Enero

¿Nda̱chun va̱ʼaní xi̱niñúʼu Jehová ta̱ Timoteo? Saáchi va̱ʼaní xi̱keʼéra xíʼin inkana (Filip. 2:​19-22). Xíʼin ña̱ ni̱ka̱ʼa̱n ta̱ Pablo xa̱ʼa̱ra kúnda̱a̱-iniyó ña̱ vitání ni̱xi̱yo inira, nda̱kúní ni̱xi̱yo inira xíʼin Ndióxi̱, va̱ʼaní xi̱kachíñura, ta saátu va̱ʼaní xi̱ndaa-ininara. Xi̱ndi̱ʼi̱ní-inira xa̱ʼa̱ na̱ hermano. Ña̱kán xi̱kuʼvi̱ní-ini ta̱ Pablo xi̱xinira ta̱ Timoteo ta ku̱a̱ʼání chiñu yo̱ʼvi̱ ta̱xira ndaʼa̱ra. Tá ná chika̱a̱yó ndee̱ ña̱ kooyó nda̱a̱ táki̱ʼva kúni̱ mií Jehová, kuʼvi̱níka-inira kunira miíyó ta kuniñúʼukara miíyó ña̱ keʼéyó ku̱a̱ʼáka chiñu ti̱xin congregación (Sal. 25:9; 138:6). Ñakán ná ka̱ʼa̱nyó xíʼin Jehová ña̱ ná chindeétáʼanra xíʼinyó kunda̱a̱-iniyó ndáaña kúú ña̱ xíniñúʼu viíka keʼéyó. ¿Á xíniñúʼu sakúaʼakayó na̱ʼa̱yó ña̱ kúnda̱a̱-iniyó xíʼin ña̱ ndóʼo inkana? ¿Á xíniñúʼu sakúaʼayó ña̱ va̱ása ku̱a̱chiní koo iniyó? ¿Á xíniñúʼu sakúaʼayó ixakáʼnu-iniyó xa̱ʼa̱ inkana? Tá va̱ása xíni̱yó ndáaña kúú ña̱ xíniñúʼu viíka keʼéyó, ná nda̱ka̱tu̱ʼunyó iin na̱ va̱ʼaní kítáʼan xíʼinyó ña̱ ná ka̱ʼa̱nna xíʼinyó ndáaña kivi keʼéyó (Prov. 27:6). w22.04 23 párr. 4, 5

Jehová kúni̱ra ña̱ si̱íní ná kooyó, ta kúnda̱a̱-iniyó ña̱yóʼo saáchi iin ña̱ va̱ʼa ña̱ táxi espíritu santora kúú ña̱ si̱í kooyó (Gál. 5:22). Va̱ʼaní kúniyó tá nátúʼunyó xíʼin na̱ yiví xa̱ʼa̱ Ndióxi̱, ta saátu tá chíndeétáʼanyó xíʼin na̱ hermanoyó, saáchi tá táxiyó ña̱ kúúmiíyó ndaʼa̱ inkana saá kúú ña̱ kúsi̱íní-iniyó (Hech. 20:35). ¿Ndáaña chindeétáʼan xíʼinyó ña̱ ndakundeéyó kusi̱í-iniyó? Ta̱ apóstol Pablo ni̱ka̱ʼa̱nra xa̱ʼa̱ u̱vi̱ ña̱ kivi chindeétáʼan xíʼinyó. Ña̱ nu̱ú, kiviva kusi̱í-iniyó xíʼin ña̱ kéʼéyó nu̱ú Jehová tá xíʼin ndiʼi níma̱yó ná kachíñuyó nu̱úra. Ta ndiʼiyó xíniñúʼu keʼé ña̱yóʼo (Mat. 22:​36-38). Ña̱ u̱vi̱, ná va̱ása chitáʼanyó ña̱ kéʼéyó xíʼin ña̱ kéʼé inkana. Tá kǒo kue̱ʼe̱ kúúmiíyó á va̱ʼaní sa̱náʼa̱na miíyó keʼéyó iin chiñu á xíni̱níyó keʼéyóña, ná taxiyó tíxa̱ʼvi ndaʼa̱ Jehová chi ndiʼi ña̱ kúúmiíyó ta̱yóʼo kúú ta̱ ta̱xiña ndaʼa̱yó. Soo tá iin na̱ hermano kúú na̱ va̱ʼaní xíni̱ keʼé chiñu nu̱ú Jehová, ná kusi̱í-iniyó xíʼinna chi xíniñúʼuna ña̱ xíni̱na ña̱ va̱ʼa ndasakáʼnunara. w22.04 10 párr. 1, 2

Na̱ chíñu iin sana sandíʼi-xa̱ʼa̱na na̱ veʼe-ñu̱ʼu vatá, ta ndakanda̱ní-ini na̱ yiví xa̱ʼa̱ ña̱yóʼo (Apoc. 18:​8-10). Ndiʼi na̱ yiví kunda̱a̱-ini tá ná ndiʼi-xa̱ʼa̱ Babilonia ña̱ káʼnu, ta nda̱a̱ sana koo tu̱ndóʼo nu̱úyó. Soo miíyó na̱ ndásakáʼnu Jehová íyo u̱vi̱ ña̱ kivi chindeétáʼan xíʼinyó ña̱ kusi̱í-iniyó. Ña̱ nu̱ú, Babilonia ña̱ káʼnu ña̱ xa̱a̱ ku̱a̱ʼání tiempo sáa̱-ini xíni Jehová, ndiʼi-xa̱ʼa̱ña. Ta ña̱ u̱vi̱, si̱lóʼoní kúma̱ní ña̱ ka̱kuyó. Ta̱ Daniel ni̱ka̱ʼa̱nra ña̱ ku̱a̱ʼánína kunda̱a̱-ini xa̱ʼa̱ ña̱ nda̱a̱, tasaá kúuva xítoyó tiempo vitin. Saáchi vitin kúnda̱a̱ va̱ʼa iniyó xa̱ʼa̱ profecía ña̱ xínu tiempo vitin (Dan. 12:​4, 9, 10). Xa̱ʼa̱ ña̱ va̱ʼaní xínu profecía yóʼo, chíndeétáʼanña xíʼinyó ña̱ ixato̱ʼóníyó Jehová ta saátu tu̱ʼunra (Is. 46:10; 55:11). Xa̱ʼa̱ ña̱kán ná chika̱a̱yó ndee̱ ña̱ kandíxaníkayó Ndióxi̱. ¿Ndáa ki̱ʼva keʼéyó ña̱yóʼo? Ná chika̱a̱níyó ndee̱ ña̱ kaʼviyó Biblia ta ná chindeétáʼanyó xíʼin inkana ña̱ xa̱a̱na koona migo Jehová. Ta miíra kundaara ndiʼi na̱ kándíxa miíra ta chindeétáʼanra xíʼinna ña̱ va̱ása kundi̱ʼi̱-inina (Is. 26:3). w22.07 6, 7 párr. 16, 17

Libro ña̱ Apocalipsis káʼa̱nña ña̱ xa̱a̱ ki̱xáʼa xáʼndachíñu Reino Ndióxi̱ chí ndiví, ta ni̱ta̱xi̱ ta̱ Ndi̱va̱ʼa va̱xira nu̱ú ñuʼú yóʼo (Apoc. 12:​1-9). Iin ña̱ va̱ʼaní kúú ña̱yóʼo nu̱ú na̱ ndóo chí ndiví, soo miíyó na̱ ndóo nu̱ú ñuʼú yóʼo tu̱ndóʼova ki̱xáʼa íyo nu̱úyó. ¿Nda̱chun? Saáchi ta̱ Ndi̱va̱ʼa sáa̱níra ta íxandi̱va̱ʼara xíʼin na̱ ndásakáʼnu Ndióxi̱ (Apoc. 12:​12, 15, 17). ¿Ndáaña xíniñúʼu keʼéyó ña̱ va̱ʼa nda̱kú koo iniyó xíʼin Ndióxi̱ tá sáxo̱ʼvi̱ ta̱ Ndi̱va̱ʼa miíyó? (Apoc. 13:10). Iin ña̱ chindeétáʼan xíʼinyó kúú ña̱ kunda̱a̱-iniyó xa̱ʼa̱ ña̱ kuu chí nu̱únínu. Tá kúú, nu̱ú libro ña̱ Apocalipsis ta̱ apóstol Juan ni̱ka̱ʼa̱nra xa̱ʼa̱ ña̱ va̱ʼa ña̱ xa̱a̱ ku̱nu̱mí ndakiʼinyó. Ta saátu ni̱ka̱ʼa̱nra ña̱ ndiʼi-xa̱ʼa̱ na̱ sáa̱-ini xíni Ndióxi̱. Nu̱ú kíxáʼa libro ña̱ Apocalipsis náʼa̱ña nu̱úyó ña̱ íyo ña̱ kúni̱ kachi ña̱ ni̱ka̱ʼyi̱ nu̱úña (Apoc. 1:1). w22.05 8 párr. 1-3

