Septiembre

Tá tiempo ña̱ ni̱xi̱yo ta̱ Jesús nu̱ú ñuʼú yóʼo, na̱ yiví xi̱ndakanda̱ní-inina xíʼin ña̱ xi̱sanáʼa̱ra; soo ni saá xi̱kuni̱na ña̱ ná keʼéra inkaka ña̱ʼa ña̱ va̱ʼa kandíxanara. Soo xa̱ʼa̱ ña̱ va̱ása níxiinra keʼéra milagro ña̱ ndu̱kúna nu̱úra, ni̱xi̱ka-inina ta va̱ása níkandíxanara (Mat. 16:4). ¿Ndáaña káʼa̱n Biblia? Ta̱ Isaías ni̱ka̱ʼa̱nra ña̱ profecía yóʼo xa̱ʼa̱ ta̱ Mesías: “Va̱ása nda̱ʼyi̱ kóʼóra, ta ni va̱ása kuniso̱ʼona tu̱ʼunra chí calle” (Is. 42:1, 2). Tá ni̱xi̱ka ta̱ Jesús na̱túʼunra xíʼin na̱ yiví nu̱ú ñuʼú yóʼo, va̱ása níkuni̱ra ña̱ ná ka̱ʼa̱n va̱ʼanína xa̱ʼa̱ miíra. Ta̱ Jesús va̱ása ní ixava̱ʼara templo ña̱ náʼnuní, ta saátu va̱ása níxi̱ndixira ti̱ko̱to̱ táʼan ña̱ xi̱ndixi na̱ su̱tu̱ ña̱ va̱ʼaní náʼa̱. Ta va̱ása níka̱ʼa̱nra xíʼin na̱ yiví ña̱ ná kuniñúʼuna tu̱ʼun ña̱ ndáyáʼviní ña̱ va̱ʼa ka̱ʼa̱nna xíʼinra. Ta tá nda̱tiinna ku̱a̱chi xíʼinra, ni xi̱kunda̱a̱-inira ña̱ kuvira, va̱ása níxiinra keʼéra iin milagro ña̱ va̱ʼa sandákanda̱ra-ini ta̱ rey Herodes (Luc. 23:8-11). Tá ni̱xi̱yora nu̱ú ñuʼú yóʼo ke̱ʼéra sava milagro, soo ña̱ xi̱ndayáʼvika nu̱úra kúú ña̱ na̱túʼunra xa̱ʼa̱ Ndióxi̱. Saáchi ni̱ka̱ʼa̱nra xíʼin na̱ discípulora ña̱ ki̱xira xa̱ʼa̱ chiñu yóʼo (Mar. 1:38). w21.05 4 párr. 9, 10

Nándukúyó na̱ yiví na̱ kúni̱ “kutaku ndiʼi tiempo” (Hech. 13:48). Ña̱ va̱ʼa xa̱a̱na koona discípulo ta̱ Jesús xíniñúʼu chindeétáʼanyó xíʼinna 1) kunda̱a̱-inina xíʼin ña̱ káʼa̱n Biblia, 2) kandíxana ña̱ káʼa̱nña, 3) keʼéna ndiʼi ña̱ sákuaʼana nu̱úña (Col. 2:6, 7; 1 Tes. 2:13). Tá ndiʼiyó na̱ íyo ti̱xin congregación ná na̱ʼa̱yó ña̱ kúʼvi̱-iniyó xíniyó na̱ sa̱kán sákuaʼa xa̱ʼa̱ Ndióxi̱, ta saátu tá vií ndákiʼinyóna tá va̱xina reunión, saá kúú ña̱ kivi chindeétáʼanyó xíʼinna (Juan 13:35). Sana ku̱a̱ʼá tiempo xíniñúʼuyó ña̱ va̱ʼa sanáʼa̱yó na̱ yiví, ta saátu xíniñúʼu chika̱a̱níyó ndee̱ ña̱ chindeétáʼanyó xíʼinna ña̱ va̱ása kandíxakana ña̱ vatá á ña̱ va̱ása keʼékana ña̱ va̱ása va̱ʼa (2 Cor. 10:4, 5). Sana ku̱a̱ʼá yo̱o̱ xíniñúʼu chindeétáʼanyó xíʼin iin na̱ yiví ña̱ va̱ʼa nasamana ña̱ kéʼéna, tasaá kivi xa̱a̱na ndakuchina. Ta ku̱a̱ʼáníva ña̱ va̱ʼa ndakiʼinna. w21.07 3 párr. 6

¿Á kándíxayó ña̱ iinlá na̱ testigo Jehová kúú na̱ sánáʼa̱ ña̱ nda̱a̱ ta kíndo̱o-ini Ndióxi̱ xíʼin ki̱ʼva ña̱ ndásakáʼnuyóra? Ta̱ apóstol Pablo va̱ása níxi̱ka-inira ña̱ nda̱ni̱ʼíra ña̱ nda̱a̱ (1 Tes. 1:5). Ta ña̱ chi̱ndeétáʼan xíʼinra kandíxara ña̱ nda̱ni̱ʼíra ña̱ nda̱a̱ kúú ña̱ ka̱ʼvira tu̱ʼun Ndióxi̱. Ta̱yóʼo xi̱kandíxara ña̱ “ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña” (2 Tim. 3:16). Ta tá ka̱ʼviraña, nda̱ni̱ʼíra ña̱ ni̱na̱ʼa̱ nu̱úra ña̱ ndixa xi̱kuu ta̱ Jesús ta̱ Mesías. Soo na̱ xi̱niʼi yichi̱ nu̱ú na̱ judío va̱ása níxiinna ndakunina ña̱ xi̱kuu ta̱ Jesús ta̱ Mesías. Ta xi̱ka̱ʼa̱nna ña̱ xi̱sanáʼa̱na xa̱ʼa̱ Ndióxi̱, soo ndiʼi ña̱ xi̱keʼéna xi̱naʼa̱ña ña̱ su̱ví ña̱ nda̱a̱ kúúña (Tito 1:16). Soo síínva ni̱xi̱yo ta̱ apóstol Pablo nu̱ú na̱yóʼo, chi va̱ása níndaka̱xinra ndáaña kandíxara. Saáchi xi̱sanáʼa̱ra ndiʼi ña̱ va̱xi nu̱ú tu̱ʼun Ndióxi̱, ta xi̱keʼéra ña̱ xi̱kuni̱ Ndióxi̱ (Hech. 20:27). w21.10 18 párr. 1, 2

Miíyó kúú na̱ chíʼi ña̱ nda̱a̱ níma̱ na̱ yiví ta kóso̱yoña, soo xíniñúʼu ndakuniyó ña̱ mií Ndióxi̱ kúú ta̱ sákuaʼnuña (1 Corintios 3: 6, 7). Ndáyáʼviní na̱ yiví nu̱ú Jehová. Ña̱kán ta̱xira iin chiñu ña̱ ndáyáʼviní ndaʼa̱yó ña̱ chindeétáʼanyó xíʼin se̱ʼera, ta natúʼunyó xíʼin na̱ yiví ña̱ va̱ʼa ndakutáʼanna xíʼin na̱ ñuura tá kúma̱níka ndiʼi-xa̱ʼa̱ ñuyǐví yóʼo (Ageo 2:7). Tá nátúʼunyó xa̱ʼa̱ Ndióxi̱ nda̱a̱ táki̱ʼva íyo na̱ ku̱a̱ʼa̱n nandukú iin na̱ yiví na̱ nda̱ñúʼu saá íyoyó. Ni loʼova kúú na̱ yiví na̱ ku̱chiñu nda̱ni̱ʼí na̱ nda̱ñúʼu, ndáyáʼviníva chiñu ña̱ ke̱ʼé ndiʼina. Ta ki̱ʼva saátu íyo ña̱ ku̱a̱ʼa̱nyó natúʼunyó xíʼin na̱ yiví xa̱ʼa̱ Ndióxi̱, va̱ása xíni̱yó nda̱saana kivi ndataváyó ti̱xin ñuyǐví ta̱ Ndi̱va̱ʼa yóʼo. Soo kivi kuniñúʼu Jehová nda̱a̱ ndáakayó ña̱ va̱ʼa chindeétáʼanyó xíʼinna. Ta̱ Andreas ta̱ íyo chí Bolivia káchira: “Tá xáa̱ iin na̱ yiví sákuaʼana xa̱ʼa̱ ña̱ nda̱a̱ ta ndákuchina, su̱ví iinlá kuití na̱ hermano níchindeétáʼan xíʼinna, saáchi ndiʼiva na̱ hermano chi̱ndeétáʼan xíʼinna”. Ña̱kán ná chika̱a̱níyó ndee̱ ña̱ natúʼunyó xíʼin na̱ yiví ta va̱ása ndakava-iniyó. Tá ná keʼéyó ña̱yóʼo Jehová taxira ku̱a̱ʼání bendición ndaʼa̱yó ta kusi̱íníka-iniyó natúʼunyó xíʼin na̱ yiví. w21.05 18, 19 párr. 19, 20

