Enero

Kúsi̱íní-ini na̱ ti̱ndaʼa̱ tá káku se̱ʼena ta kúni̱nína xínina ña̱ loʼo se̱ʼena. Ni liviníva ña̱ loʼo se̱ʼena, soo kúni̱vana ña̱ kuaʼnuña chi tá ná kǒo kuaʼnuña sana ndi̱ʼi̱níva-inina. Ki̱ʼva saá íyo miíyó, chi kúsi̱íníva-ini Jehová tá kíxáʼa sákuaʼayó xa̱ʼa̱ra. Soo kǒo kúni̱ra ña̱ kooyó na̱ va̱lí ndiʼi tiempo (1 Cor. 3:1). Saáchi kúni̱ra ña̱ ndakanixi̱níyó táki̱ʼva ndákanixi̱ní na̱ yiví na̱ xa̱a̱ chée. Tá káʼa̱n Biblia ña̱ kooyó cristiano na̱ xa̱a̱ chée, ña̱yóʼo kúni̱ kachiña ña̱ ndakanixi̱níyó táki̱ʼva ndákanixi̱ní na̱ xa̱a̱ chée. Tu̱ʼun griego ña̱ sa̱ndáya̱ʼana tu̱ʼun “na̱ xa̱a̱ chée” kúni̱ kachiña “na̱ xa̱a̱ xu̱xa-ini” “na̱ va̱ʼaní kéʼé iin ña̱ʼa” (1 Cor. 2:6). Ña̱kán, tá va̱ʼaní xáa̱yó kúnda̱a̱-iniyó xíʼin tu̱ʼun Ndióxi̱, nda̱a̱ táki̱ʼva íyo na̱ xa̱a̱ chée saá íyoyó ni loʼo ku̱i̱ya̱yó. ¿Á ña̱yóʼo kúni̱ kachiña ña̱ tá xa̱a̱ xíni̱ va̱ʼayó xa̱ʼa̱ Jehová kǒo xíniñúʼu sakúaʼakayó xa̱ʼa̱ra? Va̱ásaví, chi ndiʼi tiempo xíniñúʼu chika̱a̱kayó ndee̱ ña̱ sakúaʼayó xa̱ʼa̱ra (1 Tim. 4:15). w24.04 2 párr. 1, 3

Jehová kúúra Ndióxi̱yó, migoyó xíʼin yiváyó. Soo, ¿á xíni̱ún ña̱ kánara yóʼó ku̱ʼún veʼera? Ná kachiyó ña̱ iin na̱ yiví ka̱nana yóʼó ña̱ ku̱ʼún veʼena ta va̱ʼaní nda̱kiʼinna yóʼó. Ta̱ rey David ni̱ka̱ʼa̱nra ña̱ ki̱ʼva saá kéʼé Jehová xíʼin na̱ káchíñu nu̱úra chi va̱ʼaní-inira xíʼinna. Ta̱ David ni̱nda̱ka̱tu̱ʼunrara: “Jehová Ndióxi̱ miíi̱, ¿ndáana kúú na̱ kivi koo veʼún? Ta, ¿ndáana kivi koo yuku̱ ña̱ yi̱i̱ní nu̱ú íyoún?” (Sal. 15:1). Xíʼin tu̱ʼun ña̱ ni̱ka̱ʼa̱n ta̱ David kúnda̱a̱-iniyó ña̱ kiviva kooyó veʼe Jehová ta ña̱yóʼo kúni̱ kachiña ña̱ kooyó migora. Tá kúma̱ní ixava̱ʼa Jehová ndiʼi ña̱ʼa mitúʼun miíra ni̱xi̱yo. Soo, saá i̱xava̱ʼara ta̱ Jesús tasaá kǒo níxi̱yo mitúʼunkara. Ta nda̱a̱ táki̱ʼva íyo ta̱ ka̱nara ni̱xa̱a̱ veʼera saá ni̱xi̱yo ta̱ Jesús. Ni̱kusi̱íní-ini Jehová nda̱kiʼinrara. Ña̱ Biblia káʼa̱nña ña̱ kúsi̱íní-ini Jehová xíʼin ta̱ Jesús, ta saátu ta̱ Jesús kúsi̱íní-inira ña̱ íyora xíʼin yivára (Prov. 8:30). w24.06 2 párr. 1-3

