Diciembre

¿Á xa̱a̱ ni̱xi̱yo tu̱ʼva ta̱ etíope yóʼo ña̱ ndakuchira? Ta̱yóʼo ni̱xa̱ʼa̱nra Jerusalén ña̱ va̱ʼa ndasakáʼnura Ndióxi̱ (Hech. 8:​27). Ni̱xa̱a̱ra ka̱ndíxara ña̱ kándíxa na̱ judío. Ta xi̱xini̱ra ña̱ káʼa̱n Escrituras Hebreas ta nu̱ú ña̱yóʼo sa̱kuaʼara xa̱ʼa̱ Jehová, soo ta̱yóʼo xi̱kuni̱ra kunda̱a̱ka-inira. Tá nda̱ni̱ʼí ta̱ Felipe ta̱yóʼo chí yichi̱, rollo ña̱ ka̱ʼyí ta̱ profeta Isaías kúú ña̱ káʼvira (Hech. 8:​28). Ta̱yóʼo xi̱kuni̱kara kunda̱a̱-inira xa̱ʼa̱ Ndióxi̱. Ta̱yóʼo ke̱era ñuu Etiopía ta ni̱xa̱a̱ra ñuu Jerusalén ña̱ va̱ʼa ndasakáʼnura Jehová. Ta̱ Felipe ni̱ka̱ʼa̱nra xíʼin ta̱ ñuu Etiopía xa̱ʼa̱ ña̱ʼa ña̱ ndáyáʼviní ña̱ kǒo xíni̱ra xa̱ʼa̱. Tá kúú, ña̱ kúú ta̱ Jesús ta̱ Mesías (Hech. 8:​34, 35). Soo xa̱ʼa̱ ña̱ ni̱xa̱a̱ra ni̱kuʼvi̱ka-inira xi̱nira Jehová xíʼin ta̱ Jesús, ña̱yóʼo chi̱ndeétáʼan xíʼinra ña̱ ni̱xa̱a̱ra nda̱kuchira ta nda̱kundiku̱nra ta̱ Jesús. Ña̱kán ta̱ Felipe xi̱nira ña̱ xa̱a̱ íyo tu̱ʼva ta̱ ta̱a kán ta sa̱ndákuchirara. w23.03 8, 9 párr. 3-6

Ndiʼi yichi̱ ka̱ʼún ña̱ nda̱a̱. Tá ná va̱ása keʼéyó ña̱yóʼo, Jehová va̱ása kusi̱í-inira xíʼinyó (Prov. 6:​16, 17). Nu̱ú na̱ ñuyǐví su̱ví iin ku̱a̱chiví kúúña ka̱ʼa̱nna ña̱ vatá, soo miíyó kúni̱yó ndakanixi̱níyó nda̱a̱ táki̱ʼva ndákanixi̱ní Jehová (Sal. 15:​1, 2). Xa̱a̱ kúnda̱a̱va-iniyó ña̱ va̱ása va̱ʼa sandáʼviyó inkana, soo saátu va̱ása va̱ʼa chise̱ʼé yuʼúyó xa̱ʼa̱ iin ña̱ʼa, ña̱ va̱ʼa ná kandíxana ndiʼi ña̱ káʼa̱nyó. Saatu, va̱ása xíniñú’u kakaún natúʼún xa̱ʼa̱ inkana (Prov. 25:​23; 2 Tes. 3:​11). Tá xítoún ña̱ iinna kíxáʼana nátúʼunna xa̱ʼa̱ inkana, ndi̱ku̱n kixáʼún natúʼún xíʼinna xa̱ʼa̱ inka ña̱ʼa, ta iin ña̱ va̱ʼa ná koo ña̱yóʼo. Tiempo vitin, ku̱a̱ʼání na̱ yiví va̱ása kíʼinna kuenta xíʼin tu̱ʼun ña̱ káʼa̱nna. Ña̱kán, xíniñúʼu chika̱a̱níyó ndee̱ ña̱ viíní ka̱ʼa̱nyó nda̱a̱ táki̱ʼva kúni̱ mií Jehová. Tá ná chika̱a̱yó ndee̱ ña̱ ndasakáʼnuyó Jehová xíʼin ña̱ káʼa̱nyó tá nátúʼunyó xíʼin na̱ yiví xa̱ʼa̱ra, tá ku̱a̱ʼa̱nyó reunión á tá nátúʼunyó xíʼin inkana, ta̱yóʼo taxivara ku̱a̱ʼání ña̱ va̱ʼa ndaʼa̱yó. Tá ná sandíʼi-xa̱ʼa̱ Jehová ñuyǐví ta̱ Ndi̱va̱ʼa yóʼo, va̱ása ixayo̱ʼvi̱níkavíña xíʼinyó ndasakáʼnuyóra xíʼin tu̱ʼun ña̱ káʼa̱nyó (Jud. 15). w22.04 9 párr. 18-​20

Tá ndákanixi̱níyó ña̱ kúʼvi̱ní-ini Jehová xíʼin ta̱ Jesús xínina miíyó, saátu miíyó kúni̱yó kuʼvi̱níka-iniyó kuniyóna (1 Juan 4:​10). Ta kúʼvi̱níka-iniyó xíniyóna tá kúnda̱a̱-iniyó ña̱ ni̱xi̱ʼi̱ ta̱ Jesús xa̱ʼa̱ iin tá iinyó. Saá ke̱ʼé ta̱ apóstol Pablo, ta̱xiníra tíxa̱ʼvi xa̱ʼa̱ ña̱ ke̱ʼé ta̱ Jesús. Xa̱ʼa̱ ña̱kán nu̱ú carta ña̱ ka̱ʼyíra ka̱chira: “Se̱ʼe Ndióxi̱ [...] ni̱kuʼvi̱ní-ini xi̱ni yi̱ʼi̱ ta ni̱xi̱ʼi̱ra xa̱ʼíi̱” (Gál. 2:​20). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, kivi xa̱a̱yó kutáʼan viíyó xíʼin Jehová (Juan 6:​44). Ndákanda̱ní-iniyó xa̱ʼa̱ ña̱ yaʼviní cha̱ʼvi Jehová ña̱ va̱ʼa kutáʼanra xíʼinyó, ¿á su̱ví saá? Xa̱ʼa̱ ña̱kán kúʼvi̱ní-iniyó xíniyó Jehová xíʼin ta̱ Jesús. Ta ndiʼiyó kivi ndakanixi̱níyó xa̱ʼa̱ ña̱yóʼo: “Tá kúʼvi̱-inii̱ xínii̱ Jehová xíʼin ta̱ Jesús, ¿ndáaña xíniñúʼu keʼíi̱?”. Xa̱ʼa̱ ña̱ kúʼvi̱ní-iniyó xíniyó Jehová xíʼin ta̱ Jesús ña̱yóʼo chíndeétáʼanña xíʼinyó ña̱ kuʼvi̱-iniyó kuniyó inkana (2 Cor. 5:​14, 15; 6:​1, 2). w23.01 28 párr. 6, 7

Kúnda̱a̱ káxi iniyó ña̱ mií Jehová xíniñúʼura Biblia ña̱ va̱ʼa sáxi̱nura ña̱ kúni̱ra: ña̱ ndiʼi na̱ ñuura inkáchi ná ndasakáʼnunara ta kachíñuna nu̱úra. Jehová viíní ki̱ʼinra kuenta ndáaña ka̱ʼyi̱ nu̱ú Biblia ta nda̱saa na̱ yiví na̱ vitá-ini kuití kúú na̱ kunda̱a̱-ini xíʼinña (Luc. 10:​21). Biblia kúú iin libro ña̱ káʼvi ku̱a̱ʼání na̱ yiví na̱ íyo iníísaá nu̱ú ñuʼú. Soo nda̱saa na̱ yiví na̱ vitá-ini kúú na̱ kivi kunda̱a̱-ini xíʼinña ta keʼéna ña̱ káʼa̱nña (2 Cor. 3:​15, 16). Ná kotoyó ña̱ náʼa̱ Jehová ña̱ ndíchi ña̱ kúúmiíra. Jehová xíniñúʼura tu̱ʼunra ña̱ sanáʼa̱ra ndiʼiyó ta saátu xíniñúʼuraña ña̱ sanáʼa̱ra iin tá iinyó ta sandíkora-iniyó. Tá káʼviyó tu̱ʼunra saá xáa̱yó kúnda̱a̱-iniyó ña̱ ndixaní ndíʼi̱-inira xa̱ʼa̱ iin tá iinyó (Is. 30:​21). Tá yáʼayó nu̱ú iin tu̱ndóʼo ta kaʼviyó iin texto, ña̱yóʼo va̱ʼaní chíndeétáʼanña xíʼinyó, saáchi ña̱yóʼo kúú ña̱ xíniñúʼuyó mií tiempo saá. Biblia ni̱ka̱ʼyi̱ña ña̱ va̱ʼa kaʼvi ku̱a̱ʼání na̱ yivíña, soo xa̱a̱ naʼání ni̱ka̱ʼyi̱ña. Ña̱kán, ¿nda̱chun va̱ʼa chíndeétáʼanña xíʼin na̱ yiví na̱ íyo tiempo vitin? Saáchi tu̱ʼun mií Jehová kúú ña̱ ni̱ka̱ʼyi̱ nu̱úña ta ta̱yóʼo ndíchiníra (2 Tim. 3:​16, 17). w23.02 4, 5 párr. 8-​10