Iin na̱ tíin kití ña̱ kúni̱na kúú ña̱ tiinnarí á kaʼnínarí. Ta ña̱ va̱ʼa keʼéna ña̱yóʼo xíniñúʼuna ku̱a̱ʼání ña̱ʼa, tá kúú táʼan ña̱ ni̱ka̱ʼa̱n iin ta̱a xíʼin ta̱ Job (Job 18:8-10). ¿Ndáaña kéʼéna ña̱ va̱ʼa sandáʼvina iin kití tasaá tiinnarí? Ku̱a̱ʼání tiempo xíto na̱nínarí. Xíto va̱ʼana ndáa míí xíkarí, ndáaña kútóorí, ta ndáaña kivi kuniñúʼuna ña̱ va̱ʼa sandáʼvinarí tasaá va̱ʼa tiinnarí. Ta ki̱ʼva saá íyo ña̱ kéʼé ta̱ Ndi̱va̱ʼa, kíʼin va̱ʼara kuenta xíʼinyó, ta xíto va̱ʼara ndáaña kéʼéyó, ta ndáaña kútóoyó. Tasaá iin kama kuití chíndúʼúra iin ña̱ʼa nu̱úyó ña̱ kivi sandákava miíyó. Soo ni saá, tu̱ʼun Ndióxi̱ káʼa̱nña xíʼinyó ndáaña xíniñúʼu keʼéyó ña̱ va̱ása ko̱oyoyó ndaʼa̱ ta̱ Ndi̱va̱ʼa. Ta ni xa̱a̱ ni̱ko̱oyoyó ndaʼa̱ra, káʼa̱nña xíʼinyó ndáaña kivi keʼéyó ña̱ va̱ʼa sa̱ñáyó ndaʼa̱ra. U̱vi̱ ña̱ʼa kúú ña̱ xíniñúʼu ta̱ Ndi̱va̱ʼa ña̱ sandáʼvira miíyó, ña̱yóʼo kúú: ña̱ ni̱nu kuniyó á ña̱ kuni̱yó kuumiíyó ku̱a̱ʼáka ña̱ʼa. Xa̱a̱ ku̱a̱ʼání ku̱i̱ya̱ xíniñúʼuraña ta xa̱a̱ ku̱a̱ʼánína kúchiñura sándaʼvira. Nda̱a̱ táki̱ʼva kéʼé ta̱ tíin saa, sándaʼvirarí ña̱ va̱ʼa ki̱ʼvirí ini iin ñunú á inkaka ña̱ʼa tasaá tiinrarí, ki̱ʼva saátu íyo ña̱ kéʼé ta̱ Ndi̱va̱ʼa xíʼinyó (Sal. 91:3). Soo va̱ása xíniñúʼu taxiyó sandáʼvira miíyó, saáchi xa̱a̱ káʼa̱nva Jehová xíʼinyó ndáaña xíniñúʼu ta̱ Ndi̱va̱ʼa ña̱ va̱ʼa sandáʼvira miíyó (2 Cor. 2:11). w21.06 14 párr. 1, 2

Nda̱a̱ táki̱ʼva ndáyáʼvi diamante, saá íyo na̱ hermanoyó na̱ xa̱a̱ ku̱chée saáchi ndáyáʼvinína. Tu̱ʼun Ndióxi̱ chítáʼanña vi̱xi xi̱nína xíʼin iin corona (Prov. 16:31; 20:29). Soo sana ixayo̱ʼvi̱ña xíʼinyó kotoyó ña̱ ndáyáʼvinína. Soo tá ná kundayáʼvi na̱ hermanoyó na̱ xa̱a̱ ku̱chée nu̱úyó, ku̱a̱ʼání ña̱ va̱ʼa sakúaʼayó xíʼin ña̱ kéʼéna. Ndáyáʼviní na̱ hermano na̱ xa̱a̱ ku̱chée nu̱ú Jehová. Saáchi kúnda̱a̱-inira ndáa ki̱ʼva íyona ta chíndayáʼviníra ña̱ va̱ʼa kúúmiína. Kúsi̱íní-ini Jehová tá xítora sánáʼa̱na na̱ hermano na̱ válíka xa̱ʼa̱ ndiʼi ña̱ sa̱kúaʼana ndiʼi tiempo ña̱ káchíñuna nu̱úra (Job 12:12; Prov. 1:1-4). Ta saátu ndáyáʼvinína nu̱úra xa̱ʼa̱ ña̱ kúndeé-inina (Mal. 3:16). Ta ni ku̱a̱ʼání tu̱ndóʼo yáʼana nu̱ú kándíxanína Jehová. Ta vitin ni loʼo va̱ása xíka-inina xa̱ʼa̱ ña̱ ndátuna ndakiʼinna chí nu̱únínu. Ta kúʼvi̱ní-ini Jehová xínirana saáchi ni xa̱a̱ ku̱chéena, ndákundeéna nátúʼunna xa̱ʼa̱ra xíʼin na̱ yiví (Sal. 92:12-15). w21.09 2 párr. 2, 3

Ndáyáʼviní kotoyó ndáa ki̱ʼva íyo ña̱ kéʼéyó. Ña̱kán ná ndakanixi̱níyó xa̱ʼa̱ ña̱yóʼo: “¿Á xíniñúʼu chitáʼi̱n ña̱ kéʼíi̱ xíʼin ña̱ kéʼé inkana tasaá va̱ʼa kunii̱? ¿Nda̱chun chíka̱i̱ ndee̱ ña̱ kachíñui̱ ti̱xin congregación? ¿Á xa̱ʼa̱ ña̱ kúnii̱ kundáyáʼvii̱ nu̱ú inkana kúúña? ¿Á xa̱ʼa̱ Jehová kéʼíi̱ña?”. Tu̱ʼun Ndióxi̱ káʼa̱nña xíʼinyó ña̱ va̱ása xíniñúʼu chitáʼanyó miíyó xíʼin inkana. ¿Nda̱chun? Saáchi tá túviyó ña̱ ndáyáʼvikayó nu̱ú inkana kivi kixáʼayó ni̱nu kuniyó ta tá túviyó ña̱ va̱ása ndáyáʼviyó, kivi kixáʼayó ndakava-iniyó (Rom. 12:3). Ná ndakaʼányó chi su̱ví xa̱ʼa̱ ña̱ livi náʼa̱yó kúú ña̱ ka̱na Jehová miíyó ti̱xin ñuura, ta ni su̱ví xa̱ʼa̱ ña̱ va̱ʼaní káʼa̱nyó kúúña á xa̱ʼa̱ ña̱ xíni̱ní na̱ yiví miíyó kúúña, saáchi ka̱nara miíyó xa̱ʼa̱ ña̱ kúʼvi̱ní-iniyó xíniyóra, ta xíniso̱ʼoyó ña̱ káʼa̱n se̱ʼera (Juan 6:44; 1 Cor. 1:26-31). w21.07 14, 15 párr. 3, 4