Tá ná kuni na̱ íyo contra xíʼin Jehová ña̱ nda̱kúní íyo ini na̱ ndásakáʼnu-ñaʼá, sa̱a̱nína xíʼinna. Ta xa̱ʼa̱ ña̱yóʼo ndakutáʼan ku̱a̱ʼání na̱ yiví ña̱ ixandi̱va̱ʼana xíʼin na̱ ñuu Ndióxi̱ na̱ ndóo nu̱ú iníísaá ñuʼú. Tu̱ʼun Ndióxi̱ káʼa̱nña xa̱ʼa̱ na̱yóʼo ña̱ kunanína Gog ña̱ Magog (Ezeq. 38:​14, 15). ¿Ndáaña keʼé Jehová tá ná kixáʼana ixandi̱va̱ʼana xíʼin na̱ ñuura? Ta̱yóʼo káchira: “Ndeéní sa̱i̱” (Ezeq. 38:​18, 21-23). Apocalipsis capítulo 19 káʼa̱nña xa̱ʼa̱ Jehová ña̱ chindaʼára se̱ʼera ña̱ va̱ʼa ndakiʼinra tu̱ʼun na̱ ñuura, ta sandíʼi-xa̱ʼa̱ra na̱ sáa̱-ini xíniñaʼá. Soo va̱ása kixi mitúʼun ta̱ Jesús saáchi kixi na̱ ángel xíʼin na̱ 144,000 xíʼinra (Apoc. 17:14; 19:​11-15). ¿Ndáaña kuu tá ná kanitáʼanna? Kuchiñuna sandíʼi-xa̱ʼa̱na ndiʼi na̱ yiví na̱ ku̱a̱ʼa̱n contra Jehová (Apoc. 19:​19-21). w22.05 17 párr. 9, 10

Tá sa̱kán ni̱ki̱ʼvi ta̱ Adán xíʼin ñá Eva ku̱a̱chi nu̱ú Jehová, nu̱ú iin profecía ni̱ka̱ʼa̱n Jehová xa̱ʼa̱ ña̱ va̱ʼa ña̱ ndakiʼin na̱ se̱ʼe na̱yóʼo. Ta nu̱ú Génesis 3:15 va̱xi ña̱ ni̱ka̱ʼa̱nra xa̱ʼa̱. “Taxii̱ ña̱ ná koún contra xíʼin ñá ñaʼá, ta na̱ se̱ʼún xíʼin na̱ se̱ʼe ñákán sa̱a̱-inina kunitáʼanna. Ta̱kán ku̱a̱ñi̱ndosóra á ku̱niʼnira xi̱níún ta yóʼó satukue̱ʼún si̱ʼndi̱-xa̱ʼa̱ra”. Profecía yóʼo va̱xiña nu̱ú libro ña̱ Génesis. Ta ndáyáʼviní ña̱yóʼo, ¿nda̱chun? Saáchi tu̱ʼun ña̱ va̱xi nu̱ú Génesis 3:​15, kúú ña̱ káʼa̱nníka tu̱ʼun Ndióxi̱ xa̱ʼa̱. Ta ndiʼika libro ña̱ va̱xi nu̱ú tu̱ʼun Ndióxi̱ kítáʼanníña xíʼin ña̱ káʼa̱n ña̱yóʼo. Nu̱ú profecía yóʼo káʼa̱nña xa̱ʼa̱ iin ta̱ sakǎku ndiʼi na̱ yiví, ta saátu káʼa̱nña ña̱ sandíʼi-xa̱ʼa̱ra ta̱ Ndi̱va̱ʼa xíʼin ndiʼika na̱ kítáʼan xíʼinra. Tá ná xi̱nu profecía yóʼo, ndiʼi na̱ ndásakáʼnu Jehová kusi̱íní-inina. Ta iin ña̱ chindeétáʼan xíʼinyó ña̱ kunda̱a̱-iniyó á ndixa xi̱nu profecía yóʼo kúú ña̱ kaʼviyó xa̱ʼa̱ña, ta kotoyó ndáaña va̱ʼa ndakiʼinyó xíʼin ña̱yóʼo. w22.07 14 párr. 1-3

Xíniñúʼu kuumiíndó ña̱ ndíchi ña̱ va̱ʼa chindeétáʼanndó xíʼin se̱ʼendó ña̱ kuʼvi̱-inina kunina Jehová, ña̱kán ndukúndó ña̱ ndíchi nu̱úra (Sant. 1:5). Iinlá Jehová kúú ta̱ va̱ʼaní consejo táxi. ¿Nda̱chun? Saáchi iinlá ta̱yóʼo kúú ta̱ xíni̱níka nu̱ú ndiʼi na̱ íyo se̱ʼe (Sal. 36:9). Ta saátu, consejo ña̱ táxira ndaʼa̱yó va̱ʼaní chíndeétáʼanña xíʼinyó (Is. 48:17). Jehová táxira tu̱ʼunra ta saátu xíniñúʼura na̱ ñuura ña̱ va̱ʼa tavána ku̱a̱ʼá tutu ña̱ kivi chindeétáʼan xíʼinndó sanáʼa̱ndó se̱ʼendó ña̱ kuʼvi̱-inina kuninara (Mat. 24:45). Tá kúú, kivi ndani̱ʼíndó consejo ña̱ kivi chindeétáʼan xíʼinndó nu̱ú táʼví ña̱ naní “Ayuda para las familias”, ña̱ xi̱kana nu̱ú ¡Despertad! ta vitin va̱xiña nu̱ú jw.org. Nu̱ú sitio yóʼo kivi ndani̱ʼíndó ku̱a̱ʼá video nu̱ú kána sava na̱ hermano na̱ nátúʼun xa̱ʼa̱ ña̱ ndóʼona, ta ña̱yóʼo kivi chindeétáʼanña xíʼinndó kundiku̱nndó consejo ña̱ táxi Jehová ndaʼa̱ndó xa̱ʼa̱ ki̱ʼva ña̱ sakúaʼnundó se̱ʼendó (Prov. 2:​4, 5). w22.05 27 párr. 4, 5

Kǒo nda̱a̱ ni iin na̱ íxakáʼnu-ini nda̱a̱ táki̱ʼva íxakáʼnu-ini Jehová. Ña̱ nu̱ú, saáchi ndiʼi tiempo íyo tu̱ʼva Jehová ña̱ ixakáʼnu-inira xa̱ʼa̱yó. Ña̱ u̱vi̱, saáchi iinlá ta̱yóʼo kúú ta̱ va̱ʼaní xíni̱ ndáa ki̱ʼva íyoyó, ta iinlá ta̱yóʼo kúnda̱a̱-ini á ndixa ndándikó-iniyó xa̱ʼa̱ ku̱a̱chi ña̱ ni̱ki̱ʼviyó. Ta ña̱ u̱ni̱, tá íxakáʼnu-ini Jehová xa̱ʼa̱yó va̱ása ndákaʼánkara xa̱ʼa̱ ku̱a̱chi ña̱ ni̱ki̱ʼviyó. Ta ña̱yóʼo chíndeétáʼanña xíʼinyó ña̱ vií koo ña̱ xínitúni̱yó chi kúnda̱a̱-iniyó ña̱ kúsi̱í-ini Jehová xíʼinyó. Xa̱ʼa̱ ña̱ kúúyó na̱ yiví ku̱a̱chi sana keʼékavayó ña̱ va̱ása va̱ʼa, soo va̱ʼaní sándi̱kó ña̱ káʼa̱n libro. Perspicacia para comprender las Escrituras, volumen 1, página 209 iniyó, ña̱ káchi: “Jehová kúndáʼvi-inira xínira na̱ ndásakáʼnu miíra, saáchi kúnda̱a̱-inira ndáaña íxayo̱ʼvi̱ xíʼinna. Xa̱ʼa̱ ña̱yóʼo su̱ví ndiʼi tiempo xíniñúʼu ndakava-inina xa̱ʼa̱ ña̱ va̱ása va̱ʼa ke̱ʼéna, chi na̱ yiví ku̱a̱chi kúúna (Sal. 103:​8-14; 130:3). Ta kiviva kusi̱í-inina tá ndíku̱nna ña̱ káʼa̱n Ndióxi̱ (Filip. 4:​4-6; 1 Juan 3:​19-22)”. w22.06 7 párr. 18, 19

