Febrero

¿Ndáaña xi̱kuni̱ kachi ta̱ Jesús xíʼin ña̱yóʼo? Ña̱ xi̱kuni̱ kachira kúú ña̱ kuʼvi̱-inina kunitáʼanna ta nda̱a̱ kandíxana kuvina xa̱ʼa̱ táʼanna. Tu̱ʼun Ndióxi̱ sánáʼa̱ña ña̱ ndáyáʼviní kuʼvi̱-iniyó kunitáʼanyó. Savana káʼa̱nna ña̱ kútóonína texto yóʼo: “Ndióxi̱ kúúra ña̱ kúʼvi̱-ini” (1 Juan 4:8). “Kuʼvi̱-iniún kuniún inka na̱ yiví nda̱a̱ táki̱ʼva kúʼvi̱-iniún xíniún miíún” (Mat. 22:39). “Na̱ kúʼvi̱-ini xíni inkana ndiʼi tiempo íyo tu̱ʼvana ña̱ koo káʼnu-inina xa̱ʼa̱ táʼanna” (1 Ped. 4:8). Xíʼin inka ña̱yóʼo, “ña̱ kúʼvi̱-inina xínina inkana va̱ása ndíʼiña” (1 Cor. 13:8). Texto yóʼo xíʼin inkakaña náʼa̱ña nu̱úyó ña̱ ndáyáʼviní kuʼvi̱-iniyó kunitáʼanyó. Chi kúnda̱a̱-iniyó ña̱ iinlá Jehová kúú ta̱ kúʼvi̱ní-ini xíni miíyó (1 Juan 4:7). Vitin kúnda̱a̱-iniyó nda̱chun kúú ña̱ ni̱ka̱ʼa̱n ta̱ Jesús ña̱ na̱ ndixa ndíku̱n sa̱tára kuʼvi̱ní-inina kunitáʼanna. w23.03 27, 28 párr. 5-8

¿Á xíniñú’u ixakáʼnu-iniyó xa̱ʼa̱ inkana? Kivi kaʼviyó ta ndakanixi̱níyó xa̱ʼa̱ na̱ ni̱xi̱yo xi̱naʼá na̱ káʼa̱n tu̱ʼun Ndióxi̱ xa̱ʼa̱ ña̱ va̱ʼaní i̱xakáʼnu-inina xa̱ʼa̱ inkana, ta saátu kivi kaʼviyó xa̱ʼa̱ na̱ va̱ása ní ixakáʼnu-ini xa̱ʼa̱ inkana. Ná ndakanixi̱níyó xa̱ʼa̱ ta̱ Jesús chi ta̱yóʼo va̱ʼaní xi̱ ixakáʼnu-inira xa̱ʼa̱ na̱ yiví (Luc. 7:47). Va̱ása níxi̱ndi̱ʼi̱ní-inira xa̱ʼa̱ ña̱ va̱ása va̱ʼa xi̱keʼéna, chi ña̱ xi̱kiʼinra kuenta xíʼin kúú ña̱ kivi xa̱a̱na keʼévana. Soo na̱ fariseo síínva ni̱xi̱yona, saáchi “xi̱ndakanixi̱nína ña̱ kǒo ndáyáʼvi inka na̱ yiví” (Luc. 18:9). Tá ndi̱ʼi ka̱ʼviyó xa̱ʼa̱na, ná ndakanixi̱níyó xa̱ʼa̱ ña̱yóʼo: “¿Ndáaña ndákanixi̱níi̱ xa̱ʼa̱ inkana? ¿Ndáaña kéʼéna kúúña kíʼinkai̱ kuenta xíʼin?”. Tá íxayo̱ʼvi̱ña xíʼinyó ixakáʼnu-iniyó xa̱ʼa̱ inkana, kivi kaʼyíyó nu̱ú iin tutu ndiʼi ña̱ va̱ʼa ña̱ xítoyó kéʼé na̱ yiví kán, ta ná ndakanixi̱níyó xa̱ʼa̱ ña̱yóʼo: “¿Ndáaña ndákanixi̱ní ta̱ Jesús xa̱ʼa̱na? ¿Á ixakáʼnu-inira xa̱ʼa̱na?”. Sana tá xa̱ʼa̱, ixayo̱ʼvi̱ña xíʼinyó ixakáʼnu-iniyó xa̱ʼa̱ na̱ ke̱ʼé ña̱ va̱ása va̱ʼa xíʼinyó. Soo tá ná chika̱a̱níyó ndee̱, kuchiñuvayó ixakáʼnu-iniyó xa̱ʼa̱na. w22.04 23 párr. 6

Libro ña̱ Apocalipsis káʼa̱nña xa̱ʼa̱ kití yukú tí ndána̱ʼa̱ na̱ sáa̱-ini xíni Ndióxi̱. Tá kúú, káʼa̱nña xa̱ʼa̱ iin “kití yukú tí ki̱ta ini mar”, “10 xi̱kuu ndiki̱rí ta 7 xi̱kuu xi̱nírí” (Apoc. 13:1). Tasaá “ki̱ta inka kití yukú chí nu̱ú ñuʼú”. Ta nda̱a̱ táki̱ʼva káʼa̱n iin dragón saá káʼa̱nrí, ta “nda̱a̱ kée ñuʼu̱ chí ndiví ta kóyoña nu̱ú ñuʼú íxaarí” (Apoc. 13:​11-13). Tándi̱ʼi káʼa̱nña xa̱ʼa̱ iin “kití yukú tí color kúáʼa ña̱ yéʼe̱ní”, ta sa̱tá tíyóʼo kánuu iin ñaʼá ñá kísi̱ xíʼin ku̱a̱ʼání ta̱a. U̱ni̱ saá tí kití yukú yóʼo ndána̱ʼa̱rí na̱ xa̱a̱ ku̱a̱ʼání ku̱i̱ya̱ sáa̱-ini xíni Jehová xíʼin Reinora. Xa̱ʼa̱ ña̱kán ndáyáʼviní kunda̱a̱-iniyó ndáana kúú na̱yóʼo (Apoc. 17:​1, 3). Xíniñúʼu kunda̱a̱-iniyó ndáana ndána̱ʼa̱ tí kití yóʼo. Ta ña̱ va̱ʼa kunda̱a̱-iniyó xa̱ʼa̱ tíyóʼo ná kotoyó ndáaña káʼa̱n tu̱ʼun Ndióxi̱ xa̱ʼa̱rí. Tí kití yukú tí káʼa̱n libro ña̱ Apocalipsis xa̱ʼa̱, xa̱a̱ káʼa̱n inkaka libro ña̱ va̱xi nu̱ú Biblia xa̱ʼa̱rí. w22.05 8, 9 párr. 3, 4

