Febrero

Ná kuxini̱ va̱ʼayó na̱ hermano. Ná natúʼunyó xíʼin na̱ hermanoyó tá kúma̱níka kixáʼa reunión ta saátu tá xa̱a̱ ndi̱ʼiña, ná keeyó natúʼunyó xa̱ʼa̱ Ndióxi̱ xíʼinna, ta tá kivi ná kanayóna ña̱ ku̱ʼu̱nna kuxuna xíʼinyó. Tá ná keʼéyó ña̱yóʼo, sana kivi kunda̱a̱-iniyó ña̱ iin ñá hermana ñá va̱ása kútóo natúʼun su̱ví ndixa saá íyoñá chi ñá kúkaʼan nu̱úva kúúñá, á iin ta̱ hermano ta̱ kúúmií ku̱a̱ʼání xu̱ʼún su̱ví ta̱ kútóo kuumií ku̱a̱ʼání ña̱ʼa kúúra chi ta̱ va̱ʼa-iniva kúúra, á iin ñá hermana ñá kíxaa̱ xi̱ku̱aání reunión xíʼin na̱ va̱lí se̱ʼeñá chi va̱ása táxi na̱ veʼena keʼéna ña̱yóʼo (Job 6:29). Ña̱ nda̱a̱ kúú ña̱ va̱ása xíniñúʼu kunda̱a̱-iniyó xa̱ʼa̱ ndiʼi ña̱ ndóʼo na̱ hermano (1 Tim. 5:13). Soo tá ná kunda̱a̱-iniyó xa̱ʼa̱ sava ña̱ ndo̱ʼona, saá kúú ña̱ kivi kunda̱a̱-iniyó nda̱chun kéʼéna sava ña̱ʼa. Tá ná kuxini̱ va̱ʼayó na̱ hermano na̱ sása̱a̱ miíyó sava yichi̱, kivi kunda̱a̱ka-iniyó ndáa ki̱ʼva íyona. Kivi ixayo̱ʼvi̱ña xíʼinyó ña̱ keʼéyó ña̱yóʼo. Soo tá ndíku̱nyó consejo ña̱ táxi Biblia, ña̱ ndakunáyó níma̱yó nu̱ú inkana á ña̱ kuxini̱yóna, ndíku̱nyó yichi̱ Jehová chi kúʼvi̱-inira xínira ndiʼi na̱ yiví (1 Tim. 2:3, 4; 2 Cor. 6:11-13). w20.04 16, 17 párr. 10-12

Ñuú tá kúma̱ní kuvi ta̱ Jesús sa̱ndákaʼánra na̱ discípulora ña̱ xíniñúʼu kuʼvi̱-inina kunitáʼanna. Saáchi xi̱kunda̱a̱-inira ña̱ chindeétáʼanña xíʼinna ña̱ inkáchi kutáʼanna ta kundeé-inina tá ná sa̱a̱-ini na̱ ñuyǐví yóʼo kuninana. Ná ndakanixi̱níyó xa̱ʼa̱ ña̱ ndo̱ʼo na̱ congregación na̱ ni̱xi̱yo ñuu Tesalónica, nani tá ki̱xáʼana sákuaʼana xa̱ʼa̱ Ndióxi̱ saáví ki̱xáʼa na̱ yiví íxandi̱va̱ʼana xíʼinna. Na̱ hermano kán va̱ʼaní yichi̱ sa̱ndákoona nu̱úyó xa̱ʼa̱ ña̱ ni̱kuʼvi̱-inina xi̱nitáʼanna, ta saátu xa̱ʼa̱ ña̱ ku̱ndeé-inina nu̱ú tu̱ndóʼo (1 Tes. 1:3, 6, 7). Ta̱ Pablo ni̱ka̱ʼa̱nra xíʼinna ña̱ ná ndakundeéna na̱ʼa̱kana ña̱ kúʼvi̱-inina xínitáʼanna (1 Tes. 4:9, 10). Ta ña̱yóʼo chindaʼáñana ña̱ sandíkona-ini na̱ kúsuchí-ini ta chindeétáʼanna xíʼin na̱ ndákava-ini (1 Tes. 5:14). Ta ke̱ʼévana ña̱ ni̱ka̱ʼa̱n ta̱ Pablo, saáchi tá ni̱ya̱ʼa iin ku̱i̱ya̱, nu̱ú carta ña̱ u̱vi̱ ña̱ chi̱ndaʼára ndaʼa̱na ni̱ka̱ʼa̱nra ña̱yóʼo: “Ña̱ kúʼvi̱-inindó xínitáʼanndó ku̱a̱ʼa̱n xáʼnuníka ña̱yóʼo” (2 Tes. 1:3-5). Xa̱ʼa̱ ña̱ ni̱kuʼvi̱-inina xi̱nitáʼanna chi̱ndeétáʼanña xíʼinna ña̱ ku̱ndeé-inina nu̱ú tu̱ndóʼo, ta saátu tá i̱xandi̱va̱ʼa na̱ yiví xíʼinna. w21.03 22 párr. 11

Tá kúni̱yó ndakiʼinyó ña̱ kutakuyó ndiʼi tiempo, xíniñúʼu kutakuyó nda̱a̱ táki̱ʼva xíniñúʼu kutaku na̱ ndásakáʼnu Ndióxi̱ (Hech. 20:24; 1 Ped. 2:21). Soo ta̱ Ndi̱va̱ʼa xíʼin na̱ yiví na̱ kítáʼan xíʼinra, kúni̱na ña̱ miíyó na̱ ndásakáʼnu Ndióxi̱ ná kitayó yichi̱ nu̱ú ku̱a̱ʼa̱nyó ta ndakutáʼanyó xíʼinna (1 Ped. 4:4). Kúsi̱kindaana ki̱ʼva íyo ña̱ tákuyó, ta káʼa̱nna ña̱ va̱ʼaníka tákuna chi kéʼéna ña̱ kúni̱ miína. Soo iin ña̱ vatá kúú ña̱yóʼo (2 Ped. 2:19). Ndáyáʼviní ña̱ vií ná ndaka̱xinyó yichi̱ nu̱ú ku̱ʼu̱nyó. Ta̱ Ndi̱va̱ʼa kúni̱ra ña̱ ná sandákooyó yichi̱ táñu ña̱ taxi ña̱ kutakuyó, tá ná ku̱ʼu̱nyó chí yichi̱ ndíka̱ nu̱ú ku̱a̱ʼa̱n ku̱a̱ʼání na̱ yiví na̱ íyo ñuyǐví yóʼo. Va̱ása yo̱ʼvi̱ví ku̱ʼu̱nyó ña̱ yichi̱ ndíka̱ yóʼo, soo yóʼo kúú nu̱ú ku̱a̱ʼa̱n na̱ ndiʼi-xa̱ʼa̱ (Mat. 7:13, 14). Tá va̱ása kúni̱yó ña̱ ná tavána miíyó yichi̱ nu̱ú ku̱a̱ʼa̱nyó, xíniñúʼu kandíxayó Jehová ta kuniso̱ʼoyó ndiʼi ña̱ káʼa̱nra xíʼinyó. w20.04 26 párr. 1; 27 párr. 5, 7