Miíyó na̱ ndásakáʼnu Jehová kúʼvi̱ní-iniyó xíniyóra, ña̱kán kúni̱yó chika̱a̱yó ndee̱ ña̱ viíníka kachíñuyó nu̱úra. Soo ña̱ va̱ʼa keʼéyó ña̱yóʼo, xíniñúʼu chika̱a̱-iniyó ña̱ viíka koo ña̱ keʼéyó xíʼin inkana, ña̱ sakúaʼayó keʼéyó iin chiñu á ña̱ ndukúyó ki̱ʼva ña̱ chindeétáʼanyó xíʼin inkana. ¿Nda̱chun xíniñúʼu chika̱a̱-iniyó keʼéyó inkaka chiñu nu̱ú Ndióxi̱ ta chika̱a̱yó ndee̱ ña̱ saxínuyóña? Saáchi kúni̱yó sakúsi̱íyó-ini Jehová. Ta̱yóʼo kúsi̱íní-inira tá xíniñúʼuyó ña̱ xíni̱yó ña̱ va̱ʼa kachíñuyó nu̱úra. Ta saátu kúni̱yó viíníka koo ña̱ keʼéyó ña̱ va̱ʼa chindeétáʼanyó xíʼin na̱ hermanoyó (1 Tes. 4:​9, 10). Ni loʼo á xa̱a̱ ku̱a̱ʼá ku̱i̱ya̱ káchíñuyó nu̱ú Jehová, ndiʼivayó xíniñúʼu chika̱a̱ ndee̱ ña̱ viíka kachíñuyó nu̱úra. w22.04 22 párr. 1, 2

Na̱ chíñu xa̱a̱ ku̱nu̱mí sandíʼi-xa̱ʼa̱na Babilonia ña̱ káʼnu, ña̱ kúú ndiʼi veʼe-ñu̱ʼu vatá ña̱ íyo nu̱ú ñuʼú yóʼo. Tasaá kixáʼa ña̱ gran tribulación. ¿Á kixáʼa na̱ yiví ndasakáʼnuna Jehová tá ná kunina kixáʼa kuu ña̱yóʼo? Va̱ásaví, chi inkava ña̱ keʼéna. Apocalipsis capítulo 6 káʼa̱nña ña̱ na̱ yiví na̱ va̱ása ndásakáʼnu Jehová chise̱ʼéna miína tañu yuku̱, ña̱yóʼo kúni̱ kachiña ña̱ kundaa-inina xu̱ʼún ña̱ kúúmiína á na̱ chíñu. Ta xa̱a̱na koona contra Jehová xa̱ʼa̱ ña̱ va̱ása chíndeétáʼanna xíʼin Reinora (Luc. 11:​23; Apoc. 6:​15-​17). Ti̱xin ña̱ gran tribulación, iinlá na̱ ndásakáʼnu Jehová kúú na̱ síín koo. Saáchi iinlá na̱yóʼo kúú na̱ ndakundeé ndasakáʼnu Jehová ta va̱ása chindeétáʼanna xíʼin tí “kití yukú” (Apoc. 13:​14-​17). w22.05 16, 17 párr. 8, 9

Na̱ ndásakáʼnu Ndióxi̱ va̱ása nátúʼun kuitína xa̱ʼa̱ tu̱ʼun va̱ʼa xa̱ʼa̱ Reino Ndióxi̱ (Mat. 24:​14). Chi saátu chíndeétáʼanna xíʼin na̱ ángel na̱ káʼa̱n Apocalipsis capítulo 8 nda̱a̱ 10 xa̱ʼa̱. Na̱ ángel yóʼo káʼa̱nna xa̱ʼa̱ tu̱ndóʼo ña̱ ndeéní kixi sa̱tá na̱ va̱ása xíín kuni Reino Ndióxi̱. Ña̱kán miíyó na̱ testigo Jehová nátúʼunyó xíʼin na̱ yiví xa̱ʼa̱ tu̱ndóʼo ña̱ kixi sa̱tána, ña̱ íyo nda̱a̱ táki̱ʼva íyo “ñíí xíʼin ñuʼu̱”. Ta ña̱ nátúʼunyó náʼa̱ña ndáaña keʼé Ndióxi̱ xíʼin na̱ chíñu na̱ íyo nu̱ú ñuyǐví ta̱ Ndi̱va̱ʼa yóʼo (Apoc. 8:​7, 13). Na̱ yiví xíniñúʼu kunda̱a̱-inina ña̱ xa̱a̱ ku̱yatinní kixaa̱ ña̱ ndiʼi-xa̱ʼa̱ ña̱ kini ña̱ íyo nu̱ú ñuʼú yóʼo. Chi saá kúú ña̱ kivi nasamana ña̱ va̱ása va̱ʼa kéʼéna, tasaá kivi ka̱kuna tá ná sandíʼi-xa̱ʼa̱ Jehová ña̱ va̱ása va̱ʼa (Sof. 2:​2, 3). Soo xa̱ʼa̱ ña̱ va̱ása kútóo na̱ yiví kuniso̱ʼona ña̱yóʼo, xíniñúʼu ndakúní koo iniyó natúʼunyó xíʼinna. Chi tá ná kixáʼa ña̱ gran tribulación ndeéníka koo ña̱ natúʼunyó xíʼinna (Apoc. 16:​21). w22.05 7 párr. 18, 19

Tá kúma̱níka koo se̱ʼe iin na̱ matrimonio, xa̱a̱ xíniso̱ʼovana ku̱a̱ʼá discurso á consejo ña̱ káʼa̱n ndáa ki̱ʼva sakúaʼnuna se̱ʼena. Soo tá xa̱a̱ íyo se̱ʼena saá kíxáʼana chíndayáʼviníkana consejo ña̱ kivi chindeétáʼan xíʼinna sakúaʼnuna se̱ʼena. Iin chiñu káʼnuní kúúmiína vitin. Ña̱kán, tá nása̱ma ña̱ ndóʼoyó saá kúú ña̱ kíxáʼayó chíndayáʼviníkayó sava consejo ña̱ xa̱a̱ xíni̱yó. Xa̱ʼa̱ ña̱yóʼo, miíyó na̱ ndásakáʼnu Ndióxi̱ káʼviyó tu̱ʼunra ta ndákanixi̱níyó xa̱ʼa̱ña ndiʼi ki̱vi̱, nda̱a̱ táki̱ʼva xi̱niñúʼu keʼé na̱ xi̱kuu rey ti̱xin ñuu Israel (Deut. 17:​19). Ndóʼó na̱ íyo se̱ʼe kúúmiíndó iin chiñu ña̱ ndáyáʼviní: ña̱ chindeétáʼanndó xíʼin se̱ʼendó ña̱ sakúaʼana xa̱ʼa̱ Jehová. Soo ña̱yóʼo va̱ása kúni̱ kachiña ña̱ xíniñúʼu sanáʼa̱ kuitíndóna xa̱ʼa̱ra, chi saátu xíniñúʼu chindeétáʼanndó xíʼinna ña̱ kuʼvi̱-inina kuninara xíʼin ndiʼi níma̱na. w22.05 26 párr. 2, 3

