Junio

Ñaʼá ñá ndáʼvi ñá ni̱xi̱ʼi̱ yií xóʼvi̱níñá saáchi íxayo̱ʼvi̱níña xíʼinñá ña̱ ni̱ʼíñá xu̱ʼún ña̱ va̱ʼa satáñá ña̱ʼa ña̱ xíniñúʼuñá. Soo ni saá ku̱yatinñá nu̱ú chíka̱a̱na xu̱ʼún ta tá va̱ása xíto inkana chi̱kaa̱ñá u̱vi̱ xu̱ʼún válí, sana ni va̱ása níkaxánví tá ni̱ko̱yo ña̱yóʼo. Soo ku̱nda̱a̱va-ini ta̱ Jesús ña̱ chi̱kaa̱ñá u̱vi̱ xu̱ʼún ña̱ xi̱naní leptón, loʼoní xi̱ndayáʼvi ña̱yóʼo tiempo saá. Ña̱yóʼo va̱ása nanivíña ña̱ va̱ʼa satáñá iin gorrión, iin saa loʼo tí núuní ya̱ʼvi tí xi̱satána ña̱ va̱ʼa kuxuna. Ta̱ Jesús nda̱kanda̱ní-inira xíʼin ña̱ ke̱ʼé ñá ñaʼá ndáʼvi ñá ni̱xi̱ʼi̱ yií. Ña̱kán ka̱nara na̱ discípulora ta ni̱ka̱ʼa̱nra xíʼinna ña̱ ná kotona ña̱ kéʼé ñáyóʼo, ta ka̱chira: “Ña̱ nda̱a̱ káʼi̱n xíʼinndó ku̱a̱ʼáka ña̱ chi̱ka̱a̱ ñaʼá ñá ndáʼvi ñá ni̱xi̱ʼi̱ yií yóʼo nu̱úka na̱ káa” (Mar. 12:43, 44). Tá chi̱ka̱a̱ ñá ñaʼá kán ndiʼi xu̱ʼún ña̱ kúúmiíñá ki̱vi̱ kán, ni̱na̱ʼa̱ñá ña̱ kándíxañá ña̱ kundaa Jehová miíñá (Sal. 26:3). w21.04 6 párr. 17, 18

Tá ni̱xi̱yo ta̱ Jesús nu̱ú ñuʼú yóʼo xi̱kusi̱íní-inira xi̱natúʼunra xíʼin na̱ yiví xa̱ʼa̱ Ndióxi̱, tasaá kúni̱ra keʼé miíyó tiempo vitin (Juan 4:35, 36). Tá ni̱xi̱yo ta̱ Jesús xíʼin na̱ discípulora, xi̱kusi̱íní-inina tá xi̱natúʼunna xa̱ʼa̱ Ndióxi̱ (Luc. 10:1, 5-11, 17). Soo tá ti̱in na̱ yiví ta̱yóʼo ta xa̱ʼnínara, va̱ása níkusi̱íka-inina natúʼunna xíʼin na̱ yiví (Juan 16:32). Tá xa̱a̱ nda̱taku ta̱ Jesús ni̱ka̱ʼa̱nra xíʼin na̱ discípulora ña̱ ná kundi̱ʼi̱ka-inina natúʼunna xíʼin na̱ yiví xa̱ʼa̱ Ndióxi̱. Ta tá xa̱a̱ íyo ta̱ Jesús chí ndiví, na̱ discípulora chi̱ka̱a̱níkana ndee̱ ña̱ na̱túʼunna xíʼin na̱ yiví. Ta nda̱a̱ na̱ yiví na̱ xi̱sa̱a̱-ini xi̱xini miína ni̱ka̱ʼa̱n kúáchina xa̱ʼa̱ ña̱yóʼo. Ta nda̱a̱ táki̱ʼva káchi texto ña̱ káʼviyó ki̱vi̱ vitin. Tá ni̱xi̱ka na̱ cristiano na̱ xi̱ndoo tá siglo nu̱ú na̱túʼunna xa̱ʼa̱ Ndióxi̱, ta̱ Jesús kúú ta̱ xi̱niʼi yichi̱ nu̱úna ta xa̱ʼa̱ ña̱ ta̱xi Jehová bendición ndaʼa̱na, ku̱a̱ʼání na̱ yiví ni̱xa̱a̱ sa̱kuaʼa xa̱ʼa̱ra. Tá kúú tá Pentecostés ña̱ ku̱i̱ya̱ 33, nda̱kuchi ki̱ʼva 3,000 na̱ yiví (Hech. 2:41). Ta ku̱a̱ʼáníka na̱ yiví ni̱xa̱a̱na ndu̱una discípulo ta̱ Jesús (Hech. 6:7). Soo ni̱ka̱ʼa̱ntu ta̱ Jesús ña̱ ku̱a̱ʼání na̱ yiví xa̱a̱na sákuaʼana xa̱ʼa̱ ña̱ nda̱a̱ tiempo nu̱ú ndíʼi (Juan 14:12; Hech. 1:8). w21.05 14 párr. 1, 2

¿Á ndákaʼún ndáaña ndo̱ʼún tá ni̱xa̱ún sa̱kuaʼún xa̱ʼa̱ ña̱ nda̱a̱? Sana nda̱kanixi̱níún ña̱ ndiʼi na̱ yiví kutóo sakuaʼa xa̱ʼa̱ ña̱yóʼo. Saáchi xi̱kandíxaún ña̱ chindeétáʼan tu̱ʼun Ndióxi̱ xíʼinna ña̱ va̱ʼa si̱í koona tiempo vitin, ta ndakiʼinna iin ña̱ va̱ʼa chí nu̱únínu (Sal. 119:105). Ta ni̱kusi̱íkaví-iniún tá ki̱xáʼún nátúʼún xa̱ʼa̱ ña̱ sákuaʼún xíʼin na̱ veʼún ta saátu xíʼin na̱ migoún. Soo nda̱kavaní-iniún tá va̱ása níxiin na̱yóʼo kuniso̱ʼona. Va̱ása ndákanda̱-iniyó tá va̱ása xíín na̱ yiví kuniso̱ʼona ña̱ nátúʼunyó xa̱ʼa̱ Ndióxi̱ xíʼinna. Saáchi tá ni̱xi̱yo ta̱ Jesús nu̱ú ñuʼú yóʼo, ke̱ʼéra ku̱a̱ʼá milagro ña̱ ni̱na̱ʼa̱ ña̱ xi̱chindeétáʼan Jehová xíʼinra. Soo ni saá va̱ása níxiin na̱ yiví kandíxanara. Tá kúú, tá sa̱ndátakura ta̱ Lázaro nda̱a̱ na̱ sáa̱-ini xíni miíra xi̱nina tá ke̱ʼéra milagro yóʼo. Ta na̱ xi̱niʼi yichi̱ nu̱ú na̱ judío va̱ása níxiinna kandíxana ña̱ xi̱kuura ta̱ Mesías, ta nda̱a̱ xi̱kuni̱na kaʼnínara ta saátu ta̱ Lázaro (Juan 11:47, 48, 53; 12:9-11). w21.05 2 párr. 1, 2

Xíniñúʼu chika̱a̱yó ndee̱ ña̱ ku̱ʼu̱n ni̱ʼiyó reunión. Saáchi yóʼo kivi ndakiʼinyó ndee̱ ta saátu kivi kuxini̱kayó na̱ hermanoyó. Ná kutáʼanyó xíʼin na̱ va̱ʼaní yichi̱ chínúu nu̱úyó, ni su̱ví inkáchi íyo ku̱i̱ya̱yó xíʼinna á ni inka ñuu ke̱ena. Tu̱ʼun Ndióxi̱ sándakaʼánña miíyó ña̱ ku̱a̱ʼání ña̱ ndíchi kúúmií na̱ xa̱a̱ ku̱chée (Job 12:12). Soo saátu na̱ xa̱a̱ ku̱chée kivi sákuaʼana ku̱a̱ʼání ña̱ʼa xíʼin ña̱ kéʼé na̱ hermano na̱ válíka nu̱úna. Tá kúú, ta̱ David iin ta̱ loʼova xi̱kuura nu̱ú ta̱ Jonatán soo ni saá va̱ʼaníva ni̱xa̱a̱na xi̱táʼanna (1 Sam. 18:1). U̱vi̱ saána va̱ʼaní chi̱ndeétáʼanna xíʼin táʼanna ña̱ va̱ʼa ka̱chíñuna nu̱ú Jehová tá ni̱xi̱yo tu̱ndóʼo nu̱úna (1 Sam. 23:16-18). Ñá Irina, iin ñá hermana ñá ndásakáʼnu iinlá mií Jehová ti̱xin veʼeñá, káchiñá: “Na̱ hermanoyó kivi xa̱a̱na koona nda̱a̱ táki̱ʼva íyo na̱ yiváyó á ku̱ʼvayó. Jehová kivi kuniñúʼura na̱yóʼo ña̱ koona na̱ veʼeyó”. Na̱ migoyó kúni̱vana chindeétáʼanna xíʼinyó ta chika̱a̱na ndee̱ xíʼinyó, soo xíniñúʼu chindeétáʼanyó xíʼinna ña̱ kunda̱a̱-inina ndáa ki̱ʼva keʼéna ña̱yóʼo. w21.06 10, 11 párr. 9-11

