Agosto

Sana na̱ ni̱ka̱ʼa̱n ta̱ Jesús xa̱ʼa̱ yóʼo kúú na̱ soldado ña̱ ñuu Roma na̱ ka̱an xa̱ʼa̱ra xíʼin ndaʼa̱ra tá ka̱tikaanara ndaʼa̱ yitu̱n. Ta̱ Jesús va̱ása nísa̱a̱ra ta ni va̱ása níndakava-inira xa̱ʼa̱ ndiʼi ña̱ va̱ása va̱ʼa ke̱ʼéna xíʼinra (1 Ped. 2:23). Nda̱a̱ táki̱ʼva ke̱ʼé ta̱ Jesús, xíniñúʼu koo káʼnu-iniyó xa̱ʼa̱ inkana (Col. 3:13). Sana sava na̱ yiví á nda̱a̱ na̱ veʼe miíyó kixáʼana kundasína kunina miíyó xa̱ʼa̱ ña̱ va̱ása kúnda̱a̱-inina xíʼin ña̱ kándíxayó á ña̱ kéʼéyó. Ta xa̱ʼa̱ ña̱yóʼo kivi kixáʼana ka̱ʼa̱nna ña̱ vatá xa̱ʼa̱yó ta sákukaʼanna nu̱úyó, ta nda̱a̱ kivi kixáʼana ndatána tutu ña̱ kúúmiíyó á saátu nda̱a̱ kuni̱na kanina miíyó. Soo nu̱úka ña̱ sa̱a̱-iniyó kuniyóna ná ka̱ʼa̱nyó xíʼin Jehová ña̱ ná chindeétáʼanra xíʼinna ña̱ xa̱a̱na sakuaʼana xa̱ʼa̱ ña̱ nda̱a̱ (Mat. 5:44, 45). Sava yichi̱ na̱ yiví kéʼéna ña̱ va̱ása va̱ʼa xíʼinyó, ta xa̱ʼa̱ ña̱yóʼo íxayo̱ʼvi̱níña xíʼinyó ña̱ koo káʼnu-iniyó xa̱ʼa̱na. Soo tá ná sa̱a̱-iniyó kuniyóna sáxo̱ʼvi̱yó miívayó (Sal. 37:8). Tá íxakáʼnu-iniyó xa̱ʼa̱ iin na̱ yiví, chíka̱a̱-iniyó ña̱ va̱ása sa̱a̱-iniyó kuniyóna (Efes. 4:31, 32). w21.04 8, 9 párr. 3, 4

Tá kíta iinna ti̱xin congregación, ndeéní kúsuchí-ini na̱ veʼena. Ná ndakanixi̱níyó nda̱saaví ku̱suchí-ini Jehová tá ku̱a̱ʼání na̱ ángel va̱ása níkandíxakanara (Jud. 6). Ta saátu ku̱suchíní-inira tá xi̱nira ña̱ tuku ta tuku i̱xaso̱ʼo na̱ ñuu Israel nu̱úra (Sal. 78:41). Tá iin na̱ veʼún sa̱ndákoona Jehová, va̱ása kaka-iniún ña̱ kúsuchíní-ini Jehová xíʼún. Chi ta̱kán kúnda̱a̱va-inira xíʼin ña̱ ndóʼún, ta xa̱ʼa̱ ña̱ kúndáʼvi-inira xínira yóʼó chíka̱a̱ra ndee̱ xíʼún ta sándíkora-iniún. Tá kíta se̱ʼe iin na̱ hermano ti̱xin ñuu Jehová, túvina ña̱ va̱ása níchindeétáʼanna xíʼin se̱ʼena ña̱ ndakundeéna ndasakáʼnuna Jehová. Iin ta̱ hermano ni̱ka̱ʼa̱nra: “Nda̱kanixi̱níi̱ ña̱ ku̱a̱chi miíi̱ kúúña. Ta nda̱a̱ xi̱xaníi̱ xa̱ʼa̱ ña̱yóʼo”. Iin ñá hermana xi̱ndakanixi̱níña ña̱yóʼo: “¿Ndáaña kúú ña̱ va̱ása va̱ʼa níkeʼíi̱? Nda̱kanixi̱níi̱ ña̱ va̱ása vií nísanáʼi̱ se̱ʼi̱ xa̱ʼa̱ Ndióxi̱”. w21.09 26 párr. 1, 2, 4

Savana káʼa̱nna ña̱ va̱ása xíniñúʼu sanáʼa̱yó xa̱ʼa̱ Biblia, saáchi va̱ása níxa̱ʼa̱nyó iin escuela nu̱ú sánáʼa̱na xa̱ʼa̱ Ndióxi̱. Soo viíní nandukún xa̱ʼa̱ ndiʼi ña̱ʼa. Chi saá ke̱ʼé ta̱ Lucas tá kúma̱ní kaʼyíra ña̱ Evangelio. Siʼna na̱ndukúra xa̱ʼa̱ ndiʼi ña̱ ku̱u tá ya̱chi̱. Saáchi xi̱kuni̱ra ña̱ ndiʼi na̱ yiví na̱ xa̱a̱ kaʼvi ña̱ Evangelio yóʼo, ná kándíxana ndiʼi ña̱ xi̱niso̱ʼona xa̱ʼa̱ ta̱ Jesús (Luc. 1:1-4). Saátu ke̱ʼé na̱ judío na̱ ñuu Berea, tá xi̱niso̱ʼona xa̱ʼa̱ ta̱ Jesús, viíní ka̱ʼvina ña̱ va̱xi nu̱ú Escrituras Hebreas ña̱ va̱ʼa kunda̱a̱-inina á ña̱ ndixa kúú ña̱ káʼa̱nna xa̱ʼa̱ ta̱ Jesús (Hech. 17:11). Ta saátu xíniñúʼu keʼé miíún, xíniñúʼu nandukún xa̱ʼa̱ ndiʼi ña̱ʼa. Chitáʼan ña̱ sánáʼa̱ na̱ testigo Jehová xíʼin ña̱ káʼa̱n Biblia. Saátu kivi kaʼviún xa̱ʼa̱ ndiʼi ña̱ xa̱a̱ kéʼé na̱ testigo Jehová tiempo vitin. Tá ná nandukú viíún xa̱ʼa̱ ña̱yóʼo, saá kúú ña̱ va̱ása kandíxaún ña̱ vatá ña̱ káʼa̱n inkana. w21.05 3 párr. 7, 8

¿Á íyo sava na̱ hermano ti̱xin congregación na̱ xíniñúʼu chindeétáʼanyó xíʼin? Íyo sava tiempo ña̱ va̱ʼaníka kuni na̱ hermano tá ná koo yatinyó xíʼinna. Tá kúú sava na̱ hermano na̱ ndásakáʼnu iinlá mií Ndióxi̱, kivi kuni mitúʼunna tá tává na̱ veʼena na̱ va̱ása kúú testigo Jehová vikó. Ta inkana xóʼvi̱nína tá xínu ku̱i̱ya̱ ña̱ ni̱xi̱ʼi̱ iin na̱ veʼena. Tá táváyó tiempo ña̱ kutáʼanyó xíʼin na̱ hermano yóʼo náʼa̱yó ña̱ ndixa ndíʼi̱-iniyó xa̱ʼa̱na (Filip. 2:20). Ku̱a̱ʼáníva xa̱ʼa̱ kúú ña̱ kivi kuni mitúʼunyó sava yichi̱. Soo ná ndakaʼányó ña̱ kúnda̱a̱va-ini Jehová xíʼin ña̱ ndóʼoyó. Ta xíniñúʼura na̱ hermanoyó ña̱ va̱ʼa taxira ña̱ xíniñúʼuyó (Mat. 12:48-50). Ta kivi na̱ʼa̱yó ña̱ táxiyó tíxa̱ʼvi ndaʼa̱ Jehová tá ná chika̱a̱yó ndee̱ ña̱ chindeétáʼanyó xíʼin na̱ hermanoyó. Ta ni nda̱a̱ ndáaka ña̱ ndóʼoyó ná ndakaʼányó chi va̱ása íyo mitúʼunyó, saáchi ndiʼi tiempo íyo Jehová xíʼinyó. w21.06 12, 13 párr. 18-20

