Enero

Ta̱ Timoteo xi̱kandíxara ña̱ nda̱a̱ kúú ña̱ va̱xi nu̱ú Biblia, ta xi̱kuni̱ra kutáʼan viíra xíʼin Jehová. Saátu miíyó xíniñúʼu kaʼviyó ña̱ káʼa̱n Biblia xa̱ʼa̱ Jehová ta vií ndakanixi̱níyó xa̱ʼa̱ ña̱ káʼa̱nña. U̱ni̱ ña̱ʼa ña̱ ndáyáʼviní kúú ña̱ xíniñúʼu kandíxayó. Ña̱ nu̱ú, Jehová kúú ta̱ i̱xava̱ʼa ndiʼi ña̱ʼa ña̱ íyo nu̱ú ñuʼú yóʼo (Éx. 3:14, 15; Heb. 3:4; Apoc. 4:11). Ña̱ u̱vi̱, nu̱ú Biblia kúú nu̱ú va̱xi ña̱ kúni̱ Ndióxi̱ ná kunda̱a̱-ini na̱ yiví (2 Tim. 3:16, 17). Ña̱ u̱ni̱, íyo iin tiʼvi na̱ yiví na̱ ndásakáʼnu Jehová, ta ta̱ Cristo kúú ta̱ níʼi yichi̱ nu̱úna: na̱yóʼo kúú miíyó na̱ testigo Jehová (Is. 43:10-12; Juan 14:6; Hech. 15:14). Va̱ása xíniñúʼuví kuxini̱ xíʼin xi̱níyó ndiʼi ña̱ káʼa̱n Biblia. Chi ña̱ kúni̱yó kúú ña̱ kuniñúʼuyó ña̱ ndákanixi̱níyó ña̱ va̱ʼa kandíxayó ña̱ kúúmiíyó ña̱ nda̱a̱ (Rom. 12:1). w20.07 10 párr. 8, 9

Ña̱yóʼo káʼa̱nña xa̱ʼa̱ ku̱a̱ʼání tí ti̱ka náʼnu, ta nu̱úrí íyoña nda̱a̱ táki̱ʼva íyo nu̱ú na̱ yiví ta xi̱nírí “kánuu iin ña̱ náʼa̱ nda̱a̱ táki̱ʼva íyo iin corona ña̱ oro” (Apoc. 9:7). Ta sáxo̱ʼvi̱rí “na̱ yiví na̱ va̱ása kúúmií sello Ndióxi̱ chí te̱ʼéna” na̱yóʼo kúú na̱ sáa̱-ini xíni Jehová, ta u̱ʼu̱n yo̱o̱ kúú ña̱ kéʼérí ña̱yóʼo, chi ki̱ʼva saá kúú ña̱ xítaku tí ti̱ka náʼnu (Apoc. 9:4). Ña̱ profecía yóʼo kúú ña̱ káʼa̱n xa̱ʼa̱ na̱ nda̱kaxin Jehová ku̱ʼu̱n chí ndiví, chi na̱yóʼo xíʼin ña̱ ndakú-ini káʼa̱nna xa̱ʼa̱ ña̱ keʼé Ndióxi̱ xíʼin na̱ ñuyǐví yóʼo, ta na̱ kítáʼan xíʼin na̱ ñuyǐví yóʼo va̱ása kútóona ña̱yóʼo. Tí ti̱ka náʼnu tí káʼa̱n libro ña̱ Joel 2:7-9 xa̱ʼa̱, va̱ása inkáchi kítáʼanrí xíʼin tí káʼa̱n libro ña̱ Apocalipsis xa̱ʼa̱. Va̱ása xíniñúʼu ndakanda̱-iniyó xíʼin ña̱yóʼo, saáchi ña̱ Biblia sava yichi̱ inkáchi ña̱ʼa xíniñúʼuña ña̱ va̱ʼa ka̱ʼa̱nña xa̱ʼa̱ xa̱a̱ síín síín ña̱ʼa. Tá kúú, nu̱ú Apocalipsis 5:5 káʼa̱nña xa̱ʼa̱ ta̱ Jesús ña̱ kúúra iin león tí ke̱e ti̱xin na̱ veʼe ta̱ Judá, ta nu̱ú 1 Pedro 5:8 káʼa̱nña xa̱ʼa̱ ta̱ Ndi̱va̱ʼa ña̱ kúúra iin león tí ndeéní ndáʼyi̱. w20.04 3 párr. 8; 5 párr. 10

Ñá Agar, ñá xi̱kachíñu nu̱ú ñá Sarái, ki̱xáʼañá kéʼéñá ña̱ va̱ása va̱ʼa tá ni̱xa̱a̱ñá ku̱uñá ñá síʼí ta̱ Abrán. Tá ki̱ʼinñá kuenta ña̱ ñúʼu se̱ʼeñá, ki̱xáʼañá kúndasíñá xíniñá ñá Sarái chi ñáyóʼo va̱ása níxi̱yo se̱ʼeñá. Tasaá, ñá Sarái ta̱xiñá castigo ndaʼa̱ñá, ta ñá Agar xi̱nuñá (Gén. 16:4-6). Xa̱ʼa̱ ña̱ kúúyó na̱ yiví ku̱a̱chi kivi ndakanixi̱níyó ña̱ ni̱nuní xi̱kuni ñá Agar ña̱kán nda̱kiʼinñá castigo. Soo Jehová va̱ása níndakanixi̱níra saá xa̱ʼa̱ ñá Agar. Chi̱ndaʼára iin ángel ña̱ chindeétáʼanra xíʼinñá ña̱ nasamañá ki̱ʼva ña̱ íyoñá, ta ta̱xira bendición ndaʼa̱ñá. Ñá Agar ku̱nda̱a̱-iniñá ña̱ xi̱xitova Jehová ña̱ xi̱ndoʼoñá. Xa̱ʼa̱ ña̱yóʼo ni̱ka̱ʼa̱nñá xíʼinra: “Yóʼó kúún iin Ndióxi̱ ta̱ xíto ndiʼi ña̱ kúu” (Gén. 16:7-13). ¿Ndáaña ndo̱ʼo ñá Agar kúú ña̱ ki̱ʼin Jehová kuenta xíʼin? Xi̱kunda̱a̱ va̱ʼa inira xa̱ʼa̱ ña̱ ndo̱ʼoñá tá ya̱chi̱. Ña̱ nda̱a̱ kúú ña̱ xi̱kunda̱a̱-ini Jehová xa̱ʼa̱ ña̱ va̱ása va̱ʼa ña̱ xi̱keʼé ñá Agar xíʼin ñá Sarái, soo saátu xi̱kunda̱a̱-inira xa̱ʼa̱ ña̱ xi̱ndoʼo ñá Agar ña̱kán va̱ʼa ni̱xi̱yo inira xíʼinñá. w20.04 16 párr. 8, 9

Ta̱ apóstol Pablo ni̱ka̱ʼa̱nra ña̱ ndiʼi miíyó na̱ ndásakáʼnu Ndióxi̱ nda̱a̱ táki̱ʼva íyo na̱ xínu saá íyoyó (Heb. 12:1). Ni nda̱saaka ku̱i̱ya̱ á nda̱saaka ndee̱ kúúmiíyó, ndiʼiyó xíniñúʼu ndakú koo iniyó ña̱ va̱ʼa xa̱a̱yó nda̱a̱ nu̱ú ndíʼi, tá kúni̱yó ndakiʼinyó ña̱ káʼa̱n Jehová taxira ndaʼa̱yó (Mat. 24:13). Ta̱ Pablo va̱ása níxi̱ka-inira ña̱ ka̱ʼa̱nra xa̱ʼa̱ ña̱ íyoyó nda̱a̱ táki̱ʼva íyo na̱ xínu, chi miíra ku̱ndeéra sa̱ndíʼira xi̱nura (2 Tim. 4:7, 8). Soo, ¿ndáa carrera kúú ña̱ ni̱ka̱ʼa̱nra xa̱ʼa̱? Ña̱ va̱ʼa sanáʼa̱ ta̱ Pablo iin ña̱ ndáyáʼviní, sava yichi̱ xi̱xiniñúʼura ejemplo na̱ xi̱sisíkí chí Grecia tiempo xi̱naʼá (1 Cor. 9:25-27; 2 Tim. 2:5). Ku̱a̱ʼá yichi̱ chi̱táʼanra ña̱ kéʼé na̱ ndásakáʼnu Ndióxi̱ xíʼin na̱ xínu (1 Cor. 9:24; Gál. 2:2; Filip. 2:16). Iin na̱ yiví kíxáʼana xínuna tá ndátaxina miína ndaʼa̱ Jehová ta ndákuchina (1 Ped. 3:21). Tá ná sandíʼina ña̱ xínuna, taxi Jehová ña̱ kutakuna ndiʼi tiempo (Mat. 25:31-34, 46; 2 Tim. 4:8). w20.04 26 párr. 1-3