Tiempo vitin, na̱ Rusia xíʼin na̱ kítáʼan xíʼinna xa̱a̱ ni̱ki̱ʼvina nu̱ú “ñuʼú ña̱ liviní” (Dan. 11:41). ¿Ndáa ki̱ʼva kéʼéna ña̱yóʼo? Tá ku̱i̱ya̱ 2017, ta̱ kúú ta̱ rey ña̱ norte tiempo vitin va̱ása nítaxikara ña̱ ndasakáʼnuna Jehová, ta chi̱ka̱a̱ra savana veʼeka̱a. Ta saátu, va̱ása nítaxira ña̱ kuumiína tutu ña̱ tává na̱ ñuu Ndióxi̱, tá kúú ña̱ Traducción del Nuevo Mundo. Ta ki̱ndaara sucursal ña̱ íyo Rusia, saátu veʼe nu̱ú ndákutáʼanyó xíʼin salón nu̱ú xíyo Asamblea. Tá ku̱u ndiʼi ña̱yóʼo, na̱ Cuerpo Gobernante ku̱nda̱a̱-inina tá ku̱i̱ya̱ 2018 ña̱ na̱ Rusia xíʼin na̱ kítáʼan xíʼinna kúúna ta̱ rey ña̱ norte. Soo, miíyó na̱ ndásakáʼnu Jehová va̱ása kánitáʼanyó xíʼin na̱ chíñu ta ni va̱ása kúni̱yó nasamayó na̱yóʼo, ni tá íxandi̱va̱ʼana xíʼinyó. Chi ña̱ kéʼéyó kúú ña̱ ndíku̱nyó consejo ña̱ va̱xi nu̱ú Biblia, ña̱ ka̱ʼa̱nyó xíʼin Ndióxi̱ xa̱ʼa̱ na̱ kúúmií iin chiñu káʼnu, tá kúú tá ndáka̱xin na̱ chíñu yóʼo ña̱ keʼéna iin ña̱ʼa ña̱ kivi kasi nu̱úyó ña̱ ndasakáʼnuyó Ndióxi̱. w20.05 14 párr. 9

Ndóʼó na̱ íyo se̱ʼe, xíniñúʼu kandíxa se̱ʼendó ña̱ nda̱a̱ ña̱ va̱xi nu̱ú Biblia, ta xíniñúʼu vií kutáʼanna xíʼin Ndióxi̱ ta va̱ása kaka-inina xa̱ʼa̱ ña̱ nda̱a̱ ña̱ va̱xi nu̱ú Biblia. Tá kúni̱ndó sanáʼa̱ndó na̱ va̱lí se̱ʼendó xa̱ʼa̱ Ndióxi̱, miíndó xíniñúʼu chinúu yichi̱ nu̱úna ña̱ kaʼvindó Biblia. Tavándó tiempo ña̱ ndakanixi̱níndó xa̱ʼa̱ ña̱ káʼvindó. Tasaá kivi sanáʼa̱ndó se̱ʼendó ña̱ keʼéna nda̱a̱ táki̱ʼva kéʼé miíndó. Sanáʼa̱ndóna ña̱ kuniñúʼuna tutu ña̱ tává na̱ ñuu Ndióxi̱, video á página ña̱ kúúmiíyó nu̱ú Internet ña̱ kivi chindeétáʼan xíʼinna ña̱ kaʼvina, nda̱a̱ táki̱ʼva kéʼéndó xíʼin na̱ sánáʼa̱ndó xa̱ʼa̱ Biblia. Tá ná keʼéndó ña̱yóʼo, kivi chindeétáʼanndó xíʼin se̱ʼendó ña̱ kuʼvi̱-inina kunina Jehová, ta kandíxana ña̱ xíniñúʼura “ta̱ esclavo ta̱ ndíchiní ta̱ nda̱kúní káchíñu” ña̱ chindeétáʼanna xíʼinyó ña̱ kunda̱a̱-iniyó xa̱ʼa̱ Biblia (Mat. 24:45-47). Va̱ása sanáʼa̱ kuitíndó se̱ʼendó xa̱ʼa̱ ña̱ nda̱a̱ ña̱ va̱xi nu̱ú Biblia. Chi xíniñúʼu chindeétáʼanndó xíʼinna ña̱ kuxini̱na ña̱ʼa ña̱ yo̱ʼvi̱ xa̱ʼa̱ Ndióxi̱, soo kiʼinndó kuenta xíʼin ku̱i̱ya̱na á ki̱ʼva ña̱ kúnda̱a̱-inina xíʼin sava ña̱ʼa, tá ná keʼéndó ña̱yóʼo ndakúka koo ña̱ kándíxana Ndióxi̱ (1 Cor. 2:10). w20.07 11 párr. 10, 12, 13

Tiempo vitin, ku̱a̱ʼání na̱ yiví ku̱a̱chi va̱ʼaní kítáʼanna xíʼin Jehová. Ta va̱ʼa kítáʼanna xíʼinra saáchi kándíxana ña̱ ni̱xi̱ʼi̱ ta̱ Jesús xa̱ʼa̱na. Tíxa̱ʼvi ña̱ ni̱xi̱ʼi̱ra, kivi ndataxiyó miíyó ndaʼa̱ Jehová ta ndakuchiyó. Tá kéʼéyó ña̱ ndáyáʼviní yóʼo, ndákutáʼanyó xíʼin ku̱a̱ʼání na̱ hermano na̱ nda̱taxi mií ndaʼa̱ Ndióxi̱ ta nda̱kuchina, ta va̱ʼaní kítáʼanna xíʼinra. ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi xa̱ʼa̱ ña̱ kítáʼanyó xíʼin Ndióxi̱? Ña̱ kundiku̱nyó yichi̱ ta̱ Abrahán xíʼin ta̱ Job. Chi na̱yóʼo yáʼaka 100 ku̱i̱ya̱ nda̱kúní ni̱xi̱yo inina xíʼin Ndióxi̱. Saátu xíniñúʼu keʼé miíyó, ni xa̱a̱ nda̱saaka tiempo kúú ña̱ káchíñuyó nu̱ú Jehová. Ta saátu xíniñúʼu kundiku̱nyó yichi̱ ta̱ Daniel, ta chindayáʼvikayó ña̱ kítáʼanyó xíʼin Jehová nu̱úka ña̱ tákuyó (Dan. 6:7, 10, 16, 22). Tá chíndeétáʼan Jehová xíʼinyó kivi ya̱ʼayó nu̱ú nda̱a̱ ndáaka tu̱ndóʼo, ta va̱ása ndiʼi-xa̱ʼa̱ ña̱ kítáʼanyó xíʼinra (Filip. 4:13). w20.05 27 párr. 5, 6

Ta̱ rey David xi̱nira ñá síʼí inka ta̱a ndíka̱a̱ñá chíchiñá. Ta̱yóʼo xi̱xini̱ va̱ʼara xa̱ʼa̱ ley Jehová, ña̱yóʼo káchiña: “Va̱ása xíniñúʼu kuni̱ún kuumiíún ñá síʼí inkana” (Éx. 20:17). Soo nda̱kundeéra xi̱torañá. Ta níma̱ra ni̱xa̱a̱ña nda̱taʼvíña. Chi xi̱kuni̱ra kuumiíra ñá ñaʼá kán, ta saátu xi̱kuni̱ra sakúsi̱íra-ini Jehová. Ni xa̱a̱ ku̱a̱ʼání tiempo xi̱yíʼvíra xi̱xinira Jehová, ta saátu xi̱kuʼvi̱-inira xi̱xinirara, soo ni̱xa̱a̱ra ke̱ʼéra ña̱ kúni̱ miíra. Ta xa̱ʼa̱ ña̱yóʼo ni̱xa̱a̱ra ke̱ʼéra sava ña̱ʼa ña̱ va̱ása va̱ʼa. I̱xayaku̱a̱ra ki̱vi̱ Jehová, ta sa̱xóʼvi̱ra na̱ veʼera ta saátu inkaka na̱ yiví (2 Sam. 11:1-5, 14-17; 12:7-12). Jehová nda̱tiinra ku̱a̱chi xíʼin ta̱ David, ta xa̱ʼa̱ ña̱yóʼo va̱ʼa nda̱kutáʼanra xíʼinra (2 Sam. 12:13; Sal. 51:2-4, 17). Va̱ása nínandósó ta̱ David xa̱ʼa̱ ndiʼi tu̱ndóʼo ña̱ ki̱xi nu̱úra xa̱ʼa̱ ña̱ ta̱xira nda̱taʼví níma̱ra. Ña̱ ka̱ʼyíra nu̱ú Salmo 86:11 kivi kootuña siʼa: “Va̱ása taxiún ña̱ ná ndataʼví níma̱i̱”. ¿Á nda̱kuiin Jehová ña̱ ni̱ka̱ʼa̱n ta̱ David xíʼinra? Nda̱kuiinvara, saáchi ña̱ Biblia káʼa̱nña ña̱ nda̱kundeé ta̱ David nda̱sakáʼnura Jehová xíʼin ndiʼi níma̱ra (1 Rey. 11:4; 15:3). w20.06 11 párr. 12, 13