Va̱ása xíniñúʼu ka̱ʼa̱n kuitíyó ña̱ va̱ása va̱ʼa kúniyó xíʼin ña̱ ke̱ʼéyó, saáchi xíniñúʼu na̱ʼa̱yó ña̱yóʼo xíʼin ña̱ kéʼéyó. Ña̱kán, ¿ndáa inka ña̱ʼa kíʼin Jehová kuenta xíʼin? Ña̱ kíʼinra kuenta xíʼin kúú ña̱ nasamayó ña̱ kéʼéyó, ña̱yóʼo kúni̱ kachiña ña̱ sandákooyó ña̱ va̱ása va̱ʼa kéʼéyó ta kixáʼayó keʼéyó ña̱ kúni̱ra (Is 55:7). Iin na̱ yiví na̱ násama ña̱ kéʼéna xíniñúʼu taxina ña̱ ná nasama Jehová ki̱ʼva ña̱ ndákanixi̱nína (Rom. 12:2; Efes. 4:​23). Ta saátu xíniñúʼu chika̱a̱-inina ña̱ sandákoona ña̱ va̱ása va̱ʼa xi̱ndakanixi̱nína xíʼin ña̱ va̱ása va̱ʼa xi̱keʼéna (Col. 3:​7-9). Ná ndakaʼányó chi ña̱ va̱ʼa ixakáʼnu-ini Ndióxi̱ xa̱ʼa̱yó, xíniñúʼu kandíxayó ña̱ ni̱xi̱ʼi̱ ta̱ Jesús xa̱ʼa̱yó. Ña̱kán tá xíto Jehová ña̱ chíka̱a̱níyó ndee̱ ña̱ nasamayó ña̱ kéʼéyó, íxakáʼnuva-inira xa̱ʼa̱yó saáchi xa̱a̱ ni̱xi̱ʼi̱ se̱ʼera xa̱ʼa̱yó (1 Juan 1:7). w22.06 6 párr. 16, 17

Nda̱a̱ tá tiempo tá i̱xaso̱ʼo ta̱ Adán xíʼin ñá Eva nu̱ú Jehová, nda̱a̱ saá ki̱xáʼa na̱ yiví íxandi̱va̱ʼana xíʼin inkana (Ecl. 8:9). Tá kúú, íyo sava na̱ yiví va̱ása nda̱kú íyo ña̱ kéʼéna, savana xáʼnína, káʼa̱n-ndi̱va̱ʼana, ta íyo savatuna íxandi̱va̱ʼana xíʼin na̱ káʼvi xíʼinna escuela, ta saátu íxandi̱va̱ʼana xíʼin na̱ veʼena. Ña̱kán ku̱a̱ʼání na̱ yiví yíʼvina xa̱ʼa̱ ña̱ kéʼé inkana. Ta̱ Ndi̱va̱ʼa kivi kuniñúʼura na̱ yiví ña̱ sayíʼvina miíyó, tasaá va̱ása natúʼunkayó xa̱ʼa̱ Ndióxi̱. Ta saátu chíka̱a̱ra-ini na̱ chíñu ña̱ ná va̱ása taxikana natúʼunyó xa̱ʼa̱ Ndióxi̱ ta saátu ixandi̱va̱ʼana xíʼinyó (Luc. 21:​12). Ku̱a̱ʼání na̱ yiví káʼa̱nna ña̱ va̱ása va̱ʼa á káʼa̱nna ña̱ vatá xa̱ʼa̱ na̱ ndásakáʼnu Jehová. Ta sava na̱ kándíxa ña̱ vatá yóʼo, kivi kixáʼana kusi̱kindaana miíyó ta nda̱a̱ ixandi̱va̱ʼana xíʼinyó (Mat. 10:​36). Ña̱kán va̱ása ndákanda̱-iniyó tá sáxo̱ʼvi̱ ta̱ Ndi̱va̱ʼa na̱ ndásakáʼnu Ndióxi̱, saáchi nda̱a̱ tá siglo nu̱ú ke̱ʼéra ña̱yóʼo (Hech. 5:​27, 28, 40). w22.06 16 párr. 10, 11

¿Ndáana kúú na̱ ku̱a̱ʼání na̱ káʼa̱n ña̱yóʼo xa̱ʼa̱? Na̱yóʼo kúú na̱ ndataku, na̱ ka̱ku tá ná ya̱ʼa ña̱ Armagedón ta saátu na̱ va̱lí na̱ kaku ti̱xin ñuyǐví xa̱á. Tá ná ndiʼi ña̱ mil ku̱i̱ya̱, ndiʼi na̱ koo nu̱ú ñuʼú kán va̱ása kookana na̱ yiví ku̱a̱chi. Ná ndakaʼányó chi su̱ví ña̱ kǒo ku̱a̱chi kuumií na̱ yiví kúni kachiña ña̱ kutakuna ndiʼi tiempo. Ná ndakanixi̱níyó xa̱ʼa̱ ta̱ Adán xíʼin ñá Eva. Na̱yóʼo kǒo ku̱a̱chi níxi̱kuumiína, soo xi̱niñúʼu na̱ʼa̱na á ndixa kándíxana ña̱ káʼa̱n Jehová xíʼinna ña̱ va̱ʼa kutakuna ndiʼi tiempo, soo na̱yóʼo kǒo níxiniso̱ʼona ña̱ ni̱ka̱ʼa̱nra (Rom. 5:​12). Tá ná ndiʼi ña̱ mil ku̱i̱ya̱ ndiʼi na̱ koo nu̱ú ñuʼú yóʼo va̱ása kuumiíkana ku̱a̱chi. Ta ndiʼi na̱yóʼo, ¿á kundiku̱nna sa̱tá gobierno Jehová ndiʼi tiempo? ¿Á keʼétu na̱yóʼo nda̱a̱ táki̱ʼva ke̱ʼé ta̱ Adán xíʼin ñá Eva, chi ni kǒo ku̱a̱chi níxi̱kuumiína va̱ása níxi̱yo nda̱kú-inina xíʼinra? ¿Ndáa ki̱ʼva kunda̱a̱-iniyó ña̱ kǒo keʼéna nda̱a̱ táki̱ʼva ke̱ʼé ta̱ Adán xíʼin ñá Eva? w22.09 22 párr. 12-​14

Xa̱ʼa̱ ña̱ kininí káa tiempo vitin, ¿á íxayo̱ʼvi̱ña xíʼún kandíxaún ña̱ vií koo chí nu̱únínu? Sanava. Saáchi ku̱a̱ʼání na̱ familia va̱ása kúʼvi̱ka-inina xínitáʼanna nda̱a̱ táki̱ʼva xi̱keʼéna tá ya̱chi̱. Ku̱a̱ʼání na̱ yiví kútóonína kanitáʼanna, iinlá xa̱ʼa̱ miína ndíʼi̱-inina ta kue̱ʼe̱nína. Saátu ku̱a̱ʼání na̱ yiví íxayo̱ʼvi̱níña xíʼinna kandíxana na̱ níʼi yichi̱ nu̱úna. Soo tá xítoyó ña̱yóʼo kúnda̱a̱-iniyó ña̱ va̱ʼava kundooyó chí nu̱únínu. ¿Nda̱chun? Saáchi xa̱a̱ kéʼé na̱ yiví nda̱a̱ táki̱ʼva káʼa̱n ña̱ va̱xi nu̱ú 2 Timoteo 3:​1-5, ña̱ káʼa̱n xa̱ʼa̱ “ki̱vi̱ nu̱ú ndíʼi”. Na̱ yiví na̱ kúúmií iin níma̱ va̱ʼa kúnda̱a̱-inina ña̱ xínuva profecía yóʼo. Ta ña̱yóʼo náʼa̱ña nu̱úyó ña̱ xa̱a̱ kúú ta̱ Jesús Rey ti̱xin Reino Ndióxi̱. Soo íyo inkaka profecía ña̱ káʼa̱n xa̱ʼa̱ Reino yóʼo ta viíní kítáʼanña ndiʼiña nda̱a̱ táki̱ʼva viíní kítáʼan ndiʼi táʼví válí ña̱ rompecabeza, ta ña̱yóʼo chindeétáʼanña xíʼinyó kunda̱a̱-iniyó ndáa tiempo kúú ña̱ ndóoyó vitin. w22.07 2 párr. 1, 2