Ndakanixi̱ní xa̱ʼa̱ ña̱yóʼo: Yáʼaka 340,000 ta̱a nda̱kutáʼan ña̱ va̱ʼa ndasaana ta̱ David rey tasaá kaʼndachíñura iníísaá ñuu Israel. Ki̱ʼva u̱ni̱ ki̱vi̱, nda̱a̱ chí yukú ña̱ Hebrón táku̱ ña̱ kúsi̱íní-inina nátúʼunna ta xítana (1 Crón. 12:39). Ta xíʼin na̱kán xi̱ndikaa̱ iin ta̱ loʼo ta̱ xi̱naní Sadoc ta sana loʼoní na̱ yiví xi̱xini̱ miíra, soo Jehová xi̱tora ña̱ ke̱ʼéra. Ña̱kán ta̱xira ni̱ka̱ʼyi̱ nu̱ú Biblia ña̱ káʼa̱n xa̱ʼa̱ ta̱ Sadoc ña̱ va̱ʼa kunda̱a̱-iniyó xa̱ʼa̱ra (1 Crón. 12:​22, 26-28). Iin su̱tu̱ xi̱kuu ta̱ Sadoc ta xi̱kachíñura xíʼin ta̱ su̱tu̱ káʼnu Abiatar. Saátu Jehová chi̱ndeétáʼanra xíʼin ta̱ Sadoc ña̱ ndíchi koora ña̱ va̱ʼa kunda̱a̱-inira xíʼin ku̱a̱ʼání ña̱ʼa (2 Sam. 15:27). Ta saátu kǒo níxi̱yiʼvíra. Tiempo ña̱ so̱ndíʼi ña̱ ndóoyó vitin, ndeéní íxandi̱va̱ʼa ta̱ Ndi̱va̱ʼa xíʼin na̱ ñuu Ndióxi̱ (1 Ped. 5:8). Nani ndátuyó ña̱ sandíʼi-xa̱ʼa̱ Jehová ta̱ Ndi̱va̱ʼa xíʼin na̱ kítáʼan xíʼinra xíniñúʼu ndakú koo iniyó (Sal. 31:24). Tásaá ná keʼéyó ndakú koo iniyó nda̱a̱ táki̱ʼva ni̱xi̱yo ta̱ Sadoc. w24.07 2 párr. 1-3

Tá i̱xava̱ʼa Jehová ta̱ Adán xíʼin ña̱ Eva xi̱kuni̱ra ña̱ si̱íní ná kundoona. Xa̱ʼa̱ ña̱kán kúú ña̱ ta̱xira iin nu̱ú liviní kundoona, sa̱tíndaʼa̱rana ta ni̱ka̱ʼa̱nra xíʼinna ná koo ku̱a̱ʼání se̱ʼena ta ndasalivina iníísaá nu̱ú ñuʼú nda̱a̱ táki̱ʼva liviní ni̱xi̱yo jardín ña̱ Edén. Iin kuití kúú ña̱ ni̱ka̱ʼa̱nra xíʼinna va̱ása keʼéna, soo tá ná ixaso̱ʼona, kuvina. Ta kúnda̱a̱va-iniyó ndáaña ku̱u: iin ángel ta̱ ndi̱va̱ʼaní-ini ta̱ va̱ása níxi̱kuʼvi̱-ini kuni miína, ni va̱ása níxi̱kuʼvi̱-inira xi̱xinira Jehová, ni̱ka̱ʼa̱nra ña̱ vatá xíʼin ta̱ Adán ta saátu xíʼin ñá Eva ta ni̱ki̱ʼvina ku̱a̱chi nu̱ú Ndióxi̱. Nu̱úka ña̱ kandíxana ña̱ ni̱ka̱ʼa̱n Jehová, ka̱ndíxana ña̱ ni̱ka̱ʼa̱n ta̱ Ndi̱va̱ʼa. Ta nda̱a̱ táki̱ʼva ni̱ka̱ʼa̱n Jehová kuu, saá ndixa ku̱uva. Ta nani saá ki̱xáʼa íyo ku̱a̱ʼání tu̱ndóʼo nu̱úna, ku̱chéena, ta ni̱xi̱ʼi̱na (Gén. 1:​28, 29; 2:​8, 9, 16-18; 3:​1-6, 17-19, 24). w24.08 3 párr. 3