“Tátayó nda̱kúní-inira ta ndasandakúra-inindó ta kundaara ndóʼó nu̱ú ta̱ Ndi̱va̱ʼa” (2 Tes. 3:3). ¿Ndáa ki̱ʼva ndáa Jehová miíyó? Táxira ña̱ xíniñúʼuyó ña̱ va̱ʼa kanitáʼanyó tasaá ndáara miíyó nu̱ú ta̱ Ndi̱va̱ʼa (Efes. 6:13-17). Ña̱ táxi Jehová ndaʼa̱yó ndeéníña ta va̱ʼaní chíndeétáʼanña xíʼinyó, soo kivi chindeétáʼanña xíʼinyó tá ndiʼi tiempo ná kuniñúʼuyó ndiʼi ña̱ kúúmií ña̱yóʼo. Tá kúú, ña̱ nda̱a̱ ña̱ íyo nda̱a̱ táki̱ʼva íyo iin cinturón kúú ndiʼi ña̱ nda̱a̱ ña̱ va̱xi nu̱ú tu̱ʼun Ndióxi̱. ¿Nda̱chun xíniñúʼu kuniñúʼuyó cinturón yóʼo? Saáchi “ta̱ Ndi̱va̱ʼa kúú yivá na̱ káʼa̱n ña̱ vatá” (Juan 8:44). Xa̱a̱ ku̱a̱ʼání ku̱i̱ya̱ káʼa̱nra tu̱ʼun vatá, ta xa̱a̱ ku̱chiñura sa̱ndáʼvira “ndiʼi na̱ ndóo nu̱ú ñuʼú yóʼo” (Apoc. 12:9). Soo ña̱ nda̱a̱ ña̱ va̱xi nu̱ú Biblia ndáaña miíyó nu̱ú ña̱ vatá yóʼo. ¿Ndáa ki̱ʼva kuniñúʼuyó cinturón yóʼo? Sakúaʼayó ña̱ nda̱a̱ xa̱ʼa̱ Jehová, ta ndasakáʼnuyóra nda̱a̱ táki̱ʼva náʼa̱ ña̱ espíritu santo yichi̱ nu̱úyó, ta saátu nda̱a̱ táki̱ʼva íyo ña̱ nda̱a̱ ña̱ sa̱kuaʼayó xa̱ʼa̱ra, ta va̱ása sandáʼviyó (Juan 4:24; Efes. 4:25; Heb. 13:18). w21.03 26, 27 párr. 3-5

Liviní ni̱xi̱yoña saáchi kán kúú nu̱ú xi̱ndasakáʼnuna Jehová. Soo nda̱a̱ tá Pentecostés ña̱ ku̱i̱ya̱ 33 ña̱ tiempo vitin, “ñuʼú ña̱ liviní” su̱ví iin lugar ña̱ ndixa kúúña. Saáchi na̱ ndásakáʼnu Jehová íyona iníísaá nu̱ú ñuʼú. Xa̱ʼa̱ ña̱yóʼo, “ñuʼú ña̱ liviní” yóʼo kúú nu̱ú kéʼé na̱ ñuu Ndióxi̱ chiñuna, tá kúú ña̱ ndásakáʼnunara ti̱xin reunión, ta saátu ña̱ xíkana nátúʼunna xa̱ʼa̱ra xíʼin na̱ yiví. Ki̱vi̱ nu̱ú ndíʼi vitin, ta̱ rey ña̱ norte xa̱a̱ ku̱a̱ʼání yichi̱ kíʼvira nu̱ú “ñuʼú ña̱ liviní”. Tá kúú, tá ni̱xi̱yo na̱ Alemania nazi ta̱ rey ña̱ norte, ti̱xin ña̱ Segunda Guerra Mundial ni̱ki̱ʼvira nu̱ú “ñuʼú ña̱ liviní” tá i̱xandi̱va̱ʼara xíʼin na̱ xi̱ndasakáʼnu Ndióxi̱ ta xa̱ʼnírana. Tá ndi̱ʼi ña̱ Segunda Guerra Mundial, tá ndu̱u na̱ Unión Soviética ta̱ rey ña̱ norte, ni̱ki̱ʼvina nu̱ú “ñuʼú ña̱ liviní” tá i̱xandi̱va̱ʼana xíʼin na̱ xi̱ndasakáʼnu Jehová ta chi̱ndaʼánana inka ñuu. w20.05 13 párr. 7, 8

Ná ka̱ʼa̱nyó xa̱ʼa̱ sava na̱ xi̱kuu migo Ndióxi̱, na̱ ni̱xi̱yo tá kúma̱níka kuvi ta̱ Jesús. Ta̱ Abrahán ndakúní ni̱xi̱yo ña̱ xi̱kandíxara Ndióxi̱. Tá xa̱a̱ ni̱ya̱ʼa ki̱ʼva mil ku̱i̱ya̱ ña̱ ni̱xi̱ʼi̱ra, Jehová ni̱ka̱ʼa̱nra ña̱ kúúra migora (Is. 41:8). Ni tá ná kuvi na̱ kúú migo Jehová, va̱ása sandákoona ña̱ koona migora. Ña̱kán, Jehová ndákaʼánkavara xa̱ʼa̱ ta̱ Abrahán (Luc. 20:37, 38). Ta̱ Job kúú inka ta̱ va̱ʼaní xi̱kitáʼan xíʼin Ndióxi̱. Iin yichi̱, tá nda̱kutáʼan na̱ ángel chí ndiví, Jehová ni̱ka̱ʼa̱nra xa̱ʼa̱ ña̱ ndákanixi̱níra xa̱ʼa̱ ta̱ Job. Ka̱chira: “Iin ta̱a ta̱ kǒo ku̱a̱chi kúúra, ta nda̱kúní íyo ña̱ kéʼéra, ta ndásakáʼnura Ndióxi̱, ta va̱ása kéʼéra ña̱ kini” (Job 1:6-8). Ta, ¿ndáaña xi̱ndakanixi̱níra xa̱ʼa̱ ta̱ Daniel, ta̱ ka̱chíñu nu̱úra ki̱ʼva 80 ku̱i̱ya̱ iin ñuu nu̱ú ni̱xi̱yo na̱ yiví na̱ xi̱ndasakáʼnu inka ndióxi̱? Tá xa̱a̱ ku̱chée ta̱ Daniel, u̱ni̱ yichi̱ ni̱ka̱ʼa̱n na̱ ángel xíʼinra ña̱ ndáyáʼviníra nu̱ú Ndióxi̱ (Dan. 9:23; 10:11, 19). Kándíxayó ña̱ kúni̱ní Jehová ña̱ ná kixaa̱ ki̱vi̱ ña̱ sandátakura na̱ migora na̱ kúʼvi̱ní-inira xínira (Job 14:15). w20.05 26, 27 párr. 3, 4

Iin na̱ káʼviyó xíʼin kivi xa̱a̱na kuxini̱ va̱ʼana xa̱ʼa̱ ley Ndióxi̱ ta kundayáʼviña nu̱úna. Soo, ¿á kandíxana Jehová xa̱ʼa̱ ña̱ ni̱xa̱a̱na kúʼvi̱-inina xíninara? Ná ndakaʼányó xa̱ʼa̱ ña̱ ndo̱ʼo ñá Eva. Ñáyóʼo xi̱xini̱ va̱ʼañá xa̱ʼa̱ ley Ndióxi̱, soo va̱ása ndixa níxikuʼvi̱-iniñá kuniñára, ta saátu ke̱ʼé ta̱ Adán (Gén. 3:1-6). Xa̱ʼa̱ ña̱kán, va̱ása xíniñúʼu sanáʼa̱ kuitíyó na̱ yiví xa̱ʼa̱ ña̱ kúni̱ Jehová ná keʼéna á xa̱ʼa̱ leyra. Ña̱ káʼa̱n Jehová xíʼinyó keʼéyó, ta saátu leyra va̱ʼaní chíndeétáʼanña xíʼinyó (Sal. 119:97, 111, 112). Soo na̱ káʼviyó xíʼin va̱ása kotona ña̱yóʼo nda̱a̱ táki̱ʼva xíto miíyóña, chi siʼna xíniñúʼu kunda̱a̱-inina ña̱ ta̱xira ña̱yóʼo ndaʼa̱yó xa̱ʼa̱ ña̱ kúʼvi̱ní-inira xínira miíyó. Xa̱ʼa̱ ña̱kán xíniñúʼu nda̱ka̱tu̱ʼunyóna: “¿Nda̱chun káʼa̱n Ndióxi̱ xíʼinyó keʼéyó iin ña̱ʼa á va̱ása keʼéyóña? ¿Ndáaña sákuaʼún xa̱ʼa̱ra xíʼin ña̱yóʼo?”. Tá chíndeétáʼanyó xíʼinna ña̱ ndakanixi̱nína xa̱ʼa̱ Jehová ta kuʼvi̱-inina kunina ki̱vi̱ra, saá kúú ña̱ xa̱a̱ ña̱ sánáʼa̱yó nda̱a̱ níma̱na. Tasaá va̱ása kuʼvi̱ kuití inina kunina leyra, chi kuʼvi̱tu-inina kunina miíra. Ta ña̱ kándíxanara ndundakúkaña ta kuchiñuna ya̱ʼana nu̱ú ña̱ íxayo̱ʼvi̱ xíʼinna (1 Cor. 3:12-15). w20.06 10, 11 párr. 10, 11