Ta̱ Jesús na̱túʼunra xa̱ʼa̱ iin ta̱ rey xíʼin xa̱ʼa̱ iin ta̱ xi̱kachíñu ndáʼvi nu̱úra. Ta̱ ta̱a yóʼo ku̱a̱ʼání xu̱ʼún xi̱níkára nu̱ú ta̱ rey yóʼo ta va̱ása níkuchiñura chaʼviraña, soo i̱xakáʼnuva-ini ta̱ rey yóʼo xa̱ʼa̱ra. Tasaá, mií ta̱ xi̱níká nu̱ú ta̱ rey yóʼo va̱ása níxiinra ixakáʼnu-inira xa̱ʼa̱ iin ta̱ xi̱níká nu̱úra, ni loʼoníva kúú xu̱ʼún yóʼo. Tándi̱ʼi, ta̱ rey yóʼo chi̱ka̱a̱ra ta̱ ta̱a yóʼo veʼeka̱a. Ta̱ xi̱kachíñu nu̱ú ta̱ rey yóʼo su̱ví nda̱saa iinlá miíra níxo̱ʼvi̱ chi saátu ni̱xo̱ʼvi̱ inkana xíʼin ña̱ ke̱ʼéra. Saáchi i̱xandi̱va̱ʼara xíʼin ta̱ xi̱níká nu̱úra, ta chi̱ka̱a̱rara veʼeka̱a nda̱a̱ ná ndachaʼvira ndiʼi ña̱ xi̱níkára nu̱úra. Na̱ xi̱ni ña̱ ke̱ʼéra va̱ása va̱ʼa níkunina xíʼin ña̱yóʼo. Ta̱ Jesús ka̱chira: “Tá na̱kunda̱a̱-ini inka na̱ kítáʼan káchíñu xíʼinra ni̱sa̱a̱nína” (Mat. 18:30, 31. Ta ki̱ʼva saá ndóʼo inkana xíʼin ña̱ kéʼéyó. Tá ke̱ʼé na̱ hermano iin ña̱ va̱ása va̱ʼa xíʼinyó, ta va̱ása xíínyó ixakáʼnu-iniyó xa̱ʼa̱na ¿ndáaña kuu? Saxóʼvi̱yóna saáchi va̱ása xíínyó ixakáʼnu-iniyó xa̱ʼa̱na, ta xíʼin ña̱yóʼo na̱ʼa̱yó ña̱ va̱ása kúʼvi̱ka-iniyó xíniyóna, ta va̱ása kuni̱kayó ka̱ʼa̱nyó xíʼinna. Ta nda̱a̱ na̱ hermano na̱ íyo ti̱xin congregación, va̱ása va̱ʼa kunina tá va̱ása va̱ʼa kítáʼanyó xíʼin na̱ hermano kán. w21.06 22 párr. 11, 12

Miíyó na̱ yiví na̱kuva̱ʼayó ña̱ keʼéyó nda̱a̱ táki̱ʼva kéʼé Ndióxi̱, soo ta̱ Ndi̱va̱ʼa kúni̱ra ña̱ ná keʼéyó ña̱ va̱ása va̱ʼa á ña̱ kini. Tá tiempo ña̱ ni̱xi̱yo ta̱ Noé, Jehová xi̱nira ña̱ kini ña̱ kéʼé na̱ yiví nu̱ú ñuʼú, ta nda̱ndikóní-inira xa̱ʼa̱ ña̱ i̱xava̱ʼarana ta ku̱suchíkaví-inira (Gén. 6:5, 6, 11, nota). Soo kininíka káa tiempo ña̱ ndóoyó vitin. Ta̱ Ndi̱va̱ʼa kúsi̱íní-inira tá xítora ña̱ ku̱a̱ʼání na̱ yiví kéʼéna ña̱ kini tá kísi̱na xíʼin-táʼanna. Tá kúú, na̱ ta̱a kísi̱na xíʼin na̱ ta̱a ta saátu ná ñaʼá kísi̱ná xíʼin ná ñaʼá, ta ña̱ va̱ʼava kúú ña̱yóʼo nu̱ú na̱ yiví (Efes. 4:18, 19). Iin ña̱ sákusi̱íníka-ini ta̱ Ndi̱va̱ʼa kúú ña̱ ki̱ʼviyó ku̱a̱chi nu̱ú Jehová. Ta̱ Ndi̱va̱ʼa kúú ta̱ xáʼndachíñu nu̱ú ñuyǐví yóʼo, xa̱ʼa̱ ña̱kán na̱ yiví xáʼndachíñuna nu̱ú táʼan miína, ta xa̱ʼa̱ ña̱yóʼo nina tu̱ndóʼova íyo. Soo su̱ví nda̱saa ña̱yóʼo kéʼéna, chi saátu va̱ása ndáana ñuʼú yóʼo ta ni kití tí íyo nu̱úña nda̱a̱ táki̱ʼva xi̱kuni̱ Jehová keʼéna (Ecl. 8:9; Gén. 1:28). Ña̱kán sava na̱ científico káchina ña̱ ti̱xin loʼo ku̱i̱ya̱ ndiʼi-xa̱ʼa̱ ku̱a̱ʼání kití xíʼin planta, xa̱ʼa̱ ña̱ va̱ása va̱ʼa kéʼé na̱ yiví xíʼin ñuʼú yóʼo. w21.07 12 párr. 13, 14

Sava na̱ káchíñu nu̱ú Jehová, ndákavaní-inina xa̱ʼa̱ ña̱ va̱ása va̱ʼa ke̱ʼéna tá ya̱chi̱, ta kíxáʼana ndákanixi̱nína ña̱ va̱ása ixakáʼnu-ini Jehová xa̱ʼa̱na ni ná ndandikó-inina. Tá saá ndóʼún, iin ña̱ chindeétáʼan xíʼún kúú ña̱ kunda̱a̱-iniún ña̱ kúni̱níva Jehová na̱ʼa̱ra ña̱ kúʼvi̱ní-inira xínira yóʼó. Kiviva kusi̱í-iniyó kachíñuyó nu̱ú Jehová, ta vií koo ña̱ xínitúni̱yó. ¿Nda̱chun? Saáchi “ni̱i̱ se̱ʼera ta̱ Jesús kúú ña̱ ndákata ku̱a̱chiyó” (1 Juan 1:7). Tá ndákava-iniyó xa̱ʼa̱ ña̱ va̱ása va̱ʼa kéʼéyó, ná ndakaʼányó ña̱ kúni̱níva Jehová ixakáʼnu-inira xa̱ʼa̱yó tá ndixa ndándikó-iniyó. Ná kotoyó ndáa ki̱ʼva chi̱táʼan ta̱ rey David ña̱ ndixaní kúʼvi̱-ini Jehová xínira miíyó xíʼin ña̱ íxakáʼnu-inira xa̱ʼa̱yó. Ña̱yóʼo ka̱ʼyíra: “Saáchi nda̱a̱ táki̱ʼva va̱ása kívi chuʼunyó nda̱saa súkun ndiví nu̱ú ñuʼú yóʼo, saá va̱ása kívi chuʼunyó ña̱ ndixaní kúʼvi̱-ini Ndióxi̱ xínira na̱ íxato̱ʼó-ñaʼá. Nda̱a̱ táki̱ʼva xíká kíndo̱o nu̱ú kána ñu̱ʼu xíʼin nu̱ú kíʼviña saá xíká chíndoora ku̱a̱chiyó” (Sal. 103:11, 12). w21.11 5 párr. 12, 13