Ta̱ Jesús va̱ása níndakava-inira ta nda̱kundeéra na̱túʼunra xíʼin na̱ yiví, ni savana va̱ása níkandíxana kuniso̱ʼonara. ¿Nda̱chun ke̱ʼéra ña̱yóʼo? Saáchi xi̱kunda̱a̱-inira ña̱ xi̱xiniñúʼu sakuaʼa na̱ yiví xa̱ʼa̱ ña̱ nda̱a̱, ta xi̱kuni̱ra chindeétáʼanra xíʼin ku̱a̱ʼánína. Ta saátu xi̱kunda̱a̱-inira ña̱ ku̱a̱ʼání na̱ yiví va̱ása kuni̱na sákuaʼana xa̱ʼa̱ Reino Ndióxi̱, soo tá ná ya̱ʼa tiempo kutóovana sákuaʼana. Chi saá ke̱ʼé na̱ veʼera, ti̱xin u̱ni̱ ku̱i̱ya̱ sava ña̱ ni̱xi̱kara na̱túʼunra xíʼin na̱ yiví, nda̱a̱ ni iin na̱ ñanira va̱ása níxiinna koona discípulora (Juan 7:5). Soo tá xa̱a̱ nda̱takura saá ndu̱una discípulora (Hech. 1:14). Va̱ása xíni̱yó ndáa na̱ yiví kúú na̱ kixáʼa ndasakáʼnu Ndióxi̱. Chi savana íxayo̱ʼvi̱ña xíʼinna ña̱ kama xa̱a̱na sákuaʼana xa̱ʼa̱ ña̱ nda̱a̱. Soo nda̱a̱ na̱ yiví na̱ va̱ása kúni̱ kuniso̱ʼo ña̱ nátúʼunyó, xítona ndáa ki̱ʼva íyo ña̱ kéʼéyó, ta ña̱yóʼo kivi chindeétáʼanña xíʼinna ña̱ xa̱a̱na ndasakáʼnuna Ndióxi̱. w21.05 18 párr. 17, 18

Tá ni̱xi̱yo ta̱ Jesús nu̱ú ñuʼú yóʼo xa̱ʼndara iin chiñu nu̱ú na̱ discípulora, ta chiñu yóʼo u̱vi̱ ndáta̱ʼvíña. Ni̱ka̱ʼa̱nra xíʼinna ña̱ ná natúʼunna xa̱ʼa̱ Reino Ndióxi̱ xíʼin na̱ yiví, ta sa̱náʼa̱rana ndáa ki̱ʼva keʼénaña (Luc. 8:1). Ni̱ka̱ʼa̱nra xíʼinna ndáaña keʼéna tá ná kandíxa na̱ yiví kuniso̱ʼona xa̱ʼa̱ Reino Ndióxi̱, ta ndáaña keʼéna tá ná va̱ása kandíxa na̱ yiví yóʼo kuniso̱ʼona (Luc. 9:2-5). Saátu ni̱ka̱ʼa̱nra ña̱ ku̱a̱ʼání na̱ yiví sakúaʼana xa̱ʼa̱ Ndióxi̱ saáchi ni̱ka̱ʼa̱nra xíʼinna ña̱ “natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú” (Mat. 24:14; Hech. 1:8). Ni̱ka̱ʼa̱nra xíʼinna ña̱ ná sanáʼa̱na na̱ yiví ña̱ keʼéna ndiʼi ña̱ sa̱náʼa̱rana. Ta̱ Jesús ni̱ka̱ʼa̱nra ña̱ nda̱a̱ tiempo ña̱ ndóoyó vitin ndakundeéyó keʼéyó chiñu ña̱ ndáyáʼviní yóʼo, nda̱a̱ ná ndiʼi-xa̱ʼa̱ ñuyǐví (Mat. 28:18-20). Ta nu̱ú visión ña̱ ni̱na̱ʼa̱ ta̱ Jesús nu̱ú ta̱ Juan, ni̱na̱ʼa̱ra ña̱ kúni̱ra ña̱ ndiʼi na̱ discípulora ná chindeétáʼanna xíʼin inka na̱ yiví ña̱ xa̱a̱na sákuaʼana xa̱ʼa̱ Jehová (Apoc. 22:17). w21.07 3 párr. 3, 4

Na̱ yiví na̱ íyo nu̱ú ñuʼú yóʼo, kéʼéna nda̱a̱ ndáaka ña̱ʼa ña̱ va̱ʼa xa̱a̱na kundayáʼvina nu̱ú inkana. Tá kúú, iin ta̱a ta̱ kúúmií negocio kivi xa̱a̱ra keʼéra ña̱ va̱ása va̱ʼa xíʼin inkana á ixandi̱va̱ʼara xíʼinna, ña̱ va̱ʼa kuaʼnuka ña̱yóʼo. Iin ta̱ sísikí kivi xa̱a̱ra sátukue̱ʼe̱ra iin ta̱ sísikí xíʼinra ña̱ va̱ʼa kuchiñura nu̱ú ta̱yóʼo. Á iin na̱ kúni̱ kaʼvi ti̱xin iin escuela ña̱ ndáyáʼviní, kivi sándaʼvina tá kéʼéna exámen ña̱ va̱ʼa kaʼvina escuela yóʼo. Miíyó na̱ ndásakáʼnu Ndióxi̱ kúnda̱a̱-iniyó ña̱ va̱ása va̱ʼa ña̱yóʼo, saáchi ña̱ kéʼé na̱ ñuyǐví yóʼova kúúña (Gál. 5:19-21). Soo kivi kixáʼayó keetáʼanyó ti̱xin congregación ta ni va̱ása kiʼinyó kuenta ña̱ kéʼéyóña. Xíniñúʼu ndakanixi̱níyó xa̱ʼa̱ ña̱yóʼo chi tá kéʼéyó saá, va̱ása vií kutáʼanyó ti̱xin congregación. Ta saátu ndáyá’viní sakúaʼayó xa̱ʼa̱ na̱ xi̱ndasakáʼnu Jehová tiempo xi̱naʼá, na̱ va̱ása níkeetáʼan xíʼin inkana. w21.07 14 párr. 1, 2

Ña̱ ndixaní kúʼvi̱-iniyó xíniyó na̱ ndákava-ini, chíndaʼáña miíyó ña̱ chindeétáʼanyó xíʼinna. Ku̱a̱ʼání na̱ hermano va̱ʼaní-inina ta chíndeétáʼanna xíʼin na̱ kúsuchí-ini á na̱ ndákava-ini. Kúʼvi̱ní-inina xínina na̱ hermano, ta kúni̱na keʼéna nda̱a̱ ndáaka ña̱ʼa ña̱ va̱ʼa chindeétáʼanna xíʼinna (Prov. 12:25, nota; 24:10). Tasaá ndíku̱nna consejo ña̱ ta̱xi ta̱ apóstol Pablo, tá ka̱chira: “Sandíkondó-ini na̱ nda̱kava-ini, ta chindeétáʼanndó xíʼin na̱ vitá kúni, ta kúee koo inindó xíʼin ndiʼina” (1 Tes. 5:14). Iin ki̱ʼva ña̱ chindeétáʼanyó xíʼin na̱ hermano na̱ nda̱kava-ini kúú ña̱ kuniso̱ʼoyó ña̱ káʼa̱nna, ta ka̱ʼa̱nyó xíʼinna ña̱ kúʼvi̱ní-iniyó xíniyóna. Jehová xítora ndiʼi ña̱ kéʼéyó ña̱ va̱ʼa chindeétáʼanyó xíʼin na̱ hermanoyó. Proverbios 19:17 káchiña: “Na̱ chíndeétáʼan xíʼin na̱ nda̱ʼví, nda̱a̱ táki̱ʼva íyo na̱ sátati iin ña̱ʼa Jehová saá íyona, ta ndataxira ña̱ va̱ʼa ndaʼa̱na xa̱ʼa̱ ña̱ kéʼéna ña̱yóʼo”. w21.11 10 párr. 11, 12

