʼo xíʼin na̱ yiví na̱ ndi̱va̱ʼa-ini, ña̱ va̱ása sándiʼi-xa̱ʼa̱kana nu̱ú ñuʼú yóʼo, ta sakǎkuña na̱ yiví na̱ va̱ʼa-ini (Rev. 11:18). Ña̱ tu̱ʼun Armagedón iin kuití yichi̱ va̱xiña nu̱ú Biblia, ta ka̱naña ti̱xin ña̱ tu̱ʼun hebreo ta kúni̱ kachiña “yuku̱ ña̱ Meguidó” (Rev. 16:16, nota). Ña̱ Meguidó xi̱kuuña iin ñuu ña̱ ni̱xi̱yo chí Israel (Jos. 17:11). Soo ña̱ Armagedón su̱ví iin lugar ña̱ ndixa kúúña, ta yóʼo kúú nu̱ú ndakutáʼan ndiʼi na̱ chíñu na̱ íyo iníísaá ñuyǐví ña̱ kixáʼana kanitáʼanna xíʼin Jehová (Rev. 16:14). w19.09 8 párr. 1-3

Ñá ñaʼá yóʼo xi̱niñúʼu kamaní chindeétáʼanna xíʼinñá. Ñáyóʼo xa̱a̱ ku̱a̱ʼání nu̱ú na̱ doctor ni̱xa̱ʼa̱nñá ta xa̱a̱ yáʼaka 12 ku̱i̱ya̱ xóʼvi̱ñá ta va̱ása kúchiñu ndaʼañá. Saátu, ña̱ ley xi̱ka̱ʼa̱nña ña̱ kúúñá ñá yaku̱a̱ (Lev. 15:25). Tasaá ku̱nda̱a̱-iniñá ña̱ ta̱ Jesús sándaʼara na̱ ndeé ndóʼo, saá ku̱a̱ʼa̱nñá nandukúñára. Tá nda̱ni̱ʼíñára, ti̱inñá yuʼú ti̱ko̱to̱ra ta ndi̱ku̱n nda̱ʼañá. Soo ta̱ Jesús su̱ví ni sándaʼa kuitírañá, chi saátu nda̱taxira ña̱ si̱í-iniñá. Tá kúú, ni̱xa̱a̱ra nu̱úñá ta xíʼin ña̱ to̱ʼó ni̱ka̱ʼa̱nra xíʼinñá “siʼí”. Ñá ñaʼá kán sana ni̱kusi̱íní-iniñá ta va̱ʼaní ku̱niñá (Luc. 8:44-48). Ná kotoyó chi siʼna mií ñá ñaʼá yóʼo kúú ñá na̱ndukú ta̱ Jesús. Ta saátu xíniñúʼu keʼé miíyó. Xíniñúʼu chika̱a̱yó ndee̱ ña̱ kuyatinyó nu̱ú ta̱ Jesús. Tiempo vitin, va̱ása kívi sándaʼakara na̱ ndeé ndóʼo na̱ nándukúñaʼá. Soo káʼa̱nkavara xíʼinyó: “Kixindó nu̱úi̱, [...] ta yi̱ʼi̱ sandíko-inindó” (Mat. 11:28). w19.09 20 párr. 2, 3

Ta ki̱ʼva saá íyo ña̱ ni̱ka̱ʼa̱n ta̱ profeta Zacarías. Ka̱ʼyíra: “Tiempo kán u̱xu̱ na̱ ta̱a na̱ káʼa̱n ku̱a̱ʼání tu̱ʼun, tiinna ti̱ko̱to̱ iin ta̱ judío ta ka̱ʼa̱nna xíʼinra: ‘Kúni̱ndi̱ ku̱ʼu̱nndi̱ xíʼinndó chi xi̱niso̱ʼondi̱ ña̱ íyo Ndióxi̱ xíʼinndóʼ” (Zac. 8:23). Miíyó na̱ ndásakáʼnu Jehová kúnda̱a̱-iniyó ña̱ va̱ʼa ndakutáʼan na̱ yiví na̱ káʼa̱n xa̱a̱ síín síín tu̱ʼun, xíniñúʼu ku̱ʼu̱nyó natúʼunyó xa̱ʼa̱ tu̱ʼun Ndióxi̱ xíʼin ndiʼi na̱ káʼa̱n inka tu̱ʼun. Na̱ ñuu Ndióxi̱ távána tutu ña̱ íyo xa̱a̱ síín síín nu̱ú tu̱ʼun. Ta tiempo vitin xa̱a̱ ku̱a̱ʼání nu̱ú tu̱ʼun kána tutu yóʼo. Ña̱yóʼo náʼa̱ña nu̱úyó ña̱ mií Jehová kúú ta̱ chíndeétáʼan xíʼin na̱ ñuura, ña̱ va̱ʼa ndakutáʼan ku̱a̱ʼání na̱ yiví na̱ xa̱a̱ síín síín ñuu. Xa̱ʼa̱ ña̱ íyo ku̱a̱ʼání tutu xa̱a̱ síín síín nu̱ú tu̱ʼun, na̱ gran muchedumbre inkáchi ndásakáʼnuna Jehová. Ta saátu ku̱a̱ʼá na̱ yiví xíni̱na na̱yóʼo xa̱ʼa̱ ña̱ xíkana nátúʼunna xíʼin ña̱ si̱í-ini xa̱ʼa̱ Ndióxi̱, ta kúʼvi̱-inina xíni táʼanna. Ndiʼi ña̱yóʼo ndásandakúníña ña̱ kándíxayó Ndióxi̱ (Mat. 24:14; Juan 13:35). w19.09 30 párr. 16, 17