Ta̱a ta̱ ndásakáʼnu Jehová, xíniñúʼu ixato̱ʼóníra ñá síʼira (1 Ped. 3:7). Ña̱yóʼo kúni̱ kachiña ña̱ xíniñúʼu kundayáʼviníñá nu̱úra, ta viíní keʼéra xíʼinñá. ¿Ndáa ki̱ʼva keʼéra ña̱yóʼo? Xíniñúʼu na̱ʼa̱ra ña̱ ndáyáʼviñá nu̱úra, ta va̱ása ka̱ʼa̱nra xíʼinñá keʼéñá ña̱ʼa ña̱ va̱ása kuchiñuñá keʼéñá. Ta saátu va̱ása chitáʼanrañá xíʼin inka ná ñaʼá. ¿Ndáaña kundoʼo ñá síʼira tá ná keʼéra ña̱yóʼo? Ná kotoyó ña̱ ndo̱ʼo iin ñá hermana ñá naní Rosa. Su̱ví testigo Jehová kúú yiíñá xa̱ʼa̱ ña̱kán chítáʼanrañá xíʼin inka ná ñaʼá. Káʼa̱n-ndi̱va̱ʼaníra xíʼinñá ta ndákava-iniñá, xa̱ʼa̱ ña̱yóʼo xíka-iniñá á íyo iin na̱ ndixa kúʼvi̱-ini xíniñaʼá, ñáyóʼo káchiñá: “Ndiʼi tiempo xíniñúʼu sándakaʼánna yi̱ʼi̱ ña̱ ndáyáʼvii̱ nu̱ú Jehová”. Ta̱a ta̱ ndásakáʼnu Jehová va̱ása kéʼéra táʼan ña̱ kéʼé yií ñá hermana yóʼo, saáchi íxato̱ʼóra ñá síʼira ta kúnda̱a̱-inira ña̱ saá viíní kutáʼanra xíʼinñá ta saátu xíʼin Jehová. Ta̱a ta̱ íxato̱ʼó ñá síʼi, káʼa̱n va̱ʼara xa̱ʼa̱ñá. Ta káʼa̱nra xíʼinñá ña̱ kúʼvi̱ní-inira xínirañá, ta saátu káʼa̱nra tu̱ʼun va̱ʼa xíʼinñá tá viíní ke̱ʼéñá iin ña̱ʼa. w21.07 22 párr. 7, 8

Ná ndakanixi̱níyó ña̱ ndátuyó ndakiʼinyó iin ña̱ʼa ña̱ chi̱ndaʼána ndaʼa̱yó ta xíniñúʼuníyóña, soo xa̱a̱ naʼání ndátuyóña ta ta̱ʼán kixaa̱ña. Soo, ¿ndáaña keʼéyó tá ku̱ndaa̱-iniyó ña̱ íyo iin ña̱ ku̱u ta xa̱ʼa̱ ña̱yóʼo ta̱ʼán kixaa̱ ña̱ʼa ña̱ ndátuyó? Sana kúee koo iniyó ta kundatuyóña. Nu̱ú Proverbios 13:11 va̱xi iin ña̱ chindeétáʼan xíʼinyó ña̱ kúee koo iniyó. Ña̱yóʼo káchiña: “Na̱ yiví na̱ kamaní ndúkúiká, kamava ndiʼi ña̱yóʼo ndaʼa̱na, soo na̱ ndákaya loʼo tá loʼoña, nduku̱a̱ʼákaña ndaʼa̱na”. ¿Ndáaña sákuaʼayó xíʼin versículo yóʼo? Tá ndíchi ndákanixi̱níyó, kúee keʼéyó iin ña̱ʼa tasaá vií kanaña. Proverbios 4:18 káchiña: “Yichi̱ na̱ kéʼé ña̱ nda̱kú íyoña nda̱a̱ táki̱ʼva íyo ñu̱ʼu tá kítaña xi̱ta̱a̱n, ta ña̱yóʼo loʼo tá loʼo ndeéka ndáyeʼe̱ña tá xa̱a̱ ku̱a̱ʼa̱n túvi”. Ña̱ versículo yóʼo náʼa̱ña nu̱úyó ña̱ loʼo tá loʼo sánáʼa̱ Jehová na̱ ñuura xa̱ʼa̱ ña̱ kúni̱ra keʼéra chí nu̱únínu. w21.08 8 párr. 1, 3, 4

Xa̱a̱ ku̱yatinní ndiʼi-xa̱ʼa̱ ñuyǐví ta̱ Ndi̱va̱ʼa ta xa̱ʼa̱ ña̱yóʼo íyoní chiñu nu̱úyó (Mat. 24:14; Luc. 10:2; 1 Ped. 5:2). Ndiʼiyó kúni̱yó keʼéyó ku̱a̱ʼáka chiñu nu̱ú Jehová. Ta xa̱a̱ ku̱a̱ʼání na̱ hermano ki̱xáʼana kéʼéna ña̱yóʼo, savana kúni̱na koona precursor, inkana kúni̱na kachíñuna ti̱xin Betel á kúni̱na kachíñuna nu̱ú íxava̱ʼana veʼe nu̱ú ndásakáʼnuyó Jehová. Ta ku̱a̱ʼání na̱ hermano chíka̱a̱na ndee̱ ña̱ xa̱a̱na koona siervo ministerial á anciano (1 Tim. 3:1, 8). Kúsi̱íní-ini Jehová tá xítora ña̱ kúni̱ní na̱yóʼo kachíñuna nu̱úra (Sal. 110:3). ¿Á nda̱kava-iniyó chi ta̱ʼán saxínuyó ña̱ xi̱kuni̱yó keʼéyó? Tá saá íyo ña̱ ndóʼoyó ná natúʼunyó xíʼin Jehová xa̱ʼa̱ ña̱yóʼo (Sal. 37:5-7). Ná nda̱ka̱tu̱ʼunyó na̱ hermano na̱ xa̱a̱ ku̱a̱ʼá tiempo ndásakáʼnu Ndióxi̱ ndáa ña̱ʼa kúú ña̱ xíniñúʼu viíka keʼéyó, ta ná chika̱a̱yó ndee̱ ña̱ kundiku̱nyó consejo ña̱ táxina ndaʼa̱yó. Tá ná keʼéyó ña̱yóʼo saá xa̱a̱yó saxínuyó ña̱ kúni̱yó keʼéyó. w21.08 20 párr. 1; 21 párr. 4

Ná ndakanixi̱níyó xa̱ʼa̱ ñá Ana ñá xi̱kuu profeta. Ni ni̱xi̱ʼi̱ yiíñá ta ni xi̱kuumiíñá 84 ku̱i̱ya̱, ndiʼi tiempo xi̱ndika̱a̱ñá ti̱xin templo. Xa̱ʼa̱ ña̱ nda̱kúní ni̱xi̱yo iniñá, Jehová ta̱xira ña̱ ná kuniñá ta̱ Jesús tá ni̱xi̱yo loʼora (Luc. 2:36-38). Tiempo vitin ku̱a̱ʼání na̱ hermano na̱ xa̱a̱ ku̱chée va̱ʼaní yichi̱ chínúuna nu̱ú na̱ hermano na̱ válíka. Ña̱kán ku̱a̱ʼání ña̱ va̱ʼa sakúaʼayó tá ná taváyó tiempo ña̱ nda̱ka̱tu̱ʼunyóna xa̱ʼa̱ ndiʼi ña̱ xa̱a̱ ndóʼona ti̱xin ñuu Jehová, ta kuniso̱ʼoyó ña̱ natúʼunna xíʼinyó. Na̱ hermanoyó na̱ xa̱a̱ ku̱chée ndáyáʼvinína ti̱xin ñuu Jehová. Na̱yóʼo xa̱a̱ xínina ndáa ki̱ʼva táxi Jehová ku̱a̱ʼání bendición ndaʼa̱ na̱ ñuura, ta saátu ndaʼa̱ miína. Ku̱a̱ʼání ña̱ xa̱a̱ sa̱kúaʼana xíʼin ña̱ va̱ása va̱ʼa ke̱ʼéna tá ya̱chi. Na̱yóʼo ndíchinína ta xíni̱nína, ña̱kán ná sakúaʼayó xíʼin ña̱ kéʼéna (Prov. 18:4). Tá ná taváyó tiempo ña̱ kuxini̱yóna, saá kúú ña̱ kandíxakayó Ndióxi̱. w21.09 3 párr. 4; 4 párr. 7, 8; 5 párr. 11, 13

