Febrero

Tá ki̱ʼin kue̱ʼe̱ ta̱ rey Ezequías ni̱ka̱ʼa̱n-ndáʼvira xíʼin Jehová ña̱ ná sandáʼarara ta Jehová sa̱ndáʼavarara (2 Rey. 20:​1-6). Saátu ta̱ apóstol Pablo ni̱ka̱ʼa̱n-ndáʼvira xíʼin Jehová ña̱ ná sandáʼarara chi nda̱a̱ táki̱ʼva íyo iñú saá ni̱xi̱yo ña̱ xi̱ndikaa̱ ku̱ñura, soo kǒo nísandáʼaví Jehová ta̱ Pablo (2 Cor. 12:​7-9). Ná ndakaʼányó xa̱ʼa̱ ña̱ ndo̱ʼo ta̱ apóstol Santiago xíʼin ta̱ Pedro. Ta̱ rey Herodes xi̱kuni̱ra kaʼníra u̱vi̱ saá na̱yóʼo. Soo xa̱ʼnívana ta̱ Santiago, ta ta̱ Pedro ni̱ka̱kuvara, chi Jehová ke̱ʼéra iin milagro ña̱ sa̱kákurara (Hech. 12:​1-11). Ta sana ndákanixi̱níyó nda̱chun kúú ña̱ sa̱káku Jehová iinra ta inkara kǒo nísakákurara. Kǒo káʼa̱nví Biblia xa̱ʼa̱ ña̱yóʼo, soo kivi kandíxayó ña̱ nina ña̱ nda̱kú kúú ña̱ kéʼé (Deut. 32:4). Sava yichi̱ kǒo ndákuiin Jehová ña̱ káʼa̱nyó xíʼinra nda̱a̱ táki̱ʼva kúni̱ miíyó. Soo kǒo xíniñúʼu natúʼun kúáchiyó xa̱ʼa̱ ndáa ki̱ʼva ndákuiin Jehová ña̱ káʼa̱nyó xíʼinra, saáchi kándíxayó ña̱ kúʼvi̱ní-inira xínira miíyó ta nina ña̱ nda̱kú kúú ña̱ ndáka̱xinra keʼéra (Job 33:13). w23.11 21 párr. 6

Ta̱ Santiago ni̱ka̱ʼa̱nra, na̱ yiví na̱ ndíchi íyo tu̱ʼvana ña̱ “kandíxana ña̱ káʼa̱nna xíʼinna”. ¿Ndáaña kúni̱ kachi ña̱yóʼo? Ña̱ xíniñúʼu chikaa̱yó ndee̱ ña̱ kuniso̱ʼoyó na̱ ta̱xi Jehová kuniʼi yichi̱ nu̱úyó. Soo Jehová kǒo kúni̱ra ña̱ ná keʼéyó ña̱ va̱ása va̱ʼa ña̱ káʼa̱n na̱ yiví xíʼinyó (Hech. 4:​18-20). Kǒo íxayo̱ʼvi̱víña xíʼinyó kuniso̱ʼoyó ña̱ káʼa̱n Jehová chi ndiʼi ña̱ káʼa̱nra va̱ʼaníña, soo íxayo̱ʼvi̱vaña xíʼinyó ña̱ kuniso̱ʼoyó ña̱ káʼa̱n na̱ yiví xíʼinyó (Sal. 19:7). Soo na̱ yiví na̱ ta̱xi Ndióxi̱ chiñu ndaʼa̱ na̱ ku̱a̱chiva kúúna. Tá kúú, na̱ chíñu, na̱ íyo se̱ʼe, ta saátu na̱ anciano (Prov. 6:20; 1 Tes. 5:12; 1 Ped. 2:​13, 14). Tá xíniso̱ʼoyó na̱yóʼo nda̱a̱ táki̱ʼva íyo na̱ xíniso̱ʼo Jehová saá íyoyó. w23.10 6 párr. 2, 3

Iin ña̱ chindeétáʼan xíʼinyó ña̱ kandíxakayó Jehová kúú ña̱ ndakanixi̱níyó xa̱ʼa̱ ndee̱ ña̱ kúúmiíra. Ta̱kán kúúmiíra ndee̱ ña̱ saxínura ndiʼi ña̱ káʼa̱nra keʼéra. Ta Jehová kuchiñuvara keʼéraña chi ku̱a̱ʼání ndee̱ kúúmiíra (Job 42:2; Mar. 10:27; Efes. 3:20). Tá kúú, ni̱ka̱ʼa̱nra xíʼin ta̱ Abrahán xíʼin ñá Sara ña̱ koo iin se̱ʼena ni xa̱a̱ chéenína (Gén. 17:​15-17). Saátu ni̱ka̱ʼa̱n Jehová xíʼin ta̱ Abrahán ña̱ taxira ñuʼú ña̱ Canaán kundoo na̱ se̱ʼera. Soo na̱ se̱ʼe ta̱ Abrahán á na̱ ñuu Israel ku̱a̱ʼání ku̱i̱ya̱ ni̱xi̱yona esclavo chí ñuu Egipto. Ta sana nda̱kanixi̱nína ña̱ va̱ása xi̱nuví ña̱ ni̱ka̱ʼa̱n Jehová xíʼin ta̱ Abrahán. Soo sa̱xínuva Jehová ña̱ ki̱ndoora keʼéra. Saátu ni̱ka̱ʼa̱nra xíʼin ñá María, iin ñá loʼo kúa̱an ña̱ kaku iin se̱ʼeñá. Ta xíʼin ña̱yóʼo xi̱nu ña̱ ni̱ka̱ʼa̱n Jehová xa̱a̱ íyo ku̱a̱ʼání ku̱i̱ya̱ nu̱ú jardín ña̱ Edén (Gén. 3:15). Tá ndákanixi̱níyó xa̱ʼa̱ ndiʼi ña̱ ki̱ndoo Jehová keʼéra ta ndáa ki̱ʼva sa̱xínuraña, saá kúnda̱a̱-iniyó ña̱ kúúmiíníra ndee̱ (Jos. 23:14; Is. 55:​10, 11). w23.04 28 párr. 10-12

Jehová nda̱kuiinra oración ta̱ David ta chi̱ndeétáʼanra xíʼinra (1 Sam. 19:​10, 18-20; 2 Sam. 5:​17-25). Ta saátu miíyó xíʼin ndinuʼu-iniyó ná kandíxayó ña̱ chindeétáʼan Jehová xíʼinyó (Sal. 145:18). Sava yichi̱ su̱ví nda̱a̱ táki̱ʼva kúni̱ miívíyó ndákuiin Jehová oración ña̱ kéʼéyó nu̱úra. Ta̱ apóstol Pablo xi̱ndikaa̱ “iin ña̱ káa táki̱ʼva káa iin iñú ku̱ñura” ta ña̱yóʼo xi̱kuu iin tu̱ndóʼo ña̱ xi̱kuumiíra, ta u̱ni̱ yichi̱ ni̱ka̱ʼa̱n-ndáʼvira xíʼin Jehová ña̱ ná sakútaʼaraña. ¿Á nda̱kuiin Jehová oración ña̱ ke̱ʼéra? Nda̱kuiinvaraña, soo su̱ví nda̱a̱ táki̱ʼva níxikuni̱ mií ta̱ Pablo saá ni̱xi̱yoña. Ni va̱ása níkindaa Jehová tu̱ndóʼo ña̱ xi̱kuumiíra, soo ta̱xivara ndee̱ ndaʼa̱ra ña̱ va̱ʼa nda̱kú koo inira xíʼinra (2 Cor. 12:​7-10). Sava yichi̱ ndúkúyó ña̱ʼa nu̱ú Jehová soo inkavaña kivi taxira ndaʼa̱yó. Soo kivi kandíxayó ña̱ kúnda̱a̱-ini Jehová ndáaña xíniñúʼuyó ta mií ña̱kán taxira ndaʼa̱yó. Ta nda̱a̱ kivi taxira ku̱a̱ʼáníka ña̱ʼa ndaʼa̱yó nu̱úka ña̱ ndu̱kúyó nu̱úra á ña̱ ndákanixi̱níyó xa̱ʼa̱ (Efes. 3:20). Kivi ndakuiinra oraciónyó iin ki̱vi̱ ña̱ kǒo ndátuyó ña̱ ndakuiinraña á keʼéra iin ña̱ʼa ña̱ kǒo níndakanixi̱níyó xa̱ʼa̱. w23.05 8, 9 párr. 4-6