Tá ki̱xáʼa ña̱ coronavirus, ni̱ka̱ʼa̱nna xíʼinyó ndáa ki̱ʼva koo reunión ta saátu predicación. Tasaá ndi̱ku̱n ki̱xáʼayó xíniñúʼuyó videollamada ña̱ va̱ʼa kuumiíyó reunión xíʼin asamblea. Ta saátu ki̱xáʼayó kéʼéyó carta xíʼin llamada ña̱ natúʼunyó xa̱ʼa̱ Ndióxi̱, ta ku̱a̱ʼání ña̱ va̱ʼa táxi Jehová ndaʼa̱yó xa̱ʼa̱ ña̱ kéʼéyó ña̱yóʼo. Ku̱a̱ʼání na̱ sucursal káʼa̱nna ña̱ ku̱a̱ʼáníka ku̱a̱ʼa̱n ndúu na̱ publicador tiempo vitin. Ta saátu ku̱a̱ʼání na̱ hermano nátúʼunna ndáaña va̱ʼa xa̱a̱ ndákiʼinna xa̱ʼa̱ ña̱yóʼo. Sana sava na̱ hermano ndákanixi̱nína ña̱ ku̱a̱ʼání ña̱ káʼa̱n na̱ ñuu Ndióxi̱ xíʼinyó keʼéyó xa̱ʼa̱ ña̱ ndíka̱a̱ kue̱ʼe̱ yóʼo. Soo xa̱a̱ ku̱a̱ʼání yichi̱ kíʼinyó kuenta ña̱ va̱ʼaníva íyo ña̱ káʼa̱nna xíʼinyó keʼéyó. Tá ná ndakanixi̱níyó xa̱ʼa̱ ña̱ viíní níʼi ta̱ Jesús yichi̱ nu̱úyó, kivi kandíxayó ña̱ ni nda̱a̱ ndáaka ña̱ ná kuu chí nu̱únínu, Jehová xíʼin se̱ʼera chindeétáʼanvana xíʼinyó (Heb. 13:​5, 6). w22.07 13 párr. 15, 16

Xíniñúʼu ndasakáʼnuyó Jehová tá káʼa̱nyó xíʼinra ta saátu xíniñúʼu taxiyó tíxa̱ʼvi ndaʼa̱ra xa̱ʼa̱ ndiʼi ña̱ va̱ʼa ña̱ táxira ndaʼa̱yó, tá kúú ña̱ liviní color yita, ta ku̱a̱ʼání nu̱ú ña̱ʼa táxira xíxiyó ta ya̱si̱nníña, ta saátu ña̱ táxira na̱ migoyó na̱ va̱ʼaní kítáʼan xíʼinyó. Jehová táxira ndiʼi ña̱yóʼo ndaʼa̱yó xa̱ʼa̱ ña̱ kúʼvi̱-inira xínira miíyó ta kúni̱ra ña̱ si̱íní ná kooyó (Sal. 104:​12-​15, 24). Saátu táxiyó tíxa̱ʼvi ndaʼa̱ra xa̱ʼa̱ ña̱ táxira ndiʼi ña̱ xíniñúʼuyó ña̱ sakúaʼayó xa̱ʼa̱ra, ta saátu xa̱ʼa̱ ña̱ va̱ʼaní ndátuyó ndakiʼinyó chí nu̱únínu. Kamaníva nándósóyó taxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ kéʼéra xa̱ʼa̱yó. ¿Ndáaña kivi keʼéyó ña̱ va̱ása kundoʼoyó ña̱yóʼo? Kivi kaʼyíyó nu̱ú iin tutu ndiʼi ña̱ʼa ña̱ ndúkúyó nu̱ú Jehová ta tá xa̱a̱ ni̱ya̱ʼa tiempo kotoyó ndáa ki̱ʼva xa̱a̱ táxira ña̱ ndúkúyó nu̱úra. Tasaá kivi ka̱ʼa̱nyó xíʼinra ña̱ taxiyó tíxa̱ʼvi ndaʼa̱ra xa̱ʼa̱ ndiʼi ña̱ kéʼéra xa̱ʼa̱yó (Col. 3:​15). w22.07 22 párr. 8, 9

Su̱ví nda̱saa xíniñúʼu kaʼvi kuitíyó Biblia, chi xíniñúʼu keʼéyó ña̱ sákuaʼayó. Chi tá saá ná keʼéyó, si̱íní xa̱a̱yó kooyó (Sant. 1:​25). Soo, ¿ndáaña xíniñúʼu keʼéyó ña̱ va̱ʼa kunda̱a̱-iniyó ña̱ ndíku̱nyó ña̱ nda̱a̱ yóʼo? Iin ta̱ hermano káʼa̱nra ña̱ viíní ná kotoyó ndáaña xa̱a̱ va̱ʼaní kéʼéyó ta ná kotoyó ndáaña kivi chika̱a̱yó ndee̱ ña̱ viíka keʼéyó. Ta̱ apóstol Pablo ni̱ka̱ʼa̱nra xa̱ʼa̱ ña̱yóʼo tá ka̱chira: “Ni nda̱a̱ ndáaka ki̱ʼva kúú ña̱ xu̱xa-iniyó xíʼin tu̱ʼun Ndióxi̱, ná ndakundeéyó viíní kakayó ti̱xin yichi̱ yóʼo” (Filip. 3:​16). Ná ndakanixi̱níyó ndáa ki̱ʼva xa̱a̱ chíndeétáʼan ña̱ nda̱a̱ xíʼinyó xa̱ʼa̱ ña̱ ndákundeéyó ndíku̱nyóña. Ña̱yóʼo va̱ása chíndeétáʼan kuitíña xíʼinyó ña̱ si̱í kutakuyó, chi saátu tá ndákundeéyó ndíku̱nyóña saá kúú ña̱ sákusi̱íyó-ini Jehová ta saátu sákusi̱íyó-ini na̱ hermanoyó (Prov. 27:​11; 3 Juan 4). Ta xa̱ʼa̱ ña̱yóʼo kúú ña̱ kúʼvi̱ní-iniyó xíniyó ña̱ nda̱a̱ ta ndíku̱nyó ña̱ káʼa̱nña. w22.08 18, 19 párr. 16-​18

Iin ki̱ʼva ña̱ na̱ʼa̱ na̱ anciano ña̱ kúʼvi̱-inina xínina Jehová xíʼin ta̱ Jesús kúú: ña̱ viíní kundaana ndikachi válí sa̱na̱ ta̱ Jesús (1 Ped. 5:​1, 2). Ta̱ Jesús káxiní ni̱ka̱ʼa̱nra xa̱ʼa̱ ña̱yóʼo xíʼin ta̱ apóstol Pedro. Chi xa̱ʼa̱ ña̱ ni̱ka̱ʼa̱n ta̱ Pedro ña̱ va̱ása xíni̱ra ta̱ Jesús u̱ni̱ yichi̱, xi̱kuni̱ra na̱ʼa̱ra nu̱ú ta̱ Jesús ña̱ kúʼvi̱va-inira xínirara. Tá nda̱taku ta̱ Jesús, ña̱yóʼo ni̱nda̱ka̱tu̱ʼunra ta̱ Pedro: “Simón se̱ʼe ta̱ Juan, ¿á kúʼvi̱-iniún xíniún yi̱ʼi̱?”. Sana xi̱kuni̱níva ta̱ Pedro keʼéra nda̱a̱ ndáaka ña̱ʼa ña̱ va̱ʼa na̱ʼa̱ra nu̱ú ta̱ Jesús ña̱ kúʼvi̱ní-inira xínirara. Ta ta̱ Jesús ni̱ka̱ʼa̱nra xíʼinra: “Kundaa ndikachi válí sa̱na̱i̱” (Juan 21:​15-​17). Tasaá ke̱ʼéva ta̱ Pedro, chi va̱ʼaní xi̱ndaara na̱ discípulo ta̱ Jesús tasaá ni̱na̱ʼa̱ra ña̱ kúʼvi̱ní-inira xínirara. ¿Nda̱saa kivi na̱ʼa̱ na̱ anciano ña̱ ndíku̱nna ña̱ ni̱ka̱ʼa̱n ta̱ Jesús xíʼin ta̱ Pedro? Kivi na̱ʼa̱na ña̱ kúʼvi̱ní-inina xínina Jehová xíʼin ta̱ Jesús tá ná chika̱a̱na ndee̱ xíʼin na̱ hermano ta saátu chindeétáʼanna xíʼin na̱ inactivo (Ezeq. 34:​11, 12). w23.01 29 párr. 10, 11