Ti̱xin ña̱ gran tribulación, na̱ yiví yi̱ʼvínína tá ná kunina ña̱ ndíʼi-xa̱ʼa̱ ndiʼi na̱ xi̱kandíxana, tá kúú na̱ político xíʼin inkakana. Na̱yóʼo ndi̱ʼi̱ní-inina ta yi̱ʼvína xa̱ʼa̱ ña̱ kuvina, saáchi iin tiempo ña̱ i̱yoní kooña (Sof. 1:14, 15). Ta ña̱ kutakuna yo̱ʼvi̱níka kooña, ta saátu nda̱a̱ nu̱ú miíyó na̱ ndásakáʼnu Ndióxi̱. Ta sana xo̱ʼvi̱yó xa̱ʼa̱ ña̱ va̱ása kúúyó táʼan na̱ ñuyǐví yóʼo. Ta nda̱a̱ kivi kuma̱ní sava ña̱ʼa ña̱ kuniñúʼuyó. Na̱ esclavo fiel y prudente xa̱a̱ chíndeétáʼannína xíʼinyó ña̱ nda̱kú koo iniyó ti̱xin ña̱ gran tribulación (Mat. 24:45). Xa̱a̱ ku̱a̱ʼání ki̱ʼva kéʼénaña, ná ndakanixi̱níyó xa̱ʼa̱ savaña: tá kúú ña̱ asamblea regional ña̱ ni̱xi̱yo tá ku̱i̱ya̱ 2016 nda̱a̱ 2018. Ña̱yóʼo chi̱ka̱a̱níña ndee̱ xíʼinyó ña̱ va̱ʼa ndakúka koo iniyó tá ná kixaa̱ ki̱vi̱ Jehová. w19.10 14 párr. 2; 16 párr. 10; 17 párr. 12

Tá xa̱a̱ ko̱kóyó ña̱ xíxiyó, ña̱yóʼo kíxáʼaña káchíñu miíña ti̱xinyó, ta kíxáʼaña kíʼviña ku̱ñuyó. Tá va̱ʼa íyo ña̱ xíxiyó chíndeétáʼanña xíʼinyó ña̱ vií kooyó, ta tá va̱ása va̱ʼa íyo ña̱ xíxiyó va̱ása chíndeétáʼanña xíʼinyó. Soo, ña̱yóʼo va̱ása ndi̱ku̱n ndóʼoyóña chi tá yáʼa tiempo saáví kéʼéña ña̱ va̱ása va̱ʼa xíʼinyó. Ki̱ʼva saá íyoña, tá kíʼinyó kuenta xíʼin ña̱ ndáka̱xinyó kotonde̱ʼéyó á ña̱ kusíkíyó. Chi saá ña̱yóʼo kíʼviña xi̱níyó, ta kíxáʼayó kúni̱yó keʼéyóña. Tá vií íyo ña̱ xítoyó á sísikíyó va̱ʼa kúniyó xíʼinña, soo tá su̱ví ña̱ va̱ʼa kúúña sándiʼi-xa̱ʼa̱ña ña̱ va̱ʼa ña̱ kúúmiíyó (Sant. 1:14, 15). Soo ña̱yóʼo va̱ása ndi̱ku̱n keʼéña ña̱ va̱ása va̱ʼa xíʼinyó, chi tá ná ya̱ʼa tiempo saáví kuniyóña. Xa̱ʼa̱ ña̱kán ña̱ Biblia káʼa̱nña ña̱yóʼo xíʼinyó: “Chi nda̱a̱ ndáaka ña̱ chíʼiyó ña̱kán ndakiʼinvayó; chi ndiʼi na̱ chíʼi si̱ʼva̱ ña̱ kútóo ku̱ñuna, ña̱ ndakiʼinna kúú ña̱ ndiʼi-xa̱ʼa̱na” (Gál. 6:7, 8). Ña̱kán, ndáyáʼviní ña̱ va̱ása kotonde̱ʼéyó á kusíkíyó ña̱ʼa ña̱ va̱ása kutóo Jehová (Sal. 97:10). w19.10 30, 31 párr. 12-14