¿Ndáaña xíniñúʼu keʼéyó vitin ña̱ va̱ʼa koo tu̱ʼvayó ya̱ʼayó nu̱ú ña̱ kixi nu̱úyó chí nu̱únínu? Ña̱ kusi̱í-iniyó xíʼin ña̱ xa̱a̱ kúúmiíyó, ta ná kusi̱í-iniyó xa̱ʼa̱ ña̱ kítáʼanyó xíʼin Jehová. Ta tá ná sakúaʼakayó xa̱ʼa̱ Jehová, saá kúú ña̱ kandíxaníkayó ña̱ kuchiñuvara ndakiʼinra tu̱ʼunyó tá ná kixáʼa na̱ Gog ña̱ Magog ixandi̱va̱ʼana xíʼinyó. Texto ña̱ káʼviyó ki̱vi̱ vitin táxiña kunda̱a̱-iniyó nda̱chun kúú ña̱ va̱ʼaní xi̱kandíxa ta̱ David ña̱ chindeétáʼan Jehová xíʼinra. Ndiʼi yichi̱ xi̱ndaa-inira Jehová, ta nda̱a̱ ni iin yichi̱ va̱ása nísandákoo ndaʼa̱rara. Tá ni̱xi̱yo loʼora, ka̱nitáʼanra xíʼin iin ta̱a ta̱ káʼnuní ta̱ ñuu Filistea ta̱ xi̱naní Goliat, ta ña̱yóʼo ni̱ka̱ʼa̱nra xíʼinra: “Ki̱vi̱ vitin Jehová taxira yóʼó ndaʼíi” (1 Sam. 17:46). Tá ni̱ya̱ʼa ku̱i̱ya̱, tá xi̱kachíñura nu̱ú ta̱ rey Saúl, ta̱yóʼo ku̱a̱ʼá yichi̱ xi̱kuni̱ra kaʼnírara, soo ni̱xi̱yo Jehová xíʼinra (1 Sam. 18:12). Ta xa̱ʼa̱ ña̱ xi̱nira ndáa ki̱ʼva xi̱ndaa Jehová miíra tá ya̱chi̱, xi̱kunda̱a̱-inira ña̱ ndakundeévara kundaarara. Ta ña̱yóʼo kivi chindeétáʼantuña xíʼinyó ña̱ va̱ʼa koo tu̱ʼvayó ya̱ʼayó nu̱ú tu̱ndóʼo ña̱ kixi nu̱úyó chí nu̱únínu. w22.01 6 párr. 14, 15

Ni nda̱a̱ ndáaka ña̱ʼa kéʼé Jehová, kúee íyo inira ta ndátura nda̱a̱ ná saxínuraña. Ta kéʼéraña ña̱ va̱ʼa ndukáʼnu ki̱vi̱ra ta saátu xa̱ʼa̱ ña̱ va̱ʼa inkana. Ná kotoyó ndáa ki̱ʼva loʼo tá loʼo i̱xava̱ʼa Jehová ñuʼú yóʼo, tasaá kivi kundooyó nu̱úña. Tu̱ʼun Ndióxi̱ káʼa̱nña ndáa ki̱ʼva i̱xava̱ʼa Jehová ñuʼú yóʼo, siʼna xi̱tora ndáa ki̱ʼva kooña, ndáa ki̱ʼva kuva̱ʼaña tasaá ki̱xáʼara i̱xava̱ʼaraña (Job 38:5, 6). Ta nda̱a̱ ta̱vára tiempo ña̱ va̱ʼa kotora ña̱ i̱xava̱ʼara (Gén. 1:10, 12). ¿Á kivi ndakanixi̱níyó ndáaña ndo̱ʼo na̱ ángel tá xi̱nina ndáa ki̱ʼva ki̱xáʼa Jehová íxava̱ʼara iin tá iin ña̱ʼa? Ku̱si̱íníva-inina tá xi̱nina ña̱yóʼo ta nda̱a̱ ki̱xáʼana xítana nu̱úra. ¿Ndáaña sákuaʼayó xíʼin ña̱yóʼo? Ku̱a̱ʼání ku̱i̱ya̱ i̱xava̱ʼa Jehová ñuʼú yóʼo, tí ki̱mi, saátu ndiʼi ña̱ʼa ña̱ íyo nu̱úña, ta tá ki̱xáʼara xítora ndiʼi ña̱ i̱xava̱ʼara saá ki̱ʼinra kuenta ña̱ va̱ʼaní íyoña (Gén. 1:31). w21.08 9 párr. 6, 7

Ta̱ Jesús ni̱ka̱ʼa̱nra xa̱ʼa̱ iin ta̱a ta̱ ku̱ʼu̱n xíká. Tá kúma̱ní ku̱ʼu̱n ta̱yóʼo, ka̱nara na̱ káchíñu nu̱úra ta ta̱xira talento ndaʼa̱ iin iin na̱yóʼo ña̱ va̱ʼa kachíñuna xíʼinña. Iinra nda̱kiʼin u̱ʼu̱n talento ta inkara nda̱kiʼin u̱vi̱ña, ta inkara nda̱kiʼin iinña. Iin tá iin na̱yóʼo nda̱kiʼinna ña̱ kuchiñuna kundaana. Soo u̱vi̱na va̱ʼaní ka̱chíñuna xíʼin ña̱yóʼo, ta ku̱a̱ʼá ndu̱uña. Soo ta̱ nda̱kiʼin iin talento va̱ása níkachíñura xíʼinña ta xa̱ʼa̱ ña̱yóʼo ni̱ta̱xíra. Nda̱a̱ táki̱ʼva ke̱ʼé ta̱ nda̱kiʼin u̱ʼu̱n talento, saátu ke̱ʼé ta̱ nda̱kiʼin u̱vi̱ña, saáchi ni̱ndi̱ʼi̱ní-inira xa̱ʼa̱ chiñu ña̱ nda̱kiʼinra ta chi̱ka̱a̱níra ndee̱ ña̱ ka̱chíñura xíʼin ña̱yóʼo. Ta xa̱ʼa̱ ña̱kán nda̱kiʼinra u̱vi̱ka talento. Ta ta̱ káchíñura nu̱ú ni̱kusi̱íní-inira xíʼinra ta ta̱xira ku̱a̱ʼáka chiñu ndaʼa̱ra. w21.08 21 párr. 7; 22 párr. 9, 10

Tiempo vitin Jehová náʼa̱ra ña̱ kúee íyo inira ta ndátura, saáchi va̱ása kúni̱ra ña̱ ná ndiʼi-xa̱ʼa̱ ndiʼi na̱ yiví (2 Ped. 3:9). Táxira tiempo ndaʼa̱ ndiʼina ña̱ va̱ʼa ndandikó-inina ta vií ndaka̱xinna ña̱ keʼéna. Soo kixaa̱ iin ki̱vi̱ ña̱ va̱ása keʼékara ña̱yóʼo. Tá ná va̱ása ndaka̱xin viína ña̱ keʼéna, kundoʼona nda̱a̱ táki̱ʼva ndo̱ʼo ta̱ faraón tá tiempo ta̱ Moisés. Ña̱yóʼo ni̱ka̱ʼa̱n Jehová xíʼinra: “Xa̱a̱ ku̱a̱ʼá tiempo chí sa̱tá kivi chindaʼíi̱ iin kue̱ʼe̱ ña̱ ndeéní sa̱táún xíʼin sa̱tá na̱ ñuún, tá saá níkeʼíi̱ kǒokaviún íyo nu̱ú ñuʼú yóʼo. Soo va̱ása nísandíʼi-xa̱ʼíi̱ yóʼó ña̱ va̱ʼa na̱ʼi̱ ndee̱ ña̱ kúúmiíi̱ nu̱ún, ta saátu ña̱ va̱ʼa ndukáʼnu ki̱víi̱ nu̱ú ndiʼi na̱ yiví na̱ ndóo nu̱ú ñuʼú yóʼo” (Éx. 9:15, 16). Ndiʼi na̱ yiví xa̱a̱na kunda̱a̱-inina ña̱ iinlá Jehová kúú Ndióxi̱ ta̱ nda̱a̱ (Ezeq. 38:23). Na̱ yiví na̱ kéʼé nda̱a̱ táki̱ʼva ke̱ʼé ta̱ faraón, ña̱ va̱ása xíínna ndakunina ña̱ iinlá Jehová kúú ta̱ xíniñúʼu kaʼndachíñu, Jehová sandíʼi-xa̱ʼa̱rana. w21.09 18, párr. 17, 18