Iin ña̱ va̱ʼaní kúú ña̱ taváyó tiempo ña̱ ndakanixi̱níyó xa̱ʼa̱ ña̱ káʼa̱n Ndióxi̱ sandátakura na̱ ni̱xi̱ʼi̱. ¿Nda̱chun? Saáchi va̱ása kúnda̱a̱-iniyó ndáaña kivi kundoʼoyó. Kivi kiʼin iin kue̱ʼe̱ ndeé miíyó á iin kama kuití kuvi na̱ veʼeyó (Ecl. 9:11; Sant. 4:​13, 14). Ta ña̱ káʼa̱n Ndióxi̱ sandátakura na̱ ni̱xi̱ʼi̱, kivi chindeétáʼanníña xíʼinyó (1 Tes. 4:13). Biblia káʼa̱nña xíʼinyó ña̱ va̱ʼaní xíni̱ Jehová miíyó ta kúʼvi̱ní-inira xínira miíyó (Luc. 12:7). Jehová va̱ʼaní xíni̱ra miíyó, xa̱ʼa̱ ña̱kán tá ná sandátakura miíyó kuumiíyó ndiʼi ña̱ va̱ʼa ña̱ xi̱kuumiíyó ta ndakaʼányó xa̱ʼa̱ ndiʼi ña̱ʼa. Ta xa̱ʼa̱ ña̱ kúʼvi̱ní-inira xínira miíyó káʼa̱nra taxira ña̱ kutakuyó ndiʼi tiempo. ¿Nda̱chun kivi kandíxayó ña̱ ndataku na̱ ni̱xi̱ʼi̱? Saáchi kúni̱va Jehová sandátakurana ta kúúmiíra ndee̱ ña̱ saxínuraña. w23.04 8, 9 párr. 2-4

Ta̱ José xíʼin ñá María va̱ʼaní xi̱chindeétáʼan xíʼin táʼanna ña̱ va̱ʼa xa̱a̱na kutáʼan va̱ʼakana xíʼin Jehová. Ta na̱yóʼo xi̱kunda̱a̱-inina ña̱ ndáyáʼviní inkáchi kitáʼanna ña̱ ndasakáʼnuna Jehová (Luc. 2:​22-24; 4:16). Ku̱chiñuvana ke̱ʼéna ña̱yóʼo. Ña̱kán va̱ʼaní yichi̱ sa̱ndákoona nu̱ú na̱ xa̱a̱ ti̱ndaʼa̱. Tá xa̱a̱ íyo se̱ʼendó, sana íxayo̱ʼvi̱nívaña xíʼinndó ña̱ tavándó tiempo ña̱ kaʼvindó xíʼin na̱ veʼendó ta saátu ña̱ ku̱ʼu̱nndó reunión. Ta sana ixayo̱ʼvi̱níkaña xíʼinndó ña̱ tavándó tiempo ña̱ koo u̱vi̱ saándó ña̱ kaʼvindó tu̱ʼun Ndióxi̱ ta keʼéndó oración. Soo ndakaʼánndó, tá inkáchi ndásakáʼnundó Jehová va̱ʼaníka xa̱a̱ndó kutáʼanndó xíʼinra ta va̱ʼanítu xa̱a̱ndó kutáʼan xíʼin táʼanndó. Ña̱kán siʼnaka chiñu Ndióxi̱ kundi̱ʼi̱-inindó xa̱ʼa̱ nu̱úka chiñu miíndó. Tá íyo ku̱a̱chi nu̱úndó sana ni va̱ása kúni̱víndó inkáchi kutáʼanndó kaʼvindó tu̱ʼun Ndióxi̱. Tá ña̱yóʼo kúú ña̱ ndóʼondó, va̱ʼaka tavándó tiempo ni loʼo ná koo ña̱ kaʼvindó soo ña̱ ná kutóo u̱vi̱ saándó ná kooña. Ta ña̱yóʼo va̱ʼaní chindeétáʼanña xíʼinndó ña̱ va̱ʼaka kutáʼanndó ta kusi̱í-inindó kachíñundó nu̱ú Jehová. w23.05 22 párr. 7, 8

¿Ndáa ki̱ʼva chi̱ndeétáʼan ña̱yóʼo xíʼin ta̱ Abdías? Ta̱yóʼo va̱ʼa ni̱xi̱yo inira ta xi̱ndaa-ininara. Xa̱ʼa̱ ña̱kán ta̱ rey ni̱ka̱ʼa̱nra xíʼinra ña̱ kiʼinra kuenta xíʼin ndiʼi ña̱ xi̱kuumiíra veʼera (chitáʼanña xíʼin Nehemías 7:2). Xa̱ʼa̱ ña̱ xi̱ ixato̱ʼóníra Jehová, ña̱yóʼo chi̱ndeétáʼanña xíʼinra ña̱ ndakú koo inira. Ta xi̱niñúʼuníva ndakú koo inira. ¿Nda̱chun? Saáchi tiempo ña̱ xi̱xaʼndachíñu ta̱ rey Acab ni̱xi̱yora (1 Rey. 16:30). Ta̱ rey Acab ti̱ndaʼa̱ra xíʼin ñá Jezabel, ñáyóʼo xi̱ndasakáʼnuñá ndióxi̱ Baal, ta xi̱saa̱ní-iniñá xi̱xiniñá Jehová, xa̱ʼa̱ ña̱yóʼo xi̱kuni̱ñá sandíʼi-xa̱ʼa̱ñá ndiʼi na̱ xi̱ndasakáʼnu Jehová na̱ xi̱ndoo chí reino ña̱ norte. Ñáyóʼo xa̱ʼníñá ku̱a̱ʼání na̱ profeta na̱ xi̱ndasakáʼnu Jehová (1 Rey. 18:4). Tá ki̱xáʼa ñá Jezabel xáʼníñá ndiʼi na̱ profeta Jehová, ta̱ Abdías chi̱se̱ʼéra 100 na̱ profeta, 50 kúú na̱ chi̱se̱ʼéra ini iin kavá ta inka 50 na̱yóʼo ini inkaña. Ta miíra xi̱taxi ña̱ xi̱xixina xíʼin ti̱kui̱í tá xi̱xiʼina (1 Rey. 18:​13, 14). Tá níxini ñá Jezabel ña̱ ke̱ʼéra kaʼnívañára. Ndiʼi miíyó na̱ yiví kǒo kúni̱yó kuviyó ta saátu kúnda̱a̱-iniyó ña̱ kǒo níxi̱kuni̱ ta̱ Abdías kuvira. Soo xa̱ʼa̱ ña̱ xi̱kuʼvi̱ní-inira xi̱xinira Jehová, chi̱kaa̱-inira ña̱ kuvira xa̱ʼa̱ na̱ profeta na̱ xi̱ndasakáʼnu Jehová. w23.06 16 párr. 9, 10