Ku̱a̱ʼání na̱ hermano ndákava-inina saáchi xa̱ʼa̱ ña̱ ku̱chéena á xa̱ʼa̱ ña̱ kúúmiína kue̱ʼe̱, va̱ása kívi keʼékana chiñu nu̱ú Jehová. Tá sava yichi̱ ndákava-iniyó xa̱ʼa̱ ña̱ va̱ása kívika keʼéyó ndiʼi ña̱ kúni̱yó keʼéyó, ná ndakanixi̱níyó xa̱ʼa̱ ña̱yóʼo: “¿Ndáaña kúni̱ Jehová ná keʼíi̱?”. Ña̱ kúni̱ra kúú ña̱ ná keʼéyó ndiʼi ña̱ kivi keʼévayó. Ndakanixi̱ní xa̱ʼa̱ ña̱yóʼo: iin ñá hermana ñá kúúmií 80 ku̱i̱ya̱ ndákavaní-iniñá saáchi kǒo kívi keʼéñá chiñu nu̱ú Ndióxi̱ nda̱a̱ táki̱ʼva xi̱keʼéñá tá xi̱kuumiíñá 40 ku̱i̱ya̱. Ni kúnda̱a̱-iniñá ña̱ xíʼin ndinuʼu-iniñá káchíñuñá nu̱ú Jehová, soo ndákanixi̱níñá ña̱ va̱ása kúsi̱í-inira xíʼin ña̱ kéʼéñá. Soo tá xíʼin ndinuʼu-iniyó ná kachíñuyó nu̱ú Jehová kusi̱íníva-inira xíʼin ña̱ kéʼéyó (chitáʼanña xíʼin Mateo 25:​20-23). Iin ña̱ kivi chindeétáʼan xíʼinyó ña̱ kusi̱í-iniyó kúú ña̱ ná ndakanixi̱níyó xa̱ʼa̱ ña̱ kivi keʼéyó nu̱úka ña̱ ndakanixi̱níyó xa̱ʼa̱ ña̱ va̱ása kívi keʼéyó. w22.04 10 párr. 2; 11 párr. 4-6

Apocalipsis capítulo 21 chítáʼanña na̱ 144,000 xíʼin iin ñuu ña̱ liviní, ña̱ naní “Jerusalén ña̱ xa̱á”. Ta ña̱yóʼo káʼa̱nkaña xa̱ʼa̱ ñuu yóʼo: “Nu̱ú ka̱na xa̱ʼa̱ nama̱ yóʼo íyo 12 yu̱u̱, ta nu̱ú ña̱yóʼo ni̱ka̱ʼyi̱ 12 saá ki̱vi̱ na̱ 12 apóstol tí ndikachi” (Apoc. 21:​10-14; Efes. 2:20). Ñuu yóʼo va̱ása kítáʼanña xíʼin nda̱a̱ ni iin ñuu. Chi calle káʼnu ña̱ kúúmií ñuu yóʼo na̱kuva̱ʼaña xíʼin oro ña̱ va̱ʼa, ta 12 perla na̱kuva̱ʼa 12 yéʼéña, nu̱ú ka̱na xa̱ʼa̱ nama̱ ñuu yóʼo ku̱a̱ʼání yu̱u̱ livi kúúmiíña, ta ki̱ʼvaní chu̱ʼunna ñuu yóʼo (Apoc. 21:​15-21). Soo ta̱ Juan káchira: “Kǒo ni iin templo níxinii̱ ini ñuu yóʼo, saáchi Jehová Ndióxi̱ ta̱ kúúmií ndiʼi ndee̱ ta̱kán kúú temploña, ta saátu tí ndikachi. Ta ñuu yóʼo va̱ása xíniñúʼuña ña̱ kutuu̱n ñu̱ʼu á yo̱o̱ nu̱úña, saáchi ña̱ yéʼe̱ ña̱ kúúmií Ndióxi̱ kúú ña̱ túun nu̱úña, ta tí ndikachi kúú lámparaña” (Apoc. 21:​22, 23). Na̱ kúú Jerusalén ña̱ xa̱á kuni nu̱úna Jehová ta koo yatinna xíʼinra (Heb. 7:27; Apoc. 22:​3, 4). w22.05 17, 18 párr. 14, 15

Jehová kúú ta̱ i̱xava̱ʼa miíyó, ta̱ ndátiin ku̱a̱chi xíʼinyó, ta saátu kúúra yiváyó ta̱ kúʼvi̱ní-ini xíni miíyó (Sal. 100:3; Is. 33:22). Ña̱kán tá kíʼviyó ku̱a̱chi nu̱úra ta xíʼin ndiʼi níma̱yó ndándikó-iniyó, íxakáʼnuva-inira xa̱ʼa̱yó (Sal. 86:5). Jehová xi̱niñúʼura ta̱ profeta Isaías ña̱ ni̱ka̱ʼa̱nra iin tu̱ʼun ña̱ sándi̱koní-iniyó. Ta ña̱yóʼo ni̱ka̱ʼa̱nra: “Ni táki̱ʼva íyo color kúaʼa saá íyo ku̱a̱chindó, nduyaaña táki̱ʼva yaa nieve” (Is. 1:18). Xa̱ʼa̱ ña̱ kúúyó na̱ yiví ku̱a̱chi sava yichi̱ kéʼéyó á káʼa̱nyó ña̱ʼa ña̱ kivi sandákava-ini inkana (Sant. 3:2). Soo su̱ví ña̱yóʼo kúni̱ kachiña ña̱ va̱ása kivi vií kutáʼanyó xíʼin inkana. Chi kiviva kutáʼanyó xíʼinna tá ná ixakáʼnu-iniyó xa̱ʼa̱na ta saátu tá ná ixakáʼnu-inina xa̱ʼa̱yó (Prov. 17:9; 19:11; Mat. 18:​21, 22). Sava yichi̱ su̱ví ña̱ ndeéví kéʼé iinna xíʼinyó, ña̱kán kúni̱ Jehová ña̱ ná ixakáʼnu-iniyó xa̱ʼa̱na (Is. 55:7). w22.06 8 párr. 1, 2

Su̱ví ña̱ va̱ʼa kúú ña̱ chitáʼanyó miíyó xíʼin inkana, soo ku̱a̱ʼání ña̱ kivi sakúaʼayó tá ná kotoyó ña̱ kéʼé inka na̱ ndásakáʼnu Jehová. Ná ndakanixi̱níyó xa̱ʼa̱ ta̱ Jesús chi ta̱yóʼo kúú ta̱ va̱ʼaní yichi̱ chi̱núu nu̱úyó (1 Ped. 2:21). Tá ná chika̱a̱níyó ndee̱ ña̱ kundiku̱nyó yichi̱ra, va̱ʼaníka kachíñuyó nu̱ú Jehová. Biblia káʼa̱nña xa̱ʼa̱ ku̱a̱ʼá na̱ ta̱a xíʼin ná ñaʼá na̱ sa̱ndákoo iin yichi̱ va̱ʼaní nu̱úyó, ni xi̱kuuna na̱ yiví ku̱a̱chi. Ta iin ta̱yóʼo xi̱kuu ta̱ rey David. Ña̱yóʼo ni̱ka̱ʼa̱n Jehová xa̱ʼa̱ra: “Ta̱ David [...] iin ta̱a ta̱ sákusi̱íní-inii̱ kúúra” (Hech. 13:22). Ta̱ David ke̱ʼéra sava ña̱ va̱ása va̱ʼa, soo nisaá va̱ʼava yichi̱ sa̱ndákoora nu̱úyó. ¿Nda̱chun? Saáchi tá ta̱xina consejo ndaʼa̱ra va̱ása níchika̱a̱ra ku̱a̱chi inkana xa̱ʼa̱ ña̱ ke̱ʼéra. Ta va̱ʼaní ka̱ndíxara consejo ña̱ ta̱xina ndaʼa̱ra, ta saátu nda̱ndikóní-inira xa̱ʼa̱ ña̱ ke̱ʼéra, ña̱kán i̱xakáʼnu-ini Jehová xa̱ʼa̱ra (Sal. 51:​3, 4, 10-12). w22.04 13 párr. 11, 12