¿Á kúsuchí-iniún xa̱ʼa̱ ña̱ ki̱ta iin na̱ veʼún ti̱xin congregación? ¿Ndáaña keʼún tá iin na̱ hermano ni̱ka̱ʼa̱nna xíʼún iin tu̱ʼun ña̱ sa̱ndákavaka-iniún? Su̱ví ndiʼivína vií koo tu̱ʼun ña̱ ka̱ʼa̱nna xíʼún (Sant. 3:2). Ndiʼiyó kúúyó na̱ yiví ku̱a̱chi, ña̱kán va̱ása ndakanda̱-iniún tá ná ka̱ʼa̱nna tu̱ʼun ña̱ sáxo̱ʼvi̱ yóʼó á tá va̱ása xíni̱na ndáaña ka̱ʼa̱nna xíʼún. Ndakaʼán xa̱ʼa̱ ña̱ ni̱ka̱ʼa̱n ta̱ apóstol Pablo: “Kǒo sandákoondó ña̱ kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na (Col. 3:13). Ná ndakundeéyó chindeétáʼanyó xíʼin na̱ hermano tá kíta iin na̱ veʼena ti̱xin ñuu Jehová. Saáchi tá ndóʼona ña̱yóʼo saá kúú ña̱ xi̱niñúʼuníka na̱ʼa̱yó ña̱ kúʼvi̱-iniyó xíniyóna ta chika̱a̱yó ndee̱ xíʼinna (Heb. 10:24, 25). Savana káʼa̱nna ña̱ va̱ása xíínka na̱ hermano ka̱ʼa̱nna xíʼinna, ta nda̱a̱ táki̱ʼva kéʼéna xíʼin na̱ ki̱ta ti̱xin ñuu Ndióxi̱ saá kéʼéna xíʼinna. Nda̱a̱ ni iin yichi̱ ná va̱ása keʼéyó ña̱yóʼo. Ta na̱ va̱lí kúú na̱ xíniñúʼu chika̱a̱níkayó ndee̱ xíʼin tá kíta iin na̱ veʼena ti̱xin ñuu Ndióxi̱, ta ka̱ʼa̱nyó tu̱ʼun va̱ʼa xíʼinna. w21.09 29 párr. 13, 14; 30 párr. 16

Tá nátúʼun iin na̱ hermano na̱ válíka xíʼin iin na̱ hermano na̱ xa̱a̱ ku̱chée kivi chika̱a̱na ndee̱ xíʼin táʼanna (Rom. 1:12). Na̱ hermano na̱ válíka xa̱a̱na kandíxana ña̱ va̱ʼaní ndáa Jehová na̱ káchíñu nu̱úra, ta na̱ hermano na̱ xa̱a̱ ku̱chée kunina ña̱ kúʼvi̱ní-ini inkana xíninana, ta kusi̱íní-inina natúʼunna xa̱ʼa̱ ki̱ʼva ña̱ xa̱a̱ chíndeétáʼan Jehová xíʼinna. Tá xáʼnuyó ku̱a̱ʼa̱nyó, ndíʼi-xa̱ʼa̱va ña̱ livi náʼa̱yó. Soo nu̱ú Jehová na̱ ndúlivikava kúú na̱ káchíñu nu̱úra tá yáʼa ku̱i̱ya̱ (1 Tes. 1:2, 3). ¿Nda̱chun? Saáchi xa̱a̱ ku̱a̱ʼání ku̱i̱ya̱ táxina ña̱ ná chindeétáʼan espíritu santo Jehová xíʼinna ña̱ nasamana ña̱ kéʼéna, tasaá viíníka keʼéna chiñu nu̱úra. Tá ná kuxini̱kayó na̱ hermanoyó na̱ xa̱a̱ ku̱chée ta saátu tá ná sakúaʼakayó xíʼin ña̱ kéʼéna, saá kúú ña̱ xa̱a̱na kundayáʼvikana nu̱úyó. Ku̱a̱ʼání ña̱ va̱ʼa ndákiʼin na̱ congregación, tá chíka̱a̱na ndee̱ ña̱ kundayáʼvika na̱ hermano na̱ xa̱a̱ ku̱chée nu̱úna. Soo saátu ku̱a̱ʼání ña̱ va̱ʼa ndakiʼin na̱ hermano na̱ xa̱a̱ ku̱chée tá ná chika̱a̱na ndee̱ ña̱ kundayáʼvika na̱ válí nu̱úna. w21.09 7 párr. 15-18

Va̱ása xíniñúʼu ka̱ʼa̱n kuitíyó ña̱ kúndáʼvi-iniyó xíniyó inkana, saáchi xíniñúʼu na̱ʼa̱yóña xíʼin ña̱ kéʼéyó (Efes. 2:4). Ña̱kán, ndiʼiyó kivi ndakanixi̱níyó xa̱ʼa̱ na̱ kivi kundáʼvi-iniyó kuniyó ti̱xin veʼeyó, ti̱xin congregación á na̱ íyo nu̱ú territorio ña̱ kúúmiíyó. Kiviva ndani̱ʼíyó ki̱ʼva ña̱ na̱ʼa̱yó ña̱ kúndáʼvi-iniyó xíniyóna. ¿Á xíni̱yó iin na̱ kúsuchí-ini? ¿Á kivi ku̱ʼu̱nyó xíʼin ña̱ʼa kuxuna, á ndukúyó inka ki̱ʼva ña̱ chindeétáʼanyó xíʼinna? ¿Á íyo iin na̱ sa̱kán nda̱ndikó ti̱xin congregación na̱ xíniñúʼu chika̱a̱yó ndee̱ xíʼin, ta sandíkoyó inina? ¿Á kivi ku̱ʼu̱nyó natúʼunyó xíʼin na̱ yiví xa̱ʼa̱ Reino Ndióxi̱? (Job 29:12, 13; Rom. 10:14, 15; Sant. 1:27). Tá ná kiʼinyó kuenta xíʼin ña̱ ndóʼo inkana, saá kúú ña̱ kunda̱a̱-iniyó ña̱ kivi na̱ʼa̱yó ña̱ kúndáʼvi-iniyó xíniyóna. Ta tá kéʼéyó ña̱yóʼo saá kúú ña̱ sákusi̱íyó-ini Jehová, ta̱ kúndáʼvi-ini xíni inkana. w21.10 12, 13 párr. 20-22

Nu̱ú Salmo 23, ta̱ David ni̱ka̱ʼa̱nra xa̱ʼa̱ ña̱ va̱ʼa ña̱ xi̱ndakiʼinra chi xi̱taxira ná kundaa Jehová miíra. Jehová kúú ta̱ chi̱ndeétáʼan xíʼinra ña̱ ni̱xi̱kara “yichi̱ ña̱ nda̱kú”, ta saátu va̱ása nísandákoo ndaʼa̱rara tá ni̱ya̱ʼara nu̱ú tu̱ndóʼo. Ni ni̱ka̱ʼa̱n ta̱ David ña̱ xi̱ndaa Jehová miíra, soo xi̱kunda̱a̱-inira ña̱ koova tu̱ndóʼo nu̱úra. Sana xi̱ndakavaní-inira ta nda̱a̱ táki̱ʼva ni̱xi̱yo ta̱ ni̱xi̱ka nu̱ú “yoso̱ ña̱ naání” saá ni̱xi̱yora. Ta saátu ni̱ka̱ʼa̱nra ña̱ ni̱xi̱yo na̱ xi̱saa̱-ini xi̱xiniñaʼá, soo xa̱ʼa̱ ña̱ xi̱ndaa Jehová miíra ni̱ka̱ʼa̱nra ña̱yóʼo: “Va̱ása yi̱ʼvíi̱”. ¿Ndáaña kúni̱ kachi ña̱ va̱ása níxi̱kuma̱ní nda̱a̱ ni iin ña̱ʼa nu̱ú ta̱ David? Kúni̱ kachiña ña̱ xi̱kuumiíra ndiʼi ña̱ xi̱xiniñúʼura ña̱ va̱ʼa koo yatinra xíʼin Jehová. Ni kǒoví ña̱ ku̱i̱ká níxi̱kuumiíra, soo xi̱kusi̱í-inira xíʼin loʼo ña̱ xi̱taxi Jehová ndaʼa̱ra. Ta ña̱ xi̱ndayáʼvika nu̱úra kúú ña̱ kusi̱í-ini Jehová xíʼinra, ta kundaarara. Xíʼin ña̱yóʼo kúnda̱a̱-iniyó ña̱ xíniñúʼu ki̱ʼva koo ña̱ ndakanixi̱níyó xa̱ʼa̱ ña̱ ku̱i̱ká. w22.01 3, 4 párr. 5-7

