Noviembre

Na̱ ndásakáʼnu Ndióxi̱ va̱ása xíniñúʼu ka̱ʼa̱nna tu̱ʼun kini. Soo tá va̱ása kíʼinyó kuenta, kivi ka̱ʼa̱nyó tu̱ʼun ña̱ sáxo̱ʼvi̱-ini inkana. Va̱ása xíniñúʼu ka̱ʼa̱nyó ña̱ va̱ása va̱ʼa xa̱ʼa̱ na̱ káʼa̱n inka tu̱ʼun á na̱ ke̱e inka ñuu. Saátu va̱ása xíniñúʼu ka̱ʼa̱nyó tu̱ʼun ña̱ kivi sandákava-ini inkana á ña̱ kivi sáxo̱ʼvi̱-inina. Ka̱ʼa̱n tu̱ʼun ña̱ chíka̱a̱ ndee̱ xíʼinna. Nu̱úka ña̱ ka̱ʼa̱n kúáchiún xa̱ʼa̱ inkana á ña̱ ka̱ʼún ña̱ va̱ása va̱ʼa xa̱ʼa̱na, va̱ʼaka chika̱ún ndee̱ ña̱ ka̱ʼún xíʼinna ña̱ va̱ʼaní íyo ña̱ kéʼéna. Va̱ása kúni̱yó kooyó nda̱a̱ táki̱ʼva ni̱xi̱yo na̱ ñuu Israel. Ni ta̱xi Jehová ku̱a̱ʼání ña̱ va̱ʼa ndaʼa̱na, soo ndiʼi tiempo xi̱ka̱ʼa̱n kúáchina. Ta ná ndakaʼányó chi tá káʼa̱n kúáchiyó, nda̱a̱ inkana kíxáʼa kéʼé ña̱yóʼo. Tá kúú, tá ndi̱kó u̱xu̱ na̱ ta̱a na̱ ni̱xa̱ʼa̱n xi̱to se̱ʼé ñuu Canaán ta na̱túʼunna nina ña̱ va̱ása va̱ʼa xíʼin na̱ ñuu Israel, ndiʼina ki̱xáʼana káʼa̱n kúáchina xa̱ʼa̱ ta̱ Moisés (Núm. 13:​31–14:4). Soo va̱ʼaní chíndeétáʼanyó xíʼin inkana tá káʼa̱nyó xíʼinna ña̱ va̱ʼaní íyo ña̱ kéʼéna. w22.04 8 párr. 16, 17

Nda̱a̱ tá tiempo xi̱naʼá, Jehová xa̱a̱ chíndeétáʼanra xíʼin ku̱a̱ʼání na̱ va̱lí ña̱ xa̱a̱na vií kutáʼanna xíʼinra. Ña̱kán kivitu chindeétáʼanra xíʼin se̱ʼún ña̱ kutáʼan viína xíʼinra tá ná taxina chindeétáʼanra xíʼinna (1 Cor. 3:​6, 7). Tá ná kixáʼa se̱ʼún kúxíkána nu̱ú Jehová, ndakundeévara kuʼvi̱-inira kunirana (Sal. 11:4). Ta tá loʼo kuití ná kixáʼana na̱ʼa̱na ña̱ kúni̱na keʼéna ña̱ kútóora, ndi̱ku̱n kama chindeétáʼanra xíʼinna (Hech. 13:48; 2 Crón. 16:9). Ta saátu kivi chindeétáʼanra xíʼún ña̱ ka̱ʼún tu̱ʼun va̱ʼa xíʼin se̱ʼún mií tiempo ña̱ xíniñúʼunaña (Prov. 15:23). Ta kivi chika̱a̱ra-ini iin ta̱ hermano á iin ñá hermana ña̱ kundi̱ʼi-inina xa̱ʼa̱ se̱ʼún. Tá xa̱a̱ ná kuchéena Jehová kivi chindeétáʼanra xíʼinna ndakaʼánna xa̱ʼa̱ iin ña̱ sa̱náʼúnna tá ya̱chi̱ (Juan 14:26). Tá ná ndakundeún chinúún iin yichi̱ va̱ʼa nu̱ú se̱ʼún xíʼin ña̱ káʼún á xíʼin ña̱ kéʼún, Jehová taxira ku̱a̱ʼání ña̱ va̱ʼa ndaʼún. w22.04 21 párr. 18

Xa̱ʼa̱ ña̱ sáa̱ní ta̱ Ndi̱va̱ʼa, íxandi̱va̱ʼara xíʼin na̱ nda̱kaxin Ndióxi̱ ku̱ʼu̱n chí ndiví, na̱yóʼo kuenta Reino Ndióxi̱ kúúna ta “nda̱kiʼinna chiñu ña̱ natúʼunna xa̱ʼa̱ ta̱ Jesús” (2 Cor. 5:20; Efes. 6:​19, 20). Tá ku̱i̱ya̱ 1918, chi̱ka̱a̱na ku̱a̱chi síkí u̱na̱ na̱ hermano na̱ xi̱niʼi yichi̱ nu̱ú na̱ ñuu Ndióxi̱ ta ni̱ka̱ʼa̱nna ña̱ ku̱a̱ʼání ku̱i̱ya̱ kuñuʼu na̱yóʼo veʼeka̱a. Ku̱a̱ʼánína xi̱ndakanixi̱nína ña̱ va̱ása kuchiñuka na̱ hermano yóʼo saxínuna chiñu ña̱ xi̱kuumiína (Apoc. 11:​3, 7-11). Va̱ása níxi̱nu iin ku̱i̱ya̱ ña̱ kuñuʼu na̱ hermano kán veʼeka̱a, ta ke̱evana tá marzo ña̱ ku̱i̱ya̱ 1919, tasaá sa̱ndíʼi-xa̱ʼa̱ na̱ chíñu ku̱a̱chi ña̱ chi̱kaa̱na sa̱tána. Ta ndi̱ku̱n kama ki̱xáʼa tuku na̱ hermano yóʼo nátúʼunna xíʼin na̱ yiví xa̱ʼa̱ Reino Ndióxi̱. Soo nda̱kundeéva ta̱ Ndi̱va̱ʼa i̱xandi̱va̱ʼara xíʼin na̱ hermano. Chi nani saá ndeéka ki̱xáʼara sáxo̱ʼvi̱ra ndiʼi na̱ ndásakáʼnu Ndióxi̱ (Apoc. 12:15). Xa̱ʼa̱ ña̱kán ndiʼiyó xíniñúʼu ndakúní koo iniyó ta kandíxaníyó Ndióxi̱ (Apoc. 13:10). w22.05 5, 6 párr. 14-16

Ti̱xin iin visión xi̱ni ta̱ apóstol Juan u̱vi̱ tiʼvi na̱ yiví na̱ chíndeétáʼan xíʼin Reino Ndióxi̱ ña̱ ndákiʼinna ña̱ kutakuna ndiʼi tiempo ta saátu ndákiʼinna ku̱a̱ʼáníka ña̱ va̱ʼa. Siʼna xi̱nira 144,000 na̱ yiví. Na̱ íyo nu̱ú ñuʼú yóʼo kúúna, ta nda̱kaxinnana ña̱ ku̱ʼu̱nna chí ndiví ña̱ va̱ʼa ndakutáʼanna xíʼin ta̱ Jesús. Tasaá inkáchi kaʼndachíñuna nu̱ú ñuʼú yóʼo ti̱xin Reino Ndióxi̱ (Apoc. 5:​9, 10; 14:​3, 4). Ta̱ Juan xi̱nira ña̱ ndítana xíʼin ta̱ Jesús chí yuku̱ Sion ña̱ íyo chí ndiví (Apoc. 14:1). Tá tiempo ña̱ ni̱xi̱yo na̱ apóstol ki̱xáʼa Jehová ndáka̱xinra na̱ yiví na̱ koo táʼan na̱ 144,000, ta nda̱a̱ tiempo vitin ndáka̱xinkarana (Luc. 12:32; Rom. 8:17). Soo iin ángel ni̱ka̱ʼa̱n xíʼin ta̱ apóstol Juan, ña̱ ndáa si̱lóʼo kuití na̱yóʼo kindo̱o nu̱ú ñuʼú yóʼo tiempo so̱ndíʼi vitin (Apoc. 12:17). Ti̱xin ña̱ gran tribulación Jehová ndakiʼinra na̱yóʼo ña̱ ku̱ʼu̱nna chí ndiví ña̱ va̱ʼa ndakutáʼanna xíʼin na̱ xa̱a̱ íyo kán xa̱ʼa̱ ña̱ nda̱kú ni̱xi̱yo inina. Tasaá na̱ 144,000 yóʼo kaʼndachíñuna xíʼin ta̱ Jesús ti̱xin Reino Ndióxi̱ (Mat. 24:31; Apoc. 5:​9, 10). w22.05 16 párr. 4, 5