Tu̱ʼun Ndióxi̱ káʼa̱nña xa̱ʼa̱ ña̱ xíʼi̱yó, ña̱ nda̱a̱ táki̱ʼva íyo contrayó saá íyoña (1 Cor. 15:​25, 26). ¿Nda̱chun yíʼviyó tá ndákanixi̱níyó ña̱ xa̱a̱yó kuviyó? Saáchi mií Jehová chi̱kaa̱ra-iniyó ña̱ kuni̱yó kutakuyó ndiʼi tiempo (Ecl. 3:11). Ta iin ña̱ va̱ʼava kúú ña̱ yi̱ʼvíyó kuviyó, saáchi ña̱yóʼo kivi chindeétáʼanña xíʼinyó ña̱ kiʼinníyó kuenta xíʼin ña̱ xíxiyó, ña̱ keʼéyó ejercicio, ña̱ kiʼinníyó kuenta xíʼin ña̱ kéʼéyó ña̱ va̱ʼa kǒo ña̱ kundoʼoyó, ta saátu ku̱ʼu̱nyó nu̱ú doctor ta koʼoyó ta̱tán ña̱ xíniñúʼu koʼoyó. Ta̱ Ndi̱va̱ʼa kúnda̱a̱-inira ña̱ ndáyáʼviní ña̱ tákuyó. Ña̱kán káʼa̱nra ña̱ nda̱a̱ kivi sandákooyó ña̱ ndasakáʼnuyó Jehová ña̱ va̱ʼa kutakuyó (Job 2:5). Soo su̱ví ña̱ nda̱a̱ kúú ña̱ káʼa̱nra xa̱ʼa̱yó. Ta̱ Ndi̱va̱ʼa kúúmiívara ndee̱ ña̱ kuniñúʼura nda̱a̱ ndáaka ña̱ʼa ña̱ kaʼníra miíyó, ta xíʼin ña̱yóʼo sáyi̱ʼvíra miíyó ña̱ va̱ʼa sandákooyó ña̱ ndasakáʼnuyó Jehová (Heb. 2:​14, 15). w22.06 18 párr. 15, 16

Tá va̱ása xíín na̱ chíñu taxina keʼéyó chiñu nu̱ú Ndióxi̱, sana loʼovayó kivi ndakutáʼan. Ña̱kán ndáyáʼviní vií kutáʼanyó xíʼin na̱ hermanoyó. Chi ta̱ kánitáʼanyó xíʼin kúú ta̱ Ndi̱va̱ʼa ta su̱ví na̱ hermanoyó. Ná koo káʼnu-iniyó xa̱ʼa̱ ña̱ kéʼé na̱ hermano xíʼinyó ta kama ná ndukúyó ki̱ʼva ña̱ ndasaviíyó ku̱a̱chi ña̱ kúúmiíyó xíʼinna (Prov. 19:11). Siʼna miíyó ná ndukú ki̱ʼva ña̱ chindeétáʼanyó xíʼin na̱ hermanoyó (Tito 3:14). Iin grupo ña̱ predicación va̱ʼaní chi̱ndeétáʼanna xíʼin iin ñá hermana, ta ña̱yóʼo va̱ʼaní chindeétáʼanña xíʼin ndiʼika na̱ hermano ña̱ inkáchi viíní kutáʼanna (Sal. 133:1). Sava na̱ hermano ñúʼuna veʼeka̱a xa̱ʼa̱ ña̱ kándíxana Jehová. Ná ka̱ʼa̱nyó xíʼin Jehová xa̱ʼa̱na ta saátu xa̱ʼa̱ na̱ veʼena. Ná ka̱ʼa̱ntuyó xa̱ʼa̱ na̱ ndákiʼin tu̱ʼun na̱ hermanoyó nu̱ú na̱ chíñu (Col. 4:​3, 18). Ná va̱ása kaka-iniyó chi oración ña̱ kéʼéyó nu̱ú Jehová kivi chindeétáʼanña xíʼin inka na̱ hermanoyó (2 Tes. 3:​1, 2; 1 Tim. 2:​1, 2). w22.12 26, 27 párr. 15, 16

Na̱ va̱lí xítona ña̱ kéʼé na̱ yivána. Ndiʼi na̱ íyo se̱ʼe na̱ yiví ku̱a̱chi kúúna (Rom. 3:23). Soo tá ndíchi ndákanixi̱nína chika̱a̱nívana ndee̱ ña̱ chinúuna iin yichi̱ va̱ʼa nu̱ú se̱ʼena. Iin ta̱ hermano ta̱ íyo se̱ʼe káchira: “Nda̱a̱ táki̱ʼva íyo iin esponja á ka̱chi̱ saá íyo na̱ va̱lí, saáchi tá chíka̱a̱yó ña̱yóʼo ini ti̱kui̱í ndákoʼo ndiʼiñará, ta ki̱ʼva saá kéʼé na̱ va̱lí chi kéʼéna ndiʼi ña̱ xítona. [...] Tá xíto na̱ va̱lí se̱ʼeyó ña̱ va̱ása kéʼéyó ña̱ sánáʼa̱yóna, nda̱ka̱tu̱ʼunvana miíyó nda̱chun va̱ása kéʼéyóña”. Ña̱kán tá kúni̱yó ña̱ ná kuʼvi̱-ini na̱ va̱lí se̱ʼeyó kunina Jehová, siʼna miíyó xíniñúʼu kuʼvi̱ní-ini kunira ta na̱ʼa̱yóña xíʼin ña̱ kéʼéyó. Ná kotoyó ña̱ káʼa̱n ta̱ Andrew ta̱ kúúmií 17 ku̱i̱ya̱: “Na̱ yivái̱ sa̱náʼa̱na yi̱ʼi̱ ña̱ ndáyáʼviní ka̱ʼi̱n xíʼin Ndióxi̱. Ndiʼi ñuú xi̱keʼé yivái̱ oración xíʼi̱n ni xa̱a̱ ke̱ʼéva miíi̱ oración. Vitin va̱ʼaní kúnii̱ tá káʼi̱n xíʼin Jehová, ta nda̱a̱ táki̱ʼva íyo yivái̱ ta̱ kúʼvi̱ní-ini xíni yi̱ʼi̱ saá íyora”. Ndóʼó na̱ íyo se̱ʼe ndakaʼánndó ña̱ tá ná kuni na̱ va̱lí se̱ʼendó ña̱ kúʼvi̱ní-inindó xínindó Jehová, saátu na̱kán kixáʼana kuʼvi̱ní-inina kuninara. w22.05 28 párr. 7, 8

¿Ndáaña xíniñúʼu keʼún ña̱ va̱ʼa ndakuchiún? Iin ña̱ kivi keʼéyó kúú ña̱ ndandikó-iniyó xa̱ʼa̱ ku̱a̱chi ña̱ ni̱ki̱ʼviyó (Hech. 2:​37, 38). Ta ña̱yóʼo kúni̱ kachiña ña̱ sandákooyó ña̱ va̱ása va̱ʼa kéʼéyó. ¿Á xa̱a̱ nda̱koún kéʼún ña̱ va̱ása kútóo Jehová? Tá kúú ña̱ keʼún ña̱ kini, ña̱ kaʼmiún á ña̱ ka̱ʼún tu̱ʼun kini (1 Cor. 6:​9, 10; 2 Cor. 7:1; Efes. 4:29). Kivi ka̱ʼún xíʼin iin na̱ sánáʼa̱ yóʼó xa̱ʼa̱ tu̱ʼun Ndióxi̱ á iin na̱ anciano ña̱ va̱ʼa chindeétáʼanna xíʼún. Tá iin na̱ va̱lí kúúndó tá ndóokandó xíʼin na̱ yivándó kivi ka̱ʼa̱nndó xíʼinna ña̱ ná chindeétáʼanna xíʼinndó tá íyo ña̱ sási nu̱úndó ña̱ xa̱a̱ndó ndakuchindó. Ta saátu ndáyáʼviní ña̱ ku̱ʼún reunión ta taxiún comentario (Heb. 10:​24, 25). Ña̱kán tá na̱ ka̱ʼa̱nna xíʼún ña̱ xa̱a̱ va̱ʼa kitaún natúʼun xa̱ʼa̱ tu̱ʼun Ndióxi̱, kita ni̱ʼi natúʼun xa̱ʼa̱ra. w23.03 10, 11 párr. 14-16