Jehová xíʼin ta̱ Jesús kúni̱na ña̱ si̱í kooyó. Ta̱ ka̱ʼyi Salmo 119:2 ka̱chira: “Si̱íní íyo na̱ kándíxa ña̱ káʼa̱nra ta saátu na̱ nándukú miíra xíʼin ndiʼi níma̱na”. Saátu ta̱ Jesús ni̱ka̱ʼa̱nra ña̱yóʼo: “Na̱ si̱íka íyo kúú na̱ xíniso̱ʼo tu̱ʼun Ndióxi̱ ta kéʼéna ña̱ káʼa̱nña” (Luc. 11:28). Si̱íní íyo miíyó na̱ ndásakáʼnu Jehová. Iin ña̱yóʼo kúú ña̱ káʼvi ni̱ʼiyó tu̱ʼun Ndióxi̱ ta chíkaa̱yó ndee̱ ña̱ keʼéyó ña̱ sákuaʼayó nu̱úña (Sant. 1:​22-25). Tá kéʼéyó ña̱yóʼo saá kúú ña̱ sákusi̱íyó-ini Jehová (Ecl. 12:13). Ta saátu tá ndíku̱nyó ña̱ káʼa̱n tu̱ʼun Ndióxi̱ chíndeétáʼanña xíʼinyó ña̱ vií kutáʼanyó xíʼin na̱ veʼeyó ta saátu chíndeétáʼanña xíʼinyó ña̱ vií kutáʼanyó xíʼin na̱ hermanoyó. Saátu va̱ása yáʼayó nu̱ú tu̱ndóʼo táʼan ña̱ ndóʼo na̱ va̱ása ndíku̱n ña̱ káʼa̱n Jehová. Ta̱ rey David ni̱ka̱ʼa̱nra nu̱ú iin yaa xa̱ʼa̱ ley Jehová, xa̱ʼa̱ chiñu ña̱ xáʼndara ta saátu ndáa ki̱ʼva ndátiinra ku̱a̱chi, ka̱chira: “Na̱ kéʼé ña̱ káʼún, ku̱a̱ʼání ña̱ va̱ʼa ndakiʼinna” (Sal. 19:​7-11). w24.09 2 párr. 1-3

Xíni̱va Jehová ndáaña sándi̱ʼi-iniyó ta saátu xíni̱ra ndáaña sákusi̱í-iniyó xíʼin ña̱ sákusuchí-iniyó (Sal. 37:18). Sava yichi̱ ni xóʼvi̱níyó soo chíkaa̱yó ndee̱ ña̱ ndasakáʼnuyóra ta kúsi̱íníva-inira xíʼin ña̱ kéʼéyó. Soo saátu kúni̱ra chindeétáʼanra xíʼinyó ta sándi̱kora-iniyó. Salmo 147:3 káʼa̱nña: “Jehová sándaʼara na̱ xóʼvi̱ní ta kátúnra ti̱ko̱to̱ nu̱ú tu̱kue̱ʼe̱na”. Va̱ʼaní káʼa̱n texto yóʼo xa̱ʼa̱ ki̱ʼva ña̱ ndáa Jehová na̱ xóʼvi̱ xíʼin na̱ ndákava-ini. Soo, ¿ndáaña kivi keʼéyó ña̱ va̱ʼa viíní kundaara miíyó? Ná ka̱ʼa̱nyó xa̱ʼa̱ iin ejemplo. Tá iin na̱ yiví tu̱kue̱ʼe̱na kivi ku̱ʼu̱nna nu̱ú iin doctor. Soo ña̱ va̱ʼa ndaʼana xíniñúʼu keʼéna ndiʼi ña̱ káʼa̱n ta̱ doctor xíʼinna. Nu̱ú Biblia káʼa̱n Jehová xíʼin na̱ xóʼvi̱ ta saátu na̱ ndákava-ini, ta káʼa̱nra ndáa ki̱ʼva kundiku̱nyó consejo ña̱ táxira ndaʼa̱yó xa̱ʼa̱ ña̱ kúʼvi̱ní-inira xínira miíyó. w24.10 6 párr. 1, 2