Ña̱ Biblia chítáʼanña ña̱ kúʼvi̱-ini Jehová xínira na̱ káchíñu nu̱úra xíʼin iin yoʼo̱. ¿Nda̱chun íyo ña̱yóʼo saá? Ná ka̱ʼa̱nyó xa̱ʼa̱ iin ejemplo. Ndakanixi̱ní ña̱ kúni̱ kuviún ini iin yu̱ta tá ndeéní ku̱a̱ʼa̱n, ta iin na̱ níndichi chí yuʼú yu̱ta sákanana iin yoʼo̱ ndaʼún. Ta sana táxiún tíxa̱ʼvi ndaʼa̱na, chi ña̱yóʼo chindeétáʼanña xíʼún ña̱ va̱ása ku̱ʼún xíʼin yu̱ta. Soo ni xa̱a̱ kúúmiíún ña̱yóʼo, íyo inkaka ña̱ xíniñúʼún ña̱ va̱ʼa ka̱kún. Xa̱ʼa̱ ña̱ ndeéní ku̱a̱ʼa̱n tá yu̱ta yóʼo, ña̱ va̱ʼa ka̱kún xíniñúʼu xi̱tána yóʼó xíʼin yoʼo̱ ña̱ va̱ʼa xa̱ún nda̱a̱ yuʼú yu̱ta. Ta nda̱a̱ táki̱ʼva ni̱ka̱ʼa̱n Jehová nu̱ú texto ña̱ káʼviyó ki̱vi̱ vitin, tá ku̱xíká na̱ ñuu Israel nu̱úra nda̱kundeéra ni̱xi̱tárana. Ña̱yóʼo kúú ña̱ kúni̱ Jehová keʼéra xíʼin na̱ ku̱xíká nu̱úra tiempo vitin, na̱ íyoní tu̱ndóʼo nu̱ú ta ndíʼi̱ní-inina. Kúni̱ra chindeétáʼanra xíʼinna ña̱ ndikóna nu̱úra, ta saátu ná kunda̱a̱-inina ña̱ kúʼvi̱ní-inira xínirana. Ta kivi kuniñúʼura miíyó ña̱ na̱ʼa̱yó ña̱yóʼo nu̱úna. Ndáyáʼviní ka̱ʼa̱nyó xíʼin na̱ ku̱xíká nu̱ú Jehová ña̱ kúʼvi̱ní-inira xínirana ta saátu miíyó. w20.06 27, 28 párr. 12, 13

Tá xa̱ʼnína ta̱ discípulo Esteban, ku̱a̱ʼání na̱ hermano sa̱ndákoona ñuu Jerusalén ta ku̱a̱ʼa̱nna inka ñuu válí ña̱ íyo chí Judea xíʼin Samaria. Ta savana ni̱xa̱a̱na nda̱a̱ Chipre xíʼin Antioquía (Hech. 7:58–8:1; 11:19). Ña̱kán kivi ka̱ʼa̱nyó ña̱ ni̱xo̱ʼvi̱ní na̱ hermano kán, saáchi ku̱a̱ʼání tu̱ndóʼo ni̱ya̱ʼana nu̱ú. Soo ni saá, xíʼin ña̱ si̱í-ini nda̱kundeéna na̱túʼunna xíʼin na̱ yiví xa̱ʼa̱ Ndióxi̱ ñuu nu̱ú ni̱xa̱a̱na, ta xa̱ʼa̱ ña̱yóʼo ki̱xáʼa íyo congregación iníísaá ñuu nu̱ú xi̱xaʼndachíñu na̱ ñuu Roma (1 Ped. 1:1). Soo su̱ví ña̱yóʼo kúú ndiʼi tu̱ndóʼo ña̱ ni̱ya̱ʼana nu̱ú, saáchi ni̱xi̱yokavaña nu̱úna. Tá kúú, tá ku̱i̱ya̱ 50 ta̱ Claudio ta̱ xi̱xaʼndachíñu nu̱ú na̱ ñuu Roma, xa̱ʼndara chiñu ña̱ ná sandákoo ndiʼi na̱ judío ñuu kán. Xa̱ʼa̱ ña̱yóʼo, na̱ judío na̱ ni̱xa̱a̱ ndu̱u cristiano xi̱niñúʼu sandákoona veʼena ta ku̱ʼu̱nna koona inka ñuu (Hech. 18:1-3). Tá ku̱i̱ya̱ 61 ta̱ apóstol Pablo ka̱ʼyíra ña̱ ni̱ka̱ʼa̱n ndi̱va̱ʼana xíʼin na̱ hermano kán, ña̱ ta̱ánnana veʼeka̱a, ta ki̱ndaana ña̱ʼa ña̱ xi̱kuumiína (Heb. 10:32-34). Ta nda̱a̱ táki̱ʼva xi̱ndoʼo inka na̱ yiví, sava na̱ hermano kán ndáʼviní ni̱xi̱yona ta savana xi̱kuumiína kue̱ʼe̱ (Rom. 15:26; Filip. 2:25-27). w21.02 26, 27 párr. 2-4

Tá ndakú íyo ña̱ kándíxayó Ndióxi̱ nda̱a̱ ni iin ña̱ ná keʼé ta̱ Ndi̱va̱ʼa á na̱ kítáʼan xíʼinra va̱ása kivi sandákavaña miíyó (2 Juan 8, 9). Kúnda̱a̱-iniyó ña̱ sa̱a̱-ini na̱ yiví kunina miíyó (1 Juan 3:13). Ta saátu, ta̱ Juan ni̱ka̱ʼa̱nra ña̱ “ñuyǐví yóʼo ndíka̱a̱ña ndaʼa̱ ta̱ Ndi̱va̱ʼa” (1 Juan 5:19). Xa̱a̱ ku̱yatinní ndiʼi-xa̱ʼa̱ ña̱ ñuyǐví yóʼo, xa̱ʼa̱ ña̱yóʼo sáa̱ní ta̱ Ndi̱va̱ʼa. Va̱ása xíniñúʼu kuitíra ña̱ kini á tu̱ʼun vatá ña̱ káʼa̱n na̱ apóstata, chi saátu íxandi̱va̱ʼara xíʼinyó. Xa̱ʼa̱ ña̱ kúnda̱a̱-inira ña̱ si̱lóʼo kúma̱ní ndiʼi-xa̱ʼa̱ra, tuku ta tuku kúni̱ra kasira nu̱úyó ña̱ ná va̱ása natúʼunkayó xíʼin na̱ yiví á kúni̱ra sandíʼi-xa̱ʼa̱ra ña̱ kándíxayó Ndióxi̱. Xa̱ʼa̱ ña̱yóʼo va̱ása ndákanda̱-iniyó, tá kúnda̱a̱-iniyó ña̱ sava país va̱ása táxikana ña̱ ná ndasakáʼnuyó Ndióxi̱. Soo ni saá, na̱ hermano na̱ íyo país kán ndakú íyo inina. Saá náʼa̱na ña̱ nda̱a̱ ndáaka ña̱ ná keʼé ta̱ Ndi̱va̱ʼa xíʼinyó, va̱ása kuchiñura kasira nu̱úyó ña̱ nda̱kú koo iniyó xíʼin Ndióxi̱. w20.07 24 párr. 12, 13