Ta̱ Jesús sa̱náʼa̱ra na̱ discípulora ña̱ xíniñúʼu viíní ndakanixi̱nína xa̱ʼa̱ miína. Ni̱ka̱ʼa̱nra ña̱yóʼo xíʼinna: “Nda̱a̱ yixí xi̱níndó kúnda̱a̱ va̱ʼa-inira nda̱saa kúú ña̱ íyo” (Mat. 10:30). Sándi̱koní tu̱ʼun yóʼo iniyó tá va̱ása vií íyo ña̱ ndákanixi̱níyó xa̱ʼa̱ miíyó. Ña̱yóʼo sándakaʼánña miíyó ña̱ ndíʼi̱ní-ini Jehová xa̱ʼa̱yó ta ndáyáʼviníyó nu̱úra. Iin artículo ña̱ ka̱na nu̱ú tutu La Atalaya ni̱ka̱ʼa̱nña xíʼinyó ña̱ xíniñúʼu viíní ndakanixi̱níyó xa̱ʼa̱ miíyó. Ña̱yóʼo ka̱chiña: “Va̱ása xíniñúʼu ndakanixi̱níyó ña̱ ndáyáʼviníyó ta kixáʼayó ni̱nu kuniyó; soo saátu va̱ása xíniñúʼu ndakanixi̱níyó ña̱ ni loʼoví va̱ása ndáyáʼviyó. Saáchi ña̱ xíniñúʼu keʼéyó kúú ña̱ viíní ndakanixi̱níyó xa̱ʼa̱ miíyó, ña̱yóʼo kúni̱ kachiña ña̱ xíniñúʼu ndakuniyó ña̱ íyo sava ña̱ va̱ʼa kéʼéyó ta íyo sava ña̱ va̱ása kívi keʼéyó”. w22.05 24, 25 párr. 14-16

¿Ndáaña xíniñúʼu keʼé iin tá iinyó ña̱ vií kutáʼanyó? Ná chika̱a̱yó ndee̱ ña̱ kǒo sákakuyó ku̱a̱chi xíʼin na̱ hermanoyó (Mat. 5:9; Rom. 12:18). Ña̱kán tá ná chika̱a̱yó ndee̱ ña̱ vií kutáʼanyó xíʼin na̱ hermanoyó ti̱xin congregación, saá kúú ña̱ inkáchi kutáʼanyó ndasakáʼnuyó Jehová. Miíra ka̱na na̱ hermano ña̱ kuñuʼuna ti̱xin ñuura ña̱ va̱ʼa ndasakáʼnunara nda̱a̱ táki̱ʼva kúni̱ miíra (Juan 6:44). Kúsi̱íníva-ini Jehová ta xítora ña̱ chíka̱a̱níyó ndee̱ ña̱ vií kutáʼanyó xíʼin na̱ hermanoyó, saáchi ndáyáʼviní na̱yóʼo nu̱úra (Is. 26:3; Ageo 2:7). ¿Ndáaña xíniñúʼu keʼéyó ña̱ va̱ʼa ndakiʼinyó bendición ña̱ táxi Jehová ndaʼa̱ na̱ káchíñu nu̱úra? Ná ndakanixi̱níyó xa̱ʼa̱ ndiʼi ña̱ xa̱a̱ sákuaʼayó nu̱ú tu̱ʼunra. Tá káʼviyó ta ndákanixi̱níyó, saá kúú ña̱ xa̱a̱yó keʼéyó ña̱ kútóora. Tá kúú ña̱ xa̱a̱yó kuʼvi̱-iniyó kuniyó na̱ hermano nda̱a̱ táki̱ʼva kúʼvi̱-iniyó xíniyó na̱ veʼeyó (Rom. 12:10). w22.11 12, 13 párr. 16-18

Tá íxakáʼnu-ini Jehová xa̱ʼa̱yó, va̱ʼaní kúniyó. Ta ña̱yóʼo chíndeétáʼanña xíʼinyó ña̱ va̱ása ndi̱ʼiní-iniyó ta vií koo ña̱ xínitúni̱yó. Ta va̱ása ndákiʼinvíyó ña̱yóʼo tá íxakáʼnu-ini iin na̱ yiví xa̱ʼa̱yó, chi iinlá Jehová kúú ta̱ táxiña (Hech. 3:19). Tá íxakáʼnu-inira xa̱ʼa̱yó, táxira ña̱ ná xa̱a̱yó ndakutáʼan vií tukuyó xíʼinra, ta nda̱a̱ táki̱ʼva íyo na̱ va̱ása níki̱ʼvi ku̱a̱chi saá íyoyó nu̱úra. Tá xa̱a̱ i̱xakáʼnu-ini Jehová xa̱ʼa̱ iin na̱ yiví, va̱ása ndíkóra káʼa̱nra xa̱ʼa̱ña xíʼinna ta va̱ása táxira castigo ndaʼa̱na xa̱ʼa̱ ña̱ ke̱ʼéna (Is. 43:25). Saáchi nda̱a̱ táki̱ʼva xíká kíndo̱o nu̱ú kána ñu̱ʼu xíʼin nu̱ú kíʼviña saá xíká ndákoo Jehová ku̱a̱chiyó (Sal. 103:12). Tá ndákanixi̱níyó xa̱ʼa̱ ki̱ʼva ña̱ íxakáʼnu-ini Jehová xa̱ʼa̱yó, táxiníyó tíxa̱ʼvi ndaʼa̱ra ta saátu íxato̱ʼóníyóra (Sal. 130:4). Ndiʼivana íxakáʼnu-ini Jehová xa̱ʼa̱ ni nda̱a̱ ndáaka ku̱a̱chi ni̱ki̱ʼvina. Ku̱a̱ʼání ña̱ʼa xíni̱ Jehová xa̱ʼa̱yó chi miíra kúú ta̱ i̱xava̱ʼa miíyó, ta va̱ʼaní xíni̱ra xa̱ʼa̱ ley chi miíra kúú ta̱ ta̱xiña ta saátu nda̱kúní ndátiinra ku̱a̱chi xíʼinyó. Ta ndiʼi ña̱yóʼo kúú ña̱ xíniñúʼura tá xítora á ixakáʼnu-inira xa̱ʼa̱yó á va̱ása. w22.06 5 párr. 12-14