Jehová sa̱ndíʼi-xa̱ʼa̱ra na̱ yiví na̱ xi̱ndoo xi̱naʼá saáchi nina ña̱ va̱ása va̱ʼa xi̱keʼéna. Ña̱kán, ¿ndáaña kuu xíʼinna? Tá ya̱chi̱ na̱ ñuu Ndióxi̱ xi̱kaʼa̱nna ña̱ kǒo ndatakuvína. Biblia káʼa̱nña ña̱ sava yichi̱ Jehová sa̱ndíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa. Tá kúú, tá ki̱xi Diluvio nu̱ú ñuʼú yóʼo, Jehová sa̱ndíʼi-xa̱ʼa̱ra ndiʼi na̱ yiví na̱ xi̱keʼé ña̱ va̱ása va̱ʼa ta iinlá ta̱ Noé xíʼin na̱ veʼera ni̱ka̱ku. Tá ni̱ya̱ʼa tiempo, Jehová ni̱ka̱ʼa̱nra xíʼin na̱ ñuu Israel ña̱ sandíʼi-xa̱ʼa̱na 7 ñuu ña̱ ni̱xi̱yo nu̱ú ñuʼú ña̱ ni̱ka̱ʼa̱nra taxira ndaʼa̱na. Ta iin ñuú iin ángel xa̱ʼníra 185,000 na̱ soldado asirio (Deut. 7:​1-3; Is. 37:​36, 37). Kǒo káʼa̱n káxiví Biblia xíʼinyó xa̱ʼa̱ na̱ yiví na̱ sa̱ndíʼi-xa̱ʼa̱ Jehová á ndatakuna chí nu̱únínu á va̱ása ndatakuna. Xíni̱yó ña̱ sa̱ndíʼi-xa̱ʼa̱ Jehová ndiʼi na̱ yiví kán, soo kǒo xíni̱yó ndáaña xi̱ndakanixi̱níra xa̱ʼa̱ iin tá iinna, ni kǒo xíni̱yó á sa̱kúaʼana xa̱ʼa̱ra ta nda̱ndikó-inina tá kúma̱níka kuvina. w24.05 3 párr. 5-7

Ta̱ Jesús ni̱ka̱ʼa̱nra iin ilustración xa̱ʼa̱ iin ñaʼá ñá ni̱xi̱ʼi̱ yii̱, ñáyóʼo ku̱a̱ʼání yichi̱ xi̱xaʼa̱nñá nu̱ú iin ta̱ Juez ña̱ va̱ʼa nda̱kú ndatiinra ku̱a̱chi xíʼinñá. Sana xi̱kunda̱a̱va-ini na̱ discípulo xíʼin ña̱ xi̱ndoʼo ñá ñaʼá kán, saáchi tiempo kán xi̱ ixandi̱va̱ʼanína xíʼin na̱ yiví ta kǒo na̱ níxi̱ndakiʼin tu̱ʼunna (Luc. 18:​1-5). Kúnda̱a̱va-iniyó xíʼin ña̱ ndo̱ʼo ñá ñaʼá kán, saáchi sava yichi̱ nda̱a̱ xíʼin miíyó íxandi̱va̱ʼana. Íxandi̱va̱ʼana xíʼinyó ta kúndasína xínina miíyó xa̱ʼa̱ ña̱ ke̱eyó inka ñuu, ña̱ kǒo kéʼéyó táʼan ña̱ kéʼéna á ña̱ kǒo inkáchi íyoyó xíʼinna (Ecl. 5:8). Soo sava yichi̱ iin ta̱ hermano á iin ñá hermana kúú na̱ íxandi̱va̱ʼa xíʼinyó ta xa̱ʼa̱ ña̱kán ndákavaní-iniyó. Na̱yóʼo kǒo sásivína nu̱úyó ña̱ ndasakáʼnuyó Ndióxi̱, soo xa̱ʼa̱ ña̱ kúúna na̱ yiví ku̱a̱chi sava yichi̱ íxandi̱va̱ʼana xíʼinyó. Soo ná kotoyó ndáaña ke̱ʼé ta̱ Jesús tá i̱xandi̱va̱ʼana xíʼinra. Tá íxandi̱va̱ʼa na̱ kǒo ndásakáʼnu Jehová xíʼinyó, íxakáʼnuva-iniyó xa̱ʼa̱na ña̱kán saátu kivi ixakáʼnu-iniyó xa̱ʼa̱ na̱ hermanoyó. w24.11 2 párr. 1, 2