Ku̱a̱ʼání na̱ xi̱ndasakáʼnu Jehová xi̱natúʼunna xíʼin na̱ yiví na̱ va̱ása níxiin kuniso̱ʼo. Tá kúú, ta̱ Noé ku̱a̱ʼání ku̱i̱ya̱ na̱túʼunra xíʼin na̱ yiví xa̱ʼa̱ Ndióxi̱ (2 Ped. 2:5). Ta̱yóʼo xi̱kuni̱vara ña̱ ná kuniso̱ʼo na̱ yiví ña̱ xi̱natúʼunra xíʼinna, soo va̱ása níka̱ʼa̱n Jehová xíʼinra ña̱ kuniso̱ʼonara. Saáchi tá ni̱ka̱ʼa̱nra xíʼinra ña̱ ná ixava̱ʼara tú arca, ña̱yóʼo ni̱ka̱ʼa̱nra xíʼinra: “Xíniñúʼu ndi̱ʼviún ini tú arca xíʼin se̱ʼún, xíʼin ñá síʼún ta saátu xíʼin xa̱nuún” (Gén. 6:18). Ta tá ni̱ka̱ʼa̱n Jehová xíʼinra ndáa ki̱ʼva koo tú arca, sana ki̱ʼinra kuenta ña̱ su̱ví ndiʼiví na̱ yiví kuniso̱ʼo ña̱ natúʼunra (Gén. 6:15). Ta ndixa saá ku̱uva, saáchi nda̱a̱ ni iin na̱ yiví na̱ ni̱xi̱yo tiempo kán va̱ása níxiniso̱ʼona ña̱ na̱túʼunra (Gén. 7:7). ¿Á nda̱kanixi̱ní Jehová ña̱ va̱ása va̱ʼa íyo chiñu ña̱ ke̱ʼé ta̱ Noé? Va̱ása, chi nu̱ú Jehová va̱ʼava íyo chiñu ña̱ ke̱ʼéra, saáchi sa̱xínuva ta̱ Noé ña̱ ni̱ka̱ʼa̱nra xíʼinra (Gén. 6:22). w21.10 26 párr. 10, 11

¿Á kivi ndakanixi̱níyó ndáaña ndo̱ʼo ñá Rut tá xi̱niso̱ʼoñá ni̱ka̱ʼa̱n si̱soñá ña̱yóʼo? Ku̱a̱ʼání ña̱ ke̱ʼé ñá Rut ña̱ va̱ʼa chindeétáʼanñá xíʼin ñá Noemí: xa̱kuñá xíʼinñá, sa̱ndíkoñá-iniñá, ta ku̱a̱ʼání ki̱vi̱ ni̱xi̱ka xáʼañá xíʼinñá. Soo ni saá, ni̱ka̱ʼa̱n ñá Noemí ña̱ ki̱ndaa Jehová ndiʼi ña̱ xi̱kuumiíñá, ta kǒokaña níndandikó xíʼinñá. Ni nda̱ndikóva ñá Rut xíʼin ñá Noemí, soo xíʼin ña̱ ni̱ka̱ʼa̱nñá ni̱na̱ʼa̱ñá ña̱ va̱ása níxi̱chindayáʼviñá ndiʼi ña̱ ke̱ʼé ñá Rut xa̱ʼa̱ñá. Sana ku̱suchíníva-ini ñá Rut tá xi̱niso̱ʼoñá ña̱yóʼo. Soo ni saá va̱ása níndakoondaʼa̱ñá ñá Noemí (Rut. 1:3-18). Iin ñá hermana ñá nda̱kava-ini sana kivi ka̱ʼa̱nñá iin ña̱ va̱ása va̱ʼa xíʼinyó, ni chíka̱a̱nívayó ndee̱ ña̱ chindeétáʼanyó xíʼinñá. Soo va̱ása sáa̱yó xíʼinñá ta ndákundeéyó chíndeétáʼanyó xíʼinñá. Ta saátu káʼa̱nyó xíʼin Jehová ña̱ ná chindeétáʼanra xíʼinyó kunda̱a̱-iniyó ndáa ki̱ʼva sandíkoyó-iniñá (Prov. 17:17). Sana xíniñúʼu chindeétáʼanyó xíʼin iin ñá hermana ñá va̱ása xíín taxi chindeétáʼanyó xíʼin. Soo ni saá, xa̱ʼa̱ ña̱ ndixaní kúʼvi̱-iniyó xíniyóñá chíka̱a̱vayó ndee̱ ña̱ chindeétáʼanyó xíʼinña (Gál. 6:2). w21.11 11 párr. 17-19

Tá káʼa̱n tu̱ʼun Ndióxi̱ xa̱ʼa̱ iin na̱ yiví na̱ yi̱i̱, káʼa̱nña xa̱ʼa̱ iin na̱ yiví na̱ va̱ása kéʼé ña̱ yaku̱a̱, ta viíní ndásakáʼnuna Ndióxi̱. Saátu káʼa̱nña xa̱ʼa̱ na̱ yiví na̱ ndátaxi mií ndaʼa̱ Ndióxi̱ ña̱ va̱ʼa kachíñuna nu̱úra. Ña̱kán, yi̱i̱ kooyó tá va̱ása kéʼéyó ña̱ kini, tá ndásakáʼnuyó Jehová nda̱a̱ táki̱ʼva kúni̱ miíra, ta saátu tá viíní kítáʼanyó xíʼinra. Ndákanda̱ní-iniyó xíʼin ña̱yóʼo, saáchi ni kúúyó na̱ yiví ku̱a̱chi kiviva xa̱a̱yó kutáʼan viíyó xíʼin Jehová, ta̱ kúú Ndióxi̱ ta̱ yi̱i̱. Jehová yi̱i̱níra ta va̱ása kéʼéra nda̱a̱ ni iin ña̱ yaku̱a̱. Tasaá íyo ña̱ ni̱ka̱ʼa̱n na̱ serafín xa̱ʼa̱ra, na̱ ángel na̱ íyo yatin sii̱n tronora, chi nda̱a̱ u̱ni̱ yichi̱ ni̱ka̱ʼa̱nna ña̱ yi̱i̱níra (Is. 6:3). Ta ña̱ va̱ʼa viíní kutáʼanna xíʼin Jehová xíniñúʼu yi̱i̱ní koona, tasaá íyovana. w21.12 3 párr. 4, 5

Vií ná koo ña̱ ndaka̱xinyó keʼéyó. Ña̱yóʼo kúú ña̱ sándi̱ʼi̱ní-ini na̱ va̱lí. Saáchi na̱ maestrona á na̱ veʼena na̱ va̱ása kúú testigo Jehová, káʼa̱nna xíʼinna ña̱ ná kaʼvi va̱ʼava tasaá kuumiína iin chiñu va̱ʼa ta koo xu̱ʼúnna. Ta ña̱yóʼo kivi kindaaña ku̱a̱ʼání tiempona. Ta sana na̱ yivána ta saátu na̱ hermano, káʼa̱nna xíʼinna ña̱ ná kachíñuna nu̱ú Jehová. ¿Ndáaña chindeétáʼan xíʼinna ña̱ vií koo ña̱ ndaka̱xinna keʼéna? Kivi kaʼvina Efesios 5:15-17 ta ndakanixi̱nína xa̱ʼa̱ ña̱ káʼa̱nña. Saátu kivi ndakanixi̱nína xa̱ʼa̱ ña̱yóʼo: “¿Ndáaña kúni̱ Jehová ná keʼíi̱? Tá ná ndaka̱xii̱n keʼíi̱ iin ña̱ʼa, ¿ndáaña kutóokara? ¿Ndáaña xíniñúʼu ndaka̱xii̱n keʼíi̱ ña̱ va̱ʼa viíka kuniñúʼi̱ tiempoi̱?”. Ná ndakaʼányó “chi su̱ví tiempo va̱ʼaka kúú ña̱ ndóoyó”, ta ndáa si̱lóʼo kúma̱ní ta ndiʼi-xa̱ʼa̱ ñuyǐví ta̱ Ndi̱va̱ʼa yóʼo. w22.01 27 párr. 5