Ndi’iyó na̱ kúʼvi̱-ini xíni Jehová, ndátuyó ña̱ taxira ku̱a̱ʼání ña̱ va̱ʼa ndaʼa̱yó chí nu̱únínu, saáchi si̱lóʼo kúma̱ní ta sandíʼi-xa̱ʼa̱ra kue̱ʼe̱ xíʼin ña̱ kúsuchí-iniyó ta va̱ása kuvikayó (Apoc. 21:​3, 4). Saátu chindeétáʼanra xíʼinyó ña̱ ndasaliviyó nu̱ú ñuʼú yóʼo tá vitá íyo iniyó (Sal. 37:​9-11). Ta saátu chindeétáʼanra xíʼinyó ña̱ va̱ʼaníka xa̱a̱yó kutáʼanyó xíʼinra. Ña̱kán liviníva ña̱ ndátuyó ndakiʼinyó. Soo, ¿nda̱chun kándíxayó ña̱ ndixa xi̱nu ña̱ káʼa̱n Jehová keʼéra chí nu̱únínu? Saáchi ta̱kán, ndiʼi tiempo sáxi̱nura ña̱ káʼa̱nra. Íyova ña̱ náʼa̱ nu̱úyó ña̱ kivi kandíxayó ña̱ káʼa̱nra (Sal. 27:14). ¿Ndáa ki̱ʼva náʼa̱yó ña̱ ndáa-iniyóra? Xíniñúʼu kúee koo iniyó ta kusi̱í-iniyó kundatuyó ña̱ saxínura ndiʼi ña̱ káʼa̱nra (Is. 55:​10, 11). Ndiʼi tiempo nda̱kúní ná koo iniyó xíʼin Jehová ta ná kandíxayó ña̱ taxira ña̱ va̱ʼa ndaʼa̱yó tá chíka̱a̱yó ndee̱ ña̱ nandukúyóra. w22.06 20 párr. 1; 25 párr. 18

Ta xa̱ʼa̱ ña̱ mií Jehová kúú ta̱ níʼi yichi̱ nu̱úyó, kivi kandíxayó ña̱ taxira ña̱ xíniñúʼuyó nda̱a̱ táki̱ʼva íyo ña̱ káʼa̱nra nu̱ú 1 Timoteo 5:8 xíʼin na̱ níʼi yichi̱ nu̱ú na̱ veʼe. Tá kándíxayó ña̱ kúʼvi̱-ini Jehová xínira miíyó ta saátu na̱ veʼeyó, va̱ása kaka-iniyó ña̱ taxivara ña̱ xíniñúʼuyó (Mat. 6:​31-33). Ta xa̱ʼa̱ ña̱ kúʼvi̱-ini Jehová xínira miíyó kúú ña̱ táxira ña̱ xíniñúʼuyó, ta ku̱a̱ʼáníva ña̱yóʼo táxira ndaʼa̱yó. Tá i̱xava̱ʼa Jehová ñuʼú yóʼo, va̱ása ní ixava̱ʼara loʼo kuití ña̱ʼa ña̱ chindeétáʼan xíʼinyó kutakuyó. Chi xa̱ʼa̱ ña̱ kúʼvi̱ní-inira xínira miíyó ku̱a̱ʼání ña̱ʼa i̱xava̱ʼara nu̱ú ñuʼú yóʼo ña̱ va̱ʼa kusi̱í-iniyó (Gén. 2:9). Ta ni loʼoní ña̱ʼa kúúmiíyó ña̱ kuxuyó ki̱vi̱ tá ki̱vi̱, ná taxiyó tíxa̱ʼvi ndaʼa̱ Jehová xa̱ʼa̱ ña̱ kúúmiíyó ña̱yóʼo. Ndiʼi tiempo íyo Jehová xíʼinyó ta táxira ña̱ xíniñúʼuyó ki̱vi̱ tá ki̱vi̱ (Mat. 6:11). Ta ná ndakaʼányó chi ku̱a̱ʼáníkava ña̱ʼa taxi Jehová ndaʼa̱yó chí nu̱únínu nu̱ú ña̱ kúúmiíyó vitin (Is. 65:​21, 22). w22.06 15 párr. 7, 8

Su̱ví nda̱saa kuití na̱ káʼviyó xíʼin kúú na̱ xíniñúʼu sakúaʼa va̱ʼa xa̱ʼa̱ Ndióxi̱ chi saátu xíniñúʼu keʼé ndiʼi miívayó. Ta̱ apóstol Pablo ka̱ʼyíra, tá kéʼéyó ña̱ sákuaʼayó, chindeétáʼanña xíʼinyó ña̱ ndakuniyó “ndáaña kúú ña̱ va̱ʼa ta ndáaña kúú ña̱ va̱ása va̱ʼa”. Xa̱ʼa̱ ña̱ kéʼé ku̱a̱ʼání na̱ yiví ku̱a̱chi kini, kivi ixayo̱ʼvi̱ña xíʼinyó ña̱ kandíxayó ña̱ káʼa̱n Jehová xíʼinyó. Soo ta̱ Jesús táxira ku̱a̱ʼání ña̱ chíndeétáʼan xíʼinyó ña̱ kandíxakayó Ndióxi̱ ta ña̱yóʼo nu̱ú Biblia va̱xiña. Nda̱a̱ táki̱ʼva ke̱ʼé ta̱ Jesús, saátu miíyó íxato̱ʼóníyó ki̱vi̱ Ndióxi̱ (Juan 17:​6, 26). Tá ku̱i̱ya̱ 1931 nda̱kunaníyó testigo Jehová ta ña̱yóʼo nu̱ú Biblia ka̱naña. Tá nda̱kiʼinyó ki̱vi̱ yóʼo, ni̱na̱ʼa̱yó ña̱ kúni̱yó kuumiíyó ki̱vi̱ yiváyó ta̱ íyo chí ndiví saáchi ndáyáʼviní ña̱yóʼo nu̱úyó (Is. 43:​10-12). Ta saátu nu̱ú ña̱ Traducción del Nuevo Mundo, va̱xi ki̱vi̱ Ndióxi̱ nu̱ú xíniñúʼu kixiña. w22.07 11 párr. 11, 12

Inka ña̱ nda̱a̱ ña̱ va̱xi nu̱ú Biblia kúú ña̱ káʼa̱n xa̱ʼa̱ Reino Ndióxi̱. Ta̱ Jesús chi̱táʼanra ña̱ nda̱a̱ xa̱ʼa̱ Reino Ndióxi̱ xíʼin iin ña̱ʼa ña̱ ndáyáʼviní ña̱ xi̱ndika̱a̱ se̱ʼé. Ta̱yóʼo ka̱chira: “Reino Ndióxi̱ ña̱ íyo chí ndiví, íyoña táki̱ʼva íyo iin ña̱ʼa ña̱ ndáyáʼviní ña̱ xi̱ndika̱a̱ se̱ʼé ti̱xin ñuʼú ta iin ta̱a nda̱ni̱ʼíña. Ta̱yóʼo chi̱se̱ʼé tukuraña, ta xa̱ʼa̱ ña̱ ni̱kusi̱íní-inira ki̱tara ku̱a̱ʼa̱nra ta ni̱xi̱kóra ndiʼi ña̱ kúúmiíra ta sa̱tára ñuʼú kán” (Mat. 13:44). Nda̱a̱ táki̱ʼva xi̱niyó, su̱ví ña̱yóʼoví kúú ña̱ xíkara nándukúra, soo tá nda̱ni̱ʼíraña chi̱ka̱a̱níra ndee̱ ña̱ va̱ʼa kuumiíraña: saáchi ni̱xi̱kóra ndiʼi ña̱ʼa ña̱ xi̱kuumiíra. ¿Nda̱chun ke̱ʼéra ña̱yóʼo? Saáchi ku̱nda̱a̱-inira ña̱ ndáyáʼviníña. Kúnda̱a̱-iniyó ña̱ ni iin ña̱ʼa ña̱ íyo ñuyǐví yóʼo va̱ása kítáʼanña xíʼin ña̱ kúsi̱íní-iniyó káchíñuyó nu̱ú Jehová ta saátu ña̱ ndátuyó kooyó ndiʼi tiempo nu̱ú ñuʼú yóʼo tá ná kaʼndachíñu Reino Ndióxi̱. Ndáyáʼviníka ña̱ kutáʼan viíyó xíʼin Jehová nu̱úka ña̱ʼa ña̱ íyo ñuyǐví yóʼo. Ta ña̱ kooyó migo Jehová kúú ña̱ ndáyáʼviníka. Ña̱ sákusi̱íníka-iniyó kúú ña̱ keʼéyó ña̱ kúni̱ Jehová (Col. 1:10). w22.08 15 párr. 8, 9; 17 párr. 12