Jehová ni̱na̱ʼa̱ra ña̱ kúʼvi̱ní-inira xínira na̱ yiví ña̱kán ta̱xira se̱ʼera ña̱ ni̱xi̱ʼi̱ra xa̱ʼa̱yó ta sakǎkura miíyó (Juan 3:16). ¿Nda̱saa kivi kundiku̱nyó yichi̱ Jehová ta kuʼvi̱-iniyó kuniyó inkana? Ná ndakaʼányó chi na̱ káchíñu nu̱úra ndáyáʼvinína ta saátu xíʼin ña̱ si̱í-ini ná ndakiʼinyó na̱ ndándikó ti̱xin ñuura (Sal. 119:176; Luc. 15:7, 10). Náʼa̱yó ña̱ kúʼvi̱-iniyó xíniyó na̱ hermano tá táxiyó miíyó ña̱ chindeétáʼanyó xíʼinna tá yáʼana nu̱ú iin tu̱ndóʼo (1 Juan 3:17). Ta̱ Jesús xa̱ʼndara chiñu nu̱ú na̱ xi̱ndiku̱nñaʼá ña̱ ná kuʼvi̱-inina kunitáʼanna táki̱ʼva ni̱kuʼvi̱-inira xi̱nirana (Juan 13:34, 35). Iin ña̱ xa̱á kúú ña̱ ni̱ka̱ʼa̱n ta̱ Jesús xíʼinna saáchi ña̱yóʼo va̱ása níkixiña ti̱xin ley ña̱ ta̱xi Ndióxi̱ ndaʼa̱ na̱ ñuu Israel. Ni̱ka̱ʼa̱nra ña̱ ná kuʼvi̱-iniyó kuniyó na̱ hermanoyó nda̱a̱ táki̱ʼva ni̱kuʼvi̱-inira xi̱nira miíyó. Ndeéka ná kuni̱yóna nu̱úka ña̱ kúni̱yó xíniyó miíyó, ta nda̱a̱ kuviyó xa̱ʼa̱na táki̱ʼva ke̱ʼé ta̱ Jesús. w19.05 4 párr. 11-13

Tá kúni̱yó ná chindeétáʼan espíritu santo xíʼinyó va̱ása sandákooyó ndukúyóña ti̱xin ña̱ oración (Luc. 11:13). Ejemplo ña̱ va̱xi nu̱ú Lucas 11:5-9 chíndeétáʼantuña xíʼinyó ña̱ kunda̱a̱-iniyó, ndáa ki̱ʼva táxi Jehová espíritu santora ndaʼa̱yó. Ta̱a ta̱ ni̱ka̱ʼa̱n ta̱ Jesús xa̱ʼa̱, xi̱kuni̱ra ndakiʼin viíra ta̱ ki̱xaa̱ veʼera tá xa̱a̱ ñuú. Ta kúni̱ra taxira ña̱ kuxu ta̱ ta̱a kán, soo kǒo ña̱ʼa ña̱ taxira kuxura. Ta̱ Jesús ni̱ka̱ʼa̱nra ña̱ ta̱ íyo yatin xíʼinra ta̱xira ña̱ xíniñúʼura, xa̱ʼa̱ ña̱ va̱ása nísandákoora ndukúraña nu̱úra. ¿Ndáaña xi̱kuni̱ ta̱ Jesús sanáʼa̱ra miíyó? Ña̱ tá iin ta̱a ni kúúra ta̱ ku̱a̱chi, va̱ʼa chíndeétáʼanra xíʼin inkana xa̱ʼa̱ ña̱ va̱ása sándakoona ndukúnaña nu̱úra, kachikaví yiváyó ta̱ íyo chí ndiví taxivara espíritu santora ndaʼa̱ na̱ va̱ása sándakoo ndukúña nu̱úra. Xa̱ʼa̱ ña̱yóʼo, kiviva ndukúyó nu̱ú Jehová ña̱ ná taxira espíritura ndaʼa̱yó, ta va̱ása kaka-iniyó ña̱ ndakuiinra yuʼúyó (Sal. 10:17; 66:19). Kúnda̱a̱-iniyó ña̱ kuchiñuvayó ni nda̱a̱ ndáaka ña̱ ná keʼé ta̱ Ndi̱va̱ʼa xíʼinyó. w19.11 13 párr. 17-19