Su̱ví nda̱saa ña̱ kéʼé na̱ chíñu kúú ña̱ xíniñúʼu ta̱ Ndi̱va̱ʼa ña̱ sayíʼvira miíyó. Chi xíniñúʼutura na̱ veʼeyó na̱ va̱ása kúú testigo ña̱ sayíʼvira miíyó. Tá kúú, kivi yi̱ʼvíyó ndáaña ka̱ʼa̱nna xíʼinyó tá ná xa̱a̱yó kooyó testigo Jehová. Ta savayó yíʼviníkayó nu̱ú ña̱yóʼo nu̱úka ña̱ ixandi̱va̱ʼana xíʼinyó. Ta xa̱ʼa̱ ña̱ kúʼvi̱ní-iniyó xíniyó na̱ veʼeyó, kúni̱yó ña̱ ná xa̱a̱na sakúaʼana xa̱ʼa̱ Jehová ta kuʼvi̱-inina kuninara. Ña̱kán tá káʼa̱n na̱ veʼeyó ña̱ va̱ása va̱ʼa xa̱ʼa̱ Jehová ta saátu xa̱ʼa̱ na̱ ñuura, ndákavaní-iniyó. Soo sava na̱ veʼeyó na̱ xi̱sasi nu̱úyó ña̱ ndasakáʼnuyó Jehová, tá yáʼa tiempo xáa̱na sákuaʼana xa̱ʼa̱ra. Ña̱kán tá iin na̱ veʼeyó va̱ása kúni̱kana kunina miíyó, ¿ndáaña kivi keʼéyó? Liviní tu̱ʼun va̱xi nu̱ú Salmo 27:10 ta sándi̱koní ña̱yóʼo iniyó. Tá kándíxayó ña̱ kúʼvi̱ní-ini Jehová xínira miíyó, ña̱yóʼo chindeétáʼanña xíʼinyó ña̱ va̱ása yi̱ʼvíyó ni sáa̱-ini inkana xínina miíyó. Ta kándíxayó ña̱ ku̱a̱ʼání ña̱ va̱ʼa taxira ndaʼa̱yó tá ndakú íyo iniyó xíʼinra. Jehová taxira ña̱ xíniñúʼuyó, sandíkora-iniyó ta saátu taxira ña̱ sákuaʼayó xa̱ʼa̱ra, iinlá miíra kúú ta̱ kivi taxi ndiʼi ña̱yóʼo ndaʼa̱yó. w22.06 16, 17 párr. 11-13

Tá ni̱xi̱yo ta̱ Jesús nu̱ú ñuʼú yóʼo xi̱ka̱ʼa̱nna xa̱ʼa̱ra ña̱ xi̱xixiníra ta xi̱xiʼiníra vino, ña̱ xi̱chindeétáʼanra xíʼin ta̱ Ndi̱va̱ʼa, ña̱ va̱ása ní ixato̱ʼóra ki̱vi̱ sábado ta ni va̱ása ní ixato̱ʼóra Ndióxi̱ (Mat. 11:19; 26:65; Luc. 11:15; Juan 9:16). Soo va̱ása níka̱ʼa̱n-ndi̱va̱ʼa ta̱ Jesús xíʼinna. Tá káʼa̱n-ndi̱va̱ʼana xíʼinyó, ná kundiku̱nyó yichi̱ ta̱ Jesús ta ná va̱ása ka̱ʼa̱n-ndi̱va̱ʼayó xíʼinna táki̱ʼva káʼa̱nna xíʼinyó (1 Ped. 2:​22, 23). Soo sava yichi̱ íxayo̱ʼvi̱vaña xíʼinyó vií ndakuiinyó yuʼúna (Sant. 3:2). Tá saá, ¿ndáaña chindeétáʼan xíʼinyó ña̱ vií ndakuiinyó yuʼúna? Tá nátúʼún xíʼin na̱ yiví xa̱ʼa̱ Ndióxi̱ ta va̱ása vií ndákuiinna yuʼún, va̱ása sa̱ún xíʼinna. Iin ta̱ hermano ta̱ naní Sam káchira: “Chíka̱i̱ ndee̱ ña̱ ndakanixi̱ní ña̱ ndáyáʼviní sakúaʼa na̱ yiví kán xa̱ʼa̱ ña̱ nda̱a̱, ta kiviva nasa̱mana”. Sava yichi̱ sáa̱na, saáchi tá xa̱a̱yó nuúna sana íyo iin ña̱ ndóʼona. Tá ná ndani̱ʼíyó iin na̱ yiví na̱ sáa̱ xíʼinyó, kivi káʼa̱nyó xíʼin Jehová ña̱ ná chindeétáʼanra xíʼinyó ña̱ va̱ása sa̱a̱yó ta to̱ʼó ndakuiinyó yuʼúna. w22.04 6 párr. 8, 9

Iin ña̱ kivi keʼé na̱ íyo se̱ʼe ña̱ va̱ʼa kuyatin na̱ va̱lí se̱ʼena nu̱ú Jehová kúú ña̱ inkáchi kaʼvina Biblia xíʼinna (2 Tim. 3:​14-17). Biblia káʼa̱nña xíʼinyó ndáa inka ña̱ʼa kúú ña̱ kivi chindeétáʼan xíʼin na̱ va̱lí ña̱ va̱ʼa sakúaʼana xa̱ʼa̱ Jehová. Nu̱ú libro ña̱ Proverbios káʼa̱nña xa̱ʼa̱ iin ta̱a ña̱ káʼa̱nra xíʼin se̱ʼera ña̱ ná kotora ña̱ va̱ʼa ña̱ kúúmií Jehová ta xíʼin ña̱ i̱xava̱ʼa Jehová kivi kotora ña̱yóʼo (Prov. 3:​19-21). Ndóʼó na̱ íyo se̱ʼe, ¿á su̱ví ña̱ nda̱a̱ kúú ña̱ kúsi̱íní-inindó tá xáʼa̱n si̱índó xíʼin se̱ʼendó chí yuku̱? Chindeétáʼanndó xíʼin na̱ va̱lí se̱ʼendó ná kotona ña̱ i̱xava̱ʼa Jehová, chi saá kúú ña̱ kivi kunda̱a̱-inina ndáa ki̱ʼva íyo Jehová (Rom. 1:20). Kotondó ndáa ki̱ʼva xi̱niñúʼu ta̱ Jesús ña̱ i̱xava̱ʼa Jehová ña̱ va̱ʼa sa̱náʼa̱ra na̱ yiví. Iin yichi̱ ni̱ka̱ʼa̱nra xíʼin na̱ discípulora ña̱ ná kotona yita xíʼin tí saa (Luc. 12:​24, 27-30). Sa̱náʼa̱rana xa̱ʼa̱ ña̱ʼa ña̱ ndáyáʼviní. Ña̱ va̱ʼaní-ini yivára: ta mií Jehová taxi ña̱ kuxu na̱ ndásakáʼnu miíra xíʼin ña̱ kundixina nda̱a̱ táki̱ʼva kéʼéra xíʼin tí saa ta saátu xíʼin yita. w23.03 20, 21 párr. 1-4

Xa̱ʼa̱ ña̱ ki̱xi ta̱ Jesús ni̱xi̱ʼi̱ra xa̱ʼa̱yó, kivi ka̱ʼa̱nyó xíʼin Jehová ta taxiyó tíxa̱ʼvi ndaʼa̱ra xa̱ʼa̱ ña̱yóʼo. Jehová xíniñúʼura ta̱ Jesús ña̱ va̱ʼa taxira ña̱ ndúkúyó nu̱úra. Ña̱kán tá xíniñúʼuyó ki̱vi̱ se̱ʼera ña̱ ka̱ʼa̱nyó xíʼinra, xíniso̱ʼovara ña̱ káʼa̱nyó ta ndákuiinra ña̱ káʼa̱nyó xíʼinra. Va̱ʼa íxakáʼnu-ini Jehová xa̱ʼa̱ ku̱a̱chiyó xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (Rom. 5:1). Biblia káʼa̱nña xa̱ʼa̱ ta̱ Jesús ña̱ kúúra “ta̱ su̱tu̱ káʼnu” ta níndúʼura “chí ndaʼa̱ kúaʼa Ndióxi̱ ta̱ káʼnu ta̱ íyo chí ndiví” (Heb. 8:1). Saátu káʼa̱nkaña xa̱ʼa̱ ta̱ Jesús ña̱ íyora chí ndiví ta chíndeétáʼanra xíʼin yivára (1 Juan 2:1). Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira iin su̱tu̱ káʼnu ta̱ kúndáʼvi-ini xíni miíyó, kúnda̱a̱-inira xíʼin ña̱ ndóʼoyó ta xákundáʼvira xa̱ʼa̱yó nu̱ú Ndióxi̱ (Rom. 8:34; Heb. 4:15). Tá va̱ása níxi̱ʼi̱ ta̱ Jesús xa̱ʼa̱ miíyó na̱ yiví ku̱a̱chi, va̱ása kiviví ka̱ʼa̱nyó xíʼin Jehová. Táxiníyó tíxa̱ʼvi ndaʼa̱ Jehová xa̱ʼa̱ ña̱ ta̱xira se̱ʼera ta̱ kúʼvi̱ní-inira xínira ña̱ ni̱xi̱ʼi̱ra xa̱ʼa̱yó. w22.07 23 párr. 10-12