Na̱ ñuu Ndióxi̱ viíní xíniñúʼuna ña̱ xíni̱na keʼéna, tasaá kúú ña̱ xínu ña̱ ni̱ka̱ʼa̱n ta̱ profeta Isaías ña̱ kuniñúʼuyó “leche tá kúúmií na̱ ñuyǐví” (Is. 60:5, 16). Ndiʼi na̱ ñúʼu ti̱xin ñuu Ndióxi̱ va̱ʼaní káchíñuna saáchi xa̱a̱ 240 país kúú ña̱ nátúʼunna xa̱ʼa̱ Ndióxi̱, ta xa̱a̱ yáʼaka 1,000 nu̱ú tu̱ʼun sándaya̱ʼana tutu ña̱ tává na̱ ñuura. Tiempo vitin kúú ña̱ sákanda̱ Jehová ndiʼi na̱ ñuu, xa̱ʼa̱ ña̱yóʼo ndiʼi na̱ yiví xíniñúʼu ndaka̱xinna keʼéna iin ña̱ ndáyáʼviní: ¿á chindeétáʼanna xíʼin Reino Ndióxi̱ á na̱ chíñu na̱ íyo nu̱ú ñuʼú yóʼova kundaa-inina? Ku̱a̱ʼání na̱ ndásakáʼnu Jehová kándíxavana ley ña̱ íyo país nu̱ú ndóona, soo va̱ása kíʼvina xíʼin ña̱ política (Rom. 13:1-7). Saáchi kúnda̱a̱-inina ña̱ iinlá Reino Ndióxi̱ kúú ña̱ kuchiñu sandíʼi-xa̱ʼa̱ tu̱ndóʼo ña̱ íyo nu̱ú na̱ yiví, ta ña̱ Reino yóʼo su̱ví nu̱ú ñuʼú yóʼo íyoña (Juan 18:36, 37). w21.09 17, 18 párr. 13, 14

Tá iin na̱ kúʼvi̱ní-iniún xíniún ki̱tana ti̱xin ñuu Jehová, Ndáyáʼviní ña̱ ndakundeún kutáʼún xíʼin Ndióxi̱, ta saátu xíʼin na̱ veʼún. ¿Ndáa ki̱ʼva keʼún ña̱yóʼo? Iin ña̱ chindeétáʼan xíʼún ña̱ kandíxakaún Ndióxi̱ kúú ña̱ kaʼviún tu̱ʼunra, ta ndakanixi̱níún xa̱ʼa̱ña, ta saátu ña̱ ku̱ʼún reunión. Ná ndakanixi̱níyó xa̱ʼa̱ ña̱ kéʼé ñá Joanna. Saáchi yiváñá xíʼin ku̱ʼvi̱ñá ke̱ena ti̱xin ñuu Jehová. Ñáyóʼo káchiñá: “Va̱ʼaní kúnii̱ tá káʼvii̱ xa̱ʼa̱ ñá Abigaíl, ñá Ester, ta̱ Job, ta̱ José xíʼin ta̱ Jesús. Ña̱ ke̱ʼé na̱yóʼo va̱ʼaní chíndeétáʼanña xíʼi̱n ña̱ vií ndakanixi̱níi̱ ta va̱ása kusuchíníka-inii̱”. Ta ndíʼi̱ní-iniún, va̱ása sandákoún ña̱ ka̱ʼún xíʼinra. Ka̱ʼa̱n xíʼinra ña̱ ná chindeétáʼanra xíʼún kotoún tu̱ndóʼo ña̱ ndóʼún nda̱a̱ táki̱ʼva xíto miíraña, ta ná taxira ña̱ ndíchi ndaʼún. Ta saátu ná na̱ʼa̱ra nu̱ún ndáa yichi̱ kúú ña̱ xíniñúʼu kakaún (Sal. 32:6-8). Sana ixayo̱ʼvi̱ña xíʼún natúʼún xíʼin Jehová xa̱ʼa̱ ña̱ ndóʼún. Soo kúnda̱a̱va-inira xíʼin ña̱ ndóʼún. Ta káʼa̱nra xíʼún ña̱ ná natúʼún xíʼinra xa̱ʼa̱ ndiʼi ña̱ ndóʼún (Éx. 34:6; Sal. 62:7). w21.09 27, 28 párr. 9, 10

Tá ku̱i̱ya̱ 32 tá ni̱ya̱ʼa ña̱ pascua, ta̱ apóstol Pedro, ta̱ Santiago xíʼin ta̱ Juan xi̱nina iin visión. Na̱yóʼo xi̱nina ña̱ na̱sama ki̱ʼva ña̱ náʼa̱ ta̱ Jesús chí xi̱ní iin yuku̱ ña̱ súkun, ta sana ña̱yóʼo xi̱kuu yuku̱ ña̱ xi̱naní Hermón. Tu̱ʼun Ndióxi̱ nátúʼunña xíʼinyó ndáaña ku̱u, káchiña: “Nu̱úra iin nda̱ye̱ʼe̱ña táki̱ʼva káa ñu̱ʼu ta ti̱ko̱to̱ ña̱ ndíxira ki̱ndoo yéʼe̱ña táki̱ʼva íyo luz” (Mat. 17:1-4). Ta saátu xi̱niso̱ʼona ña̱ ni̱ka̱ʼa̱n Ndióxi̱ tu̱ʼun yóʼo: “Ta̱yóʼo kúú se̱ʼi̱ ta̱ kúʼvi̱ní-inii̱ xínii̱; ta̱ sákusi̱í-inii̱. Kuniso̱ʼondó ña̱ káʼa̱nra”. Xíʼin ña̱ ke̱ʼéna ndiʼi tiempo ña̱ xi̱takuna ni̱na̱ʼa̱na ña̱ xi̱niso̱ʼona ña̱ ni̱ka̱ʼa̱n ta̱ Jesús. Ta saátu miíyó kúni̱yó keʼéyó táʼan ña̱ ke̱ʼéna. Táxiníyó tíxa̱ʼvi ndaʼa̱ Jehová saáchi va̱ʼaní xíniñúʼura ta̱ Jesús ña̱ kuniʼira yichi̱ nu̱úyó ti̱xin congregación (Efes. 5:23). Nda̱a̱ táki̱ʼva ke̱ʼé ta̱ apóstol Pedro, ta̱ Santiago xíʼin ta̱ Juan ná chika̱a̱-iniyó kuniso̱ʼoyó ña̱ káʼa̱n ta̱ Jesús. Ku̱a̱ʼání ña̱ va̱ʼa ndakiʼinyó tá ná va̱ása kítayó yichi̱ ña̱ taxi ña̱ kutakuyó, ta saátu ndiʼi tiempo kusi̱í-iniyó. w21.12 22 párr. 1; 27 párr. 19

Iin ta̱ cristiano ta̱ ñuu Corinto, ke̱ʼéra ña̱ kini xíʼin ñá síʼi yivára. Ta ta̱ apóstol Pablo ni̱ka̱ʼa̱nra ña̱ ná tavána ta̱ ta̱a kán ti̱xin congregación. Ña̱ kini ña̱ xi̱keʼé ta̱ ta̱a kán, va̱ása níxi̱chindeétáʼanña xíʼin na̱ congregación, saáchi nda̱a̱ ki̱xáʼana ndákanixi̱nína ña̱ su̱ví ku̱a̱chi ndeéví kúú ña̱ xi̱keʼéra (1 Cor. 5:1, 2, 13). Tá ni̱ya̱ʼa tiempo, ta̱ Pablo ku̱ndaa̱-inira xa̱ʼa̱ ta̱ ta̱a kán ña̱ na̱samara ña̱ kéʼéra ta ndixa nda̱ndikó-inira xa̱ʼa̱ ña̱ ke̱ʼéra. Ta ña̱yóʼo ni̱ka̱ʼa̱n Pablo xíʼin na̱ anciano: “Xíniñúʼu koo káʼnu-inindó xa̱ʼa̱ra ta sandíkondó-inira”. Ta ni̱ka̱ʼa̱nra xíʼinna nda̱chun kúú ña̱ xi̱niñúʼu keʼéna ña̱yóʼo: “Ña̱ va̱ʼa ná kǒo kundi̱ʼi̱ní-inira xa̱ʼa̱ ña̱ kúsuchíní-inira”. Ta̱ Pablo ku̱ndáʼvi-inira xi̱nira ta̱ ta̱a kán, saáchi nda̱ndikó-inira. Ta va̱ása níxi̱kuni̱ra kundi̱ʼi̱ní-ini ta̱ ta̱a kán, ta ndakavaní-inira tasaá va̱ása ndandikóra nu̱ú Jehová (2 Corintios 2:5-8, 11). Nda̱a̱ táki̱ʼva kéʼé mií Jehová saá kéʼé na̱ anciano. Saáchi na̱yóʼo kúndáʼvi-inina xínina inkana. Na̱yóʼo távána iin na̱ ni̱ki̱ʼvi ku̱a̱chi ti̱xin congregación tá xíniñúʼu keʼénaña, soo saátu kivi na̱ʼa̱na ña̱ kúndáʼvi-inina xíninana tá xítona ña̱ kivi keʼénaña. Saáchi tá ná va̱ása tavána na̱yóʼo ti̱xin congregación, va̱ása na̱ʼa̱na ña̱ kúndáʼvi-inina xíninana, ta táxina kéʼéna ña̱ va̱ása va̱ʼa. w21.10 10, 11 párr. 12-15