¿Nda̱chun va̱ʼa xi̱kunda̱a̱-ini ta̱ José ña̱ tá ná ku̱su̱nra xíʼinñá síʼí ta̱ Potifar iin ku̱a̱chi ndeé kúúna nu̱ú Ndióxi̱? Saáchi tá ni̱ya̱ʼa 200 ku̱i̱ya̱ saáví ka̱ʼyí ta̱ Moisés iin ley ña̱ káchi: “Va̱ása ku̱sún xíʼin na̱ kǒo ní tindaʼa̱ xíʼún” (Éx. 20:14). Ña̱ xi̱xini̱ ta̱ José xa̱ʼa̱ Jehová kúú ña̱ chi̱ndeétáʼan xíʼinra ña̱ kunda̱a̱-inira ndáaña ndákanixi̱ní Jehová xa̱ʼa̱ ña̱yóʼo. Xi̱xini̱ra ña̱ mií Jehová kúú ta̱ chi̱ndúʼú xa̱ʼa̱ ña̱ matrimonio, ta chi̱táʼanra iin ta̱a kuití xíʼin iin ñaʼá. Ta sana xi̱xini̱vara ña̱ u̱vi̱ yichi̱ chi̱ndeétáʼan Jehová xíʼin xi̱tán síkúára ñá Sara tá xi̱kuni̱ u̱vi̱ na̱ rey ku̱su̱nna xíʼinñá. Sana xi̱xini̱tura ña̱ chi̱ndeétáʼan Jehová xíʼin ñá Rebeca ñá síʼi ta̱ Isaac (Gén. 2:24; 12:​14-20; 20:​2-7). Ña̱ nda̱kanixi̱ní ta̱ José xa̱ʼa̱ ndiʼi ña̱yóʼo, chi̱ndeétáʼanña xíʼinra ña̱ kunda̱a̱-inira ndáaña kúú ña̱ va̱ʼa ta ndáaña kúú ña̱ va̱ása va̱ʼa nu̱ú Ndióxi̱. Ta xa̱ʼa̱ ña̱ xi̱kuʼvi̱-inira xi̱xinira Ndióxi̱, xi̱ ixato̱ʼóra ña̱yóʼo. w22.08 26 párr. 1, 2

Ña̱ profecía yóʼo va̱ása káʼa̱nña xa̱ʼa̱ na̱ ndataku chí ndiví ña̱ kuu tiempo so̱ndíʼi nda̱a̱ táki̱ʼva xi̱kunda̱a̱-iniyó tá ya̱chi̱. Chi xa̱ʼa̱ na̱ ndataku nu̱ú ñuyǐví xa̱áva káʼa̱nña. ¿Nda̱chun va̱ʼa kúnda̱a̱-iniyó ña̱ xa̱ʼa̱ na̱yóʼo káʼa̱nña? Saáchi nu̱ú Job 17:16 káʼa̱nña xa̱ʼa̱ yáká, ta tu̱ʼun yóʼo kítáʼanña xíʼin tu̱ʼun ña̱ káʼa̱n xa̱ʼa̱ nu̱ú ndúxu̱n na̱ ni̱xi̱ʼi̱. Ña̱yóʼo táxiña kúnda̱a̱-iniyó ña̱ Daniel 12:2 káʼa̱nña xa̱ʼa̱ ña̱ ndataku na̱ ni̱xi̱ʼi̱ tá ná ya̱ʼa tiempo ña̱ so̱ndíʼi ta saátu tá ná ya̱ʼa ña̱ Armagedón. Soo, ¿ndáaña kúni̱ kachi Daniel 12:2 tá káʼa̱nña ña̱ ndataku savana ta koona ndiʼi tiempo? Ña̱ kúni̱ kachiña kúú ña̱ ndakiʼinna ña̱ kutakuna ndiʼi tiempo tá ná sakúaʼana xa̱ʼa̱ Jehová xíʼin xa̱ʼa̱ ta̱ Jesús, ta kundiku̱nna ña̱ káʼa̱nna ti̱xin ña̱ mil ku̱i̱ya̱ (Juan 17:3). w22.09 21 párr. 6, 7

Jehová káʼa̱nra xíʼinyó ña̱ kandíxayó na̱ hermanoyó chi xíʼin ña̱ kéʼéna náʼa̱na ña̱ kiviva xa̱a̱yó kandíxayóna. Su̱ví xa̱a̱ ndi̱ku̱n kamaví xáa̱yó kándíxayó na̱ hermanoyó, chi ku̱a̱ʼá tiempo yáʼa tasaáví xáa̱yó kándíxayóna. ¿Ndáaña kivi keʼún ña̱ va̱ʼa kandíxaún na̱ hermano? Xíniñúʼu xa̱ún kuxini̱ va̱ʼúnna. Natúʼun xíʼinna tá ku̱a̱ʼún reunión. Tavá tiempo ña̱ kutáʼún xíʼinna tá ku̱a̱ʼa̱nndó natúʼunndó xa̱ʼa̱ Ndióxi̱. Kúee koo iniún xíʼinna ta taxi ná na̱ʼa̱na ña̱ kiviva kandíxaúnna. Tá sa̱kán xi̱nitáʼún xíʼin iin na̱ hermano, sana va̱ása kivi natúʼun xíʼinna xa̱ʼa̱ ndiʼi ña̱ ndóʼún. Soo tá xa̱a̱ ku̱a̱ʼá tiempo kítáʼún xíʼinna sana natúʼún xíʼinna xa̱ʼa̱ ña̱ ndóʼún (Luc. 16:10). Soo, ¿ndáaña kivi keʼéyó tá iin na̱ hermanoyó va̱ása nda̱kú níxi̱yo inina xíʼinyó? Ná va̱ása sandákooyó ña̱ kitáʼanyó xíʼinna. Tá ná va̱ása taxiyó kasi ña̱yóʼo nu̱úyó ña̱ kandíxayó inkana. w22.09 4 párr. 7, 8

Iin ta̱ anciano naní Miqueas ni̱tu̱vira ña̱ sava na̱ anciano va̱ása vií níkeʼéna xíʼinra. Ni ndo̱ʼora ña̱yóʼo, chika̱a̱ra ndee̱ ña̱ viíní ndakanixi̱níra ta va̱ása ndakava-inira. Xi̱ka̱ʼa̱nníra xíʼin Jehová ña̱ ná taxira espíritu santo ndaʼa̱ra ña̱ va̱ʼa kundeé-inira ya̱ʼara nu̱ú ña̱yóʼo ¿Ndáaña sákuaʼayó xíʼin ña̱yóʼo? Tá ndákanixi̱níún ña̱ va̱ása vií ní keʼé iin na̱ hermano na̱ íyo ti̱xin congregación xíʼún, va̱ása kundi̱ʼi̱ní-iniún ta va̱ása ndakava-iniún. Sana íyova ña̱ ndo̱ʼo na̱ hermano kán xa̱ʼa̱ ña̱kán ni̱ka̱ʼa̱nna saá xíʼún á ke̱ʼéna saá xíʼún. Ña̱kán natúʼun xa̱ʼa̱ ndiʼi ña̱ ndóʼún xíʼin Jehová ta ka̱ʼa̱n xíʼinra ña̱ ná chindeétáʼanra xíʼún ña̱ va̱ʼa ná ndakanixi̱níún nda̱a̱ táki̱ʼva ndákanixi̱ní miíra. Ta ná ndakanixi̱níyó ña̱ va̱ása níkuni̱ví na̱ hermano kán keʼéna saá xíʼinyó ta ná ixakáʼnu-iniyó xa̱ʼa̱na (Prov. 19:11). Ndakaʼún chi Jehová kíʼinra kuenta xíʼin ndiʼi ña̱ ndóʼún ta taxira ndee̱ ndaʼún ña̱ va̱ʼa ya̱ʼún nu̱úña (Ecl. 5:8). w22.11 21 párr. 5