Ta ña̱ va̱ʼa nasamayó ki̱ʼva ña̱ ndákanixi̱níyó xíniñúʼu ka̱ʼa̱n ni̱ʼiyó xíʼin Jehová, kaʼviyó tu̱ʼunra ta ndakanixi̱níyó xa̱ʼa̱ña. Ná ndakundeéyó keʼéyó ña̱yóʼo, ta ná ka̱ʼa̱nyó xíʼin Jehová ña̱ taxira ndee̱ ndaʼa̱yó. Espíritu santora chindeétáʼan xíʼinyó ña̱ va̱ása chitáʼanyó miíyó xíʼin inkana. Ta saátu kivi chindeétáʼan Jehová xíʼinyó ña̱ kotoyó á ni̱nu kúniyó ta á ki̱xáʼayó sáa̱-iniyó xíniyó inkana, tasaá ndukúyó ki̱ʼva ña̱ va̱ása keʼékayóña (2 Crón. 6:29, 30). Jehová kúnda̱a̱-inira ndáaña ndíka̱a̱ níma̱yó. Ta kúnda̱a̱-inira ña̱ chíka̱a̱níyó ndee̱ ña̱ va̱ása keʼéyó táʼan ña̱ kéʼé na̱ ñuyǐví yóʼo, ta saátu kúnda̱a̱-inira ña̱ kúúyó na̱ yiví ku̱a̱chi. Tá xítora ña̱ chíka̱a̱níyó ndee̱ keʼéyó ña̱ kúni̱ miíra, kúʼvi̱níka-inira xínira miíyó. Jehová kúʼvi̱-inira xínira miíyó, nda̱a̱ táki̱ʼva kúʼvi̱-ini iin ñaʼá xíniñá se̱ʼeñá (Is. 49:15). Ta ki̱ʼva saá ndóʼo Jehová tá xítora ña̱ chíka̱a̱níyó ndee̱ ña̱ vií kachíñuyó nu̱úra, xáa̱ra kúʼvi̱níka-inira xínira miíyó. ¿Á su̱ví ña̱ nda̱a̱ kúú ña̱ sándi̱koní ña̱yóʼo iniyó? w21.07 24, 25 párr. 17-19

Saátu kivi kusi̱í-ini miíyó tá ná chika̱a̱yó ndee̱ keʼéyó nda̱a̱ ndáaka chiñu ná taxina ndaʼa̱yó ti̱xin ñuu Ndióxi̱. Ná chika̱a̱yó ndee̱ ña̱ natúʼunyó xíʼin ku̱a̱ʼáka na̱ yiví xa̱ʼa̱ Ndióxi̱, ta saátu ku̱a̱ʼáka chiñu ná keʼéyó ti̱xin congregación (Hech. 18:5; Heb. 10:24, 25). Ta ná chika̱a̱yó ndee̱ ña̱ viíní koo comentario ña̱ taxiyó ti̱xin reunión ña̱ va̱ʼa chika̱a̱ña ndee̱ xíʼin na̱ hermano. Ta tá káʼa̱nna xíʼinyó ya̱ʼayó ti̱xin reunión ña̱ xíyo ma̱ʼñú semana, viíní ná keʼéyó ña̱yóʼo. Ta saátu tá káʼa̱nna xíʼinyó keʼéyó chiñu ti̱xin salón, ya̱chi̱ ná xa̱a̱yó, ta viíní ná keʼéyó chiñu yóʼo ña̱kán va̱ʼa kundaa-inina miíyó. Ta ná kǒo ndakanixi̱níyó ña̱ va̱ása ndáyáʼvi sava chiñu ña̱ táxina ndaʼa̱yó, ta ndakanixi̱níyó ña̱ va̱ása xíniñúʼu viíní keʼéyóña. Va̱ʼaka ná chika̱a̱yó ndee̱ ña̱ viíní keʼéyó chiñu ña̱ táxina ndaʼa̱yó (Prov. 22:29). Tá ná chika̱a̱yó ndee̱ ña̱ kachíñukayó nu̱ú Jehová, saá kúú ña̱ viíní xa̱a̱yó kutáʼanyó xíʼinra ta kusi̱íní-iniyó (Gál. 6:4). Tasaá va̱ása ixayo̱ʼvi̱ña xíʼinyó kusi̱í-iniyó xíʼin inkana tá ndákiʼinna chiñu ña̱ xi̱kuni̱yó ndakiʼinyó (Gál. 5:26). w21.08 22 párr. 11

Ná va̱ása ni̱nu koo iniyó ta ná taxiyó sanáʼa̱ Jehová miíyó. Tá ndíka̱a̱ kue̱ʼe̱ níma̱ na̱ yiví kivi ndasatéʼéña tu̱chi ña̱ íyo níma̱na ta va̱ása viíka kachíñuña, ta nda̱a̱ táki̱ʼva íyo kue̱ʼe̱ yóʼo saá íyo ña̱ ni̱nu kuniyó, saáchi kivi ndasatéʼéña níma̱yó tasaá ixayo̱ʼvi̱ña xíʼinyó kuniso̱ʼoyó ña̱ káʼa̱n Jehová. Xa̱ʼa̱ ña̱ ni̱nuní xi̱kuni na̱ fariseo, va̱ása níxiinna ndakunina ña̱ xi̱kuu ta̱ Jesús se̱ʼe Ndióxi̱, ta xi̱kuumiíra espíritu santo (Juan 12:37-40). Ta̱ xa̱ʼa̱ ña̱ ni̱nuní xi̱kunina va̱ása níxa̱a̱na ni̱ʼína ña̱ kutakuna ndiʼi tiempo (Mat. 23:13, 33). Ña̱kán ndáyáʼviní taxiyó chindeétáʼan tu̱ʼun Ndióxi̱ xíʼinyó xíʼin espíritu santora ña̱ nasamayó ña̱ kéʼéyó xíʼin ña̱ ndákanixi̱níyó, ta nda̱a̱ ndáaka ña̱ ndáka̱xinyó keʼéyó ná taxiyó ña̱ chindeétáʼanña xíʼinyó. Xa̱ʼa̱ ña̱ vitání ni̱xi̱yo ini ta̱ Santiago, ta̱xira ña̱ ná sanáʼa̱ Jehová miíra. Ta saátu xa̱ʼa̱ ña̱ vitání ni̱xi̱yo inira va̱ʼaní xi̱sanáʼa̱ra inkana. w22.01 9 párr. 7

Tá ndákundeéyó káʼa̱nyó xíʼin Jehová, kivi kandíxayó ña̱ kuniso̱ʼovara ña̱ káʼa̱nyó xíʼinra ta ndakuiinra yuʼúyó (Col. 4:2). Sana túviyó ña̱ va̱ása kama ndákuiin Jehová oración ña̱ kéʼéyó nu̱úra, soo ta̱yóʼo káʼa̱nra xíʼinyó ña̱ ndakuiinvara “mií tiempo ña̱ xíniñúʼuyóña” (Heb. 4:16). Ña̱kán ná va̱ása ndakanixi̱níyó ña̱ su̱ví ña̱ va̱ʼa kéʼé Jehová tá va̱ása kama ndákuiinra yuʼúyó. Tá kúú, xa̱a̱ ku̱a̱ʼání ku̱i̱ya̱ káʼa̱n savana xíʼin Jehová ña̱ ná kixaa̱ Reinora ta sandíʼi-xa̱ʼa̱ña ña̱ va̱ása va̱ʼa íyo nu̱ú ñuʼú yóʼo. Ta nda̱a̱ mií ta̱ Jesús sa̱náʼa̱ miíyó ña̱ ndukúyó Reino yóʼo (Mat. 6:10). Soo iin ña̱ kíʼviní kúú ña̱ sandákooyó kandíxayó Ndióxi̱ xa̱ʼa̱ ña̱ ta̱ʼán sa̱ndíʼi-xa̱ʼa̱ra ña̱ va̱ása va̱ʼa íyo nu̱ú ñuʼú yóʼo (Hab. 2:3; Mat. 24:44). Ta ña̱ va̱ʼaníka kúú ña̱ kúee koo iniyó ta kundatuyó ná sandíʼi-xa̱ʼa̱ Jehová ña̱ va̱ása va̱ʼa, ta saátu ndakundeéyó ka̱ʼa̱nyó xíʼinra. Xa̱a̱ nda̱kaxinva Jehová mií ki̱vi̱ xíʼin hora ña̱ sandíʼi-xa̱ʼa̱ra ña̱ va̱ása va̱ʼa íyo nu̱ú ñuʼú yóʼo. Ta keʼéraña mií tiempo ña̱ va̱ʼaka nu̱ú ndiʼiyó (Mat. 24:36; 2 Ped. 3:15). w21.08 10 párr. 10, 11