Tá kéʼéna iin ña̱ va̱ása va̱ʼa xíʼinyó, táki̱ʼva íyo na̱ sátukue̱ʼe̱na saá íyoyó, sava yichi̱ loʼova túkue̱ʼe̱yó soo sava yichi̱ ku̱a̱ʼáva túkue̱ʼe̱yó. Tá kúú, tá xúnayó iin tutu sana táʼnda̱ loʼo nduku ndaʼa̱yó ta kíʼvi̱vaña, soo tá yáʼa ki̱vi̱ ndáʼavaña ta nándósó-iniyó xa̱ʼa̱ña. Ki̱ʼva saá ndóʼoyó tá iin na̱ migoyó ni̱ka̱ʼa̱nna á ke̱ʼéna iin ña̱ va̱ása níkutóoyó á ña̱ sa̱xóʼvi̱ miíyó, ta sana va̱ása ixayo̱ʼvi̱víña xíʼinyó ña̱ ixakáʼnu-iniyó xa̱ʼa̱na. Ta tá ku̱a̱ʼá ni̱ta̱ʼnda̱ ndaʼa̱yó sana xíniñúʼu ndaku̱ku na̱ doctor ña̱yóʼo, ta ndakasina nu̱úña xíʼin ti̱ko̱to̱. Soo tá ná keʼéníyó nu̱ú ni̱ta̱ʼnda̱ ndaʼa̱yó, satúkue̱ʼe̱kavayóña. Ki̱ʼva saá kéʼé iin na̱ sáa̱ní xíʼin na̱ ke̱ʼé ña̱ va̱ása va̱ʼa xíʼinna. Saáchi tá ná ndakaniníxi̱nína xa̱ʼa̱ ña̱ ke̱ʼéna xíʼinna á ña̱ ni̱ka̱ʼa̱nna xíʼinna, saá kúú ña̱ sáxo̱ʼvi̱na miína. Ña̱kán va̱ʼaníka kúú ña̱ kundiku̱nyó ña̱ káʼa̱n texto ña̱ káʼviyó ki̱vi̱ vitin. w21.12 12 párr. 15

Ná kachiyó ña̱ iin ta̱ anciano ki̱xáʼara ndíʼi̱ní-inira xa̱ʼa̱ ki̱ʼva ña̱ ndíxi iin ta̱ hermano á xa̱ʼa̱ ki̱ʼva ña̱ ndásaviíra miíra. Soo, siʼna ná ndakanixi̱níra xa̱ʼa̱ ña̱yóʼo: “¿Á yáʼandosó ta̱ hermano kán ña̱ va̱xi nu̱ú tu̱ʼun Ndióxi̱ xíʼin ña̱ kéʼéra?”. Xa̱ʼa̱ ña̱ va̱ása kúni̱ ta̱ anciano yóʼo kundiku̱nra ña̱ ndákanixi̱ní miíra, va̱ʼaka ndáka̱tu̱ʼunra inka ta̱ anciano á iin ta̱ hermano ta̱ xa̱a̱ xu̱xaini ña̱ va̱ʼa ka̱ʼa̱nra xíʼinra ndáaña ndákanixi̱níra. Tasaá inkáchi kotona ndáaña ni̱ka̱ʼa̱n ta̱ Pablo xa̱ʼa̱ ki̱ʼva ña̱ ndíxiyó xíʼin ki̱ʼva ña̱ ndásaviíyó miíyó (1 Tim. 2:9, 10). Va̱ása níka̱ʼa̱nví ta̱ Pablo xa̱ʼa̱ iin tá iin ña̱ xíniñúʼu keʼéyó xíʼin ña̱ va̱ása xíniñúʼu keʼéyó. Chi ña̱ ni̱ka̱ʼa̱nra xa̱ʼa̱ kúú tu̱ʼun ña̱ táxi yichi̱ nu̱úyó, ña̱ kivi chindeétáʼan xíʼinyó ña̱ kiʼinníyó kuenta xíʼin ki̱ʼva ña̱ ndásaviíyó miíyó ta viíní ndakanixi̱níyó xa̱ʼa̱ ña̱yóʼo ta keʼéyóña xíʼin ña̱ to̱ʼó. Ta̱yóʼo xi̱kunda̱a̱-inira ña̱ kiviva ndaka̱xinyó ndáa ki̱ʼva kundixiyó á ndáa ki̱ʼva ndasaviíyó miíyó, nani tá va̱ása yáʼandosóyó ña̱ káʼa̱n tu̱ʼun Ndióxi̱. Ña̱kán, tá kúni̱ na̱ anciano taxina consejo ndaʼa̱ iin na̱ hermano, siʼna xíniñúʼu kotona á kíʼin na̱ hermano yóʼo kuenta xíʼin ki̱ʼva ña̱ ndásaviína miína ta á vií ndákanixi̱nína xa̱ʼa̱ ña̱ ndáka̱xinna kundixina. Ña̱kán, ná va̱ása ixandúxayó xíʼin na̱ hermano ña̱ keʼéna ña̱ kútóo miíyó (Rom. 14:10). w22.02 16 párr. 9, 10

¿Nda̱chun ndixaní xíniñúʼu kuʼvi̱-iniyó kunitáʼanyó? Sava proverbio ña̱ va̱xi nu̱ú Biblia káʼa̱nña xíʼinyó nda̱chun xíniñúʼu na̱ʼa̱yóña. Tá kúú ña̱yóʼo: “Ndiʼi tiempo na̱ʼún ña̱ ndixaní kúʼvi̱-iniún xíniún inkana, ta nda̱kú koo iniún xíʼinna [...] tasaá, kusi̱í-ini Ndióxi̱ xíʼin ña̱ kéʼún, ta saátu na̱ yiví kusi̱í-inina xíʼún, ta ndiʼina kunda̱a̱-ini xa̱ʼún ña̱ ndíchiníún”; “na̱ yiví na̱ ndixaní kúʼvi̱-ini xíni inkana, ku̱a̱ʼání ña̱ va̱ʼa ndákiʼinna”, ta “na̱ kéʼé ña̱ va̱ʼa ta ndixaní kúʼvi̱-inina xínina inkana, Ndióxi̱ taxira ña̱ kutakuna” (Prov. 3:3, 4; 11:17, nota; 21:21). Proverbio yóʼo káʼa̱nña xíʼinyó nda̱chun kúú ña̱ xíniñúʼu ndixaní kuʼvi̱-iniyó kuniyó inkana. Ña̱ nu̱ú, chi saá kúú ña̱ ndáyáʼvikayó nu̱ú Jehová. Ña̱ u̱vi̱, chi ña̱ va̱ʼa miíyó kúúña, tá kúú chíndeétáʼanña xíʼinyó ña̱ ku̱a̱ʼání tiempo kutáʼanyó xíʼin inkana. Ta ña̱ u̱ni̱, chi ku̱a̱ʼání ña̱ va̱ʼa ndakiʼinyó chí nu̱únínu, tá kúú ña̱ kutakuyó ndiʼi tiempo. Ña̱kán xíniñúʼu kandíxayó ña̱ káʼa̱n Jehová, ña̱ ndixaní ná kuʼvi̱-iniyó kunitáʼanyó ta kundáʼvi-iniyó kunitáʼanyó. w21.11 8 párr. 1, 2

Va̱ása ndakava-iniún tá iin tu̱ndóʼo ña̱ ni̱ya̱ʼún nu̱ú á iin ña̱ yáʼún nu̱ú vitin náʼa̱ña ña̱ xíniñúʼu kandíxaníkaún Ndióxi̱. Ndukú ki̱ʼva ña̱ kandíxakaúnra. Ta taxi ná chindeétáʼan na̱ veʼún xíʼin na̱ hermano xíʼún, saáchi Jehová kúú ta̱ xíniñúʼu na̱yóʼo ña̱ va̱ʼa chindeétáʼanra xíʼún. Tá táxiún ña̱ chindeétáʼan Jehová xíʼún tá yáʼún nu̱ú tu̱ndóʼo tiempo vitin, saá kúú ña̱ kandíxaníúnra ña̱ chindeétáʼanra xíʼún kundeé-iniún ya̱ʼún nu̱ú tu̱ndóʼo ña̱ kixi nu̱ún. Ta̱ Jesús chi̱ndeétáʼanra xíʼin na̱ discípulora ña̱ kunda̱a̱-inina ama kúú ña̱ xíniñúʼu kandíxaníkana Ndióxi̱. Ta va̱ása níxi̱ka-inira ña̱ mií Jehová chindeétáʼan xíʼin na̱yóʼo tá ná kixi tu̱ndóʼo nu̱úna (Juan 14:1; 16:33). Saátu xi̱kandíxara ña̱ ku̱a̱ʼání na̱ yiví ka̱kuna xa̱ʼa̱ ña̱ kándíxana Ndióxi̱ tá ná kixaa̱ ña̱ gran tribulación (Apoc. 7:9, 14). ¿Á ka̱kún xíʼin na̱yóʼo? Ka̱kuvaún tá ná chindeétáʼan Jehová xíʼún, ta saátu tá ná chika̱a̱ún ndee̱ ña̱ kandíxaúnra tiempo vitin (Heb. 10:39). w21.11 25 párr. 18, 19