Nu̱ú Génesis 3:​14, 15 káʼa̱nña xa̱ʼa̱ iin “ko̱o̱”. Su̱ví iin ko̱o̱ kúú tí níka̱ʼa̱n Jehová xíʼin nu̱ú jardín ña̱ Edén, saáchi tá níxi̱yorí iin ko̱o̱, va̱ása kiviví kunda̱a̱-inirí xa̱ʼa̱ ña̱ ni̱ka̱ʼa̱n Jehová. Ña̱kán tu̱ʼun Ndióxi̱ káxiní káʼa̱nña xíʼinyó ndáa na̱ kúú “ko̱o̱ tí nu̱ú” tí káʼa̱n libro ña̱ Apocalipsis 12:9 xa̱ʼa̱, tíyóʼo kúú tí káʼa̱nna xíʼin naní Satanás xíʼin Diablo. Tu̱ʼun Ndióxi̱ káʼa̱nña xa̱ʼa̱ na̱ kúú se̱ʼe tí ko̱o̱, ta na̱yóʼo kúú na̱ ta̱chí ndi̱va̱ʼa xíʼin na̱ yiví na̱ ndákanixi̱ní nda̱a̱ táki̱ʼva ndákanixi̱ní ta̱ Ndi̱va̱ʼa ta kéʼéna nda̱a̱ táki̱ʼva kéʼéra. Ta kúndasína xínina Jehová ta saátu na̱ ñuura. Na̱ ángel na̱ ndu̱u ta̱chí ndi̱va̱ʼa tá tiempo ta̱ Noé, nda̱koona ndiví ta ki̱xaa̱na nu̱ú ñuʼú yóʼo. Ta ki̱xáʼana kéʼéna nda̱a̱ táki̱ʼva kéʼé ta̱ Ndi̱va̱ʼa ta saátu kininí kéʼé na̱ yiví na̱ kítáʼan xíʼinra nda̱a̱ tiempo vitin (Gén. 6:​1, 2; Juan 8:44; 1 Juan 5:19; Jud. 6). w22.07 14, 15 párr. 4, 5

Ta̱ apóstol Pablo xi̱kuʼvi̱ní-inira xi̱xinira na̱ hermano. Ta xa̱ʼa̱ ña̱ ni̱ya̱ʼara nu̱ú ku̱a̱ʼání tu̱ndóʼo ña̱ yo̱ʼvi̱ní, va̱ʼaní xi̱kunda̱a̱-inira xíʼin ña̱ xi̱ndoʼo na̱ hermano tá xi̱yaʼana nu̱ú tu̱ndóʼo. Ta xi̱kundáʼviní-inira xi̱xinira na̱yóʼo. Iin yichi̱ ndi̱ʼi xu̱ʼún ndaʼa̱ra, xa̱ʼa̱ ña̱kán ka̱chíñura ña̱ va̱ʼa ni̱ʼíra xu̱ʼún kuniñúʼura ta saátu ña̱ kuniñúʼu na̱ xi̱kitáʼan xíʼinra (Hech. 20:34). Tá ni̱xa̱a̱ra ñuu Corinto, ka̱chíñura xíʼin ta̱ Áquila xíʼin ñá Priscila, saáchi inkáchi chiñu xi̱kuumiína. Soo “ndiʼi sábado” xi̱natúʼunra xa̱ʼa̱ Ndióxi̱ xíʼin na̱ judío ta saátu xíʼin na̱ griego. Ta tá ki̱xaa̱ ta̱ Silas xíʼin ta̱ Timoteo, ta̱ Pablo ki̱xáʼara “nátúʼun ni̱ʼira xa̱ʼa̱ tu̱ʼun Ndióxi̱” (Hech. 18:​2-5). Ña̱kán ña̱ xi̱ndayáʼvika nu̱ú ta̱ apóstol Pablo kúú ña̱ kachíñura nu̱ú Ndióxi̱. Xa̱ʼa̱ ña̱kán va̱ʼaní consejo ta̱xira ndaʼa̱ na̱ hermano ña̱ va̱ása taxina kasi ña̱ʼa ña̱ íyo ñuyǐví yóʼo nu̱úna, ni chiñu ña̱ kúúmiína, ña̱ va̱ʼa kachíñuna nu̱ú Ndióxi̱. w22.08 20 párr. 3

Ña̱ kúni̱ Ndióxi̱ keʼéyó tiempo vitin kúú ña̱ natúʼunyó tu̱ʼun va̱ʼa ña̱ káʼa̱n xa̱ʼa̱ Reinora iníísaá ñuyǐví (1 Tim. 2:​3, 4). Chiñu mií Jehová kúú ña̱yóʼo, ta xa̱ʼa̱ ña̱ ndáyáʼviníña nda̱kaxinra se̱ʼera ta̱ kúʼvi̱ní-inira xínira ña̱ kiʼinra kuenta xíʼinña. Ta xa̱ʼa̱ ña̱ kíʼin ta̱ Jesús kuenta xíʼin ña̱ predicación, kivi kandíxayó ña̱ tá ná kixaa̱ ña̱ Armagedón kusi̱íníva-ini Jehová xíʼin ndiʼi chiñu yóʼo (Mat. 24:14). ¿Nda̱chun va̱ʼa xíni̱yó ña̱yóʼo? Tá si̱lóʼo kúma̱ní ku̱ʼu̱n ta̱ Jesús chí ndiví, nda̱kutáʼanra xíʼin sava na̱ discípulora iin yuku̱ chí Galilea ta ni̱ka̱ʼa̱nra xíʼinna: “Ndióxi̱ ta̱xi chiñu ndaʼíi̱ ña̱ kiʼi̱n kuenta xíʼin ndiʼi ña̱ʼa ña̱ íyo chí ndiví xíʼin ña̱ íyo nu̱ú ñuʼú yóʼo”. Ta saátu ni̱ka̱ʼa̱nkara ña̱yóʼo: “Kúáʼanndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna ña̱ ná kundiku̱nna yi̱ʼi̱” (Mat. 28:​18, 19). Xíʼin ña̱yóʼo kúnda̱a̱-iniyó ña̱ mií ta̱ Jesús kúú ta̱ kíʼin kuenta xíʼin ña̱ predicación nda̱a̱ tiempo vitin. w22.07 8 párr. 1, 3; 9 párr. 4

Na̱ ke̱ʼé ña̱ va̱ʼa tá kúma̱níka kuvina, ndatakuna ta kixi ki̱vi̱na nu̱ú libro nu̱ú va̱xi ki̱vi̱ na̱ kutaku. Ña̱kán, “na̱ ke̱ʼé ña̱ va̱ʼa” na̱ káʼa̱n Juan 5:29 xa̱ʼa̱, iin kúúna xíʼin na̱ káʼa̱n Hechos 24:15 xa̱ʼa̱. Saáchi Romanos 6:7 káchiña: “Na̱ xa̱a̱ ni̱xi̱ʼi̱ xa̱a̱ ndo̱ova ku̱a̱china”. Ña̱kán tá iin na̱ ke̱ʼé ña̱ va̱ʼa ni̱xi̱ʼi̱na, xa̱a̱ ndo̱ova ku̱a̱china nu̱ú Jehová. Soo va̱ása nandósó-inira xa̱ʼa̱ ndiʼi chiñu ña̱ va̱ʼa ña̱ ke̱ʼéna nu̱úra (Heb. 6:10). Soo ni saá, xíniñúʼu ndakundeéna nda̱kú koo inina xíʼin Ndióxi̱ ña̱ va̱ása ndoo ki̱vi̱na nu̱ú libro nu̱ú va̱xi ki̱vi̱ na̱ kutaku. w22.09 18 párr. 13, 15