Na̱ hermano na̱ vitá íyo ini kúnda̱a̱-inina ña̱ va̱ása kivi keʼéna ku̱a̱ʼáka chiñu nda̱a̱ táki̱ʼva xi̱keʼéna tá ya̱chi̱. Ná ndakanixi̱níyó xa̱ʼa̱ ña̱ ndóʼo na̱ superintendente ña̱ circuito, tá xínuna 70 ku̱i̱ya̱ táxina inka chiñu ndaʼa̱na. Ta sana íxayo̱ʼvi̱ña xíʼinna saáchi xi̱kutóonína keʼéna chiñu yóʼo, ta kúni̱kavana keʼénaña. Soo kúnda̱a̱-inina ña̱ na̱ va̱ʼaníka keʼé chiñu yóʼo kúú na̱ hermano na̱ válíka nu̱úna. Na̱ hermano yóʼo ndíku̱nna yichi̱ na̱ levita na̱ ni̱xi̱yo tiempo xi̱naʼá, chi tá xi̱xinuna 50 ku̱i̱ya̱ va̱ása níxi̱kachíñukana ti̱xin tabernáculo. Soo ni saá xi̱kusi̱íníva-inina xi̱keʼéna inkaka chiñu. Xa̱ʼa̱ ña̱yóʼo xi̱chikaa̱na ndee̱ ña̱ keʼéna nda̱a̱ ndáaka chiñu, ta xi̱chindeétáʼanna xíʼin na̱ válíka (Núm. 8:25, 26). Ta saátu kéʼé na̱ hermano na̱ va̱ása kúúka superintendente ña̱ circuito, ni va̱ása xáʼa̱nkana xítona congregación ña̱ xi̱xitona tá ya̱chi̱, soo chíka̱a̱nívana ndee̱ xíʼin na̱ congregación nu̱ú ñúʼuna. w21.09 8, 9 párr. 3, 4

Ta̱ Jesús na̱túʼunra xa̱ʼa̱ iin ta̱ loʼo ta̱ nda̱ñúʼu nu̱ú Lucas 15:11-32. Ta̱ loʼo yóʼo va̱ása níxiinkara kuniso̱ʼora ña̱ káʼa̱n yivára xíʼinra ña̱kán nda̱koora veʼera ta ku̱a̱ʼa̱nra “inka ñuu ña̱ kíndo̱o xíká”. Ta tá ni̱xa̱a̱ra kán ki̱xáʼara kéʼéra ku̱a̱ʼání ña̱ kini. Soo tá ki̱xáʼa íyo tu̱ndóʼo nu̱úra ki̱xáʼara ndákaʼánra xa̱ʼa̱ ña̱ va̱ʼaní ni̱xi̱yora xíʼin yivára. Ta̱ Jesús ni̱ka̱ʼa̱nra ña̱ ki̱xáʼa ta̱ loʼo yóʼo “ndákani vií xi̱níra”. Xi̱kunda̱a̱-inira ña̱ va̱ása va̱ʼa íyo ña̱ ke̱ʼéra, soo su̱ví nda̱saa ña̱yóʼo níxiniñúʼu keʼéra, chi saátu xi̱niñúʼu nasamara ña̱ xi̱keʼéra. Ta nda̱ndikóní-inira xa̱ʼa̱ ña̱ ke̱ʼéra. Ña̱ ndo̱ʼo ta̱ loʼo yóʼo su̱ví iin cuento kúúña chi ña̱ ndixa ku̱u kúúña. Ta xíʼin ña̱yóʼo kivi sákuaʼa na̱ anciano ña̱ kotona á ndixa nda̱ndikó-ini na̱ hermana na̱ ni̱ki̱ʼvi ku̱a̱chi ndeé. w21.10 5 párr. 14, 15

¿Ndáa ña̱ʼa kúú ña̱ va̱ása kanda̱ á ña̱ ndiʼi-xa̱ʼa̱? Ta̱ apóstol Pablo ka̱ʼyíra: “Xa̱ʼa̱ ña̱ ndakiʼinyó iin Reino ña̱ kǒo kívi kanda̱, ná ndakundeéyó taxiyó ña̱ na̱ʼa̱ Ndióxi̱ ña̱ va̱ʼaní-inira xíʼinyó, chi ña̱yóʼo kúú ña̱ chindeétáʼan xíʼinyó ña̱ ndasakáʼnuyóra nda̱a̱ táki̱ʼva kúni̱ miíra, ta yi̱ʼvíníyó kuniyó Ndióxi̱ ta ixato̱ʼóníyóra” (Heb. 12:28). Ña̱kán, tá ná sankánda̱ Ndióxi̱ ñuʼú yóʼo, ña̱yóʼo kúni kachiña ña̱ sandíʼi-xa̱ʼa̱ra ndiʼi na̱ yiví na̱ va̱ása xíín kundiku̱nñaʼá (Sal. 110:5, 6; Dan. 2:44). Si̱lóʼoní tiempo kíndo̱o nu̱ú na̱ yiví, ña̱kán xíniñúʼu ndaka̱xinna ndáaña keʼéna. ¿Á ndakundeéna keʼéna ña̱ va̱ása va̱ʼa ta ndiʼi-xa̱ʼa̱na? ¿Á nasamana ña̱ kéʼéna ta kixáʼana keʼéna ña̱ kúni̱ Ndióxi̱ ña̱ va̱ʼa ndakiʼinna ña̱ kutakuna ndiʼi tiempo? (Heb. 12:25). Tá nátúʼunyó xíʼin na̱ yiví xa̱ʼa̱ Ndióxi̱, saá kúú ña̱ chíndeétáʼanyó xíʼinna ña̱ ndaka̱xinna ña̱ keʼéna. Ta ná va̱ása nandósó-iniyó xa̱ʼa̱ tu̱ʼun ña̱ ni̱ka̱ʼa̱n tátayó Jesús tá ka̱chira: “Ta natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mat. 24:14). w21.09 18, 19 párr. 18-20

Ndóʼó na̱ anciano, chika̱a̱ndó ndee̱ xíʼin na̱ hermano yóʼo. Ndóʼó kúúmiíndó chiñu ña̱ sandíkondó-ini na̱ hermano tá ki̱ta iin na̱ veʼena ti̱xin ñuu Ndióxi̱ (1 Tes. 5:14). Siʼna miíndó kuyatin nu̱úna ta chika̱a̱ndó ndee̱ xíʼinna tá sa̱kán kíxáʼa reunión á tá xa̱a̱ ndíʼiña. Ku̱ʼu̱nndó kotondóna veʼena ta ka̱ʼa̱nndó xa̱ʼa̱na xíʼin Ndióxi̱. Ta saátu keendó natúʼunndó xa̱ʼa̱ Ndióxi̱ xíʼinna á kivitu kanandóna tá káʼvindó xíʼin na̱ veʼendó. Xíniñúʼu kundaandó na̱ hermano na̱ ndíʼi̱-ini, kuʼvi̱-inindó kunindóna ta saátu kundáʼvi-inindó kunindóna (1 Tes. 2:7, 8). Jehová va̱ása “kúni̱ra ña̱ ná ndiʼi-xa̱ʼa̱ nda̱a̱ ni iinna saáchi ña̱ kúni̱ra kúúña ná ndikó-inina” (2 Ped. 3:9). Ni ke̱ʼé iin na̱ hermano ña̱ va̱ása va̱ʼa soo ndáyáʼvinívana nu̱úra, saáchi Jehová ta̱xira se̱ʼera ña̱ ni̱xi̱ʼi̱ra xa̱ʼa̱ iin tá iinyó. Xa̱ʼa̱ ña̱ kúʼvi̱ní-ini Ndióxi̱ xínira na̱ ki̱ta ti̱xin ñuura, ndúkúra ki̱ʼva ña̱ va̱ʼa ndikóna nu̱úra ta kúni̱ra ña̱ ná chika̱a̱-inina ña̱ ndikóna nu̱úra nda̱a̱ táki̱ʼva ke̱ʼé ta̱ loʼo ta̱ nda̱ñúʼu, ta̱ na̱túʼun ta̱ Jesús xa̱ʼa̱. (Luc. 15:11-32). w21.09 30, 31 párr. 17-19