¿Ama ni̱xa̱a̱ ta̱ Santiago ndu̱ura discípulo ta̱ Jesús? Tá xa̱a̱ nda̱takura “ki̱tara nu̱ú ta̱ Santiago; tasaá ki̱tara nu̱ú ndiʼika na̱ apóstol” (1 Cor. 15:7). Tá xa̱a̱ ki̱ta ta̱ Jesús nu̱úra saá ni̱xa̱a̱ra ndu̱ura discípulora. Ta saátu ni̱xi̱yora xíʼin na̱ apóstol tá nda̱takana ini iin veʼe chí Jerusalén, nu̱ú xi̱ndatuna ndakiʼinna espíritu santo ña̱ ni̱ka̱ʼa̱n ta̱ Jesús ndakiʼinna (Hech. 1:13, 14). Tá ni̱ya̱ʼa ku̱i̱ya̱ ni̱xa̱a̱ra ndu̱ura táʼan na̱ cuerpo gobernante na̱ ni̱xi̱yo tá siglo nu̱ú (Hech. 15:6, 13-22; Gál. 2:9). Ta tá kúyatin ku̱i̱ya̱ 62 ka̱ʼyíra iin carta ku̱a̱ʼa̱n ndaʼa̱ na̱ nda̱kaxin Ndióxi̱ ku̱ʼu̱n chí ndiví. Ta nda̱a̱ vitin chíndeétáʼanní carta yóʼo xíʼinyó, kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo (Sant. 1:1). Iin ta̱ xi̱natúʼun xa̱ʼa̱ ña̱ ku̱u xi̱naʼá ta̱ xi̱naní Josefo, ni̱ka̱ʼa̱nra ña̱ xa̱ʼnda ta̱ su̱tu̱ káʼnu ta̱ xi̱naní Anán chiñu ña̱ ná kaʼnína ta̱ Santiago. Nda̱kúní ni̱xi̱yo ini ta̱ Santiago xíʼin Jehová nda̱a̱ tá ni̱xi̱ʼi̱ra. w22.01 9 párr. 5

Iin ña̱ sákuaʼayó xíʼin ña̱ káʼa̱n texto ña̱ ki̱vi̱ vitin kúú ña̱ va̱ása kundatuyó ña̱ ná kasi Jehová tu̱ndóʼo ña̱ kivi kundoʼoyó. Ta nda̱a̱ táki̱ʼva ke̱ʼé ta̱ Jesús, xíniñúʼu koo tu̱ʼvayó ña̱ va̱ʼa nda̱kú koo iniyó xíʼin Ndióxi̱ ni ná kuviyó (Mat. 16:24, 25). Soo kúnda̱a̱-iniyó ña̱ va̱ása taxi Ndióxi̱ ya̱ʼayó nu̱ú tu̱ndóʼo ña̱ kǒo kundeé-iniyó xíʼin (1 Cor. 10:13). Inka ña̱ sákuaʼayó xíʼin ña̱ ndo̱ʼo ta̱ Jesús kúú ña̱ kivi xo̱ʼvi̱yó ni kǒo níkeʼéyó ña̱ʼa ña̱ va̱ása va̱ʼa (1 Ped. 2:19, 20). Na̱ yiví sáa̱-inina xínina miíyó soo su̱ví xa̱ʼa̱ ña̱ kéʼéyó ña̱ va̱ása va̱ʼa kúúña, saáchi xa̱ʼa̱ ña̱ va̱ása kítáʼanyó xíʼinna kúúña ta saátu xa̱ʼa̱ ña̱ nátúʼunyó xa̱ʼa̱ ña̱ nda̱a̱ kúúña (Juan 17:14; 1 Ped. 4:15, 16). Ta̱ Jesús xi̱kunda̱a̱-inira nda̱chun kúú ña̱ ta̱xi Jehová ña̱ ni̱xo̱ʼvi̱ra. Soo sava na̱ xi̱ndasakáʼnu Ndióxi̱ tiempo xi̱naʼá, xi̱ndaka̱tu̱ʼunna miína nda̱chun xi̱taxi Jehová ña̱ ná ya̱ʼana nu̱ú tu̱ndóʼo (Hab. 1:3). Ta xa̱ʼa̱ ña̱ ku̱ndáʼviní-ini Jehová xi̱nira na̱yóʼo ta kúee ni̱xi̱yo inira xíʼinna, ku̱ndaa̱va-inira ña̱ su̱ví xa̱ʼa̱ ña̱ kǒo kándíxana miíra kúú ña̱ ni̱ka̱ʼa̱nna ña̱yóʼo, chi ni̱ka̱ʼa̱nnaña xa̱ʼa̱ ña̱ xi̱ndika̱a̱na nu̱ú tu̱ndóʼo ta xi̱niñúʼu sandíkora-inina (2 Cor. 1:3, 4). w21.04 11 párr. 9, 10

Jehová kindo̱o-inira xíʼin ki̱ʼva ña̱ ndásakáʼnuyóra tá nda̱a̱ táki̱ʼva kúni̱ miíra saá ndásakáʼnuyóra ta kúʼvi̱-iniyó xíniyóra ta íxato̱ʼóyóra. Ndáyáʼviníva ndasakáʼnuyó Jehová ta xíniñúʼu viíní ndasakáʼnuyóra. Ndásakáʼnuyó Jehová tá kéʼéyó oración nu̱úra. Tu̱ʼun Ndióxi̱ chítáʼanña oración xíʼin ña̱ʼa ña̱ xi̱chiʼmána ini tabernáculo ta saátu ini templo tiempo xi̱naʼá. Ña̱ xi̱chimáʼna yóʼo va̱ʼaní xi̱xa̱ʼa̱nña ta xi̱kutóoní Ndióxi̱ ña̱yóʼo. Saátu íyo oración ña̱ kéʼéyó nu̱úra, tá xíʼin ndiʼi níma̱yó káʼa̱nyó xíʼinra kúsi̱íníva-inira (Prov. 15:8; Deut. 33:10). Jehová kútóonívara ña̱ ka̱ʼa̱nyó xíʼinra ña̱ kúʼvi̱ní-iniyó xíniyóra ta saátu kúsi̱í-inira tá táxiyó tíxa̱ʼvi ndaʼa̱ra. Saátu kúni̱ra ña̱ ná ka̱ʼa̱nyó xíʼinra xa̱ʼa̱ ña̱ kúni̱yó, ña̱ sándi̱ʼi̱-iniyó xíʼin ña̱ ndátuyó ndakiʼinyó chí nu̱únínu. Ña̱kán, tá kúma̱níka keʼéyó iin oración nu̱ú Jehová viíní ná ndakanixi̱níyó xa̱ʼa̱ ña̱ kúni̱yó ka̱ʼa̱nyó xíʼinra. Tá saá ná keʼéyó, nda̱a̱ táki̱ʼva koo na̱ chiʼmá iin ña̱ʼa ña̱ va̱ʼaní nu̱ú Jehová saá kooyó. w22.03 20 párr. 2; 21 párr. 7

Ti̱xin ña̱ Armagedón, su̱ví miívíyó kúú na̱ ka̱ʼa̱n ndáana xíniñúʼu kundáʼvi-ini Jehová kunira ta ndáana va̱ása kundáʼvi-inira kunira (Mat. 25:34, 41, 46). ¿Á kandíxayó Jehová xa̱ʼa̱ ña̱ ndaka̱xinra keʼéra? ¿Á va̱ása ndasakáʼnukavíyora xa̱ʼa̱ ña̱ va̱ása níkutóoyó ña̱ nda̱kaxinra keʼéra? Ña̱kán xíniñúʼu kandíxaníyó Jehová tiempo vitin chi ña̱yóʼo chindeétáʼanña xíʼinyó kandíxayóra chí nu̱únínu. Ná ndakanixi̱níyó ndáaña kundoʼoyó tá ná kuniyó ña̱ ku̱a̱ʼání ña̱ va̱ʼa ndakiʼinyó xa̱ʼa̱ ña̱ nda̱kaxin Jehová ke̱ʼéra. Va̱ása kooka veʼe-ñu̱ʼu vatá, va̱ása kooka na̱ yiví na̱ kútóoní xu̱ʼún, va̱ása kooka na̱ chíñu na̱ íxandi̱va̱ʼa xíʼin na̱ yiví. Va̱ása kooka kue̱ʼe̱, va̱ása kuchéekayó ta saátu va̱ása kuvika na̱ veʼeyó. Ta̱ Ndi̱va̱ʼa xíʼin na̱ ta̱chí ndi̱va̱ʼa na̱ kítáʼan xíʼinra 1,000 ku̱i̱ya̱ ndaku̱ndasina. Ndiʼi ña̱ʼa ña̱ va̱ása va̱ʼa ke̱ʼé ta̱ Ndi̱va̱ʼa va̱ása kookaña (Apoc. 20:2, 3). Kusi̱íníva-iniyó saáchi xi̱ndiku̱nyó ndiʼi ña̱ ni̱ka̱ʼa̱n Jehová. w22.02 6 párr. 16, 17

