Mayo

Na̱ cristiano na̱ ni̱xi̱yo tá siglo nu̱ú, ni̱xi̱yo iin ña̱ i̱xayo̱ʼvi̱ní xíʼinna. Tá siglo nu̱ú, ndeéní xi̱ndikaa̱ so̱ko iníísaá nu̱ú ñuʼú. Ta sana na̱ ni̱xi̱yo se̱ʼe xi̱ndi̱ʼi̱ní-inina ndáa míí kee ña̱ taxina kuxu na̱ veʼena. Ta na̱ va̱lí kúa̱an na̱ xi̱kuni̱ kachíñu ku̱a̱ʼá tiempo nu̱ú Jehová, sana nda̱kanixi̱nína ña̱ suví tiempo ña̱ kachíñuna nu̱ú Jehová níxi̱kuuña. Soo ni saá na̱ cristiano nda̱kundeéna na̱túʼunna xa̱ʼa̱ tu̱ʼun Ndióxi̱ xíʼin na̱ yiví ni yo̱ʼvi̱ní ña̱ xi̱yaʼana nu̱ú. Ta xíʼin ndiʼi níma̱na xi̱taxina ña̱ xi̱kuumiína ndaʼa̱ na̱ cristiano na̱ ni̱xi̱yo chí Judea (Hech. 11:​29, 30). Na̱ cristiano na̱ ta̱xina ña̱ʼa ndaʼa̱, ki̱ʼinna kuenta ña̱ mií Jehová kúú ta̱ xi̱ndaa-ñaʼá (Mat. 6:​31-33). Ta saátu va̱ʼaníka ki̱xáʼana kítáʼanna xíʼin na̱ cristiano na̱ chi̱ndeétáʼan xíʼinna. Ta na̱ xi̱taxi donación ta saátu na̱ xi̱chindeétáʼan xíʼin inka na̱ cristiano, xi̱kusi̱íní-inina tá xi̱keʼéna ña̱yóʼo (Hech. 20:35). w23.04 16 párr. 12, 13

Sava yichi̱ Jehová kivi kuniñúʼura na̱ kǒo ndásakáʼnu miíra ña̱ va̱ʼa ndakuiinra oración na̱ káchíñu nu̱úra. Tá kúú, Jehová xi̱niñúʼura ta̱ rey Artajerjes ña̱ va̱ʼa chindeétáʼanra xíʼin ta̱ Nehemías ña̱ ndikóra ñuu Jerusalén ta chindeétáʼanra xíʼin na̱ ñuu ña̱ va̱ʼa sandáʼana ña̱ ñuu yóʼo (Neh. 2:​3-6). Ta saátu tiempo vitin, Jehová xíniñúʼura na̱ va̱ása ndásakáʼnu miíra ña̱ va̱ʼa chindeétáʼanna xíʼinyó. Sava yichi̱ túviyó ña̱ va̱ása ndákuiin Jehová oración ña̱ kéʼéyó nu̱úra nda̱a̱ táki̱ʼva kúni̱yó. Soo ndákuiinvara oraciónyó nda̱a̱ táki̱ʼva kúni̱ miíra ña̱ va̱ʼa chindeétáʼanra xíʼinyó ña̱ nda̱kú koo iniyó xíʼinra. Ña̱kán ná kiʼin va̱ʼayó kuenta ndáa ki̱ʼva ndákuiin Jehová oraciónyó. Ndáyáʼviní taváyó tiempo ña̱ kotoyó ndáa ki̱ʼva ndákuiin Jehová oraciónyó (Sal. 66:​19, 20). Tá ndúkúyó ña̱’a nu̱ú Jehová kándíxaníyó ña̱ taxivaraña ndaʼa̱yó, soo tá su̱ví ña̱ ndúkúyó nu̱ú Jehová kúú ña̱ ta̱xira ndaʼa̱yó ná ndakiʼinvayóña (Heb. 11:6). w23.05 12 párr. 13, 15; 13 párr. 16

Tá nda̱taxiyó miíyó ndaʼa̱ Jehová ta nda̱kuchiyó ki̱ndooyó ña̱ ndasakáʼnuyóra ta saátu ña̱ ndiʼi tiempo kachíñuyó nu̱úra. Xíniñúʼu keʼéyó ña̱ ni̱ka̱ʼa̱nyó xíʼinra saáchi kuchiñuvayó keʼéyóña. ¿Nda̱chun káʼa̱nyó ña̱yóʼo? Saáchi mií Jehová i̱xava̱ʼa miíyó ña̱ ndasakáʼnuyóra (Apoc. 4:11). I̱xava̱ʼara miíyó nda̱a̱ táki̱ʼva íyora, saátu chi̱kaa̱ra iniyó ña̱ kuni̱yó sakúaʼayó xa̱ʼa̱ra ta ndasakáʼnuyóra. Ña̱kán kiviva viíní kitáʼanyó xíʼinra ta kusi̱íní-iniyó ña̱ kachíñuyó nu̱úra. Tá kéʼéyó ña̱ káʼa̱n Jehová ta ndíku̱nyó yichi̱ ta̱ Jesús saá va̱ʼaní kúniyó (Mat. 11:​28-30). Chikaa̱ ndee̱ ña̱ kuʼvi̱ka-iniún kuniún Jehová. Tá ndákanixi̱níún xa̱ʼa̱ ña̱ xa̱a̱ kéʼé Jehová xa̱ʼún ta saátu ña̱ ndátún ndakiʼún chí nu̱únínu, ña̱yóʼo chindeétáʼan xíʼún ña̱ kuʼvi̱ka-iniún kuniúnra. Tá ná kuʼvi̱ka-iniún kuniún Jehová saá kúú ña̱ va̱ása ixayo̱ʼvi̱ña xíʼún keʼún ña̱ káʼa̱nra (1 Juan 5:3). Ta̱ Jesús ku̱chiñura ke̱ʼéra chiñu nu̱ú Ndióxi̱ saáchi xi̱ka̱ʼa̱nra xíʼinra ña̱ taxira ndee̱ ndaʼa̱ra ta kǒo nínandósó-inira xa̱ʼa̱ ña̱ ni̱ka̱ʼa̱n Ndióxi̱ taxira ndaʼa̱ra (Heb. 5:7; 12:2). Nda̱a̱ táki̱ʼva ke̱ʼé ta̱ Jesús, saátu miíún ka̱ʼa̱n xíʼin Jehová ná taxira ndee̱ ndaʼún, ta saátu kǒo nandósó-iniún xa̱ʼa̱ ña̱ ndátún ndakiʼún chí nu̱únínu. w23.08 27, 28 párr. 4, 5

Ndi’iyó kútóoyó kitáʼanyó xíʼin na̱ yiví na̱ kǒo sáa̱ kama tá kéʼéyó á káʼa̱nyó iin ña̱ va̱ása va̱ʼa xíʼinna. Saátu táxíníyó tíxa̱ʼvi ndaʼa̱ na̱ hermano na̱ sa̱náʼa̱ miíyó xa̱ʼa̱ Ndióxi̱, saáchi kúee ni̱xi̱yo inina xíʼinyó tá xi̱ i̱xayo̱ʼvi̱ña xíʼinyó kunda̱a̱-iniyó xíʼin ña̱ xi̱kaʼviyó. Táxinítuyó tíxa̱ʼvi ndaʼa̱ Jehová xa̱ʼa̱ ña̱ kúee íyo inira xíʼinyó. Ndiʼiyó kúni̱yó ña̱ kúee koo ini inkana xíʼinyó. Soo, íxayo̱ʼvi̱níña xíʼin miíyó ña̱ kúee koo iniyó xíʼin inkana, tá kúú, tá ku̱a̱ʼa̱nyó xíʼin carro ta ku̱a̱ʼánínú ku̱a̱ʼa̱n carretera íxayo̱ʼvi̱níña xíʼinyó ña̱ kundatuyó, kachikaví tá xa̱a̱ ni̱ya̱ʼa hora ña̱ xa̱a̱yó nu̱ú kúni̱yó ku̱ʼu̱nyó. Ta sana kivi sa̱a̱níyó tá iin na̱ yiví ke̱ʼéna á ni̱ka̱ʼa̱nna ña̱ va̱ása va̱ʼa xíʼinyó. Á sanatu kivi ndakanixi̱níyó ña̱ va̱ása kama kixaa̱ ñuyǐví xa̱á ña̱ káʼa̱n Jehová taxira kooyó. Tá ndó’oyó ña̱yó’o, ndáyáʼviní ña̱ kúee koo iniyó. w23.08 20 párr. 1, 2