Xíniñúʼu kúee koo iniyó xíʼin na̱ ku̱xíká nu̱ú Jehová, saáchi va̱ása kama ndakutáʼan viína xíʼin Jehová. Ku̱a̱ʼání na̱ ku̱xíká nu̱ú Jehová káʼa̱nna ña̱ ku̱a̱ʼá yichi̱ ni̱xa̱ʼa̱n na̱ anciano xíʼin na̱ hermano xi̱tonana ña̱ va̱ʼa ndikóna nu̱ú Jehová. Iin ñá hermana ñá naní Nancy, ñá íyo chí Asia, ka̱ʼyíña ña̱yóʼo: “Iin migai̱ ñá ndíka̱a̱ ti̱xin congregación va̱ʼaní chi̱ndeétáʼanñá xíʼi̱n. Xi̱kuʼvi̱ní-iniñá xi̱xiniñá yi̱ʼi̱ ta nda̱a̱ táki̱ʼva íyo ku̱ʼvii̱ saá ni̱xi̱yoñá. Xi̱sandákaʼánñá yi̱ʼi̱ xa̱ʼa̱ ña̱ va̱ʼaní xi̱táʼanndi̱ tá ya̱chi̱. Tá xi̱natúʼi̱n xíʼinñá xa̱ʼa̱ ña̱ xi̱ndoʼi̱ kúeení ni̱xi̱yo iniñá, ta viíní xi̱xiniso̱ʼoñá yi̱ʼi̱, ta va̱ʼaní consejo xi̱taxiñá ndaʼíi̱. Va̱ʼaní miga ni̱xi̱yoñá, ta ndiʼi tiempo chi̱ndeétáʼanñá xíʼi̱n”. Ña̱ na̱ʼa̱yó ña̱ kúnda̱a̱-iniyó xíʼin ña̱ ndóʼona, íyoña nda̱a̱ táki̱ʼva íyo ta̱tán ña̱ sándaʼa nu̱ú tu̱kue̱ʼe̱. Savana ku̱xíkana nu̱ú Jehová saáchi iin na̱ ndíka̱a̱ ti̱xin congregación ke̱ʼéna iin ña̱ va̱ása va̱ʼa xíʼinna, ta ni xa̱a̱ ni̱ya̱ʼa ku̱a̱ʼání ku̱i̱ya̱ sáa̱kavana. Ta xa̱ʼa̱ ña̱yóʼo va̱ása kúni̱na ndikóna nu̱ú Jehová. Sana ndákanixi̱nína ña̱ va̱ása va̱ʼa ña̱ níkeʼéna xíʼinna. Ña̱kán, ña̱ xíniñúʼuna kúú ña̱ ná kuniso̱ʼo inkana ña̱ nátúʼunna, ta kunda̱a̱-inina xíʼin ña̱ ndóʼona. w20.06 26, 27 párr. 10, 11

Tá ná kundeé-iniún ta va̱ása keʼún ña̱ kini, va̱ása ixayo̱ʼvi̱ña xíʼún ke̱ʼún ña̱ va̱ʼa. Va̱ása nandósóún ña̱ ta̱ Ndi̱va̱ʼa kúú ta̱ násama ki̱ʼva ña̱ ndákanixi̱ní na̱ yiví xa̱ʼa̱ ña̱ kísi̱na xíʼin táʼanna. Ña̱kán, tá ná va̱ása ndakanixi̱níún nda̱a̱ táki̱ʼva ndákanixi̱ní na̱ ñuyǐví yóʼó, va̱ása taxiún ña̱ ná sandáʼvi ta̱ Ndi̱va̱ʼa yóʼó. Iinlá Jehová kúú ta̱ kivi ka̱ʼa̱n ndáaña kúú ña̱ va̱ása va̱ʼa, ta chíka̱a̱yó ndee̱ ña̱ va̱ása keʼéyóña. Soo tá kéʼéyó ña̱ va̱ása va̱ʼa, nátúʼunyó xíʼinra xa̱ʼa̱ ña̱yóʼo (1 Juan 1:9). Ta, tá ku̱a̱chi ndeé kúú ña̱ ni̱ki̱ʼviyó, káʼa̱nyó xíʼin na̱ anciano ña̱ ná chindeétáʼanna xíʼinyó, saáchi na̱yóʼo kúú na̱ nda̱kaxin Jehová ña̱ kundaana miíyó (Sant. 5:14-16). Ta saátu, va̱ása xíniñúʼu ndakaniníxi̱níyó xa̱ʼa̱ ña̱ va̱ása va̱ʼa ña̱ ke̱ʼéyó tá ya̱chi̱. ¿Nda̱chun? Chi xa̱ʼa̱ ña̱ kúʼvi̱ní-ini yiváyó xínira miíyó ta̱xira se̱ʼera ña̱ ni̱xi̱ʼi̱ra xa̱ʼa̱yó tasaá va̱ʼa ixakáʼnu-inira xa̱ʼa̱ ku̱a̱chiyó. Tá káʼa̱n Jehová ña̱ ixakáʼnu-inira xa̱ʼa̱ na̱ ni̱ki̱ʼvi ku̱a̱chi, kéʼévaraña. Ña̱kán, kiviva kachíñuyó nu̱úra chi vií íyo ña̱ xínitúni̱yó (1 Juan 2:1, 2, 12; 3:19, 20). w20.07 22, 23 párr. 9, 10

Ni̱xi̱yo iin tiempo ña̱ kǒo nda̱a̱ ni iinna níxi̱yo xíʼin Jehová, soo va̱ása níxi̱kuni mitúʼunra. Ta kǒo nda̱a̱ ni iin ña̱ʼa níxikuma̱ní nu̱úra. Soo xi̱kuni̱ra ña̱ ná kutaku inkana ta si̱í koona. Ña̱kán, xa̱ʼa̱ ña̱ kúúmiíra ña̱ kúʼvi̱-ini ki̱xáʼara íxava̱ʼara ña̱ʼa (1 Juan 4:19). Ta̱ Jesús kúú ta̱ siʼna i̱xava̱ʼara. Tándi̱ʼi, ta̱yóʼo kúú ta̱ chi̱ndeétáʼan xíʼinra ña̱ ke̱ʼéra inkaka ña̱ʼa, tá kúú, ndiʼi na̱ ángel (Col. 1:16). Ta̱ Jesús ni̱kusi̱íní-inira xa̱ʼa̱ ña̱ ka̱chíñura xíʼin yivára (Prov. 8:30). Ta saátu na̱ ángel ni̱kusi̱í-inina xa̱ʼa̱ ña̱yóʼo, saáchi na̱yóʼo kúú na̱ xi̱ni ndáa ki̱ʼva i̱xava̱ʼa Jehová xíʼin ta̱ Jesús ndiví xíʼin ñuʼú. Ta, ¿ndáaña ke̱ʼé na̱ ángel? Nda̱sakáʼnuna Jehová tá i̱xava̱ʼara ñuʼú, ta nda̱kundeéna nda̱sakáʼnunara tá i̱xava̱ʼara inkaka ña̱ʼa, tá kúú na̱ yiví (Job 38:7; Prov. 8:31). Ndiʼi ña̱ʼa ña̱ ke̱ʼéra náʼa̱ña ña̱ kúʼvi̱ní-inira xínira miíyó ta ndíchiníra (Sal. 104:24; Rom. 1:20). w20.08 14 párr. 1, 2

Jehová i̱xava̱ʼara miíyó ña̱ kuʼvi̱-iniyó kuniyó inkana, ta saátu ña̱ kuʼvi̱-inina kunina miíyó. Xa̱ʼa̱ ña̱kán, xóʼvi̱yó ta yíʼviyó tá sáa̱-ini inkana xínina miíyó. Iin ta̱ hermano ni̱ka̱ʼa̱nra ña̱yóʼo: “Tá ka̱ni na̱ soldado yi̱ʼi̱, ni̱ka̱ʼa̱n-ndi̱va̱ʼana xíʼi̱n, ta ni̱ka̱ʼa̱nna ña̱ ixandi̱va̱ʼana xíʼi̱n xa̱ʼa̱ ña̱ kúi̱ testigo Jehová, ni̱yi̱ʼvíi̱ ta nda̱a̱ ni̱xa̱i̱ nda̱kanixi̱níi̱ ña̱ va̱ása ndáyáʼvii̱”. Ni xóʼvi̱yó, soo va̱ása ndákanda̱-iniyó xa̱ʼa̱ ña̱ sáa̱-inina xínina miíyó, saáchi ta̱ Jesús xa̱a̱ ni̱ka̱ʼa̱nvara ña̱ kuu ña̱yóʼo. Na̱ yiví sáa̱-inina xínina miíyó, saáchi nda̱a̱ táki̱ʼva ni̱xi̱yo ta̱ Jesús va̱ása kúúyó táʼan na̱ ñuyǐví yóʼo (Juan 15:17-19). Ña̱kán, ni íxato̱ʼóvayó na̱ chíñu na̱ íyo nu̱ú ñuyǐví yóʼo, va̱ása kíʼviyó xíʼin ña̱ política, ni va̱ása chíndeéyó bandera ta ni va̱ása xítayó himno nacional. Saáchi iinlá Jehová kúú ta̱ ndásakáʼnuyó. Miíyó káʼa̱nyó xa̱ʼa̱ derecho ña̱ kúúmií Ndióxi̱ ña̱ kaʼndachíñura nu̱úyó, soo ta̱ Ndi̱va̱ʼa ta saátu na̱ kítáʼan xíʼinra va̱ása íxato̱ʼóna derecho yóʼo (Gén. 3:1-5, 15). Nátúʼunyó xíʼin na̱ yiví xa̱ʼa̱ Reino Ndióxi̱, ña̱ iinlá ña̱yóʼo kúú ña̱ kuchiñu sandíʼi-xa̱ʼa̱ tu̱ndóʼo ña̱ kúúmiína, ta si̱lóʼo kúma̱ní ta sandíʼi-xa̱ʼa̱ Ndióxi̱ ndiʼi na̱ sáa̱-ini xíni Reinora (Dan. 2:44; Apoc. 19:19-21). Na̱ yiví na̱ vitá-ini kúsi̱í-inina xa̱ʼa̱ ña̱yóʼo, soo na̱ yiví na̱ ndi̱va̱ʼa-ini va̱ása kúsi̱í-inina. w21.03 20 párr. 1, 2