Na̱ kúʼvi̱-ini xíni Jehová kúú na̱ ndukún koo migoún. Na̱ migoún kúú na̱ kivi chika̱a̱ka ndee̱ xíʼún ña̱ kachíñukaún nu̱ú Ndióxi̱ (Prov. 13:20). Iin ta̱ hermano ta̱ naní Julien ta̱ kúú anciano káchira: “Tá ni̱xi̱yo loʼi̱ xi̱kei̱ xi̱natúʼi̱n xíʼin na̱ yiví xa̱ʼa̱ Ndióxi̱ xíʼin na̱ hermano, ta na̱yóʼo ni̱xa̱a̱na ku̱una migoi̱. Na̱yóʼo xi̱kusi̱íní-inina tá xi̱natúʼunna xa̱ʼa̱ Ndióxi̱. Ta saátu ki̱ʼi̱n kuenta ña̱ va̱ása níxi̱chika̱i̱ ndee̱ ña̱ ndukúi̱ na̱ hermano na̱ xa̱a̱ síín síín ku̱i̱ya̱ ña̱ koona migoi̱”. ¿Ndáaña keʼún tá íyo iin na̱ kéʼé ña̱ va̱ása va̱ʼa ti̱xin congregación? Ta̱ apóstol Pablo xi̱kunda̱a̱-inira ña̱ ti̱xin congregación ña̱ ni̱xi̱yo tá siglo nu̱ú ni̱xi̱yo sava na̱ yiví na̱ va̱ása níxi̱kutóo keʼé chiñu Ndióxi̱. Ña̱kán ni̱ka̱ʼa̱nra xíʼin ta̱ Timoteo ña̱ ná kǒo kutáʼanra xíʼin na̱yóʼo (2 Tim. 2:​20-22). Xa̱a̱ chi̱ka̱a̱níyó ndee̱ ña̱ vií kutáʼanyó xíʼin Jehová ta ndáyáʼviníña nu̱úyó, ña̱kán ná va̱ása taxiyó ña̱ sakúxíkána miíyó nu̱úra. w22.08 5, 6 párr. 13-15

Va̱ása íyoyó nda̱a̱ táki̱ʼva íyo na̱ kíʼvi na̱ kǒo xíín kuniso̱ʼo consejo ña̱ táxi Ndióxi̱, chi kúʼvi̱va-iniyó xíniyó ña̱ sánáʼa̱ Jehová miíyó. Ta kivi kuʼvi̱ka-iniyó kuniyóña tá ná kotoyó ndáa ki̱ʼva xa̱a̱ chíndeétáʼanña xíʼinyó. Saátu ná kotoyó ndáa tu̱ndóʼo kúú ña̱ íyo nu̱ú na̱ kǒo xíín kuniso̱ʼo consejo Jehová. Ta saátu ná kiʼinníyó kuenta ña̱ va̱ʼaníka íyoyó xa̱ʼa̱ ña̱ xíniso̱ʼoyó ña̱ káʼa̱n Jehová xíʼinyó (Sal. 32:​8, 10). Jehová táxira ña̱ ndíchi ndaʼa̱ ndiʼi na̱ yiví. Ta káʼa̱nra ndáaña kundoʼo na̱ kǒo xíín sakúaʼa xa̱ʼa̱ ña̱ ndíchi ña̱ kúúmiíra (Prov. 1:​29-32). Na̱ kǒo xíín kuniso̱ʼo ña̱ káʼa̱n Jehová, va̱xi tu̱ndóʼo nu̱úna, soo na̱ xíniso̱ʼo consejo ña̱ káʼa̱nra ta ndíku̱nnaña, ni̱ʼína ña̱ va̱ʼa nda̱a̱ táki̱ʼva káʼa̱n texto yóʼo: “Soo na̱ xíniso̱ʼo ña̱ káʼi̱n kǒo nda̱a̱ ni iin ña̱ʼa sayíʼvi miína, ta nda̱a̱ ni iin tu̱ndóʼo va̱ása sayíʼvi miína” (Prov. 1:33). w22.10 21 párr. 11-13

Ña̱ íxato̱ʼóyó Jehová kúni̱ kachiña ña̱ va̱ása keʼéyó ña̱ʼa ña̱ kúndasíra xínira (Prov. 16:6). Ña̱kán chíka̱a̱níyó ndee̱ ña̱ sákuaʼayó ña̱ káʼa̱n Biblia xa̱ʼa̱ ndáaña kúú ña̱ va̱ʼa xíʼin ña̱ va̱ása va̱ʼa (2 Cor. 7:1). Tá ná keʼéyó ña̱ kútóo Jehová ta kundasíyó ña̱ kúndasíra xínira, saá kúú ña̱ si̱íní xa̱a̱yó kooyó (Sal. 37:27; 97:10; Rom. 12:9). Sana iin na̱ yiví kúnda̱a̱-inina ña̱ mií Jehová kúú ta̱ kúúmií derecho ña̱ ka̱ʼa̱nra ndáa ña̱ʼa kúú ña̱ va̱ʼa ta ndáaña kúú ña̱ va̱ása va̱ʼa. Soo su̱ví ña̱yóʼo kuití xíniñúʼu kunda̱a̱-inina xa̱ʼa̱ chi xíniñúʼu keʼéna ña̱ káʼa̱nra (Rom. 12:2). Xíʼin ña̱ kéʼéyó kúú ña̱ na̱ʼa̱yó á ndixa íxato̱ʼóyó chiñu ña̱ xáʼnda Jehová nu̱úyó (Prov. 12:28). Ta̱ David xi̱kunda̱a̱-inira ña̱ káʼa̱n Jehová kúú ña̱ va̱ʼaníka, ña̱kán ni̱ka̱ʼa̱nra ña̱yóʼo: “Sánáʼún yi̱ʼi̱ yichi̱ ña̱ taxi ña̱ kutakui̱. Na̱ íyo yatin nu̱ún si̱íní íyona, na̱ íyo chí ndaʼa̱ kúaʼún ndiʼi tiempo kusi̱í-inina” (Sal. 16:11). w22.10 8 párr. 9, 10