Sana va̱ása kívika sanáʼún á natúʼún xíʼin na̱ yiví xa̱ʼa̱ Ndióxi̱, xa̱ʼa̱ ña̱ ndeé ndóʼún á xa̱ʼa̱ ña̱ ku̱chéún. Soo kiviva kusi̱í-iniún keʼún ña̱ kúchiñu kuitíún keʼún. Ná kotoyó ndáaña ke̱ʼé ta̱ rey David xíʼin na̱ ta̱a na̱ kítáʼan xíʼinra tá ka̱nitáʼanna xíʼin na̱ ñuu Amaleq, ña̱ va̱ʼa ndakindaana na̱ veʼena ndaʼa̱ na̱yóʼo xíʼin ña̱ʼa ña̱ i̱xakúiʼnána. U̱vi̱ ciento na̱ ta̱a ku̱naánína ta va̱ása níxa̱ʼa̱nna kanitáʼanna ta ki̱ndoona kundaana ña̱ʼa. Soo tá ndi̱ʼi ku̱a̱chi, ni̱ka̱ʼa̱n ta̱ David ña̱ inkáchi ndataʼvína ña̱ʼa ña̱ nda̱kiʼinna ndaʼa̱ na̱ ñuu Amaleq (1 Sam. 30:21-25). Ki̱ʼva saá kúu tiempo vitin xíʼin chiñu ña̱ kúúmiíyó ña̱ chíndeétáʼanyó xíʼin na̱ yiví ña̱ xa̱a̱na koona discípulo ta̱ Jesús. Ndiʼiyó chíka̱a̱yó ndee̱ ña̱ taxiyó mií ña̱ va̱ʼaka ndaʼa̱ Jehová, ta inkáchi kúsi̱í-iniyó tá iin na̱ hermano chi̱ndeétáʼanna xíʼin iin na̱ yiví ña̱ ni̱xa̱a̱na sa̱kúaʼana xa̱ʼa̱ Jehová, tasaá kivi ni̱ʼína ña̱ kutakuna ndiʼi tiempo. Jehová xítora ña̱ chíka̱a̱níyó ndee̱ ña̱ kachíñuyó nu̱úra, ta nátúʼunyó xíʼin na̱ yiví xa̱ʼa̱ ña̱ kúʼvi̱-iniyó xíniyóna, xa̱ʼa̱ ña̱yóʼo táxira ku̱a̱ʼání ña̱ va̱ʼa ndaʼa̱yó. Saátu sánáʼa̱ra miíyó ña̱ kusi̱íní-iniyó xa̱ʼa̱ chiñu ña̱ kéʼéyó nu̱úra (Juan 14:12). Ña̱kán ná kandíxaníyó ña̱yóʼo: Ndióxi̱ taxira ña̱ va̱ʼa ndaʼa̱yó tá ná va̱ása ndakava-iniyó. w21.10 28 párr. 15-17

Tá xa̱a̱ ku̱a̱ʼa̱n kúchée na̱ hermano, kíxáʼana ndíʼi̱-inina xa̱ʼa̱ ña̱ va̱ása kívi keʼéna ku̱a̱ʼáka chiñu nu̱ú Jehová nda̱a̱ táki̱ʼva xi̱keʼéna tá ya̱chi̱. Ña̱ nda̱a̱ kúú ña̱ va̱ása íyoka ndee̱na, soo kivi kuniñúʼuna ña̱ ndíchi ña̱ kúúmiína, saátu ña̱ xíni̱na keʼéna ña̱ va̱ʼa chindeétáʼanna xíʼin na̱ hermano na̱ válíka nu̱úna, ña̱ kachíñukana nu̱ú Jehová ta ndakiʼinna inkaka chiñu. Tá kúni̱na chindeétáʼanna xíʼin na̱ hermano na̱ válíka nu̱úna, xíniñúʼu vitá koo inina. Na̱ yiví na̱ vitá-ini ndákunina ña̱ ndáyáʼvika inkana nu̱úna (Filip. 2:3, 4). Tá vitá íyo ini na̱ hermano na̱ xa̱a̱ ku̱chée, ndíku̱nna ña̱ káʼa̱n tu̱ʼun Ndióxi̱ tá kéʼéna iin chiñu tasaá va̱ʼaní kána ndiʼi ña̱ kéʼéna. Ña̱kán va̱ása kúni̱na ña̱ ná keʼé na̱ hermano iin chiñu nda̱a̱ táki̱ʼva xi̱keʼé miínaña tá ya̱chi̱ (Ecl. 7:10). Ta ni xíni̱nína keʼéna iin chiñu, kúnda̱a̱-inina ña̱ nása̱maní ña̱ʼa ña̱ íyo nu̱ú ñuyǐví yóʼo, ta xa̱ʼa̱ ña̱yóʼo xíniñúʼu nasamana ki̱ʼva ña̱ káchíñuna ti̱xin ñuu Ndióxi̱ (1 Cor. 7:31). w21.09 8 párr. 1, 3

Síínva íyo Jehová nu̱ú ndióxi̱ vatá yóʼo, saáchi nda̱a̱ ni iin yichi̱ va̱ása ka̱ʼa̱nra xíʼinyó keʼéyó ña̱ kini ña̱ va̱ʼa ndasakáʼnuyóra. Ta̱yóʼo kúúra iin Ndióxi̱ ta̱ yi̱i̱ní. Chi saá íyo tu̱ʼun ña̱ ni̱ka̱ʼyi̱ nu̱ú iin ka̱a ña̱ oro ña̱ xi̱tiin nu̱ú ti̱ko̱to̱ ña̱ xi̱núu xi̱ní ta̱ su̱tu̱ káʼnu. Siaʼa xi̱kachi tu̱ʼun yóʼo: “Iinlá Jehová kúú Ndióxi̱ ta̱ yi̱i̱” (Éx. 28:36-38). Tá xi̱xini na̱ ñuu Israel ka̱a ña̱ xi̱núu te̱ʼé ta̱ su̱tu̱ káʼnu, xi̱ndakaʼánna ña̱ iinlá Jehová kúú Ndióxi̱ ta̱ yi̱i̱ní. Soo, ¿ndáaña xi̱keʼéna tá va̱ása níxi̱kuchiñu kuyatinna nu̱ú ta̱ su̱tu̱ káʼnu ña̱ va̱ʼa kuninaña? ¿Á ni̱xi̱yo iin ña̱ kivi sandákaʼán miína ña̱ kúú Jehová iin Ndióxi̱ ta̱ yi̱i̱? Ni̱xi̱yovaña. Saáchi xi̱kaʼvina ley nu̱ú ndiʼina, kúúna ta̱a, ñaʼá á na̱ va̱lí (Deut. 31:9-12). Tá kán níxi̱yoyó, kuniso̱ʼovayó kaʼvina tu̱ʼun yóʼo: “Yi̱ʼi̱ kúú Jehová Ndióxi̱ndó, ta xíniñúʼu yi̱i̱ koondó saáchi ta̱ yi̱i̱ kúi̱”, “xíniñúʼu yi̱i̱ koondó saáchi yi̱ʼi̱ Jehová ta̱ yi̱i̱ kúi̱” (Lev. 11:44, 45; 20:7, 26). w21.12 3 párr. 6, 7

Ku̱a̱ʼání na̱ hermano ndíʼi̱-inina, saáchi kǒo chiñu ña̱ kachíñuna ñuu nu̱ú ndóona. Ta íxayo̱ʼvi̱níña xíʼinna kuumiína loʼo xu̱ʼún ña̱ va̱ʼa taxina ña̱ xíniñúʼu na̱ veʼena. Ta sava na̱ familia xóʼvi̱nína chi ni̱xi̱ʼi̱ na̱ xi̱kachíñu ña̱ va̱ʼa koo ña̱ kuxuna. Ta xa̱ʼa̱ ña̱ ndíka̱a̱ kue̱ʼe̱ ña̱ coronavirus, ku̱a̱ʼánína kǒoka chiñu ndaʼa̱na ta kǒo xu̱ʼúnna. Tá yáʼayó nu̱ú táʼan tu̱ndóʼo yóʼo á inkakaña, ¿ndáa ki̱ʼva kundiku̱nyó consejo ña̱ ta̱xi ta̱ Jesús ña̱ va̱ása kundi̱ʼi̱ní-iniyó? Iin ña̱ chindeétáʼan xíʼinyó ña̱ va̱ása kundi̱ʼi̱ní-iniyó kúú ña̱ kundaa-iniyó Jehová. Ná ndakaʼányó chi yiváyó Jehová káʼa̱nra taxira ndiʼi ña̱ xíniñúʼuyó tá siʼna chiñura ná kundi̱ʼi̱-iniyó xa̱ʼa̱ (Mat. 6:32, 33). Ta ndiʼi tiempo sáxi̱nura ña̱ káʼa̱nra (Deut. 8:4, 15, 16; Sal. 37:25). Jehová ndáara saa ta saátu yita, ña̱kán ná va̱ása kundi̱ʼi̱-iniyó xa̱ʼa̱ ña̱ kuxuyó á ña̱ kundixiyó (Mat. 6:26-30; Filip. 4:6, 7). Chi nda̱a̱ táki̱ʼva kéʼé iin ta̱a xíʼin se̱ʼera ña̱ táxira ndiʼi ña̱ xíniñúʼuna xa̱ʼa̱ ña̱ kúʼvi̱-inira xínirana, saátu kéʼé Jehová xíʼin miíyó, táxira ndiʼi ña̱ xíniñúʼuyó xa̱ʼa̱ ña̱ kúʼvi̱-inira xínira miíyó. w21.12 16, 17 párr. 4, 5; 18 párr. 8