Ña̱ xi̱kuni̱ Jehová kúú ña̱ ndiʼi tiempo ná kutaku na̱ yiví nu̱ú ñuʼú ña̱ liviní i̱xava̱ʼara. Soo xa̱ʼa̱ ña̱ va̱ása níkandíxa ta̱ Adán xíʼin ñá Eva ña̱ ni̱ka̱ʼa̱n yivána, va̱ása níkivika kutakuna ndiʼi tiempo nu̱ú ñuʼú yóʼo ta miína xíʼin se̱ʼena kuvina tá ná ya̱ʼa tiempo (Rom. 5:12). ¿Ndáaña ke̱ʼé Jehová? Kama ni̱ka̱ʼa̱nra ndáa ki̱ʼva sakǎkura na̱ ñuyǐví (Gén. 3:15). Ta ña̱ ke̱ʼéra kúú ña̱ ta̱xira se̱ʼera ña̱ ni̱xi̱ʼi̱ra xa̱ʼa̱ na̱ se̱ʼe ta̱ Adán xíʼin ñá Eva, ña̱ va̱ʼa sakǎkurana nu̱ú ku̱a̱chi xíʼin ña̱ xíʼi̱na. Xíʼin ña̱ ke̱ʼéra ta̱xira ña̱ ná ndaka̱xin na̱ yiví kachíñuna nu̱úra ta ndakiʼinna ña̱ kutakuna ndiʼi tiempo (Juan 3:16; 1 Cor. 15:21, 22). Jehová kuniñúʼura ta̱ Jesús ña̱ va̱ʼa sandátakura ku̱a̱ʼání na̱ ni̱xi̱ʼi̱. Soo sana su̱ví iin ki̱vi̱ ndataku ndiʼina. ¿Nda̱chun? Saáchi tá kamaní ná kutú nu̱ú ñuʼú yóʼo xíʼin na̱ yiví, kooní tu̱ndóʼo. Soo ña̱ kútóo Jehová kúú ña̱ viíní ná koo ndiʼi ña̱ʼa. Kúnda̱a̱-inira ña̱ va̱ʼa táxi̱n kundoo na̱ yiví xíniñúʼu viíní koo ndiʼi ña̱ʼa (1 Cor. 14:33). w20.08 14 párr. 3; 15 párr. 5

Na̱ káʼviyó xíʼin xíniñúʼu kunda̱a̱-inina ña̱ káʼviyó xíʼinna chi kúni̱yó chindeétáʼanyó xíʼinna ña̱ xa̱a̱na koona testigo Jehová. Na̱ káʼviyó xíʼin xíniñúʼu keʼéna sava ña̱ʼa tasaá xa̱a̱na ndakuchina. Siʼna xáa̱na sákuaʼana xa̱ʼa̱ Jehová, kúʼvi̱-inina xíninara ta kándíxanara (Juan 3:16; 17:3). Tasaá xáa̱na ndúuna migora, ta saátu kítáʼanna xíʼin na̱ hermano na̱ íyo ti̱xin congregación (Heb. 10:24, 25; Sant. 4:8). Tá yáʼa tiempo sándakoona ña̱ va̱ása va̱ʼa kéʼéna, ta ndándikó-inina xa̱ʼa̱ ku̱a̱china (Hech. 3:19). Ta xa̱ʼa̱ ña̱ kándíxanína Ndióxi̱ kíxáʼana nátúʼunna xíʼin inka na̱ yiví xa̱ʼa̱ ña̱ nda̱a̱ (2 Cor. 4:13). Tándi̱ʼi ndátaxina miína ndaʼa̱ Ndióxi̱ ta ndákuchina (1 Ped. 3:21; 4:2). Tá kíxaa̱ ki̱vi̱ ña̱ ndákuchina ndiʼiyó kúsi̱í-ini. Tá kíxáʼa na̱ káʼviyó xíʼin kéʼéna ña̱yóʼo, ná ka̱ʼa̱nyó xíʼinna ña̱ va̱ʼaní íyo ña̱ kéʼéna, ta ná chika̱a̱yó ndee̱ xíʼinna ña̱ ndakundeéna keʼénaña. w20.10 18 párr. 12, 13

Tá ná chitáʼanyó ña̱ kéʼéyó xíʼin ña̱ kéʼé inka na̱ hermano, ixayo̱ʼvi̱ña xíʼinyó kotoyó ña̱ ndáyáʼviyó ti̱xin congregación. Sava na̱ hermano va̱ʼaní sánáʼa̱na, viíní kéʼéna chiñuna á va̱ʼaní sándi̱kona-ini inkana. Ta sana kivi ndakanixi̱níyó ña̱ va̱ása kúchiñuyó keʼéyó táʼan ña̱ kéʼé na̱kán. Ña̱yóʼo náʼa̱ña ña̱ vitá-iniyó ta ndákuniyó ña̱ íyo sava ña̱ʼa ña̱ va̱ása kívi keʼéyó (Filip. 2:3). Soo ná kiʼinyó kuenta. Chi tá ndiʼi tiempo ná chitáʼanyó miíyó xíʼin na̱ xíni̱ní keʼé iin ña̱ʼa, ndakava-iniyó. Nda̱a̱ táki̱ʼva ni̱ka̱ʼa̱n ta̱ apóstol Pablo, nda̱a̱ kivi xa̱a̱yó ndakanixi̱níyó ña̱ kǒo iin chiñu kéʼéyó ti̱xin congregación. Sava na̱ cristiano na̱ ni̱xi̱yo tá siglo nu̱ú, Jehová ta̱xira espíritu santora ndaʼa̱na ña̱ va̱ʼa ke̱ʼéna milagro, soo xa̱a̱ síín síín ni̱xi̱yo ña̱ xi̱keʼéna (1 Cor. 12:4-11). Soo ndiʼina xi̱ndayáʼvina nu̱úra. Tiempo vitin va̱ása kéʼéyó milagro, soo ndiʼi ña̱ kéʼéyó ndáyáʼvinívaña nu̱ú Jehová, ni va̱ása inkáchi íyo ña̱ xíni̱yó keʼéyó. w20.08 22, 23 párr. 13-15

Ka̱ʼa̱n xíʼin Jehová ña̱ ná taxira ndee̱ ndaʼún chi ta̱yóʼo ndakuiinra ña̱ ka̱ʼún xíʼinra ta nda̱a̱ ni iin yichi̱ va̱ása sandákoora yóʼó (Hech. 4:29, 31). Ndiʼi tiempo koora xíʼún ña̱ chindeétáʼanra xíʼún. Ndakanixi̱ní xa̱ʼa̱ ki̱ʼva ña̱ xa̱a̱ chíndeétáʼanra xíʼún ña̱ yáʼún nu̱ú tu̱ndóʼo, ta ndáa ki̱ʼva ta̱xira ndee̱ ndaʼún ña̱ na̱samaún sava ña̱ʼa ña̱ xi̱keʼún. Tá ku̱chiñura chi̱ndeétáʼanra xíʼin na̱ ñuura ña̱ ni̱ko̱so̱kavana tá mar Rojo, va̱ása kaka-iniún chi saátu kuchiñura chindeétáʼanra xíʼún ña̱ xa̱ún koún discípulo ta̱ Cristo (Éx. 14:13). Ta kivi kandíxaún Jehová nda̱a̱ táki̱ʼva ke̱ʼé iin ta̱ salmista, ta̱ ni̱ka̱ʼa̱n tu̱ʼun ña̱ va̱xi nu̱ú texto ña̱ káʼviyó ki̱vi̱ vitin. Saátu kivi chindeétáʼan Jehová xíʼin na̱ publicador xa̱á ña̱ ndakú koo inina. Ná kotoyó ndáaña ndo̱ʼo iin ñá hermana ñá naní Tomoyo. Tá ki̱xáʼañá nátúʼunñá xa̱ʼa̱ Ndióxi̱ veʼe tá veʼe, veʼe ña̱ nu̱ú ni̱xa̱a̱ñá ki̱ta iin ñá nána ta ni̱nda̱ʼyi̱ñá nu̱úñá ta ka̱chiñá: “Va̱ása kúni̱i̱ natúʼun na̱ testigo Jehová xíʼi̱n”, ta ndeéní nda̱kasiñá yéʼé. Ñá Tomoyo va̱ása níndakava-iniñá chi ni̱ka̱ʼa̱nñá xíʼin ñá hermana ñá ku̱a̱ʼa̱n xíʼinñá: “¿Á xi̱niún ña̱ ku̱u? Kǒo nda̱a̱ ni iin tu̱ʼun níka̱ʼi̱n, ta ñá nána káa xa̱a̱ xíni̱ñá ña̱ kúi̱ testigo Jehová. Kúsi̱íní-inii̱”. Ñá Tomoyo precursora regular kúúñá vitin. w20.09 6 párr. 13, 14