Tá sáxi̱nuyó ña̱ ki̱ndooyó keʼéyó ta káʼa̱nyó nina ña̱ nda̱a̱, saá kúú ña̱ kivi kandíxa inkana miíyó ta kundaa-inina miíyó (Sal. 15:4). Ña̱ kúni̱yó kúú ña̱ ndiʼi na̱ hermanoyó ná kundaa-inina miíyó. Soo, ¿ndáaña chindeétáʼan xíʼinyó ña̱ kundaa-inina miíyó? Va̱ása kivi ixandúxayó xíʼin na̱ hermanoyó ña̱ kandíxana miíyó, chi siʼnaka miíyó xíniñúʼu chika̱a̱ ndee̱ ña̱ va̱ʼa kandíxana miíyó. Ña̱ kandíxa na̱ hermano miíyó nda̱a̱ táki̱ʼva íyo xu̱ʼún saá íyoña, saáchi yo̱ʼvi̱va ni̱ʼíyó xu̱ʼún soo va̱ása yo̱ʼvi̱ kuniñúʼuyóña. Tá kúú, va̱ʼaní ni̱xa̱a̱yó kándíxayó Jehová saáchi xíʼin ña̱ kéʼéra náʼa̱ra ña̱ kiviva kandíxayóra (Sal. 33:4). Ta kúni̱ra ná kundiku̱nyó yichi̱ra (Efes. 5:1). Kúsi̱íní-iniyó xa̱ʼa̱ ña̱ ka̱na Jehová miíyó ña̱ kutáʼanyó xíʼin na̱ ñuura, na̱ kúʼvi̱ní-ini xínitáʼan ta kándíxatáʼanna. Ndiʼiyó xíniñúʼu chika̱a̱yó ndee̱ ña̱ va̱ʼa kandíxa na̱ hermano miíyó. Tá iin tá iinyó ná chika̱a̱yó ndee̱ ña̱ kuʼvi̱-iniyó kunitáʼanyó, ña̱ vitá koo iniyó, ña̱ vií ndakanixi̱níyó, ña̱ vií keʼéyó ndiʼi ña̱ʼa xíʼin ña̱ ka̱ʼnu̱-iniyó, saá kúú ña̱ va̱ʼaníka kandíxatáʼanyó ti̱xin ña̱ congregación. Ná kundiku̱nyó yichi̱ Jehová Ndióxi̱yó, ta ná ndakundeéyó na̱ʼa̱yó ña̱ kivi kandíxa inkana miíyó. w22.09 8 párr. 1, 2; 13 párr. 17

Ni ku̱a̱ʼáníva kúú miíyó na̱ ndásakáʼnu Jehová, soo sava yichi̱ kivi kuni mitúʼunyó. Savayó kúsuchí-iniyó, á savatuyó ndákanixi̱níyó ña̱ va̱ása ndáyáʼviyó ta kǒo na̱ chindeétáʼan xíʼinyó. Soo kǒo kúni̱ Jehová ná ndakanixi̱níyó ña̱ íyo mitúʼunyó. Ku̱a̱ʼá ña̱ ke̱ʼé Jehová ña̱ va̱ʼa chindeétáʼanra xíʼin ta̱ Elías. Tá kúú, ni̱ka̱ʼa̱nra xíʼin ta̱ Elías ña̱ ná ka̱ʼa̱nra xíʼinra xa̱ʼa̱ ña̱ xi̱ndoʼora. Ta u̱vi̱ yichi̱ ni̱nda̱ka̱tu̱ʼunrara ña̱yóʼo: “¿Ndáaña kéʼún ndíka̱ún yóʼo Elías?” (1 Rey. 19:​9, 13). U̱vi̱ saá yichi̱ va̱ʼaní xi̱niso̱ʼo Jehová ña̱ ni̱ka̱ʼa̱n ta̱ Elías xíʼinra. Ta ni̱na̱ʼa̱ Jehová ña̱ íyora xíʼin ta̱ Elías, saátu ni̱na̱ʼa̱ra nu̱úra ña̱ íyoní ndee̱ra. Ni̱ka̱ʼa̱ntura xíʼinra ña̱ íyo ku̱a̱ʼákava na̱ íyo nda̱kú-ini xíʼinra chí Israel (1 Rey. 19:​11, 12, 18). Ni̱ndi̱koníva-ini ta̱ Elías tá ni̱ka̱ʼa̱nra xíʼin Jehová xa̱ʼa̱ ndiʼi ña̱ ndóʼora ta saátu ña̱ xi̱nira ña̱ va̱ʼaní nda̱kuiin Jehová yuʼúra. Ta ta̱xitu Jehová sava chiñu ña̱ ndáyáʼviní ndaʼa̱ra, ta chiñu ña̱ ta̱xira ndaʼa̱ra kúú: ña̱ ndaka̱xinra ta̱ Hazael ña̱ koora rey ña̱ Siria ta saátu ña̱ ndaka̱xinra ta̱ Jehú ña̱ koora rey ñuu Israel, xíʼin ña̱ ndaka̱xinra ta̱ Eliseo ña̱ koora profeta (1 Rey. 19:​15, 16). Ta chiñu ña̱ ta̱xi Jehová ndaʼa̱ra chi̱ndeétáʼanña xíʼinra ña̱ vií ndakanixi̱níra, ta saátu nda̱kaxinra ta̱ Eliseo ña̱ chindeétáʼanra xíʼinra. w22.08 8 párr. 3; 9 párr. 5

¿Á xa̱a̱ sava yichi̱ chíndeétáʼún xíʼin iin congregación ña̱ kuva̱ʼa veʼe nu̱ú ndásakáʼnuyó Ndióxi̱ á ña̱ ndaʼaña? Tá saá íyoña, sana ndákaʼún ña̱ yichi̱ nu̱ú ña̱ ni̱xa̱ʼún congregación kán, ta ta̱xikavíún tíxa̱ʼvi ndaʼa̱ Jehová xa̱ʼa̱ ña̱ ni̱xi̱nu ña̱yóʼo. Ta xa̱ʼa̱ ña̱ kúsi̱íní-iniún sana nda̱a̱ i̱xayo̱ʼvi̱ña xíʼún kataún yaa ña̱ nu̱ú ña̱ chi̱kaa̱na. Veʼe nu̱ú ndátakayó va̱ʼaní ndásakáʼnuña Jehová, soo ndásakáʼnukayóra tá chíka̱a̱yó ndee̱ xíʼin na̱ yiví na̱ ku̱a̱ʼa̱n iniña. Ta ña̱yóʼo kúú ña̱ nda̱kanixi̱ní ta̱ apóstol Pablo xa̱ʼa̱ tá ka̱ʼyíra ña̱ káʼa̱n ña̱ va̱xi nu̱ú texto ña̱ ki̱vi̱ vitin. Ña̱ va̱ʼa ndasandakúyó-ini na̱ hermanoyó, kivi kundiku̱nyó yichi̱ ña̱ sa̱ndákoo ta̱ apóstol Pablo nu̱úyó. Ta̱yóʼo xi̱kunda̱a̱-inira xíʼin ña̱ xi̱ndoʼo inkana. Kivi kundiku̱nyó yichi̱ra (1 Cor. 11:1). w22.08 20 párr. 1, 2