Tiempo vitin va̱ása ndátuvíyó keʼé Jehová iin milagro ña̱ va̱ʼa sakǎkura miíyó. Soo kúnda̱a̱-iniyó ña̱ su̱ví ndiʼi tiempoví xo̱ʼvi̱ na̱ kándíxa Ndióxi̱. Tá ná kixi tu̱ndóʼo nu̱úyó chí nu̱únínu, saá kúú ña̱ na̱ʼa̱yó á kándíxayó ña̱ kuchiñu Jehová kundaara miíyó. Tá ná kixáʼa na̱ chíñu na̱ kúú Gog ña̱ Magog ixandi̱va̱ʼana xíʼinyó, sana ndakanixi̱níyó ña̱ kaʼnína miíyó. Ta xa̱ʼa̱ ña̱kán kúú ña̱ xíniñúʼu kandíxaníyó ña̱ kuchiñu Jehová sakǎkura miíyó. Nu̱ú na̱ yiví kooyó nda̱a̱ táki̱ʼva íyo ndikachi tí kǒo xi̱toʼo ta kǒo na̱ ndakiʼin tu̱ʼunyó (Ezeq. 38:10-12). Ta saátu, ndakanixi̱nína ña̱ kuchiñuvana xíʼinyó, saáchi kǒo tu̱xi̱í kúúmiíyó ta ni va̱ása xíni̱yó kanitáʼanyó. Soo xa̱ʼa̱ ña̱ va̱ása kándíxana Jehová, va̱ása kunda̱a̱-inina ña̱ xa̱a̱ koo tu̱ʼva na̱ ángelra ña̱ ndakiʼinna tu̱ʼunyó. Ta miíyó kúnda̱a̱va-iniyó xa̱ʼa̱ ña̱yóʼo saáchi kándíxaníyó Jehová. Ña̱kán ndakanda̱ní-inina tá ná kixi na̱ ángelra sakǎkuna miíyó (Apoc. 19:11, 14, 15). w22.01 6 párr. 12, 13

Tá ndiʼi na̱ hermano ndáyáʼvina nu̱ú Jehová, saátu xíniñúʼu kundayáʼvina nu̱ú miívayó. Xíniñúʼu chika̱a̱-iniyó keʼéyó nda̱a̱ ndáaka ña̱ʼa ña̱ va̱ʼa kundaayó na̱ hermanoyó. Tá ku̱ndaa̱-iniyó ña̱ va̱ása va̱ʼa níkuni iin na̱ hermano xíʼin ña̱ ke̱ʼéyó, ná va̱ása ndakanixi̱níyó ña̱ su̱ví ña̱ ndeéví kúú ña̱ ke̱ʼéyó xíʼinna ta ka̱ʼa̱nyó ña̱ xa̱a̱ saá inivana, ta xíniñúʼu nandósó-inina xa̱ʼa̱ ña̱ ku̱u. ¿Nda̱chun va̱ása va̱ʼa kúni savana xíʼin ña̱ kéʼéyó? Saáchi xa̱ʼa̱ ki̱ʼva ña̱ xa̱ʼnuna túvina ña̱ va̱ása ndáyáʼvina nu̱ú inkana. Á sana sa̱kán loʼo tiempo ki̱xáʼana ndásakáʼnuna Ndióxi̱, ta ta̱ʼán sákuaʼana ixakáʼnu-inina xa̱ʼa̱ inkana tá kéʼéna ña̱ va̱ása va̱ʼa xíʼinna. Soo ni nda̱a̱ ndáaka xa̱ʼa̱ kúúña, xíniñúʼu chika̱a̱yó ndee̱ ña̱ ndasaviíyó ku̱a̱chi yóʼo xíʼinna. Ta saátu tá kamaní sáa̱ iin na̱ hermano xíniñúʼu chika̱a̱na ndee̱ ña̱ nasamana ki̱ʼva ña̱ íyona. Ta ndáyáʼviní keʼéna ña̱yóʼo, chi saá kúú ña̱ kivi xa̱a̱na si̱í koona ta vií kutáʼanna xíʼin ndiʼi na̱ hermano. w21.06 21 párr. 7

Kúnda̱a̱va-ini ta̱ Jesús xíʼin ña̱ ndóʼún. Tá ndíʼi̱ní-iniyó, kúsi̱íní-iniyó xa̱ʼa̱ ña̱ íyo iin migoyó ta̱ va̱ʼaní kúnda̱a̱-ini xíʼin ña̱ ndóʼoyó, saáchi xa̱a̱ ni̱ya̱ʼara nu̱ú táʼan tu̱ndóʼo ña̱ kúúmiíyó. Ta ta̱yóʼo kúú ta̱ Jesús. Kúnda̱a̱-inira ndáa ki̱ʼva ndóʼoyó tá ndákava-iniyó ta xíniñúʼu chindeétáʼanna xíʼinyó. Ta saátu kúnda̱a̱-inira ndáa ki̱ʼva na̱kuva̱ʼayó, ta chíndeétáʼanra xíʼinyó mií tiempo ña̱ xíniñúʼuyóña (Heb. 4:15, 16). Tá ndíka̱a̱ ta̱ Jesús Jardín ña̱ Getsemaní, ta̱xira ña̱ ná chindeétáʼan iin ángel xíʼinra, ta saátu miíyó ná taxiyó chindeétáʼan Jehová xíʼinyó. Ta ña̱ va̱ʼa keʼéra ña̱yóʼo, kivi kuniñúʼura iin tutu ña̱ tává na̱ ñuura, iin video, iin discurso á kivitu kuniñúʼura iin na̱ anciano á iin na̱ migoyó ña̱ va̱ʼa chika̱a̱ra ndee̱ xíʼinyó. (Luc. 22:39-44) Jehová sandíkora-iniún. ¿Ndáa ki̱ʼva ndásandakú Jehová iniyó? Tá káʼa̱nyó xíʼin Ndióxi̱ va̱ʼaní sándi̱kora-iniyó ta nda̱a̱ miíyó va̱ása kúnda̱a̱-iniyó ndáa ki̱ʼva sándi̱kora-iniyó (Filip. 4:6, 7). w22.01 18 párr. 17-19

Kándíxavayó ña̱ viíní íyo ndiʼi ña̱ ndáka̱xin Jehová keʼéra. Soo sana íxayo̱ʼvi̱ña xíʼinyó kandíxayó na̱ nda̱kaxinra kuniʼi yichi̱ nu̱úyó. Ta sana nda̱a̱ kivi xa̱a̱yó ndakanixi̱níyó ña̱ va̱ása kéʼéna ña̱ kúni̱ Jehová chi kéʼéna ña̱ kúni̱ miívana. Jehová kándíxaníra na̱ nda̱kaxinra kuniʼi yichi̱ nu̱ú na̱ ñuura, ña̱kán va̱ása kivi ka̱ʼa̱nyó ña̱ kándíxayó Jehová tá va̱ása kándíxayó na̱yóʼo. Tiempo vitin Jehová ta̱xira chiñu ndaʼa̱ na̱ esclavo na̱ nda̱kúní-ini na̱ ndíchiní ña̱ va̱ʼa kuniʼina yichi̱ nu̱ú na̱ ñuura (Mat. 24:45). Nda̱a̱ táki̱ʼva ke̱ʼé na̱ cuerpo gobernante na̱ ni̱xi̱yo tá siglo nu̱ú, saátu na̱yóʼo níʼina yichi̱ nu̱ú na̱ ñuu Ndióxi̱ tiempo vitin ta káʼa̱nna xíʼin na̱ anciano ndáa ki̱ʼva kundaana na̱ congregación. Ta na̱ anciano kúú na̱ chíndeétáʼan xíʼin na̱ congregación ña̱ kundiku̱nna ña̱ káʼa̱n na̱yóʼo. Tá ná kundiku̱nyó ña̱ káʼa̱n na̱ ñuu Ndióxi̱ xíʼinyó ta saátu ña̱ káʼa̱n na̱ anciano, saá kúú ña̱ náʼa̱yó ña̱ kándíxaníyó ña̱ viíní íyo ña̱ ndáka̱xin Jehová keʼéra. w22.02 4 párr. 7, 8