Jehová ni̱ka̱ʼa̱nra xíʼin ta̱ Gedeón ña̱ ka̱ʼa̱nra xíʼin ku̱a̱ʼání na̱ soldado ña̱ ndikóna veʼena ta si̱lóʼo na̱yóʼo kindo̱o ña̱ ku̱ʼu̱nna xíʼinra nu̱ú ku̱a̱chi. Sana nda̱kanixi̱níra: “¿Á kuniso̱ʼi̱ ña̱ ni̱ka̱ʼa̱n Jehová xíʼi̱n? ¿Á kuchiñui̱ ku̱ʼi̱n nu̱ú ku̱a̱chi xíʼin loʼoní na̱ soldado?”. Soo ni saá, ta̱ Gedeón xi̱niso̱ʼora ña̱ ni̱ka̱ʼa̱n Jehová xíʼinra. Tiempo vitin tá násama na̱ ñuu Ndióxi̱ sava ña̱ʼa ta va̱ʼaní xíniso̱ʼo na̱ anciano ndiʼi ña̱ káʼa̱nna xíʼinna, saá kúú ña̱ náʼa̱na ña̱ va̱ʼaní ndíku̱nna yichi̱ ta̱ Gedeón (Heb. 13:17). Ni ni̱yi̱ʼvíní ta̱ Gedeón, ke̱ʼévara ña̱ ni̱ka̱ʼa̱n Jehová xíʼinra (Juec. 9:17). Tá ni̱ka̱ʼa̱n Jehová xíʼin ta̱ Gedeón ña̱ chindeétáʼanra xíʼinra, ta̱yóʼo kǒo níxi̱kaka-inira ña̱ kuchiñuvara sáka̱kura na̱ ñuura. Na̱ anciano na̱ íyo ñuu nu̱ú kǒo xíínna taxina ndasakáʼnuyó Jehová íyona nda̱a̱ táki̱ʼva ni̱xi̱yo ta̱ Gedeón, saáchi kǒo yíʼvina ta ndákundeéna kéʼéna reunión ña̱ va̱ʼa ndakutáʼan na̱ hermano ta saátu ña̱ keena predicación. Ni kivi tiin na̱ chíñu na̱yóʼo ña̱ ku̱ʼu̱nna veʼeka̱a á tavánana nu̱ú káchíñuna á ña̱ ixandi̱va̱ʼana xíʼinna. Tá ná kixáʼa ña̱ gran tribulación, na̱ anciano xíniñúʼu kuniso̱ʼona ña̱ ka̱ʼa̱n na̱ ñuu Ndióxi̱ xíʼinna ni sava yichi̱ i̱yo kuvina. w23.06 5, 6 párr. 12, 13

Jehová ta̱xira ña̱ ka̱ʼyi̱ nu̱ú Biblia ndiʼi ña̱ ke̱ʼé ta̱ su̱tu̱ Jehoiadá ña̱ va̱ʼa chindeétáʼanña xíʼinyó tiempo vitin (Rom. 15:4). Ta̱ Jehoiadá ke̱ʼéra ña̱ va̱ʼa ñuu Israel, saáchi kǒo nítaxira keʼéna ña̱ kini ti̱xin veʼe Jehová, xa̱ʼa̱ ña̱kán tá ni̱xi̱ʼi̱ra sa̱ndúxu̱nnara ñuu ta̱ David nu̱ú xi̱sandúxu̱nna ndiʼi na̱ rey (2 Crón. 24:​15, 16). Ña̱ ke̱ʼé ta̱ Jehoiadá chíndeétáʼanña xíʼinyó ña̱ yi̱ʼvíkayó kuniyó Jehová á ña̱ ixato̱ʼóyóra. Na̱ anciano kivi kundiku̱nna yichi̱ ta̱ Jehoiadá ña̱ va̱ʼa kundaana na̱ hermano nu̱ú ña̱ kini (Hech. 20:28). Na̱ hermano na̱ xa̱a̱ chée kivi ndakaʼánna tá nda̱kú íyo inina xíʼin Jehová miíra kivi kuniñúʼurana ña̱ kachíñukana nu̱úra. Ni xa̱a̱ ku̱chéena kiviva kuniñúʼurana ta ndáyáʼvinína nu̱úra. Sáatu na̱ va̱lí kúa̱an kivi ixato̱ʼóna na̱ xa̱a̱ chée nu̱úna, tasaá keʼéna táki̱ʼva ke̱ʼé Jehová chi xi̱niñúʼura ta̱ Jehoiadá ña̱ ka̱chíñura nu̱úra. Íyo ku̱a̱ʼání na̱ hermano na̱ xa̱a̱ ku̱a̱ʼání tiempo káchíñu nu̱ú Jehová ta xíniñúʼu ixato̱ʼóníyóna (Prov. 16:31). Ná kandíxayó ta chindeétáʼanyó xíʼin na̱ níʼi yichi̱ nu̱úyó (Heb. 13:17). w23.06 17 párr. 14, 15

Tá xáʼa̱nyó reunión, ná kiʼinníyó kuenta nda̱saa yichi̱ ndániʼiyó ndaʼa̱yó tá kúni̱yó taxiyó comentario. Chi tá ku̱a̱ʼání yichi̱ ndániʼiyó ndaʼa̱yó, sana sandíʼi̱yó-ini ta̱ hermano ta̱ sáya̱ʼa reunión, ta xa̱ʼa̱ ña̱kán sana taxira ku̱a̱ʼá comentario ndaʼa̱yó ta ni va̱ása taxikaraña ndaʼa̱ na̱ kúma̱níka taxi comentario. Ta sana inkana ndakava-inina ta va̱ása kúni̱kana taxina comentario (Ecl. 3:7). Tá ku̱a̱ʼání na̱ hermano ndániʼina ndaʼa̱na ña̱ taxina comentario, sana loʼova comentario taxina ndaʼa̱yó. Ta sava yichi̱ nda̱a̱ ni iin comentario kǒo nítaxiyó ta xa̱a̱ ndi̱ʼiva reunión. Sana sakúsuchíva ña̱yóʼo iniyó, soo ná kǒo sa̱a̱yó tá va̱ása táxina comentario ndaʼa̱yó (Ecl. 7:9). Ni tá kǒo kívi taxiyó ku̱a̱ʼání comentario, kiviva kuniso̱ʼoyó ña̱ táxi inkana, ta tá ná ndiʼi reunión kivi ka̱ʼa̱nyó xíʼinna ña̱ va̱ʼaní comentario ta̱xina. Ta tu̱ʼun ña̱ ka̱ʼa̱nyó xíʼin na̱yóʼo kivi chika̱a̱níña ndee̱ xíʼinna. Ta nda̱a̱ táki̱ʼva íyo ña̱ taxiyó comentario saátu íyo ña̱yóʼova. w23.04 23, 24 párr. 14-16

Ná kaʼviyó tu̱ʼun Ndióxi̱ ta ndakanixi̱níyó xa̱ʼa̱ña. Ña̱ chíndeétáʼan xíʼin iin yitu̱n ña̱ va̱ása ndi̱vanú kúú ña̱ kúnu ñúʼu yoʼo̱nú á ti̱oʼonú. Ta saátu miíyó tá kúni̱yó nda̱kú koo iniyó xíʼin Ndióxi̱ xíniñúʼu kandíxaníyó ña̱ káʼa̱n tu̱ʼunra. Nani xáʼnu iin yitu̱n saátu xáʼnu ti̱oʼonú ta kúnuka ku̱a̱kiʼviña ti̱xin ñuʼú. Ta saátu ndóʼo miíyó saáchi tá káʼviyó Biblia ta ndákanixi̱níyó xa̱ʼa̱ña saá kúú ña̱ xáa̱yó kándíxaníkayó Ndióxi̱ ta kúnda̱a̱-iniyó ña̱ va̱ʼaní íyo ndiʼi ña̱ sánáʼa̱ra (Col. 2:​6, 7). Ná ndakanixi̱níyó ndáa ki̱ʼva xi̱ndaa Jehová na̱ xi̱ndasakáʼnu miíra tiempo xi̱naʼá xa̱ʼa̱ ña̱ xi̱ndiku̱nna consejo ña̱ ta̱xira ndaʼa̱na. Tá kúú, nu̱ú iin visión ta̱ Ezequiel xi̱nira iin ta̱ ángel ña̱ viíní ta̱vára ki̱ʼva ña̱ templo. Visión ña̱ xi̱ni ta̱ Ezequiel chi̱ndeétáʼanña xíʼinra ña̱ kandíxakara Ndióxi̱, ta saátu chíndeétáʼanña xíʼinyó tiempo vitin ña̱ kuniso̱ʼoyó ndiʼi ña̱ káʼa̱n Jehová xíʼinyó, xa̱ʼa̱ ndáa ki̱ʼva xíniñúʼu ndasakáʼnuyóra (Ezeq. 40:​1-4; 43:​10-12). Nu̱ú Biblia va̱xi sava ña̱ʼa ña̱ íxayo̱ʼvi̱ní xíʼinyó kunda̱a̱-iniyó xíʼin, ña̱kán ná taváyó tiempo ña̱ kaʼviyó xa̱ʼa̱ ña̱yóʼo ta ndakanixi̱níyó xa̱ʼa̱ña. Kivi nda̱kú koo iniyó xíʼin Jehová ta ndiʼi tiempo kandíxayóra (Sal. 112:7). w23.07 18 párr. 15, 16