Tiempo vitin Jehová níʼira yichi̱ nu̱ú na̱ ñuura nda̱a̱ táki̱ʼva ke̱ʼéra tiempo xi̱naʼá. Xíniñúʼura se̱ʼera ta̱ Jesús ña̱ va̱ʼa kuniʼira yichi̱ nu̱úna ta saátu xíniñúʼura tuʼunra ña̱ Biblia. ¿Á íyo prueba ña̱ náʼa̱ ña̱ xíniñúʼura na̱ yiví ña̱ kuniʼina yichi̱ nu̱úyó tiempo vitin? Íyovaña. Ná ka̱ʼa̱nyó xa̱ʼa̱ ña̱ ku̱u tá kúma̱ní ndiʼi siglo diecinueve. Ta̱ Charles Russell xíʼin na̱ xi̱kitáʼan xíʼinra xi̱kunda̱a̱-inina ña̱ ku̱i̱ya̱ 1914 kooña iin ku̱i̱ya̱ ña̱ ndáyáʼviní (Dan. 4:​25, 26). ¿Nda̱chun va̱ʼa xi̱kunda̱a̱-inina ña̱yóʼo? Saáchi ka̱ʼvina profecía ña̱ va̱xi nu̱ú Biblia. Ta Jehová kúú ta̱ chi̱ndeétáʼan xíʼinna ña̱ va̱ʼa ku̱ndaa̱-inina xíʼinña. Ña̱ ku̱u ku̱i̱ya̱ 1914 náʼa̱ña ña̱ xa̱a̱ ki̱xáʼa xáʼndachíñu Reino Ndióxi̱: chi ku̱i̱ya̱ saá ki̱xáʼa primera guerra mundial, ki̱xáʼa íyo kue̱ʼe̱, so̱ko ta saátu ki̱xáʼa táanní (Luc. 21:​10, 11). Ña̱yóʼo náʼa̱ káxiña nu̱úyó ña̱ mií Jehová ndáka̱xin na̱ kuniʼi yichi̱ nu̱ú na̱ ñuura. w24.02 22 párr. 11

Miíyó na̱ ndásakáʼnu Jehová kúnda̱a̱-iniyó ña̱ kúʼvi̱ní-inira xínira miíyó ta kúni̱ra ña̱ va̱ʼaní ná kundooyó (Rom. 8:​35-39). Ta saátu kúnda̱a̱-iniyó ña̱ tá ná keʼéyó ña̱ káʼa̱n tu̱ʼunra, va̱ʼaní kundooyó (Is. 48:​17, 18). Soo, ¿ndáaña keʼéyó tá iin kama ná kixi tu̱ndóʼo nu̱úyó? Tá kúú, sava yichi̱ na̱ veʼeyó kivi keʼéna á ka̱ʼa̱nna xíʼinyó iin ña̱ʼa ta ña̱yóʼo kivi sandákavaña-iniyó. Á sanatu kúúmiíyó iin kue̱ʼe̱ ña̱ va̱ása táxika kachíñuyó nu̱ú Jehová. Á sanatu xóʼvi̱yó xa̱ʼa̱ ña̱ ku̱u iin tu̱ndóʼo nu̱ú ndóoyó, tá kúú ña̱ ndeéní ku̱un sa̱vi̱ á ndeéní ni̱ta̱an. Á íxandi̱va̱ʼatuna xíʼinyó xa̱ʼa̱ ña̱ ndásakáʼnuyó Jehová. Tá yáʼayó nu̱ú táʼan tu̱ndóʼo yóʼo kivi ndakanixi̱níyó: “¿Nda̱chun ndóʼi̱ ña̱yóʼo? ¿Á íyo iin ña̱ va̱ása va̱ʼa ke̱ʼíi̱? ¿Á kúni̱ kachi ña̱yóʼo ña̱ va̱ása chíndeétáʼanka Jehová xíʼi̱n?”. ¿Á xa̱a̱ ndóʼún saá? Tá xa̱a̱ saá ndóʼún, va̱ása ndakava-iniún. Chi ku̱a̱ʼání na̱ ndásakáʼnu Jehová xa̱a̱ yáʼana nu̱ú táʼa̱n tu̱ndóʼo yóʼo (Sal. 22:​1, 2; Hab. 1:​2, 3). w23.04 14 párr. 1, 2

Tá íyo iin ña̱ kivi sandákava miíyó ña̱ keʼéyó ña̱ kini, ndi̱ku̱n kama ná ndakanixi̱níyó xa̱ʼa̱ inka ña̱ʼa chi kǒo kúni̱yó sakúxíka ña̱yóʼo miíyó nu̱ú Jehová. Jehová kúni̱ra ña̱ xíʼin ndiʼi níma̱yó ná kuniso̱ʼoyó ndiʼi ña̱ káʼa̱nra xíʼinyó (Rom. 6:17). Ndiʼi ley ña̱ va̱xi nu̱ú tu̱ʼunra xíʼin ndiʼi ña̱ káʼa̱nra xíʼinyó, ña̱ va̱ʼa miíyó kúúña ta kúni̱ra ná kuniso̱ʼoyóña (Is. 48:​17, 18; 1 Cor. 6:​9, 10). Ta̱ Ndi̱va̱ʼa va̱ása kúni̱ra ña̱ nda̱kú koo iniyó xíʼin Jehová. Xa̱ʼa̱ ña̱kán xíniñúʼura na̱ yiví ña̱ sayíʼvina miíyó ta ixandi̱va̱ʼana xíʼinyó, saáchi ña̱ kúni̱ra kúú ña̱ sakúxíkara miíyó nu̱ú Jehová (1 Ped. 5:8). Na̱ cristiano na̱ xi̱ndoo tá siglo nu̱ú i̱xandi̱va̱ʼanína xíʼinna, ka̱ninana ta nda̱a̱ xa̱ʼnína savana xa̱ʼa̱ ña̱ nda̱kú ni̱xi̱yo inina xíʼin Ndióxi̱ (Hech. 5:​27, 28, 40; 7:​54-60). Ki̱ʼva saá íyo ña̱ kéʼé ta̱ Ndi̱va̱ʼa tiempo vitin, saáchi xíniñúʼura na̱ yiví ña̱ sáxo̱ʼvi̱na miíyó. Iníísaá ñuyǐví íxandi̱va̱ʼara xíʼin na̱ hermano, ta xa̱a̱ síín síín ña̱ʼa xíniñúʼura ña̱ keʼéra ña̱yóʼo, tá kúú na̱ hermanoyó na̱ ñuu Rusia xíʼin na̱ ndóo inka ñuu ndeéní xóʼvi̱na. Sava yichi̱ mií ta̱ Ndi̱va̱ʼa kúú ta̱ sáxo̱ʼvi̱ miíyó, soo sava yichi̱ xíniñúʼura inka ña̱ʼa ña̱ sandáʼvira miíyó (Efes. 6:11). w23.07 15, 16 párr. 6-9