Jehová táxira iin chiñu ndaʼa̱ ná hermana ti̱xin congregación. Ta va̱ʼaní yichi̱ chínúuná nu̱úyó saáchi ndíchi íyoná, kándíxaná Ndióxi̱, si̱í íyo ininá, ndakú-ininá, va̱ʼa-ininá ta kéʼéná ña̱ va̱ʼa (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Ta saátu, ti̱xin congregación íyo na̱ hermano na̱ xa̱a̱ chée ta iin bendición kúú na̱yóʼo. Ku̱a̱ʼání na̱yóʼo ndeé ndóʼona xa̱ʼa̱ ña̱ xa̱a̱ ku̱chéena. Soo ni saá, chíka̱a̱nína ndee̱ ña̱ natúʼunna xíʼin na̱ yiví xa̱ʼa̱ Ndióxi̱ ta xíniñúʼuna ndee̱na ña̱ va̱ʼa ka̱ʼa̱nna tu̱ʼun va̱ʼa xíʼin inkana ta sánáʼa̱nana. Ku̱a̱ʼání ña̱ʼa sákuaʼayó xíʼin ña̱ xíni̱na keʼéna. Ndáyáʼvinína nu̱ú Jehová ta saátu nu̱ú miíyó (Prov. 16:31). Ná ndakanixi̱níyó xa̱ʼa̱ na̱ va̱lí. Na̱yóʼo íxayo̱ʼvi̱níña xíʼinna ña̱ koona nu̱ú ñuyǐví ta̱ Ndi̱va̱ʼa chi íyoní ña̱ va̱ása va̱ʼa. Soo, tá xítoyó ña̱ táxina comentario ti̱xin reunión, xáʼa̱nna nátúʼunna xa̱ʼa̱ Ndióxi̱ ta va̱ása yíʼvina ka̱ʼa̱nna xa̱ʼa̱ ña̱ kándíxana, ña̱yóʼo chíka̱a̱níña ndee̱ xíʼinyó. Ndóʼó na̱ va̱lí, kúúmiíndó iin chiñu ña̱ ndáyáʼviní ti̱xin congregación Jehová (Sal. 8:2). w20.08 21, 22 párr. 9-11

Tá kíxáʼayó nátúʼunyó xíʼin na̱ yiví xa̱ʼa̱ Ndióxi̱ ta káʼa̱nyó ña̱ kúúyó testigo Jehová, sana kíxáʼa íyo tu̱ndóʼo nu̱úyó, tá kúú na̱ veʼeyó va̱ása táxina keʼéyó ña̱yóʼo, na̱ migoyó kúsi̱kindaana miíyó ta va̱ása xíín na̱ yiví kuniso̱ʼona ña̱ nátúʼunyó. ¿Ndáaña chindeétáʼan xíʼún ña̱ ndakú koo iniún? Xíniñúʼu kandíxaún ña̱ níʼi ta̱ Jesús yichi̱ nu̱úyó tá ku̱a̱ʼa̱nyó natúʼunyó xíʼin na̱ yiví (Juan 16:33; Apoc. 14:14-16). Ta saátu xíniñúʼu ndakundeéún kandíxaún ña̱ saxínu Jehová ña̱ ni̱ka̱ʼa̱nra kundaara yóʼó (Mat. 6:32-34). Tá kándíxaníkaún Ndióxi̱ ndakúka koo iniún. Ta saátu miíún ni̱na̱ʼún ña̱yóʼo tá ni̱ka̱ʼún xíʼin na̱ migoún saátu xíʼin na̱ veʼún ña̱ ki̱xáʼún káʼviún Biblia xíʼin na̱ testigo Jehová, ta xáʼún reunión. Ta na̱samaún ki̱ʼva ña̱ tákún xíʼin ña̱ kéʼún ña̱ va̱ʼa ixato̱ʼún ña̱ káʼa̱n Jehová. Tasaá ni̱na̱ʼún ña̱ kándíxaún Ndióxi̱ ta ndakú íyo iniún. Tá ná ndakundeéún chika̱a̱ún ndee̱ ña̱ ndakú koo iniún, kivi kandíxaún ña̱ koo Jehová xíʼún nda̱a̱ ndáaka nu̱ú ná ku̱ʼún (Josué 1:7-9). w20.09 4, 5 párr. 11, 12

Va̱ʼaní yichi̱ sa̱ndákoo ta̱ rey Asá nu̱úyó, saáchi nda̱kaxinra ña̱ kandíxara iinlá Jehová. Su̱ví tá tiempo yo̱ʼvi̱ kuití níxi̱kachíñura nu̱úra chi saátu xi̱kachíñura nu̱úra tá xi̱kuuña tiempo va̱ʼa. Nda̱a̱ tá loʼoví ta̱ Asá xi̱kachíñura xíʼin ndiʼi níma̱ra nu̱ú Jehová (1 Rey. 15:14, nota). Ni̱na̱ʼa̱ra ña̱yóʼo tá sa̱ndíʼi-xa̱ʼa̱ra ndióxi̱ vatá chí ñuu Judá. Ña̱ Biblia káchiña: “Sa̱kútaʼara ndiʼi altar xíʼin lugar nu̱ú xi̱ndasakáʼnuna ndióxi̱ ña̱ inka ñuu, sa̱ndíʼi-xa̱ʼa̱ra nama̱ xíʼin poste ña̱ yi̱i̱” (2 Crón. 14:3, 5). Ta saátu ki̱ndaara chiñu ndaʼa̱ xi̱tánra ñá Maacá ta va̱ása níxi̱yokañá reina, saáchi ke̱ʼéñá iin ndióxi̱ vatá ña̱ va̱ʼa ná ndasakáʼnu na̱ ñuu ña̱yóʼo (1 Rey. 15:11-13). Ta̱ Asá va̱ása nísandíʼi-xa̱ʼa̱ kuitíra ndióxi̱ vatá. Chi saátu chi̱ndeétáʼanra xíʼin na̱ ñuu Judá ña̱ ki̱xáʼa tukuna ndásakáʼnuna Jehová. Ndióxi̱ ta̱xira bendición ndaʼa̱ ta̱ Asá xíʼin na̱ ñuu Judá, chi ni̱xi̱yo iin tiempo ña̱ va̱ása níxi̱yo ku̱a̱chi nu̱úna á ña̱ táxi̱n xi̱ndoona. Tá xi̱xaʼndachíñura, ki̱ʼva u̱xu̱ ku̱i̱ya̱ kǒo na̱ níkanitáʼan xíʼinna (2 Crón. 14:1, 4, 6). w20.09 14 párr. 2, 3

Tá kúúmií na̱ yiví iin ña̱ʼa ña̱ ndáyáʼviní, sava yichi̱ táxinaña ndaʼa̱ inka na̱ yiví ña̱ va̱ʼa kundaanaña. Tá kúú, kivi chika̱a̱na xu̱ʼún ña̱ kúúmiína ti̱xin banco ña̱ va̱ʼa ná va̱ása sandáñúʼunaña á ixakuíʼná inkanaña. Ta̱ apóstol Pablo sa̱ndákaʼánra ta̱ Timoteo ña̱ nda̱kiʼinra iin ña̱ ndáyáʼviní: ña̱yóʼo kúú ña̱ ni̱xa̱a̱ra ku̱nda̱a̱-inira xa̱ʼa̱ ña̱ kúni̱ Ndióxi̱ taxira ndaʼa̱ na̱ ñuyǐví. Ta saátu, Jehová ta̱xira iin ña̱ ndáyáʼviní ndaʼa̱ ta̱ Timoteo, ña̱ ku̱ʼu̱nra natúʼunra xíʼin na̱ yiví xa̱ʼa̱ tu̱ʼunra (2 Tim. 4:2, 5). Ta̱ Pablo ni̱ka̱ʼa̱nra xíʼin ta̱ Timoteo ña̱ xíniñúʼu kundaara ña̱ ta̱xina ndaʼa̱ra. Saátu miíyó, Jehová ta̱xira ña̱ ndáyáʼviní ndaʼa̱yó. Xa̱ʼa̱ ña̱ va̱ʼa-inira ta̱xira ña̱ ná kunda̱a̱ káxi-iniyó xa̱ʼa̱ ña̱ nda̱a̱ ña̱ va̱xi nu̱ú tu̱ʼunra ña̱ Biblia. Ña̱ nda̱a̱ yóʼo ndáyáʼviníña saáchi sánáʼa̱ña miíyó ndáa ki̱ʼva xa̱a̱yó kitáʼanyó xíʼin Jehová, ta saátu ña̱ si̱íní kooyó. Tá kándíxayó ña̱ nda̱a̱ yóʼo ta kéʼéyóña, ndátaváña miíyó ndaʼa̱ ña̱ vatá ña̱ sánáʼa̱ inkana ta va̱ása kéʼékayó ña̱ kini (1 Cor. 6:9-11). w20.09 26 párr. 1-3