Ná kǒo ndakanixi̱níyó ña̱ ni iinna kǒo kúnda̱a̱-ini xíʼin ña̱ ndóʼoyó chi su̱ví saá íyoña. Saáchi tá ná kixáʼayó ndakanixi̱níyó ña̱yóʼo, kixáʼayó ka̱ʼa̱nyó ña̱ nda̱a̱ ni iinna kǒo kúchiñu chindeétáʼan xíʼinyó ya̱ʼayó nu̱ú ña̱yóʼo. Soo síínva káʼa̱n Biblia, saáchi ña̱yóʼo káchiña: “Tá ná kixi tu̱ndóʼo nu̱úndó, chindeétáʼanvara xíʼinndó ña̱ va̱ʼa kundeé-inindó ya̱ʼandó nu̱úña”. Xa̱ʼa̱ ña̱kán, ni ndakaniníva xi̱níyó xa̱ʼa̱ ña̱ kini, kuchiñuvayó nda̱kú koo iniyó xíʼin Jehová. Miíra chindeétáʼan xíʼinyó tasaá kǒo keʼéyó ña̱yóʼo. Ná ndakaʼányó chi na̱ yiví ku̱a̱chi kúúyó ta ña̱ va̱ása va̱ʼa íyoña iniyó ta kixaa̱va iin tiempo ña̱ ndakanixi̱níyó xa̱ʼa̱ ña̱yóʼo. Soo tá ná kuu ña̱yóʼo ná kǒo xinu̱-iniyó ta keʼéyóña, ná keʼéyó nda̱a̱ táki̱ʼva ke̱ʼé ta̱ José, chi ta̱yóʼo xi̱nura nu̱ú ñá síʼi ta̱ Potifar (Gén. 39:​12). Kiviva sa̱ñáyó ndaʼa̱ ña̱ va̱ása va̱ʼa, va̱ása xíniñúʼu keʼévíyóña. w23.01 12, 13 párr. 16, 17

Nda̱kúní íyo ndiʼi ña̱ kéʼé Jehová (Deut. 32:4). Saáchi va̱ása kúndasíra na̱ yiví, chi na̱ va̱ʼa kúú ndiʼina nu̱úra (Hech. 10:​34, 35). Jehová ni̱ka̱ʼa̱nra ña̱ tiempo so̱ndíʼi ku̱a̱ʼání na̱ yiví nandukúna ña̱ nda̱a̱, ta ku̱a̱ʼánína xa̱a̱na kunda̱a̱-inina xa̱ʼa̱ ña̱ va̱xi nu̱ú Biblia (Dan. 12:4). Ta xa̱a̱ xínuva ña̱yóʼo tiempo vitin, saáchi iinlá Biblia kúú iin libro ña̱ sándaya̱ʼana ku̱a̱ʼání nu̱ú tu̱ʼun. Na̱ ñuu Ndióxi̱ va̱ʼaní káchíñuna saáchi xa̱a̱ yáʼaka 240 nu̱ú tu̱ʼun kána ña̱ Biblia, sava ña̱yóʼo xa̱a̱ íyo inííña ta savaña káchíñukana xa̱ʼa̱ña ña̱ va̱ʼa kana inííña. ¿Ndáaña va̱ʼa ndákiʼin na̱ yiví xa̱ʼa̱ ña̱yóʼo? Ku̱a̱ʼání na̱ yiví na̱ íyo iníísaá ñuyǐví xáa̱na kúnda̱a̱-inina xa̱ʼa̱ Reino Ndióxi̱ vitin tá kúma̱níka kixaa̱ ña̱ ndiʼi-xa̱ʼa̱ ñuyǐví yóʼo (Mat. 24:​14). Xa̱ʼa̱ ña̱ va̱ʼaní-ini Jehová kúni̱ra ña̱ ndiʼi na̱ yiví ná kuumiína Biblia ta xa̱a̱na sakúaʼana xa̱ʼa̱ra. ¿Nda̱chun kéʼéra ña̱yóʼo? Xa̱ʼa̱ ña̱ kúʼvi̱ní-inira xínira miíyó kúú ña̱ kéʼéraña. w23.02 5 párr. 11, 12

¿Á kúʼvi̱-iniún xíniún ña̱ va̱ʼa? Sana kúʼvi̱va-iniún xíniúnña. Soo xa̱ʼa̱ ña̱ kúúyó na̱ yiví ku̱a̱chi, kivi kixáʼayó ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo xa̱ʼa̱ ña̱ va̱ʼa xíʼin xa̱ʼa̱ ña̱ va̱ása va̱ʼa (Is. 5:​20). Tá ni̱xi̱yo ta̱ Jesús nu̱ú ñuʼú yóʼo, ki̱ʼinra kuenta ña̱ xi̱ndakanixi̱ní na̱ su̱tu̱ ña̱ xi̱kuuna na̱ yiví va̱ʼa. Soo ni̱ka̱ʼa̱nra xíʼinna ña̱ su̱ví saá íyona, chi ndi̱va̱ʼaní ni̱xi̱yo inina xíʼin inkana. Ta na̱ su̱tu̱ yóʼo kúú na̱ xi̱ka̱ʼa̱n xíʼin na̱ yiví ndáaña kúú ña̱ xi̱niñúʼu keʼéna ta ndáaña kúú ña̱ va̱ása níxiniñúʼu keʼéna (Ecl. 7:​16; Luc. 16:​15). Ta saátu tiempo vitin íyo na̱ yiví na̱ íyo táki̱ʼva ni̱xi̱yo na̱yóʼo. Nu̱ú miína ña̱ va̱ʼava kúú ña̱ kéʼéna, ni̱nuní kúnina ta káʼa̱nna ña̱ va̱ása va̱ʼa xa̱ʼa̱ inkana. Soo Jehová va̱ása kútóora ña̱ kéʼéna, saáchi su̱ví ña̱ va̱ʼa kúú ña̱ kéʼéna. Iin ña̱ liviní kúú ña̱ keʼéyó ña̱ va̱ʼa. Ta tá kéʼéyó ña̱ va̱ʼa yóʼo, kéʼéyó nda̱a̱ táki̱ʼva kúni̱ Ndióxi̱. Tá káʼa̱n tu̱ʼun Ndióxi̱ xa̱ʼa̱ ña̱ keʼéyó ña̱ va̱ʼa, kúni̱ kachiña ña̱ kundiku̱nyó ndiʼi ña̱ káʼa̱n Jehová xíʼinyó. w22.08 27 párr. 3-5

Ta̱ Jesús xi̱kandíxavara na̱ discípulora ni sava yichi̱ va̱ása vií níxi̱keʼéna sava ña̱ʼa (Juan 15:​16). Tá kúú tá ni̱ka̱ʼa̱n ta̱ Santiago ta saátu ta̱ Juan xíʼin ta̱ Jesús ña̱ ná taxira koo yatinna xíʼinra tá ná kaʼndachíñura, va̱ása níka̱ʼa̱nra xíʼinna á xa̱ʼa̱ ña̱kán kúú ña̱ ndásakáʼnuna Jehová, saátu va̱ása níka̱ʼa̱nra xíʼinna ña̱ ná sandákoona ña̱ koona apóstolra (Mar. 10:​35-​40). Ta ñuú tá ti̱inna ta̱ Jesús, na̱ discípulora sa̱ndákoonara ta xi̱nuna ku̱a̱ʼa̱nna (Mat. 26:​56). Soo va̱ása nísandákoora ña̱ kandíxarana. Ni xi̱kunda̱a̱-inira ña̱ ni̱xi̱yo sava ña̱ xi̱ ixayo̱ʼvi̱ xíʼinna, kǒo nísandákoora ña̱ kuʼvi̱-inira kunirana (Juan 13:1). Tá nda̱takura, ni̱ka̱ʼa̱nra xíʼin na̱ 11 apóstolra ña̱ ná ku̱ʼu̱nna iníísaá ñuyǐví ta sanáʼa̱na na̱ yiví ña̱ ná kundiku̱nnara ta saátu ná kiʼinna kuenta xíʼinna (Mat. 28:​19, 20; Juan 21:​15-​17). Ta va̱ʼaníva ke̱ʼéra ña̱ ka̱ndíxarana, saáchi ni xi̱kuuna na̱ yiví ku̱a̱chi va̱ʼaní ke̱ʼéna chiñu ña̱ sa̱ndákoora ndaʼa̱na. Ta nda̱kú ni̱xi̱yo inina ndiʼi tiempo ña̱ xi̱takuna. w22.09 5, 6 párr. 12