Ta̱ Jesús xi̱kunda̱a̱-inira, ña̱ miíra xíʼin na̱ discípulora xi̱xiniñúʼu ndakindee̱na. Nda̱a̱ táki̱ʼva ni̱xi̱yo na̱ yiví tiempo xi̱naʼá, saá íyo na̱ yiví tiempo vitin, chi ku̱a̱ʼánína kéʼéna táki̱ʼva ke̱ʼé ta̱ ku̱i̱ká ta̱ ni̱ka̱ʼa̱n ta̱ Jesús xa̱ʼa̱. Ta̱ ta̱a yóʼo xi̱ka̱ʼa̱nra xíʼin miíra: “Va̱ása kundi̱ʼi̱-iniún, kuxún, koʼún ta kusi̱í-iniún” (Luc. 12:19; 2 Tim. 3:4). Ña̱ xi̱ndayáʼvika nu̱ú ta̱ ta̱a yóʼo kúú ña̱ ndakindee̱ra ta kusi̱í-inira. Soo, ta̱ Jesús xíʼin na̱ discípulora va̱ása níndi̱ʼi̱-inina ña̱ kusi̱í-inina xíʼin ña̱ʼa ña̱ íyo ñuyǐví yóʼo. Ndíku̱nyó yichi̱ ta̱ Jesús, tá xíniñúʼuyó tiempo ña̱ va̱ása káchíñuyó, ña̱ ku̱ʼu̱nyó natúʼunyó xíʼin na̱ yiví á ña̱ ku̱ʼu̱nyó reunión, ta su̱ví kuití ña̱ ndakindee̱yó. Ta xa̱ʼa̱ ña̱ ndáyáʼviní u̱vi̱ saá ña̱ chiñu yóʼo nu̱úyó, chíka̱a̱níyó ndee̱ ña̱ keʼé ni̱ʼiyóña (Heb. 10:24, 25). Ta saátu, xáʼa̱nyó reunión ta ndúkúyó ndáa ki̱ʼva natúʼunyó xíʼin na̱ yiví ni tá vacación xíkayó, á nda̱a̱ ndáaka nu̱ú xíkayó (2 Tim. 4:2). w19.12 7 párr. 16, 17

Jehová táxira ña̱ ná ndaka̱xinyó ña̱ kúni̱yó keʼéyó. Sánáʼa̱ra miíyó ña̱ vií ná ndaka̱xinyó ña̱ keʼéyó, ta chíndeétáʼanra xíʼinyó ña̱ vií keʼéyóña tá ña̱ kútóora kúúña (Sal. 119:173). Tá kéʼéyó ndiʼi ña̱ káʼa̱n consejo ña̱ va̱xi nu̱ú tu̱ʼun Ndióxi̱, chindeétáʼanña xíʼinyó ña̱ vií ndaka̱xinyó ña̱ keʼéyó (Heb. 5:14). Ni xa̱a̱ vií nda̱ka̱xinyó iin ña̱ kúni̱yó keʼéyó, sana xíniñúʼu chika̱a̱yó ndee̱ ña̱ sáxi̱nuyóña. Ná kotoyó sava ejemplo. Iin ta̱ loʼo chi̱ka̱a̱-inira ña̱ kaʼvira ndiʼi Biblia. Ka̱ʼviraña sava semana, soo tá ni̱ya̱ʼa loʼo sa̱ndákoora keʼéraña. Iin ñá hermana kúni̱ñá kooñá precursora regular, soo tuku ta tuku násamañá fecha ña̱ kixáʼañá keʼéñá ña̱yóʼo. Iin tiʼvi na̱ anciano ni̱ka̱ʼa̱nna ña̱ ku̱ʼu̱nna keʼéna visita ña̱ pastoreo xíʼin na̱ hermano, soo tá xa̱a̱ ni̱ya̱ʼa ku̱a̱ʼání yo̱o̱ ta ni ta̱ʼán ku̱ʼu̱nna kotona na̱ hermano. Ña̱yóʼo xa̱a̱ síín síínva íyoña, soo iin kúni̱ kitáʼanña, chi nda̱ka̱xinna keʼéna iin ña̱ʼa soo va̱ása nísaxínunaña. w19.11 26 párr. 1, 2