Tá ná kaʼvikaún Biblia saá kúú ña̱ kuʼvi̱níka-iniún kuniún Jehová. Ta xa̱ʼa̱ ña̱ kúʼvi̱-iniún xíniúnra kéʼún ña̱ kútóora. Ña̱ Biblia kúú ña̱ chindeétáʼan xíʼún ña̱ vií koo ña̱ ndaka̱xiún keʼún. Nda̱a̱ táki̱ʼva kéʼé iin ta̱ loʼo ña̱ xítora ña̱ kéʼé yivára tasaá kíxáʼara kéʼéra, saátu ke̱ʼé miíún chi ki̱xáʼún kéʼún ña̱ kútóo yiváún Jehová (Efes. 5:​1, 2). Kivi ndakanixi̱níyó xa̱ʼa̱ ña̱yóʼo: “¿Á kúʼvi̱ka-inii̱ xínii̱ Jehová nda̱a̱ táki̱ʼva xi̱keʼíi̱ tá sa̱kán nda̱kuchii̱? ¿Á kítáʼan ña̱ ndákanixi̱níi̱ xíʼin ki̱ʼva ña̱ ndákanixi̱ní Jehová, tá kúú ña̱ kuʼvi̱-inii̱ kunii̱ na̱ hermano?”. Tá va̱ása kúʼvi̱ka-iniyó xíniyó na̱ hermanoyó nda̱a̱ táki̱ʼva xi̱keʼéyó tá ya̱chi̱ ná va̱ása ndakava-iniyó, saáchi ña̱yóʼo kúú ña̱ ndo̱ʼo na̱ cristiano na̱ ni̱xi̱yo tá siglo nu̱ú. Soo ta̱ Jesús kǒo níndakanixi̱níra ña̱ va̱ása kuchiñukana na̱ʼa̱na ña̱yóʼo, ta ki̱ʼva saá íyo ña̱ ndákanixi̱níra xa̱ʼa̱ miíyó tiempo vitin (Apoc. 2:​4, 7). Ta̱ Jesús kúnda̱a̱-inira ña̱ kivi kixáʼa tukuyó kuʼvi̱-iniyó kuniyó Jehová nda̱a̱ táki̱ʼva ke̱ʼéyó tá sa̱kán ki̱xáʼayó sákuaʼayó xa̱ʼa̱ra. w23.07 8 párr. 2, 3

Ta̱ apóstol Pedro ke̱ʼéra sava ña̱ va̱ása va̱ʼa. Siʼna ni̱ka̱ʼa̱nra xíʼin ta̱ Jesús ña̱ kǒo sandákoorara (Mar. 14:​27-29). Saátu tá xa̱a̱ ñúʼuna jardín ña̱ Getsemaní, tuku ta tuku ni̱ki̱si̱ra (Mar. 14:​32, 37-41). Tándi̱ʼi, tá ti̱inna ta̱ Jesús sa̱ndákoorara (Mar. 14:50). Saátu u̱ni̱ yichi̱ ni̱ka̱ʼa̱n ta̱ Pedro ña̱ kǒo xíni̱ra ta̱ Jesús ta nda̱a̱ chi̱naʼára xa̱ʼa̱ ña̱yóʼo (Mar. 14:​66-71). ¿Ndáaña ndo̱ʼora tá ki̱ʼinra kuenta ña̱ su̱ví ña̱ va̱ʼa kúú ña̱ ke̱ʼéra xíʼin ta̱ Jesús? Nda̱kavaní-inira ta ki̱xáʼara xákura (Mar. 14:72). Nu̱úka ña̱ ka̱ʼa̱n ta̱ Jesús xíʼin ta̱ Pedro xa̱ʼa̱ ña̱ va̱ása va̱ʼa ke̱ʼéra, ni̱ka̱ʼa̱nra xíʼinra ña̱ ndakiʼinra ku̱a̱ʼáka chiñu ña̱ ndáyáʼviní (Juan 21:​15-17). Xi̱kunda̱a̱va-ini ta̱ Pedro ña̱ ni̱ki̱ʼvira iin ku̱a̱chi ña̱ káʼnuní, soo kǒo nítaxira kasi ña̱yóʼo nu̱úra ña̱ ndasakáʼnura Jehová. ¿Nda̱chun? Saáchi xi̱kandíxaníra ña̱ xi̱kuʼvi̱kava-ini ta̱ Jesús xi̱xinirara. ¿Ndáaña sákuaʼayó xíʼin ña̱yóʼo? Jehová kúni̱ra ña̱ ná kandíxayó ña̱ kúʼvi̱ní-inira xínira miíyó ta íyo tu̱ʼvara ña̱ ixakáʼnu-inira xa̱ʼa̱yó (Rom. 8:​38, 39). w24.03 18 párr. 13-15

Na̱ yiví na̱ kísi̱ xíʼin na̱ ta̱ʼán tindaʼa̱ xíʼinna, va̱ása va̱ʼa kúni̱na xíʼin miína, ndákanixi̱nína ña̱ kǒo ndáyáʼvina, kée̱ se̱ʼena, ta kíxáʼa káku ku̱a̱chi ti̱xin veʼena. Ña̱kán ná kǒo kandíxayó ña̱ káʼa̱n ñaʼá ñá kíʼví. Ku̱a̱ʼání na̱ kéʼé ña̱ kini su̱ví nu̱ú Jehová kuití kúxíkána chi savana nda̱a̱ kíʼinna kue̱ʼe̱ ta xa̱ʼa̱ ña̱yóʼo xíʼi̱na (Prov. 7:23). Proverbios capítulo 9 versículo 18 káchiña: “Ndiʼi na̱ ni̱xa̱ʼa̱n nu̱úñá na̱ xa̱a̱ ni̱xi̱ʼi̱ kúúna”. Ku̱a̱ʼání na̱ yiví kúnda̱a̱-inina tá ná ku̱ʼu̱nna nu̱ú ñaʼá ñá kíʼví yóʼo kuvina. Tásaá, ¿nda̱chun ku̱a̱ʼa̱nna veʼeñá? (Prov. 9:​13-18). Ña̱ pornografía á nu̱ú kée na̱ yiví chálá ndiʼi lugar íyoña. Savana káʼa̱nna ña̱ kǒo ku̱a̱chiví ña̱ kotoyóña, soo su̱ví ña̱ nda̱a̱ví kúú ña̱yóʼo. Saáchi na̱ xíto ña̱yóʼo kúni̱kana kotonaña, sándiʼi-xa̱ʼa̱ñana ta va̱ása va̱ʼaka ndákanixi̱nína xa̱ʼa̱ inkana. Na̱ yiví na̱ xíto ña̱yóʼo íxayo̱ʼvi̱níña xíʼinna nandósona xa̱ʼa̱ña, ta ña̱yóʼo kǒo chíndeétáʼanña xíʼinna chi kúni̱níkana keʼéna ña̱ kini (Col. 3:5; Sant. 1:​14, 15). Ku̱a̱ʼá na̱ xíto nu̱ú kée na̱ yiví chálá xáa̱na kíʼvina ku̱a̱chi kini ta kísi̱na xíʼin na̱ ta̱ʼán tindaʼa̱ xíʼinna. w23.06 23 párr. 10, 11