Va̱ása kuchiñu ta̱ Ndi̱va̱ʼa sayíʼvira miíyó tá kándíxaníyó ña̱ kúʼvi̱-ini Jehová xínira miíyó ta íyora xíʼinyó. Tá kúú, ta̱ ka̱ʼyí ña̱ Salmo 118 ni̱ya̱ʼara nu̱ú tu̱ndóʼo ña̱ sa̱ndíʼiní-inira. Ku̱a̱ʼání na̱ yiví xi̱sa̱a̱-ini xi̱xiniñaʼá, ta sava na̱yóʼo xi̱kuumií chiñu ña̱ ndáyáʼviní (versículo 9 xíʼin 10). Sava yichi̱ xi̱ndi̱ʼi̱ní-inira (versículo 13). Ta saátu ta̱xi Jehová consejo ndaʼa̱ra (versículo 18). Soo ni ni̱ya̱ʼara nu̱ú ndiʼi ña̱yóʼo ni̱ka̱ʼa̱nra ña̱ va̱ása yíʼvira. Ni ta̱xi Jehová consejo ndaʼa̱ra, soo xi̱kunda̱a̱va-inira ña̱ xi̱kuʼvi̱ní-ini Jehová xi̱xinirara. Ta̱yóʼo xi̱kandíxara ña̱ ni nda̱a̱ ndáaka tu̱ndóʼo ná kixi nu̱úra, Jehová íyo tu̱ʼvara ña̱ chindeétáʼanra xíʼinra (Sal. 118:​29). Iin tá iin miíyó na̱ ndásakáʼnu Jehová xíniñúʼu kandíxayó ña̱ kúʼvi̱ní-inira xínira miíyó. Chi ña̱yóʼo chindeétáʼanña xíʼinyó ña̱ va̱ása yi̱ʼvíyó nu̱ú u̱ni̱ ña̱yóʼo. Ña̱ nu̱ú: ña̱ yíʼviyó ña̱ va̱ása kuchiñuyó taxiyó ña̱ xíniñúʼu na̱ veʼeyó. Ña̱ u̱vi̱: ña̱ yíʼviyó na̱ yiví. Ta ña̱ u̱ni̱: ña̱ yíʼviyó kuviyó. w22.06 15 párr. 3, 4

Ná kundayáʼvika ña̱ ndásakáʼnuyó Jehová. Xa̱ʼa̱ ña̱ i̱xava̱ʼara miíyó xíniñúʼu ndasakáʼnuyóra (Apoc. 4:​11; 14:​6, 7). Ña̱kán, ña̱ xíniñúʼu kundi̱ʼi̱ka-iniyó xa̱ʼa̱ kúú ña̱ ndasakáʼnuyóra nda̱a̱ táki̱ʼva kúni̱ miíra, nda̱a̱ táki̱ʼva náʼa̱ ña̱ espíritu santo yichi̱ nu̱úyó ta nda̱a̱ táki̱ʼva íyo ña̱ nda̱a̱ ña̱ sa̱kuaʼayó xa̱ʼa̱ra (Juan 4:​23, 24). Kúni̱yó ña̱ ná kuniʼi espíritu santo yichi̱ nu̱úyó ña̱ va̱ʼa ndasakáʼnuyóra nda̱a̱ táki̱ʼva káʼa̱n mií tu̱ʼunra. Mií ña̱ xíniñúʼu kundi̱ʼi̱-iniyó xa̱ʼa̱ kúú ña̱ keʼéyó ña̱ kúni̱ Jehová ni lugar nu̱ú íyoyó va̱ása táxina ña̱ natúʼunyó xa̱ʼa̱ra. Tiempo vitin yáʼaka 100 na̱ hermano ñúʼuna veʼeka̱a xa̱ʼa̱ ña̱ kúúna testigo Jehová. Ta ni ndóʼona ña̱yóʼo kúsi̱íní-inina chi va̱ʼa kéʼéna oración nu̱úra, va̱ʼa káʼvina ta va̱ʼa nátúʼunna xa̱ʼa̱ra xíʼin inkana. Ña̱kán ni káʼa̱n ndi̱va̱ʼana xíʼinyó, ni íxandi̱va̱ʼana xíʼinyó, kúsi̱í-iniyó chi íyo Jehová xíʼinyó ta ku̱a̱ʼání ña̱ va̱ʼa taxira ndaʼa̱yó chí nu̱únínu (1 Ped. 4:​14). w22.10 9 párr. 13

Nu̱ú libro ña̱ Proverbios va̱xi consejo ña̱ táxi Jehová ndaʼa̱yó ta ña̱yóʼo va̱ʼaní chíndeéña miíyó ndiʼi tiempo tá ndíku̱nyóña. Ná sakúaʼayó xa̱ʼa̱ u̱vi̱ consejo yóʼo. Ña̱ nu̱ú, ná kusi̱í-iniyó xíʼin ña̱ xa̱a̱ kúúmiíyó. Consejo yóʼo táxi Proverbios 23:​4, 5 ndaʼa̱yó: “Va̱ása kundi̱ʼi̱ní-iniún ndukún ña̱ ku̱i̱ká. […] Saáchi nda̱a̱ táki̱ʼva ndáchi iin tí aguila saá keʼéña”. Soo ni saá, tiempo vitin na̱ ku̱i̱ká xíʼin na̱ ndáʼvi ndíʼi̱ní-inina ña̱ kuumiína xu̱ʼún. Ta sava yichi̱ xa̱ʼa̱ ña̱ kéʼéna, nda̱a̱ inka na̱ yiví káʼa̱nna ña̱ va̱ása va̱ʼa xa̱ʼa̱na ta nda̱a̱ va̱ása viíka kítáʼanna xíʼin inkana ta kiʼin kue̱ʼe̱ miína (Prov. 28:​20; 1 Tim. 6:​9, 10). Ña̱ u̱vi̱, siʼnaka ná ndakanixi̱níyó tasaá ka̱ʼa̱nyó. Tá va̱ása kíʼinyó kuenta xíʼin ña̱ káʼa̱nyó kivi sandákavayó-ini inkana. Proverbios 12:​18 káchiña: “Na̱ kǒo ndákanixi̱ní xíʼin ña̱ káʼa̱nna, ña̱yóʼo íyoña nda̱a̱ táki̱ʼva íyo ña̱ kanina iinna xíʼin espada, soo na̱ ndákanixi̱ní xíʼin ña̱ káʼa̱nna sándi̱kona-ini na̱ ndóʼo-ini” Ná kiʼinyó kuenta ña̱ va̱ása ka̱ʼa̱nyó ña̱ va̱ása va̱ʼa xa̱ʼa̱ inkana, chi saá kúú ña̱ va̱ʼaní kitáʼanyó xíʼin inkana (Prov. 20:​19). w22.10 21 párr. 14; 22 párr. 16, 17