Ta̱ Jesús chi̱táʼanra tiempo ña̱ tákuyó vitin xíʼin ña̱ xi̱taku ta̱ Noé, ta ña̱ nda̱a̱ kúú ña̱ yo̱ʼvi̱níka íyo tiempo ña̱ tákuyó vitin (2 Tim. 3:1; Mat. 24:37). Xa̱ʼa̱ ña̱yóʼo, sava na̱ ti̱ndaʼa̱ ndáka̱xinna ña̱ va̱ása koo se̱ʼena, ña̱ va̱ʼaka kachíñuna nu̱ú Jehová. Tá ndáka̱xin na̱ ti̱ndaʼa̱ ña̱ koo se̱ʼena ta nda̱saa se̱ʼena koo, xíniñúʼu kotona nda̱saa xu̱ʼún kuniñúʼuna (Luc. 14:28, 29). Tá kúú na̱ xa̱a̱ íyo se̱ʼe, kúnda̱a̱-inina ña̱ va̱ʼa koo se̱ʼena su̱ví nda̱saa xu̱ʼún kuniñúʼuna, chi saátu tiempona xíʼin ndee̱na. Xa̱ʼa̱ ña̱yóʼo, ndáyáʼviní ña̱ ná nda̱ka̱tu̱ʼun xíʼin miína: “¿Á xíniñúʼu kachíñu u̱vi̱ saáyó ña̱ va̱ʼa satáyó ña̱ xíniñúʼu na̱ veʼeyó? ¿Á inkáchi ndákanixi̱níyó xa̱ʼa̱ ndáaña kúú ña̱ ndáyáʼvika? Tá u̱vi̱ saáyó xíniñúʼu kachíñu, ¿ndáana kundaa na̱ va̱lí? Ta, ¿ndáana sanáʼa̱-ñaʼá ña̱ vií ndakanixi̱nína ta keʼéna ña̱ va̱ʼa?”. Na̱ xa̱a̱ ti̱ndaʼa̱ na̱ kéʼé ña̱yóʼo, ndíku̱nna ña̱ káʼa̱n texto ña̱ kaʼviyó ki̱vi̱ vitin. w19.12 23 párr. 6, 7

Ta̱ apóstol Pablo tuku ta tuku ni̱ya̱ʼara nu̱ú tu̱ndóʼo (2 Cor. 11:23-28). Saátu xi̱niñúʼu kundeé-inira xa̱ʼa̱ ña̱ xi̱ndika̱a̱ iin iñú ku̱ñura, ta sana iin kue̱ʼe̱ xi̱kuu ña̱yóʼo (2 Cor. 12:7). Saátu, nda̱kavaní-inira xa̱ʼa̱ ña̱ sa̱ndákoo ta̱ Demas miíra xa̱ʼa̱ ña̱ʼa ña̱ íyo ñuyǐví yóʼo, iin ta̱ ku̱a̱ʼání tiempo ka̱chíñu xíʼinra (2 Tim. 4:10). Ni ta̱ Pablo ndakúní ni̱xi̱yo inira chi xi̱chindeétáʼanra xíʼin inkana, soo sava yichi̱ nda̱a̱ miíra xi̱ndakava-ini (Rom. 9:1, 2). ¿Ndáana sa̱ndíko-ini ta̱ Pablo? Jehová xi̱niñúʼura espíritu santora ña̱ nda̱sandakúra-inira (2 Cor. 4:7; Filip. 4:13). Ta saátu xi̱niñúʼu Jehová inkaka na̱ hermano ña̱ sa̱ndíkona-inira. Ta̱ Pablo ni̱ka̱ʼa̱nra, ña̱ sava na̱yóʼo va̱ʼaní sa̱ndíkona-inira (Col. 4:11). Ta sava na̱ chi̱ndeétáʼan xíʼinra kúú ta̱ Marcos, ta̱ Aristarco, xíʼin ta̱ Tíquico ta na̱yóʼo nda̱sandakúnína-inira. w20.01 8 párr. 2, 3