Ta ni kúni̱ inka na̱ chíñu kanitáʼanna xíʼin na̱ chíñu Estados Unidos xíʼin Gran Bretaña kǒo kuchiñuna sándiʼi-xa̱ʼa̱nana. Chi na̱yóʼo kúú na̱ koo tá ná kixaa̱ ki̱vi̱ Jehová. Va̱ʼa kúnda̱a̱-iniyó xa̱ʼa̱ ña̱yóʼo, saáchi nda̱a̱ táki̱ʼva káʼa̱n ña̱ profecía “yu̱u̱” ña̱ ndána̱ʼa̱ Reino Ndióxi̱ sakúachi válíña xa̱ʼa̱ imagen yóʼo (Dan. 2:​34, 35, 44, 45). ¿Á kándíxaún ña̱ ndixa kúú ña̱ ni̱ka̱ʼa̱n ta̱ Daniel xa̱ʼa̱ imagen ña̱ xi̱ni ta̱ Nabucodonosor? Tá saá íyoña, na̱ʼún ña̱yóʼo xíʼin ña̱ kéʼún. Tá kúú, kǒo kuni̱ún kuumiíún ku̱a̱ʼání ña̱ʼa chi kúnda̱a̱-iniún ña̱ xa̱a̱ ku̱nu̱mí ndiʼi-xa̱ʼa̱ ña̱ʼa ña̱ íyo nu̱ú ñuʼú yóʼo (Luc. 12:​16-21; 1 Juan 2:​15-17). Saátu tá kúnda̱a̱-iniún xíʼin profecía yóʼo, saá kǒo nandóso-iniún ña̱ iin chiñu ndáyáʼviní kúú ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱ ta xíniñúʼu keʼéyó ña̱yóʼo (Mat. 6:33; 28:​18-20). Vitin ña̱ xa̱a̱ ni̱ka̱ʼa̱nyó xa̱ʼa̱ profecía yóʼo, kivi ndakanixi̱níún xa̱ʼa̱ ña̱yóʼo: “¿Á náʼi̱ xíʼin ña̱ kéʼíi̱ ña̱ kándíxai̱ ña̱ si̱lóʼo kúma̱ní ta sandíʼi-xa̱ʼa̱ Reino Ndióxi̱ ndiʼi na̱ chíñu na̱ íyo nu̱ú ñuʼú yóʼo?”. w23.08 11 párr. 13, 14

Tá vitá íyo iniún, saá ndakuniún ña̱ íyo sava ña̱ʼa ña̱ kivi kasi nu̱ún ña̱ kachíñún nu̱ú Jehová. Tá kúú, sana xa̱a̱ ku̱chéeún á kúúmiíún iin kue̱ʼe̱. Keʼé nda̱a̱ táki̱ʼva ke̱ʼé ta̱ Barzilái, tá káʼa̱nna xíʼún ña̱ keʼún iin chiñu ti̱xin ñuu Ndióxi̱. Tá túviún ña̱ va̱ása kuchiñún keʼúnña xa̱ʼa̱ kue̱ʼe̱ ña̱ kúúmiíún va̱ʼaka kǒo keʼúnña (2 Sam. 19:​35, 36). Á keʼé nda̱a̱ táki̱ʼva ke̱ʼé ta̱ Moisés, taxi ná chindeétáʼan inkana xíʼún ña̱ keʼún chiñu ña̱ kúúmiíún (Éx. 18:​21, 22). Tá vitá íyo iniún kǒo chitáʼún miíún xíʼin inkana, tasaá kúú ña̱ kusi̱í-iniún keʼún chiñu ña̱ va̱ʼa keʼún. Saátu kǒo chikaún ku̱a̱chi miíún xa̱ʼa̱ ña̱ va̱ása va̱ʼa ndáka̱xin inkana keʼéna, chi va̱ása kívi ka̱ʼa̱nyó xíʼin inkana ndáaña keʼéna. Ta saátu su̱ví ndiʼi tiempo kivi kundaayóna nu̱ú tu̱ndóʼo ña̱ kivi kixi nu̱úna xa̱ʼa̱ ña̱ va̱ása va̱ʼa ndáka̱xinna keʼéna. Na̱ íyo se̱ʼe, xóʼvi̱nína tá iin se̱ʼena sándakoona Jehová ta kéena ti̱xin ñuura. Ña̱kán, tá na̱ íyo se̱ʼe ndákanixi̱nína ña̱ ku̱a̱chi miína kúú ña̱ ke̱e se̱ʼena ti̱xin ñuu Jehová, xóʼvi̱nína. Ta nda̱a̱ táki̱ʼva íyo iin ña̱ʼa ña̱ ve̱ení saá íyo ña̱ ndísona. Soo Jehová kǒo kúni̱ra ña̱ ná ndakanixi̱níndó saá chi su̱ví ku̱a̱chi ndóʼó kúúña. w23.08 29 párr. 11, 12

Ta̱ Sansón iin ta̱ ku̱a̱chi xi̱kuura nda̱a̱ táki̱ʼva íyo miíyó. Sava yichi̱ kǒo níxi̱ndaka̱xin viíra ña̱ xi̱keʼéra ta ni̱xo̱ʼvi̱níra xa̱ʼa̱ ña̱yóʼo, chi kǒo níxiniso̱ʼora ña̱ ni̱ka̱ʼa̱n Ndióxi̱ xíʼinra. Tá xa̱a̱ ku̱a̱ʼá loʼo tiempo kúúra juez, ki̱xáʼara kútóora iin ñaʼá ñá naní Dalila ñá ni̱xi̱yo yoso̱ ña̱ Sorec. Tá kúma̱níka kunira ñá Dalila xi̱kuni̱ra tindaʼa̱ra xíʼin iin ñaʼá ñá ñuu Filistea. Biblia káʼa̱nña ña̱ mií Jehová xi̱kuni̱ ña̱ ná tindaʼa̱ ta̱ Sansón xíʼinñá, chi ña̱ xi̱kuni̱ Jehová kúú ña̱ kanitáʼan ta̱ Sansón xíʼin na̱ filisteo. Iin yichi̱ ni̱xa̱ʼa̱nra Gaza ña̱ ndíkaa̱ ñuu Filistea ta kán ki̱ndoora veʼe iin ñá ñaʼá ñá kísi̱ xíʼin ku̱a̱ʼání ta̱a. Tá íyo ta̱ Sansón ñuu Gaza, Jehová ta̱xira ndee̱ ndaʼa̱ra ña̱ tavára yéʼé ña̱ ñuu kán ña̱ va̱ʼa ki̱ʼvi inkana ta sandíʼi-xa̱ʼa̱naña (Juec. 14:​1-4; 16:​1-3). Soo ñá Dalila sana ñá israelita xi̱kuuñá, ña̱kán tá níti̱ndaʼa̱ra xíʼinñá kǒo chindeétáʼanví ña̱yóʼo xíʼinra ña̱ kanitáʼanra xíʼin na̱ filisteo. Na̱ filisteo xi̱kuni̱na tiinna ta̱ Sansón ña̱kán ni̱ka̱ʼa̱nna xíʼin ñá Dalila ña̱ chindeétáʼanñá xíʼinna ta taxina ku̱a̱ʼá xu̱ʼún ndaʼa̱ñá, ta ñáyóʼo ka̱ndíxavañá. w23.09 4, 5 párr. 12, 13

Ya̱chika ná ndakanixi̱níyó ndáaña kivi kuu ta ña̱yóʼo va̱ʼaní chindeétáʼanña xíʼinyó ña̱ vita koo iniyó. Na̱kán tá va̱ʼaní ndákanixi̱ní kǒo sáa̱yó tá inka na̱ yiví káʼa̱nna ña̱ su̱ví ña̱ ndixa kúú ña̱ kándíxayó. Sáachi miíyó kǒo kúnda̱a̱-iniyó nda̱chun ndáka̱tu̱ʼun na̱ yiví miíyó xa̱ʼa̱ iin ña̱ʼa. Ña̱kán, tá kúma̱níka ndakuiinyó yuʼú na̱ yiví ná ndakaʼányó ña̱ kǒo kúnda̱a̱-iniyó nda̱chun kúú ña̱ ki̱xáʼana káʼa̱nna xíʼinyó. Saátu ná ndakaʼanyó ña̱ xa̱a̱ síín síín íyo na̱ yiví, ña̱kán xíniñúʼu kunda̱a̱-iniyó ndáa ki̱ʼva ka̱ʼa̱nyó xíʼinna ña̱ va̱ʼa kunda̱a̱-iniyó ndáaña ndíkaa̱ níma̱na (Prov. 16:23). Ná ka̱ʼa̱nyó xa̱ʼa̱ ta̱ Gedeón. Iin yichi̱ na̱ ta̱a na̱ tribu ta̱ Efraín ni̱sa̱a̱nína xíʼinra, chi kǒo níka̱ʼa̱nra xíʼinna ña̱ ku̱ʼu̱nna kanitáʼanna xíʼin na̱ sáa̱-ini xíni na̱ ñuu Israel. Soo, ¿nda̱chun ni̱sa̱a̱na xíʼinra? ¿Á xa̱ʼa̱ ña̱ kǒo níka̱ʼa̱nra xíʼinna kúúña? Kǒo xíni̱yó, soo ta̱ Gedeón ndíchiní ni̱xi̱yora ta xi̱kunda̱a̱-inira xíʼin ña̱ xi̱ndoʼona ta viíní nda̱kuiinra yuʼúna. ¿Ndáaña ku̱u tándi̱ʼi? Tá ni̱ka̱ʼa̱nra xíʼinna ni̱ndi̱kova-inina (Juec. 8:​1-3). w23.09 16 párr. 8, 9