Kúsi̱íní-iniyó xa̱ʼa̱ ña̱ ndásakáʼnuyó Ndióxi̱. Kúsi̱íní-iniyó tá chíndeétáʼanyó xíʼin na̱ yiví na̱ kúni̱ “kutaku ndiʼi tiempo” ña̱ xa̱a̱na ndasakáʼnuna Jehová (Hech. 13:48). Ndóʼoyó nda̱a̱ táki̱ʼva ndo̱ʼo ta̱ Jesús saáchi “ni̱kusi̱íní-inira i̱xaa ña̱ espíritu santo”, tá nda̱ndikó na̱ discípulora ña̱ ni̱xa̱ʼa̱nna na̱túʼunna xíʼin na̱ yiví xa̱ʼa̱ Ndióxi̱, ta na̱túʼunna xíʼinra xa̱ʼa̱ ndiʼi ña̱ ndo̱ʼona (Luc. 10:1, 17, 21). Ta̱ apóstol Pablo ta̱xira consejo yóʼo ndaʼa̱ ta̱ Timoteo, ka̱chira: “Kiʼin va̱ʼún kuenta xíʼin ña̱ kéʼún ta saátu ña̱ sánáʼún”. Ta ni̱ka̱ʼa̱nkara: “Chi saá kúú ña̱ sakǎkún miíún ta saátu na̱ xíniso̱ʼo ña̱ káʼún” (1 Tim. 4:16). Xíʼin ña̱ ni̱ka̱ʼa̱n ta̱ apóstol Pablo kúnda̱a̱-iniyó ña̱ ndáyáʼviní sakúaʼa na̱ yiví xa̱ʼa̱ Ndióxi̱, chi saá kivi ka̱kuna. Kíʼinníyó kuenta xíʼin ña̱ kéʼéyó, saáchi nátúʼunyó xa̱ʼa̱ Reino Ndióxi̱. Ta saátu viíní íyo ña̱ kéʼéyó chi kúni̱yó ná ndukáʼnu ki̱vi̱ Jehová, ta xíʼin ña̱ kéʼéyó náʼa̱yó ña̱ kándíxayó ña̱ nátúʼunyó xíʼin na̱ yiví (Filip. 1:27). Tá xa̱a̱ ya̱chi̱ka káʼviyó xa̱ʼa̱ ña̱ natúʼunyó xíʼin na̱ yiví, ta káʼa̱nyó xíʼin Jehová ña̱ ná chindeétáʼanra xíʼinyó ña̱ natúʼunyó xíʼinna xa̱ʼa̱ra, saá náʼa̱yó ña̱ kíʼin va̱ʼayó kuenta xíʼin ña̱ sánáʼa̱yó. w21.10 24 párr. 1, 2

Ña̱ ndasaxa̱áyó ki̱ʼva ña̱ kéʼéyó kúni̱ kachiña ndakanixi̱níyó ta keʼéyó nda̱a̱ táki̱ʼva kúni̱ mií Jehová ta na̱ʼa̱yó ña̱ va̱ʼa ña̱ kúúmiíra. ¿Ndáa ki̱ʼva ndásaxa̱áyó ki̱ʼva ña̱ kéʼéyó? Ndásaxa̱áyóña tá táxiyó ña̱ ná nasama espíritu santo Ndióxi̱ ña̱ ndákanixi̱níyó xíʼin ña̱ kéʼéyó. Tá kúú na̱ yiví na̱ ndásaxa̱á ki̱ʼva ña̱ kéʼéna kúʼvi̱-inina xínina Jehová ta saátu na̱ ñuura (Mat. 22:36-39). Ni yáʼana nu̱ú tu̱ndóʼo kúsi̱íva-inina (Sant. 1:2-4). Chíka̱a̱na ndee̱ ña̱ va̱ása tavána ku̱a̱chi xíʼin inkana (Mat. 5:9). Kúee-inina xíʼin inkana ta to̱ʼó-inina xíʼinna (Col. 3:13). Kúʼvi̱-inina xínina ña̱ va̱ʼa ta kéʼénaña (Luc. 6:35). Xíʼin ña̱ kéʼéna náʼa̱na ña̱ kándíxana Ndióxi̱ (Sant. 2:18). Va̱ása kama sáa̱na tá kéʼé inkanana (Tito 3:2). Ta saátu xáʼnu̱-inina ña̱ keʼéna ña̱ va̱ása va̱ʼa (1 Cor. 9:25, 27). Ña̱ va̱ʼa ndasaxa̱áyó ki̱ʼva ña̱ kéʼéyó xíniñúʼu kuumiíyó táʼan ña̱ va̱ʼa ña̱ va̱xi nu̱ú Gálatas 5:22, 23, ta saátu ña̱ va̱ʼa ña̱ va̱xi nu̱ú inkaka texto. w22.03 8, 9 párr. 3, 4

Na̱ anciano kivi kundiku̱nna yichi̱ ta̱ apóstol Pablo ña̱ va̱ása natúʼun kuitína xíʼin na̱ yiví xa̱ʼa̱ tu̱ʼun Ndióxi̱ veʼe tá veʼe, chi nda̱a̱ ndáaka nu̱ú xíkana kivi keʼéna ña̱yóʼo (Efes. 6:14, 15). Ta saátu, tá kéena nátúʼunna xa̱ʼa̱ Ndióxi̱ kivi sanáʼa̱na inkana, tá kúú na̱ siervo ministerial (1 Ped. 5:1, 2) Na̱ anciano va̱ása xíniñúʼu kundi̱ʼi̱ kuití inina xa̱ʼa̱ chiñu ña̱ íyo ti̱xin congregación á ti̱xin circuito ta xa̱ʼa̱ ña̱yóʼo kǒoka tiempo kuumiína ña̱ natúʼunna xa̱ʼa̱ Ndióxi̱ (Mat. 28:19, 20). Tá kúni̱na koo tiempo nu̱úna ña̱ keʼéna ndiʼi chiñu ña̱ kúúmiína, sana sava yichi̱ ka̱ʼa̱nna ña̱ va̱ása kivika keʼéna inka chiñu ña̱ táxina ndaʼa̱na. Tá ná ndakanixi̱nína xa̱ʼa̱ ña̱yóʼo ta ka̱ʼa̱nna xíʼin Ndióxi̱, sana kiʼinna kuenta ña̱ tá ná kandíxana keʼéna inkaka chiñu, va̱ása keʼéna mií ña̱ ndáyáʼvika. Tá kúú ña̱ kaʼvina xíʼin na̱ veʼena ndiʼi semana, ña̱ natúʼunna xa̱ʼa̱ Ndióxi̱ á ña̱ sanáʼa̱na na̱ va̱lí se̱ʼena ña̱ keʼéna ña̱yóʼo. Soo xíniñúʼu ndakaʼánna ña̱ kúnda̱a̱va-ini Jehová ña̱ kéʼéna ña̱yóʼo xa̱ʼa̱ ña̱ kúni̱na viíní keʼéna chiñu ña̱ xa̱a̱ kúúmiína. w22.03 27 párr. 4, 7; 28 párr. 8