Ta̱ Asá ni̱ka̱ʼa̱nra xíʼin na̱ ñuu Judá ña̱ mií Jehová kúú ta̱ ta̱xi ña̱ táxi̱n íyona (2 Crón. 14:6, 7). Soo va̱ása níndakanixi̱níra ña̱ kúúña tiempo ña̱ ndakindee̱ra. Chi ki̱xáʼara íxava̱ʼara ñuu, nama̱, torre xíʼin yéʼé. Tá ni̱ka̱ʼa̱nra xíʼin na̱ ñuu Judá: “Kuenta miíyó kúú país yóʼo”. ¿Ndáaña xi̱kuni̱ kachira? Ña̱ kǒo na̱ sáa̱-ini xíniñaʼá na̱ kivi kasi nu̱úna ña̱ ku̱ʼu̱nna nda̱a̱ ndáaka nu̱ú kúni̱ miína á ña̱ ixava̱ʼana iin ña̱ʼa. Ña̱kán níka̱ʼa̱nra xíʼin na̱ ñuu kán ña̱ viíní ná kuniñúʼuna tiempo ña̱ kǒo ku̱a̱chi níxi̱yo nu̱úna. Ta saátu miíra viíní xi̱niñúʼura tiempo yóʼo ña̱ va̱ʼa chi̱ndeétáʼanra xíʼin na̱ xi̱xa̱ʼa̱n nu̱ú ku̱a̱chi ña̱ koo tu̱ʼvana kanitáʼanna (2 Crón. 14:8). ¿Á kúni̱ kachi ña̱yóʼo ña̱ va̱ása níxi̱kandíxara Jehová? Xi̱kandíxavara Jehová, soo xa̱ʼa̱ ña̱ kúúra rey xi̱kunda̱a̱-inira ña̱ xi̱niñúʼu chindeétáʼanra xíʼin na̱ ñuu ña̱ koo tu̱ʼvana nu̱ú tu̱ndóʼo ña̱ kivi kixi nu̱úna chí nu̱únínu. Xi̱kunda̱a̱-inira ña̱ su̱ví ndiʼi tiempo kúú ña̱ táxi̱n kundoona, tasaá ku̱uva. w20.09 15 párr. 4, 5

Xa̱ʼa̱ ña̱ kúni̱ iin ta̱ anciano chindeétáʼanra xíʼin na̱ hermano, kiviva ka̱ʼa̱nra xíʼin na̱ hermano ndáaña keʼéna ña̱ va̱ʼa kundaarana. Soo ni saá, síín íyo chiñu ña̱ kéʼé na̱ anciano nu̱ú na̱ níʼi yichi̱ nu̱ú na̱ veʼena. Iin chiñu ña̱ ta̱xi Jehová ndaʼa̱ na̱ anciano kúú ña̱ ndatiinna ku̱a̱chi xíʼin na̱ kéʼé ña̱ va̱ása va̱ʼa, ta tavánana ti̱xin congregación tá va̱ása ndándikó-inina xa̱ʼa̱ ña̱ va̱ása va̱ʼa ke̱ʼéna (1 Cor. 5:11-13). Jehová táxira ña̱ ná keʼé na̱ níʼi yichi̱ nu̱ú na̱ veʼena sava ña̱ʼa ña̱ va̱ása kívi keʼé na̱ anciano. Iin ña̱ kivi keʼé ta̱ níʼi yichi̱ nu̱ú na̱ veʼera kúú ña̱ ka̱ʼa̱nra xíʼinna ndáaña kúú ña̱ kivi keʼéna ta ndáaña va̱ása kívi keʼéna, ta saátu ka̱ʼa̱nra xíʼinna ña̱ ná saxínuna ña̱yóʼo (Rom. 7:2). Tá kúú, kúúmiíra derecho ña̱ ka̱ʼa̱nra xíʼin se̱ʼera ndáa hora ndixa̱a̱na tá ñuú, ta saátu kivi taxira castigo ndaʼa̱na tá íxaso̱ʼona ña̱ káʼa̱nra (Efes. 6:1). Soo tá kúma̱níka ndaka̱xinra ndáaña keʼé na̱ veʼera, siʼna xíniñúʼu ka̱ʼa̱nra xíʼin ñá síʼira xa̱ʼa̱ ña̱yóʼo saáchi “su̱ví u̱vi̱ka kúúna chi iinláva ndu̱una” (Mat. 19:6). w21.02 16-18 párr. 10-13

Ndáyáʼviní ña̱ nda̱a̱ ña̱ va̱xi nu̱ú tu̱ʼun Ndióxi̱, saáchi iinlá na̱ yiví na̱ vitá-ini na̱ ndixa kúni̱ sakúaʼa xa̱ʼa̱ra kúú na̱ táxiraña ndaʼa̱ (Hech. 13:48). Na̱yóʼo kándíxana ña̱ xíniñúʼu Ndióxi̱ “ta̱ esclavo ta̱ ndíchiní ta̱ nda̱kúní káchíñu”, ña̱ va̱ʼa chindeétáʼanra xíʼinyó ña̱ kunda̱a̱-iniyó xa̱ʼa̱ ña̱ nda̱a̱ yóʼo tiempo vitin (Mat. 11:25; 24:45). Ña̱ va̱ʼa sakúaʼayó xa̱ʼa̱ ña̱ nda̱a̱, xíniñúʼu chindeétáʼanna xíʼinyó chi va̱ása kuchiñu iinlá miíyó keʼéyó ña̱yóʼo. Ña̱ kunda̱a̱-iniyó xíʼin ña̱yóʼo ndáyáʼviníkaña nu̱ú inkaka ña̱ʼa (Prov. 3:13). Ta saátu, Jehová ta̱xira iin ña̱ ndáyáʼviní ndaʼa̱yó, ña̱ ku̱ʼu̱nyó sanáʼa̱yó inka na̱ yiví xa̱ʼa̱ra xíʼin ña̱ kúni̱ra keʼéra (Mat. 24:14). Ña̱ nátúʼunyó xíʼin na̱ yiví ndáyáʼviníña saáchi chíndeétáʼanña xíʼinna ña̱ xa̱a̱na koona na̱ veʼera, ta ndakiʼinna ña̱ kutakuna ndiʼi tiempo (1 Tim. 4:16). Ni loʼo á ku̱a̱ʼá kúú ña̱ kéʼéyó, soo sáxi̱nuyó iin chiñu ña̱ ndáyáʼviní tiempo vitin (1 Tim. 2:3, 4). Iin ña̱ ndáyáʼviní kúú ña̱ káchíñuyó xíʼin Ndióxi̱ (1 Cor. 3:9). w20.09 27 párr. 4, 5

Tá ni̱xa̱ʼa̱n ta̱ apóstol Pablo ñuu Roma, ku̱a̱ʼá yichi̱ xi̱niñúʼu Jehová na̱ hermano, ña̱ va̱ʼa chi̱ndeétáʼanra xíʼinra. Ta̱ Aristarco xíʼin ta̱ Lucas va̱ʼaní xi̱kitáʼanna xíʼin ta̱ Pablo ta chi̱ka̱a̱-inina ku̱ʼu̱nna xíʼinra chí ñuu Roma. Na̱yóʼo xi̱kuni̱na chindeétáʼanna xíʼin ta̱ Pablo ni xi̱kunda̱a̱-inina ña̱ nda̱a̱ kivi kuvina tá ná ku̱ʼu̱nna xíʼinra. Ta va̱ása káʼa̱n Biblia ña̱ ni̱ka̱ʼa̱n ta̱ Jesús xíʼin na̱yóʼo ña̱ xa̱a̱na ñuu Roma. Chi tá kúun sa̱vi̱ kini saáví kúú ña̱ ku̱nda̱a̱-inina ña̱ ka̱kuna. Tá ni̱xa̱a̱na ñuu Sidón, ta̱ Julio “ta̱xira ña̱ ná ku̱ʼu̱nra kotora na̱ migora ta ná kundaanara” (Hech. 27:1-3). Ta, tá ni̱ya̱ʼa tiempo tá ni̱xa̱a̱na ñuu Puteoli, ta̱ Pablo xíʼin na̱ kítáʼan xíʼinra nda̱ni̱ʼína sava na̱ hermano, ta na̱yóʼo ni̱ka̱ʼa̱nna xíʼinna ña̱ ná kindo̱ona u̱xa̱ ki̱vi̱ xíʼinna. Tá chi̱ndeétáʼan na̱ hermano yóʼo xíʼinna, ni̱kusi̱íní-inina xíʼin ndiʼi ña̱ na̱túʼun ta̱ Pablo xíʼinna, ta ña̱yóʼo chi̱ka̱a̱níña ndee̱ xíʼinna (chitáʼanña xíʼin Hech. 15:2, 3). w20.11 15, 16 párr. 15-17