Jehová chi̱ndaʼára se̱ʼera ta̱ va̱ʼaní kítáʼan xíʼinra ña̱ ki̱xira nu̱ú ñuʼú yóʼo. Ña̱kán, xi̱kusuchíní-inira tá xi̱xitora ña̱ xi̱ ixandi̱va̱ʼanína xíʼin se̱ʼera, ña̱ xi̱kusi̱kindaanara, ta saátu ña̱ xi̱kundasína xi̱xininara. Ndóʼó na̱ xa̱a̱ ni̱xi̱ʼi̱ iin se̱ʼe, kúnda̱a̱va-inindó ndáaña ndo̱ʼo Jehová tá xa̱ʼnína ta̱ Jesús. Ni kándíxavayó ña̱ káʼa̱n Ndióxi̱ ña̱ ndataku na̱ ni̱xi̱ʼi̱, soo kúsuchíníva-iniyó tá xíʼi̱ iin na̱ kúni̱níyó xíniyó. Ejemplo yóʼo chíndeétáʼanña xíʼinyó ña̱ kunda̱a̱-iniyó ndáaña ndo̱ʼo Jehová ku̱i̱ya̱ 33 tá xi̱nira ña̱ i̱xandi̱va̱ʼanína xíʼin se̱ʼera ta xa̱ʼnínara (Mat. 3:17). ¿Á kivi kaʼviún xíʼin na̱ veʼún xa̱ʼa̱ ña̱ ke̱ʼé Jehová ña̱ va̱ʼa chaʼvira xa̱ʼa̱ ku̱a̱chiyó? Kivi keʼún ña̱yóʼo tá kúma̱níka kixaa̱ ki̱vi̱ ña̱ koo Conmemoración. Ta saátu kivi kotoún video ña̱ xíto na̱ ñúʼu Betel ña̱ káʼa̱n xa̱ʼa̱ Conmemoración. Tá ná keʼéyó ña̱yóʼo saá kivi chindeétáʼanyó xíʼin na̱ yiví ña̱ ku̱ʼu̱nna Conmemoración (Esd. 7:10). w24.01 11 párr. 10-12

Iin ña̱ kivi keʼéyó ña̱ va̱ʼa taxi Jehová ndee̱ ndaʼa̱yó kúú ña̱ ka̱ʼa̱nyó xíʼinra. Ta̱kán ndákuiinra ña̱ káʼa̱nyó xíʼinra ta táxira ndee̱ “ña̱ ndakúníka nu̱ú ndiʼi ña̱ʼa” ndaʼa̱yó (2 Cor. 4:7). Soo, saátu inka ña̱ kivi keʼéyó kúú, ña̱ kaʼviyó tu̱ʼunra ta ndakanixi̱níyó xa̱ʼa̱ña (Sal. 86:11). Ña̱ káʼa̱n Jehová xíʼinyó nu̱ú Biblia “kúúmiíníña ndee̱” (Heb. 4:12). Ña̱kán tá káʼún xíʼin Jehová ta káʼviún tu̱ʼunra saá taxira ndee̱ ndaʼún ña̱ va̱ʼa kundeé-iniún, tasaá kusi̱í-iniún ndasakáʼnúnra, ta saátu ña̱ keʼún iin chiñu ña̱ nda̱kanixi̱níún kǒo kivi keʼún. Ná kotoyó ndáa ki̱ʼva chi̱ndeétáʼan Jehová xíʼin ta̱ profeta Jonás. Jehová ta̱xira iin chiñu ña̱ ndáyáʼviní ndaʼa̱ ta̱ Jonás. Soo xa̱ʼa̱ ña̱ xi̱yiʼvíra keʼéra ña̱yóʼo, nda̱ara iin barco ta nda̱kiʼinra ku̱a̱ʼa̱nra inka ñuu. Xa̱ʼa̱ ña̱yóʼo miíra xíʼin ndiʼi na̱ ku̱a̱ʼa̱n ini barco kán si̱lóʼo kuvina chi ndeéní ki̱xáʼa kúun sa̱vi̱. Tá sa̱kánanara ini ti̱kui̱í ni̱yi̱ʼvíníra, saáchi iin ti̱a̱ká ko̱kóríra. ¿Ndáaña ke̱ʼé ta̱ Jonás tá xa̱a̱ ndíkaa̱ra ini ti̱a̱ká? Ni̱ka̱ʼa̱nra xíʼin Jehová (Jon. 2:​1, 2, 7). w23.10 13 párr. 4-6

Ni ka̱ʼyi ta̱ apóstol Pedro carta yóʼo ku̱a̱ʼa̱n nu̱ú na̱ cristiano na̱ ni̱xi̱yo tá siglo nu̱ú, mií Jehová ni̱ka̱ʼa̱n ña̱ ná ka̱ʼyi̱ña nu̱ú Biblia, ña̱kán nda̱a̱ miíyó kivi chindeétáʼanña xíʼin tiempo vitin (Rom. 15:4). Kǒo kándíxaví na̱ yiví ña̱ káʼa̱n Biblia kǒo chí nu̱úni̱nú. Xa̱ʼa̱ ña̱ xa̱a̱ ku̱a̱ʼání tiempo nátúʼunyó xíʼin na̱ yiví ña̱ kixaa̱ iin ki̱vi̱ ña̱ ndiʼi-xa̱ʼa̱ ndiʼi ña̱ kini ña̱ íyo nu̱ú ñuʼú yóʼo, sana kixáʼana kusi̱kindaana miíyó ta ka̱ʼa̱nna ña̱ kǒo kixaa̱ví ki̱vi̱ yóʼo (2 Ped. 3:​3, 4). Tá iin na̱ yiví na̱ ndáni̱ʼi̱yó predicación, na̱ káchíñu xíʼinyó á na̱ táʼanyó ná ka̱ʼa̱nna ña̱yóʼo xíʼinyó, kivi kixáʼa kaka-iniyó xa̱ʼa̱ ña̱ káʼa̱n Jehová koo chí nu̱únínu. Soo, ¿ndáaña kivi chindeétáʼan xíʼinyó? Ná kotoyó ña̱ ni̱ka̱ʼa̱n ta̱ Pedro. Ku̱a̱ʼání na̱ yiví káʼa̱nna ña̱ kúáchi̱ní Jehová ña̱ sandíʼi-xa̱ʼa̱ra ndiʼi ña̱ kini ña̱ íyo nu̱ú ñuʼú yóʼo. Soo, ndáyáʼviní ña̱ ni̱ka̱ʼa̱n ta̱ Pedro chi su̱ví tá xíto miíyó tiempo saá xíto Jehová ña̱yóʼo (2 Ped. 3:​8, 9). Nu̱ú Jehová mil ku̱i̱ya̱ iin ki̱vi̱ kúúña. Soo ndátura saáchi kǒo kúni̱ra ndiʼi-xa̱ʼa̱ ni iin na̱ yiví. Soo kixaa̱va ki̱vi̱ ña̱ sandíxa̱ʼa̱ra ndiʼi ña̱ kini. w23.09 26, 27 párr. 2-5