Ná ndakaʼányó tá ki̱xáʼayó sákuaʼayó xa̱ʼa̱ Ndióxi̱, sana xi̱yi̱ʼvíyó ña̱ xa̱a̱yó kooyó testigo Jehová. Ta xi̱ndakanixi̱níyó ña̱ va̱ása kuchiñuyó natúʼunyó xíʼin na̱ yiví veʼe tá veʼe. Ta sana xi̱yi̱ʼvíyó ña̱ sa̱a̱ na̱ veʼeyó xíʼinyó á na̱ migoyó. Tá saá, kúnda̱a̱va-iniyó xíʼin ña̱ ndóʼo na̱ káʼviyó xíʼin tá ndóʼona táʼan ña̱yóʼo. Ta̱ Jesús ni̱ka̱ʼa̱nra ña̱ savana yi̱ʼvína, soo ni̱ka̱ʼa̱nra xíʼin na̱ discípulora ña̱ va̱ása taxina kasi ña̱yóʼo nu̱úna ña̱ xa̱a̱na ndasakáʼnuna Jehová (Mat. 10:16, 17, 27). Loʼo tá loʼo ná sanáʼa̱yó na̱ káʼviyó xíʼin ña̱ natúʼunna xa̱ʼa̱ ña̱ sákuaʼana. Sana ni̱yi̱ʼvíva na̱ discípulo ta̱ Jesús tá ni̱ka̱ʼa̱nra xíʼinna ña̱ ku̱ʼu̱nna natúʼunna xíʼin na̱ yiví. Soo chi̱ndeétáʼanra xíʼinna tá ni̱ka̱ʼa̱nra xíʼinna ndáana natúʼunna xíʼin ta ndáaña ka̱ʼa̱nna (Mat. 10:5-7). ¿Ndáa ki̱ʼva kundiku̱nyó yichi̱ra? Ndíku̱nyó yichi̱ra tá chíndeétáʼanyó xíʼin na̱ káʼviyó xíʼin ña̱ kunda̱a̱-inina ndáana natúʼunna xíʼin. Tá kúú kivi nda̱ka̱tu̱ʼunyóna á xíni̱na iin na̱ yiví na̱ xíniñúʼu sákuaʼa xa̱ʼa̱ ña̱ va̱xi nu̱ú tu̱ʼun Ndióxi̱. Tándi̱ʼi, ná chindeétáʼanyó xíʼinna ña̱ kunda̱a̱-inina ndáa ki̱ʼva natúʼunna xíʼin na̱ yiví yóʼo. w21.06 6 párr. 15, 16

“Iin kama ki̱xáʼa ndíva ndiʼi veʼe nu̱ú íxi̱kóna ña̱ʼa, ta saátu veʼe ña̱ súkunní”. “Ni̱yi̱ʼvíkaví na̱ yiví, ku̱a̱ʼánína ni̱ka̱ʼa̱nna ña̱ loʼova minuto ni̱xi̱yoña, soo nu̱ú yi̱ʼi̱ naʼáníva ni̱xi̱yoña”. Ña̱yóʼo kúú ña̱ ni̱ka̱ʼa̱n sava na̱ yiví na̱ ni̱ka̱ku tá ndeéní ni̱ta̱an chí Nepal tá ku̱i̱ya̱ 2015. Ta ki̱ʼva saá kúu tiempo vitin, saáchi Jehová sákanda̱ra ndiʼi ñuu ña̱ íyo iníísaá nu̱ú ñuʼú, ta xa̱a̱ ku̱a̱ʼání ku̱i̱ya̱ kéʼéraña. Ta̱ Ageo ni̱ka̱ʼa̱nra xa̱ʼa̱ ña̱ kúu tiempo vitin, ka̱chira: “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Si̱lóʼo kúma̱ní ta sakánda̱ tukui̱ ndiví xíʼin ñuʼúʼ” (Ageo 2:6). Ku̱a̱ʼání ña̱ʼa ndíʼi-xa̱ʼa̱ tá táan, soo tá ni̱ka̱ʼa̱n ta̱ Ageo ña̱ kanda̱ ñuʼú yóʼo, ña̱ va̱ʼava ndakiʼinyó xíʼinña. Jehová ka̱chira: “Sakánda̱i̱ ndiʼi ñuu, ta ndiʼi ña̱ʼa ña̱ ndáyáʼvi ña̱ íyo nu̱ú ñuʼú ki̱ʼviña ini veʼe yóʼo, ta sakútúi̱ña xíʼin ña̱ʼa yóʼo”. w21.09 14 párr 1-3

Tá kúni̱yó viíní kitáʼanyó xíʼin iin na̱ yiví xíniñúʼu natúʼun ni̱ʼiyó xíʼinna ta ka̱ʼa̱nyó xíʼinna xa̱ʼa̱ ña̱ ndóʼoyó, ta ki̱ʼva saá xíniñúʼu keʼéyó xíʼin Jehová. Tá nátúʼunyó xíʼinra xa̱ʼa̱ ña̱ ndóʼoyó, xa̱ʼa̱ ña̱ ndákanixi̱níyó xíʼin xa̱ʼa̱ ña̱ sándi̱ʼi̱-iniyó saá náʼa̱yó ña̱ ndáa-iniyóra ta kándíxayó ña̱ kúʼvi̱-inira xínira miíyó (Sal. 94:17-19; 1 Juan 5:14, 15). Ná kitáʼanyó xíʼin na̱ hermanoyó, chi nda̱a̱ táki̱ʼva íyo iin regalo ña̱ ta̱xi Jehová ndaʼa̱yó saá íyo na̱yóʼo (Sant. 1:17). Jehová náʼa̱ra ña̱ ndíʼi̱-inira xa̱ʼa̱ iin tá iinyó, saáchi ta̱xira na̱ hermano ña̱ koona nda̱a̱ táki̱ʼva íyo na̱ veʼeyó ta na̱yóʼo kúʼvi̱ní-inina xínina miíyó (Prov. 17:17). Tá chi̱ndaʼá ta̱ Pablo carta ña̱ ku̱a̱ʼa̱n ndaʼa̱ na̱ ñuu Colosas, ni̱ka̱ʼa̱nra xa̱ʼa̱ sava na̱ hermano na̱ chi̱ndeétáʼan xíʼinra ta sa̱ndíkona-inira (Col. 4:10, 11). Ta nda̱a̱ ta̱ Jesús xi̱niñúʼu chindeétáʼan na̱ migora xíʼinra, sava na̱yóʼo xi̱kuuna na̱ ángel á na̱ yiví, ta ta̱xira tíxa̱ʼvi ndaʼa̱na xa̱ʼa̱ ña̱ chi̱ndeétáʼanna xíʼinra (Luc. 22:43). Tá nátúʼunyó xíʼin iin na̱ hermano na̱ viíní kítáʼan xíʼin Ndióxi̱ xa̱ʼa̱ ña̱ ndóʼoyó, ña̱yóʼo va̱ása kúni̱ kachiña ña̱ va̱ása kándíxakayó Ndióxi̱, saáchi ña̱ ka̱ʼa̱nyó xíʼin na̱yóʼo kivi chindeétáʼanña xíʼinyó. w21.04 24, 25 párr. 14-16

¿Ndáaña keʼéyó tá iin na̱ hermano kéʼéna iin ña̱ʼa ña̱ sása̱a̱ní miíyó? Xíniñúʼu chika̱a̱yó ndee̱ ña̱ vií kutáʼanyó xíʼinna. Ná keʼéyó oración nu̱ú Jehová ta ná natúʼunyó xíʼinra xa̱ʼa̱ ndiʼi ña̱ ndóʼoyó. Ná ka̱ʼa̱nyó xíʼinra ña̱ ná taxira bendición ndaʼa̱ na̱ ke̱ʼé ña̱ va̱ása va̱ʼa xíʼinyó. Ta ná chindeétáʼanra xíʼinyó kotoyó ta chindayáʼviyó ña̱ va̱ʼa ña̱ kúúmií na̱yóʼo, táʼan ña̱ xíto miíra (Luc. 6:28). Tá íxayo̱ʼvi̱ña xíʼinyó ña̱ ixakáʼnu-iniyó xa̱ʼa̱ na̱ ke̱ʼé ña̱ va̱ása va̱ʼa xíʼinyó, ná ndakanixi̱níyó ndáa ki̱ʼva viíní ka̱ʼa̱nyó xíʼinna. Ta ná ndakanixi̱níyó ña̱ su̱ví ña̱ kúni̱ miína kúú ña̱ ke̱ʼéna ña̱yóʼo xíʼinyó (Mat. 5:23, 24). Tá káʼa̱nyó xíʼinna ná va̱ása ka̱ʼa̱nyó ña̱ ku̱a̱china kúúña. Soo ¿ndáaña keʼéyó tá va̱ása xíínna ndakutáʼan viína xíʼinyó? Ña̱ Biblia káchiña: “Kǒo sandákoondó ña̱ kundeé-inindó xíʼin ña̱ kéʼé inkana xíʼinndó”. Ná chika̱a̱yó ndee̱ ña̱ kúee koo iniyó xíʼin na̱yóʼo (Col. 3:13). Ta ña̱ ndáyáʼvika kúú ña̱ va̱ása sa̱a̱-iniyó kuniyóna, saáchi tá ná keʼéyó ña̱yóʼo va̱ása kutáʼan viíkayó xíʼin Jehová. Ná va̱ása taxiyó kasi nda̱a̱ ni iin ña̱ʼa nu̱úyó ña̱ kachíñuyó nu̱ú Jehová, chi saá na̱ʼa̱yó ña̱ kúʼvi̱ka-iniyó xíniyóra nu̱ú nda̱a̱ ndáaka ña̱ʼa (Sal. 119:165). w21.06 23 párr. 15