Ndáyáʼviní koto na̱ káʼviyó xíʼin ña̱ xíʼin ña̱ si̱í-ini sánáʼa̱yó xa̱ʼa̱ ña̱ va̱xi nu̱ú Biblia ta kándíxayóña. Saá kúú ña̱ kusi̱íka-inina xíʼin ña̱ sákuaʼana. Ta saátu kivi ka̱ʼa̱nyó xíʼinna ndáa ki̱ʼva xa̱a̱ chíndeétáʼan ña̱ va̱xi nu̱ú Biblia xíʼinyó ña̱ viíka íyo ña̱ tákuyó. Tasaá xa̱a̱na kunda̱a̱-inina ña̱ kivitu chindeétáʼan ña̱ va̱xi nu̱ú Biblia xíʼin miína. Tá káʼviyó xíʼin iin na̱ yiví ná natúʼunyó xa̱ʼa̱ na̱ hermano na̱ ku̱chiñu ni̱ya̱ʼa nu̱ú tu̱ndóʼo táʼan ña̱ kúúmiína. ¿Á íyo iin na̱ hermano ti̱xin congregaciónyó na̱ ku̱chiñu ni̱ya̱ʼa nu̱ú táʼan tu̱ndóʼo ña̱ ndóʼona? Tá saá, ná ka̱ʼa̱nyó xíʼin na̱ hermano ña̱ ku̱ʼu̱nna xíʼinyó sanáʼa̱yó na̱ yiví. Na̱yóʼo kivi chindeétáʼanna xíʼin na̱ káʼviyó xíʼin ña̱ kunda̱a̱-inina ña̱ ku̱a̱ʼání ña̱ va̱ʼa ndakiʼinna tá ná keʼéna ña̱ káʼa̱n Biblia. Tá xa̱a̱ na̱ ti̱ndaʼa̱ kúú na̱ káʼviyó xíʼin, ¿á kivi ka̱ʼa̱nyó xíʼin yiína á ñá síʼina ña̱ kivitu kaʼvi na̱yóʼo xíʼinyó? Ta saátu ná ka̱ʼa̱nyó xíʼinna ña̱ natúʼunna xíʼin na̱ migona á na̱ veʼena xa̱ʼa̱ ña̱ sákuaʼana (Juan 1:40-45). w20.10 16 párr. 7-9

Ta̱ José xíʼin ñá María chi̱ndeétáʼanna xíʼin ta̱ Jesús ña̱ sa̱kúsi̱íra-ini Ndióxi̱, saáchi xi̱ndiku̱nna ña̱ ni̱ka̱ʼa̱n Jehová xíʼin na̱ íyo se̱ʼe (Deut. 6:6, 7). U̱vi̱ saána xi̱kuʼvi̱ní-inina xi̱xinina Jehová ta ña̱ xi̱ndayáʼvika nu̱úna kúú ña̱ chindeétáʼanna xíʼin se̱ʼena ña̱ kuʼvi̱-inina kuninara. Ta̱ José xíʼin ñá María nda̱kaxinna ña̱ viíní sanáʼa̱na se̱ʼena xa̱ʼa̱ Ndióxi̱, ndiʼi semana xi̱xa̱ʼa̱nna sinagoga ña̱ ni̱xi̱yo ñuu Nazaret ta ndiʼi ku̱i̱ya̱ xi̱xa̱ʼa̱nna chí ñuu Jerusalén ña̱ va̱ʼa keʼéna ña̱ Pascua (Luc. 2:41; 4:16). Sana tá xi̱xa̱ʼa̱nna chí ñuu Jerusalén xi̱sanáʼa̱na ta̱ Jesús xíʼin inkaka se̱ʼena xa̱ʼa̱ ña̱ ndo̱ʼo na̱ ñuu Jehová. Ta tá xi̱xa̱ʼa̱nna chí yichi̱ xi̱yaʼana lugar ña̱ káʼa̱n Biblia xa̱ʼa̱. Tá ndu̱ku̱a̱ʼáka se̱ʼena i̱xayo̱ʼvi̱ña xíʼin ta̱ José xíʼin ñá María ña̱ keʼéna ña̱yóʼo. Soo ku̱a̱ʼání ña̱ va̱ʼa nda̱kiʼinna xa̱ʼa̱ ña̱ ni̱ndi̱ʼi̱ka-inina nda̱sakáʼnuna Jehová, saáchi miína xíʼin se̱ʼena va̱ʼa xi̱kitáʼanna xíʼinra. w20.10 28 párr. 8, 9

Tá ná ku̱ʼu̱nyó xíʼin iin na̱ hermano ña̱ kaʼvina xíʼin na̱ yiví, xa̱a̱ ya̱chi̱ka ná sakúaʼa kúeeyó xa̱ʼa̱ ña̱ kaʼvina. Iin ta̱ precursor especial ta̱ naní Dorín, káchira: “Kúsi̱íní-inii̱ tá xa̱a̱ sákuaʼa kúee na̱ ku̱a̱ʼa̱n xíʼi̱n xa̱ʼa̱ ña̱ kaʼvindi̱. Chi saá kivi chindeétáʼanna xíʼin na̱ káʼvii̱ xíʼin”. Ta saátu va̱ʼaní yichi̱ chinúuyó nu̱ú na̱ káʼvina xíʼin, chi kiʼinna kuenta ña̱ u̱vi̱ saáyó xa̱a̱ káʼvi kúeeyó xa̱ʼa̱ ña̱ sanáʼa̱yóna. Ni tá va̱ása kívi viíní kaʼviyó iin lección, ná taváyó tiempo ña̱ kotoyó ndáaña kúú ña̱ ndáyáʼvi va̱ʼaka va̱xi nu̱úña. Ndáyáʼviní keʼéyó oración tá káʼviyó xíʼin na̱ yiví, ña̱kán xa̱a̱ ya̱chi̱ka ná ndakanixi̱níyó ndáaña ka̱ʼa̱nyó xíʼin Ndióxi̱ tá ná ka̱ʼa̱nna xíʼinyó keʼéyó iin oración. Saá kúú ña̱ káxiníka koo ña̱ ka̱ʼa̱nyó (Sal. 141:2). Iin ñá hermana ñá íyo chí Japón ñá naní Hanae, ndákaʼánñá xa̱ʼa̱ oración ña̱ xi̱keʼé iin ñá hermana ñá xi̱xa̱ʼa̱n xíʼin ñá xi̱sanáʼa̱-ñaʼá. Ñáyóʼo káchiñá: “Xi̱kiʼi̱n kuenta ña̱ va̱ʼaní xi̱kitáʼanñá xíʼin Jehová, ta xi̱kuni̱i̱ koi̱ nda̱a̱ táki̱ʼva íyoñá. Ta saátu, tá xi̱ka̱ʼa̱nñá ki̱víi̱ ti̱xin oración xi̱kunda̱a̱-inii̱ ña̱ kúʼvi̱ní-iniñá xíniñá yi̱ʼi̱”. w21.03 9, 10 párr. 7, 8