¿Á xa̱a̱ ke̱ʼéna iin ña̱ va̱ása va̱ʼa xíʼinyó, ta sana iin na̱ hermano kúú na̱ ke̱ʼé ña̱yóʼo xíʼinyó? Ta̱ José va̱ása nísa̱a̱ra xíʼin na̱ ñanira xa̱ʼa̱ ña̱ va̱ása va̱ʼa ke̱ʼéna xíʼinra. Chi ña̱ ni̱ndi̱ʼi̱ka-inira xa̱ʼa̱ kúú ña̱ ndasakáʼnura Jehová, ta ku̱a̱ʼání bendición ta̱xi Jehová ndaʼa̱ra xa̱ʼa̱ ña̱ kúee ni̱xi̱yo inira ta ku̱ndeé-inira. Tá ni̱ya̱ʼa tiempo i̱xakáʼnu-ini ta̱ José xa̱ʼa̱ na̱ ñanira, ta xi̱nira ndáa ki̱ʼva ta̱xi Jehová ku̱a̱ʼání bendición ndaʼa̱ra (Gén. 45:5). Nda̱a̱ táki̱ʼva ndo̱ʼo ta̱ José, saátu miíyó va̱ʼaní kuniyó tá ná kuyatinyó nu̱ú Jehová ta taxiyó ndasaviíra ku̱a̱chi ña̱ ndóʼoyó (Sal. 7:17; 73:28). Tá kúndeé-iniyó xa̱ʼa̱ ña̱ kéʼéna ña̱ va̱ása va̱ʼa xíʼinyó á xa̱ʼa̱ ña̱ kúúmiíyó inkaka tu̱ndóʼo ña̱ sáxo̱ʼvi̱ miíyó, ná ndakaʼányó ña̱ yatin íyo Jehová xíʼin na̱ kúsuchí-ini (Sal. 34:18). Ta̱yóʼo kúʼvi̱-inira xínira miíyó, saáchi kúee íyo iniyó ta sándakooyó ña̱ ndóʼoyó ndaʼa̱ra (Sal. 55:22). Jehová kúú ta̱ ndátiin ku̱a̱chi nu̱ú ñuʼú yóʼo ta xítora ndiʼi ña̱ kúu (1 Ped. 3:12). Xa̱ʼa̱ ña̱yóʼo tá yáʼayó nu̱ú iin tu̱ndóʼo ña̱ va̱ása kívi ndasaviíyó, ná ndakaʼányó ña̱ xíniñúʼu chika̱a̱-iniyó ña̱ kúee koo iniyó ta kundatuyó Jehová. w21.08 11 párr. 14; 12 párr. 16

Tá ná chika̱a̱-iniyó ña̱ sakúsi̱íyó-ini Jehová ndiʼi tiempo, saá kúú ña̱ na̱ʼa̱yó ña̱ ndíchi íyo ña̱ ndákanixi̱níyó. Ta kundi̱ʼi̱-iniyó xa̱ʼa̱ ña̱ ndáyáʼvika. Sava yichi̱ kúni̱yó keʼéyó u̱vi̱ ña̱ʼa, ta ña̱ va̱ʼa kúú u̱vi̱ saávaña, soo xíniñúʼu ndaka̱xinyó keʼéyó iin kuitíña. Ta ña̱yóʼo kúú ña̱ ku̱u tá ni̱xa̱ʼa̱n ta̱ Jesús xi̱tora ñá María xíʼin ñá Marta. Xa̱ʼa̱ ña̱ va̱ʼaní-ini ñá Marta ta saátu xa̱ʼa̱ ña̱ kúsi̱íní-iniñá ña̱ ni̱xa̱a̱ ta̱ Jesús veʼeñá, ki̱xáʼañá íxava̱ʼañá ku̱a̱ʼání ña̱ kuxuna. Soo ku̱ʼvi̱ñá ñá María xi̱kooñá yatin xa̱ʼa̱ ta̱ Jesús ña̱ va̱ʼa kuniso̱ʼoñá ña̱ sánáʼa̱ra. Su̱ví ña̱ va̱ása va̱ʼaví kúú ña̱ ke̱ʼé ñá Marta, soo ta̱ Jesús ni̱ka̱ʼa̱nra xa̱ʼa̱ ñá María ña̱ “nda̱kaxinñá ña̱ ndáyáʼvi va̱ʼaka” (Luc. 10:38-42). Sana tá ni̱ya̱ʼa tiempo na̱ndósóva-ini ñá María xa̱ʼa̱ ña̱ xi̱xiñá, soo va̱ása nínandósó-iniñá xa̱ʼa̱ ña̱ sa̱náʼa̱ ta̱ Jesús ki̱vi̱ kán. Xíʼin ña̱yóʼo kúnda̱a̱-iniyó ña̱ xi̱ndayáʼviní nu̱ú ñá María kúú ña̱ kutáʼanñá xíʼin ta̱ Jesús. Saátu miíyó ña̱ xíniñúʼu kundayáʼviní nu̱úyó kúú ña̱ kutáʼanyó xíʼin Jehová. w22.01 27 párr. 5, 6

Ni nda̱ndikó-ini ta̱ Acab, soo ña̱ ke̱ʼéra tá ni̱ya̱ʼa tiempo ni̱na̱ʼa̱ña ña̱ su̱ví xíʼin ndinuʼu-inira níndandikó-inira. Saáchi va̱ása nísandíʼi-xa̱ʼa̱ra ndióxi̱ Baal ti̱xin ñuu Israel, ta ni va̱ása níka̱ʼa̱nra xíʼinna ña̱ ndasakáʼnu tukuna Jehová. Tá ni̱xi̱ʼi̱ ta̱ Acab, Jehová ni̱na̱ʼa̱ra ndáaña ndákanixi̱níra xa̱ʼa̱ra, chi̱ndaʼára ta̱ profeta Jehú ña̱ ka̱ʼa̱nra. Ña̱ va̱ása va̱ʼa íyo ña̱ ke̱ʼé ta̱ Acab (2 Crón. 19:1, 2). Ná ndakanixi̱níyó xa̱ʼa̱ ña̱yóʼo: tá ndixa nda̱ndikó-ini ta̱ Acab va̱ása ka̱ʼa̱nví ta̱ profeta yóʼo xa̱ʼa̱ra ña̱ kúúra iin ta̱a ta̱ va̱ása va̱ʼa, á ta̱ sáa̱-ini xíni Jehová. Xíʼin ña̱yóʼo kúnda̱a̱-iniyó ña̱ ni nda̱ndikóva-ini ta̱ Acab xa̱ʼa̱ ña̱ ke̱ʼéra, soo su̱ví xíʼin ndinuʼu-inira níndandikó-inira. ¿Ndáaña sákuaʼayó xíʼin ña̱ ke̱ʼé ta̱ Acab? Tá ni̱ka̱ʼa̱n ta̱ Elías xa̱ʼa̱ castigo ña̱ kixi sa̱tá na̱ veʼera, nda̱ndikóva-inira. Ta va̱ʼava ke̱ʼéra. Soo ña̱ ke̱ʼéra tá ni̱ya̱ʼa tiempo ni̱na̱ʼa̱ña ña̱ su̱ví xíʼin ndinuʼu-inira níndandikó-inira. Ña̱yóʼo sánáʼa̱ña miíyó ña̱ tá ndixa ndándikó-iniyó va̱ása xíniñúʼu ka̱ʼa̱n kuitíyó ña̱ va̱ása va̱ʼa kúniyó xa̱ʼa̱ ña̱ ke̱ʼéyó. w21.10 3 párr. 4, 5, 7, 8