Ta̱ Jesús siʼna miíra xi̱ndasavií ku̱a̱chi xíʼin inkana, ta xi̱ka̱ʼa̱nra xíʼinna ña̱ ndasaviína ku̱a̱chi ña̱ xi̱kuumiína xíʼin inkana. Sa̱náʼa̱rana ña̱ xíniñúʼu ndasaviína ku̱a̱chi ña̱ kúúmiína xíʼin táʼanna tá kúni̱na ña̱ ná kusi̱í-ini Jehová xíʼinna (Mat. 5:23, 24). Ta ku̱a̱ʼá yichi̱ ni̱ka̱ʼa̱nra xíʼin na̱ apóstolra ña̱ ná va̱ása ka̱ʼa̱n kúáchinína xa̱ʼa̱ ndáana kúú na̱ káʼnuka nu̱ú táʼanna (Luc. 9:46-48; 22:24-27). Tá va̱ása kúni̱yó koo ku̱a̱chi xíʼin inkana xíniñúʼu chika̱a̱yó ndee̱ ña̱ va̱ása sákakuyóña. Soo tá kúúmiíyó ku̱a̱chi xíʼin inkana siʼnaka miíyó ná ndasaviíña xíʼinna, ta saátu ná ka̱ʼa̱nyó xíʼin na̱ hermanoyó ña̱ ná chika̱a̱na ndee̱ ña̱ ndasaviína ku̱a̱chi ña̱ kúúmiína xíʼin inkana (Filip. 4:2, 3; Sant. 3:17, 18). “¿Á chíka̱i̱ ndee̱ ña̱ keʼíi̱ nda̱a̱ ndáaka ña̱ʼa ña̱ va̱ʼa ndasaviíi̱ ku̱a̱chi xíʼin inkana? ¿Á íxayo̱ʼvi̱ña xíʼi̱n nandósó-inii̱ xa̱ʼa̱ ña̱ va̱ása va̱ʼa kéʼéna xíʼi̱n? Tá kéʼéna iin ña̱ va̱ása va̱ʼa xíʼi̱n, ¿á ndátui̱ ña̱ siʼnaka miína ná ndukú ña̱ káʼnu-ini nu̱úi̱? ¿Á siʼnaka miívai̱ ndúkú ña̱ káʼnu-ini nu̱úna ni túvii̱ ña̱ miína kúú na̱ kúúmií ku̱a̱chi? w22.03 10 párr. 10, 11

Nu̱ú Biblia ni̱ka̱ʼyi̱ iin profecía ña̱ káʼa̱n xa̱ʼa̱ na̱ ñuu Ndióxi̱ ña̱ xíʼin ña̱ si̱í-ini kachíñuna nu̱úra ta kundiku̱nna yichi̱ se̱ʼera (Sal. 110:3). Ta tiempo vitin xínu profecía yóʼo. Ndiʼi ku̱i̱ya̱, na̱ ndásakáʼnu Ndióxi̱ ku̱a̱ʼání hora nátúʼunna xa̱ʼa̱ra xíʼin na̱ yiví, ta kǒo na̱ cháʼvina ña̱ keʼéna chiñu yóʼo, chi kéʼénaña xa̱ʼa̱ ña̱ kúni̱ miína. Ta saátu chíndeétáʼanna xíʼin na̱ hermanona tá kúma̱ní ña̱ʼa nu̱úna, chíka̱a̱na ndee̱ xíʼinna ta chíndeétáʼanna xíʼinna ña̱ kandíxakana Ndióxi̱. Ta na̱ anciano xíʼin na̱ siervo ministerial, ku̱a̱ʼání hora xíniñúʼuna ña̱ va̱ʼa ya̱chi̱ka kaʼvina ña̱ taxina ti̱xin reunión á ña̱ va̱ʼa tavána discursona, saátu xáʼa̱nna xítona sava na̱ hermano ña̱ va̱ʼa chika̱a̱na ndee̱ xíʼinna. ¿Nda̱chun kéʼéna ndiʼi ña̱yóʼo? Kéʼénaña xa̱ʼa̱ ña̱ kúʼvi̱-inina xínina Jehová ta saátu xa̱ʼa̱ ña̱ kúʼvi̱-inina xínina na̱ yiví xíʼin na̱ hermanona (Mat. 22:37-39). Ta̱ Jesús ni̱ndi̱ʼi̱ka-inira xa̱ʼa̱ ña̱ xi̱xiniñúʼu na̱ yiví nu̱úka ña̱ kundi̱ʼi̱-inira xa̱ʼa̱ miíra, ta miíyó na̱ ndásakáʼnu Ndióxi̱ chíka̱a̱yó ndee̱ ña̱ kundiku̱nyó yichi̱ra (Rom. 15:1-3). Tá saá ná keʼéyó ku̱a̱ʼání ña̱ va̱ʼa ndakiʼinyó. w22.02 20 párr. 1, 2

Chiñu ña̱ xi̱kuumií ku̱a̱ʼání na̱ ñuu Israel kúú ña̱ xi̱chiʼina, ta xi̱chaʼvina na̱ xi̱kachíñu nu̱úna tá xi̱ndiʼi ki̱vi̱ ña̱ xi̱kachíñuna. Tá iin ki̱vi̱ va̱ása níxi̱chaʼvinana, na̱yóʼo va̱ása níxi̱ni̱ʼína ña̱ taxina kuxu na̱ veʼena ki̱vi̱ kán. Ña̱kán Jehová ni̱ka̱ʼa̱nra ña̱yóʼo: “Ta̱ nda̱ʼví kúúra ta xu̱ʼún yóʼo kúú ña̱ xíniñúʼura ña̱ va̱ʼa kutakura” (Deut. 24:14, 15; Mat. 20:8). Tiempo vitin su̱ví ki̱vi̱ tá ki̱vi̱ cháʼvina iin na̱ yiví na̱ káchíñu, saáchi iin yichi̱ á u̱vi̱ yichi̱ nu̱ú iin yo̱o̱ cháʼvinana. Soo ña̱ káʼa̱n Levítico 19:13 chíndeétáʼankavaña xíʼinyó tiempo vitin. Sava na̱ yiví íxandi̱va̱ʼana xíʼin na̱ káchíñu nu̱úna, saáchi loʼoní cháʼvinana. Kúnda̱a̱-inina ña̱ ndakundeéva na̱ yiví yóʼo kachíñuna nu̱úna ni loʼoní ná chaʼvinana, saáchi xíniñúʼunína chiñu yóʼo. Xa̱ʼa̱ ña̱ kéʼéna ña̱yóʼo táki̱ʼva íyo na̱ kíndo̱o xíʼin xu̱ʼún na̱ káchíñu nu̱úna saá íyona. Tá iin na̱ ndásakáʼnu Ndióxi̱ kúúmiína iin negocio ta íyo na̱ káchíñu nu̱úna, xíniñúʼu kiʼinnína kuenta xíʼin ña̱ káʼa̱n texto yóʼo. w21.12 10 párr. 9, 10