Tiempo xi̱naʼá, si̱ta̱váʼa kúú ña̱ xi̱xixiníka na̱ yiví (Gén. 14:18; Luc. 4:4). Xa̱ʼa̱ ña̱ xi̱xixinína si̱ta̱váʼa, tá káʼa̱n Biblia xa̱ʼa̱ inkaka ña̱ʼa ña̱ xi̱xixina káʼa̱nña ña̱ kúúña si̱ta̱váʼa (Mat. 6:11; Hech. 20:​7, nota ña̱ va̱xi nu̱ú Biblia de estudio). Ta saátu si̱ta̱váʼa kúú ña̱ xi̱niñúʼu ta̱ Jesús tá ke̱ʼéra u̱vi̱ milagro ña̱ xíni̱yó xa̱ʼa̱ (Mat. 16:​9, 10). Ná ka̱ʼa̱nyó xa̱ʼa̱ iin milagro ña̱ ke̱ʼéra ña̱ va̱xi nu̱ú Juan capítulo 6. Ku̱a̱ʼání ñuu ni̱xi̱ka na̱ apóstol na̱túʼunna xíʼin na̱ yiví ta xi̱kuni̱na ndakindee̱na, xa̱ʼa̱ ña̱kán nda̱kiʼin ta̱ Jesús ku̱a̱ʼa̱nra xíʼinna xíʼin iin barco loʼo chí nu̱ú mar ña̱ Galilea ña̱ va̱ʼa ku̱ʼu̱nna ndakindee̱na nu̱ú kǒo na̱ yiví yatin ñuu Betsaida (Mar. 6:​7, 30-32; Luc. 9:10). Soo ndi̱ku̱n saá ki̱xaa̱ ku̱a̱ʼání na̱ yiví nu̱ú ndóona ña̱ va̱ʼa kotona ta̱ Jesús, soo kǒo nísa̱a̱víra xíʼinna ta ni va̱ása nítaxírana, saáchi ta̱vára tiempo ña̱ ka̱ʼa̱nra xíʼinna xa̱ʼa̱ Reino Ndióxi̱ ta sa̱ndáʼara na̱ kúúmií kue̱ʼe̱. Xa̱ʼa̱ ña̱ xa̱a̱ ku̱a̱ʼa̱n kúáa, na̱ discípulo ki̱xáʼana ndákanixi̱nína ndáa míí kiʼin ndiʼi na̱ yiví yóʼo ña̱ kuxuna. Savana sana xi̱niʼivana loʼo ña̱ kuxuna soo ku̱a̱ʼánína xi̱niñúʼu ku̱ʼu̱nna satána á kuenna ña̱ kuxuna (Mat. 14:15). w24.12 2 párr. 1, 2