Biblia káʼa̱nña xa̱ʼa̱ ku̱a̱ʼání na̱ ta̱a na̱ va̱ʼaní xi̱ndasakáʼnu Ndióxi̱ ta xi̱kuʼvi̱ní-inina xi̱xininara ta va̱ʼaní xi̱ndaana na̱ ñuura. Sana ti̱xin veʼún á ti̱xin congregación íyo na̱ hermano na̱ xa̱a̱ ku̱a̱ʼání tiempo ndásakáʼnu Ndióxi̱ na̱ kivi kundikún yichi̱ (Heb. 13:7). Ta saátu kivi kundikún yichi̱ ña̱ va̱ʼaní sa̱ndákoo ta̱ Jesucristo nu̱ún (1 Ped. 2:21). Tá xa̱a̱ ndi̱ʼi nda̱kanixi̱níún xa̱ʼa̱ ndiʼi na̱yóʼo koto ndáaña va̱ʼa kúúmiína ña̱ kivi chindeétáʼan xíʼún (Heb. 12:​1, 2). Tándi̱ʼi, chika̱a̱ ndee̱ ña̱ keʼún táki̱ʼva kéʼéna. Ndiʼi ta̱a xíniñúʼu tavára tiempo ña̱ viíní ndakanixi̱níra tá ndáka̱xinra keʼéra iin ña̱ʼa. Ña̱kán, chikaa̱ ndee̱ ña̱ viíní koo ña̱ ndákanixi̱níún ta kǒo sandákoún keʼún ña̱yóʼo. Kivi sakúaʼún ña̱ va̱xi nu̱ú Biblia ta ndakanixi̱níún nda̱chun káʼa̱n Jehová xíʼún ña̱ keʼúnña. Tándi̱ʼi, kivi kuniñúʼún ña̱ sa̱kuaʼún ña̱ va̱ʼa viíní ndaka̱xiún ña̱ keʼún tasaá sakúsi̱íún-ini Jehová (Sal. 119:9). Tá ná sakúaʼún viíní ndakanixi̱níún, ña̱yóʼo chindeétáʼanña xíʼún ña̱ kuxa-iniún xíʼin tu̱ʼun Ndióxi̱ (Prov. 2:​11, 12; Heb. 5:14). w23.12 24, 25 párr. 4, 5

Na̱ íyo se̱ʼe kivi sanáʼa̱na se̱ʼena ña̱ vií ndakuiinna yuʼú na̱ káʼa̱n xíʼinna ña̱ su̱ví ña̱ nda̱a̱ kúú ña̱ kándíxana (Sant. 3:13). Ña̱ kéʼé sava na̱ íyo se̱ʼe kúú ña̱ sákuaʼa kúeena xíʼin na̱ va̱lí se̱ʼena tá kúúmiína adoración ña̱ familia, ta káʼa̱nna xa̱ʼa̱ ña̱ kivi ndakatu̱ʼúnnana ti̱xin escuela. Saátu káʼa̱nna xíʼin na̱ va̱lí se̱ʼena ña̱ to̱ʼóní ná ndakuiinna yuʼú na̱ yiví ta viíní ná ka̱ʼa̱nna xíʼinna. Ña̱ sákuaʼa na̱ va̱lí xíʼin na̱ veʼena chíndeétáʼanña xíʼinna ña̱ ka̱ʼa̱nna xa̱ʼa̱ ña̱ kándíxana soo saátu chíndeétáʼanña xíʼinna ña̱ kǒo kaka-inina xa̱ʼa̱ ña̱ kándíxana. Táʼví ña̱ naní “Jóvenes” ña̱ tu̱ʼun sáʼán ña̱ va̱xi nu̱ú jw.org kúúmiíña tutu ña̱ va̱xi nu̱ú sección ña̱ naní “Ponlo por escrito”, ña̱yóʼo ku̱va̱ʼaña ña̱ chindeétáʼanña xíʼin na̱ va̱lí kúa̱an ña̱ va̱ʼa kandíxakana Ndióxi̱. Ta saátu ña̱ kunda̱a̱-inina ka̱ʼa̱nna xíʼin inkana xa̱ʼa̱ ña̱ kándíxana. Tá káʼviyó tutu yóʼo xíʼin na̱ veʼeyó, ta xíniñúʼuyó sección ña̱ naní “Los jóvenes preguntan”, saá kúú ña̱ sakúaʼayó ña̱ to̱ʼó ndakuiinyó yuʼú na̱ yiví tá ná nda̱ka̱tu̱ʼunna miíyó xa̱ʼa̱ ña̱ kándíxayó. w23.09 18 párr. 15, 16

¿Á xa̱a̱ kúni̱ún keʼún iin chiñu soo íxayo̱ʼvi̱ña xíʼún saxínúnña? Su̱ví iinlá yóʼó ndóʼo saá, chi saátu ndóʼo inkavana. Tá kúú ta̱ Philip xi̱kuni̱ra ka̱ʼa̱n ni̱ʼira xíʼin Jehová ta viíka koo ña̱ ka̱ʼa̱nra xíʼinra, soo xi̱ ixayo̱ʼvi̱ña xíʼinra tavára tiempo ña̱ ka̱ʼa̱nra xíʼin Jehová. Ta saátu ñá Erika ya̱chi̱ka xi̱kuni̱ñá xa̱a̱ñá reunión ña̱ xíyo tá kéena predicación, soo ni saá va̱ása ya̱chi̱ví níxi̱xaa̱ñá. Tá chíka̱a̱-iniún keʼún iin chiñu ta ta̱ʼán saxínúnña va̱ása ndakava-iniún, chi ni iin chiñu ña̱ loʼoní kúú ña̱ ndáka̱xinyó keʼéyó ku̱a̱ʼáva tiempo xíniñúʼuyó xíʼinña ta saátu xíniñúʼu chika̱a̱níyó ndee̱ ña̱ va̱ʼa saxínuyóña. Tá kúni̱kaún keʼún chiñu nu̱ú Jehová soo íxayo̱ʼvi̱ña xíʼún, ña̱yóʼo náʼa̱ña ña̱ chíndayáʼviníún ña̱ kítáʼún xíʼinra ta kúni̱ún viíka keʼún chiñu nu̱úra. Jehová kíʼinra kuenta xa̱ʼa̱ ña̱yóʼo, ta va̱ása káʼa̱nra xíʼún keʼún iin ña̱ʼa ña̱ va̱ása kuchiñún keʼún (Sal. 103:14; Miq. 6:8). Ña̱kán ndaka̱xin keʼé iin ña̱ kivi saxínún. Soo, ¿ndáaña kivi keʼún ña̱ va̱ʼa saxínúnña? w23.05 26 párr. 1, 2

Iin na̱ yiví sana ndakúniva-inina soo sava yichi̱ kivi yi̱ʼvína, soo kǒo táxina ña̱ kasi ña̱yóʼo nu̱úna ña̱ keʼéna ña̱ va̱ʼa. Ni ta̱ loʼo ni̱xi̱yo ta̱ Daniel soo ni̱na̱ʼa̱ra ña̱ ndakúní ni̱xi̱yo inira. Ta̱ Daniel xi̱kuumiíra costumbre ña̱ kaʼvira tutu ña̱ ka̱ʼyí na̱ profeta Ndióxi̱, tá kúú ña̱ ka̱ʼyí ta̱ Jeremías. Xa̱ʼa̱ ña̱kán xi̱kunda̱a̱-inira ña̱ si̱lóʼo xi̱kuma̱ní ta sa̱ñá na̱ ñuu Israel ta ndikóna ñuuna (Dan. 9:2). Tá ki̱ʼinra kuenta ña̱ ndiʼi tiempo sáxi̱nu Jehová profecía ña̱ káʼa̱nra, ña̱yóʼo chi̱ndeétáʼan xíʼinra ña̱ kandíxaníkarara. Saáchi tá iin na̱ yiví kándíxanína Jehová saá kúú ña̱ ndakúní íyo inina (Rom. 8:​32, 37-39). Ña̱ chi̱ndeétáʼanníka xíʼin ta̱ Daniel kúú ña̱ xi̱ka̱ʼa̱n ni̱ʼira xíʼin Jehová (Dan. 6:10). Xi̱ka̱ʼa̱nra xíʼin Jehová xa̱ʼa̱ tu̱ndóʼo ña̱ xi̱yaʼara nu̱ú, saátu xi̱ka̱ʼa̱nra xíʼinra ña̱ ná chindeétáʼanra xíʼinra (Dan. 9:​4, 5, 19). Xi̱niñúʼu sakúaʼa ta̱ Daniel ña̱ ndakú koo-inira. Ta ña̱ chi̱ndeétáʼan xíʼinra xi̱kuu ña̱ xi̱ka̱ʼa̱nra xíʼin Ndióxi̱, ña̱ xi̱kaʼvira tu̱ʼunra xíʼin ña̱ xi̱kandíxaníra. w23.08 3 párr. 4, 7

Tá xíniso̱ʼoyó ña̱ káʼa̱n na̱ chíñu íyo ña̱ va̱ʼa ndákiʼinyó ta saátu inka na̱ yiví. ¿Nda̱chun káʼa̱nyó ña̱yóʼo? Saáchi tá kǒo xíniso̱ʼoyó ley ña̱ táxi na̱ chíñu kivi kixi tu̱ndóʼo nu̱úyó (Rom. 13:​1, 4). Ta saátu tá kándíxayó ña̱ káʼa̱n na̱ chíñu, ña̱yóʼo chindeétáʼan xíʼinna ña̱ vií ndakanixi̱nína xa̱ʼa̱ na̱ testigo Jehová. Ña̱yóʼo kúú ña̱ ku̱u ñuu Nigeria xa̱a̱ íyo ku̱a̱ʼá ku̱i̱ya̱ chí sa̱tá. Iin tiʼvi na̱ soldado ni̱ki̱ʼvina ti̱xin Salón tá íyo reunión. Na̱yóʼo xi̱nandukúna na̱ yiví na̱ xi̱ka̱ʼa̱n kúáchi xa̱ʼa̱ impuesto ña̱ xi̱xiyo ñuu kán. Soo ta̱ soldado ta̱ xáʼndachíñu nu̱ú na̱ soldado yóʼo ni̱ka̱ʼa̱nra xíʼinna ña̱ ná kǒo keʼéna na̱ testigo Jehová, ka̱chira: “Na̱ testigo Jehová kǒo káʼa̱n kúáchivína xíʼin na̱ chíñu xa̱ʼa̱ impuesto”. Ña̱kán tá xíniso̱ʼún ña̱ káʼa̱n na̱ chíñu, ña̱yóʼo chíndeétáʼanña xíʼin na̱ ñuu Ndióxi̱ ña̱ ka̱ʼa̱n va̱ʼana xa̱ʼa̱na. Ta sana ña̱yóʼo chindeétáʼan xíʼin na̱ hermano chí nu̱únínu. w23.10 9 párr. 13

Sava na̱ ndásakáʼnu Jehová xa̱a̱ ku̱a̱ʼání ku̱i̱ya̱ ndátuna ña̱ kixaa̱ ki̱vi̱ ña̱ ndiʼi-xa̱ʼa̱ ñuyǐví yóʼo. Savana ndákanixi̱nína ña̱ xa̱a̱ xi̱niñúʼu ndiʼi-xa̱ʼa̱vaña. Jehová kúnda̱a̱va-inira xíʼin ña̱ ndóʼo na̱ ndásakáʼnu miíra. Ta ña̱yóʼo ni̱ka̱ʼa̱nra xíʼin ta̱ profeta Habacuc: “Saáchi kúma̱níva kixaa̱ ki̱vi̱ ña̱ xi̱nu ña̱yóʼo, ta xa̱a̱ ku̱nu̱míní xi̱nu tu̱ʼun yóʼo, ta ña̱ kixa̱a̱ kúúvaña. Ni ná kukuachi̱ña, koo tu̱ʼvaníún kundatúnña, saáchi xi̱nuvaña. Va̱ása kukuachi̱ña” (Hab. 2:3). ¿Á iinlá xíʼin ta̱ Habacuc ni̱ka̱ʼa̱n Jehová tu̱ʼun yóʼo? ¿Á chíndeétáʼantuña xíʼin miíyó nda̱a̱ tiempo vitin? Jehová xi̱niñúʼura ta̱ apóstol Pablo ña̱ va̱ʼa ka̱ʼa̱nra xíʼin na̱ cristiano ña̱ ná kundoo tu̱ʼvanína nani ndátuna ná kixaa̱ ñuyǐví xa̱á (Heb. 10:37). Ni túviyó ña̱ kúáchi̱ní Jehová, ná ndakaʼányó chi ña̱ xi̱nu kúúva ña̱ kúni̱ra keʼéra ta va̱ása kuachi̱ra. w23.04 30 párr. 16

Ni xi̱ni na̱ ñuu Israel ku̱a̱ʼání prueba ña̱ xi̱naʼa̱ ña̱ mií Jehová kúú ta̱ nda̱kaxin ta̱ Moisés ña̱ kuniʼira yichi̱ nu̱úna, soo koo níxiinna kandíxanara (Núm. 14:​10, 11). Xa̱ʼa̱ ña̱ kǒo níxiniso̱ʼona ta̱ Moisés, Jehová kǒo nítaxira ki̱ʼvina nu̱ú ñuʼú ña̱ ni̱ka̱ʼa̱nra taxira ndaʼa̱na (Núm. 14:30). Ni̱xi̱yova sava na̱ israelita na̱ xi̱kandíxa ña̱ xi̱ka̱ʼa̱n Jehová. Tá kúú, Jehová ni̱ka̱ʼa̱nra: “Ta̱ Caleb ta̱ káchíñu nu̱úi̱ ndákundeéra ndíku̱nra yi̱ʼi̱ xíʼin ndiʼi níma̱ra” (Núm. 14:24). Ni̱kusi̱íní-ini Jehová xíʼin ta̱ Caleb, ta nda̱a̱ ni̱ka̱ʼa̱nra xíʼinra ndáa táʼví ñuu Canaán xi̱kuni̱ra koora (Jos. 14:​12-14). Nda̱a̱ táki̱ʼva ke̱ʼé ta̱ Caleb, saá ke̱ʼétu sava na̱ israelita na̱ ka̱ku chí desierto. Na̱yóʼo i̱xato̱ʼónína ta̱ Josué chi ta̱yóʼo kúú ta̱ nda̱kaxin Jehová ña̱ kuniʼira yichi̱ nu̱ú na̱ ñuu Israel tá ni̱xi̱ʼi̱ ta̱ Moisés (Jos. 4:14). Xa̱ʼa̱ ña̱kán ta̱xi Jehová ña̱ ndakiʼinna ñuʼú ña̱ ni̱ka̱ʼa̱nra taxira ndaʼa̱na (Jos. 21:​43, 44). w24.02 21 párr. 6, 7

Tá xíto ta̱ doctor ña̱ kúee kánda̱ tu̱chu su̱kún ndaʼa̱ na̱ yiví, sana kúúmiína kue̱ʼe̱. Soo tá xítora ña̱ ndeé kánda̱ña sana íyo va̱ʼavana. Ki̱ʼva saá kivi kundoʼoyó, tá kíʼinyó kuenta ña̱ kǒo náʼa̱kayó ña̱ kúʼvi̱-iniyó xíniyó na̱ hermano, xíʼin ña̱yóʼo kúnda̱a̱-iniyó ña̱ va̱ása kúʼvi̱ka-iniyó xíniyó Jehová. Soo tá ndiʼi tiempo náʼa̱yó ña̱ kúʼvi̱-iniyó xíniyó na̱ hermano, ña̱yóʼo náʼa̱ña ña̱ va̱ʼaní kítáʼanyó xíʼin Jehová ta kúʼvi̱ní-iniyó xíniyóra. ¿Nda̱chun xíniñúʼu kundi̱ʼi-iniyó tá va̱ása kúʼvi̱ka-iniyó xíniyó na̱ hermanoyó? Saáchi ña̱yóʼo kúni̱ kachiña ña̱ va̱ása viíka kítáʼanyó xíʼin Jehová. Ta va̱ʼaní ni̱ka̱ʼa̱n ta̱ apóstol Juan xa̱ʼa̱ ña̱yóʼo tá ka̱chira: “Saáchi na̱ va̱ása kúʼvi̱-ini xíni na̱ ñanina na̱ va̱ʼa xínina, va̱ása kívi kuʼvi̱-inina kunina Ndióxi̱ ta̱ va̱ása kívi kunina” (1 Juan 4:20). ¿Ndáaña sákuaʼayó xíʼin ña̱yóʼo? Tá kúʼvi̱-iniyó xíniyó na̱ hermanoyó saá kúú ña̱ kivi sakúsi̱íyó-ini Jehová (1 Juan 4:​7-9, 11). w23.11 9 párr. 5, 6

Tá ni̱xi̱yo loʼo ta̱ Jehoás ni̱xi̱ʼi̱ yivára, ta ta̱ su̱tu̱ káʼnu Jehoiadá sa̱kúaʼnurara nda̱a̱ táki̱ʼva ni̱xi̱yo se̱ʼera ta ku̱a̱ʼání ña̱ʼa sa̱náʼa̱rara xa̱ʼa̱ Jehová. Ndíchi ni̱xi̱yo ta̱ loʼo Jehoás saáchi xi̱niso̱ʼora consejo ña̱ ta̱xi ta̱ Jehoiadá ndaʼa̱ra. Ta xa̱ʼa̱ ña̱ va̱ʼaní yichi̱ chi̱núu ta̱ Jehoiadá nu̱ú ta̱ loʼo yóʼo, nda̱kaxinra ña̱ kachíñura nu̱ú Jehová ta saátu ña̱ chindeétáʼanra xíʼin na̱ yiví ña̱ keʼéna ña̱yóʼo. Ta nda̱saviíra templo Jehová (2 Crón. 24:​1, 2, 4, 13, 14). Tá na̱ yiváún á inka na̱ hermano chíndeétáʼanna xíʼún ña̱ kuʼvi̱-iniún kuniún Jehová ta nda̱kú koo iniún xíʼinra, iin ña̱ va̱ʼaní kéʼéna xíʼún (Prov. 2:​1, 10-12). Na̱ íyo se̱ʼe xa̱a̱ síín síín kivi sánáʼa̱na se̱ʼena. Tá xíniso̱ʼún consejo ña̱ va̱xi nu̱ú Biblia ña̱ táxi na̱ yiváún ndaʼún, sákusi̱íún-inina soo saátu sákusi̱íníún-ini Jehová tasaá va̱ʼaní kitáʼún xíʼinra ndiʼi tiempo (Prov. 22:6; 23:​15, 24). Tá ná keʼún ña̱yóʼo, saá kúú ña̱ va̱ʼaní kundiku̱ún yichi̱ ta̱ Jehoás. w23.09 8 párr. 3-5

Jehová káʼa̱nra xíʼinyó ña̱ xíniso̱ʼovara oración ña̱ káʼa̱nyó xíʼinra. Kúʼvi̱níva-ini Jehová xínira ndiʼi na̱ ndásakáʼnu miíra ta xíniso̱ʼora ndiʼi oración ña̱ káʼa̱nna xíʼinra (Sal. 10:17; 37:28). Soo su̱ví ña̱yóʼo kúni̱ kachiña, ña̱ ndiʼi tiempo taxira ña̱ ndúkúyó nu̱úra. Sana xíniñúʼu kundatuyó ña̱ nda̱a̱ nu̱ú ñuyǐví xa̱á taxira ndiʼi ña̱ ndúkúyó nu̱úra. Jehová kíʼinra kuenta ndáa ki̱ʼva xi̱nu ña̱ kúni̱ra tá kúma̱níka ndákuiinra oraciónyó (Is. 55:​8, 9). Ña̱ kúni̱ Jehová kúú ña̱ kixaa̱ iin ki̱vi̱ ña̱ ndiʼi na̱ yiví na̱ koo nu̱ú ñuʼú yóʼo iinlá Reinora kaʼndachíñu nu̱úna, ta si̱íní koona ta inkáchi kutáʼanna ndasakáʼnunara. Soo ta̱ Ndi̱va̱ʼa káʼa̱nra ña̱ va̱ʼava kooyó tá ná kǒo kaʼndachíñu Ndióxi̱ nu̱úyó ta keʼéyó ña̱ kúni̱ miíyó (Gén. 3:​1-5). Ta ña̱ va̱ʼa kunda̱a̱-ini na̱ yiví ña̱ su̱ví ña̱ nda̱a̱ kúú ña̱ káʼa̱n ta̱ Ndi̱va̱ʼa, Jehová táxira ña̱ ná keʼé na̱ yiví ña̱ kúni̱ miína á ña̱ kaʼndachíñuna nu̱ú miína, ta xa̱ʼa̱ ña̱yóʼo ku̱a̱ʼání tu̱ndóʼo íyo tiempo vitin (Ecl. 8:9). Xa̱ʼa̱ ña̱kán kǒo ndásaviíví Jehová ndiʼi tu̱ndóʼo ña̱ íyo tiempo vitin. w23.11 21 párr. 4, 5

Jehová ni̱ka̱ʼa̱nra ña̱ ku̱a̱ʼání ña̱ va̱ʼa ndakiʼin na̱ yiví xa̱ʼa̱ ña̱ ke̱ʼé ta̱ Abrahán. Soo tá xi̱kuumií ta̱ Abrahán 100 ku̱i̱ya̱ ta ñá Sara 90, kǒo se̱ʼena níxi̱yo. Sana nda̱kanixi̱nína ña̱ va̱ása saxínu Ndióxi̱ ña̱ ni̱ka̱ʼa̱nra xíʼinna saáchi xa̱a̱ chéenína. Soo ta̱ Abrahán ka̱ndíxanívara ña̱ saxínu Jehová ña̱ ni̱ka̱ʼa̱nra xíʼinra, ña̱ ku̱a̱ʼání koo se̱ʼera (Rom. 4:​18, 19). Tá ni̱ya̱ʼa tiempo ni̱xi̱nuva ña̱ ni̱ka̱ʼa̱n Ndióxi̱ xíʼinna, saáchi ka̱ku ta̱ Isaac se̱ʼena ta xi̱kuʼvi̱ní-inina xi̱xinina ta̱yóʼo (Rom. 4:​20-22). Kivi chikaa̱yó ndee̱ ña̱ kundiku̱nyó yichi̱ ta̱ Abrahán, tasaá Jehová ka̱ʼa̱nra ña̱ nda̱kúní íyo iniyó xíʼinra ta saátu ña̱ kúúyó migora. Ta̱ Pablo ni̱ka̱ʼa̱nra ña̱yóʼo xa̱ʼa̱ ta̱ Abrahán: “Tu̱ʼun ña̱ ni̱ka̱ʼyi̱, ni̱xa̱a̱ra ku̱ura iin ta̱ nda̱kú-ini su̱ví iinlá xa̱ʼa̱ ta̱yóʼo kuití níka̱ʼyi̱ña, chi saátu ni̱ka̱ʼyi̱ña xa̱ʼa̱ miíyó, ña̱ xa̱a̱yó kooyó na̱ yiví nda̱kú-ini xa̱ʼa̱ ña̱ kándíxayó Ndióxi̱, ta̱ sa̱ndátaku ta̱ tátayó Jesús” (Rom. 4:​23, 24). Xíniñúʼu keʼéyó ña̱ ke̱ʼé ta̱ Abrahán: ná kandíxayó Ndióxi̱, ná keʼéyó ña̱ sákuaʼayó, ta ná kundatuyó ña̱ saxínu Ndióxi̱ ña̱ káʼa̱nra keʼéra chí nu̱únínu. w23.12 6, 7 párr. 16, 17

Tá yáʼún nu̱ú iin tu̱ndóʼo ña̱ yo̱ʼvi̱ní ta xa̱ʼa̱ ña̱kán yíʼvíníún, ndakaʼán chi Jehová kúnda̱a̱-inira xíʼin ña̱ ndóʼún. Tá xi̱kuu na̱ ñuu Israel esclavo na̱ ñuu Egipto, xi̱kunda̱a̱va-ini Jehová ña̱ xi̱xoʼvi̱nína ta xi̱kusuchí-inina (Éx. 3:7). Tá yáʼayó nu̱ú iin tu̱ndóʼo ña̱ yo̱ʼvi̱ní ta xa̱ʼa̱ ña̱yóʼo yíʼviníyó, sana íxayo̱ʼvi̱níña xíʼinyó kotoyó ndáa ki̱ʼva chíndeétáʼan Jehová xíʼinyó. Ña̱kán, ¿ndáaña xíniñúʼu keʼéyó? Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ va̱ʼa kunda̱a̱-iniyó ndáaña kéʼéra xa̱ʼa̱yó (2 Rey. 6:​15-17). Tándi̱ʼi, ná ndakanixi̱níyó xa̱ʼa̱ ña̱yóʼo: Discurso ña̱ xi̱niso̱ʼoyó reunión á iin comentario ña̱ ta̱xi iin na̱ hermano, ¿á chi̱kaa̱ña ndee̱ xíʼinyó? ¿Á íyo iin yaa, video á tutu ña̱ tává na̱ ñuu Ndióxi̱ ña̱ chi̱kaa̱ ndee̱ xíʼinyó? ¿Á iin na̱ hermano ka̱ʼvina iin texto nu̱úyó ña̱ va̱ʼaní chi̱ndeétáʼan xíʼinyó? Sava yichi̱ kivi nandósó-iniyó ña̱ iin regalo Jehová kúú ña̱ chíndeétáʼan iin na̱ hermano xíʼinyó, ta saátu iin regalo ña̱ káʼnuní kúú ndiʼi ña̱ táxira ndaʼa̱yó ti̱xin ñuura ña̱ va̱ʼa sakúaʼakayó xa̱ʼa̱ra (Is. 65:13; Mar. 10:​29, 30). Ndiʼi ña̱ va̱ʼa ña̱ táxi Jehová ndaʼa̱yó náʼa̱ña ña̱ ndíʼi̱-inira xa̱ʼa̱yó, xa̱ʼa̱ ña̱kán xíniñúʼu kandíxaníyóra (Is. 49:​14-16). w24.01 4, 5 párr. 9, 10

Tá xa̱a̱ ku̱nu̱mí ku̱ʼu̱n ta̱ Jesús chí ndiví, ni̱ka̱ʼa̱nra xíʼin na̱ discípulora ña̱ ná natúʼunna xa̱ʼa̱ra “chí ñuu Jerusalén, xíʼin iníí chí Judea xíʼin Samaria, ta nda̱a̱ iníísaá nu̱ú ñuʼú” (Hech. 1:8; Luc. 24:​46-48). Tá ni̱ya̱ʼa loʼo tiempo na̱ níʼi yichi̱ nu̱ú na̱ judío ti̱inna ta̱ Pedro xíʼin ta̱ Juan ta ni̱xa̱ʼa̱nna xíʼinna chí nu̱ú na̱ Sanedrín. Ta ni̱ka̱ʼa̱nna xíʼinna ña̱ ná sandákoona natúʼunna xa̱ʼa̱ Ndióxi̱. Ta saátu ni̱ka̱ʼa̱nna xíʼinna ña̱ ixandi̱va̱ʼana xíʼinna tá ná kǒo sandákoona keʼéna chiñu yóʼo (Hech. 4:​18, 21). “Soo ta̱ Pedro xíʼin ta̱ Juan nda̱kuiinna yuʼúna: Tá ña̱ va̱ʼa kúúña nu̱ú Ndióxi̱ ña̱ kuniso̱ʼondi̱ ña̱ káʼa̱n ndóʼó nu̱úka ña̱ káʼa̱n Ndióxi̱, kotoka miíndó. Soo ndi̱ʼi̱ kǒo kívi sandákoondi̱ ka̱ʼa̱nndi̱ xa̱ʼa̱ ña̱ʼa ña̱ xi̱nindi̱ xíʼin ña̱ xi̱niso̱ʼondi̱” (Hech. 4:​19, 20). Tá sa̱ñána ta̱ Pedro xíʼin ta̱ Juan, na̱yóʼo ni̱xa̱ʼa̱nna nda̱kutáʼanna xíʼin inkaka na̱ discípulo ta̱ Jesús, ta inkáchi ni̱ka̱ʼa̱nna xíʼin Jehová ña̱ ná chindeétáʼanra xíʼinna ña̱ kachíñukana nu̱úra. Ta Jehová ta̱xivara ña̱ ndu̱kúna nu̱úra (Hech. 4:31). w23.05 5 párr. 11, 12

Ta̱ Jesús xíʼin Jehová xa̱a̱ ku̱a̱ʼání ku̱i̱ya̱ viíní kítáʼanna, xa̱ʼa̱ ña̱kán kúʼvi̱ní-inina xínitáʼanna. Nu̱ú texto ña̱ káʼviyó ki̱vi̱ vitin, Jehová ni̱ka̱ʼa̱nra ña̱ kúʼvi̱ní-inira xínira ta̱ Jesús. Soo va̱ása níka̱ʼa̱n kuitíra: “Ta̱yóʼo kúú ta̱ kéʼé ña̱ kútóoi̱” chi xi̱kuni̱ra ña̱ kunda̱a̱-iniyó ña̱ kúni̱níra xínira ta̱ Jesús ta xi̱kusi̱íní-inira xíʼin ña̱ xi̱keʼéra, ña̱kán ni̱ka̱ʼa̱nra ña̱yóʼo: “Ta̱yóʼo kúú seʼi̱ ta̱ kúni̱níi̱ xínii̱” (Efes. 1:7). Ta̱ Jesús xi̱kandíxaníra ña̱ xi̱kuʼvi̱-ini Jehová xi̱xinirara. Ña̱kán, ku̱a̱ʼání yichi̱ ni̱ka̱ʼa̱nra ña̱ kúʼvi̱ní-ini yivára xínirara (Juan 3:35; 10:17; 17:24). w24.01 28 párr. 8

Ná kachiyó ña̱ iin na̱ kúʼvi̱ní-iniyó xíniyó káʼa̱nna ku̱a̱ʼání ña̱ vatá xa̱ʼa̱yó. Soo kúnda̱a̱-iniyó ña̱ su̱ví ña̱ ndixa kúúña, soo savana kándíxana ña̱ vatá ña̱ ni̱ka̱ʼa̱nna xa̱ʼa̱yó ta kíxáʼana káʼa̱nnaña xíʼin inkana, ¿ndáa ki̱ʼva kuniyó tá ná kuu ña̱yóʼo? Sana kixáʼa ndi̱ʼiní-iniyó ta kusuchíní-iniyó saáchi na̱ yiví kixáʼana ndakanixi̱nína ña̱ va̱ása va̱ʼa xa̱ʼa̱yó. Ejemplo yóʼo chíndeétáʼanña xíʼinyó kunda̱a̱-iniyó ndáaña ndo̱ʼo Jehová tá ni̱ka̱ʼa̱n iin ta̱ ángel ña̱ vatá xa̱ʼa̱ra. Ñá Eva ka̱ndíxañá ña̱ vatá ña̱ ni̱ka̱ʼa̱n ta̱ Ndi̱va̱ʼa, xa̱ʼa̱ ña̱kán miíñá xíʼin ta̱ Adán kǒo níxiniso̱ʼokana ña̱ ni̱ka̱ʼa̱n Jehová. Ta xa̱ʼa̱ ña̱yóʼo ndiʼiyó kúúyó na̱ yiví ku̱a̱chi ta xíʼi̱yó (Gén. 3:​1-6; Rom. 5:12). Ku̱a̱ʼání ña̱ vatá ni̱ka̱ʼa̱n ta̱ Ndi̱va̱ʼa xíʼin ñá Eva, xa̱ʼa̱ ña̱kán kúúmiíyó ku̱a̱ʼání tu̱ndóʼo tiempo vitin. Tá kúú xóʼvi̱níyó, íyoní guerra ta saátu xíʼi̱yó. Ku̱suchíní-ini Jehová xa̱ʼa̱ ña̱ vatá ña̱ ni̱ka̱ʼa̱n ta̱ Ndi̱va̱ʼa xa̱ʼa̱ra ta saátu kúsuchíní-inira ña̱ xítora ña̱ xóʼvi̱ní na̱ yiví xa̱ʼa̱ ña̱yóʼo. Soo va̱ása táxira ña̱ kasi ña̱yóʼo nu̱úra ña̱ kusi̱í-inira, saáchi Biblia káʼa̱nña xa̱ʼa̱ra ña̱ kúúra iin “Ndióxi̱ ta̱ si̱í-ini” (1 Tim. 1:11). w24.02 8 párr. 1, 2

¿Ndáa ki̱ʼva kundiku̱nyó yichi̱ ta̱ José ta nda̱kú koo iniyó xíʼin Jehová? Ya̱chi̱ka ná ndakanixi̱níyó ndáaña keʼéyó tá xa̱a̱ ná ya̱ʼayó nu̱ú tu̱ndóʼo. Ná kǒo keʼéyó á kotoyó ni iin ña̱ʼa ña̱ kúndasí Jehová xínira ta ni loʼo ná kǒo ndakanixi̱níyó xa̱ʼa̱ ña̱yóʼo (Sal. 97:10; 119:165). Ña̱yóʼo chindeétáʼan xíʼinyó ña̱ kǒo keʼéyó ku̱a̱chi kini. Sana xa̱a̱ kúnda̱a̱-iniún ña̱ nda̱ni̱ʼún ña̱ nda̱a̱ ta kúni̱ún ndasakáʼnún Ndióxi̱ xíʼin ndiʼi níma̱ún. Soo, ¿á íyo iin ña̱ sási nu̱ún ña̱ ndataxiún miíún ndaʼa̱ Jehová ta ndakuchiún? Tá saá íyoña, kivi keʼún ña̱ ke̱ʼé ta̱ rey David ta kuakundáʼviún ka̱ʼún xíʼin Jehová: “Ndióxi̱, koto va̱ʼún ndáa ki̱ʼva íyoi̱, koto ña̱ ndíka̱a̱ níma̱i̱, koto va̱ʼún ña̱ sándi̱ʼi̱-inii̱. Ta koto tá íyo iin ña̱ va̱ása va̱ʼa kúni̱i̱ keʼíi̱, ta chika̱a̱ yi̱ʼi̱ yichi̱ nu̱ú kivi kutakui̱ ndiʼi tiempo” (Sal. 139:​23, 24). Tá chíka̱ún ndee̱ ña̱ ndataxiún miíún nda̱ʼa Jehová saá na̱ʼún ña̱ kúni̱ún viíníka kutáʼún xíʼinra. Biblia káʼa̱nña ña̱ táxira bendición ndaʼa̱ na̱ kéʼé ña̱yóʼo (Heb. 11:6). w24.03 6 párr. 14, 15

Ta̱ su̱tu̱ káʼnu kúú ta̱ xi̱kaʼa̱n xa̱ʼa̱ na̱ ñuu xíʼin Ndióxi̱. Ta̱ Aarón xi̱kuu ta̱ nu̱ú ta̱ xi̱kuu su̱tu̱ káʼnu ñuu Israel, ta mií Jehová ta̱xi chiñu yóʼo ndaʼa̱ra tá ki̱xáʼa íyo ña̱ tabernáculo. Soo, ta̱ apóstol Pablo ni̱ka̱ʼa̱nra: “Va̱ása níkivi ku̱a̱ʼá tiempo koona su̱tu̱ saáchi ni̱xi̱ʼi̱vana, ña̱kán xi̱niñúʼu koo ku̱a̱ʼáníka na̱ ndakiʼin chiñu yóʼo ña̱ koona su̱tu̱” (Heb. 7:​23-26). Ta saátu na̱ su̱tu̱ náʼnu yóʼo xa̱ʼa̱ ña̱ xi̱kuuna na̱ ku̱a̱chi, xi̱niñúʼu so̱kóna ña̱ʼa nu̱ú Ndióxi̱ xa̱ʼa̱ ku̱a̱china. Soo, tátayó Jesucristo ta̱ kúú su̱tu̱ káʼnu, “káchíñura ini lugar ña̱ yi̱i̱ ta saátu ini tabernáculo ña̱ i̱xava̱ʼa Jehová ta su̱ví na̱ yiví ní ixava̱ʼa ña̱yóʼo” (Heb. 8:​1, 2). Ta̱ Pablo ni̱ka̱ʼa̱nra ña̱ ndiʼi tiempo íyo ta̱ Jesús ña̱kán, “kǒo inkana ndakiʼin chiñu nu̱úra” ña̱ koona su̱tu̱ káʼnu chi iinlá miíra koovara. Ta saátu ni̱ka̱ʼa̱nra ña̱ kúú ta̱ Jesús ta̱ yi̱i̱ ta̱ “kǒo ku̱a̱chi kúúmií”, ta kǒo kéʼévíra táki̱ʼva ke̱ʼé na̱ su̱tu̱ na̱ ni̱xi̱yo ñuu Israel “saáchi va̱ása xíniñúʼu so̱kóra ña̱ʼa ndaʼa̱ Ndióxi̱ ndiʼi ki̱vi̱ xa̱ʼa̱ ku̱a̱chi miíra”, chi su̱ví ta̱ ku̱a̱chi kúúra. w23.10 26 párr. 8, 9

“Ndiví yatá” ndánaʼa̱ña ndiʼi na̱ chíñu na̱ íyo nu̱ú ñuʼú yóʼo na̱ kéʼé ña̱ kúni̱ ta̱ Ndi̱va̱ʼa xí’in na̱ ta̱chí ndi̱va̱’a na̱ kítáʼan xíʼinra (Mat. 4:​8, 9; 1 Juan 5:19). Sava yichi̱ tá káʼa̱n Biblia xa̱ʼa̱ ñuʼú, káʼa̱nña xa̱ʼa̱ na̱ yiví na̱ ndóo nu̱úña (Gén. 11:1; Sal. 96:1). Ña̱kán “ñuʼú yatá” ndánaʼa̱ña ndiʼi na̱ yiví na̱ kéʼé ña̱ va̱ása va̱ʼa na̱ íyo tiempo vitin. Jehová ixava̱ʼara “iin ndiví xa̱á xíʼin iin ñuʼú xa̱á”. Ña̱yóʼo kúni̱ kachiña ña̱ koo iin gobierno xa̱á ta saátu na̱ yiví na̱ kundoo nu̱ú ñuʼú yóʼo nina ña̱ va̱ʼa keʼéna. Ta saátu chindeétáʼanra xíʼin na̱ yiví ña̱ ndoo ku̱a̱china. Táki̱ʼva ni̱ka̱ʼa̱n ta̱ profeta Isaías, iníísaá ñuʼú yóʼo nduuña ñuyǐví xa̱á, ta liviní kooña nda̱a̱ táki̱ʼva ni̱xi̱yo jardín ña̱ Edén. Ta saátu miíyó nduxa̱á ndiʼi ku̱ñuyó. Jehová sandáʼara na̱ yiví na̱ kǒo kívi kaka, na̱ kǒo kívi koto, na̱ kǒo xíniso̱ʼo ta nda̱a̱ sandátakura na̱ ni̱xi̱ʼi̱ (Is. 25:8; 35:​1-7). w23.11 4 párr. 9, 10

Iin kama kixáʼa ña̱ gran tribulación (Mat. 24:21). Tá ná kuu ña̱yóʼo su̱ví ndiʼivína yi̱ʼví, saáchi savana xa̱a̱ xíni̱na ña̱ kixaa̱ña. Xa̱a̱ íyo 2,000 ku̱i̱ya̱ ta̱ Jesús ni̱ka̱ʼa̱nra xíʼin na̱ discípulora ña̱ xíniñúʼu koo tu̱ʼvana tá ná kuu ña̱yóʼo. Tá ná kuniso̱ʼoyó consejo yóʼo, saá kúú ña̱ va̱ása ixayo̱ʼvi̱ña xíʼinyó ka̱kuyó ta saátu ña̱ chindeétáʼanyó xíʼin inkana (Luc. 21:36). Xíniñúʼu kundeé-iniyó ta kuniso̱ʼoyó ña̱ káʼa̱n Jehová saáchi miíra kundaa miíyó. ¿Ndáaña keʼéyó tá ná ku̱ndaa̱-iniyó ña̱ ndi̱ʼi-xa̱ʼa̱ ndiʼi ña̱ʼa ña̱ kúúmií na̱ hermano? (Hab. 3:​17, 18). Tá ná kuu ña̱yóʼo saá chindeétáʼanyó xíʼinna, tasaá na̱ʼa̱yó ña̱ kúndáʼvi-iniyó xíniyóna. Ta, ¿ndáaña keʼéyó tá ná kixáʼa iin tiʼvi na̱ yiví ixandi̱va̱ʼana xíʼinyó? ¿Ndáaña keʼéyó tá ná ka̱ʼa̱nna xíʼinyó ña̱ kindo̱oyó iin veʼe ña̱ táñuní xíʼin na̱ hermanoyó? (Ezeq. 38:​10-12). Tá ná kuu ña̱yóʼo saá kúú ña̱ na̱ʼa̱yó ña̱ kúʼvi̱ní-iniyó xíniyó na̱ hermanoyó. w23.07 2 párr. 2, 3

Na̱ xa̱a̱ ti̱ndaʼa̱ kivi kundiku̱nna yichi̱ ta̱ Áquila xíʼin ñá Priscila, na̱yóʼo kúú na̱ cristiano na̱ xi̱ndoo tá siglo nu̱ú (Rom. 16:​3, 4). Ña̱ Biblia káʼa̱nvaña xa̱ʼa̱na ña̱ inkáchi xi̱kachíñuna, ña̱ inkáchi xi̱natúʼunna xa̱ʼa̱ Ndióxi̱ ta saátu ña̱ inkáchi xi̱chindeétáʼanna xíʼin inkana (Hech. 18:​2, 3, 24-26). Tá káʼa̱n Biblia xa̱ʼa̱ u̱vi̱ saá na̱yóʼo, káʼa̱nña xa̱ʼa̱na ña̱ inkáchi kítáʼanna. Na̱ xa̱a̱ ti̱ndaʼa̱, ¿ndáa ki̱ʼva kivi kundiku̱nna yichi̱ ta̱ Áquila xíʼin ñá Priscila? Ndakanixi̱níndó xa̱ʼa̱ chiñu ña̱ xíniñúʼu keʼé iin tá iinndó. ¿Á kivi inkáchi kutáʼanndó keʼéndó sava chiñu yóʼo nu̱úka ña̱ keʼé iinlá miíndóña? Tá kúú ta̱ Áquila xíʼin ñá Priscila inkáchi xi̱natúʼunna xa̱ʼa̱ Ndióxi̱. Ta, ¿á saá kéʼé ndóʼó? Ta̱ Áquila xíʼin ñá Priscila inkáchi xi̱kitáʼanna tá xi̱kachíñuna, soo sana ndóʼó su̱ví inkáchiví chiñu kúúmiíndó. Ña̱kán, ¿á kivi tavándó tiempo ña̱ inkáchi keʼéndó chiñu ti̱xin veʼendó? (Ecl. 4:9). Tá inkáchi ná kitáʼandó keʼéndó iin ña̱ʼa kusi̱íníka-inindó, tasaá kúú ña̱ kivika natúʼun xíʼin táʼanndó. w23.05 23 párr. 11, 12

Ndi’ivayó yíʼvi sava yichi̱. Tá xi̱kuni̱ ta̱ rey Saúl kaʼníra ta̱ David ta̱yóʼo xi̱nura ku̱a̱ʼa̱nra chí ñuu na̱ filisteo ña̱ naní Gat. Soo tá ndíkaa̱ ta̱ David ñuu kán, ki̱xáʼa yíʼviníra saáchi ni̱ka̱ʼa̱nna xíʼin ta̱ Akís ta̱ xi̱kuu rey ña̱ Gat ña̱ ku̱a̱ʼání na̱ filisteo xa̱ʼní ta̱ David (1 Sam. 21:​10-12). Ta ni̱ndi̱ʼi̱ní-inira saáchi nda̱kanixi̱níra ña̱ ixandi̱va̱ʼa ta̱ rey kán xíʼinra. Ña̱kán, ¿ndáaña chi̱ndeétáʼan xíʼin ta̱ David ña̱ kǒo yi̱ʼvíkara? Nu̱ú Salmo 56 ni̱ka̱ʼa̱n ta̱ David ndáaña ndo̱ʼora tá ni̱xa̱a̱ra ñuu Gat, ni̱ka̱ʼa̱nra nda̱chun ni̱yi̱ʼvíra ta saátu ni̱ka̱ʼa̱nra ña̱ chi̱ndeétáʼan xíʼinra ña̱ kǒo yi̱ʼvíkara xi̱kuu ña̱ xi̱ndaaní-inira Jehová (Sal. 56:​1-3, 11). Soo kǒo níxaʼnívínara xa̱ʼa̱ ña̱ nda̱kaxinra ke̱ʼéra. Jehová chi̱ndeétáʼan xíʼinra tasaá ke̱ʼéra iin ña̱ʼa ña̱ sana ndákanda̱-iniyó xíʼin, ki̱xáʼa kéʼéra nda̱a̱ táki̱ʼva kéʼé iin ta̱ sána ña̱ va̱ʼa sandáʼvirana. Tá xi̱ni ta̱ Akís ña̱ sána ta̱ David kǒo ní ixandi̱va̱ʼara xíʼinra, xa̱ʼa̱ ña̱yóʼo ni̱ka̱ku ta̱ David ta xi̱nura ku̱a̱ʼa̱nra (1 Sam. 21:​13–22:1). w24.01 2 párr. 1-3

¿Ndáa xa̱’a̱ ká’a̱n texto ña̱ káʼviyó ki̱vi̱ vitin? Ká’a̱nña xa̱ʼa̱ na̱ ungido na̱ íyo chí ndiví. Tá xa̱a̱ ná koo ndiʼi na̱ ungido chí ndiví, chiñu ña̱ nu̱ú ña̱ taxi Jehová ndaʼa̱na kúú ña̱ kanitáʼanna. Iin chiñu ña̱ ndáyáʼviní kúú ña̱yóʼo. Soo tá xa̱a̱ ná koona chí ndiví, kitáʼanna xíʼin ta̱ Cristo ta saátu xíʼin na̱ ángel ña̱ kanitáʼanna xíʼin na̱ sáa̱-ini xíni Ndióxi̱. Ná ndakanixi̱níyó xa̱ʼa̱ ña̱yóʼo, sava na̱ ungido na̱ ndóo nu̱ú ñuʼú yóʼo xa̱a̱ chéenína ta kǒoka ndee̱ kúúmiína. Soo tá ná koona chí ndiví ndakúní koona ta va̱ása kuvikana ta inkáchi kitáʼanna xíʼin ta̱ rey Jesucristo ña̱ kanitáʼanna xíʼin na̱ sáa̱-ini xíni Ndióxi̱. Tá ná ndiʼi ña̱ Armagedón chindeétáʼanna xíʼin na̱ yiví ña̱ ndoo ku̱a̱china. Va̱ʼaníkava chindeétáʼanna xíʼin na̱ ñuu Ndióxi̱ tá ná koona chí ndiví, nu̱úka ña̱ kéʼéna nu̱ú ñuʼú yóʼo saáchi tiempo vitin na̱ yiví ku̱a̱chiva kúúna. w24.02 6, 7 párr. 15, 16

Sava na̱ yiví xa̱a̱ íyo tu̱ʼvavana ña̱ ndataxina miína ndaʼa̱ Jehová ta ndakuchina, soo kǒo xíínna keʼéna ña̱yóʼo saáchi yíʼvina ña̱ tavánana ti̱xin congregación tá ná keʼéna iin ku̱a̱chi kini. Soo, Biblia káʼa̱nña ña̱ mií Jehová chindeétáʼan xíʼin na̱ ndásakáʼnu miíra ña̱ keʼéna ña̱ va̱ʼa tasaá sakúsi̱ína-inira (Col. 1:10). Ña̱kán, kǒo kaka-iniún chi mií Jehová taxi ndee̱ ndaʼún ña̱ keʼún ña̱ va̱ʼa nda̱a̱ táki̱ʼva kéʼéra xíʼin inkana (1 Cor. 10:13). Loʼova na̱ yiví kée ti̱xin congregación xa̱ʼa̱ ña̱ kéʼéna ku̱a̱chi kini. Mií Jehová chindeétáʼan xíʼinyó ña̱ nda̱kú koo iniyó xíʼinra. Xa̱ʼa̱ ña̱ kúúyó na̱ yiví ku̱a̱chi sana kúni̱yó keʼéyó ña̱ va̱ása va̱ʼa (Sant. 1:14). Soo, tá xa̱a̱ ná kixaa̱ iin ki̱vi̱ ña̱ sana kúni̱ún keʼún iin ña̱ kini, ndakaʼán chi iinlá miíún kúú na̱ kivi ndaka̱xin á keʼúnña á kǒo keʼúnña. Sava na̱ yiví káʼa̱nna ña̱ kǒo kivi ka̱ʼnu̱-iniyó, soo su̱ví ña̱ ndixa kúú ña̱yóʼo. w24.03 5 párr. 11, 12