Vitání ni̱xi̱yo ini ta̱ Jesús ta viíní xi̱ndakanixi̱níra xa̱ʼa̱ miíra. Tá kúma̱níka kixira nu̱ú ñuʼú yóʼo ke̱ʼéra ku̱a̱ʼání chiñu ña̱ ndáyáʼvi nu̱ú Jehová. Ña̱yóʼo káʼa̱n Colosenses 1:16 xa̱ʼa̱ra: “Ta̱yóʼo kúú ta̱ xi̱niñúʼu Ndióxi̱ ña̱ ke̱ʼéra ndiʼika ña̱ʼa ña̱ íyo chí ndiví ta saátu ña̱ íyo nu̱ú ñuʼú”. Sana tá nda̱kuchi ta̱ Jesús saá kúú ña̱ nda̱kaʼánra xa̱ʼa̱ ndiʼi ña̱ ke̱ʼéra xíʼin yivára tá ni̱xi̱yora chí ndiví (Mat. 3:16; Juan 17:5). Soo tá nda̱kaʼánra xa̱ʼa̱ ndiʼi ña̱yóʼo va̱ása níkuta̱a-inira xíʼinña. Ta saátu va̱ása níndakanixi̱níra ña̱ ndáyáʼviníkara nu̱ú inkana. Ta ni̱ka̱ʼa̱nra xíʼin na̱ discípulora ña̱ “kǒo níkixira ña̱ kachíñuna nu̱úra, chi ki̱xira ña̱ kachíñura nu̱ú inkana tasaá kuvira xa̱ʼa̱ na̱ yiví ña̱ ndacháʼvira xa̱ʼa̱na” (Mat. 20:28). Ta saátu ni̱ka̱ʼa̱nra ña̱ va̱ása kéʼéra ña̱ kúni̱ miíra chi kéʼéra ña̱ kúni̱ yivára. Vitání ni̱xi̱yo ini ta̱ Jesús, ña̱kán ndiʼiyó kúni̱yó kundiku̱nyó yichi̱ra. w22.05 24 párr. 13

Jehová kíʼinra kuenta á xi̱kunda̱a̱-ini na̱ yiví kán ña̱ va̱ása va̱ʼa íyo ña̱ xi̱keʼéna. Ta̱ Jesús káxiní ni̱ka̱ʼa̱nra xa̱ʼa̱ ña̱yóʼo nu̱ú Lucas 12:​47, 48. Ña̱kán tá iin na̱ yiví kéʼéna ña̱ va̱ása va̱ʼa ni kúnda̱a̱ káxi inina ña̱ va̱ása va̱ʼaña ta va̱ása kútóo Ndióxi̱ ña̱yóʼo, iin ku̱a̱chi ndeé ku̱a̱kiʼvina. Ta tá kéʼéna saá, Jehová kivi ndaka̱xinra á koo káʼnu-inira xa̱ʼa̱na á va̱ása (Mar. 3:29; Juan 9:41). Tá saá, ¿á kandíxa Jehová ixakáʼnu-inira xa̱ʼa̱yó? Kandíxavara. Ña̱ kíʼin Jehová kuenta xíʼin kúú ña̱ á ndixa ndándikó-inina xa̱ʼa̱ ña̱ va̱ása va̱ʼa ke̱ʼéna. ¿Ndáaña kéʼé iin na̱ yiví na̱ ndixa ndándikó-ini? Na̱yóʼo násamana ña̱ ndákanixi̱nína, ki̱ʼva ña̱ íyona á ña̱ kéʼéna, ta saátu va̱ása va̱ʼa kúnina ta kúsuchíní-inina xa̱ʼa̱ ña̱ ku̱xíkána nu̱ú Jehová. w22.06 5, 6 párr. 15-17

Sáa̱na xínina miíyó ta káʼa̱nna ña̱ vatá xa̱ʼa̱ na̱ hermano na̱ kúúmií chiñu ti̱xin ñuu Jehová (Sal. 31:13). Chíka̱a̱na ku̱a̱chi na̱ hermanoyó ta táannana veʼeka̱a. Saá ku̱u xíʼin ta̱ Pablo tá siglo nu̱ú, chi̱kaa̱na ku̱a̱chira ta chi̱kaa̱nara veʼeka̱a. Tá xi̱ndika̱a̱ ta̱ apóstol Pablo veʼeka̱a chí Roma, sava na̱ cristiano sa̱ndákoo ndaʼa̱nara (2 Tim. 1:​8, 15; 2:​8, 9). Soo sana va̱ása va̱ʼa níkuni ta̱ Pablo xa̱ʼa̱ ña̱yóʼo. Chi miíra ni̱xo̱ʼvi̱níra xa̱ʼa̱na ta nda̱a̱ xi̱kuni̱ na̱ yiví kaʼnínara (Hech. 20:​18-21; 2 Cor. 1:8). Ná va̱ása keʼéyó táki̱ʼva ke̱ʼé na̱ cristiano kán, chi sa̱ndákoo ndaʼa̱na ta̱ Pablo. Ña̱kán va̱ása xíniñúʼu ndakanda̱-iniyó ña̱ ta̱ Ndi̱va̱ʼa kúú ta̱ sáxo̱ʼvi̱ miíyó ta kúni̱ra sakúxíkara miíyó nu̱ú Jehová (1 Ped. 5:8). Ná ndakundeéyó nda̱kú koo iniyó xíʼin na̱ hermano na̱ kúúmií chiñu ti̱xin ñuu Ndióxi̱ (2 Tim. 1:​16-18). w22.11 16, 17 párr. 8-11

Ta̱ kui̱ʼná ta̱ nda̱ndikó-ini ta̱ ka̱tikaana xíʼin ta̱ Jesús, sana ta̱ judío xi̱kuura. Na̱ judío iinlá kuití Ndióxi̱ xi̱ndasakáʼnuna, soo na̱ yiví na̱ inka ñuu ku̱a̱ʼání ndióxi̱ xi̱ndasakáʼnuna (Éx. 20:​2, 3; 1 Cor. 8:​5, 6). Tá su̱ví ta̱ judío níxi̱yo ta̱yóʼo sana ña̱yóʼova nda̱ka̱tu̱ʼunra: “¿Á va̱ása yíʼviún xíniún na̱ ndióxi̱?”. Ndióxi̱ chi̱ndaʼára ta̱ Jesús ña̱ kixira nu̱ú ñuʼú yóʼo ña̱ chindeétáʼanra xíʼin na̱ ñuu Israel na̱ íyo táki̱ʼva íyo ndikachi tí kǒo xi̱toʼo, ta va̱ása níxi̱natúʼunra xíʼin na̱ inka ñuu, sava kuití yichi̱ xi̱natúʼunra xíʼinna (Mat. 15:24). Na̱ ñuu Israel xi̱kunda̱a̱-inina ña̱ kivi sandátaku Ndióxi̱ na̱ ni̱xi̱ʼi̱. Ta sana ta̱ kui̱ʼná kán xi̱kunda̱a̱va-inira xa̱ʼa̱ ña̱yóʼo, ta xíʼin ña̱ ni̱ka̱ʼa̱nra ni̱na̱ʼa̱ra ña̱ xi̱kunda̱a̱va-inira ña̱ kiviva sandátaku Jehová ta̱ Jesús. Ta saátu xi̱kandíxavara ña̱ kivi sandátaku Jehová miíra. Sana xi̱xini̱tura xa̱ʼa̱ ñuʼú livi ña̱ ta̱xi Jehová ni̱xi̱yo ta̱ Adán xíʼin ñá Eva. Ña̱kán tá xi̱niso̱ʼora ña̱ ni̱ka̱ʼa̱n ta̱ Jesús xa̱ʼa̱ ñuʼú livi, sana nda̱kanixi̱níra xa̱ʼa̱ iin ñuʼú livi ña̱ koo nu̱ú ñuʼú yóʼo (Gén. 2:15). w22.12 8, 9 párr. 2, 3