Ta̱ Adán xíʼin ñá Eva kǒo ku̱a̱chi níxi̱kuumiína tá xi̱ndoona nu̱ú iin ñuʼú ña̱ liviní (Gén. 1:27; 2:​7-9). Si̱íníva kundoona ndiʼi tiempo ta ku̱a̱ʼání ña̱ʼa va̱ʼa kuumiína tá níxiniso̱ʼona. Soo su̱ví saáví níkuu, saáchi kǒo níkivika kundoona nu̱ú ñuʼú ña̱ liviní kán ta saátu kǒo níkivika kutakuna ndiʼi tiempo. Kǒo ña̱ va̱ʼaví nísandákoona ndaʼa̱yó. Ña̱ Biblia káʼa̱nña ña̱yóʼo: “Xa̱ʼa̱ iin ta̱a kúú ña̱ ni̱ki̱ʼvi ku̱a̱chi ñuyǐví yóʼo ta xa̱ʼa̱ ku̱a̱chi yóʼo kúú ña̱ xíʼi̱yó, tasaá kúú ña̱ ki̱xáʼa xíʼi̱ ndiʼi na̱ yiví, chi ndiʼina ni̱ki̱ʼvi ku̱a̱chi” (Rom. 5:12). Herencia ña̱ sa̱ndákoo ta̱ Adán ndaʼa̱yó kúú ku̱a̱chi ña̱ kúúmiíyó ta xa̱ʼa̱ ña̱yóʼo ndiʼiyó xíʼi̱. Ña̱ ku̱a̱chi yóʼo íyoña nda̱a̱ táki̱ʼva íyo ña̱ níkáyó ku̱a̱ʼání xu̱ʼún ta nda̱a̱ ni iinyó kǒo kuchiñu chaʼviña (Sal. 49:8). Ta̱ Jesús chi̱táʼanra ku̱a̱chi ña̱ kúúmiíyó xíʼin ña̱ níkáyó (Mat. 6:12; Luc. 11:4). Tá kíʼviyó ku̱a̱chi nda̱a̱ táki̱ʼva íyo na̱ níká nu̱ú Jehová saá íyoyó ta xíniñúʼu chaʼviyóña. Jehová ndu̱kúra ki̱ʼva ña̱ chaʼvira xa̱ʼa̱ ku̱a̱chiyó, chi tá kǒo níkeʼéraña ndiʼiyó kuvi (Rom. 6:7). w25.02 2, 3 párr. 2, 3

Iin chiñu ña̱ ndáyáʼviní kúú ña̱ ku̱ʼu̱nyó natúʼunyó xíʼin na̱ yiví xa̱ʼa̱ reino Ndióxi̱ ta su̱ví ndiʼina kivi keʼé ña̱yóʼo. Tá kúú tá ni̱xi̱yo ta̱ Jesús nu̱ú ñuʼú yóʼo, kǒo nítaxira ña̱ natúʼun na̱ ta̱chí ndi̱va̱ʼa xa̱ʼa̱ ndiʼi ña̱ xi̱keʼéra (Luc. 4:41). Na̱ kúni̱ kee predicación xíʼin na̱ testigo Jehová siʼna xíniñúʼu keʼéna sava ña̱ʼa. ¿Ndáa ki̱ʼva náʼa̱yó ña̱ ndáyáʼviní chiñu ña̱ ta̱xi Ndióxi̱ ndaʼa̱yó? Xíniñúʼu ndiʼi tiempo natúʼunyó xa̱ʼa̱ra xíʼin na̱ yiví. Nda̱a̱ táki̱ʼva ke̱ʼé ta̱ Jesús saá kéʼéyó chi chíndeétáʼanyó xíʼin na̱ yiví ña̱ kunda̱a̱-inina xa̱ʼa̱ Jehová (Mat. 13:​3, 23; 1 Cor. 3:6). Ta na̱ ñuu Ndióxi̱ ndíku̱nna yichi̱ ta̱ Jesús saáchi chíkaa̱nína ndee̱ ña̱ ka̱ʼa̱nna xíʼin na̱ yiví nda̱saa naní Ndióxi̱. Ta ña̱ xíniñúʼuyó ña̱ natúʼunyó xa̱ʼa̱ Ndióxi̱ kúú Biblia ña̱ naní Traducción del Nuevo Mundo, ta xa̱a̱ 270 nu̱ú tu̱ʼun íyoña. w24.04 9 párr. 8, 9