Ta̱ Jesús ni̱ka̱ʼa̱nra ña̱ ixayo̱ʼvi̱ña xíʼin iinna, ña̱ ka̱ʼa̱nna xíʼin na̱ va̱ása níndaka̱xin Ndióxi̱ ndáa ki̱ʼva ndóʼo na̱ káku tuku á na̱ káku xíʼin espíritu (Juan 3:3-8). ¿Nda̱chun nása̱ma ña̱ ndákanixi̱ní na̱ cristiano na̱ nda̱kaxin Ndióxi̱ ku̱ʼu̱n chí ndiví? Tá ya̱chi̱ xíʼin ndiʼi níma̱na xi̱chindayáʼvina ña̱ kutakuna ndiʼi tiempo nu̱ú ñuʼú yóʼo. Saátu xi̱ndatuna ña̱ ná kixaa̱ ki̱vi̱ ña̱ sandiʼi-xa̱ʼa̱ Jehová ndiʼi tu̱ndóʼo ta ndasalivira nu̱ú ñuʼú yóʼo. Sana xi̱ndakanixi̱nína ña̱ ndakiʼinna na̱ veʼena á na̱ migona na̱ ndataku. Soo tá nda̱kaxin Ndióxi̱ miína ña̱ ku̱ʼu̱nna chí ndiví, na̱sama ña̱ ndákanixi̱nína. ¿Nda̱chun? Su̱ví xa̱ʼa̱ ña̱ va̱ása kútóokana koona nu̱ú ñuʼú yóʼo kúúña. Ta ni su̱ví xa̱ʼa̱ ña̱ ndíʼi̱ní-inina á íyoní tu̱ndóʼo nu̱úna kúúña, ta ni su̱ví xa̱ʼa̱ ña̱ ndákanixi̱nína ña̱ va̱ása livi kutakuna ndiʼi tiempo nu̱ú ñuʼú yóʼo kúúña. Saáchi Jehová kúú ta̱ xi̱niñúʼu espíritu santora ña̱ na̱samara ña̱ ndákanixi̱nína, ta na̱samara ña̱ ndátuna ndakiʼinna chí nu̱únínu. w20.01 22 párr. 9-11

Tá ta̱xi Ndióxi̱ ley ndaʼa̱ na̱ ñuu Israel, na̱ juez xíʼin na̱ anciano kúú na̱ xi̱ndatiin ku̱a̱chi xíʼin na̱ xi̱kiʼvi nda̱a̱ ndáaka ku̱a̱chi, ña̱ va̱ʼa kutáʼan tukuna xíʼin Jehová ta nda̱a̱ sava yichi̱ xi̱ndakiʼinna castigo. Soo nu̱ú “ley ta̱ Cristo” ña̱ íyo vitin xa̱a̱ síínva kéʼé na̱ anciano (Gál. 6:2). Tá ni̱ki̱ʼvi iin na̱ congregación iin ku̱a̱chi ña̱ ndeé, na̱ anciano chíndeétáʼanna xíʼinna ña̱ va̱ʼa ná kitáʼan tukuna xíʼin Jehová. Kúnda̱a̱-inina ña̱ tiempo vitin táxi Ndióxi̱ ña̱ ná tiin na̱ chíñu ku̱a̱chi xíʼin na̱ ke̱ʼé ña̱ va̱ása va̱ʼa. Ña̱kán na̱ chíñu yóʼo kúú na̱ kivi taxi castigo ndaʼa̱na á ña̱ ku̱ʼu̱nna veʼeka̱a (Rom. 13:2-4). Tasaá, ¿ndáaña kéʼé na̱ anciano tá ni̱ki̱ʼvi iinna iin ku̱a̱chi ña̱ ndeé? Xíniñúʼuna Biblia ña̱ va̱ʼa ndakanixi̱nína xa̱ʼa̱ ña̱ ku̱u tasaá ndáka̱xinna ña̱ keʼéna. Ndákaʼánna chi ley ta̱ Cristo káʼa̱nña ña̱ xíniñúʼu kuʼvi̱-inina kunina inkana. Ña̱yóʼo chindeétáʼan xíʼinna ña̱ kotona nda̱saa chindeétáʼanna xíʼin iin na̱ ke̱ʼéna ña̱ va̱ása va̱ʼa xíʼin. Ta xa̱ʼa̱ ña̱ kúʼvi̱-inina xínitáʼanna kotona á ndixa ndándikó-ini na̱ ke̱ʼé ña̱ va̱ása va̱ʼa ta saátu kotona nda̱saa kivi chindeétáʼanna xíʼinna ña̱ tuku kutáʼanna xíʼin Jehová. w19.05 7 párr. 23, 24