Va̱ása kuchiñuyó natúʼunyó xa̱ʼa̱ Ndióxi̱ tá kǒo espíritu santora chíndeétáʼan xíʼinyó. ¿Nda̱chun káʼa̱nyó ña̱yóʼo? Saáchi ta̱ Ndi̱va̱ʼa va̱ása táxira ña̱ natúʼunyó xa̱ʼa̱ Ndióxi̱ (Apoc. 12:17). Ku̱a̱ʼání na̱ yiví ndákanixi̱nína ña̱ íyoní ndee̱ ta̱ Ndi̱va̱ʼa ta va̱ása kuchiñuyó xíʼinra. Soo tá nátúʼunyó xa̱ʼa̱ tu̱ʼun Ndióxi̱, saá kúú ña̱ kúchiñuyó xíʼinra (Apoc. 12:​9-11). Tá kǒo sándakooyó keʼéyó chiñu yóʼo, náʼa̱yó ña̱ va̱ása yíʼviyó xíniyóra ta náʼa̱tuyó ña̱ va̱ása kuchiñura kasira nu̱úyó. Ña̱kán ni íyoní ña̱ sási nu̱úyó ña̱ natúʼunyó xa̱ʼa̱ Ndióxi̱, va̱ʼa nátúʼunyó xa̱ʼa̱ra chi espíritu santora táxi ndee̱ ndaʼa̱yó, ta xíʼin ña̱ kéʼéyó sákusi̱íyó-inira (Mat. 5:​10-12; 1 Ped. 4:14). Espíritu santo kúú ña̱ chindeétáʼan xíʼinyó ña̱ kundeé-iniyó ya̱ʼayó nu̱ú nda̱a̱ ndáaka ña̱ ná kasi nu̱úyó tá nátúʼunyó xa̱ʼa̱ tu̱ʼun Ndióxi̱ (2 Cor. 4:​7-9). Ña̱kán, ¿ndáaña xíniñúʼu keʼéyó ña̱ va̱ʼa ndakiʼinyó espíritu santo Ndióxi̱? Ná ndukúyóña nu̱úra tá ka̱ʼa̱nyó xíʼinra chi kuniso̱ʼovara miíyó. w22.11 5 párr. 10, 11

Inka ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ hermanoyó kúú ña̱ vií kutáʼanyó xíʼinna. Kúni̱yó ixakáʼnu-iniyó xa̱ʼa̱na nda̱a̱ táki̱ʼva kéʼé Jehová. Ná ndakanixi̱níyó xa̱ʼa̱ ña̱yóʼo, tá Jehová ta̱xira ña̱ ná kuvi se̱ʼera xa̱ʼa̱ ku̱a̱chiyó, ¿á su̱ví kama xíniñúʼu ixakáʼnu-iniyó xa̱ʼa̱ na̱ hermanoyó tá ke̱ʼéna iin ña̱ va̱ása va̱ʼa xíʼinyó? Va̱ása kúni̱yó kooyó táki̱ʼva ni̱xi̱yo ta̱a ta̱ na̱túʼun ta̱ Jesús xa̱ʼa̱. Ta̱ xi̱kachíñura nu̱ú, i̱xakáʼnuva-inira xa̱ʼa̱ra ni ku̱a̱ʼání xu̱ʼún xi̱níkara nu̱úra, soo mií ta̱ ta̱a kán va̱ása níxiinra ixakáʼnu-inira xa̱ʼa̱ ta̱ xi̱níka nu̱úra ni loʼoníva xi̱kuuña (Mat. 18:​23-35). Ña̱kán tá va̱ása vií kítáʼún xíʼin iin na̱ hermano, ¿á kivi chika̱ún ndee̱ ña̱ vií ndakutáʼún xíʼinna tá kúma̱níka koo Conmemoración? (Mat. 5:​23, 24). Tásaá ná keʼún, náʼún ña̱ kúʼvi̱ní-iniún xíniún Jehová xíʼin ta̱ Jesús. w23.01 29 párr. 8, 9

Iin ña̱ kivi keʼé na̱ anciano ña̱ va̱ʼa kunda̱a̱-inina ndáaña xíniñúʼu na̱ hermano kúú ña̱ viíní nda̱ka̱tu̱ʼunnana (Prov. 20:5). ¿Á íyo ndiʼi ña̱ xíniñúʼuna? Tá kúú, ¿á íyo ña̱ xíxina á ta̱tán ña̱ xíniñúʼuna? ¿Á ki̱ndaana veʼena á chiñu ña̱ kúúmiína? Jehová káʼa̱nra xíʼin ndiʼiyó ña̱ ná chika̱a̱yó ndee̱ xíʼin ndiʼi na̱ hermanoyó ta saátu ná chindeétáʼanyó xíʼinna (Gál. 6:10). Ta ni ña̱ loʼoní kúú ña̱ kéʼéyó xa̱ʼa̱ na̱ ndeéndóʼo, soo kivi chika̱a̱ní ña̱yóʼo ndee̱ xíʼinna. Na̱ va̱lí kivi keʼéna iin tarjeta loʼo á iin dibujo loʼo ña̱ taxina ndaʼa̱ na̱ hermano, ña̱ chika̱a̱na ndee̱ xíʼinna. Inkana kivi ixava̱ʼana ña̱ kuxu iin na̱ ndeéndóʼo ta ku̱ʼu̱nna nda̱kanaña veʼena. Sava na̱ hermano káʼyína nu̱ú iin tutu loʼo nu̱ú táxina tíxa̱ʼvi ndaʼa̱ na̱ anciano xa̱ʼa̱ ndiʼi ña̱ kéʼéna. Va̱ʼaní ná kundiku̱n ndiʼiyó consejo yóʼo: “Ndakundeéndó sandíkondó-ini táʼanndó ta ndasandakúndó-ini táʼanndó” (1 Tes. 5:11). w22.12 22 párr. 2; 23 párr. 5, 6

Ni va̱ʼaní xi̱xini̱ na̱ saduceo xa̱ʼa̱ u̱ʼu̱n libro ña̱ siʼna va̱xi nu̱ú Biblia, soo va̱ása níxi̱keʼéna ña̱ káʼa̱nña. Ná kotoyó ña̱ ni̱ka̱ʼa̱n ta̱ Jesús xíʼin na̱ saduceo tá xi̱kuni̱na kotondosónara ndáaña ndákanixi̱níra xa̱ʼa̱ ña̱ ndataku na̱ yiví. Ta̱ Jesús ni̱nda̱ka̱tu̱ʼunrana: ¿“Á va̱ása níkaʼvindó xa̱ʼa̱ ña̱ ka̱ʼyí ta̱ Moisés, ña̱ káʼa̱n xa̱ʼa̱ yitu̱n tú iñú, tá ni̱ka̱ʼa̱n Ndióxi̱ xíʼinra: ‘Yi̱ʼi̱ kúú Ndióxi̱ ta̱ Abrahán, Ndióxi̱ ta̱ Isaac, Ndióxi̱ ta̱ Jacob’?” (Mar. 12:​18, 26). Sana xa̱a̱ ku̱a̱ʼáníva yichi̱ ka̱ʼvi na̱ saduceo relato yóʼo, soo pregunta ña̱ ke̱ʼé ta̱ Jesús xíʼinna ni̱na̱ʼa̱ña ña̱ va̱ása níxi̱kandíxana ña̱ ndáyáʼviní ña̱ káʼa̱nña xa̱ʼa̱, ña̱ ndataku na̱ ni̱xi̱ʼi̱ (Luc. 20:38). ¿Ndáaña sákuaʼayó xíʼin ña̱ ni̱ka̱ʼa̱n ta̱ Jesús xíʼin na̱ saduceo? Tá káʼviyó Biblia ná kotoyó ndáaña sánáʼa̱ iin versículo á iin relato miíyó, chi su̱ví nda̱saa loʼo kuití ña̱ʼa kúni̱yó kunda̱a̱-iniyó xa̱ʼa̱, chi kúni̱yó kunda̱a̱-iniyó xa̱ʼa̱ inkaka ña̱ ndáyáʼviní va̱xi nu̱ú Biblia. w23.02 11 párr. 9, 10