Kúnda̱a̱va-iniyó nda̱chun ni̱ka̱ʼa̱n ta̱ Jesús ña̱ yíchi̱níra ti̱kui̱í, saáchi ndeéní ni̱xo̱ʼvi̱ra tá xi̱tikaara ndaʼa̱ yitu̱n, ta ku̱a̱ʼání ña̱ ndo̱ʼora ki̱vi̱ kán. Xa̱ʼa̱ ña̱yóʼo xi̱kuni̱ra koʼora ti̱kui̱í. Ta̱ Jesús va̱ása níkukaʼan nu̱úra ña̱ ndukúra ña̱ xíniñúʼura, ta saátu miíyó va̱ása xíniñúʼu kukaʼan nu̱úyó ña̱ ndukúyó ña̱ xíniñúʼuyó. Soo sana va̱ása kútóoyó natúʼunyó xíʼin inkana ndáaña xíniñúʼuyó. Soo tá xíniñúʼuyó iin ña̱ʼa ná kǒo kukaʼan nu̱úyó ña̱ ndukúyóña nu̱ú inkana. Tá kúú, tá xa̱a̱ ku̱chéeyó á ndeé ndóʼoyó, sana xíniñúʼu ka̱ʼa̱nyó xíʼin iin na̱ migoyó ña̱ ná chindeétáʼanna xíʼinyó ña̱ satána ña̱ xíniñúʼuyó á ku̱ʼu̱nna xíʼinyó nu̱ú na̱ doctor. Ta saátu tá ndákava-iniyó, kivi ka̱ʼa̱nyó xíʼin iin na̱ anciano á iin na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ ña̱ ná kuniso̱ʼona miíyó, ta ná ka̱ʼa̱nna tu̱ʼun va̱ʼa ña̱ chika̱a̱ ndee̱ xíʼinyó (Prov. 12:25). Ná ndakaʼányó chi na̱ hermanoyó kúʼvi̱níva-inina xínina miíyó ta kúni̱na chindeétáʼanna xíʼinyó tá íyo iin ña̱ sándi̱ʼi̱-iniyó (Prov. 17:17). Soo na̱yóʼo va̱ása kunda̱a̱-inina ndáaña xíniñúʼuyó tá va̱ása káʼa̱nyó xíʼinna. w21.04 11, 12 párr. 11, 12

Ku̱a̱ʼáníyó íxayo̱ʼvi̱ña xíʼinyó tá nása̱ma ña̱ kéʼéyó. Savana xa̱a̱ ku̱a̱ʼání ku̱i̱ya̱ xi̱kachíñuna nu̱ú Jehová, xi̱kuuna misionero, xi̱ñuʼuna Betel á xi̱kachíñuna nu̱ú kúva̱ʼa veʼe ña̱ ndásakáʼnuyó Ndióxi̱, ta vitin na̱sama chiñu ña̱ kéʼéna. Inkana sa̱ndákoona chiñu ña̱ xi̱kutóonína keʼéna xa̱ʼa̱ ña̱ xa̱a̱ ku̱chéena. Tá ndóʼoyó u̱vi̱ saá ña̱ ni̱ka̱ʼa̱nyó xa̱ʼa̱ yóʼo kivi sakúsuchíníña-iniyó. Ña̱ chindeétáʼan xíʼinyó tá nása̱ma ña̱ kéʼéyó kúú ña̱ kotoyó ña̱ʼa nda̱a̱ táki̱ʼva xíto Jehová ña̱yóʼo. Ta̱yóʼo kéʼéra ña̱ʼa ña̱ ndáyáʼviní tiempo vitin, ta kúúmiíyó iin chiñu ña̱ ndáyáʼviní ña̱ chindeétáʼanyó xíʼinra (1 Cor. 3:9). Chiñu ña̱ kúúmiíyó kivi nasa̱maña, soo ña̱ kúʼvi̱-ini Jehová xínira miíyó va̱ása nása̱maña. Tá na̱sama ña̱ kéʼé na̱ ñuu Ndióxi̱ ta íxayo̱ʼvi̱ña xíʼún ña̱ keʼún ña̱yóʼo, va̱ása ndakaniníxi̱níún xa̱ʼa̱ ña̱yóʼo nda̱chun na̱samanaña. Nu̱úka ña̱ ndakanixi̱níún xa̱ʼa̱ ña̱ xi̱keʼún tá ya̱chi̱, ka̱ʼa̱n xíʼin Ndióxi̱ ña̱ ná chindeétáʼanra xíʼún ña̱ vií ndakanixi̱níún xa̱ʼa̱ chiñu ña̱ kúúmiíún vitin (Ecl. 7:10). Ña̱ kusi̱í-iniyó ta saátu ña̱ nda̱kú koo iniyó ni na̱sama ña̱ kéʼéyó. w22.03 17 párr. 11, 12

¿Ndáana ndixaní kúʼvi̱-ini Jehová xínira? Ña̱ Biblia káʼa̱nña ña̱ kivi xa̱a̱yó kuʼvi̱-iniyó kuniyó ku̱a̱ʼá ña̱ʼa, tá kúú, consejo ña̱ táxina ndaʼa̱yó, ña̱ ndíchi, ña̱ xínitúni̱yó, ña̱ xíʼiyó á ña̱ xíxiyó (2 Crón. 26:10; Prov. 12:1; 21:17; 29:3). Soo va̱ása kivi xa̱a̱yó ndixaní kuʼvi̱-iniyó kuniyó ña̱yóʼo, chi iinlá na̱ yiví kúú na̱ kivi xa̱a̱yó ndixaní kuʼvi̱-iniyó kuniyó. ¿Á kúni̱ kachi ña̱yóʼo ña̱ ndixaní kúʼvi̱-ini Jehová xínira nda̱a̱ ndáaka na̱ yiví? Va̱ása, saáchi iinlá na̱ viíní kítáʼan xíʼinra kúú na̱ ndixaní kúʼvi̱-inira xínira. Jehová nda̱kúní-inira xíʼin na̱ va̱ʼaní kítáʼan xíʼinra. Ta íyo iin ña̱ va̱ʼa taxira ndaʼa̱na chí nu̱únínu, ta nda̱a̱ ni iin yichi̱ va̱ása sandákoondaʼa̱ Jehová na̱yóʼo. Jehová kúʼvi̱-inira xínira ndiʼi na̱ yiví. Saáchi ña̱yóʼo ni̱ka̱ʼa̱n ta̱ Jesús xíʼin iin ta̱a ta̱ xi̱naní Nicodemo: “Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na, ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:1, 16; Mat. 5:44, 45). w21.11 2 párr. 3; 3 párr. 6, 7

Yo̱ʼvi̱ní ña̱ tákuyó nu̱ú ñuyǐví yóʼo ta sana kixi tu̱ndóʼo ña̱ ndeéníka nu̱úyó chí nu̱únínu (Mat. 24:21). Xa̱ʼa̱ ña̱kán kúni̱níyó ña̱ ná ki̱xaa̱ ki̱vi̱ ña̱ va̱ása kooka tu̱ndóʼo yóʼo. Tasaá va̱ása ndikókayó ndakanixi̱níyó xa̱ʼa̱ ña̱yóʼo saáchi va̱ása kookaña (Isa. 65:16, 17). Ña̱kán xíniñúʼu chika̱a̱níkayó ndee̱ ndakúka koo-iniyó. Ta̱ Jesús ni̱ka̱ʼa̱nra nda̱chun xíniñúʼu keʼéyó ña̱yóʼo, ka̱chira: “Tá ná kundeé-inindó saá kúú ña̱ ka̱kundó” (Luc. 21:19). Ta ña̱ chindeétáʼan xíʼinyó ña̱ ndakú koo-iniyó kúú ña̱ ndakanixi̱níyó ndáa ki̱ʼva yáʼa savana nu̱ú táʼan tu̱ndóʼo ña̱ kúúmiíyó. ¿Ndáana va̱ʼaní yichi̱ chínúu nu̱úyó ña̱ kundeé-iniyó? Jehová, saáchi xa̱a̱ ku̱a̱ʼání tiempo ndíka̱a̱ ñuyǐví yóʼo ndaʼa̱ ta̱ Ndi̱va̱ʼa ta íyoní tu̱ndóʼo, soo kúndeéva-ini Jehová xíʼin ña̱yóʼo. Kiviva ndi̱ku̱n sandíʼi-xa̱ʼa̱ra ñuyǐví ta̱ Ndi̱va̱ʼa, soo ndátura ña̱ kixaa̱ ki̱vi̱ ña̱ xa̱a̱ nda̱kaxinra (Rom. 9:22). Ta nani ndátura, kúndeé-inira xíʼin ña̱ va̱ása va̱ʼa kúu ñuyǐví yóʼo. w21.07 8 párr. 2-4