Ndóʼó na̱ íyo se̱ʼe na̱ʼa̱ndó nu̱ú se̱ʼendó xíʼin ña̱ káʼa̱nndó ta saátu xíʼin ña̱ kéʼéndó ña̱ xíʼin ndiʼi níma̱ndó kúʼvi̱-inindó xínindó Jehová. Ta iin ña̱ va̱ʼaní taxindó ndaʼa̱na kúú ña̱ chindeétáʼanndó xíʼinna ña̱ kuʼvi̱-inina kunina Jehová. Iin ña̱ ndáyáʼviní ña̱ kivi sanáʼa̱ndóna kúú ña̱ ná kaʼvina tu̱ʼun Ndióxi̱ ndiʼi ki̱vi̱, ña̱ ka̱ʼa̱nna xíʼinra, ña̱ ku̱ʼu̱nna reunión ta natúʼunna xíʼin na̱ yiví xa̱ʼa̱ra (1 Tim. 6:6). Xíniñúʼuva taxindó ña̱ʼa ña̱ xíniñúʼuna (1 Tim. 5:8). Soo ndakaʼánndó, ña̱yóʼo va̱ása chindeétáʼanña xíʼinna ña̱ ka̱kuna tá ná ndiʼi-xa̱ʼa̱ ña̱ íyo ñuyǐví yóʼo, ta koona nu̱ú ñuyǐví xa̱á ña̱ taxi Ndióxi̱, chi ña̱ chindeétáʼan xíʼinna ka̱kuna kúú ña̱ vií kutáʼanna xíʼin Jehová (Ezeq. 7:19). Kúsi̱íní-iniyó tá xítoyó ña̱ ku̱a̱ʼání na̱ íyo se̱ʼe viíní íyo ña̱ ndáka̱xinna keʼéna xa̱ʼa̱ ña̱ kúni̱na chindeétáʼanna xíʼin na̱ veʼena ña̱ vií kutáʼanna xíʼin Ndióxi̱. Na̱ va̱lí na̱ kéʼé ña̱yóʼo xíʼin na̱ veʼena ndákundeéna kéʼénaña tá xa̱a̱ xáʼnuna, ta táxinína tíxa̱ʼvi xa̱ʼa̱ ña̱ viíní sa̱náʼa̱ na̱ yivánana (Prov. 10:22). w20.10 28, 29 párr. 10, 11

Ta̱ apóstol Pedro sava yichi̱ kamaní xi̱ka̱ʼa̱nra á xi̱keʼéra iin ña̱ʼa, soo tándi̱ʼi xi̱ndandikó-inira xa̱ʼa̱ ña̱yóʼo. Tá kúú, tá ni̱ka̱ʼa̱n ta̱ Jesús xíʼin na̱ apóstolra ña̱ xíniñúʼu xo̱ʼvi̱ra ta kuvira, saá kúú ña̱ ni̱ka̱ʼa̱n ta̱ Pedro tu̱ʼun ña̱ va̱xi nu̱ú texto ña̱ káʼviyó ki̱vi̱ vitin (Mat. 16:21-23). Ta̱ Jesús ni̱ka̱ʼa̱nra xíʼin ta̱ Pedro ña̱ va̱ása va̱ʼa íyo ña̱ ni̱ka̱ʼa̱nra. Ta saátu tá ni̱xa̱a̱ iin tiʼvi na̱ yiví ña̱ tiinna ta̱ Jesús, ta̱ Pedro kama xa̱ʼndara so̱ʼo iin ta̱ xi̱kachíñu nu̱ú ta̱ su̱tu̱ káʼnu (Juan 18:10, 11). Ta tuku ni̱ka̱ʼa̱n ta̱ Jesús xíʼinra ña̱ va̱ása va̱ʼa íyo ña̱ ke̱ʼéra. Ta saátu, ta̱ Pedro ni̱ka̱ʼa̱nra ña̱ va̱ása sandákoora ta̱ Jesús ni ná sandákoo inkaka na̱ apóstol ta̱yóʼo (Mat. 26:33). Ta̱ Pedro va̱ása ndakú níxi̱yo inira nda̱a̱ táki̱ʼva xi̱ndakanixi̱níra, saáchi nda̱a̱ u̱ni̱ yichi̱ ni̱ka̱ʼa̱nra ña̱ va̱ása xíni̱ra ta̱ Jesús. Nda̱kavakaví-inira ta ki̱tara chi ke̱ʼé ta ki̱xáʼara xákura (Mat. 26:69-75). Ta sana xi̱ndakanixi̱níra á ixakáʼnu-ini ta̱ Jesús xa̱ʼa̱ra. Ni nda̱kava-ini ta̱ Pedro, va̱ása nítaxira ña̱ kasi ña̱yóʼo nu̱úra ña̱ kachíñura nu̱ú Jehová. Ni ke̱ʼéra ña̱ va̱ása va̱ʼa chi̱ka̱a̱ra ndee̱ ña̱ kachíñura xíʼin inkaka na̱ apóstol (Juan 21:1-3; Hech. 1:15, 16). w20.12 20, 21 párr. 17, 18

Ta̱ níʼi yichi̱ nu̱ú na̱ veʼera ku̱a̱ʼání ki̱ʼva kivi na̱ʼa̱ra ña̱ vitá íyo inira. Tá kúú, tá kúnda̱a̱-inira ña̱ na̱ yiví ku̱a̱chi kúú ñá síʼira xíʼin se̱ʼera, kunda̱a̱va-inira ña̱ va̱ása viíní keʼéna sava ña̱ʼa. Ta viíní kuniso̱ʼora ña̱ káʼa̱n na̱ veʼera ni va̱ása inkáchi íyoña xíʼin ña̱ ndákanixi̱níra. Ta saátu, iin ta̱a ta̱ vitá-ini kéʼéra chiñu ña̱ íyo ti̱xin veʼera, ni káʼa̱n na̱ yiví ña̱ iin chiñu ná ñaʼá kúú ña̱yóʼo. Ta ña̱yóʼo kivi ixayo̱ʼvi̱ña xíʼinra. ¿Nda̱chun? Iin ñá hermana ñá naní Rachel káchiñá: “Ñuu nu̱ú ke̱i̱, tá iin ta̱a chíndeétáʼanra xíʼin ñá síʼira ña̱ ndakatara ko̱ʼo̱ á ndaya̱kúnra veʼe, na̱ íyo yatin xíʼinra á na̱ veʼera kivi ka̱ʼa̱nna xíʼinra ña̱ ‘su̱ví ta̱a kúúraʼ. Ta saátu kivi ndakanixi̱nína ña̱ va̱ása xíni̱ra kaʼndara chiñu nu̱ú ñá síʼira”. Tá saá ndákanixi̱ní na̱ yiví ñuu nu̱ú íyoún, ndakaʼán chi ta̱ Jesús nda̱katara xa̱ʼa̱ na̱ discípulora ni xi̱kuuña iin chiñu ña̱ xi̱keʼé na̱ esclavo. Iin ta̱ va̱ʼaní níʼi yichi̱ nu̱ú na̱ veʼera kundi̱ʼi̱ka-inira xa̱ʼa̱ ña̱ vií koo na̱ veʼera ta su̱ví ña̱ ka̱ʼa̱n vií na̱ yiví xa̱ʼa̱ra. w21.02 2 párr. 3; 4 párr. 11