Ta̱ Ezequiel xi̱niñúʼu kunda̱a̱ káxi inira xa̱ʼa̱ ña̱ natúʼunra xíʼin na̱ yiví. Ta saátu xi̱niñúʼu kandíxara tu̱ʼun yóʼo ña̱ va̱ʼa kusi̱í-inira natúʼunra xa̱ʼa̱ña. Ta tá xa̱xí ta̱ Ezequiel rollo yóʼo, kiʼinra kuenta ña̱ vi̱xikavíña táki̱ʼva vi̱xi ñu̱ñú (Ezeq. 3:3). ¿Nda̱chun vi̱xiña? Saáchi ña̱ ku̱ʼu̱nra natúʼunra xa̱ʼa̱ Jehová iin ña̱ ndáyáʼviní kúúña nu̱úra ta iin ña̱ va̱ʼaní kúúña (Sal. 19:​8-​11). Ta ta̱xiníra tíxa̱ʼvi ndaʼa̱ Jehová xa̱ʼa̱ ña̱ nda̱kaxinrara ña̱ koora profetara. Tándi̱ʼi, ña̱yóʼo ni̱ka̱ʼa̱n Jehová xíʼin ta̱ Ezequiel: “Kuniso̱ʼo ndiʼi ña̱ káʼi̱n xíʼún ta taán va̱ʼúnña níma̱ún” (Ezeq. 3:​10). Jehová xi̱kuni̱ra ña̱ ná ndakaʼán ta̱ Ezequiel xa̱ʼa̱ tu̱ʼun ña̱ ni̱ka̱ʼyi̱ nu̱ú rollo ta ná ndakanixi̱níra xa̱ʼa̱ ña̱ káʼa̱nña. Ña̱yóʼo chindeétáʼankaña xíʼin ta̱ Ezequiel ña̱ kandíxakara Ndióxi̱, ta kunda̱a̱ káxi-inira ña̱ ndáyáʼviní tu̱ʼun ña̱ ku̱ʼu̱nra natúʼunra xíʼin na̱ yiví (Ezeq. 3:​11). Ta tá ni̱xa̱a̱ ta̱ Ezequiel ku̱ndaa̱-inira ta ka̱ndíxara ña̱ ni̱ka̱ʼa̱n Jehová xíʼinra, ni̱xi̱yo tu̱ʼvara ña̱ ku̱ʼu̱nra natúʼunra ta saxínura chiñu ña̱ ta̱xi Ndióxi̱ ndaʼa̱ra. w22.11 6 párr. 12-​14

¿Ndáaña keʼún tá kǒo kútóún iin ña̱ nása̱ma ti̱xin ñuu Ndióxi̱? Ndiʼi ña̱ násama na̱ ñuu Ndióxi̱, xíʼin ndiʼi níma̱ún keʼúnña. Tá xi̱xika na̱ ñuu Israel chí nu̱ú ñuʼú yi̱chí, na̱ levita na̱ veʼe ta̱ Cohat kúú na̱ xi̱niʼi arca ña̱ pacto nu̱ú ndiʼi na̱ ñuu (Núm. 3:​29, 31; 10:​33; Jos. 3:​2-4). Iin chiñu káʼnuní kúú ña̱ xi̱kuumií na̱yóʼo. Tá ni̱xa̱a̱ na̱ ñuu Israel nu̱ú ñuʼú ña̱ ni̱ka̱ʼa̱n Jehová taxira ndaʼa̱na, na̱sama sava ña̱ʼa ña̱ xi̱keʼéna. Va̱ása níxi̱xiniñúʼuka tuku ta tuku nasa̱mana lugar nu̱ú kundichi tú arca. Ña̱kán na̱ veʼe ta̱ Cohat na̱samana chiñu ña̱ ke’éna (1 Crón. 6:​31-​33; 26:​1, 24). Biblia va̱ása káʼa̱nña xa̱ʼa̱ na̱ veʼe ta̱ Cohat ña̱ va̱ása níxi̱natúʼun kúáchina xa̱ʼa̱ ña̱ na̱sama chiñu ña̱ xi̱keʼéna. ¿Ndáaña sákuaʼún xíʼin ña̱yóʼo? Xíʼin ndiʼi níma̱ún keʼún ña̱ násama na̱ ñuu Jehová, ni xíniñúʼu sandákoún sava ña̱ xi̱kutóún keʼún ti̱xin ñuura. Ni nda̱a̱ ndáaka chiñu ná taxina ndaʼún, kusi̱í-iniún xíʼinña. Ndakaʼún chi ndáyáʼvivaún nu̱ú Jehová ni nda̱a̱ ndáaka chiñu ná kuumiíún ti̱xin ñuura. Nu̱ú Jehová ña̱ ndáyáʼvika kúú ña̱ ná kuniso̱ʼún ña̱ káʼa̱nra nu̱úka chiñu ña̱ kúúmiíún. w22.11 23 párr. 10, 11

Ta̱ Onesíforo na̱ndukúra ta̱ apóstol Pablo, ta tá nda̱ni̱ʼírara chi̱ndeétáʼanra xíʼinra. Nda̱a̱ kivi kaʼnívana ta̱ Onesíforo xa̱ʼa̱ ña̱ ke̱ʼéra ña̱yóʼo. ¿Ndáaña sákuaʼayó xíʼin ña̱yóʼo? Ña̱ sákuaʼayó kúú ña̱ ná va̱ása yi̱ʼvíyó nu̱ú inkana ña̱ va̱ʼa chindeétáʼanyó xíʼin na̱ hermanoyó na̱ íxandi̱va̱ʼana xíʼin. Ná chika̱a̱yó ndee̱ ña̱ ndakiʼinyó tu̱ʼunna ta chindeétáʼanyó xíʼinna (Prov. 17:​17). Ná na̱ʼa̱yó ña̱ kúʼvi̱-iniyó xíniyóna ta ná chindeétáʼanyó xíʼinna. Kotondó ndáaña kéʼé na̱ hermanoyó xíʼin ná hermanayó na̱ ñuu Rusia tá chika̱a̱na iin na̱yóʼo veʼeka̱a. Tá xáʼa̱n iin na̱yóʼo nu̱ú na̱ chíñu, ndiʼi na̱ hermano xáʼa̱n ña̱ chindeétáʼanna xíʼinna. ¿Ndáaña sákuaʼayó xíʼin ña̱yóʼo? Tá káʼa̱nna ña̱ vatá xa̱ʼa̱ na̱ hermanoyó na̱ kúúmií chiñu ti̱xin ñuu Ndióxi̱, tá táannana veʼeka̱a á íxandi̱va̱ʼana xíʼinna, ná va̱ása yi̱ʼvíyó. Ná ka̱ʼa̱nyó xa̱ʼa̱na xíʼin Ndióxi̱, ná chindeétáʼanyó xíʼin na̱ veʼena ta saátu ná ndukúyó ki̱ʼva ña̱ chindeétáʼanyó xíʼin miína (Hech. 12:5; 2 Cor. 1:​10, 11). w22.11 17 párr. 11, 12

Na̱ anciano xíniñúʼu sandíkona-inina na̱ hermano xíʼin tu̱ʼun Ndióxi̱ (1 Ped. 5:2). Tá iin kama kúu iin tu̱ndóʼo, siʼna xíniñúʼu kotona á íyo va̱ʼa na̱ hermano ta kotona á íyo ña̱ kuxuna, ti̱ko̱to̱ kundixina á nu̱ú kundoona. Na̱ hermano na̱ yáʼa nu̱ú tu̱ndóʼo sana ku̱a̱ʼáva yo̱o̱ xíniñúʼuna ña̱ sandíkoyó-inina xíʼin tu̱ʼun Ndióxi̱ (Juan 21:​15). Ta̱ Harold ta̱ kúú Comité ña̱ Sucursal xa̱a̱ káʼa̱nra xíʼin ku̱a̱ʼá na̱ yáʼa nu̱ú tu̱ndóʼo, ta̱yóʼo káchira: “Ku̱a̱ʼáva tiempo yáʼa tasaá va̱ʼa kúni na̱ hermano tá yáʼana nu̱ú iin tu̱ndóʼo. Kiviva ndakaʼánna xa̱ʼa̱ ña̱ ndo̱ʼona. Tá kúú, kivi ndakaʼánna xa̱ʼa̱ iin na̱ veʼena na̱ ni̱xi̱ʼi̱, xa̱ʼa̱ iin ña̱ʼana ña̱ ndáyáʼviní ndi̱ʼi-xa̱ʼa̱ á xa̱ʼa̱ iin ña̱ ndeéní sa̱xóʼvi̱-inina. Ta kusuchíva-inina tá ná ndakaʼánna xa̱ʼa̱ ña̱yóʼo. Ta su̱ví ña̱yóʼo kúni̱ kachiña ña̱ va̱ása kándíxana Ndióxi̱, chi ndiʼivayó kivi ndakaʼányó xa̱ʼa̱ ña̱ ndóʼoyó ta su̱ví iin ku̱a̱chiví kúúña”. Ndáyáʼviní kundiku̱n na̱ anciano consejo yóʼo: “Kuakundó xíʼin na̱ xáku” (Rom. 12:​15). w22.12 22 párr. 1; 24, 25 párr. 10, 11