Na̱ hermano na̱ kúni̱ keʼé ña̱ va̱ʼa nu̱ú Ndióxi̱, va̱ása sándaʼvina tá íxi̱kóna. Saátu na̱ yiví na̱ kéʼé ña̱ va̱ʼa ña̱ kútóo Ndióxi̱, va̱ása kútóona tá sáxo̱ʼvi̱na inkana. Ta xa̱ʼa̱ ña̱ kúni̱na sakúsi̱ína ini Ndióxi̱, kíʼinna kuenta ndáaña ndákanixi̱níra xa̱ʼa̱ ña̱ ndáka̱xinna keʼéna. Biblia káʼa̱nña ña̱ nina ña̱ va̱ʼa kéʼé Jehová. Ña̱yóʼo kúni̱ kachiña ña̱ nina ña̱ nda̱kú kéʼéra (Jer. 50:7). Xa̱ʼa̱ ña̱ i̱xava̱ʼara miíyó kúúmiíra derecho ña̱ ka̱ʼa̱nra xíʼinyó ndáaña kúú ña̱ va̱ʼa ta ndáaña kúú ña̱ va̱ása va̱ʼa. Jehová káxiní kúnda̱a̱-inira ndáaña kúú ña̱ va̱ʼa (Prov. 14:12; Is. 55:​8, 9). Soo, ¿á kivi keʼéyó ña̱ va̱ʼa nda̱a̱ táki̱ʼva kúni̱ Ndióxi̱ ná keʼéyó? Kiviva, saáchi Ndióxi̱ i̱xava̱ʼara miíyó nda̱a̱ táki̱ʼva íyora (Gén. 1:27). Ta kútóoníyó keʼéyó ña̱ va̱ʼa ta xa̱ʼa̱ ña̱ kúʼvi̱ní-iniyó xíniyó Jehová Ndióxi̱yó, kúni̱yó keʼéyó nda̱a̱ táki̱ʼva kéʼéra (Efes. 5:1). w22.08 27 párr. 5, 6

Tá ndíʼi̱ní-iniyó á ndákava-iniyó, sana kuni̱yó keʼéyó ña̱ʼa ña̱ chindeétáʼan xíʼinyó nandósóyó xa̱ʼa̱ ña̱yóʼo. Soo xíniñúʼu kiʼinníyó kuenta ña̱ va̱ʼa ná kǒo keʼéyó ña̱ʼa ña̱ kúndasí Jehová xínira (Efes. 5:​10-12, 15, 16). Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ ñuu Filipos, ni̱ka̱ʼa̱nra xíʼinna ña̱ ná ndakanixi̱nína xa̱ʼa̱ ndiʼi ña̱ʼa ña̱ nda̱kú, ndiʼi ña̱ʼa ña̱ va̱ása yaku̱a̱, ndiʼi ña̱ʼa ña̱ va̱ʼa xíʼin ndiʼi ña̱ʼa ña̱ chindeétáʼan xíʼinna ña̱ kuʼvi̱-inina kunitáʼanna (Fili. 4:8). Nu̱ú versículo yóʼo ni va̱ása níka̱ʼa̱n káxira xa̱ʼa̱ ña̱ʼa ña̱ kivi sákusi̱í-iniyó. Soo consejo ña̱ ta̱xira va̱ʼaní chindeétáʼanña xíʼinyó ña̱ vií ndaka̱xinyó yaa ña̱ kuniso̱ʼoyó, pelicula ña̱ kotoyó, libro ña̱ kaʼviyó á videojuego ña̱ kusíkíyó. Ta ña̱yóʼo chindeétáʼan xíʼinyó ña̱ kunda̱a̱-iniyó ndáaña kútóo Jehová ta ndáaña va̱ása kútóora. Chi miíyó kúni̱yó keʼéyó ndiʼi ña̱ kútóora (Sal. 119:​1-3) w22.10 9 párr. 11, 12

Sava na̱ yiví xi̱keʼéna ña̱ kini tá kúma̱níka kuvina. Soo tá ná sandátaku Jehová na̱yóʼo, xíniñúʼu sakúaʼana xa̱ʼa̱ra ta keʼéna ña̱ kúni̱ra. Ña̱ va̱ʼa chindeétáʼanyó xíʼin ndiʼi na̱ yiví yóʼo, ta̱ Jesús ta̱ kúú rey ti̱xin Reino Ndióxi̱ kúú ta̱ kuniʼi yichi̱ nu̱úyó ña̱ va̱ʼa sanáʼa̱yó ndiʼi na̱yóʼo. Na̱ ke̱ʼé ña̱ va̱ʼa na̱ ndataku ti̱xin ñuyǐví xa̱á xíʼin na̱ ka̱ku ti̱xin ña̱ Armagedón, na̱yóʼo kúú na̱ chindeétáʼan xíʼin na̱ ke̱ʼé ña̱ va̱ása va̱ʼa ña̱ xa̱a̱na sakúaʼana xa̱ʼa̱ Ndióxi̱. ¿Ndáaña xíniñúʼu keʼé na̱ ke̱ʼé ña̱ va̱ása va̱ʼa tá kúni̱na ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku? Xíniñúʼu xa̱a̱na kutáʼan viína xíʼin Jehová ta iinlá ta̱yóʼo kachíñuna nu̱ú. Tá xa̱a̱ ná kaʼndachíñu ta̱ Jesús ta saátu na̱ ku̱ʼu̱n chí ndiví, viíní kiʼinna kuenta á xa̱a̱ chíka̱a̱ na̱yóʼo ndee̱ ña̱ sákuaʼana xa̱ʼa̱ Jehová (Apoc. 20:4). Tá iinna va̱ása xíínna keʼéna ña̱yóʼo, na̱ ndiʼi-xa̱ʼa̱ koona ni kúúmiína 100 ku̱i̱ya̱ (Is. 65:20). Jehová xíʼin ta̱ Jesús kotora ña̱ ndíka̱a̱ níma̱na ta va̱ása taxira keʼéna nda̱a̱ ni iin ña̱ va̱ása va̱ʼa nu̱ú ñuyǐví xa̱á (Is. 11:9; 60:18; 65:25). w22.09 17 párr. 11, 12

Versículo yóʼo, káʼa̱nña xa̱ʼa̱ “na̱ chíñu na̱ xáʼndachíñu nu̱úyó”. Ta miíyó na̱ ndásakáʼnu Ndióxi̱ xíniñúʼu kuniso̱ʼoyó ña̱ káʼa̱n na̱yóʼo. Saáchi na̱yóʼo kúú na̱ chíndeétáʼan xíʼin na̱ yiví ña̱ vií kundoona ta káʼa̱nna xíʼinyó ña̱ ná kundiku̱nyó ña̱ káʼa̱n ley, ta nda̱a̱ sava yichi̱ ndákiʼinna tu̱ʼun na̱ ñuu Ndióxi̱ (Apoc. 12:16). Ña̱kán tu̱ʼun Ndióxi̱ káʼa̱nña xíʼinyó ña̱ ná chaʼviyó impuesto ña̱ ndúkúna nu̱úyó ta saátu ná kuniso̱ʼoyó ña̱ káʼa̱nna xíʼinyó ta ná ixato̱ʼóyóna (Rom. 13:7). Soo na̱ chíñu yóʼo xáʼndachíñuvana chi mií Ndióxi̱ táxi ná kaʼndachíñuna loʼo tiempo. Ta ta̱ Jesús káxiní ni̱ka̱ʼa̱nra xa̱ʼa̱ ña̱yóʼo tá ki̱xáʼa ta̱ Poncio Pilato ndáka̱tu̱ʼunrara. Tá ni̱ka̱ʼa̱n ta̱ Poncio Pilato xíʼin ta̱ Jesús ña̱ kiviva ka̱ʼa̱nra ña̱ ná kǒo kaʼnína ta̱ Jesús, ta̱yóʼo nda̱kuiinra yuʼúra: “Tá su̱ví Ndióxi̱ nítaxi chiñu yóʼo ndaʼún kǒo ni iin ña̱ʼa kivi keʼún xíʼi̱n” (Juan 19:11). Ña̱kán na̱ chíñu na̱ ndóo tiempo vitin, loʼova tiempo xáʼndachíñuna nda̱a̱ táki̱ʼva xa̱ʼndachíñu ta̱ Poncio Pilato. w22.10 14 párr. 6