Tá ni̱ka̱ʼa̱n ta̱ Jesús tu̱ʼun yóʼo nda̱kunira ña̱ yivára kúú ta̱ ta̱xi ña̱ tákura. Ta̱ Jesús ka̱ndíxaníra Jehová, ta ta̱yóʼo ta̱xira ndiʼi ña̱ xi̱niñúʼura ña̱ kutakura, ta ña̱ ndáyáʼviníka ke̱ʼé Jehová kúú ña̱ chi̱ndeétáʼanra xíʼinra ña̱ nda̱kú ni̱xi̱yo inira (Mat. 4:4). Ta saátu táxira ña̱ xíniñúʼuyó ña̱ sakuaʼayó xa̱ʼa̱ra. Xíʼin tu̱ʼunra sa̱náʼa̱ra miíyó ña̱ nda̱a̱ xa̱ʼa̱ra, xa̱ʼa̱ ña̱ kúni̱ra keʼéra, xa̱ʼa̱ ña̱ tákuyó xíʼin xa̱ʼa̱ ña̱ kuu chí nu̱únínu. Ni̱ndi̱ʼi̱-inira xa̱ʼa̱ iin iinyó tá ku̱ndaa̱-iniyó xa̱ʼa̱ ña̱ nda̱a̱, ta xi̱niñúʼura na̱ yiváyó á inkakana ña̱ chi̱ndeétáʼanna xíʼinyó ña̱ ku̱ndaa̱-iniyó xa̱ʼa̱ra. Ta nda̱a̱ vitin xíniñúʼura na̱ anciano ti̱xin congregación xíʼin inkaka na̱ hermano na̱ xa̱a̱ xíni̱ va̱ʼa, ña̱ chindeétáʼanna xíʼinyó. Ta saátu sánáʼa̱ra miíyó ti̱xin reunión, nu̱ú inkáchi sákuaʼayó xa̱ʼa̱ra xíʼin na̱ hermanoyó. Xíʼin ña̱yóʼo náʼa̱ yiváyó ña̱ ndíʼi̱ní-inira xa̱ʼa̱ ndiʼiyó (Sal. 32:8). w20.02 3 párr. 8; 5 párr. 13

Tá ná kukúini̱-iniyó kuniyó inkana va̱ása vií kutáʼanyó xíʼinna. Xíniñúʼu taváyó ña̱yóʼo níma̱yó, ta va̱ása chika̱a̱yó ini inkana ña̱ keʼéna ña̱yóʼo. ¿Ndáaña kivi keʼéyó ña̱ chindeétáʼanyó xíʼin inkana ña̱ va̱ása kukúini̱-inina kunina inkana, ta nda̱saa kivi vií kutáʼanyó? Tá xíto inkana ki̱ʼva ña̱ íyoyó xíʼin ña̱ kéʼéyó kivi xa̱a̱na keʼéna ña̱yóʼo. Na̱ ñuyǐví yóʼo kúni̱na ña̱ ni̱nuní ná kuniyó xa̱ʼa̱ ña̱ kúúmiíyó (1 Juan 2:16). Soo ña̱yóʼo chíndaʼáña inkana ña̱ kukúini̱-inina. ¿Ndáaña keʼéyó ña̱ va̱ása chika̱a̱yó ña̱yóʼo ini inkana? Va̱ása xíniñúʼu ka̱ʼa̱nníyó xa̱ʼa̱ ña̱ kúúmiíyó, á xa̱ʼa̱ ña̱ ndákanixi̱níyó satáyó. Inka ña̱ xíniñúʼu keʼéyó kúú, ña̱ va̱ása ni̱nuní kuniyó xa̱ʼa̱ chiñu ña̱ kúúmiíyó ti̱xin congregación. Tá ná ka̱ʼa̱nníyó xa̱ʼa̱ ña̱ kúúmiíyó, kivi kixáʼa inkana kukúini̱-inina kunina miíyó. Soo tá ná kundi̱ʼi̱-iniyó xa̱ʼa̱ inkana ta ndakuniyó ña̱ va̱ʼa ña̱ kéʼéna, chindeétáʼanyó xíʼinna ña̱ kusi̱í-inina xíʼin ña̱ kúúmiína, ta saátu vií kutáʼanyó xíʼin na̱ congregación. w20.02 18 párr. 15, 16