Tá ndákaʼányó xa̱ʼa̱ iin ña̱ va̱ʼa, iin regalo Jehová kúúña. Soo ni va̱ʼaní ni̱xi̱yo ña̱ xi̱takuyó tá ya̱chi̱ va̱ʼaníkava koo ña̱ kutakuyó nu̱ú ñuyǐví xa̱á. Sana kivi keʼé inkana ña̱ va̱ása va̱ʼa xíʼinyó soo tá chíka̱a̱-iniyó ña̱ ixakáʼnu-iniyó xa̱ʼa̱na kivi ndakundeéyó kachíñuyó nu̱ú Jehová. Tá ná chika̱a̱níyó ku̱a̱chi miíyó xa̱ʼa̱ iin ña̱ va̱ása va̱ʼa ke̱ʼéyó, kivi kasiña nu̱úyó ña̱ kusi̱í-iniyó kachíñuyó nu̱ú Jehová. Soo nda̱a̱ táki̱ʼva ke̱ʼé ta̱ apóstol Pablo ná kandíxayó ña̱ xa̱a̱ i̱xakáʼnu-ini Jehová xa̱ʼa̱ ku̱a̱chiyó (1 Tim. 1:12-15). Kusi̱íní-iniyó kutakuyó ndiʼi tiempo nu̱ú ñuyǐví xa̱á, ta va̱ása ndakaʼánkayó xa̱ʼa̱ ña̱ va̱ása va̱ʼa ndo̱ʼoyó. Ña̱ Biblia káʼa̱nña ña̱ tiempo saá va̱ása ndakaʼánkayó xa̱ʼa̱ ña̱ʼa ña̱ ku̱u tá ya̱chi̱ (Is. 65:17). Savayó xa̱a̱ ku̱a̱ʼání ku̱i̱ya̱ káchíñuyó nu̱ú Jehová ta xa̱a̱ ku̱chéeyó, soo nu̱ú ñuyǐví xa̱á nduu válí tukuyó (Job 33:25). Ña̱kán, ná chika̱a̱-iniyó ña̱ va̱ása ndakaniníxi̱níyó xa̱ʼa̱ ña̱ ndo̱ʼoyó tá ya̱chi̱, va̱ʼaka ná chika̱a̱yó ndee̱ ña̱ kachíñuyó nu̱ú Jehová tiempo vitin, ta ná ndakanixi̱níyó xa̱ʼa̱ ña̱ ndakiʼinyó chí nu̱únínu. w20.11 24 párr. 4; 29 párr. 18, 19

¿Ndáaña kuu chí nu̱únínu? Tá ná kuu ña̱ gran tribulación, u̱vi̱ ki̱ʼva sakǎku Jehová miíyó. Ña̱ nu̱ú, sakǎkura na̱ káchíñu nu̱úra tá ná chika̱a̱ra-ini na̱ chíñu na̱ íyo nu̱ú ñuʼú yóʼo ña̱ sandíʼi-xa̱ʼa̱na Babilonia ña̱ káʼnu, ña̱yóʼo kúú ndiʼi veʼe-ñu̱ʼu vatá ña̱ íyo nu̱ú ñuʼú yóʼo (Apoc. 17:16-18; 18:2, 4). Ta ña̱ u̱vi̱, sakǎkura na̱ ñuura tá ná sandíʼi-xa̱ʼa̱ra inkaka ña̱ʼa ña̱ íyo nu̱ú ñuyǐví ta̱ Ndi̱va̱ʼa ti̱xin ña̱ Armagedón (Apoc. 16:14, 16). Tá yatinka ná kooyó xíʼin Jehová, su̱ví ndiʼi tiempo saxóʼvi̱ ta̱ Ndi̱va̱ʼa miíyó. Chi ta̱yóʼo ta̱ ndiʼi-xa̱ʼa̱va kúúra (Rom. 16:20). Ña̱kán, ná kuniñúʼuyó ndiʼi ña̱ táxi Ndióxi̱ ndaʼa̱yó ña̱ va̱ʼa kanitáʼanyó ta nda̱a̱ ni iin yichi̱ ná va̱ása sandákooyóña. Ná va̱ása ndakanixi̱níyó ña̱ kuchiñu iinlá miíyó kanitáʼanyó xíʼin ta̱ Ndi̱va̱ʼa ta saátu xíʼin na̱ kítáʼan xíʼinra, ná chindeétáʼanyó xíʼin na̱ hermanoyó ta ná keʼéyó chiñu ña̱ xáʼnda Jehová. Chi tá ná keʼéyó ña̱yóʼo yiváyó ta̱ kúʼvi̱ní-ini xíni miíyó ndasandakúra-iniyó ta kundaara miíyó (Is. 41:10). w21.03 30 párr. 16, 17

¿Ama kúú ña̱ kivi na̱ʼa̱yó ña̱ kándíxayó Jehová? Tá kéʼéyó ndiʼi ña̱ káʼa̱nra xíʼinyó. Tu̱ʼun Ndióxi̱ káʼa̱nña xa̱ʼa̱ ku̱a̱ʼání na̱ nda̱kaxin ke̱ʼé ña̱ va̱ʼa ta saátu na̱ ke̱ʼé ña̱ va̱ása va̱ʼa, ta ña̱yóʼo náʼa̱ña ña̱ ndáyáʼviní táxi̱n koo iniyó ta na̱ʼa̱yó ña̱ kándíxayó Jehová. Tá ná kaʼviún xa̱ʼa̱ na̱ ke̱ʼé ña̱ va̱ʼa, koto ndáaña kúú ña̱ chi̱ndeétáʼan xíʼinna ña̱ va̱ʼa táxi̱n ni̱xi̱yo inina tá xi̱sasina nu̱úna ña̱ ndasakáʼnuna Jehová. Tá kúú, tá ni̱ka̱ʼa̱n na̱ chíñu xíʼin na̱ apóstol ña̱ va̱ása natúʼunkana xíʼin na̱ yiví xa̱ʼa̱ Ndióxi̱, va̱ása níyi̱ʼvína kunina na̱yóʼo. Nu̱úka ña̱ keʼéna ña̱yóʼo ndakú ni̱xi̱yo inina ta̱ ni̱ka̱ʼa̱nna: “Xíniñúʼu kuniso̱ʼondi̱ ña̱ káʼa̱n Ndióxi̱ chi ta̱yóʼo kúú ta̱ xáʼndachíñu nu̱úndi̱ nu̱úka ña̱ kuniso̱ʼondi̱ ña̱ káʼa̱n na̱ yiví” (Hech. 5:29). Ni ka̱ninana va̱ása níyi̱ʼvína. ¿Nda̱chun? Saáchi xi̱kunda̱a̱-inina ña̱ xi̱kusi̱í-ini Jehová xíʼin ña̱ xi̱keʼéna, ta íyora ña̱ chindeétáʼanra xíʼinna. Ña̱kán nda̱kundeéna na̱túʼunna xíʼin na̱ yiví xa̱ʼa̱ Ndióxi̱ (Hech. 5:40-42). Ta saátu íyo ña̱ ke̱ʼé ta̱ discípulo Esteban, ni xi̱kunda̱a̱-inira ña̱ si̱lóʼo kúma̱ní ta kaʼnínara va̱ása nína̱ʼa̱ra ña̱ ndíʼi̱-inira ta táxi̱n ni̱xi̱yo inira, ta nu̱úra “ndu̱uña táki̱ʼva káa nu̱ú iin ángel” (Hech. 6:12-15). ¿Nda̱chun? Saáchi xi̱kunda̱a̱-inira ña̱ xi̱kusi̱í-ini Jehová xíʼin ña̱ xi̱keʼéra. w21.01 4 párr. 10, 11