Va̱ʼaní yichi̱ sa̱ndákoo ta̱ profeta Daniel nu̱úyó. Tá nda̱kiʼinnara ku̱a̱ʼa̱nra chí Babilonia, kán ni̱na̱ʼa̱ra ña̱ kivi kandíxa inkanara. Ta va̱ʼaníka ni̱xa̱a̱ na̱ yiví ka̱ndíxanara tá chi̱ndeétáʼan Jehová xíʼinra ña̱ ka̱ʼa̱nra xa̱ʼa̱ xa̱ni ta̱ rey Nabucodonosor (Dan. 4:​20-22, 25). Tá ni̱ya̱ʼa ku̱a̱ʼá ku̱i̱ya̱ saá ni̱na̱ʼa̱ tuku ta̱ Daniel ña̱ kivi kandíxa inkanara, saáchi ni̱ka̱ʼa̱nra xíʼinna ndáaña kúni̱ kachi tu̱ʼun ña̱ ka̱na kándíka veʼe nu̱ú ni̱xi̱yo ta̱ rey ña̱ ñuu Babilonia (Dan. 5:​5, 25-29). Tá ni̱ya̱ʼa loʼoka tiempo, ta̱ Darío xíʼin na̱ xi̱kitáʼan xíʼinra ki̱ʼinna kuenta ña̱ ta̱ Daniel xi̱kuura iin ta̱a ta̱ ndíchiní. Xi̱kandíxanínara saáchi nda̱kúní xi̱keʼéra ndiʼi chiñu (Dan. 6:​3, 4). Ná ndakanixi̱níyó xa̱ʼa̱ ña̱yóʼo: “¿Á ndáa-ini inkana yi̱ʼi̱ chi sáxi̱nui̱ ña̱ káʼi̱n?”. Tá ndáa-ini inkana miíyó, saá kúú ña̱ káʼa̱n va̱ʼana xa̱ʼa̱ Jehová. w22.09 8, 9 párr. 2-4

Tá kándíxayó ña̱ káʼa̱n Jehová xíʼinyó xa̱ʼa̱ ña̱ va̱ʼa á xa̱ʼa̱ ña̱ va̱ása va̱ʼa, ku̱a̱ʼání ña̱ va̱ʼa ndákiʼinyó. Ná ndakanixi̱níyó xa̱ʼa̱ ña̱yóʼo, ¿Ndáaña kuu ti̱xin iin hospital tá na̱ médico ná ixatátanna na̱ yiví nda̱a̱ táki̱ʼva kúni̱ miína, ta va̱ása kundiku̱nna ña̱ káʼa̱n xíʼinna ndáa ki̱ʼva keʼéna iin chiñu? Sana kuviva sava na̱ yiví yóʼo tá saá ná keʼé na̱ médico. Ña̱kán ndáyáʼviní kundiku̱nyó ña̱ káʼa̱n ndáa ki̱ʼva keʼéyó iin chiñu. Ta ki̱ʼva saá íyo ña̱ káʼa̱n Ndióxi̱ xíʼinyó, tá va̱ʼaní ná kundiku̱nyóña va̱ʼaní chindeétáʼanña xíʼinyó. Ku̱a̱ʼání ña̱ va̱ʼa táxi Jehová ndaʼa̱ na̱ ndíku̱n ña̱ káʼa̱nra. Ña̱yóʼo káʼa̱nra keʼéra xa̱ʼa̱na: “Na̱ yiví va̱ʼa kúú na̱ koo nu̱ú ñuʼú, ta ndiʼi tiempo kundoona nu̱úña” (Sal. 37:29). ¿Á xa̱a̱ ndákanixi̱níún ndáa ki̱ʼva kooyó tá ndiʼi na̱ yiví ná kundiku̱n ña̱ káʼa̱n Jehová? Si̱íníva kooyó ta kǒoka ña̱ sandíʼi-iniyó ta viíní kutáʼanyó. Ta Jehová kúni̱ra ná ndakiʼún ndiʼi bendición yóʼo. Ña̱kán ndáyáʼviní kuʼvi̱-iniyó kuniyó ña̱ va̱ʼa. w22.08 27, 28 párr. 6-8

Tá yá’ayó nu̱ú iin tu̱ndóʼo ña̱ ndeéní, ña̱yóʼo kivi ixayo̱ʼvi̱ña xíʼinyó ña̱ nda̱kúní koo iniyó xíʼin Jehová ta saátu xíʼin na̱ ñuura. ¿Ndáaña kivi chindeétáʼan xíʼinyó ña̱ nda̱kú koo iniyó? Ña̱ viíní ndakanixi̱níyó, ña̱ kundito va̱ʼa nu̱úyó xíʼin ña̱ kándíxaníyó Jehová. ¿Ndáaña keʼéyó ña̱ viíní ndakanixi̱níyó? Ná kǒo kundi̱ʼi̱ní-iniyó ta ná chika̱a̱níyó ndee̱ ña̱ ndakanixi̱níyó nda̱a̱ táki̱ʼva ndákanixi̱ní Jehová. Chi tá saá ná keʼéyó, va̱ása ndakavaní-iniyó xíʼin ña̱ ndóʼoyó. Sana iin na̱ hermano ke̱ʼéna iin ña̱ va̱ása va̱ʼa xíʼún ta na̱yóʼo kúúmiína iin chiñu káʼnu ti̱xin ñuu Ndióxi̱. Sana na̱ hermano yóʼo kǒo níkuni̱vína keʼéna ña̱ va̱ása va̱ʼa xíʼún (Rom. 3:23; Sant. 3:2). Soo ni saá ni̱xo̱ʼvi̱ní-iniún xíʼin ña̱ ke̱ʼéna. Sana nda̱kaniníxi̱níún xa̱ʼa̱ ña̱yóʼo: “Tá iin na̱ hermano kéʼéna saá, ¿á ndixa ñuu Ndióxi̱ kúú ña̱yóʼo?”. Saá kúni̱ ta̱ Ndi̱va̱ʼa ná ndakanixi̱níún (2 Cor. 2:11). Chi tásaá ná ndakanixi̱níyó kivi kuxíkáyó nu̱ú Jehová ta saátu nu̱ú na̱ ñuura. w22.11 20 párr. 1, 3; 21 párr. 4