Ta̱ Isaías profeta xi̱kuura ta sana ña̱yóʼo kúútu chiñu ña̱ xi̱keʼé ñá síʼira, saáchi tu̱ʼun Ndióxi̱ káʼa̱nña xa̱ʼa̱ñá ña̱ xi̱kuuñá profeta (Is. 8:1-4). Ña̱ xi̱ndayáʼvika nu̱ú na̱yóʼo kúú ña̱ ndasakáʼnuna Jehová. ¿Ndáa ki̱ʼva kundiku̱n na̱ xa̱a̱ ti̱ndaʼa̱ yichi̱ ta̱ Isaías xíʼin ñá síʼira? Kundiku̱nna yichi̱na tá ná chika̱a̱na ndee̱ keʼéna ku̱a̱ʼáka chiñu nu̱ú Jehová. Ña̱ va̱ʼa kandíxakana Ndióxi̱, kivi kaʼvina profecía ña̱ va̱xi nu̱ú Biblia ta kotona ndáa ki̱ʼva xínu ña̱yóʼo (Tito 1:2). Ta saátu kivi ndakanixi̱nína ndáaña keʼéna ña̱ va̱ʼa xi̱nu profecía ña̱ va̱xi nu̱ú Biblia, tá kúú profecía ña̱ ni̱ka̱ʼa̱n ta̱ Jesús xa̱ʼa̱ tá ni̱ka̱ʼa̱nra ña̱ iníísaá nu̱ú ñuʼú natúʼunna xa̱ʼa̱ Ndióxi̱ tasaá ndiʼi-xa̱ʼa̱ ñuyǐví. Tá ná kandíxana ña̱ xa̱a̱ xínu profecía ña̱ va̱xi nu̱ú Biblia, saá kúú ña̱ kuni̱na keʼéna ku̱a̱ʼáka chiñu nu̱ú Jehová. w21.11 16 párr. 9, 10

Ta̱ Jesús xi̱kuni̱ra ña̱ ná kundaana siʼíra saáchi ni̱xi̱ʼi̱ yiíñá. Ta xa̱ʼa̱ ña̱ xi̱kuʼvi̱ní-inira xi̱xinira siʼíra ni̱ndi̱ʼi-inira xa̱ʼa̱ñá, ña̱kán ni̱ka̱ʼa̱nra xíʼin ta̱ Juan ña̱ kundaarañá chi xi̱kunda̱a̱-inira ña̱ ta̱yóʼo chindeétáʼan xíʼinñá ña̱ kachíñukañá nu̱ú Jehová. Nda̱a̱ tá ki̱vi̱ saá, nda̱a̱ táki̱ʼva ni̱xi̱yo se̱ʼe ñá María saá ni̱xi̱yo ta̱ Juan, ta saátu miíra viíní xi̱ndaarañá nda̱a̱ táki̱ʼva ni̱xi̱yo siʼíra saá ni̱xi̱yoñá. Ta̱ Jesús xi̱kuʼvi̱ní-inira xi̱xinira siʼíra saáchi viíní xi̱ndaañára nda̱a̱ tá loʼora iin saá nda̱a̱ tá ni̱xi̱ʼi̱ra. Ña̱ sákuaʼayó. Kivi viíníka xa̱a̱yó kutáʼanyó xíʼin na̱ hermanoyó nu̱úka na̱ veʼeyó. Sana sava na̱ veʼeyó kixáʼana kundasína kunina miíyó ta nda̱a̱ kuxíkana nu̱úyó xa̱ʼa̱ ña̱ ndásakáʼnuyó Ndióxi̱. Soo nda̱a̱ táki̱ʼva ni̱ka̱ʼa̱n ta̱ Jesús, tá ná ndakundeéyó kutáʼanyó xíʼin Jehová ta saátu xíʼin na̱ ñuura, ku̱a̱ʼání ña̱ va̱ʼa xa̱a̱yó ndakiʼinyó. Ta ku̱a̱ʼání na̱ hermano xa̱a̱na kooná nda̱a̱ táki̱ʼva íyo se̱ʼeyó, siʼíyó á yiváyó (Mar. 10:29, 30). Kúsi̱íní-iniyó ña̱ kítáʼanyó xíʼin ndiʼi na̱ hermano, saáchi ndiʼiyó kúʼvi̱-iniyó xíniyó Jehová ta kándíxaníyora (Col. 3:14; 1 Ped. 2:17). w21.04 9-11 párr. 7, 8

Tá ndixaní kúʼvi̱-iniyó xíniyó inkana, kéʼéyó nda̱a̱ ndáaka ña̱ʼa ña̱ va̱ʼa chindeétáʼanyó xíʼinna. Nda̱a̱ táki̱ʼva ke̱ʼé na̱ ni̱xi̱yo tá ya̱chi̱ saátu kéʼé ku̱a̱ʼání na̱ ndásakáʼnu Ndióxi̱ tiempo vitin, chi ndixaní kúʼvi̱-inina xínina ndiʼi na̱ hermano nda̱a̱ na̱ va̱ása xíni̱na. Ta tá kúnda̱a̱-inina ña̱ ndeéní ku̱un sa̱vi̱ á tá ni̱ta̱an, kama ndáka̱tu̱ʼunna ndáa ki̱ʼva chindeétáʼanna xíʼin na̱ hermano. Á tá kúnda̱a̱-inina xa̱ʼa̱ iin na̱ hermano na̱ kúma̱ní xu̱ʼún ndaʼa̱, ndúkúna ki̱ʼva ña̱ chindeétáʼanna xíʼinna. Na̱yóʼo ndíku̱nna yichi̱ na̱ hermano na̱ xi̱ndoo tá siglo nu̱ú chí Macedonia, saáchi na̱kán “ta̱xina ndiʼi ña̱ kúúmiína ta nda̱a̱ ku̱a̱ʼákavaña ta̱xina” ndaʼa̱ na̱ hermano (2 Cor. 8:3). Ki̱ʼva saá íyo ña̱ kéʼé na̱ anciano tiempo vitin saáchi káʼa̱nna xíʼin na̱ hermano ña̱ va̱ʼaní íyo ña̱ kéʼéna xa̱ʼa̱ ña̱ chíndeétáʼanna xíʼin inkana, ta kúʼvi̱-inina xíninana. Ta ña̱ káʼa̱n na̱ anciano yóʼo xíʼin na̱ hermano, chika̱a̱ña ndee̱ xíʼinna ña̱ ndakundeéna chindeétáʼanna xíʼin inkana (Is. 32:1, 2). w21.11 10 párr. 14; 12 párr. 21

Ndiʼivayó xíniñúʼu consejo sava yichi̱. Ña̱kán, sava yichi̱ ndúkúyó consejo nu̱ú iin na̱ hermano na̱ íxato̱ʼóníyó. Ta sava yichi̱ kivi taxi na̱ hermano iin consejo ndaʼa̱yó xa̱ʼa̱ ña̱ ndíʼi̱-inina xa̱ʼa̱yó, saáchi xítona ña̱ ki̱xáʼayó kéʼéyó iin ña̱ va̱ása va̱ʼa ña̱ kivi ndandikóní-iniyó xíʼin (Gál. 6:1). Á savatu yichi̱, tá xa̱a̱ ni̱ki̱ʼviyó iin ku̱a̱chi ndeé saá kúú ña̱ táxina consejo ndaʼa̱yó. Soo ni nda̱a̱ ndáaka xa̱ʼa̱ kúú ña̱ ná taxina consejo ndaʼa̱yó, ná kundiku̱nyóña saáchi ña̱ va̱ʼa miíyó kúúña ta kivi sakǎkuña miíyó (Prov. 6:23). Texto ña̱ ki̱vi̱ vitin káʼa̱nña xíʼinyó ña̱ viíní ná kuniso̱ʼoyó “ña̱ káʼa̱n na̱ ndíchi”. Va̱ása xíni̱víyó xa̱ʼa̱ ndiʼi ña̱ʼa saáchi íyo inka na̱ xíni̱níka nu̱úyó (Prov. 12:15). Ña̱kán, tá ná kundiku̱nyó consejo ña̱ táxina ndaʼa̱yó saá na̱ʼa̱yó ña̱ vitá íyo iniyó, ta saátu na̱ʼa̱yó ña̱ kúnda̱a̱-iniyó ña̱ íyo sava ña̱ va̱ása kúchiñuyó keʼéyó ta xíniñúʼu chindeétáʼanna xíʼinyó keʼéyóña. Jehová xi̱niñúʼura ta̱ rey Salomón ña̱ va̱ʼa ka̱ʼyíra tu̱ʼun yóʼo: “Viíva kana chiñu nu̱ú íyo ku̱a̱ʼá na̱ táxi consejo” (Prov. 15:22). w22.02 8 párr. 1, 2