Nda̱a̱ táki̱ʼva xa̱a̱ ku̱ndaa̱-iniyó, tá ku̱i̱ya̱ 56 ta̱ Jesús ni̱ka̱ʼa̱nra xíʼin ta̱ apóstol Pablo ña̱ xa̱a̱vara ñuu Roma. Soo sava na̱ judío na̱ ni̱xi̱yo Jerusalén xi̱kuni̱na kaʼnínara. Tá ku̱nda̱a̱-ini ta̱ xi̱ndisochíñu xíʼin na̱ soldado ña̱ ñuu Roma ta̱ Claudio Lisias xa̱ʼa̱ ña̱yóʼo, chi̱ndeétáʼanra xíʼinra. Kama chi̱ndaʼára ku̱a̱ʼání na̱ soldado ña̱ ku̱ʼu̱nna xíʼin ta̱ Pablo chí ñuu Cesarea. Tá ni̱xa̱a̱na kán ta̱ chíñu Félix “xa̱ʼndara chiñu ña̱ ná chika̱a̱nara veʼe nu̱ú xáʼndachíñu ta̱ Herodes ta kundaanara”. Tasaá ni̱ka̱ku ta̱ Pablo nu̱ú na̱ xi̱kuni̱ kaʼní-ñaʼá (Hech. 23:12-35). Ta̱ Festo nda̱kiʼinra chiñu nu̱ú ta̱ Félix ta ki̱xáʼara xáʼndachíñura. Xa̱ʼa̱ ña̱ xi̱kuni̱ ta̱ Festo ki̱ndo̱o va̱ʼara xíʼin na̱ judío ni̱nda̱ka̱tu̱ʼunra ta̱ Pablo: “¿Á kuni̱ún ku̱ʼún chí ñuu Jerusalén ña̱ va̱ʼa ndasaviíyó ku̱a̱chi yóʼo xa̱ʼún?”. Ta̱ apóstol Pablo xi̱kunda̱a̱-inira ña̱ sana kaʼnívanara tá ná ku̱ʼu̱nra ñuu Jerusalén. Ña̱kán ni̱ka̱ʼa̱nra ña̱yóʼo xíʼin ta̱ Festo: “Kúni̱i̱ ku̱ʼi̱n ña̱ ná tiin ta̱ Cesar ku̱a̱chi xíʼi̱n”. Saá nda̱kuiin ta̱ Festo yuʼú ta̱ Pablo, ta ka̱chira: “Ni̱ka̱ʼún ña̱ kúni̱ún ndatiin ta̱ César ku̱a̱chi xíʼún, ta va̱ʼa ku̱ʼu̱nvaún nu̱úra” (Hech. 25:6-12). w20.11 13 párr. 4; 14 párr. 8-10

Ndiʼiyó kivi chika̱a̱yó ku̱a̱chi miíyó xa̱ʼa̱ ña̱ va̱ása va̱ʼa ke̱ʼéyó. Sana ke̱ʼéyóña tá kúma̱ní xa̱a̱yó sakúaʼayó xa̱ʼa̱ ña̱ nda̱a̱ á sanatu ke̱ʼéyóña tá xa̱a̱ nda̱kuchiyó (Rom. 3:23). Ni chíka̱a̱nívayó ndee̱ ña̱ keʼéyó ña̱ va̱ʼa, ndiʼiyó “kéʼéyó ña̱ va̱ása va̱ʼa” (Sant. 3:2; Rom. 7:21-23). Va̱ása va̱ʼa kúniyó tá chíka̱a̱yó ku̱a̱chi miíyó xa̱ʼa̱ ña̱ va̱ása va̱ʼa ke̱ʼéyó, soo ña̱yóʼo kivi chindeétáʼanña xíʼinyó. ¿Nda̱chun? Saáchi kivi chindeétáʼanña xíʼinyó ña̱ nasamayó ña̱ kéʼéyó, ta saátu ña̱ chika̱a̱-iniyó ña̱ va̱ása ndikóyó keʼéyóña (Heb. 12:12, 13). Sana ndákanixi̱níyó ña̱ kúúmiíkayó ku̱a̱chi ni xa̱a̱ nda̱ndikó-iniyó ta ni xa̱a̱ ni̱na̱ʼa̱ Jehová ña̱ i̱xakáʼnu-inira xa̱ʼa̱yó. Soo xa̱ʼa̱ ña̱ chíka̱a̱níyó ku̱a̱chi miíyó sáxo̱ʼvi̱yó miíyó (Sal. 31:10; 38:3, 4). Ná va̱ása chika̱a̱níyó ku̱a̱chi miíyó xa̱ʼa̱ ña̱ va̱ása va̱ʼa ke̱ʼéyó. Saáchi ta̱ Ndi̱va̱ʼa kusi̱íní-inira tá ná sandákooyó kachíñuyó nu̱ú Jehová, ni xa̱a̱ i̱xakáʼnu-inira xa̱ʼa̱yó (chitáʼanña xíʼin 2 Corintios 2:5-7, 11). w20.11 27 párr. 12, 13

Ta̱ levita ta̱ ka̱ʼyí iin salmo xi̱kuni̱ra kuumiíra táʼan ña̱ kúúmií na̱ yiví na̱ ndi̱va̱ʼa-ini á na̱ ni̱nu kúni. Su̱ví ña̱ va̱ása va̱ʼa ña̱ xi̱keʼéna kúú ña̱ xi̱kuni̱ra keʼéra, soo xi̱ndakanixi̱níra ña̱ va̱ʼaníka ña̱ xi̱kuumií na̱kán (Sal. 73:2-9, 11-14). Chi xi̱kuumiína ña̱ ku̱i̱ká, si̱í ni̱xi̱yo inina ta kǒo ña̱ níxisandi̱ʼi̱-inina. Ta̱ levita yóʼo xi̱niñúʼu ndakanixi̱níra nda̱a̱ táki̱ʼva ndákanixi̱ní Jehová. Tá ke̱ʼéra ña̱yóʼo táxi̱n ni̱xi̱yo inira ta ku̱si̱í-inira. Ña̱yóʼo ni̱ka̱ʼa̱nra xíʼin Jehová: “Va̱ása kúni̱i̱ nda̱a̱ ni iin ña̱ʼa ña̱ íyo nu̱ú ñuʼú yóʼo, chi iinlá yóʼó kúni̱i̱” (Sal. 73:25). Ta saátu miíyó ná va̱ása kuni̱yó kuumiíyó táʼan ña̱ kúúmií na̱ kéʼé ña̱ va̱ása va̱ʼa. Sana kivi ndakanixi̱níyó ña̱ si̱íní íyo na̱yóʼo soo su̱ví ndiʼi tiempo koona saá (Ecl. 8:12, 13). Tá ná kixáʼayó kuni̱yó kuumiíyó ña̱ʼa ña̱ kúúmií na̱yóʼo, kivi ndakava-iniyó ta kuxíkayó nu̱ú Jehová. Ña̱kán, tá ná ndoʼoyó nda̱a̱ táki̱ʼva ndo̱ʼo ta̱ levita, ná keʼéyó ña̱ ke̱ʼé ta̱yóʼo: ná kundiku̱nyó consejo ña̱ táxi Ndióxi̱ ndaʼa̱yó, ta ná kutáʼanyó xíʼin na̱ káchíñu nu̱úra. Tá ná kuʼvi̱ka-iniyó kuni̱yó Jehová nu̱ú inkaka ña̱ʼa saá kúú ña̱ ndixa si̱íní kooyó, ta ndakundeéyó ku̱ʼu̱nyó chí yichi̱ ña̱ taxi ña̱ kutakuyó ndiʼi tiempo (1 Tim. 6:19). w20.12 19, 20 párr. 14-16

Tá ná ka̱ʼún xíʼin Jehová xa̱ʼa̱ ña̱ sándi̱ʼi̱-iniún, xíniñúʼu ndakanixi̱níún xa̱ʼa̱ ña̱ va̱ʼa ña̱ kúúmiíún ni íyoní tu̱ndóʼo nu̱ún, ta taxiún tíxa̱ʼvi ndaʼa̱ra xa̱ʼa̱ ña̱yóʼo. Sava yichi̱ ixayo̱ʼvi̱ña xíʼún ña̱ ndani̱ʼún tu̱ʼun ña̱ ka̱ʼún xíʼinra xa̱ʼa̱ ña̱ ndóʼún. Soo ndakaʼún ña̱ ndakuiinva Jehová oración ña̱ kéʼún nu̱úra, ni ña̱yóʼo kuití ná ka̱ʼún: “Ixaún ña̱ ma̱ní, chindeétáʼún xíʼi̱n” (2 Crón. 18:31). Kandíxa Jehová ta va̱ása kandíxaún miíún. Tá tiempo ña̱ ni̱xi̱yo ta̱ Profeta Isaías, na̱ ñuu Judá xi̱yiʼvínína ña̱ kanitáʼan na̱ ñuu Asiria xíʼinna tasaá xa̱a̱na kachíñu ndáʼvina nu̱úna, ña̱kán ni̱ka̱ʼa̱nna xíʼin na̱ ñuu Egipto ña̱ ná chindeétáʼanna xíʼinna (Is. 30:1, 2). Soo, Jehová ni̱ka̱ʼa̱nra xíʼinna ña̱ tá ná keʼéna ña̱yóʼo ndiʼi-xa̱ʼa̱na (Is. 30:7, 12, 13). Jehová xi̱niñúʼura ta̱ Isaías ña̱ va̱ʼa ka̱ʼa̱nra xíʼin na̱ ñuura ndáaña xi̱niñúʼu keʼéna ña̱ va̱ʼa ka̱kuna. Ta̱ Isaías ni̱ka̱ʼa̱nra ña̱yóʼo: “Xa̱a̱ndó ndakú koo inindó tá kándíxandó yi̱ʼi̱ ta táxi̱n íyo inindó” (Is. 30:15b). w21.01 3 párr. 8, 9