Jehová chi̱ndeétáʼanra xíʼin ta̱ David ña̱ kaʼyíra xa̱ʼa̱ ña̱ viíní kooyó tá ná kaʼndachíñu iin rey ta̱ ndíchiní ta̱ nda̱kúní-ini (Sal. 37:​10, 11, 29). Tá nátúʼunyó xíʼin sava na̱ yiví xa̱ʼa̱ ñuʼú livi, ku̱a̱ʼání yichi̱ káʼviyó Salmo 37:11 nu̱úna. Ta va̱ʼaníva tá keʼéyó ña̱yóʼo, chi nda̱a̱ mií ta̱ Jesús ni̱ka̱ʼa̱n xa̱ʼa̱ texto yóʼo chí xi̱ní yukú. Xíʼin ña̱yóʼo ni̱na̱ʼa̱ra ña̱ xi̱nu nu̱ú ña̱ káʼa̱n texto yóʼo chí nu̱únínu (Mat. 5:5). Soo ña̱ ka̱ʼyítu ta̱ rey David ni̱na̱ʼa̱ña ndáa ki̱ʼva koo tá ná kaʼndachíñu ta̱ Salomón. Tiempo saá na̱ ñuu Israel va̱ʼaní xi̱ndoona ta kǒo ña̱ʼa níxi̱kuma̱ní nu̱úna, ñuʼú nu̱ú xi̱ndoona ni̱xi̱yoní leche xíʼin ñu̱ñú. Ta Ndióxi̱ ni̱ka̱ʼa̱nra ña̱yóʼo xíʼinna: “Tá ná ndakundeéndó kuniso̱ʼondó ña̱ káʼi̱n xíʼinndó, yi̱ʼi̱ viíní taxii̱ koo na̱ ñuu, tá ná ndakundoondó ku̱su̱nndó kǒo nda̱a̱ ni iin ña̱ʼa sayíʼvi ndóʼó” (Lev. 20:24; 26:​3, 6). Tu̱ʼun yóʼo ni̱xi̱nuña tá xa̱ʼndachíñu ta̱ rey Salomón (1 Crón. 22:9; 29:​26-28). Xíʼin ña̱yóʼo kúnda̱a̱-iniyó tu̱ʼun ña̱ va̱xi nu̱ú Salmo 37:​10, 11, 29 ni̱xi̱nuña tiempo xi̱naʼá ta saátu xi̱nuña chí nu̱únínu. w22.12 10 párr. 8

Miíyó na̱ ndásakáʼnu Ndióxi̱ xíniñúʼu kundiku̱nyó ña̱ káʼa̱n na̱ ñuu Ndióxi̱. Tu̱ʼun Ndióxi̱ táxiña consejo yóʼo: “Ta nu̱ú ku̱a̱chi kuchiñuvaún tá ná chindeétáʼan iin na̱ yiví ndíchi xíʼún, saáchi viíva kána chiñu nu̱ú íyo ku̱a̱ʼá na̱ táxi consejo” (Prov. 24:​6, nota). ¿Ndáa ki̱ʼva chindeétáʼan consejo yóʼo xíʼinyó ña̱ viíníka natúʼunyó xíʼin na̱ yiví ta sanáʼa̱yóna? Va̱ʼaní chindeétáʼanña xíʼinyó saáchi nu̱úka ña̱ keʼéyó ña̱ kúni̱ miíyó, kundiku̱nyó ña̱ káʼa̱nna xíʼinyó ndáa ki̱ʼva sanáʼa̱yó na̱ yiví. Tá kúú, tá xáʼa̱nyó reunión ku̱a̱ʼání ña̱ sákuaʼayó ti̱xin discurso xíʼin demostración. Saátu na̱ ñuu Jehová táxina tutu xíʼin video ña̱ chíndeétáʼan xíʼin na̱ yiví ña̱ kunda̱a̱-inina xíʼin Biblia. Táxiníyó tíxa̱ʼvi xa̱ʼa̱ consejo ña̱ va̱xi nu̱ú tu̱ʼun Ndióxi̱, chi va̱ʼaní chíndeétáʼanña xíʼinyó ña̱ si̱í kooyó. Ña̱kán, ndiʼi tiempo ná kundiku̱nyó consejo ña̱ táxi Jehová ndaʼa̱yó chi va̱ʼaníña (Prov. 3:​13-17). w22.10 23 párr. 18, 19

Tá xíxiyó ta ku̱a̱ndee ña̱yóʼo ku̱ñuyó, saá kúú ña̱ ndúndakúkayó. Ta ki̱ʼva saá íyo ña̱ Biblia tá káʼviyóña ta ndákanixi̱níyó xa̱ʼa̱ ña̱ káʼa̱nña, ña̱yóʼo chindeétáʼankaña xíʼinyó ña̱ kandíxakayó Ndióxi̱. Jehová kúni̱ra ña̱ kunda̱a̱-iniyó xíʼin tu̱ʼunra. Ña̱kán xíniñúʼu ka̱ʼa̱nyó xíʼinra, kaʼviyó tu̱ʼunra ta ndakanixi̱níyó xa̱ʼa̱ña. Ña̱ siʼna kéʼéyó tá kúma̱níka kaʼviyó tu̱ʼunra kúú ña̱ káʼa̱nyó xíʼinra ña̱ ná chindeétáʼanra xíʼinyó kunda̱a̱-iniyó xíʼinña. Tándi̱ʼi, saá káʼviyó ña̱ va̱xi nu̱ú Biblia ta ndákanixi̱níyó xa̱ʼa̱ ña̱ káʼa̱nña. ¿Ndáaña va̱ʼa ndakiʼinyó tá kéʼéyó ña̱yóʼo? Saá kúú ña̱ kunda̱a̱ káxi iniyó ndáaña káʼa̱n Jehová xíʼinyó nu̱ú tu̱ʼunra ¿Nda̱chun ndáyáʼviní kaʼviyó Biblia ta ndakanixi̱níyó xa̱ʼa̱ ña̱ káʼa̱nña? Saáchi ña̱yóʼo ndasandakúña-iniyó ña̱ natúʼunyó xa̱ʼa̱ reino Ndióxi̱ tiempo vitin, ta saátu ndasandakúña-iniyó chí nu̱únínu ña̱ natúʼunyó xíʼin na̱ yiví xa̱ʼa̱ tu̱ndóʼo ña̱ kixi nu̱úna. Ta tá ndákanixi̱níyó xa̱ʼa̱ ña̱ va̱ʼaní-ini Jehová xíʼin xa̱ʼa̱ ña̱ kúʼvi̱ní-inira xínira miíyó, saá kúú ña̱ xáa̱yó va̱ʼaka kítáʼanyó xíʼinra. w22.11 6, 7 párr. 16, 17

Ta̱ Jesús káxiní ni̱ka̱ʼa̱nra ndáa ki̱ʼva ndakunina ndáana ndíku̱n sa̱tára, chi ndixaní kuʼvi̱-inina kunitáʼanna. Miíyó na̱ ndásakáʼnu Ndióxi̱ kúʼvi̱ní-iniyó xínitáʼanyó. Soo na̱ yiví ku̱a̱chiva kúúyó (1 Juan 1:8). Xa̱ʼa̱ ña̱kán tá xáa̱yó viíka xíni̱yó na̱ hermanoyó, xáa̱yó kúnda̱a̱-iniyó ndáa ki̱ʼva íyona (Rom. 3:23). Soo savana sándakoona ña̱ ndasakáʼnuna Jehová xa̱ʼa̱ ña̱ va̱ása va̱ʼa ke̱ʼé iin na̱ hermano xíʼinna. ¿Ndáa ki̱ʼva ni̱na̱ʼa̱ ta̱ Jesús ña̱ xi̱kuʼvi̱-inira xi̱xinira na̱ apóstolra? ¿Ndáa ki̱ʼva kundiku̱nyó yichi̱ ta̱ Jesús? Saátu miíyó na̱ xa̱a̱ kúú testigo Jehová, kivi ndakanixi̱níyó xa̱ʼa̱ ña̱yóʼo. Tá saá ná keʼéyó, chindeétáʼanña xíʼinyó ña̱ kuʼvi̱níka-iniyó kunitáʼanyó, víkaví tá iinna kéʼéna iin ña̱ va̱ása va̱ʼa xíʼinyó (Efes. 5:2). w23.03 26, 27 párr. 2-4

Xa̱ʼa̱ ña̱ xa̱a̱ ku̱yatin ndiʼi-xa̱ʼa̱ ñuyǐví yóʼo, va̱ása ndákanda̱-iniyó ña̱ ti̱xin congregación kúu sava ña̱ kivi ixayo̱ʼvi̱ xíʼinyó nda̱kú koo iniyó xíʼin Jehová. Ta ndáyáʼviní vií ndakanixi̱níyó tá kúu ña̱yóʼo. Tá ndákanixi̱níyó ña̱ va̱ása vií níkeʼé iin na̱ hermano xíʼinyó, ná va̱ása sa̱a̱yó. Tá táxina iin consejo ndaʼa̱yó, ná kundiku̱nyóña ta ná nasamayó ña̱ kéʼéyó ta ná va̱ása ndakaniníxi̱níyó ndáa ki̱ʼva ta̱xinaña ndaʼa̱yó. Ta tá nása̱ma sava ña̱ʼa ti̱xin ñuu Jehová ta íxayo̱ʼvi̱ña xíʼinyó kandíxayóña, xíʼin ndiʼi níma̱yó ná kundiku̱nyó ña̱ káʼa̱nna xíʼinyó. Ndakundeún kandíxaún Jehová tá íyo ña̱ íxayo̱ʼvi̱ xíʼún ti̱xin ñuura. Vií ndakanixi̱níún á táxi̱n koo iniún, ta ndakanixi̱níún nda̱a̱ táki̱ʼva ndákanixi̱ní Jehová. Ka̱ʼa̱n xíʼin Jehová ná chindeétáʼanra xíʼún ta va̱ása kuxíkáún nu̱ú na̱ hermano. Ña̱kán nda̱a̱ ndáaka ña̱ ná kuu, ta̱ Ndi̱va̱ʼa va̱ása kuchiñura sakúxíkára yóʼó nu̱ú Jehová ta ni nu̱ú na̱ ñuura (Sant. 4:7). w22.11 24, 25 párr. 14-16