Jehová káʼa̱nra taxira ña̱ kutakuyó ndiʼi tiempo. Sava na̱ ndásakáʼnu miíra koona chi ndiví (1 Cor. 15:​50, 53). Soo ku̱a̱ʼáníyó ndátu koo ndiʼi tiempo nu̱ú ñuʼú yóʼo ta kǒoka kue̱ʼe̱ kuumiíyó (Apoc. 21:​3, 4). Ni kúúyó na̱ kundoo nu̱ú ñuʼú yóʼo á na̱ ku̱ʼu̱n chí ndiví, ndiʼiyó chíndayáʼviníyó ña̱ káʼa̱n Jehová keʼéra xa̱ʼa̱yó. Ta kándíxaníyó ña̱ xi̱nuña saáchi mií Jehová káʼa̱nña (Rom. 15:13). Kúnda̱a̱-iniyó xa̱ʼa̱ ndiʼi ña̱ káʼa̱nra taxira ndaʼa̱yó chí nu̱únínu ta kúnda̱a̱-iniyó ña̱ ndiʼi tiempo sáxi̱nura ña̱ káʼa̱nra (Núm. 23:19). Ña̱kán kándíxaníyó ña̱ káʼa̱n Jehová keʼéra xa̱ʼa̱yó ta kuchiñuvara keʼéraña. Yiváyó Jehová kúʼvi̱ní-inira xínira miíyó ta kúni̱ra ná kandíxayó ña̱ káʼa̱nra Tá kándíxaníyó ña̱ káʼa̱n Jehová keʼéra chí nu̱únínu, saá kuchiñuyó ya̱ʼayó nu̱ú ña̱ íxayo̱ʼvi̱ xíʼinyó ta kusi̱í-iniyó kundatuyó ña̱ káʼa̱nra keʼéra. w22.10 24 párr. 1-3

Xa̱ʼa̱ ña̱ so̱ʼoní na̱ judío, ta̱ Isaías ni̱ka̱ʼa̱nra ña̱ taxi Jehová kundoʼona iin tu̱ndóʼo ña̱ káʼnuní (Is. 30:​5, 17; Jer. 25:​8-11). Tasaá ku̱uva, na̱ ñuu Babilonia ti̱inna na̱yóʼo ku̱a̱ʼa̱n xíʼinna ñuuna. Soo saátu ni̱xi̱yo sava na̱ judío na̱ nda̱kúní ni̱xi̱yo-ini xíʼin Ndióxi̱, ta ta̱ profeta Isaías ni̱ka̱ʼa̱nra ndáaña keʼé Jehová xíʼinna: kixaa̱ iin ki̱vi̱ ña̱ taxi Jehová ndikó na̱yóʼo ñuu Jerusalén (Is. 30:​18, 19). Ta ni̱xi̱nuva ña̱ ni̱ka̱ʼa̱n Jehová. Saáchi nda̱tavára na̱yóʼo ñuu Babilonia, soo su̱ví ndi̱ku̱n kama níkeʼéra ña̱yóʼo. Tá káʼa̱n Biblia “Jehová ndátura ña̱ na̱ʼa̱ra ña̱ va̱ʼa-inira xíʼinndó”, ña̱yóʼo kúni̱ kachiña ña̱ xi̱niñúʼu ya̱ʼa ku̱a̱ʼá tiempo tasaá sa̱ñá na̱ judío nu̱ú na̱ ñuu Babilonia. Ta ni̱ya̱ʼa 70 ku̱i̱ya̱ saá ta̱xi Jehová ña̱ ndandikó sava na̱ judío ñuu Jerusalén (Is. 10:21; Jer. 29:10). Tá ni̱xi̱yo na̱ judío ñuu Babilonia ku̱suchíní-inina, soo ku̱si̱íní-inina tá nda̱ndikóna ñuu Jerusalén ta nda̱a̱ xa̱kuna. w22.11 9 párr. 4

Ku̱a̱ʼání na̱ hermano na̱ ndóo tiempo vitin ndóʼona nda̱a̱ táki̱ʼva ndo̱ʼo na̱ apóstol na̱ ni̱xi̱yo tá siglo nu̱ú, saáchi i̱xandi̱va̱ʼana xíʼinna xa̱ʼa̱ ña̱ na̱túʼunna xa̱ʼa̱ ta̱ Jesús. Ku̱a̱ʼání yichi̱ na̱ su̱tu̱ náʼnu ni̱ka̱ʼa̱nna xíʼin na̱ apóstol “ña̱ ná kǒo ka̱ʼa̱nkana xa̱ʼa̱ ki̱vi̱ ta̱ Jesús” (Hech. 4:​18-20; 5:​27, 28, 40). Soo, na̱yóʼo xi̱kunda̱a̱-inina ña̱ íyo iin ta̱ káʼnuníka ni̱ka̱ʼa̱n xíʼinna ña̱ ná kǒo sandákoona ña̱ natúʼunna xa̱ʼa̱ ta̱ Jesús (Hech. 10:42). Ña̱kán ta̱ Pedro xíʼin ta̱ Juan nda̱kiʼinna tu̱ʼun ndiʼi na̱ apóstol ta ni̱ka̱ʼa̱nna ña̱ kandíxana ña̱ káʼa̱n Jehová nu̱úka ña̱ kandíxana ña̱ káʼa̱n na̱ chíñu, ta saátu ni̱ka̱ʼa̱nna ña̱ va̱ása sandákoona ña̱ natúʼunna xa̱ʼa̱ ta̱ Jesús (Hech. 5:29). Tándi̱ʼi ka̱ni na̱ chíñu na̱ apóstol yóʼo xa̱ʼa̱ ña̱ nda̱kúní ni̱xi̱yo inina xíʼin Ndióxi̱, “kúsi̱íkaví-inina ku̱a̱ʼa̱nna saáchi ta̱xi Ndióxi̱ ña̱ kundoʼona ña̱ kaʼan nu̱ú xa̱ʼa̱ ki̱vi̱ ta̱ Jesús” ta ni ndo̱ʼona ña̱yóʼo kǒo nísandákoona ña̱ natúʼunna xa̱ʼa̱ ta̱ Jesús (Hech. 5:​41, 42). w22.10 12, 13 párr. 2-4

Tá kíxáʼayó sákuaʼayó xa̱ʼa̱ Jehová kíxáʼayó sákuaʼayó xa̱ʼa̱ ña̱ʼa ña̱ va̱ása yo̱ʼvi̱. Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n ndaʼa̱ na̱ hebreo, ni̱ka̱ʼa̱nra xa̱ʼa̱ ña̱yóʼo ña̱ íyoña nda̱a̱ táki̱ʼva íyo leche tá xíʼi na̱ va̱lí. Soo su̱ví xíʼin ña̱yóʼo níkuni̱ kachira ña̱ va̱ása ndáyáʼvi ña̱ʼa ña̱ kíxáʼayó sákuaʼayó xa̱ʼa̱ Ndióxi̱ (Heb. 5:12; 6:1). Chi ni̱ka̱ʼa̱nra xíʼin na̱ cristiano ña̱ ná chika̱a̱na ndee̱ ña̱ sakúaʼana xa̱ʼa̱ ndiʼi ña̱ʼa ña̱ ndáyáʼvi ña̱ va̱xi nu̱ú tu̱ʼun Ndióxi̱. ¿Á kúni̱ún sakúaʼún xa̱ʼa̱ ña̱ nda̱a̱ ña̱ va̱xi nu̱ú tu̱ʼun Ndióxi̱? ¿Á chíka̱a̱-iniún ña̱ ndakundeún sakúaʼún xa̱ʼa̱ Jehová xíʼin xa̱ʼa̱ ña̱ káʼa̱nra keʼéra chí nu̱únínu. Savana íxayo̱ʼvi̱níña xíʼinna ña̱ kaʼvina. Ta miíún, ¿á íxayo̱ʼvi̱ña xíʼún? ¿Á sa̱náʼa̱na yóʼó kaʼviún ti̱xin escuela? ¿Á xi̱kutóún keʼún ña̱yóʼo? ¿Á i̱xayo̱ʼvi̱vaña xíʼún? Tá saá ndo̱ʼún kǒo kundi̱ʼi̱-iniún chi íyo Jehová ña̱ chindeétáʼanra xíʼún. Ta̱kán kúú iin ta̱ va̱ʼaníka sanáʼa̱ miíyó. w23.03 9 párr. 8-10