Na̱ nda̱kaxin Ndióxi̱ xa̱a̱na koona rey ta saátu koona su̱tu̱ xíʼin ta̱ Cristo chí ndiví, xa̱ʼa̱ ña̱ nda̱kúní ni̱xi̱yo inina (Apoc. 20:6). Jehová, ta̱ Jesús xíʼin na̱ ángel kusi̱íní-inina tá ná ndakiʼin na̱ 144,000 ña̱ kutakuna chí ndiví. Ta̱ apóstol Juan, siʼna ni̱ka̱ʼa̱nra xa̱ʼa̱ na̱ 144,000 ña̱ kúúna rey ta saátu su̱tu̱, tándi̱ʼi xi̱nira inkakana: xi̱nira ku̱a̱ʼání na̱ yiví na̱ ni̱ka̱ku ti̱xin Armagedón. Soo na̱yóʼo ku̱a̱ʼáníka kúúna nu̱ú na̱ siʼna xi̱nira ta va̱ása kúnda̱a̱-iniyó nda̱saa kúúna (Apoc. 7:9, 10). Ta “ndíxina ti̱ko̱to̱ káni̱ ña̱ yaa”, ña̱yóʼo kúni̱ káchiña ña̱ kǒo níkeʼéna táʼan ña̱ kéʼé na̱ ñuyǐví ta̱ Ndi̱va̱ʼa, ta nda̱kú ni̱xi̱yo inina xíʼin Ndióxi̱ ta saátu xíʼin ta̱ Cristo (Sant. 1:27). Ndeéní káʼa̱nna ña̱ ni̱ka̱kuna tíxa̱ʼvi ña̱ ke̱ʼé Jehová, ta saátu ta̱ Jesús ta̱ kúú ndikachi kuenta Ndióxi̱. Ta saátu níʼina yu̱ku̱ ndaʼa̱ tú palmera, xíʼin ña̱yóʼo náʼa̱na ña̱ ndákunina ta̱ Jesús ña̱ kúúra rey ta̱ nda̱kaxin Jehová (chitáʼanña xíʼin Juan 12:12, 13). w21.01 15, 16 párr. 6, 7

Iin ta̱a kivi vií kuniʼira yichi̱ nu̱ú na̱ veʼera tá ná sakuaʼara xíʼin ki̱ʼva ña̱ níʼi Jehová ta saátu ta̱ Jesús yichi̱ nu̱úyó. Nu̱ú iníísaá ñuyǐví Jehová kúú ta̱ ndíchiní, soo ni saá xíniso̱ʼovara ña̱ káʼa̱n na̱ káchíñu nu̱úra (Gén. 18:23, 24, 32). Ndiʼi ña̱ kéʼé Jehová va̱ʼaní íyoña saáchi va̱ása kúúmiíra ku̱a̱chi, soo kúnda̱a̱-inira ña̱ va̱ása kivi keʼéyó nda̱a̱ táki̱ʼva kéʼé miíra saáchi na̱ yiví ku̱a̱chi kúúyó. Ña̱kán chíndeétáʼanra xíʼinyó ña̱ vií ná kana ndiʼi ña̱ kéʼéyó ni kúúyó na̱ yiví ku̱a̱chi (Sal. 113:6, 7). Nu̱ú Biblia va̱xi ña̱ ni̱ka̱ʼa̱n ta̱ David xíʼin Jehová: “Yóʼó kúú ta̱ chíndeétáʼan xíʼi̱n” (Sal. 27:9; Heb. 13:6). Ta̱ rey David xi̱kunda̱a̱-inira ña̱ ku̱chiñura ke̱ʼéra ku̱a̱ʼání ña̱ʼa tíxa̱ʼvi ña̱ vitá íyo ini Jehová, ta chi̱ndeétáʼanra xíʼinra. Ná ka̱ʼa̱nyó xa̱ʼa̱ ña̱ ke̱ʼé ta̱ Jesús. Ni xi̱kuura se̱ʼe Ndióxi̱ ta xi̱sanáʼa̱ra na̱ discípulora, soo ni saá nda̱katara xa̱ʼa̱na. Ta̱ Jesús ni̱ka̱ʼa̱nra ña̱yóʼo: “Yi̱ʼi̱ sa̱ndákoi̱ yichi̱ nu̱úndó ña̱kán va̱ʼa keʼéndó nda̱a̱ táki̱ʼva ke̱ʼíi̱ xíʼinndó” (Juan 13:12-17). Ni káʼnuní chiñu xi̱kuumií ta̱ Jesús va̱ása níndakanixi̱níra ña̱ xíniñúʼu kachíñu inkana nu̱úra, chi ña̱ ke̱ʼéra kúú ña̱ ka̱chíñura xa̱ʼa̱ inkana (Mat. 20:28). w21.02 3, 4 párr. 8-10

Ndóʼó na̱ ta̱a válí, íyo ku̱a̱ʼání chiñu ña̱ kivi keʼéndó. Ta ku̱a̱ʼání ndóʼó íyoní ndee̱ndó. Ta va̱ʼaní chíndeétáʼanndó xíʼin na̱ hermano na̱ íyo ti̱xin congregación. Sana ku̱a̱ʼání ndóʼó kúni̱ndó xa̱a̱ndó koondó siervo ministerial. Soo sana savandó ndákanixi̱níndó ña̱ inkana túvina ña̱ válíníndó ta ni va̱ása xíni̱ndó keʼéndó iin chiñu ña̱ ndáyáʼviní. ¿Á saá íyo ña̱ ndákanixi̱níún? Ni loʼovaún, soo íyo ku̱a̱ʼání ña̱ kivi keʼún ña̱ va̱ʼa xa̱a̱ na̱ hermano na̱ íyo ti̱xin congregación kundaa-inina yóʼó ta ixato̱ʼóna yóʼó. Ku̱a̱ʼání na̱ ta̱a válí, xíni̱na keʼéna sava ña̱ʼa ña̱ kivi chindeétáʼan xíʼin na̱ hermano na̱ íyo ti̱xin congregación. Tá kúu, sava na̱ hermano na̱ xa̱a̱ chée kúsi̱íní-inina tá sánáʼa̱nana ña̱ kuniñúʼuna tableta á inkaka ña̱ʼa ña̱ va̱ʼa kaʼvi iinlá miína á ña̱ kuniñúʼuna ña̱yóʼo ti̱xin reunión. Ta xa̱ʼa̱ ña̱ va̱ʼaní xíni̱ún kuniñúʼún ña̱ʼa yóʼo, va̱ʼaní chindeétáʼún xíʼin na̱ hermano na̱ xa̱a̱ chée. Chika̱a̱níún ndee̱ tá kéʼún nda̱a̱ ndáaka chiñu ña̱ va̱ʼa sakúsi̱íún-ini yiváún ta̱ íyo chí ndiví. w21.03 2 párr. 1, 3; 7 párr. 18

Ni xíni̱níka iin ñá hermana nu̱ú yiíñá, soo miíra kúú ta̱ xíniñúʼu chindeétáʼan xíʼin na̱ veʼera ña̱ ndasakáʼnuna Ndióxi̱, tá kúú ña̱ kaʼvira xíʼinna ndiʼi semana (Efes. 6:4). Ñáyóʼo xíniñúʼu ixato̱ʼóñá chiñu ña̱ ta̱xi Ndióxi̱ ndaʼa̱ yiíñá, soo miíñá kúú ña̱ xíniñúʼu chika̱a̱ ndee̱ ña̱ ndasandakúñá ña̱ kándíxañá Ndióxi̱. Ña̱kán xíniñúʼu taváñá tiempo ña̱ kaʼvi iinlá miíñá ta ndakanixi̱níñá xa̱ʼa̱ ña̱ káʼviñá. Ña̱yóʼo chindeétáʼanña xíʼinñá ña̱ ndakundeéñá kuʼvi̱-iniñá kuniñá Jehová ta ixato̱ʼóñára, ta kusi̱í-iniñá xa̱ʼa̱ ña̱ níʼi yiíñá yichi̱ nu̱úñá. Tá xa̱ʼa̱ ña̱ kúʼvi̱-ini ná ñaʼá xíniná Jehová kúú ña̱ íxato̱ʼóná chiñu ña̱ kúúmií yiíná, si̱íníka kooná nu̱ú ná va̱ása xíín ixato̱ʼó chiñu yóʼo. Ta saátu, va̱ʼaní yichi̱ chínúuná nu̱ú na̱ kúa̱an, ta chíndeétáʼanná xíʼin na̱ veʼená ta saátu xíʼin na̱ congregación ña̱ vií kutáʼanna ta kuʼvi̱-inina kunitáʼanna (Tito 2:3-5). Tiempo vitin ku̱a̱ʼáníka kúú ná ñaʼá ná ndásakáʼnu Jehová (Sal. 68:11). w21.02 13 párr. 21-23