¿Nda̱chun ka̱ʼyí ta̱ apóstol Pablo carta yóʼo ku̱a̱ʼa̱n nu̱ú na̱ hebreo na̱ xi̱ndoo ñuu Judea? Sana xa̱ʼa̱ u̱vi̱ ña̱ʼa ke̱ʼéraña. Ña̱ nu̱ú, ña̱ va̱ʼa chikaa̱ra ndee̱ xíʼinna. Saáchi ku̱a̱ʼání na̱yóʼo xi̱ñuʼuna ti̱xin religión na̱ judío. Ta sava na̱ xi̱niʼi yichi̱ nu̱ú na̱ religión kán ki̱xáʼana kúsikindaanana tá ndu̱una cristiano. ¿Nda̱chun? Saáchi na̱ judío xi̱kuumiína templo nu̱ú kivi ndakutáʼanna, ta na̱ cristiano kǒovíña níxi̱kuumiína, ni kǒo níxikuumiína altar nu̱ú so̱kóna ña̱ʼa nu̱ú Ndióxi̱, ta ni kǒo na̱ su̱tu̱ níxi̱yo. Xa̱ʼa̱ ña̱yóʼo, kivi ndakava-inina ta sandákoona ña̱ ndásakáʼnuna Ndióxi̱ (Heb. 3:​12, 14). Ta sana sava na̱yóʼo nda̱kanixi̱nína ña̱ ndikó tukuna ki̱ʼvina xíʼin religión na̱ judío. Ña̱ u̱vi̱, ta̱ Pablo ni̱ka̱ʼa̱nra xíʼin na̱ hebreo ña̱ kǒo chíkaa̱na ndee̱ ña̱ kunda̱a̱-inina xíʼin ña̱ʼa xa̱á ña̱ xi̱sanáʼa̱ Ndióxi̱ miína, á ña̱ xi̱ ixayo̱ʼvi̱ xíʼinna kunda̱a̱-inina xa̱ʼa̱, ña̱ íyo nda̱a̱ táki̱ʼva íyo “ña̱ʼa ña̱ téʼé” ña̱ va̱xi nu̱ú tu̱ʼun Ndióxi̱ (Heb. 5:​11-14). Ta sava na̱yóʼo xi̱ndiku̱nkana Ley ña̱ ta̱xi Jehová ndaʼa̱ ta̱ Moisés. w23.10 24 párr. 3, 4

Sava ná hermana ndáka̱xinna ña̱ va̱ása tindaʼa̱na (Mat. 19:​10-12). Ña̱kán tá ta̱ʼán tindaʼún, ndáyáʼviníún nu̱ú Jehová xíʼin ta̱ Jesús. Iníísaá ñuyǐví ná hermana kúa̱an ndáyáʼvinína nu̱ú ndiʼi na̱ congregación. Ta xa̱ʼa̱ ña̱ kúʼvi̱ní-ininá xíniná na̱ congregación ta ndíʼi̱-ininá xa̱ʼa̱na, nda̱a̱ táki̱ʼva íyo siʼína á ku̱ʼvana saá íyoná (Mar. 10:​29, 30). Savaná ku̱a̱ʼáka káchíñuná nu̱ú Jehová. Iníísaá ñuyǐví ná nátúʼunka xa̱ʼa̱ Ndióxi̱ kúú ná hermana (Sal. 68:11). ¿Á kivi chikaa̱ún ndee̱ ña̱ ku̱a̱ʼáka kachíñún nu̱ú Jehová? Tá kúú, kivi koún precursora, ku̱ʼún nu̱ú íxava̱ʼana salón á kivitu koún Betelita. ¿Ndáaña chindeétáʼan xíʼún ña̱ keʼún ña̱yóʼo? Ka̱ʼa̱n xíʼin Jehová, natúʼún xíʼin sava na̱ xa̱a̱ káchíñu nu̱ú Jehová ndiʼi tiempo, ña̱ va̱ʼa kunda̱a̱-iniún ndáaña xíniñúʼu keʼún. Tándi̱ʼi, kaʼyí nu̱ú iin tutu ndáaña kivi chindeétáʼan xíʼún. Tá ku̱a̱ʼá chiñu ná keʼún nu̱ú Jehová, saá kúú ña̱ va̱ʼaníka kuniñúʼuna yóʼó ti̱xin ñuura. w23.12 22 párr. 16, 17

Kúnda̱a̱-iniyó ña̱ xa̱a̱ ku̱nu̱míní kixaa̱ ña̱ gran tribulación ña̱kán ndáyáʼviní ña̱ ku̱ʼu̱nyó natúʼunyó xíʼin na̱ yiví xa̱ʼa̱ tu̱ʼun va̱ʼa ña̱ káʼa̱n Ndióxi̱. Soo tá kǒo xu̱ʼún ndaʼa̱yó á na̱ chíñu kǒo xíínna taxina ña̱ natúʼunyó xa̱ʼa̱ Ndióxi̱ kivi ixayo̱ʼvi̱ña xíʼinyó. Tá saá ndóʼoyó, ¿ndáaña chindeétáʼan xíʼinyó ña̱ siʼnaka chiñu Jehová kundi̱ʼi-iniyó xa̱ʼa̱? Ña̱ xíniñúʼu keʼéyó kúú ña̱ ndiʼi tiempo kandíxayó ña̱ mií “Jehová ta̱ xáʼndachíñu nu̱ú na̱ ángel” chindeétáʼan xíʼinyó. Miíra chindeétáʼan xíʼinyó tá siʼnaka chiñu miíra ndíʼi̱-iniyó xa̱ʼa̱ nu̱úka chiñu miíyó. Ña̱kán va̱ása xíniñúʼu yi̱ʼvíyó (Ageo 2:4). Jehová kúni̱ra ña̱ natúʼunyó xa̱ʼa̱ra xíʼin na̱ yiví ña̱ va̱ʼa xa̱a̱na ndasakáʼnunara, tasaá ka̱kuna. Ta̱ Ageo chi̱kaa̱ra ndee̱ xíʼin na̱ judío ña̱ va̱ʼa kixáʼa tukuna ndasaviína templo. Ta mií Jehová ni̱ka̱ʼa̱nra xíʼinna ña̱ tá kándíxanara taxira bendición ndaʼa̱na (Ageo 2:​18, 19). Ta saátu miíyó kivi kandíxayó ña̱ ku̱a̱ʼání bendición taxi Jehová ndaʼa̱yó tá siʼnaka chiñu miíra ndíʼi̱-iniyó xa̱ʼa̱. w23.11 16 párr. 8; 17 párr. 11