Kivi sakuaʼakaún xa̱ʼa̱ Jehová tá ná kotoún ña̱ i̱xava̱ʼara (Apoc. 4:11). Ndakanixi̱ní xa̱ʼa̱ ña̱ ndíchi ña̱ kúúmií Jehová, tá xítoún ña̱ viíní i̱xava̱ʼara planta xíʼin kití. Nandukú ña̱ káʼa̱n xa̱ʼa̱ ndáa ki̱ʼva ku̱va̱ʼa na̱ yiví (Sal. 139:14). Ndakanixi̱ní ña̱ ku̱a̱ʼání ndee̱ ta̱xi Jehová ndaʼa̱ ñu̱ʼu, soo kǒo nandósóún ña̱ su̱ví iinlá ña̱yóʼo kúú ña̱ íyo, chi saátu íyo ku̱a̱ʼáníka ki̱mi (Is. 40:26). Tá ná keʼún ña̱yóʼo, ixato̱ʼókaún Jehová. Su̱ví nda̱saa ña̱ kunda̱a̱-iniún ña̱ ndíchiní Jehová ta íyoní ndee̱ra chindeétáʼan xíʼún ña̱ kutáʼan viíkaún xíʼinra. Ña̱ va̱ʼa xa̱ún kuʼvi̱-iniún kuniúnra xíʼin ndiʼi níma̱ún, xíniñúʼu sakuaʼakaún xa̱ʼa̱ra. Ndáyáʼviní ña̱ ná kandíxaún ña̱ ndíʼi̱ní-ini Jehová xa̱ʼún. Ta ndakaʼán ña̱ káʼa̱nra ña̱ tá ná nandukúnra ndani̱ʼúnra (1 Crón. 28:9). Jehová kúú ta̱ ka̱na yóʼó ña̱ ná kuyatiún nu̱úra, ña̱kán kúú ña̱ káʼviún Biblia, nda̱a̱ táki̱ʼva káchi Jeremías 31:3. Tá ná kunda̱a̱ka-iniún xa̱ʼa̱ ña̱ ke̱ʼé Jehová xa̱ʼún, kuʼvi̱ka-iniún kuniúnra. w20.03 4 párr. 6, 7

Saátu ta̱ apóstol Pablo, va̱ʼaní yichi̱ sa̱ndákoora nu̱úyó. Tá ni̱xi̱yora chí ñuu Corinto, ña̱ yichi̱ u̱vi̱ ña̱ ni̱xa̱ʼa̱nra xi̱tora na̱ congregación, ndeéní ka̱chíñura, chi va̱ása níxi̱yo ku̱a̱ʼá xu̱ʼúnra. Ke̱ʼéra chiñu yóʼo ña̱ va̱ʼa kiʼinra loʼo xu̱ʼún ña̱ kuniñúʼura, ña̱ va̱ʼa natúʼunra xa̱ʼa̱ Ndióxi̱ xíʼin na̱ ñuu Corinto tasaá va̱ása taxina xu̱ʼún ndaʼa̱ra ña̱ kuniñúʼura (2 Cor. 11:7). Ni xi̱niñúʼu kachíñura, ni̱ndi̱ʼi̱níka-inira xa̱ʼa̱ chiñu Ndióxi̱ ta xi̱natúʼunra xa̱ʼa̱ Ndióxi̱ ndiʼi sábado. Soo tá ni̱ya̱ʼa loʼo tiempo “ki̱xáʼara ndeéní chíka̱a̱ra ndee̱ ña̱ natúʼunra xa̱ʼa̱ Ndióxi̱, ta na̱túʼunra xíʼin na̱ judío ña̱ va̱ʼa kandíxana ña̱ kúú ta̱ Jesús, ta̱ Cristo” (Hech. 18:3-5; 2 Cor. 11:9). Tá ni̱ya̱ʼa tiempo, tá nda̱kasinara u̱vi̱ ku̱i̱ya̱ ti̱xin iin veʼe ña̱ ñuu Roma, nda̱a̱ kán na̱túʼunra xíʼin na̱ xi̱xa̱ʼa̱n xi̱xitoñaʼá ta saátu xi̱kaʼyira sava carta (Hech. 28:16, 30, 31). Chi̱ka̱a̱-inira ña̱ nda̱a̱ ni iin ña̱ʼa ná va̱ása kasi nu̱úra ña̱ natúʼunra xa̱ʼa̱ Ndióxi̱. w19.04 4 párr. 9