Na̱ ndixa ndándikó-ini va̱ása xíniñúʼu ka̱ʼa̱n kuitína ña̱ va̱ása va̱ʼa kúnina xa̱ʼa̱ ña̱ ke̱ʼéna. Chi saátu xíniñúʼu nasamana ña̱ ndákanixi̱nína xíʼin ña̱ ndóʼona, ta xíniñúʼu na̱ʼa̱na ña̱yóʼo xíʼin ña̱ kéʼéna. Xíniñúʼu sandákoona ña̱ va̱ása va̱ʼa kéʼéna, ta kandíxa tukuna ña̱ káʼa̱n Jehová (Ezeq. 33:14-16). Ña̱ xíniñúʼu kundayáʼvika nu̱úna kúú ña̱ kutáʼan viína xíʼin Jehová. ¿Ndáaña xíniñúʼu keʼéyó tá ku̱ndaa̱-iniyó ña̱ iin na̱ migoyó ni̱ki̱ʼvina iin ku̱a̱chi ndeé? Tá ná kuni̱yó chise̱ʼéyó ña̱ ke̱ʼéna, saxóʼvi̱kayóna saá. Ta va̱ása kuchiñuvíyó chise̱ʼéyóña chi xítova Jehová ndiʼi ña̱ kúu (Prov. 5:21, 22). Kivi chindeétáʼanyó xíʼin na̱ migoyó tá ná ka̱ʼa̱nyó xíʼinna ña̱ kúni̱ na̱ anciano chindeétáʼanna xíʼinna. Tá va̱ása xíínna natúʼunna xíʼin na̱ anciano, miíyó kivi natúʼun xa̱ʼa̱na. Tasaá na̱ʼa̱yó ña̱ ndixa kúni̱yó chindeétáʼanyó xíʼinna. w21.10 7 párr. 19-21

Ndiʼivayó kivi sakúaʼa chindeétáʼan xíʼin inkana nda̱a̱ táki̱ʼva chi̱ndeétáʼan ta̱ Jesús xíʼin inkana. Tu̱ʼun Ndióxi̱ káʼa̱nña xa̱ʼa̱ra ña̱ “ndu̱ura iin esclavo” (Filip. 2:7). Na̱ kúú esclavo á na̱ káchíñu nu̱ú inkana ndúkúna ki̱ʼva ña̱ sakúsi̱ína-ini na̱ káchíñuna nu̱ú. Xa̱ʼa̱ ña̱ káchíñuyó nu̱ú Jehová ta saátu nu̱ú na̱ hermanoyó, kúni̱yó chika̱a̱yó ndee̱ ña̱ viíníka kachíñuyó nu̱úra ta viíníka chindeétáʼanyó xíʼin na̱ hermano. Ndakanixi̱ní xa̱ʼa̱ ña̱yóʼo: “¿Á kútói̱ kuniñúʼi̱ tiempoi̱ xíʼin ndeéi̱ ña̱ va̱ʼa chindeétáʼi̱n xíʼin inkana? ¿Á chíndeétáʼi̱n xíʼin na̱ hermano ña̱ va̱ʼa ndatiʼvíi̱ á ndaya̱kúi̱n nu̱ú xíyo asamblea? ¿Á chíndeétáʼi̱n xíʼinna tá ndásaviína veʼe nu̱ú ndátakayó?”. Tá ki̱ʼún kuenta ña̱ íxayo̱ʼvi̱níña xíʼún chindeétáʼún xíʼin inkana soo va̱ása kúni̱ún nasamaún ña̱ kéʼún, ka̱ʼa̱n xíʼin Jehová xíʼin ndiʼi níma̱ún xa̱ʼa̱ña. Natúʼun xíʼinra xa̱ʼa̱ ña̱ ndóʼún, ta ka̱ʼa̱n xíʼinra ña̱ ná taxira ndee̱ ndaʼún ña̱ va̱ʼa kutóún chindeétáʼún xíʼin inkana, ta saátu ña̱ ná taxira ndee̱ ndaʼún ña̱ va̱ʼa keʼúnña (Filip. 2:13). w22.02 22, 23 párr. 9-11

Ta̱ Jesús viíní ni̱xi̱yo inira xíʼin inkana (Mat. 11:29, 30). Va̱ʼaní xi̱keʼéra xíʼin inkana ta xi̱chindeétáʼanra xíʼin na̱ va̱ása níxiniñúʼu chindeétáʼanra xíʼin. Tá kúú, tá xa̱kundáʼvi iin ñaʼá ñá ñuu Fenicia nu̱úra ña̱ ná sandáʼara ñá loʼo se̱ʼeñá, viíva nda̱kuiinra yuʼúñá. Tá xa̱ʼa̱ va̱ása níkeʼéra ña̱ ni̱ka̱ʼa̱nñá xíʼinra, soo tá xi̱nira ña̱ kándíxaníñá Ndióxi̱ sa̱ndáʼavara se̱ʼeñá (Mat. 15:22-28). Soo ni va̱ʼava ni̱xi̱yo ini ta̱ Jesús va̱ása nítaxira kasi ña̱yóʼo nu̱úra ña̱ taxira consejo ndaʼa̱ inkana. Sava yichi̱ xi̱niñúʼu káxiní ka̱ʼa̱nra xíʼin na̱ xi̱kuʼvi̱-inira xi̱xinira. Tá kúú, tá ni̱ka̱ʼa̱n ta̱ Pedro xíʼinra ña̱ va̱ása xíniñúʼu kuvivíra, ta̱ Jesús nu̱ú ndiʼi na̱ discípulora ni̱nda̱ʼyi̱ra nu̱úra (Mar. 8:32, 33). Va̱ása níxikuni̱ra sakúkaʼanra nu̱ú ta̱ Pedro saáchi ña̱ xi̱kuni̱ra kúú ña̱ sanáʼa̱rara ña̱ va̱ása xíniñúʼu ni̱nu kunira, ta saátu xi̱kuni̱ra ná kunda̱a̱-ini na̱ inka discípulora ña̱ va̱ása xíniñúʼu kasina nu̱úra ña̱ saxínura ña̱ kúni̱ yivára. Sana ku̱kaʼanníva nu̱ú ta̱ Pedro tá ni̱nda̱ʼyi̱ ta̱ Jesús nu̱úra soo ña̱ va̱ʼa miívara xi̱kuuña. Tá kúni̱yó vií koo iniyó xíʼin na̱ kúʼvi̱ní-iniyó xíniyó, sava yichi̱ xíniñúʼu káxiní ka̱ʼa̱nyó xíʼinna. Tá ná keʼéyó ña̱yóʼo ná kundiku̱nyó yichi̱ ta̱ Jesús ta nu̱ú tu̱ʼun Ndióxi̱ ná taváyó consejo ña̱ taxiyó ndaʼa̱na. w22.03 11 párr. 12, 13

Ndásakáʼnuyó Jehová tá nátúʼunyó xíʼin inkana xa̱ʼa̱ra (Sal. 34:1). Ta, ¿ndáa ki̱ʼva ndásakáʼnuyó Jehová? Tá káʼa̱nyó xíʼin inkana xíʼin ña̱ si̱í-ini xa̱ʼa̱ ndiʼi ña̱ va̱ʼa ña̱ kúúmiíra xíʼin ña̱ i̱xava̱ʼara. Tá táxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ kéʼéra xa̱ʼa̱yó, ku̱a̱ʼáníva ña̱ va̱ʼa ka̱ʼa̱nyó xa̱ʼa̱ra. Tá táváyó tiempo ña̱ ndakanixi̱níyó xa̱ʼa̱ ña̱ va̱ʼaní-inira xíʼinyó, kuni̱yó ndasakáʼnuyóra ndiʼi tiempo. Tá nátúʼunyó xíʼin na̱ yiví xa̱ʼa̱ Jehová, nda̱a̱ táki̱ʼva íyo ña̱ sóko̱yó iin ña̱ʼa nu̱úra saá íyoña chi xíniñúʼuyó yuʼúyó ña̱ ka̱ʼa̱nyó xa̱ʼa̱ra. Nda̱a̱ táki̱ʼva viíní ndákanixi̱níyó tá kúma̱níka ka̱ʼa̱nyó xíʼin Jehová saa xíniñúʼu ndakanixi̱níyó tá kúma̱níka ku̱ʼu̱nyó natúʼunyó xíʼin na̱ yiví xa̱ʼa̱ra. Kúni̱yó ña̱ va̱ʼaní ná koo ña̱ ndasakáʼnuyó Jehová, ña̱kán tá ku̱a̱ʼa̱nyó nátúʼunyó xíʼin na̱ yiví xa̱ʼa̱ra xíʼin ndinuʼu-iniyó kéʼéyóña. w22.03 21 párr. 8