Nu̱ú carta ña̱ ka̱ʼyí ta̱ apóstol Pablo ku̱a̱ʼa̱n nu̱ú na̱ Romano ni̱ka̱ʼa̱nra xíʼinna ña̱ ndiʼiyó kúúyó na̱ yiví ku̱a̱chi. Ña̱kán, ¿á kivi kusi̱í-ini Ndióxi̱ xíʼinyó ta ka̱ʼa̱nra ña̱ nda̱kú íyo iniyó xíʼinra? Ta̱ Pablo xi̱niñúʼura ña̱ ndo̱ʼo ta̱ Abrahán ña̱ va̱’a chindeétáʼanra xíʼin ndiʼiyó ña̱ kunda̱a̱-iniyó xíʼin pregunta yóʼo. Jehová ni̱ka̱ʼa̱nra xíʼin ta̱ Abrahán ña̱ nda̱kúní ni̱xi̱yo inira xíʼinra tá ni̱xi̱yora chí Canaán. ¿Nda̱chun ni̱ka̱ʼa̱nra ña̱yóʼo xíʼinra? Su̱ví xa̱ʼa̱ ña̱ va̱ʼaní níxi̱ndiku̱nra ley ta̱ Moisés níxi̱kuuña (Rom. 4:13). ¿Nda̱chun va̱ʼa xíni̱yó ña̱yóʼo? Saáchi na̱ ñuu Israel nda̱kiʼinna ley yóʼo tá xa̱a̱ ni̱ya̱ʼa 400 ku̱i̱ya̱. Ña̱kán, ¿nda̱chun ni̱ka̱ʼa̱n Jehová ña̱ iin ta̱a ta̱ nda̱kú-ini xi̱kuu ta̱ Abrahán? Saáchi ta̱ Abrahán xi̱kandíxaníra Jehová (Rom. 4:​2-4). w23.12 3 párr. 4, 5

Ta̱ profeta Natán ni̱ka̱ʼa̱nra xíʼin ta̱ David ña̱ su̱ví ta̱yóʼo kúú ta̱ keʼé templo (1 Crón. 17:​3, 4, 11, 12). ¿Ndáaña ke̱ʼé ta̱ David tá xi̱niso̱ʼora tu̱ʼun yóʼo? Nda̱kayara xu̱ʼún ta saátu ña̱ʼa ña̱ kivi kuniñúʼu se̱ʼera ta̱ Salomón ña̱ va̱ʼa keʼéra veʼe yóʼo (1 Crón. 29:​1-5). Tándi̱ʼi ni̱ka̱ʼa̱n ta̱ Natán xíʼin ta̱ David ña̱ va̱ása keʼéra templo. Jehová ke̱ʼéra iin trato xíʼin ta̱ David, ni̱ka̱ʼa̱nra xíʼinra ña̱ ti̱xin na̱ veʼera kixi iin ta̱ kaʼndachíñu ndiʼi tiempo (2 Sam. 7:16). Nu̱ú ñuyǐví xa̱á tá ná kaʼndachíñu ta̱ Cristo mil ku̱i̱ya̱, ta̱ David kusi̱íní-inira tá ná kunda̱a̱-inira ña̱ ti̱xin na̱ veʼera ki̱xi ta Jesús. Ña̱yóʼo sánáʼa̱ña miíyó ña̱ ni kǒo kívi keʼéyó ndiʼi ña̱ kúni̱yó keʼéyó nu̱ú Jehová, taxivara ku̱a̱ʼání bendición ndaʼa̱yó ña̱ va̱ása ndátuyó ndakiʼinyó. w23.04 16 párr. 9, 10

Íyo sava texto ña̱ va̱xi nu̱ú Biblia ña̱ kivi chindeétáʼan xíʼinyó tá xóʼvi̱yó. Tá kúú ña̱ va̱xi nu̱ú Job, Salmos xíʼin Proverbios. Ta saátu tu̱ʼun ña̱ ni̱ka̱ʼa̱n ta̱ Jesús nu̱ú Mateo capítulo 6. Tá káʼún xíʼin Jehová ta káʼviún tu̱ʼunra, saá kúú ña̱ kotoún ndáa ki̱ʼva sandíkora-iniún. Ná ndakaʼányó xa̱ʼa̱ ña̱yóʼo: ndiʼi tiempo ña̱ yáʼayó nu̱ú tu̱ndóʼo chíndeétáʼanva Jehová xíʼinyó. Kǒo taxira ña̱ xo̱ʼvi̱níyó xíʼin iin tu̱ndóʼo ña̱ yáʼayó nu̱ú (Sal. 23:4). Ná ndakaʼányó chi Jehová káʼa̱nra ña̱ kundaara miíyó, ña̱ kǒo taxira ña̱ kundi̱ʼi̱ní-iniyó, ña̱ kiʼinra kuenta xíʼinyó ta saátu ña̱ sándi̱kora-iniyó. Nu̱ú Isaías 26:​3, ta̱ Isaías ni̱ka̱ʼa̱nra ña̱yóʼo xíʼin Jehová: “Kundaún na̱ ndáa-ini yóʼó, ndiʼi ki̱vi̱ sandíkoún-inina. Saáchi yóʼó kúú ta̱ kándíxana”. Ña̱kán, kundaa-ini Jehová ta taxi ña̱ chindeétáʼanra xíʼún. Tá saá kéʼún, kuumiíún ndee̱ ña̱ ya̱ʼún nu̱ú tu̱ndóʼo ña̱ yo̱ʼvi̱ní ña̱ kivi kixi nu̱ún. w24.01 25 párr. 16, 17

Iin táʼví ña̱ profecía yóʼo xínuña tiempo vitin, soo saátu xínu ña̱yóʼo tiempo vitin: “Ta mií Jehová kúú ta̱ sanáʼa̱ ndiʼi na̱ se̱ʼún, ta va̱ʼaní kundoo ndiʼi na̱ se̱ʼún. Nina ña̱ nda̱kú kúú ña̱ keʼún. Va̱ása saxóʼvi̱na yóʼó, va̱ása yi̱ʼvíún xíʼin nda̱a̱ ni iin ña̱ʼa ta ni va̱ása koo ña̱ sayíʼvi yóʼó, saáchi va̱ása kuyatin ña̱yóʼo nu̱ún” (Is. 54:​13, 14). Ni ta̱ Ndi̱va̱ʼa ta̱ xáʼndachíñu nu̱ú ñuʼú yóʼo kǒo kuchiñura kasira nu̱ú na̱ ñuu Ndióxi̱ ña̱ sanáʼa̱na na̱ yiví xa̱ʼa̱ra (2 Cor. 4:4). Vitin iinlá mií Jehová kúú ta̱ ndásakáʼnuyó. Ña̱kán, nda̱a̱ ndáaka ña̱ kúni̱na keʼéna xíʼinyó va̱ása kuchiñuna. w24.02 4 párr. 10

Tá nda̱kuchiyó ke̱ʼéyó iin voto nu̱ú Jehová ta ndáyáʼviní ña̱yóʼo nu̱úyó. Ta náʼa̱yó ña̱yóʼo xíʼin ña̱ kéʼéyó ta saátu xíʼin ki̱ʼva ña̱ kítáʼanyó xíʼin na̱ veʼeyó. Chíkaa̱níyó ndee̱ ña̱ taxiyó ña̱ xíniñúʼu na̱ veʼeyó, soo siʼnaka ña̱ kúni̱ Jehová kúú ña̱ kéʼéyó nu̱úka ña̱ kúni̱ na̱ veʼeyó (Mat. 10:​35, 36; 1 Tim. 5:8). Sava yichi̱ xa̱ʼa̱ ña̱ kúni̱yó nda̱kú koo iniyó xíʼin Jehová kivi kaku ku̱a̱chi xíʼin na̱ veʼeyó. Jehová kúú ta̱ i̱xava̱ʼa na̱ familia ta kúni̱ra ña̱ si̱íní koona (Efes. 3:​14, 15). Tá ndixa kúni̱yó kusi̱í-iniyó ná keʼéyó ndiʼi ña̱ kúni̱ Jehová, chi xítora ndiʼi sacrificio ña̱ kéʼéyó. Tá kúú, ña̱ ndáayó na̱ veʼeyó ta saátu ña̱ chíkaa̱yó ndee̱ ña̱ ndasakáʼnuyóra (Rom. 12:10). w24.02 18 párr. 11, 13