Ndóʼó na̱ anciano chindeétáʼanndó xíʼin na̱ hermano ña̱ ná koo tu̱ʼvana tá kúma̱níka kuu iin tu̱ndóʼo. Sanáʼa̱ndóna ndáaña kivi keʼéna ña̱ va̱ʼa sakǎkuna miína ta ya̱chi̱ka ná natúʼunna xíʼinndó. ¿Ñdáaña kivi keʼún? Tá yatin nu̱ú íyoún ná kuu iin tu̱ndóʼo, nda̱ka̱tu̱ʼun na̱ anciano ndáaña kivi keʼún ña̱ va̱ʼa chindeétáʼún xíʼin na̱ hermano. Tá kúú, kivi taxiún veʼe kundoo na̱ hermano na̱ ndo̱ʼo tu̱ndóʼo á na̱ hermano na̱ ki̱xaa̱ chindeétáʼan xíʼin na̱yóʼo. Saátu kivi kakaún ndaxaxaún ña̱ kuxu na̱ hermano á inkaka ña̱ xíniñúʼuna. Ta ni xíká ku̱u tu̱ndóʼo kiviva chindeétáʼún xíʼin na̱ hermano. ¿Ndáa ki̱ʼva? Tá kúú, kivi ka̱ʼún xa̱ʼa̱na xíʼin Jehová á saátu kivi taxiún loʼo xu̱ʼún ña̱ kuniñúʼuna (2 Cor. 1:​8-11; 8:​2-5). Ta tá kivi ku̱ʼún nda̱a̱ nu̱ú ku̱u iin tu̱ndóʼo, kivi nda̱ka̱tu̱ʼún na̱ anciano ndáa ki̱ʼva chindeétáʼún xíʼin na̱ hermano. Tá ná ka̱ʼa̱nna xíʼún ña̱ kiviva chindeétáʼún xíʼin na̱ hermano, sana sanáʼa̱na yóʼó ña̱ va̱ʼa viíní chindeétáʼún xíʼinna, ta kivi ka̱ʼa̱nna xíʼún ndáamií kivi chindeétáʼankaún xíʼin na̱ hermano. w22.12 24 párr. 8; 25 párr. 11, 12

Nu̱ú inka Biblia siaʼa sa̱ndáya̱ʼana texto yóʼo: “Ndóʼó yáʼandó nu̱ú tu̱ndóʼo ña̱ xa̱a̱ yáʼa ndiʼi na̱ yiví nu̱ú”. Tu̱ʼun yóʼo ni̱ka̱ʼa̱nnaña xíʼin na̱ hermano na̱ xi̱ndoo chí Corinto. Sava na̱yóʼo xi̱kisi̱na xíʼin na̱ kǒo nítindaʼa̱ xíʼinna, na̱ ta̱a xi̱kisi̱na xíʼin na̱ ta̱a ta saátu xi̱xiʼina nda̱a̱ xi̱xinina (1 Cor. 6:​9-11). Tá ni̱ya̱ʼa tiempo na̱yóʼo nda̱kuchina, soo, ¿á sa̱ndákoona ña̱ ndakanixi̱nína xa̱ʼa̱ ndiʼi ña̱yóʼo? Sana va̱ásaví. Ña̱ nda̱a̱ ndiʼi na̱yóʼo na̱ ku̱ʼu̱n chí ndiví xi̱kuuna soo na̱ yiví ku̱a̱chiva xi̱kuuna. Xa̱ʼa̱ ña̱kán, sana sava yichi̱ xi̱ndakanivaxi̱nína xa̱ʼa̱ ña̱ kini yóʼo. Ña̱yóʼo sándi̱koña-iniyó, saáchi inka na̱ hermano xa̱a̱ ndóʼona nda̱a̱ táki̱ʼva ndóʼo miíyó soo kúchiñuvana yáʼana nu̱ú ña̱yóʼo. Xa̱ʼa̱ ña̱kán kiviva ndakundeéyó nda̱kú koo iniyó xíʼin Jehová chi kúnda̱a̱-iniyó ña̱ ndiʼi na̱ hermanoyó yáʼana nu̱ú táʼan tu̱ndóʼo ña̱ yáʼa miíyó nu̱ú (1 Ped. 5:9). w23.01 12 párr. 15

Ta̱ Jesús ni̱ka̱ʼa̱nra xíʼin Jehová ña̱ ná kundaara na̱ discípulora (Juan 17:11). ¿Ndáa ki̱ʼva chíndeétáʼan ña̱yóʼo xíʼinyó ña̱ va̱ása yi̱ʼvíyó? Ña̱yóʼo chíndeétáʼanníña xíʼinyó saáchi kúnda̱a̱-iniyó ña̱ kúúmiíníka Jehová ndee̱ nu̱ú na̱ sáa̱-ini xíni miíyó (1 Juan 4:4). Ta íyo tu̱ʼva Jehová ña̱ chindeétáʼanra xíʼinyó. Tá ná kundaa-iniyóra, kuchiñuvayó ya̱ʼayó nu̱ú ña̱ sáyi̱ʼví miíyó ta ndakú koo iniyó. ¿Á kúkaʼan nu̱ún ka̱ʼún ña̱ kúún testigo Jehová ti̱xin escuela á nu̱ú káchíñún? ¿Á ndákanixi̱níún ña̱ va̱ʼaka chí nu̱únínuví saá koún publicador ta ndakuchiún? Va̱ása yi̱ʼvíún kuniún na̱ yiví va̱ʼaka keʼé ña̱ kúni̱ Jehová. Ka̱ʼa̱n xíʼin Jehová ná chindeétáʼanra xíʼún ta ná taxira ndee̱ ndaʼún ña̱ va̱ása yi̱ʼvíún kachíñún nu̱úra. Tá ná kiʼún kuenta ña̱ ndákuiinra oración ña̱ káʼún xíʼinra, saá ndakúka koo iniún ta va̱ása yi̱ʼvíún (Is. 41:​10, 13). w23.01 29 párr. 12; 30 párr. 14

Tá xi̱kaʼvi na̱ fariseo tu̱ʼun Ndióxi̱ va̱ása níxi̱kunda̱a̱ káxi inina xíʼinña xa̱ʼa̱ ña̱ ni̱nuní xi̱kunina (Mat. 12:​1-7). Na̱ fariseo chi̱kaa̱na ku̱a̱chi na̱ discípulo ta̱ Jesús ña̱ ni̱ya̱ʼandosóna ley ña̱ káʼa̱n xa̱ʼa̱ ki̱vi̱ sábado, soo ta̱ Jesús xi̱niñúʼura u̱vi̱ ejemplo ña̱ va̱xi nu̱ú tu̱ʼun Ndióxi̱, ta saátu iin versículo ña̱ va̱xi nu̱ú libro ña̱ Oseas ña̱ va̱ʼa ka̱ʼa̱nra xa̱ʼa̱ ña̱yóʼo xíʼinna. Tasaá ni̱na̱ʼa̱ ta̱ Jesús nu̱ú na̱ fariseo kán ña̱ va̱ása níxi̱kunda̱a̱-inina xa̱ʼa̱ ley ña̱ káʼa̱n xa̱ʼa̱ ki̱vi̱ sábado, ta va̱ása níxi̱kundáʼvi-inina kunina inkana. Ni xi̱kaʼviva na̱ fariseo tu̱ʼun Ndióxi̱, soo va̱ása vií níxi̱kunda̱a̱-inina xíʼinña. ¿Nda̱chun? Saáchi ni̱nuní xi̱kunina ta xi̱kaʼvi kuitínaña ña̱ va̱ʼa ka̱ʼa̱n kúáchina xa̱ʼa̱ inkana. Ta xa̱ʼa̱ ña̱ ni̱nuní xi̱kunina va̱ása níxi̱kunda̱a̱-inina xíʼin ña̱ xi̱kaʼvina (Mat. 23:23; Juan 5:​39, 40). Nu̱ú Mateo 19:​4-6, ta̱ Jesús ni̱nda̱ka̱tu̱ʼunra na̱ fariseo á ta̱ʼán kaʼvina xa̱ʼa̱ tu̱ʼun Ndióxi̱. Ni va̱ʼaní xi̱kunda̱a̱-inina xa̱ʼa̱ ndiʼi ña̱ʼa ña̱ ke̱ʼé Ndióxi̱, soo va̱ása níxi̱kunda̱a̱-inina ndáa ki̱ʼva ndákanixi̱ní Jehová xa̱ʼa̱ na̱ xa̱a̱ ti̱ndaʼa̱. Ña̱yóʼo sánáʼa̱ña miíyó ña̱ viíní kaʼviyó Biblia ta ná va̱ása keʼéyó nda̱a̱ tá ki̱ʼva xi̱keʼé na̱ fariseo. w23.02 12 párr. 12, 13