Jehová va̱ʼaní-inira ta táxira espíritu santo ndaʼa̱yó ña̱ va̱ʼa chindeétáʼanña xíʼinyó ña̱ keʼéyó ña̱ va̱ʼa. Tá káʼviyó tu̱ʼun Ndióxi̱ saá kúú ña̱ táxiyó ña̱ chindeétáʼan espíritu yóʼo xíʼinyó. Ta saátu ndákiʼinyó espíritu santo tá ku̱a̱ʼa̱nyó reunión. Ta kán ku̱a̱ʼá tiempo kítáʼanyó xíʼin na̱ hermanoyó ta saátu na̱yóʼo chíkaa̱na ndee̱ ña̱ keʼéna nina ña̱ va̱ʼa, ta ña̱yóʼo ndásandakúña-iniyó (Heb. 10:​24, 25; 13:7). Tá xíʼin ndiʼi níma̱yó káʼa̱nyó xíʼin Jehová, ta xákundáʼviyó nu̱úra ña̱ chindeétáʼanra xíʼinyó ña̱ sandákooyó iin ña̱ʼa, saá taxira espíritu santo ndaʼa̱yó ña̱ chindeétáʼanña xíʼinyó ña̱ kundeé-iniyó. Ña̱yóʼo kǒo kúni̱ kachiña ña̱ sáku̱taʼa Jehová ndiʼi ña̱ va̱ása va̱ʼa ndákanikaxi̱níyó xa̱ʼa̱, soo taxira ndee̱ ndaʼa̱yó ña̱ kǒo keʼé tukuyóña. Tá xa̱a̱ ki̱xáʼayó viíní kéʼéyó chiñu nu̱ú Ndióxi̱, ná chikaa̱yó ndee̱ ña̱ kǒo sandákooyó ña̱yóʼo ta ná ndakundeéyó ndakanixi̱níyó xa̱ʼa̱ ña̱ va̱ʼa. w23.01 11 párr. 13, 14

Biblia va̱ása níkuva̱ʼaña ña̱ ka̱ʼa̱nña xíʼinyó ndáa ki̱ʼva kundaayó miíyó á ndáaña xíniñúʼu kuxuyó. Soo káʼa̱nvaña xíʼinyó xa̱ʼa̱ ña̱ ndákanixi̱ní Jehová xa̱ʼa̱ ña̱yóʼo. Tá kúú, táxiña consejo yóʼo ndaʼa̱yó: “Kuxíká nu̱ú ña̱ʼa ña̱ kivi tavá kue̱ʼe̱ xíʼún” (Ecl. 11:​10). Biblia káʼa̱nña xíʼinyó ña̱ va̱ása xíniñúʼu kuxu náʼnáyó á ña̱ koʼoyó ku̱a̱ʼání ndixi chi ña̱yóʼo kivi taváña kue̱ʼe̱ xíʼinyó (Prov. 23:​20). Ña̱kán kúni̱ Jehová ña̱ ná sakúaʼayó ka̱ʼnu̱-iniyó tá xa̱a̱ ná ndaka̱xinyó nda̱saa kuxuyó á koʼoyó (1 Cor. 9:​25). Tá kúni̱yó na̱ʼa̱yó nu̱ú Ndióxi̱ ña̱ táxiníyó tíxa̱ʼvi ndaʼa̱ra xa̱ʼa̱ ña̱ ta̱xira ña̱ tákuyó, xíniñúʼu sakúaʼayó ña̱ viíní ndakanixi̱níyó (Sal. 119:​99, 100; Prov. 2:​11). Tá kúú, tá ndáka̱xinyó ndáaña kuxuyó xíniñúʼu viíní ndakanixi̱níyó. Ni kútóonívayó kuxuyó iin ña̱ʼa, soo tá kúnda̱a̱-iniyó ña̱ kivi taváña kue̱ʼe̱ xíʼinyó va̱ʼaka ná kǒo kuxuyóña. Na̱ʼa̱yó ña̱ kúúyó na̱ yiví ndíchi tá ná ku̱su̱nyó hora ña̱ xíniñúʼu ku̱su̱nyó, tá ná keʼé ni̱ʼiyó ejercicio, tá ná kuchuyó ta limpio ná koo veʼeyó. w23.02 21 párr. 6, 7

¿Ndáa ki̱ʼva ndani̱ʼíyó ña̱ ndáyáʼviní va̱xi nu̱ú Biblia? Ná sakúaʼayó xa̱ʼa̱ ña̱ káʼa̱n 2 Timoteo 3:​16, 17. Yóʼo káchiña, “ndiʼi ña̱ ni̱ka̱ʼyi̱ nu̱ú tu̱ʼun Ndióxi̱” va̱ʼaní “chíndeétáʼanña xíʼinyó ña̱ va̱ʼa sanáʼa̱yó na̱ yiví, ña̱ va̱ʼa na̱ʼa̱ña nu̱úyó ndáaña kúú ña̱ va̱ása va̱ʼa, ndásanda̱kúña ndiʼi ña̱ʼa, ta kivi nasamaña ña̱ ndákanixi̱níyó”. Ña̱kán tá káʼviyó ña̱ va̱xi nu̱ú Biblia ná kotoyó ndáaña sánáʼa̱ña miíyó xa̱ʼa̱ Jehová, xa̱ʼa̱ ña̱ kúni̱ra keʼéra á xa̱ʼa̱ consejo ña̱ kúni̱ra taxira ndaʼa̱yó. Xíniñúʼu nandukúyó ti̱xin relato ña̱ kivi chindeétáʼan xíʼinyó ña̱ sandákooyó ña̱ va̱ása va̱ʼa kéʼéyó ta ndakundeéyó nda̱kú koo iniyó xíʼin Jehová. Ta, ¿ndáaña xíniñúʼu keʼéyó ña̱ va̱ʼa nasama iin relato ña̱ ndákanixi̱níyó? Ná nandukúyó ña̱ va̱xi nu̱úña ña̱ kivi chindeétáʼan xíʼinyó ndakanixi̱níyó nda̱a̱ táki̱ʼva ndákanixi̱ní Jehová. Tá ná keʼéyó ña̱yóʼo, saá ndani̱ʼíyó ku̱a̱ʼáka ña̱ ndáyáʼvi va̱xi nu̱ú Biblia ña̱ kivi chindeétáʼan xíʼinyó tá káʼviyóña. w23.02 11 párr. 11

¿Ama kixáʼa ta̱ Jesús kaʼndachíñura? Nda̱a̱ táki̱ʼva káchi inka profecía ña̱ va̱xi nu̱ú libro ta̱ Daniel, kixáʼara kaʼndachíñura tá ná ndiʼi ña̱ u̱xa̱ tiempo (Dan. 4:​10-​17). “U̱xa̱ tiempo”, kúúña 2,520 ku̱i̱ya̱. Ña̱yóʼo ki̱xáʼaña ku̱i̱ya̱ 607 tiempo xi̱naʼá, tá kǒo níxiinka na̱ ñuu Babilonia taxina kaʼndachíñu ta̱ so̱ndíʼi rey, ta̱ nda̱kaxin Jehová kaʼndachíñu chí ñuu Jerusalén. Ta ña̱ u̱xa̱ tiempo yóʼo ndi̱ʼiña ku̱i̱ya̱ 1914, tá ki̱xáʼa ta̱ Jesús xáʼndachíñura, chi ta̱yóʼo kúú ta̱ kúúmií derecho ña̱ kaʼndachíñura (Ezeq. 21:​25-​27). ¿Ndáa ki̱ʼva chíndeétáʼan profecía yóʼo xíʼinyó? Ña̱ kunda̱a̱-iniyó xa̱ʼa̱ profecía ña̱ káʼa̱n xa̱ʼa̱ “u̱xa̱ tiempo”, chíndeétáʼanña xíʼinyó ña̱ va̱ása kaka-iniyó ña̱ saxínuva Jehová ña̱ ni̱ka̱ʼa̱nra mií tiempo ña̱ ni̱ka̱ʼa̱nra kooña. Ta miíra kúú ta̱ nda̱kaxin ama kixáʼa kaʼndachíñu Reinora. Ta tá ki̱xaa̱ tiempo kán, ki̱xáʼa Reinora xáʼndachíñuña. Ta saátu saxínu Jehová ndiʼi profecía ña̱ ni̱ka̱ʼa̱nra tiempo ña̱ xa̱a̱ ni̱ka̱ʼa̱nra kooña. Ña̱kán ki̱vi̱ káʼnu Jehová “va̱ása kuku̱a̱chi̱ña” (Hab. 2:3). w22.07 3 párr. 3-5