Va̱ʼaní yichi̱ sa̱ndákoo ta̱ apóstol Pablo nu̱úyó, saáchi ndakú ni̱xi̱yo inira ta ku̱ndeé-inira. Ni sava yichi̱ va̱ása níxi̱yo ndee̱ra soo ku̱chiñura ku̱ndeé-inira, saáchi ka̱ndíxara ña̱ taxi Jehová ndee̱ ndaʼa̱ra (2 Cor. 12:8-10; Filip. 4:13). Ta saátu miíyó kivi koo ndee̱yó ta ndakú koo iniyó, tá vitá íyo iniyó ta ndákuniyó ña̱ xíniñúʼu chindeétáʼan Jehová xíʼinyó (Sant. 4:10). Kivi kandíxayó ña̱ su̱ví castigo Jehová kúú tu̱ndóʼo ña̱ yáʼayó nu̱ú. Ta̱ discípulo Santiago ka̱chira: “Tá yáʼa iinna nu̱ú tu̱ndóʼo ná kǒo ka̱ʼa̱nna: ‘Ndióxi̱ xítondosó yi̱ʼi̱ʼ. Saáchi Ndióxi̱ kǒo xítondosóra nda̱a̱ ni iin na̱ yiví xíʼin tu̱ndóʼo, ta nda̱a̱ ni iinna va̱ása kívi kotondosó Ndióxi̱” (Sant. 1:13). Tá kándíxayó ña̱yóʼo kuyatinkayó nu̱ú yiváyó ta̱ íyo chí ndiví. Jehová “va̱ása nása̱mara” (Sant. 1:17). Nda̱a̱ táki̱ʼva chi̱ndeétáʼanra xíʼin na̱ hermano na̱ ni̱xi̱yo tá siglo nu̱ú ña̱ ku̱ndeé-inina nu̱ú tu̱ndóʼo, saátu chindeétáʼanra xíʼin iin tá iinyó tiempo vitin. Ná ka̱ʼa̱n ndáʼviyó xíʼin Jehová ña̱ taxira ña̱ ndíchi ndaʼa̱yó, ña̱ chindeétáʼanra xíʼinyó ña̱ kandíxakayóra, ta saátu ña̱ ndakú koo iniyó. Jehová ndakuiinra oración ña̱ kéʼéyó nu̱úra. w21.02 31 párr. 19-21

Kivi chika̱a̱yó ndee̱ xíʼin na̱ sa̱kán sákuaʼa xa̱ʼa̱ Ndióxi̱ tá ná kundi̱ʼi̱-iniyó xa̱ʼa̱na tá xáʼa̱nna reunión (Filip. 2:4). Ná nda̱ka̱tu̱ʼunyóna xa̱ʼa̱ na̱ veʼena, xa̱ʼa̱ chiñuna, ta saátu ndáaña ndákanixi̱nína xa̱ʼa̱ ña̱ sákuaʼana nu̱ú Biblia, soo ná kiʼinyó kuenta ña̱ va̱ása sakúkaʼanyó nu̱úna. Kivi ka̱ʼa̱nyó xíʼinna ña̱ kúsi̱íní-iniyó xa̱ʼa̱ ña̱ na̱samana sava ña̱ kéʼéna. Saá kúú ña̱ kivi xa̱a̱yó kooyó migona ta chindeétáʼanyó xíʼinna ña̱ kuaʼnuna xíʼin tu̱ʼun Ndióxi̱ ta ndakuchina. Tá ku̱a̱ʼa̱n xáʼnuka iin na̱ yiví xíʼin tu̱ʼun Ndióxi̱ ná chika̱a̱yó ndee̱ ña̱ chindeétáʼanyó xíʼinna ña̱ kunda̱a̱-inina ña̱ kúúna táʼan na̱ congregación. Iin ki̱ʼva ña̱ keʼéyó ña̱yóʼo kúú ña̱ na̱ʼa̱yó ña̱ va̱ʼa íyo iniyó xíʼinna (Heb. 13:2). Tá xáa̱ iin na̱ yiví ndúuna publicador kivi ka̱ʼa̱nyó xíʼinna ña̱ ku̱ʼu̱nna xíʼinyó natúʼunyó xa̱ʼa̱ Ndióxi̱. Iin ta̱ hermano ta̱ íyo chí Brasil ta̱ naní Diego káchira: “Ku̱a̱ʼání na̱ hermano xi̱ka̱ʼa̱nna xíʼi̱n ña̱ ku̱ʼi̱n xíʼinna ña̱ natúʼunndi̱ xa̱ʼa̱ Ndióxi̱. Ña̱yóʼo chi̱ndeétáʼanña xíʼi̱n ña̱ kuxini̱kai̱na. Ku̱a̱ʼání ña̱ sa̱kuaʼi̱ xíʼin ña̱yóʼo ta ku̱yatinkai̱ nu̱ú Jehová xíʼin ta̱ Jesús”. w21.03 12 párr. 15, 16

Ta̱ Jesús ni̱ka̱ʼa̱nra xíʼinyó ña̱ xíniñúʼu kuʼvi̱-iniyó kuniyó na̱ íyo contra xíʼinyó (Mat. 5:44, 45). Yo̱ʼvi̱va keʼéyó ña̱yóʼo, soo tá ná chindeétáʼan espíritu santo Ndióxi̱ xíʼinyó kuchiñuvayó keʼéyóña. Ña̱ va̱ʼa ña̱ kúúmií espíritu chindeétáʼanña xíʼinyó ña̱ kundeé-iniyó tá sáa̱-inina xínina miíyó, tá kúú, ña̱ kuʼvi̱-iniyó kuniyó inkana, ña̱ kúee koo iniyó, ña̱ va̱ʼa koo iniyó, ña̱ vitá koo iniyó ta saátu ña̱ ka̱ʼnu̱-iniyó (Gál. 5:22, 23). Ku̱a̱ʼánína va̱ása sásikana nu̱ú inkana ña̱ ndasakáʼnuna Ndióxi̱ saáchi ñá síʼína, á yiína á se̱ʼena á iin na̱ íyo yatin xíʼinna ni̱na̱ʼa̱na táʼan ña̱ va̱ʼa yóʼo. Ta ku̱a̱ʼánína nda̱a̱ ni̱xa̱a̱na ndu̱una testigo Jehová. Ña̱kán tá íxayo̱ʼvi̱níña xíʼinyó ña̱ kuʼvi̱-iniyó kuniyó na̱ sáa̱-ini xíni miíyó xa̱ʼa̱ ña̱ kándíxayó Ndióxi̱, ná ndukúyó espíritu santo nu̱ú Jehová (Luc. 11:13). Ta ná va̱ása kaka-iniyó: ña̱ va̱ʼaníka kúú ña̱ tá ndiʼi tiempo kéʼéyó ña̱ káʼa̱n Ndióxi̱ (Prov. 3:5-7). Ña̱ sáa̱-inina xínina miíyó ndakúvaña saáchi kivi saxóʼvi̱ña miíyó, soo ña̱ kúʼvi̱-iniyó xíniyó inkana ndakúníkava ña̱yóʼo, saáchi kivi xa̱a̱ña nda̱a̱ níma̱ na̱ yiví, ta nasamana ña̱ kéʼéna. Tá náʼa̱yó ña̱ kúʼvi̱-iniyó xíniyó inkana sákusi̱íyó-ini Jehová. Ni ná ndakundeéna sa̱a̱-inina kunina miíyó kiviva ndakundeéyó kusi̱í-iniyó. w21.03 23 párr. 13; 24 párr. 15, 17

Ta̱ profeta Joel ni̱ka̱ʼa̱nra xa̱ʼa̱ ña̱ kanitáʼan na̱ soldado (Joel 2:1, 8, 11). Jehová ni̱ka̱ʼa̱nra ña̱ kuniñúʼura na̱ soldado ña̱ ñuu Babilonia, ña̱ taxira castigo ndaʼa̱ na̱ ñuu Israel na̱ va̱ása níxiniso̱ʼo (Joel 2:25). Káʼa̱nña ña̱ na̱ soldado yóʼo va̱xina chí norte, saáchi chí kán kúú nu̱ú kixi na̱ ñuu Babilonia ña̱ kanitáʼanna xíʼin na̱ ñuu Israel (Joel 2:20). Ña̱ profecía yóʼo chítáʼanña na̱ soldado xíʼin ku̱a̱ʼání tí ti̱ka náʼnu tí viíní kítáʼan. Ta̱ Joel káʼa̱nra ña̱yóʼo xa̱ʼa̱ na̱ soldado: “Iin tá iinna ku̱a̱ʼa̱nna yichi̱ nu̱ú xíniñúʼu ku̱ʼu̱nna. [...] Ku̱a̱ndaana sa̱tá veʼe, kíʼvina chí ventana nda̱a̱ táki̱ʼva kéʼé iin na̱ kui̱ʼná” (Joel 2:8, 9). ¿Á kivi ndakanixi̱níyó xa̱ʼa̱ ña̱yóʼo? Iníí xíka na̱ soldado, kǒo nu̱ú kivi chi̱se̱ʼé na̱ yiví miína. Ta nda̱a̱ ni iinna va̱ása kivi ka̱ku nu̱ú espada na̱ ñuu Babilonia. Nda̱a̱ táki̱ʼva kéʼé tí ti̱ka náʼnu, saá ke̱ʼé na̱ ñuu Babilonia á na̱ caldeo tá ni̱ki̱ʼvina ña̱ ñuu Jerusalén tá ku̱i̱ya̱ 607 tiempo xi̱naʼá. Ña̱ Biblia káʼa̱nña xa̱ʼa̱ ña̱ ke̱ʼé ta̱ rey na̱ caldeo ña̱ ñuu kán, káchiña: “Va̱ása níkundáʼvi-inira kunira na̱ va̱lí ni ná ñaʼá ná kúa̱an, ni na̱ xi̱ku̱aʼa ta ni na̱ vitá kúni” (2 Crón. 36:17). w20.04 5 párr. 11, 12