Tá vitá ná koo iniyó saá kúú ña̱ taxiyó ña̱ kútu̱ní ná ki̱ʼvi tu̱ʼun Ndióxi̱ níma̱yó. Tá káʼviyó tu̱ʼun Ndióxi̱ ná va̱ása ni̱nu kuniyó ta ná va̱ása ka̱ʼa̱nyó xa̱ʼa̱ ña̱ va̱ása va̱ʼa kéʼé inkana, chi saá kúú ña̱ ndixaní kundáʼvi-iniyó kuniyó inkana ta kuʼvi̱-iniyó kuniyóna. Ki̱ʼva ña̱ kéʼéyó xíʼin inkana náʼa̱ña á ndixa kéʼéyó ña̱ va̱xi nu̱ú tu̱ʼun Ndióxi̱. Xa̱ʼa̱ ña̱ va̱ása níxi̱keʼé na̱ fariseo ña̱ káʼa̱n tu̱ʼun Ndióxi̱, xi̱chi̱kaa̱na ku̱a̱chi síkí inkana (Mat. 12:7). Ña̱kán ná kotoyó ndáa ki̱ʼva ndákanixi̱níyó á kéʼéyó xíʼin inkana. ¿Á kúúmiíyó costumbre ña̱ ka̱ʼa̱n va̱ʼayó xa̱ʼa̱ inkana? ¿Á nina ña̱ va̱ása va̱ʼa káʼa̱nyó xa̱ʼa̱ná? ¿Á ndiʼi tiempo ndákaʼányó xa̱ʼa̱ ña̱ ke̱ʼéna xíʼinyó? ¿Á íxakáʼnu-iniyó xa̱ʼa̱na? Ki̱ʼva ña̱ ndakuiinyó pregunta yóʼo na̱ʼa̱ña á táxiyó ña̱ nasama Biblia ña̱ ndákanixi̱níyó, ña̱ ndóʼoyó xíʼin ña̱ kéʼéyó (1 Tim. 4:​12, 15; Heb. 4:12). w23.02 12 párr. 13, 14

Ná ndakanixi̱níyó xa̱ʼa̱ ta̱ José ta̱ ni̱xi̱yo chí ñuu Arimatea, xi̱ ixato̱ʼóní na̱ judío ta̱kán. Ta̱yóʼo táʼan na̱ Sanedrín xi̱kuura. Soo tá xa̱ʼa̱ xi̱yiʼvíníra. Ta̱ Juan ni̱ka̱ʼa̱nra ña̱ “ta̱yóʼo xi̱kuura discípulo ta̱ Jesús, soo xa̱ʼa̱ ña̱ xi̱yi̱ʼvíra xi̱xinira na̱ judío kǒo níka̱ʼa̱nra xíʼin ni iinna xa̱ʼa̱ ña̱yóʼo” (Juan 19:38). Ni xi̱kutóovara sakúaʼara ña̱ káʼa̱n xa̱ʼa̱ Reino Ndióxi̱, soo va̱ása nína̱ʼa̱ túvira ña̱ kándíxara ta̱ Jesús. Sana xi̱yiʼvíra ña̱ va̱ása ixato̱ʼókanara. Soo Biblia káʼa̱nña xíʼinyó ña̱ tá xa̱a̱ ni̱xi̱ʼi̱ ta̱ Jesús, ta̱ José “i̱xandakú-inira ta ni̱xa̱ʼa̱nra nu̱ú ta̱ Pilato ta ni̱ka̱ʼa̱nra xíʼinra ña̱ ná taxira ña̱ sandúxu̱nra ta̱ Jesús” (Mar. 15:​42, 43). Ta̱yóʼo va̱ása níchise̱ékara ña̱ kúúra discípulo ta̱ Jesús. ¿Á yíʼviún nda̱a̱ táki̱ʼva ndo̱ʼo ta̱ José ta̱ ñuu Arimatea? w23.01 30 párr. 13, 14

Tá xi̱xaʼndachíñu ta̱ Salomón, na̱ ñuu Israel va̱ʼaní xi̱ndoona ta kǒo ña̱ʼa níxi̱kuma̱ní nu̱úna, ta nda̱a̱ ñá reina ña̱ ñuu Saba ni̱xa̱a̱ ku̱ndaa̱-ini xa̱ʼa̱ ña̱yóʼo. Ta ñáyóʼo xíkaní ke̱eñá ta ni̱xa̱a̱ñá nda̱a̱ ñuu Jerusalén ña̱ va̱ʼa kuni nu̱úñá ta̱ Salomón (1 Rey. 10:1). Tándi̱ʼi xi̱ni nu̱úñá ndáa ki̱ʼva xi̱xaʼndachíñu ta̱ rey Salomón nda̱kanda̱ní-iniñá. Soo ki̱ʼva ña̱ xa̱ʼndachíñu ta̱ Salomón náʼa̱ña nu̱úyó ndáaña keʼé Jehová xa̱ʼa̱ na̱ yiví tá ná kaʼndachíñu se̱ʼera ta̱ Jesús nu̱ú ñuʼú yóʼo. Ta̱ Jesús ndáyáʼvikara nu̱ú ta̱ Salomón xíʼin ndiʼi ña̱ kéʼéra. Ta̱ Salomón iin ta̱ ku̱a̱chi xi̱kuura. Soo ta̱ Jesús xa̱ʼa̱ ña̱ kǒo ku̱a̱chi kúúmiíra va̱ʼaní xáʼndachíñura ta ndiʼi ña̱ kéʼéra va̱ʼaní kánaña (Luc. 1:32; Heb. 4:​14, 15). Ta̱ Cristo xa̱a̱ ni̱na̱ʼa̱ra nu̱úyó xíʼin ña̱ ke̱ʼéra ña̱ nda̱a̱ ni iin yichi̱ va̱ása ki̱ʼvira ku̱a̱chi ta ni va̱ása keʼéra nda̱a̱ ni iin ña̱ʼa ña̱ kivi saxóʼvi̱ na̱ kaʼndachíñura nu̱ú. ¿Á su̱ví kúsi̱íní-iniyó ña̱ koora Rey nu̱úyó? w22.12 11 párr. 9, 10

¿Ndáaña keʼéyó tá íyo iin kue̱ʼe̱ xíkun nu̱ú ndóoyó? Xíniñúʼu kuniso̱ʼoyó ña̱ káʼa̱n na̱ chíñu xíʼinyó. Tá kúú, xíniñúʼu ndaʼáyó ti̱kui̱í, koo xíkayó nu̱ú táʼanyó, kuniñúʼuyó cubreboca xíʼin ña̱ kooyó cuarentena (ña̱yóʼo kúni̱ kachiña ña̱ ndakasiyó miíyó ti̱xin veʼeyó). Tá kéʼéyó ndiʼi ña̱yóʼo náʼa̱yó ña̱ chíndayáʼviníyó ña̱ tákuyó. Tá kúu iin tu̱ndóʼo ku̱a̱ʼání ña̱ʼa kivi ka̱ʼa̱nna xíʼinyó á kivitu kuniso̱ʼoyó noticia ta sava ña̱yóʼo ña̱ vatáva kúúña. Nu̱úka ña̱ kuniso̱ʼoyó ña̱ káʼa̱n na̱yóʼo, va̱ʼaka ná kuniso̱ʼoyó ña̱ káʼa̱n na̱ chíñu á na̱ doctor na̱ xíni̱ xa̱ʼa̱ ña̱yóʼo (Prov. 14:15). Iin ña̱ va̱ʼaní keʼéyó kúú ña̱ kuniso̱ʼoyó ña̱ káʼa̱n na̱ Cuerpo Gobernante xíʼinyó ta saátu na̱ Betel, chi na̱yóʼo chíka̱a̱nína ndee̱ ña̱ siʼna nandukúna xa̱ʼa̱ ña̱ kúu ta saáví ka̱ʼa̱nna xíʼinyó ndáa ki̱ʼva ku̱ʼu̱nyó reunión á ku̱ʼu̱nyó natúʼunyó xa̱ʼa̱ Ndióxi̱. Ña̱ va̱ʼa miívayó kúúña tá ná kuniso̱ʼoyó ña̱ káʼa̱nna xíʼinyó ta saátu chindeétáʼanyó xíʼin inkana ña̱ ná kǒo ña̱ kundoʼona. Tá xíto inkana ña̱ kéʼéyó, sana nda̱a̱ ka̱ʼa̱n va̱ʼana xa̱ʼa̱ miíyó na̱ testigo Jehová (1 Ped. 2:12). w23.02 23 párr. 11, 12