Sava ta̱a ta̱ si̱íní íyo xíʼin ñá síʼi, ndiʼi ki̱vi̱ náʼa̱ra ña̱ kúʼvi̱ní-inira xínirañá xíʼin ña̱ kéʼéra (1 Juan 3:18). Iin ta̱ hermano kivi na̱ʼa̱ra ña̱ kúʼvi̱-inira xínira ñá síʼira tá tíinra ndaʼa̱ñá á tá númirañá. Sava yichi̱ kivi ka̱ʼa̱nra xíʼinñá, “kúni̱níi̱ xínii̱ yóʼó” á “ndáyáʼviníún nu̱úi̱”. Sava yichi̱ kivitu kueenra á satára ña̱ʼa ña̱ kútóoñá kuxuñá á taxitura iin regalo ndaʼa̱ñá ña̱ va̱ʼa na̱ʼa̱ra ña̱ kúʼvi̱-inira xínirañá. Tá kéʼé iin ta̱a ta̱ xa̱a̱ ti̱ndaʼa̱ ña̱yóʼo, saá náʼa̱ra ña̱ íxato̱ʼóra ñá síʼira ta saátu si̱íníka koona. Iin ta̱ xa̱a̱ ti̱ndaʼa̱ náʼa̱ra ña̱ íxato̱ʼóra ñá síʼira tá káʼa̱nra xíʼinñá nda̱chun ndáyáʼviñá nu̱úra ta saátu tá kéʼéra ña̱ʼa ña̱ sákusi̱í-iniñá. Tá kúú, kǒo nándóso-inira taxira tíxa̱ʼvi ndaʼa̱ñá xa̱ʼa̱ ndiʼi ña̱ kéʼéñá ña̱ chíndeétáʼanñá xíʼinra (Col. 3:15). Tá iin ta̱ xa̱a̱ ti̱ndaʼa̱ viíní káʼa̱nra xíʼin ñá síʼira, ñáyóʼo va̱ʼaní kúniñá ta kúnda̱a̱-iniñá ña̱ kúni̱níra xínirañá ta íxato̱ʼórañá. w25.01 11 párr. 15; 13 párr. 16

Nu̱ú ndíʼi Salmo 15 káchiña: “Na̱ kéʼé ña̱yóʼo ni iin yichi̱ va̱ása ndakavana”. Ta̱ ka̱ʼyí ña̱ Salmo yóʼo ni̱ka̱ʼa̱nra ña̱ mií Jehová ta̱xi consejo yóʼo ndaʼa̱yó chi kúni̱ra ña̱ si̱í kooyó. Ta nu̱ú ña̱yóʼo káʼa̱nña xíʼinyó ndáaña xíniñúʼu keʼéyó ña̱ va̱ʼa taxi Jehová bendición ndaʼa̱yó ta saátu ña̱ kundaara miíyó. Ku̱a̱ʼání ña̱ va̱ʼa taxi Jehová ndaʼa̱ na̱ nda̱kú íyo ini xíʼinra. Na̱ ungido ku̱ʼu̱nna chí ndiví ta kán xa̱a̱ i̱xatu̱ʼva ta̱ Jesús nu̱ú koona (Juan 14:2). Ta ndiʼi na̱ kundoo nu̱ú ñuʼú yóʼo, ndakiʼinna bendición ña̱ káʼa̱n Apocalipsis 21:3. Kúsi̱íní-iniyó chi Jehová nda̱kaxinra miíyó ña̱ kooyó migora ta kivi kooyó veʼera ndiʼi tiempo (Sal. 15:​1-5). w24.06 13 párr. 19, 20

Ña̱ Biblia káʼa̱nña xíʼinyó ña̱ kúú Jehová iin Ndióxi̱ ta̱ kúúmií ku̱a̱ʼání ndee̱ ta ndáyáʼviníra. Tá ni̱ya̱ʼa loʼo tiempo ña̱ ke̱e na̱ ñuu Israel chí ñuu Egipto nu̱ú ni̱xo̱ʼvi̱nína, Jehová ni̱na̱ʼa̱ra nu̱úna ña̱ kúúmiíníra ndee̱. Ná ndakanixi̱níyó xa̱ʼa̱ ña̱ ku̱u: ku̱a̱ʼání na̱ israelita nda̱kutáʼanna ndítana xa̱ʼa̱ yuku̱ Sinaí ña̱ va̱ʼa kuniso̱ʼona ña̱ ka̱ʼa̱n Ndióxi̱ xíʼinna ta iin vi̱kó ña̱ tu̱únní nda̱kasiña xi̱ní yuku̱ yóʼo. Tasaá ndeéní ki̱xáʼa táan, ki̱xáʼa kée yi̱ʼma̱ xi̱ní yuku̱ yóʼo, ndeéní ndáʼyi̱ sa̱vi̱ ta kóyo taxa ta saátu ndeéní táku̱ ña̱ tívina ndiki̱ (Éx. 19:​16-18; 24:17; Sal. 68:8). Sana nda̱kanda̱ní-ini na̱ israelita tá xi̱nina ña̱ ni̱na̱ʼa̱ Jehová nu̱úna ña̱ kúúmiíníra ndee̱. Saátu tiempo vitin káʼa̱nyó xíʼin ndiʼi na̱ yiví xa̱ʼa̱ ndee̱ ña̱ kúúmiíra ta saátu xa̱ʼa̱ ña̱ va̱ʼa ña̱ kúúmiíra. Ta inka ki̱ʼva ña̱ kivi keʼéyóña kúú ña̱ ndasakáʼnuyóra xa̱ʼa̱ ña̱ chíndeétáʼanra xíʼinyó ña̱ va̱ʼa keʼéyó sava ña̱ʼa (Is. 26:12). w25.01 2 párr. 2, 3