Ña̱yóʼo kúni̱ kachiña ña̱ vií íyo ña̱ xínitúni̱na ta kúsi̱í-ini Jehová xíʼin ña̱ kéʼéna (Is. 1:18). Xa̱a̱ nda̱taxina miína ndaʼa̱ Ndióxi̱ ta nda̱kuchina ta kándíxanína ña̱ ni̱xi̱ʼi̱ ta̱ Jesús xa̱ʼa̱ ku̱a̱china, ta saátu kúúna migo Jehová (Juan 3:36; 1 Ped. 3:21). Xa̱ʼa̱ ña̱yóʼo nda̱a̱ táki̱ʼva íyo na̱ ndítana nu̱ú íyo trono Ndióxi̱ saá íyona, ta ñuú xíʼin káʼñu káchíñuna nu̱úra nu̱ú ñuʼú yóʼo (Apoc. 7:15). Ta xa̱a̱ kúsi̱íní-inina káchíñuna nu̱ú Ndióxi̱, saáchi ku̱a̱ʼa̱nna nátúʼunna xíʼin na̱ yiví xa̱ʼa̱ra ña̱ va̱ʼa ná xa̱a̱na koona discípulo ta̱ Cristo. Ta iinlá ña̱yóʼo ndíʼi̱-inina xa̱ʼa̱ nu̱úka ña̱ keʼéna ña̱ kúni̱ miína (Mat. 6:33; 24:14; 28:19, 20). Na̱ gran muchedumbre kándíxana ña̱ ndakundeé Ndióxi̱ kundaarana tá ná ndiʼi ña̱ gran tribulación, saáchi saá íyo ña̱ káʼa̱n Biblia. Ta saátu kunina xi̱nu ña̱ xi̱ndatuna ndakiʼinna: Ndióxi̱ “ya̱kúnra ti̱kui̱í nu̱úna” (Apoc. 21:3, 4). w21.01 16 párr. 9, 10

Kúsi̱íní-iniyó xa̱ʼa̱ ña̱ kúúyó táʼan na̱ ñuu Jehová. Ta va̱ʼaní kítáʼanyó xa̱ʼa̱ ña̱ chíka̱a̱yó ndee̱ ña̱ íxato̱ʼóyó na̱ ta̱xi Jehová chiñu ndaʼa̱ ña̱ kuniʼina yichi̱ nu̱úyó. Tu̱ʼun Ndióxi̱ náʼa̱ña ña̱ inkáchi ndáyáʼvi na̱ ta̱a xíʼin ná ñaʼá nu̱ú Jehová. Tá kúú tá siglo nu̱ú, Jehová ta̱xira espíritu santora nda̱a̱ ná ñaʼá ta saátu na̱ ta̱a ña̱ va̱ʼa keʼéna milagro, ta kúú ña̱ ka̱ʼa̱nna ku̱a̱ʼá nu̱ú tu̱ʼun (Hech. 2:1-4, 15-18). Ndióxi̱ nda̱kaxinra na̱ ta̱a ta saátu ná ñaʼá ña̱ va̱ʼa kaʼndachíñuna xíʼin ta̱ Cristo (Gál. 3:26-29). Ta saátu, Jehová taxira ña̱ ná kutaku na̱ ta̱a ta saátu ná ñaʼá ndiʼi tiempo nu̱ú ñuʼú yóʼo (Apoc. 7:9, 10, 13-15). Ta ta̱ Jesús xa̱ʼndara chiñu nu̱ú na̱ ta̱a ta saátu ná ñaʼá ña̱ ná natúʼunna xíʼin na̱ yiví ta ná sanáʼa̱nana xa̱ʼa̱ Reino Ndióxi̱ (Mat. 28:19, 20). Ta kúú, libro ña̱ Hechos káʼa̱nña xa̱ʼa̱ iin ñá xi̱ndasakáʼnu Ndióxi̱ ñá xi̱naní Priscila. Ñáyóʼo xíʼin yiíñá ta̱ Áquila, “ki̱xáʼana ndákani viína xa̱ʼa̱ ña̱ káʼa̱n tu̱ʼun Ndióxi̱” nu̱ú ta̱ Apolos, iin ta̱a ta̱ xi̱xini̱ní xa̱ʼa̱ tu̱ʼun Ndióxi̱ (Hech. 18:24-26). w21.02 14 párr. 1, 4

Ndóʼó na̱ anciano kúúmiíndó iin chiñu ña̱ ndáyáʼviní ña̱ chindeétáʼanndó xíʼin na̱ publicador ña̱ viíka natúʼunna xíʼin na̱ yiví ta sanáʼa̱nana. Tá iin na̱ hermano yíʼvina kaʼvina xíʼin na̱ yiví tá ku̱a̱ʼa̱nndó xíʼinna, kivi ka̱ʼa̱nndó xíʼinna ña̱ chindeétáʼanndó xíʼinna ña̱ kaʼvindó xíʼin na̱ yiví kán. Ku̱a̱ʼání ña̱ kivi keʼéndó ña̱ va̱ʼa chika̱a̱ndó ndee̱ xíʼin na̱ hermano na̱ sánáʼa̱ na̱ yiví ña̱ kǒo ndakava-inina (1 Tes. 5:11). Ni kǒova na̱ yiví káʼviyó xíʼin tiempo vitin, soo kiviva chindeétáʼanyó xíʼin iinna ña̱ kuaʼnuna xíʼin tu̱ʼun Ndióxi̱. Tá ku̱a̱ʼa̱nyó xíʼin iin na̱ hermano ña̱ kaʼvina xíʼin iin na̱ yiví, kiviva ka̱ʼa̱nyó sava ña̱ʼa ña̱ chindeétáʼan xíʼinna soo va̱ása ku̱a̱ʼání ka̱ʼa̱nyó. Ná kooyó migo na̱ sa̱kán sákuaʼa xa̱ʼa̱ Ndióxi̱ tá ku̱a̱ʼa̱nna reunión, ta ná chinúuyó iin yichi̱ va̱ʼaní nu̱úna. Ta na̱ anciano kivi chika̱a̱na ndee̱ xíʼin na̱ sa̱kán sákuaʼa xa̱ʼa̱ Ndióxi̱ tá ná tavána tiempo ña̱ natúʼunna xíʼinna, ta saátu tá ná ka̱ʼa̱nna tu̱ʼun va̱ʼa xíʼin na̱ hermano ta sanáʼa̱nana ndáa ki̱ʼva viíka sanáʼa̱na na̱ yiví. Kusi̱íní-iniyó tá ná chindeétáʼanyó xíʼin iin na̱ yiví ña̱ xa̱a̱na kuʼvi̱-inina kunina Jehová ta kachíñuna nu̱úra. w21.03 13 párr. 18, 19

Ta̱ David ni̱na̱ʼa̱ra ña̱ kiviva kundaa-ini inkanara, saáchi viíní xi̱keʼéra chiñu ña̱ xi̱taxina ndaʼa̱ra. Tá kúú, tá ni̱xi̱yo loʼora xi̱ndaara ndikachi sa̱na̱ yivára ta chi̱ka̱a̱níra ndee̱ ña̱ viíní kundaararí, ni i̱yoní ni̱xi̱yo chiñu yóʼo. Tá ni̱ya̱ʼa tiempo ta̱ David ni̱ka̱ʼa̱nra ña̱yóʼo xíʼin ta̱ rey Saúl: “Táta miíi̱, yi̱ʼi̱ kúú ta̱ ndáa ndikachi sa̱na̱ yivái̱. Iin ki̱vi̱ ki̱xi iin tí león ta inka yichi̱ ki̱xi iin tí oso, ta ki̱ʼinrí iin ndikachi ku̱a̱ʼa̱n xíʼinrí. Ta yi̱ʼi̱ xi̱ndiku̱i̱n sa̱tárí ta xa̱ʼníi̱rí ta sa̱kǎkui̱ tí ndikachi kán” (1 Sam. 17:34, 35). Ta̱ David xi̱kunda̱a̱-inira ña̱ xíniñúʼu kundaara tí ndikachi yóʼo. Na̱ ta̱a válí kivi kundiku̱nna yichi̱ra tá viíní ná keʼéna chiñu ña̱ táxina ndaʼa̱na. Nda̱a̱ tá ni̱xi̱yo loʼo ta̱ David va̱ʼaní ni̱xa̱a̱ra ki̱táʼanra xíʼin Jehová. Ña̱yóʼo kúú ña̱ xi̱ndayáʼviníka nu̱úra, nu̱úka ña̱ ndakú ni̱xi̱yo inira á ña̱ va̱ʼaní xi̱sakáʼara tú arpa. Nu̱ú ta̱ David, su̱ví Ndióxi̱ kuitíra níxikuu Jehová chi ni̱xa̱a̱ra ku̱ura migora. Ndóʼó na̱ ta̱a válí, iin ña̱ ndáyáʼviní ña̱ kivi keʼéndó kúú ña̱ viíníka kutáʼanndó xíʼin yivándó ta̱ íyo chí ndiví. w21.03 3 párr. 4, 5