Tá ni̱ki̱ʼvi na̱ ñuu Israel nu̱ú ñuʼú ña̱ ni̱ka̱ʼa̱n Ndióxi̱ taxira ndaʼa̱na, xa̱a̱ síín síín lugar ni̱xi̱yona. Savana xi̱kuumiína chiñu ña̱ xi̱tiinna ti̱a̱ká, savana xi̱ndaana kití ta savana xi̱chiʼina ña̱ʼa. Ña̱kán na̱ ñuu Israel kivi nandósóna xa̱ʼa̱ táʼanna xa̱ʼa̱ ña̱ xíkaní xi̱ndoona. Soo Jehová ni̱ka̱ʼa̱nra xíʼin na̱ ñuura ña̱ ná ndakutáʼan ni̱ʼina ña̱ va̱ʼa kuniso̱ʼona tu̱ʼunra ta sakúaʼana xa̱ʼa̱ña (Deut. 31:​10-12; Neh. 8:​2, 8, 18). Ná ndakanixi̱níyó ndáa ki̱ʼva xi̱ndoʼo na̱yóʼo tá xi̱xaa̱na ñuu Jerusalén ta xi̱ndakutáʼanna xíʼin ku̱a̱ʼáníka na̱ Israel na̱ ke̱e inka ñuu, sana xi̱kusi̱íníva-inina. Tá siglo nu̱ú, ti̱xin ña̱ congregación xi̱ñuʼu ta̱a xíʼin ná ñaʼá na̱ xa̱a̱ síín ñuu, na̱ xa̱a̱ síín chiñu xi̱kuumií, ni̱xi̱yo na̱ nda̱ʼví xíʼin na̱ ku̱i̱ká ta saátu na̱ xi̱ka̱ʼa̱n inka tu̱ʼun. Ta na̱ sa̱kán xi̱kiʼvi ti̱xin congregación va̱ʼava xi̱xaa̱na xi̱kunda̱a̱-inina xa̱ʼa̱ tu̱ʼun Ndióxi̱ xa̱ʼa̱ ña̱ inkáchi xi̱ndakutáʼan ndiʼina ta saátu xa̱ʼa̱ ña̱ xi̱chindeétáʼan inkana xíʼinna ña̱ ndakanina nu̱úna xa̱ʼa̱ ña̱ káʼa̱nña (Hech. 2:42; 8:​30, 31). w23.02 3 párr. 7

Jehová káʼa̱nra xíʼin na̱ xíniso̱ʼo ña̱ káʼa̱nra ña̱ kutakuna ndiʼi tiempo (Rom. 6:23). Tá ndákanixi̱níyó xa̱ʼa̱ ña̱yóʼo xáa̱yó kúʼvi̱níka-iniyó xíniyóra. Ná ndakanixi̱níyó xa̱ʼa̱ ña̱yóʼo: Jehová kúʼvi̱-inira xínira miíyó ña̱kán kúni̱ra ña̱ ná kutakuyó ndiʼi tiempo ta nda̱a̱ ni iin yichi̱ ná kǒo kuxíkáyó nu̱úra. Ña̱ káʼa̱n Ndióxi̱ taxira kutakuyó ndiʼi tiempo chíndeétáʼanña xíʼinyó ña̱ kundeé-iniyó tá yáʼayó nu̱ú tu̱ndóʼo. ¿Nda̱chun? Saáchi tá nda̱kú íyo iniyó xíʼin Ndióxi̱ nda̱a̱ ná kuviyó, ta̱kán káʼa̱nra ña̱ sandátakura miíyó ta kivi kutakuyó ndiʼi tiempo (Juan 5:​28, 29; 1 Cor. 15:​55-58; Heb. 2:15). Kúnda̱a̱-iniyó ña̱ kivi taxi Jehová ña̱ kutakuyó ndiʼi tiempo saáchi miíra kúú ta̱ táxi ña̱ tákuyó ta íyora ndiʼi tiempo (Sal. 36:9). Biblia káʼa̱nña xa̱ʼa̱ Jehová, ña̱ xa̱a̱ íyora tiempo xi̱naʼá ta saátu koora ndiʼi tiempo (Sal. 90:2; 102:​12, 24, 27). w22.12 2 párr. 1-3

Miíyó na̱ ndásakáʼnu Jehová va̱ása ndákanda̱-iniyó tá yáʼayó nu̱ú iin tu̱ndóʼo. Chi kúnda̱a̱-iniyó ña̱ káʼa̱n Biblia: “Xíniñúʼu ya̱ʼayó nu̱ú ku̱a̱ʼání tu̱ndóʼo ña̱ va̱ʼa ki̱ʼviyó ti̱xin Reino Ndióxi̱” (Hech. 14:22). Kúnda̱a̱-iniyó ña̱ nu̱ú ñuyǐví xa̱áví kúú ña̱ ndiʼi va̱ʼa tu̱ndóʼo nu̱úyó, saáchi kán va̱ása kuvikayó, ni va̱ása kusuchíka-iniyó, ni va̱ása kuakukayó, ni va̱ása xo̱ʼvi̱kayó (Apoc. 21:4). Jehová va̱ása sáku̱taʼavíra tu̱ndóʼo nu̱úyó, soo táxivara ndee̱ ndaʼa̱yó ña̱ kundeé-iniyó ya̱ʼayó nu̱úña. Ná kotoyó ña̱ ni̱ka̱ʼa̱n ta̱ apóstol Pablo xíʼin na̱ cristiano na̱ xi̱ndoo ñuu Roma. Tándi̱ʼi ni̱ka̱ʼa̱nra xa̱ʼa̱ tu̱ndóʼo ña̱ ku̱a̱yaʼa na̱ hermano nu̱ú ta saátu miíra, ña̱yóʼo ka̱ʼyíra nu̱úna: “Tíxa̱ʼvi ta̱ ni̱kuʼvi̱-ini xi̱ni miíyó chi ta̱yóʼo kúú ta̱ chindeétáʼan xíʼinyó ña̱ kuchiñuyó ya̱ʼayó nu̱ú ndiʼi ña̱yóʼo” (Rom. 8:​36, 37). Ña̱yóʼo kúni̱ kachiña ña̱ kivi chindeétáʼan Jehová xíʼinyó ña̱ va̱ʼa kana ña̱ kúni̱yó keʼéyó ni ku̱a̱yaʼayó nu̱ú tu̱ndóʼo. w23.01 14 párr. 1, 2