Tá kúma̱níka xa̱a̱ na̱ ñuu Israel nu̱ú ñuʼú ña̱ ni̱ka̱ʼa̱n Jehová taxira ndaʼa̱na, sava na̱ ta̱a ki̱xáʼana káʼa̱n kúáchina xa̱ʼa̱ chiñu ña̱ ta̱xi Jehová ndaʼa̱ ta̱ Moisés ta ni̱ka̱ʼa̱nna: “Ndiʼiva na̱ ñuu yóʼo kúúna na̱ yi̱i̱ ta su̱ví iinlá ta̱ Moisés, ta Jehová íyora xíʼinna” (Núm. 16:​1-3). Na̱ yi̱i̱ xi̱kuu ndiʼiva na̱ ñuu Israel nu̱ú Jehová, soo miíra nda̱kaxin ta̱ Moisés ña̱ kuniʼira yichi̱ nu̱ú na̱ ñuura. Tá xi̱ka̱ʼa̱n na̱ ñuu Israel ña̱ va̱ása va̱ʼa xa̱ʼa̱ ta̱ Moisés, xa̱ʼa̱ Jehová xi̱ka̱ʼa̱nna ña̱yóʼo. Kǒo níxi̱kiʼinna kuenta xíʼin ña̱ xi̱ka̱ʼa̱n Jehová chi ña̱ xi̱kuni̱na kúú ña̱ kuumiína chiñu á ña̱ ka̱ʼa̱n va̱ʼana xa̱ʼa̱na. Jehová sa̱ndíʼi-xa̱ʼa̱ra na̱ xi̱ka̱ʼa̱n kúáchi xíʼin ndiʼi na̱ xi̱kitáʼan xíʼinna (Núm. 16:​30-35, 41, 49). Ki̱ʼva saá kúu tiempo vitin. Jehová kúndasíra xínira na̱ kǒo xíín kuniso̱ʼo na̱ nda̱kaxinra kuniʼi yichi̱ nu̱ú na̱ ñuura. w24.07 11 párr. 11

Saátu miíyó xíniñúʼu kandíxaníyó Ndióxi̱ nda̱a̱ táki̱ʼva ke̱ʼé na̱ cristiano na̱ chi̱ndaʼá ta̱ Pablo carta nu̱ú. Tiempo ña̱ ndóoyó vitin ku̱a̱ʼání na̱ yiví kǒo kándíxana ña̱ ndiʼi-xa̱ʼa̱ ñuyǐví yóʼo ta nda̱a̱ kúsi̱kindaana miíyó xa̱ʼa̱ ña̱ kándíxayó ña̱yóʼo (2 Ped. 3:​3, 4). Ña̱kán xíniñúʼu kandíxaníyó ña̱ sandíʼi-xa̱ʼa̱ Jehová ñuyǐví yóʼo mií tiempo ña̱ xa̱a̱ nda̱kaxinra ta kandíxaníyó ña̱ kundaara miíyó tiempo saá. Ta saátu xíniñúʼu kandíxaníyó ña̱ xíniñúʼu Jehová, “ta̱ ndixa kúú esclavo ta̱ nda̱kúní-ini ta̱ ndíchiní” ña̱ kuniʼira yichi̱ nu̱úyó tiempo vitin (Mat. 24:45). Ka̱ʼa̱nvana xíʼinyó ndáaña keʼéyó tá ná kixaa̱ ña̱ gran tribulación. Ña̱kán, tiempo vitin kúú ña̱ xíniñúʼu kandíxaníkayó ña̱ káʼa̱n na̱ níʼi yichi̱ nu̱úyó ti̱xin ñuu Jehová. