Abril

Ni̱xi̱yo sava na̱ xi̱ndasakáʼnu Jehová tiempo xi̱naʼá na̱ ni̱ya̱ʼa nu̱ú tu̱ndóʼo ña̱ va̱ása níndakanixi̱nína kundoʼona. Ná ndakanixi̱níyó xa̱ʼa̱ ña̱ ndo̱ʼo ta̱ Jacob. Yivára ni̱ka̱ʼa̱n xíʼinra ña̱ ná ku̱ʼu̱nra tindaʼa̱ra xíʼin iin ná se̱ʼe ta̱ Labán, táʼanna xi̱kuura ta xi̱ndasakáʼnura Jehová. Ta̱ yivá ta̱ Jacob ni̱ka̱ʼa̱nra xíʼinra ña̱ ku̱a̱ʼání bendición taxi Jehová ndaʼa̱ra (Gén. 28:​1-4). Ña̱kán, ta̱ Jacob ke̱ʼéra ña̱ ni̱ka̱ʼa̱n yivára xíʼinra, sa̱ndákoora ñuu Canaán ta nda̱kiʼinra ku̱a̱ʼa̱nra nda̱a̱ nu̱ú íyo ta̱ Labán. Ta̱kán u̱vi̱ xi̱kuu ná se̱ʼera, iin ñá xi̱naní Lea ta inkañá xi̱naní Raquel. Ta̱ Jacob ku̱tóoníkara xi̱nira ñá Raquel, ñá loʼoka. Ta ña̱ va̱ʼa tindaʼa̱ra xíʼinñá, ka̱ndíxara kachíñura u̱xa̱ ku̱i̱ya̱ xa̱ʼa̱ñá (Gén. 29:18). Soo va̱ása níkuu nda̱a̱ táki̱ʼva nda̱kanixi̱ní ta̱ Jacob. Chi ta̱ Labán sa̱ndáʼvirara ta ta̱xira se̱ʼera ñá Lea ndaʼa̱ra, ñá chéeka ña̱ tindaʼa̱ñá xíʼinra. Tá ni̱ya̱ʼa iin semana, saá ta̱xira ña̱ tindaʼa̱ ta̱ Jacob xíʼin ñá Raquel, soo xi̱niñúʼu kachíñukara inka u̱xa̱ka ku̱i̱ya̱ xa̱ʼa̱ñá (Gén. 29:​26, 27). Soo su̱ví ña̱yóʼo kúú ndiʼi ña̱ níndoʼo ta̱ Jacob, saáchi yáʼaka o̱ko̱ ku̱i̱ya̱ sa̱ndáʼvi ta̱ Labán miíra tá ka̱chíñura nu̱úra (Gén. 31:​41, 42). w23.04 15 párr. 5

¿Ndáana kivi ka̱ʼa̱nyó xíʼin ña̱ kuniʼina yichi̱ nu̱úyó ta sandíkona-iniyó? Ta̱ kivi ka̱ʼa̱nyó xíʼin ña̱ chindeétáʼanra xíʼinyó kúú Jehová. Ta miíra káʼa̱n xíʼinyó ña̱ ná ka̱ʼa̱n ni̱ʼiyó xíʼinra (1 Tes. 5:17). Kivi ka̱ʼa̱nyó xa̱ʼa̱ nda̱a̱ ndáaka ña̱ʼa xíʼinra ta kivi ka̱ʼa̱nyó xíʼinra ña̱ ná kuniʼira yichi̱ nu̱úyó (Prov. 3:​5, 6). Xa̱ʼa̱ ña̱ va̱ʼaní-ini Jehová táxira ña̱ ná ka̱ʼa̱nyó xíʼinra nda̱saa yichi̱ kúni̱ miíyó. Ta̱ Jesús xi̱kunda̱a̱-inira ña̱ ndáyáʼviní oración nu̱ú Jehová. Tá kúma̱níka kixira nu̱ú ñuʼú yóʼo ki̱ʼinra kuenta ndáa ki̱ʼva xi̱ndakuiin Jehová oración na̱ xi̱ndasakáʼnu miíra na̱ xi̱ndoo nu̱ú ñuʼú yóʼo. Tá kúú, xi̱nira ndáa ki̱ʼva nda̱kuiin Jehová oración ña̱ ke̱ʼé ñá Ana, ta̱ David, ta̱ Elías xíʼin inkakana (1 Sam. 1:​10, 11, 20; 1 Rey. 19:​4-6; Sal. 32:5). Xa̱ʼa̱ ña̱kán ni̱ka̱ʼa̱n ta̱ Jesús xíʼin na̱ discípulora ña̱ ná kǒo kaka-inina ka̱ʼa̱nna xíʼin Jehová xa̱ʼa̱ nda̱a̱ ndáaka ña̱ʼa ña̱ kúni̱na (Mat. 7:​7-11). w23.05 2 párr. 1, 3

Ta̱ su̱tu̱ káʼnu Jehoiadá xi̱yi̱ʼvíra xi̱xinira Jehová ta xi̱ ixato̱ʼónírara. Ta chi̱kaa̱ra ndee̱ ña̱ chindeétáʼanra xíʼin inkana ña̱ keʼéna ña̱yóʼo. Tá ki̱xáʼa ñá Atalía se̱ʼe ñá Jezabel xáʼndachíñuñá, ta̱ Jehoiadá ni̱na̱ʼa̱ra ña̱ íxato̱ʼóníra Jehová. Saáchi su̱ví ñáyóʼo kúú ñá xi̱xiniñúʼu kaʼndachíñu. Ñá Atalía kininí xi̱keʼéñá ta ndiʼina xi̱yiʼví xi̱xiniñaʼá, xa̱ʼa̱ ña̱ xi̱kuni̱níñá kaʼndachíñuñá, xa̱ʼníñá ndiʼi na̱ se̱ʼe na̱ rey ta nda̱a̱ na̱ se̱ʼeñáníñá xa̱ʼníñá ña̱ va̱ʼa kaʼndachíñu miíñá (2 Crón. 22:​10, 11). Soo ñá síʼi ta̱ Jehoiadá ñá naní Jehosabeat chi̱ndeétáʼanñá xíʼin iin ta̱ loʼo se̱ʼe na̱ rey yóʼo ña̱ va̱ʼa ka̱kura, ta̱ loʼo yóʼo xi̱naníra Jehoás. Miíñá xíʼin yiíñá chi̱seʼéna ta̱ loʼo yóʼo ta xi̱ndaanara. Ta xa̱ʼa̱ ña̱ ke̱ʼéna ña̱yóʼo va̱ása níndiʼi-xa̱ʼa̱ na̱ rey ti̱xin veʼe ta̱ David. Xa̱ʼa̱ ña̱ nda̱kúní ni̱xi̱yo-ini ta̱ Jehoiadá xíʼin Jehová va̱ása níyi̱ʼvíra kunira ñá Atalía. Tá kúúmií ta̱ Jehoás 7 ku̱i̱ya̱ ta̱ Jehoiadá ni̱na̱ʼa̱ tukura ña̱ nda̱kú íyo inira xíʼin Jehová. Ña̱kán nda̱kanixi̱níra xa̱ʼa̱ u̱vi̱ ña̱ʼa ña̱ kivi kuu. Tá ná kǒo kaʼnína ta̱ Jehoás ta̱yóʼo kúú ta̱ koo rey, chi ke̱era ti̱xin na̱ veʼe ta̱ David. Soo tá níxáʼnína ta̱ Jehoás nda̱a̱ ta̱ Jehoiadá kuvi xíʼinra. Soo mií Jehová chi̱ndeétáʼan xíʼinra ña̱ kǒo kaʼnínara. w23.06 17 párr. 12, 13

Ta̱ rey Nabucodonosor kivi ndakanixi̱níra ña̱ sáa̱-ini ta̱ Daniel xínirara ta nda̱a̱ kivi ka̱ʼa̱nra ña̱ kaʼnínara, soo ndakúní ni̱xi̱yo ini ta̱ Daniel ta ni̱ka̱ʼa̱nra ndiʼi ña̱ ni̱ka̱ʼa̱n Ndióxi̱. ¿Ndáaña chi̱ndeétáʼan xíʼin ta̱ Daniel ña̱ ndakú ni̱xi̱yo inira ndiʼi tiempo ña̱ xi̱takura? Ña̱ chi̱ndeétáʼan xíʼinra xi̱kuu ña̱ xi̱kiʼinra kuenta xíʼin ña̱ xi̱keʼé na̱ yivára (Deut. 6:​6-9). Su̱ví nda̱saa ña̱ u̱xu̱ Mandamiento kuití níxi̱xini̱ ta̱ Daniel xa̱ʼa̱, chi saátu xi̱kunda̱a̱-inira ndáaña kúú ña̱ va̱ʼa kuxu na̱ ñuu Israel xíʼin ña̱ kǒo kívi kuxuna (Lev. 11:​4-8; Dan. 1:​8, 11-13). Ta xi̱kunda̱a̱-inira ndáaña xi̱ndoʼo na̱ ñuu tá kǒo níxi̱xiniso̱ʼona ña̱ xi̱ka̱ʼa̱n Jehová xíʼinna (Dan. 9:​10, 11). Ta̱ Daniel ki̱ʼinra kuenta ña̱ ndiʼi tiempo ni̱xi̱yo Jehová xíʼinra ta saátu ni̱xi̱yo na̱ ángel xíʼinra (Dan. 2:​19-24; 10:​12, 18, 19). w23.08 3 párr. 5, 6

Va̱ʼaní xi̱ndakanixi̱ní ñá Rebeca, ta xi̱xini̱ñá ama kúú ña̱ kivi keʼéñá iin chiñu ta ama kúú ña̱ kǒo kivi keʼéñáña (Gén. 24:58; 27:​5-17). Ta saátu to̱ʼóní ni̱xi̱yo-iniñá ta va̱ʼaní xi̱xiniso̱ʼoñá ña̱ xi̱ka̱ʼa̱nna xíʼinñá (Gén. 24:​17, 18, 65). Tá vitá íyo iniún nda̱a̱ táki̱ʼva ni̱xi̱yo ñá Rebeca ta íxato̱ʼún na̱ nda̱kaxin Jehová kuniʼi yichi̱ nu̱ún, saá kúú ña̱ va̱ʼaní yichi̱ chinúun nu̱ú na̱ veʼún ta saátu nu̱ú na̱ congregación. Ñá Ester va̱ʼaní xi̱ndasakáʼnuñá Ndióxi̱, ta va̱ʼaní ke̱ʼéñá ña̱ káʼa̱n texto yóʼo. Tá ndu̱uñá reina, va̱ása ni̱nu níxi̱kuniñá. Ta saátu xi̱xiniso̱ʼoñá consejo ña̱ xi̱taxi ta̱ primoñá Mardoqueo ndaʼa̱ñá (Est. 2:​10, 20, 22). Kivi kundikún yichi̱ ñáyóʼo tá ná ndukún consejo nu̱ú inkana ta keʼún ña̱ káʼa̱nna xíʼún (Tito 2:​3-5). Ná ka̱ʼa̱nyó xa̱ʼa̱ inka ña̱ va̱ʼaní ke̱ʼé ñá Ester. Ñáyóʼo, ni liviní ni̱xi̱yoñá ta va̱ʼaní xi̱naʼa̱ñá, soo kǒo níxi̱kuni̱ñá ña̱ ka̱ʼa̱nna xa̱ʼa̱ iinlá mií kuitíñá (Est. 2:​7, 15). w23.12 19, 20 párr. 6-8

Kǒo kúni̱ Jehová ña̱ ndiʼi tiempo ndakaniníxi̱níyó xa̱ʼa̱ ña̱ va̱ása va̱ʼa ke̱ʼéyó. Tá xa̱a̱ ni̱na̱ʼma̱yó xa̱ʼa̱ ña̱ ke̱ʼéyó, nda̱ndikó-iniyó ta kǒo kéʼékayóña, saá kivi kandíxayó ña̱ xa̱a̱ i̱xakáʼnu-ini Jehová xa̱ʼa̱yó (Hech. 3:19). Tá xa̱a̱ ke̱ʼéyó ña̱yóʼo, Jehová kúni̱ra ña̱ ná nandósoyó xa̱ʼa̱ ku̱a̱chi ña̱ ni̱ki̱ʼviyó. Saáchi kúnda̱a̱-inira ña̱ tá ná ndakanika̱xi̱níyó xa̱ʼa̱ ña̱yóʼo kusuchíní-iniyó ta xo̱ʼvi̱níyó xíʼinña (Sal. 31:10). Tá ná ndakaʼánníyó xa̱ʼa̱ ku̱a̱chi ña̱ ni̱ki̱ʼviyó kivi ndakavaní-iniyó ta kǒo kusi̱íka-iniyó kachíñuyó nu̱ú Jehová (2 Cor. 2:7). Tá ndákaniníxi̱níún xa̱ʼa̱ ku̱a̱chi ña̱ ni̱ki̱ʼviún ndakaʼán chi Jehová xa̱a̱ i̱xakáʼnu-inira xa̱ʼún (Sal. 130:4). Tá iinna ndixaní nda̱ndikó-inina xa̱ʼa̱ ku̱a̱chi ña̱ ni̱ki̱ʼvina ña̱yóʼo káʼa̱n Jehová xíʼinna: “Kǒo ndakaʼánkai̱ xa̱ʼa̱ ku̱a̱chi ña̱ ni̱ki̱ʼvindó” (Jer. 31:34). Ña̱yóʼo kúni̱ kachiña ña̱ tá íxakáʼnu-ini Jehová xa̱ʼa̱ iin na̱ ni̱ki̱ʼvi ku̱a̱chi, kǒo ndíkokara káʼa̱nra xa̱ʼa̱ ña̱yóʼo xíʼinna. Ta kǒo ndakava-iniún tá va̱ása kéʼékaún chiñu ti̱xin congregación. Saáchi Jehová xa̱a̱ na̱ndósova-inira xa̱ʼa̱ ku̱a̱chi ña̱ ni̱ki̱ʼviún. Saátu kivi keʼé miívaún, kivi nandóso-iniún xa̱ʼa̱ ña̱ va̱ása va̱ʼa ke̱ʼún. w23.08 30, 31 párr. 14, 15

Tá xi̱ndikaa̱ ña̱ COVID-19 ku̱a̱ʼání na̱ yiví ni̱ka̱ʼa̱nna ña̱ vatá xa̱ʼa̱ ña̱yóʼo. Soo na̱ testigo Jehová na̱ xi̱niso̱ʼo ña̱ ni̱ka̱ʼa̱n na̱ ñuu Ndióxi̱, va̱ása níkandíxana ña̱ vatá ña̱ xi̱ka̱ʼa̱n na̱ yiví, ña̱kán va̱ása níndi̱ʼi̱-inina. Soo na̱ ka̱ndíxa ña̱ vatá ña̱ xi̱ka̱ʼa̱n inkana ni̱ndi̱ʼi̱ní-inina (Mat. 24:45). Ná kǒo nandósó-iniyó ndáa ña̱ʼa kúúmií ña̱ ndáyáʼvi va̱ʼaka (Filip. 1:​9, 10). Ña̱ kuxuyó, ña̱ koʼoyó, ña̱ koo si̱í-iniyó, ña̱ kachíñuyó, ña̱yóʼo kúú ña̱ kéʼéyó ndiʼi saá ki̱vi̱, soo tá va̱ása kíʼinyó kuenta xíʼin ña̱yóʼo kivi kasiña nu̱úyó ña̱ keʼéyó ña̱ ndáyáʼvika (Luc. 21:​34, 35). Ta saátu ndiʼi tiempo káʼa̱n na̱ yiví xa̱ʼa̱ ña̱ kéʼé na̱ chíñu á xa̱ʼa̱ inkaka ña̱ʼa. Tá ná kuniso̱ʼoyó ña̱ káʼa̱n na̱yóʼo kixáʼa kundi̱ʼi̱-iniyó ta kasiña nu̱úyó ña̱ keʼéyó ña̱ʼa ña̱ ndáyáʼvika. Tá va̱ása kíʼinyó kuenta nda̱a̱ kivi kixáʼayó ndakanixi̱níyó nda̱a̱ táki̱ʼva ndákanixi̱ní na̱yóʼo. Ta̱ Ndi̱va̱ʼa xíniñúʼura ña̱ xa̱a̱ ni̱ka̱ʼa̱nyó xa̱ʼa̱ yóʼo ña̱ kasira nu̱úyó tasaá kǒo keʼéyó ña̱ kútóo Jehová. w23.07 16, 17 párr. 12, 13

Ndáyá’viní ña̱ Conmemoración nu̱ú miíyó na̱ testigo Jehová, chi saá ndákaʼányó xa̱ʼa̱ ki̱vi̱ ña̱ ni̱xi̱ʼi̱ ta̱ Jesús xa̱ʼa̱yó. Ta iinlá ña̱yóʼo kúú ña̱ ni̱ka̱ʼa̱n ta̱ Jesús xíʼinyó ña̱ ndakaʼányó (Luc. 22:​19, 20). Xa̱a̱ kúni̱níyó ña̱ kixaa̱ ki̱vi̱ kán. ¿Nda̱chun? Ná ka̱ʼa̱nyó xa̱ʼa̱ ña̱yóʼo. Ña̱ Conmemoración chíndeétáʼanña xíʼinyó ña̱ ndakanixi̱níyó xa̱ʼa̱ ña̱ ndáyáʼviní ke̱ʼé ta̱ Jesús xa̱ʼa̱yó. Saátu sándakaʼánña miíyó ndáaña xíniñúʼu keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ ke̱ʼé ta̱ Jesús xa̱ʼa̱yó (2 Cor. 5:​14, 15). Saátu chíndeétáʼanña xíʼinyó ña̱ ndakutáʼanyó xíʼin na̱ hermanoyó ta chikaa̱yó ndee̱ xíʼinna (Rom. 1:12). Ndiʼi ku̱i̱ya̱ ku̱a̱ʼání na̱ inactivo xáʼa̱n Conmemoración ta savana ndíkóna nu̱ú Jehová xa̱ʼa̱ ña̱ va̱ʼaní ndákiʼinyóna. Saátu ku̱a̱ʼání na̱ yiví ndákanda̱-inina xíʼin ña̱ xítona xíʼin ña̱ xíniso̱ʼona tá xáʼa̱nna Conmemoración, ta xa̱ʼa̱ ña̱yóʼo kíxáʼana káʼvina Biblia. Xa̱ʼa̱ ña̱kán ndáyáʼviní ña̱ Conmemoración nu̱úyó. w24.01 8 párr. 1, 2

Tá ndákanixi̱níyó xa̱ʼa̱ ña̱ ndáyáʼviní ke̱ʼé Jehová xíʼin ta̱ Jesús xa̱ʼa̱yó, saá kúú ña̱ va̱ʼaníka kunda̱a̱-iniyó ña̱ kúʼvi̱ní-inina xínina miíyó (Gál. 2:20). Jehová ta̱xira se̱ʼera ta̱ kúni̱níra xínira ña̱ ni̱xo̱ʼvi̱ra ta ni̱xi̱ʼi̱ra xa̱ʼa̱ ku̱a̱chiyó, ta ke̱ʼéra ña̱yóʼo chi kúʼvi̱ní-inira xínira miíyó (Jer. 31:3). Ka̱nara miíyó ña̱ kuñuʼuyó ti̱xin ñuura saáchi kúni̱ra xínira miíyó (kivitu ka’viún Deuteronomio 7:​7, 8). Ni iin ña̱ʼa kǒo kivi sakúxika miíyó nu̱ú Jehová (Rom. 8:​38, 39). ¿Ndáaña ndóʼún xa̱ʼa̱ ña̱ kúnda̱a̱-iniún xa̱ʼa̱ ña̱yóʼo? w24.01 28 párr. 10, 11

Nu̱ú na̱ ungido ndáyáʼviní ña̱ ndakiʼinna chí nu̱únínu. Tá kúú, ku̱i̱ya̱ 1991 ta̱ hermano Frederick Franz ni̱ka̱ʼa̱nra: “Ña̱ ni̱ka̱ʼa̱n Ndióxi̱ xíʼin ndiʼi miíyó na̱ 144,000 xi̱nuvaña, ta kusi̱íní-iniyó tá ná xi̱nu ña̱yóʼo”. Soo, ¿ndáaña ni̱ka̱ʼa̱nra tá xa̱a̱ ni̱ya̱ʼa ku̱i̱ya̱? Ta̱yóʼo ni̱ka̱ʼa̱nra: “Kǒo xíka-inindi̱ xa̱ʼa̱ ña̱ ndátundi̱ ndakiʼinndi̱ chí nu̱únínu, chi ndátundi̱ ña̱yóʼo ta nani yáʼa tiempo ndáyáʼviníkaña nu̱úndi̱. Vitin, ña̱ ndáyáʼviníka nu̱úi̱ kúú ña̱ ndátui̱ ndakiʼi̱n chí nu̱únínu”. Ndiʼiyó kúsi̱í-iniyó chi íyova ña̱ ndátuyó ndakiʼinyó chí nu̱únínu, savana ku̱ʼu̱nna chí ndiví soo ku̱a̱ʼáníyó kundooyó nu̱ú ñuʼú yóʼo. Ta nani yáʼa ki̱vi̱ xíniñúʼu kandíxaníkayó ña̱ mií Jehová sáxi̱nuvara ña̱ ni̱ka̱ʼa̱nra. w23.12 9 párr. 6; 10 párr. 8

Chí yéʼé ña̱ tabernáculo ni̱xi̱yo iin altar ña̱ cobre nu̱ú xi̱xaʼnína kití ña̱ so̱kónarí nu̱ú Jehová (Éx. 27:​1, 2; 40:29). Soo ña̱ʼa ña̱ xi̱sokóna kán kǒo níxi̱kivi chaʼviña xa̱ʼa̱ ndiʼi ku̱a̱chi ña̱ xi̱kuumií na̱ ñuu (Heb. 10:​1-3). Kití tí xi̱xaʼnína ña̱ ndoo ku̱a̱china, xi̱ndana̱ʼa̱rí ña̱ kuvi ta̱ Jesús xa̱ʼa̱yó tasaá ndoo ku̱a̱chiyó nu̱ú Ndióxi̱. Ta̱ Jesús xi̱kunda̱a̱-inira ña̱ mií Jehová chi̱ndaʼárara nu̱ú ñuʼú yóʼo ña̱ kuvira xa̱ʼa̱ ndiʼi na̱ yiví, tasaá chaʼvira xa̱ʼa̱ ku̱a̱china (Mat. 20:28). Ña̱kán, tá nda̱kuchi ta̱ Jesús nda̱a̱ táki̱ʼva íyo ña̱ ni̱so̱kóra miíra nu̱ú iin altar saá ni̱xi̱yoña, saáchi nda̱taxira miíra ña̱ keʼéra ndiʼi ña̱ kúni̱ Jehová (Juan 6:38; Gál. 1:4). Altar kán xi̱ndana̱ʼa̱ña ña̱ xi̱kuni̱ Jehová keʼé ta̱ Jesús, ña̱ kuvira xa̱ʼa̱ ku̱a̱chi na̱ yiví. Ta̱ Jesús “iin kuití yichi̱ ni̱so̱kóra miíra” á ni̱xi̱ʼi̱ra ña̱ va̱ʼa ndoo ndiʼi ku̱a̱chi na̱ yiví na̱ kándíxa Ndióxi̱ (Heb. 10:​5-7, 10). w23.10 26 párr. 10, 11

Ña̱ ni̱xi̱ʼi̱ ta̱ Jesús xa̱ʼa̱yó ndáyáʼviníña, ña̱kán ná ndakanixi̱níyó xa̱ʼa̱ ña̱yóʼo tasaá koo tu̱ʼvayó tá xa̱a̱ ná koo ña̱ Conmemoración. Saáchi ni iin miíyó na̱ yiví va̱ása kuchiñuyó chaʼviyó xa̱ʼa̱ ku̱a̱chi ña̱ ni̱ki̱ʼviyó (Sal. 49:​7, 8). Jehová ta̱xira se̱ʼera ni̱xi̱ʼi̱ra xa̱ʼa̱yó ña̱kán ndáyáʼviní ña̱ ke̱ʼé u̱vi̱ saána. Tá ku̱a̱ʼáka tiempo ndákanixi̱níyó xa̱ʼa̱ ña̱ ke̱ʼé Jehová xíʼin ta̱ Jesús, saá kúú ña̱ ndáyáʼviní ña̱yóʼo nu̱úyó. Soo tá ni̱ki̱ʼvi ta̱ Adán ku̱a̱chi kǒo nítaxika Jehová ña̱ kutakura ndiʼi saá tiempo. Ta ni na̱ se̱ʼera va̱ása níkivika kutakuna ndiʼi saá tiempo. Ña̱kán ña̱ va̱ʼa ndasavií ta̱ Jesús ña̱ ke̱ʼé ta̱ Adán, xi̱niñúʼu kuvira xa̱ʼa̱yó saáchi su̱ví ta̱ ku̱a̱chi níxi̱yora. Ndiʼi tiempo ña̱ ni̱xi̱yo ta̱ Jesús nu̱ú ñuʼú yóʼo, va̱ása níki̱ʼvira ku̱a̱chi ta va̱ása níka̱ʼa̱nra nda̱a̱ ni iin ña̱ vatá (1 Ped. 2:22). Su̱ví ta̱ ku̱a̱chi níxi̱yo ta̱ Jesús, xa̱ʼa̱ ña̱kán inkáchi xi̱ndayáʼvira xíʼin ta̱ Adán (1 Cor. 15:45; 1 Tim. 2:6). w24.01 10 párr. 5, 6

Tá nda̱taku ta̱ Jesús ni̱ki̱ʼvira chí ndiví nu̱ú íyo Ndióxi̱, ta kán ndakutáʼan na̱ ungido xíʼinra. Va̱ʼaníkava íyo ki̱ʼva ña̱ nda̱kaxin Jehová ña̱ ndasakáʼnuyóra tiempo vitin. Ta ña̱ va̱ʼa koo ña̱yóʼo xi̱niñúʼu kuvi ta̱ Jesús, ña̱ va̱ʼa nduura su̱tu̱ káʼnu. Cuarto ña̱ yi̱i̱ní nu̱ú xi̱kiʼvi ta̱ su̱tu̱ káʼnu tiempo na̱ ñuu Israel, na̱ yivíva ke̱ʼéña ta ni̱i̱ kitíva xi̱kiʼvi xíʼin ta̱ su̱tu̱. Soo ta̱ Jesús ni̱ki̱ʼvira nu̱ú yi̱i̱níka “nu̱ú íyo mií Jehová chí ndiví”. Ta kán nda̱taxira ni̱i̱ miíra xa̱ʼa̱ ku̱a̱chiyó “ña̱ va̱ʼa kǒo ndikókayó kuñuʼuyó ndaʼa̱ña nda̱a̱ ni iinka ki̱vi̱” (Heb. 9:​24-26). Ndiʼivayó kivi ndasakáʼnu Jehová ti̱xin templo espiritual ña̱ kúúmiíra, ni kúúyó na̱ ku̱ʼu̱n chí ndiví á na̱ kundoo nu̱ú ñuʼú yóʼo. w23.10 28 párr. 13, 14

Ná ndakanixi̱níyó xa̱ʼa̱ chiñu ña̱ kéʼé ta̱ Jesús chí ndiví, ña̱ kúúra Rey xíʼin su̱tu̱ káʼnu ta kúndáʼviní-inira xínira miíyó. Tíxa̱ʼvi ta̱ Jesús, kivi kuyatinyó nu̱ú Jehová ta ka̱ʼa̱nyó xíʼinra “chi ta̱yóʼo kúú ta̱ náʼa̱ ña̱ va̱ʼaní-inira xíʼinyó ta kúndáʼvi-inira xínira miíyó, tasaá kúú ña̱ kivi na̱ʼa̱ra ña̱ va̱ʼaní-inira xíʼinyó mií tiempo ña̱ xíniñúʼuyóña” (Heb. 4:​14, 15). Ná kǒo taxiyó ya̱ʼa ni iin ki̱vi̱ ña̱ ndakanixi̱níyó xa̱ʼa̱ ndiʼi ña̱ xa̱a̱ ke̱ʼé Jehová xíʼin ta̱ Jesús xa̱ʼa̱yó xíʼin ña̱ kéʼékana xa̱ʼa̱yó tiempo vitin. Xa̱ʼa̱ ña̱ kúʼvi̱-inina xínina miíyó, ña̱yóʼo chíndeétáʼanña xíʼinyó ña̱ kachíñukayó nu̱ú Jehová xíʼin ña̱ si̱í-ini (2 Cor. 5:​14, 15). Iin ki̱ʼva ña̱ na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús kúú: ña̱ ná chindeétáʼanyó xíʼin na̱ yiví ña̱ xa̱a̱na koona testigora ta kundiku̱nna ta̱ Jesús (Mat. 28:​19, 20). Ta ña̱kán kúú ña̱ ke̱ʼé ta̱ apóstol Pablo. Saáchi xi̱kunda̱a̱-inira ña̱ kúni̱ Jehová kúú “ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra” (1 Tim. 2:​3, 4). w23.10 22, 23 párr. 13, 14

Tá ku̱a̱ʼa̱nyó nátúʼunyó xíʼin na̱ yiví, káʼa̱nyó xíʼinna ndáa ki̱ʼva koo nu̱ú ñuʼú yóʼo chí nu̱únínu, ta káʼviyó versículo yóʼo nu̱úna ña̱ va̱ʼa sandíkoyó-inina. Ña̱kán, ¿Ndáaña kivi keʼéyó ña̱ chindeétáʼanyó xíʼin na̱ yiví ña̱ kandíxana ña̱ ndixa xi̱nu ña̱ káʼa̱n Apocalipsis 21:​3, 4? Ta, ¿ndáaña kivi keʼé miíyó ña̱ kandíxakayó ña̱ káʼa̱n Jehová keʼéra chí nu̱únínu? Kǒo níka̱ʼa̱n kuití Jehová xa̱ʼa̱ ña̱ keʼéra chí nu̱únínu chi saátu ni̱ka̱ʼa̱nra ndáaña keʼéra ña̱ va̱ʼa saxínura ña̱yóʼo. Biblia ká’a̱nña: “Ta̱ íyo nu̱ú trono ni̱ka̱ʼa̱nra ña̱yóʼo: ‘Ndásaxa̱ái̱ ndiʼi ña̱ʼaʼ. Ta saátu ka̱chira: ‘Kaʼyí tu̱ʼun yóʼo, saáchi na̱ yiví kivi kandíxanaña, ta mií ña̱ nda̱a̱ kúúña’. Ta ka̱chira: ‘Xa̱a̱ ni̱xi̱nuvaña. Yi̱ʼi̱ kúú Alfa xíʼin Omega, ta̱ ki̱xáʼa xa̱ʼa̱ ta saátu ta̱ so̱ndíʼi’” (Apoc. 21:​5, 6a). w23.11 3 párr. 3-5

Iin ki̱ʼva ña̱ na̱ʼa̱ iin ta̱ loʼo ña̱ ndákanixi̱níra táki̱ʼva ndákanixi̱ní Jehová kúú, ña̱ kiʼinra kuenta xíʼin ti̱ko̱to̱ ña̱ ndíxira ta saátu xíʼin ki̱ʼva ña̱ ndáchuʼunra xi̱níra. Na̱ íxava̱ʼa ti̱ko̱to̱ va̱ása íxato̱ʼóna Jehová ta kéʼéna ña̱ kini, xa̱ʼa̱ ña̱kán ti̱ko̱to̱ ña̱ íxava̱ʼana ni̱ʼiníña ta náʼa̱ña táki̱ʼva íyo ti̱ko̱to̱ ná ñaʼá. Iin ta̱ loʼo ta̱ chíka̱a̱ní ndee̱ ña̱ vií kutáʼanra xíʼin Jehová, kíʼinra kuenta xíʼin ña̱ káʼa̱n Biblia ta saátu ndíku̱nra ejemplo na̱ congregación, ta vií ndáka̱xinra ña̱ kundixira xíʼin ña̱ ndasaviíra miíra. Ta kivi ndakanixi̱níra xa̱ʼa̱ pregunta yóʼó: “¿Á náʼi̱ xíʼin ña̱ ndáka̱xii̱n keʼíi̱ ña̱ íxatoʼíi̱ ña̱ ndákanixi̱ní inkana? ¿Á náʼi̱ xíʼin kiʼva ña̱ ndíxii̱ ña̱ ndásakáʼnui̱ Ndióxi̱?” (1 Cor. 10:​31-33). Na̱ hermano káʼa̱n va̱ʼana xa̱ʼa̱ na̱ va̱lí na̱ viíní ndákanixi̱ní, ta saátu sákusi̱ína-ini Jehová. w23.12 26 párr. 7

Saátu ta̱ “rey ña̱ sur” xa̱a̱ íxandi̱va̱ʼara xíʼin na̱ ndásakáʼnu Ndióxi̱ (Dan. 11:40). Tá kúú, tá xi̱ndikaa̱ Primera xíʼin ña̱ Segunda Guerra Mundial i̱xandi̱va̱ʼanína xíʼin sava na̱ hermano ta nda̱a̱ ta̱ánna na̱yóʼo veʼeka̱a. Saátu ta̱vána sava na̱ va̱lí na̱ xi̱ndasakáʼnu Ndióxi̱ na̱ xi̱kaʼvi escuela xa̱ʼa̱ ña̱ kǒo níxiinna chindeéna bandera á ña̱ katana himno nacional. Soo saátu tiempo vitin na̱ ndásakáʼnu Ndióxi̱ yáʼakavana nu̱ú tu̱ndóʼo ña̱ kivi ixayo̱ʼvi̱ xíʼinna nda̱kú koo inina xíʼinra. Tá kúú, tá xíyo campaña ña̱ ndaka̱xinna na̱ kaʼndachíñu sana iin na̱ testigo kuni̱na ña̱ iin na̱yóʼo ná ni̱ʼína chiñu. Ta sana va̱ása ku̱ʼu̱nvína ña̱ chikaa̱na voto, soo xíʼin ña̱ ndákanixi̱nína na̱ʼa̱na ña̱ kúni̱na ña̱ ná kuchiñu iin na̱yóʼo. Tá kúni̱yó nda̱kú koo iniyó xíʼin Jehová xíniñúʼu kiʼinyó kuenta xíʼin ña̱ kéʼéyó, soo saátu xíniñúʼu kundaaníyó ña̱ ndákanixi̱níyó (Juan 15:​18, 19). w23.08 12 párr. 17

Ña̱ va̱ʼa ni̱ʼíyó ña̱ kutakuyó ndiʼi saá tiempo, ná kundiku̱nyó consejo ña̱ va̱xi nu̱ú 1 Corintios 9:24 ña̱ káchi: “Kunundó ña̱ va̱ʼa ndakiʼinndóña”. Ta̱ Jesús ni̱ka̱ʼa̱nra ña̱ ná kiʼinníyó kuenta chi kivi kixáʼayó kundi̱ʼi̱ní-iniyó xa̱ʼa̱ ña̱ kuxuyó xíʼin ña̱ koʼoyó saátu ña̱ kundi̱ʼi̱ní-iniyó xa̱ʼa̱ ña̱ʼa ña̱ xíniñúʼuyó (Luc. 21:34). Texto ña̱ xa̱a̱ ni̱ka̱ʼa̱nyó xa̱ʼa̱ yóʼo xíʼin inkaka texto ña̱ va̱xi nu̱ú Biblia kivi chindeétáʼanña xíʼinyó ña̱ nasamayó sava ña̱ kéʼéyó tasaá chikaa̱kayó ndee̱ ña̱ kachíñuyó nu̱ú Jehová. Kándixavayó ña̱ ni̱ʼíyó ña̱ kutakuyó ndiʼi saá tiempo saáchi mií Jehová kúú ta̱ chindeétáʼan xíʼinyó (Is. 40:​29-31). Ña̱kán, kǒo sándakoún ña̱ kachíñún nu̱ú Ndióxi̱. Keʼé nda̱a̱ táki̱ʼva ke̱ʼé ta̱ apóstol Pablo chi ta̱yóʼo chi̱kaa̱níra ndee̱ ña̱ sa̱xínura chiñu ña̱ ta̱xi Jehová ndaʼa̱ra (Filip. 3:​13, 14). Xíniñúʼu chikaa̱níún ndee̱ kéʼún chiñu nu̱ú Jehová. Ta ndakaʼán chi íyo Jehová ña̱ chindeétáʼanra xíʼún ña̱ keʼún ña̱yóʼo. Ta saátu chindeétáʼanra xíʼún ña̱ sandákoún sava ña̱ʼa ña̱ sási nu̱ún ña̱ kachíñún nu̱úra. Mií Jehová kúú ta̱ taxi ndee̱ ndaʼún ña̱ kuchiñún sándiʼún carrera ña̱ xínún ku̱a̱ʼún. w23.08 31 párr. 16, 17

Tá xi̱kuumií ta̱ Jesús 12 ku̱i̱ya̱ ni̱xa̱ʼa̱nra xíʼin na̱ veʼera ñuu Jerusalén saáchi ku̱i̱ya̱ tá ku̱i̱ya̱ xi̱keʼéna vikó (Luc. 2:​46-52). Tá xa̱a̱ ndi̱ʼi vikó, ta xa̱a̱ nda̱kiʼinna ku̱a̱ʼa̱nna veʼena ta̱ José xíʼin ñá María ki̱ʼinna kuenta ña̱ kǒora ku̱a̱ʼa̱n xíʼinna. Na̱ yivá ta̱ Jesús xi̱niñúʼu kiʼinna kuenta á ndi̱kó ndiʼi na̱ se̱ʼena xíʼinna. Ña̱kán tá xi̱ni ñá María ña̱ kǒo ta̱ Jesús ku̱a̱ʼa̱n xíʼinna ni̱yi̱ʼvíníñá. Kiviva ka̱ʼa̱n ta̱ Jesús xíʼinna ña̱ su̱ví ku̱a̱chira níxi̱kuuña, nu̱úka ña̱yóʼo to̱ʼóní nda̱kuiinra yuʼúna. Soo ni saá “va̱ása níkunda̱a̱-inina xíʼin ña̱ ni̱ka̱ʼa̱nra xíʼinna”. Ni saá xi̱ndoʼo ta̱ Jesús, “xi̱keʼévara ña̱ xi̱ka̱ʼa̱nna xíʼinra”. Tá kǒo chínúu na̱ yivándó iin ejemplo va̱ʼa nu̱úndó á tá kǒo kúnda̱a̱-inina xíʼin ña̱ ndóʼondó, ¿á íxayo̱ʼvi̱ña xíʼinndó kuniso̱ʼondó ña̱ káʼa̱nna? ¿Ndáaña kivi chindeétáʼan xíʼinndó tá ndóʼondó ña̱yóʼo? Ña̱ nu̱ú, kiʼinndó kuenta nda̱saa ndóʼo Jehová. Biblia káʼa̱nña, ña̱ tá xíniso̱ʼo na̱ va̱lí ña̱ káʼa̱n na̱ yivána, sákusi̱ínína-ini Jehová (Col. 3:20). Tá na̱ yiváún va̱ása kúnda̱a̱-inina xíʼún á tá káʼa̱nna xíʼún keʼún iin ña̱ʼa ña̱ íxayo̱ʼvi̱ xíʼún, Jehová kúnda̱a̱-inira xíʼin ña̱ ndóʼún. Ña̱kán, sakúsi̱íníún-inira tá ná keʼún ña̱ káʼa̱n na̱ yiváún ni sava yichi̱ íxayo̱ʼvi̱ña xíʼún. w23.10 7 párr. 5, 6

Sana iin na̱ káʼvi xíʼinyó kivi ka̱ʼa̱nna ña̱ xíniñúʼu nasama na̱ testigo Jehová ña̱ ndákanixi̱nína xa̱ʼa̱ na̱ homosexual. Kivi ka̱ʼa̱nyó xíʼinna ña̱ ndíʼi̱-iniyó xa̱ʼa̱ ndiʼi na̱ yiví ta íxato̱ʼóyó ña̱ ndáka̱xin iin tá iinna keʼéna (1 Ped. 2:17). Tá ná keʼéyó ña̱yóʼo sana kandíxana ña̱ ka̱ʼa̱nyó xíʼinna ndáaña va̱ʼa ndákiʼinyó tá xíniso̱ʼoyó ña̱ káʼa̱n Biblia. Tá iin na̱ yiví kǒo kándíxana ña̱ kándíxa miíyó ta káʼa̱nna xíʼinyó xa̱ʼa̱ ña̱ ndákanixi̱nína, ná kǒo ka̱ʼa̱nyó ña̱ xa̱a̱ kúnda̱a̱-iniyó xíʼin ña̱ ndóʼona. Ndakanixi̱ní ña̱ iin na̱ káʼvi xíʼún escuela káʼa̱nna ña̱ na̱ yiví kíʼví kúú na̱ kándíxa ña̱ íyo Ndióxi̱. ¿Á xa̱ʼa̱ ña̱yóʼo ndakanixi̱níún ña̱ kándíxana ña̱ evolución á ña̱ xíni̱nína xa̱ʼa̱ ña̱yóʼo? Kivi chindaʼún enlace iin artículo á video ña̱ jw.org ndaʼa̱na, ña̱ káʼa̱n xa̱ʼa̱ ndáa ki̱ʼva i̱xava̱ʼa Ndióxi̱ ndiʼi ña̱ʼa. Tándi̱ʼi, sana kandíxana ña̱ ka̱ʼún xíʼinna xa̱ʼa̱ña. Soo, tá to̱ʼó ná ka̱ʼún xíʼinna sana kandíxavana kuniso̱ʼona yóʼó. w23.09 17 párr. 12, 13

Ni ke̱ʼéyó ña̱ va̱ása va̱ʼa nu̱ú Jehová kiviva kuniñúʼu tukura miíyó ta taxira ku̱a̱ʼá ña̱ va̱ʼa ndaʼa̱yó. Soo xíniñúʼu sandákooyó ña̱ kini kéʼéyó ta kixáʼayó keʼéyó ña̱ kúni̱ Jehová, ta chika̱a̱yó ndee̱ ña̱ kandíxaníkayóra (Prov. 28:13). Ni ta̱ ku̱a̱chi xi̱kuu ta̱ Sansón, ta ni̱ki̱ʼvira iin tu̱ndóʼo i̱xaa ñá Dalila, soo kǒo níndakava-inira ta chi̱kaa̱ra ndee̱ ña̱ kachíñukara nu̱ú Jehová. Xa̱ʼa̱ ña̱kán, Jehová xi̱niñúʼu tukurara ña̱ va̱ʼa saxínura ña̱ kúni̱ra. Va̱ʼaníva-ini Jehová chi ki̱ʼinra kuenta xíʼin ña̱ va̱ʼa ña̱ xi̱kuumií ta̱ Sansón, ta ni̱ka̱ʼa̱nra ña̱ ná ka̱ʼyi̱ ki̱vi̱ ta̱ Sansón nu̱ú iin lista ña̱ va̱xi nu̱ú Hebreos capítulo 11 nu̱ú va̱xi ki̱vi̱ ndiʼi na̱ va̱ʼaní xi̱kandíxa Ndióxi̱. Va̱ʼaní kúniyó ña̱ kúnda̱a̱-iniyó ña̱ kúʼvi̱ní-ini Ndióxi̱ xínira miíyó, ta kúni̱ra chindeétáʼanra xíʼinyó tá ku̱a̱yaʼayó nu̱ú tu̱ndóʼo saáchi xíniñúʼuníyó ña̱ chindeétáʼanra xíʼinyó. Nda̱a̱ táki̱ʼva ke̱ʼé ta̱ Sansón ná ka̱ʼa̱nyó xíʼin Jehová: “Ixaún ña̱ ma̱ní ndakaʼún xa̱ʼíi̱. Ndióxi̱ miíi̱ [...], ixaún ña̱ ma̱ní taxiún ndee̱ ndaʼíi̱” (Juec. 16:28). w23.09 6, 7 párr. 18, 19

Kúnda̱a̱-iniyó ña̱ xa̱a̱ ku̱nu̱míní kixaa̱ ki̱vi̱ káʼnu Jehová, ña̱kán kúni̱yó ka̱ʼa̱nyó xíʼin inka na̱ yiví xa̱ʼa̱ ña̱ kaʼndachíñura. Soo, sava yichi̱ kǒo xíínyó ka̱ʼa̱nyó xíʼinna. ¿Nda̱chun? Saáchi yíʼviyó. Ña̱yóʼo kúú ña̱ ndo̱ʼo ta̱ Pedro ñu̱ú tá ti̱inna ta̱ Jesús, chi ni̱yi̱ʼvíra ta ni̱ka̱ʼa̱nra ña̱ kǒo xínira ta̱ Jesús (Mat. 26:​69-75). Soo, tá ndi̱ʼi ndu̱ndakúva-inira ta ni̱ka̱ʼa̱nra: “Va̱ása yi̱ʼvíndó xa̱ʼa̱ ña̱ káʼa̱nna xíʼinndó, ta kǒo kundi̱ʼi̱-inindó” (1 Ped. 3:14). Tu̱ʼun ña̱ ni̱ka̱ʼa̱nra yóʼo náʼa̱ña nu̱úyó, ña̱ kiviva ndakú koo iniyó ta kǒo yi̱ʼvíyó kuniyó na̱ yiví. ¿Ndáaña chindeétáʼan xíʼinyó ña̱ kǒo yi̱ʼvíyó kuniyó na̱ yiví? Ta̱ Pedro ni̱ka̱ʼa̱nra ña̱yóʼo: “Xíʼin ndiʼi níma̱ndó xíniñúʼu ndakunindó ña̱ kúú ta̱ Cristo tátayó” (1 Ped. 3:15). Ña̱yóʼo kúni̱ kachiña, ña̱ ndakanixi̱níyó xa̱ʼa̱ chiñu ña̱ kúúmií ta̱ Jesús xíʼin ndee̱ ña̱ kúúmiíra chi ta̱kán kúú rey nu̱ú ndiʼiyó. w23.09 27 párr. 7, 8

Miíyó xíniñúʼu kiʼinníyó kuenta ña̱ va̱ʼa kǒo keʼéyó nda̱a̱ táki̱ʼva kéʼé na̱ kǒo ndásakáʼnu Ndióxi̱ (Efes. 5:11). Tá iin na̱ yiví xítona á xíniso̱ʼona ña̱ kini á nu̱ú kée na̱ yiví chálá sana keʼéna nda̱a̱ táki̱ʼva kéʼé na̱kán, ta ki̱ʼvina iin ku̱a̱chi ña̱ ndeéní (Gén. 3:6; Sant. 1:​14, 15). Ta̱ Ndi̱va̱ʼa sándáʼvira na̱ yiví chi kǒo kúni̱ra ña̱ kunda̱a̱-inina ndáaña kúú ña̱ va̱ʼa ta ndáaña kúú ña̱ va̱ása va̱ʼa (Is. 5:20; 2 Cor. 4:4). Jehová káʼa̱nra ña̱ kǒo xíniñúʼu keʼéyó ña̱ kini, soo na̱ yiví kúni̱na sáxi̱nuna iniyó ña̱ keʼéyó ña̱yóʼo ta káʼa̱nna ña̱ su̱ví ña̱ kiniví kúúña (2 Ped. 2:19). Xa̱ʼa̱ ña̱kán ku̱a̱ʼání película, programa ña̱ yáʼa nu̱ú televisión xíʼin ña̱ va̱xi nu̱ú internet, káʼa̱nña xa̱ʼa̱ ña̱ʼa ña̱ kǒo kútóo Jehová. Ta̱ Ndi̱va̱ʼa kúni̱ra ña̱ ná ndakanixi̱níyó ña̱ ndiʼi ña̱ íyo nu̱ú ñuʼu̱ yóʼo su̱ví ña̱ kiniví kúúña (Efes. 5:6). w24.03 22 párr. 9, 10

Ña̱ tabernáculo xi̱nanítuña “tienda ña̱ reunión”, ta yóʼo kúú nu̱ú xi̱ndakutáʼan na̱ ñuu Israel ña̱ ndasakáʼnuna Jehová ta saátu ña̱ so̱kóna ña̱ʼa nu̱úra (Éx. 29:​43-46). Ta, tá ni̱xi̱yona nu̱ú ñuʼú yichi̱ ta xi̱ndakiʼinna ku̱a̱ʼa̱nna inka lugar xi̱ndakiʼinna ña̱ tabernáculo ku̱a̱ʼa̱n xíʼinna (Éx. 25:​8, 9; Núm. 9:22). Ki̱ʼva 500 ku̱i̱ya̱ xi̱niñúʼuna ña̱ tabernáculo nda̱a̱ tá ku̱vaʼa templo ña̱ Jerusalén. Soo, saátu ña̱ tabernáculo xi̱ndanaʼa̱ña iin ña̱ʼa ña̱ va̱ʼaníka ña̱ koo chí nu̱únínu. Ña̱ tabernáculo xi̱ndana̱ʼa̱ña “ña̱ʼa ña̱ íyo chí ndiví” ta saátu xi̱ndana̱ʼa̱ña templo espiritual ña̱ kúúmií Jehová. Ta̱ apóstol Pablo ni̱ka̱ʼa̱nra: Tienda yóʼo á “ña̱ tabernáculo yóʼo ndánaʼa̱ña ña̱ íyo tiempo miíyó vitin” (Heb. 9:9). Ña̱kán, tá ka̱ʼyíra ña̱yóʼo nu̱ú na̱ hebreo xa̱a̱ ki̱xáʼa íyova ña̱ templo espiritual, saáchi ku̱i̱ya̱ 29 tiempo vitin kixáʼa íyoña. Ku̱i̱ya̱ saá kúú ña̱ nda̱kuchi ta̱ Jesús ta ki̱xáʼara kúúra “su̱tu káʼnu” ti̱xin templo espiritual (Heb. 4:14; Hech. 10:​37, 38). w23.10 26 párr. 6, 7

Tá kúni̱yó viíka kutáʼanyó xíʼin Ndióxi̱ xíniñúʼu kundeé-iniyó tá yáʼayó nu̱ú tu̱ndóʼo soo saátu xíniñúʼu vitá koo iniyó ta nasamayó ña̱ ndákanixi̱níyó. Ta kivi keʼéyó ña̱yóʼo tá nása̱ma ña̱ ndóʼoyó á tá xíniñúʼu ixato̱ʼóyó ña̱ ndákanixi̱ní inkana xíʼin ña̱ ndáka̱xinna keʼéna. Ndiʼi miíyó na̱ ndásakáʼnu Jehová xíniñúʼu chika̱a̱yó ndee̱ ña̱ ndakani vií xi̱níyó, vitá koo-iniyó ta kundáʼvi-iniyó kuniyó inkana. Biblia káʼa̱nña xa̱ʼa̱ Jehová ña̱ íyora nda̱a̱ táki̱ʼva íyo iin “Yu̱u̱” saáchi íyora ndiʼi tiempo ta kǒo nása̱mara (Deut. 32:4). Soo saátu viíní ndákanixi̱níra á kúnda̱a̱-inira xíʼin ña̱ ndóʼoyó, ¿nda̱chun va̱ʼa xíni̱yó ña̱yóʼo? Saáchi tá nása̱ma ña̱ʼa nu̱ú ñuʼú yóʼo, saátu Jehová násamara ki̱ʼva ña̱ kéʼéra sava ña̱ʼa ña̱ va̱ʼa xi̱nu ña̱ kúni̱ra koo chí nu̱únínu. Xa̱ʼa̱ ña̱ i̱xava̱ʼa Jehová miíyó nda̱a̱ táki̱ʼva íyora va̱ása íxayo̱ʼvi̱ña xíʼinyó nasamayó ña̱ ndákanixi̱níyó. Nu̱ú tu̱ʼunra va̱xi consejo ña̱ kivi chindeétáʼan xíʼinyó ña̱ ndaka̱xin viíyó ña̱ keʼéyó tá yáʼayó nu̱ú tu̱ndóʼo. Ña̱ kéʼé Jehová xíʼin ña̱ káʼa̱nra xíʼinyó nu̱ú tu̱ʼunra náʼa̱ña ña̱ va̱ása násamara ki̱ʼva ña̱ íyora, soo kúnda̱a̱va-inira xíʼin ña̱ ndóʼoyó. w23.07 20 párr. 1-3

Jehová kúni̱níra xínira miíyó, ta kéʼéra xíʼinyó nda̱a̱ táki̱ʼva kéʼé iin ñaʼá ñá íyo se̱ʼe (Is. 66:​12, 13). Ndakanixi̱ní xa̱ʼa̱ iin ñaʼá ñá íyo iin se̱ʼe loʼo, tá kíxáʼaña xákuña kamakaví xínuñá ku̱a̱ʼa̱nñá nu̱úña ña̱ kotoñá ndáaña ndóʼoña. Ki̱ʼva saá kéʼé Jehová xíʼinyó, saáchi íyo tu̱ʼvara ña̱ chindeétáʼanra xíʼinyó tá kúsuchíní-iniyó (Sal. 103:8). Ku̱a̱ʼání yichi̱ na̱ ñuu Israel sa̱ndákavana-ini Jehová, soo tá xi̱ndikó-inina va̱ʼaní xi̱ndakiʼinrana chi xi̱kuni̱níra xi̱xinirana. Iin yichi̱ ni̱ka̱ʼa̱nra ña̱yóʼo xíʼinna: “Ndáyáʼviníún nu̱úi̱, i̱xato̱ʼíi̱ yóʼó ta kúʼvi̱ní-inii̱ xínii̱ yóʼó” (Is. 43:​4, 5). Kǒo nasa̱maví Jehová, saáchi kúʼvi̱ní-inira xínira miíyó nda̱a̱ táki̱ʼva xi̱kuʼvi̱-inira xi̱xinira na̱ ñuu Israel. Ni ni̱ki̱ʼviyó iin ku̱a̱chi ña̱ ndeé va̱ása sándakoo ndaʼa̱ra miíyó. Tá ndándikó-iniyó xa̱ʼa̱ ku̱a̱chi ña̱ ni̱ki̱ʼviyó ta nándukúyóra, ta̱kán náʼa̱ra nu̱úyó ña̱ kúʼvi̱níva-inira xínira miíyó ta káʼa̱nra xíʼinyó ña̱ ixakáʼnuva-inira xa̱ʼa̱yó (Is. 55:7). Tá íxakáʼnu-ini Jehová xa̱ʼa̱yó va̱ʼaní kúniyó tasaá kúsi̱íní-iniyó (Hech. 3:19). w24.01 26, 27 párr. 4, 5

Jehová kivi chindeétáʼanra xíʼinyó tá yáʼayó nu̱ú iin tu̱ndóʼo. Tá kúú, sana xíniñúʼu ka̱ʼa̱nyó xíʼin iin ta̱ káchíñuyó nu̱ú ña̱ ná taxira permiso ndaʼa̱yó ña̱ va̱ʼa ku̱ʼu̱nyó asamblea, á ña̱ nasamayó ki̱vi̱ ña̱ káchíñuyó ña̱ va̱ʼa ku̱ʼu̱n ni̱ʼiyó reunión. Tá xítoyó ña̱ chíndeétáʼan Jehová xíʼinyó saá kúú ña̱ kándíxaníkayóra. Ta̱ Esdras vitá ni̱xi̱yo inira ta ni̱ka̱ʼa̱nra xíʼin Jehová ña̱ chindeétáʼanra xíʼinra. Tá xi̱ndakiʼin ta̱ Esdras iin chiñu ta xi̱ndakanixi̱níra ña̱ kǒo kuchiñura keʼéraña, xi̱ka̱ʼa̱nra xíʼin Jehová ña̱ chindeétáʼanra xíʼinra (Esd. 8:​21-23; 9:​3-5). Tá ki̱ʼin inkana kuenta ña̱ kándíxaní ta̱ Esdras ña̱ mií Jehová chindeétáʼan xíʼinra, saátu ke̱ʼé na̱kánva (Esd. 10:​1-4). Tá kíxáʼa ndíʼi̱ní-iniyó xa̱ʼa̱ ña̱ kǒo xu̱ʼún nu̱úyó, ndíʼi̱-iniyó xa̱ʼa̱ na̱ veʼeyó, ná ka̱ʼa̱nyó xíʼin Jehová ta ná kǒo kaka-iniyó ña̱ chindeétáʼanvara xíʼinyó. w23.11 18 párr. 15-17

Tá káʼa̱n Jehová ña̱ kundiku̱nyó yichi̱ ta̱ Abrahán ta xa̱a̱yó nduuyó iin na̱ yiví nda̱kú ini nu̱úra, su̱ví ña̱yóʼo kúni̱ kachiña ña̱ keʼéyó nda̱a̱ táki̱ʼva ke̱ʼé ta̱ Abrahán. Saáchi íyo ku̱a̱ʼáníva ki̱ʼva ña̱ kivi na̱ʼa̱yó ña̱ kándíxayó Ndióxi̱. Tá kúú, va̱ʼaní ná ndakiʼinyó na̱ xa̱á na̱ kíxaa̱ ti̱xin congregación, ná chindeétáʼanyó xíʼin na̱ hermano na̱ kúma̱ní ña̱ʼa nu̱ú, ta saátu ná chindeétáʼanyó xíʼin na̱ veʼeyó. Tá kéʼéyó ña̱yóʼo saá kúú ña̱ sákusi̱íníyó ini Jehová (Rom. 15:7; 1 Tim. 5:​4, 8; 1 Juan 3:18). Ta inka ki̱ʼva ña̱ na̱ʼa̱yó ña̱ kándíxaníyó Ndióxi̱ kúú ña̱ natúʼunyó xíʼin na̱ yiví xa̱ʼa̱ra (1 Tim. 4:16). Ndiʼiyó kivi na̱ʼa̱yó ña̱ kándíxaníyó ña̱ saxínu Jehová ña̱ káʼa̱nra keʼéra chí nu̱únínu. Ta ndiʼi ña̱ ndáka̱xinra keʼéra va̱ʼaníva íyoña. Tá kéʼéyó ña̱ káʼa̱nra xíʼinyó, xa̱a̱yó kooyó na̱ yiví na̱ nda̱kú ini nu̱úra ta kooyó migora. w23.12 6 párr. 15

Tá kúma̱ní si̱lóʼo kuvi ta̱ rey David, ni̱ka̱ʼa̱nra tu̱ʼun ña̱ va̱xi nu̱ú texto ña̱ ki̱vi̱ vitin xíʼin ta̱ Salomón (1 Rey. 2:​1, 3). Ndiʼi ta̱a ta̱ káchíñu nu̱ú Jehová xíniñúʼu kundiku̱nra consejo yóʼo. Ña̱ va̱ʼa kana ndiʼi ña̱ kéʼéra xíniñúʼu viíní kuniso̱ʼora ndiʼi ña̱ káʼa̱n Jehová, ta ndiʼi tiempo xíniñúʼu keʼéra ña̱yóʼo (Luc. 2:52). ¿Nda̱chun ndáyáʼviní kuxa-ini ta̱ va̱lí xíʼin tu̱ʼun Ndióxi̱? Ndiʼi ta̱a ta̱ káchíñu nu̱ú Jehová íyo ku̱a̱ʼání chiñu nu̱úra ti̱xin veʼera ta saátu ti̱xin congregación. Tá ta̱ kúa̱an kúún sana ndákanixi̱níún xa̱ʼa̱ chiñu ña̱ keʼún chí nu̱únínu. Tá kúú, ña̱ koún precursor, siervo ministerial, anciano á ña̱ tindaʼún ta koo se̱ʼún (Efes. 6:4; 1 Tim. 3:1). Ña̱ va̱ʼa xa̱ún keʼún ndiʼi ña̱yóʼo xíniñúʼu kuxa-iniún xíʼin tu̱ʼun Ndióxi̱. w23.12 24 párr. 1, 2

Jehová nda̱kaxinra na̱ anciano ña̱ kundaana na̱ congregación na̱ kúú ndikachi sa̱na̱ Ndióxi̱. Ta na̱ anciano chíndayáʼvinína chiñu yóʼo ta chíka̱a̱nína ndee̱ ña̱ kundaana na̱ hermano (Jer. 23:4; 1 Ped. 5:2). Táxiníyó tíxa̱ʼvi ndaʼa̱ Jehová xa̱ʼa̱ ña̱ íyo na̱ anciano na̱ va̱ʼaní chíndeétáʼan xíʼinyó ti̱xin congregación. Ku̱a̱ʼání ña̱ va̱ʼa kivi sákuaʼa na̱ anciano xíʼin ña̱ ke̱ʼé ta̱ Gedeón ta̱ xi̱kuu juez ñuu Israel (Heb. 6:12). Ta̱yóʼo xi̱ndaara na̱ ñuu Ndióxi̱ ta xi̱kiʼinra kuenta xíʼinna (Juec. 2:16; 1 Crón. 17:6). Nda̱a̱ táki̱ʼva ke̱ʼé ta̱ Gedeón, saátu kéʼé na̱ anciano na̱ íyo tiempo vitin saáchi ndáana na̱ hermano na̱ íyo ti̱xin congregación (Hech. 20:28; 2 Tim. 3:1). Ku̱a̱ʼání ña̱ kivi sákuaʼayó xíʼin ña̱ ke̱ʼé ta̱ Gedeón, saáchi xi̱kunda̱a̱-inira ña̱ va̱ása kivi keʼéra ndiʼi chiñu ña̱ xi̱taxina ndaʼa̱ra, vitá ni̱xi̱yo-inira ta xi̱xiniso̱ʼora ndiʼi ña̱ xi̱ka̱ʼa̱n Jehová xíʼinra. Kivi kundiku̱nyó yichi̱ ta̱ Gedeón ta ná kundayáʼvi chiñu ña̱ kéʼé na̱ anciano nu̱úyó ta ná kuniso̱ʼoyó ña̱ káʼa̱nna xíʼinyó (Heb. 13:17). w23.06 2 párr. 1, 3