Jehová ta̱xira ley ndaʼa̱ na̱ ñuu Israel nu̱ú ni̱ka̱ʼa̱nra xíʼinna ndáaña keʼéna ña̱ va̱ʼa ná kǒo kundoʼona tu̱ndóʼo ti̱xin veʼena ni nu̱ú káchíñuna (Éx. 21:​28, 29; Deut. 22:8). Tá iin na̱ yiví xa̱ʼnína iinna ta su̱ví ña̱ níxi̱kuni̱ miína kúú ña̱yóʼo chi iin ña̱ ku̱u sana kúúña, xi̱kixiva tu̱ndóʼo nu̱úna xa̱ʼa̱ ña̱yóʼo (Deut. 19:​4, 5). Ña̱ ley xi̱ka̱ʼa̱nña tá iin na̱ yiví xa̱ʼnína iin ña̱ lée loʼo ta su̱ví ña̱ níxi̱kuni̱ miína kúú ña̱yóʼo, taxivana castigo ndaʼa̱na (Éx. 21:​22, 23). Ña̱ Biblia káxiní náʼa̱ña nu̱úyó ña̱ kúni̱ Jehová ná kundaayó miíyó ña̱ va̱ʼa ná kǒo kixi tu̱ndóʼo nu̱úyó. Kivi na̱ʼa̱yó ña̱ táxiníyó tíxa̱ʼvi ndaʼa̱ Ndióxi̱ xa̱ʼa̱ ña̱ ta̱xira ña̱ tákuyó, tá ná kiʼinníyó kuenta xíʼin chiñu ña̱ kéʼéyó ti̱xin veʼeyó ta saátu nu̱ú káchíñuyó. Tá kúú, táan va̱ʼayó ña̱ʼa ña̱ xi̱ín yuʼú, ña̱ʼa ña̱ kúúmií veneno á inkaka nu̱ú ta̱tán ta kíʼinníyó kuenta ña̱ ná kǒo tiin na̱ va̱lí ña̱yóʼo. Ta tá xátayóña, kíʼinníyó kuenta xíʼinña. Tá kúú, tá ndákaʼmiyó ñuʼú kíʼinníyó kuenta xíʼin ña̱yóʼo, ta saátu tá sása̱a̱yó ti̱kui̱í á tá kéʼéyó inkaka ña̱ʼa, va̱ása sándakoo miíyó ña̱yóʼo, chi kíʼinyó kuenta xíʼinña. Saátu ni va̱ása kávayó carro tá xa̱a̱ xi̱ʼiyó ta̱tán ña̱ kivi tavá kue̱ʼe̱ xíʼinyó, á tá xi̱ʼiyó ndixi, á tá ku̱naáníyó, ta saátu ni va̱ása tíinyó celular tá kávayó carro. w23.02 21, 22 párr. 7-9

Jehová kúee íyo inira tá sánáʼa̱ra miíyó, va̱ʼaní-inira, kúnda̱a̱-inira xíʼinyó ta kíʼinra kuenta xíʼin ña̱ va̱ʼa ña̱ kéʼéyó (Sal. 130:3). Va̱ása káʼa̱nra xíʼinyó keʼéyó ña̱ va̱ása kuchiñuyó keʼéyó. Ná va̱ása nandósó-iniyó chi ta̱kán kúú ta̱ ke̱ʼé mekeyó ta ña̱yóʼo va̱ʼaní regalo kúúña (Sal. 139:14). Ta kúni̱ra ña̱ ná ndakundeéyó sakúaʼayó ndiʼi tiempo ta ná kusi̱í-iniyó xíʼin ña̱yóʼo. Ña̱kán nda̱a̱ tiempo vitin ná chika̱a̱-iniyó ña̱ sakúaʼayó xa̱ʼa̱ ña̱ nda̱a̱ (1 Ped. 2:2). ¿Ndáaña kivi chindeétáʼan xíʼún? Chinúu meta nu̱ún ña̱ kivi saxínún ta kaʼvi ni̱ʼi tu̱ʼun Ndióxi̱ ta ndakanixi̱ní xa̱ʼa̱ña (Jos. 1:8). Mií Jehová chindeétáʼan xíʼún ña̱ kutóún sakúaʼún xa̱ʼa̱ra ta saátu ña̱ ndakanixi̱níún xa̱ʼa̱ ña̱ sákuaʼún xa̱ʼa̱ra. Miíyó ndákundeéyó sákuaʼayó xa̱ʼa̱ Jehová chi kúni̱yó kunda̱a̱ka-iniyó xa̱ʼa̱ra. Kúni̱yó kuʼvi̱ka-iniyó kuniyóra ta kandíxakayóra (1 Cor. 8:​1-3). Tá ndákundeún sákuaʼún xa̱ʼa̱ Jehová ka̱ʼa̱n xíʼinra ña̱ chindeétáʼanra xíʼún ña̱ kandíxakaúnra (Luc. 17:5). Ta ta̱kán ndakuiinvara yuʼún chi va̱ʼaní-inira. w23.03 10 párr. 11, 13

Tá ni̱ka̱ʼa̱n ta̱ Jesús xíʼin na̱ discípulora ña̱ xa̱a̱ ku̱yatin kixaa̱ ña̱ ndiʼi-xa̱ʼa̱ ñuyǐví yóʼo. ¿Á ni̱xi̱yo miína ta kǒo chiñu níkeʼéna? Va̱ásaví, saáchi ta̱ Jesús ta̱xira iin chiñu ña̱ ndáyáʼviní ndaʼa̱na tá ni̱ka̱ʼa̱nra xíʼinna: “Natúʼunndó xa̱ʼíi̱ chí ñuu Jerusalén, xíʼin iníí chí Judea xíʼin Samaria, ta nda̱a̱ iníísaá nu̱ú ñuʼú” (Hech. 1:​6-8). Iin chiñu káʼnuní kúú ña̱ ta̱xi ta̱ Jesús ndaʼa̱na. Soo tá ña̱yóʼo kúú ña̱ ná kundi̱ʼi̱-inina xa̱ʼa̱, saá kúú ña̱ viíní kuniñúʼuna tiempona. Ña̱ va̱ʼa kiʼinyó kuenta xíʼin miíyó, xíniñúʼu kiʼinníyó kuenta ndáa ki̱ʼva xíniñúʼuyó tiempoyó. Nda̱a̱ táki̱ʼva káchi Eclesiastés 9:​11, ndiʼiyó iin sana kivi ndakava tu̱ndóʼo nu̱úyó ta nda̱a̱ kivi xa̱a̱yó kuviyó. Iin ki̱ʼva ña̱ viíní kuniñúʼuyó tiempoyó kúú ña̱ keʼéyó chiñu Jehová ta chika̱a̱yó ndee̱ ña̱ viíka kutáʼanyó xíʼinra (Juan 14:21). Xíniñúʼu chika̱a̱yó ndee̱ ña̱ kuniso̱ʼoyó consejo yóʼo: “Kǒo sandákoondó ña̱ kandíxaníndó Ndióxi̱ ta ndiʼi tiempo keʼéndó chiñu tátayó” (1 Cor. 15:58). Ña̱kán tá ná kixaa̱ ki̱vi̱ ña̱ ndiʼi-xa̱ʼa̱ ndiʼi ña̱ʼa ña̱ íyo nu̱ú ñuʼú yóʼo á tá ná kixaa̱ ki̱vi̱ ña̱ kuviyó, va̱ása ndakanixi̱níyó ña̱ loʼoní chiñu ke̱ʼéyó nu̱ú Jehová (Mat. 24:13; Rom. 14:8). w23.02 18 párr. 12-14