Ni yo̱ʼvi̱ní tu̱ndóʼo ña̱ ni̱ya̱ʼana nu̱ú, soo ndiʼi na̱yóʼo nda̱kúní ni̱xi̱yo inina xíʼin Jehová (Heb. 11:​36-40). Soo, ¿á ndáyáʼvi ña̱ chi̱ka̱a̱na ndee̱ ña̱ nda̱kúní ni̱xi̱yo inina? Ndáyáʼvinívaña. Ni va̱ása níxinina ña̱ ni̱xi̱nu ndiʼi ña̱ ni̱ka̱ʼa̱n Ndióxi̱, soo kǒo nísandákoona ña̱ kundaa-ininara. Ta xa̱ʼa̱ ña̱ xi̱kunda̱a̱-inina ña̱ xi̱kusi̱íva-ini Jehová xíʼin ña̱ xi̱keʼéna, va̱ása níxi̱ka-inina ña̱ kunivana ña̱ xi̱nu ndiʼi ña̱ ni̱ka̱ʼa̱nra (Heb. 11:​4, 5). Tá ndákanixi̱níyó xa̱ʼa̱ ña̱ ke̱ʼéna, ña̱yóʼo chíndeétáʼanña xíʼinyó ña̱ nda̱kúka koo iniyó ta kandíxayó ña̱ saxínuva Jehová ndiʼi ña̱ ni̱ka̱ʼa̱nra keʼéra chí nu̱únínu (2 Tim. 3:13). Ta̱ Ndi̱va̱ʼa ndákundeéra íxandi̱va̱ʼara xíʼin na̱ ndásakáʼnu Ndióxi̱. Ni nda̱a̱ ndáaka tu̱ndóʼo ná kixi nu̱úyó chí nu̱únínu, ná ndakundeéyó kachíñuyó nu̱ú Jehová xíʼin ndiʼi níma̱yó, “chi ta̱ ndáaní-iniyó kúú Ndióxi̱ ta̱ táku” (1 Tim. 4:10). w22.06 25 párr. 17, 18

Miíyó va̱ása kúni̱yó kiʼin kue̱ʼe̱ miíyó saáchi kúni̱yó va̱ʼa kooyó ña̱ va̱ʼaka kachíñuyó nu̱ú Jehová (Mar. 12:30). Xa̱ʼa̱ ña̱kán ná kundaaníyó miíyó ta ná kǒo kuniñúʼuyó nda̱a̱ ni iin ña̱ʼa ña̱ kivi tavá kue̱ʼe̱ xíʼinyó (Rom. 12:1). Ni ná kundaaníyó miíyó kixaa̱va iin ki̱vi̱ ña̱ kiʼin kue̱ʼe̱ miíyó. Soo chíka̱a̱níyó ndee̱ ña̱ kundaayó miíyó, saáchi kúni̱yó na̱ʼa̱yó nu̱ú yiváyó Jehová ña̱ chíndayáʼviníyó ña̱ tákuyó. Sana xa̱ʼa̱ ña̱ ku̱chéeyó á kúúmiíyó kue̱ʼe̱, kǒo kívika keʼéyó ku̱a̱ʼání ña̱ʼa. Soo su̱ví ña̱yóʼo kúni̱ kachiña ña̱ va̱ása chika̱a̱kayó ndee̱ ña̱ kundaayó miíyó. ¿Nda̱chun? Saáchi ni xa̱a̱ chéeyó á kúúmiíyó kue̱ʼe̱ kivikava ndasakáʼnuyó Jehová táki̱ʼva ke̱ʼé ta̱ rey David. Kúni̱ní Jehová xínira miíyó ta ndáyáʼviníyó nu̱úra (Mat. 10:​29-31). Xa̱ʼa̱ ña̱ ndáyáʼviníyó nu̱úra nda̱a̱ káʼa̱nra sandátakura miíyó tá ná kuviyó (Job 14:​14, 15). Nani tákuyó ná kundaaníyó miíyó. w23.02 20, 21 párr. 3-5

¿Á kixika ki̱vi̱ na̱ gran muchedumbre nu̱ú libro yóʼo tá ná ka̱kuna ti̱xin ña̱ Armagedón? Kixivaña (Apoc. 7:14). Ta̱ Jesús ni̱ka̱ʼa̱nra ña̱ na̱ yiví yóʼo nda̱a̱ táki̱ʼva íyo ndikachi saá íyona, ta na̱yóʼo “kutakuna ndiʼi tiempo” (Mat. 25:46). Ta na̱ ka̱ku ti̱xin ña̱ Armagedón, su̱ví xa̱a̱ ndi̱ku̱n kama ndakiʼinna ña̱ kutakuna ndiʼi tiempo. Saáchi ti̱xin ña̱ mil ku̱i̱ya̱, ta̱ Jesús kundaarana ta kuniʼira yichi̱ nu̱úna “ña̱ ku̱ʼu̱nna nu̱ú kána ku̱a̱ʼání ti̱kui̱í tá táxi ña̱ kutakuna”. Tá ná kundiku̱nna ña̱ káʼa̱n ta̱ Jesús saá kúú ña̱ kaʼyí va̱ʼa Jehová ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo (Apo. 7:​16, 17). Íyo inka tiʼvi na̱ yiví na̱ íyo táki̱ʼva íyo ti̱xúʼu, ta na̱yóʼo kúú na̱ ndiʼi-xa̱ʼa̱ ti̱xin ña̱ Armagedón. Saáchi kǒo ki̱vi̱na va̱xi nu̱ú libro nu̱ú va̱xi ki̱vi̱ na̱ kutaku. Ta Jesús ni̱ka̱ʼa̱nra ña̱ ndiʼi-xa̱ʼa̱ va̱ʼana (Mat. 25:46). Ta ta̱ apóstol Pablo ni̱ka̱ʼa̱nra xa̱ʼa̱ ta̱ Jesús, ña̱ taxira castigo ndaʼa̱na ta sandíʼi-xa̱ʼa̱rana (2 Tes. 1:9; 2 Ped. 2:9). w22.09 16 párr. 7, 8

Ña̱ʼa ña̱ i̱xava̱ʼa Jehová va̱ʼaní chíndeétáʼanña xíʼin na̱ familia ña̱ si̱í kundoona ta saátu ña̱ viíní kutáʼanna. Ku̱a̱ʼání lugar ña̱ liviní i̱xava̱ʼa Jehová ña̱ kivi ku̱ʼu̱nyó ta kusi̱í-iniyó. Ku̱a̱ʼání na̱ yiví kúsi̱íní-inina tá xáʼa̱nna nu̱ú íyo yuku̱ á nu̱ú íyo mar. Nu̱ú ñuyǐví xa̱á, na̱ va̱lí xíʼin na̱ yivána kusi̱íní-inina xíʼin ña̱ʼa ña̱ i̱xava̱ʼa Jehová. Saáchi kǒo yi̱ʼvíkayó nu̱ú kití ta ni tíkán va̱ása yi̱ʼvíkarí miíyó (Is. 11:​6-9). Koo ku̱a̱ʼání tiempo nu̱úyó ña̱ kusi̱í-iniyó xíʼin ña̱ʼa ña̱ i̱xava̱ʼa Jehová (Sal. 22:26). Soo ndóʼó na̱ íyo se̱ʼe kǒo kundatundó nda̱a̱ ná kixaa̱ ñuyǐví xa̱á ta saáví sanáʼa̱ndó se̱ʼendó xa̱ʼa̱ ndiʼi ña̱ʼa ña̱ i̱xava̱ʼa Jehová. Tá vitin ná kixáʼandó sanáʼa̱ndó na̱ va̱lí se̱ʼendó xa̱ʼa̱ ña̱ i̱xava̱ʼara, kivi ka̱ʼa̱nna nda̱a̱ táki̱ʼva ni̱ka̱ʼa̱n ta̱ rey David: “Kǒo nda̱a̱ ni iin na̱ íyo nda̱a̱ táki̱ʼva íyoún Jehová, ta kǒo nda̱a̱ ni iin ña̱ʼa ña̱ kítáʼan xíʼin ña̱ i̱xava̱ʼún” (Sal. 86:8). w23.03 25 párr. 16, 17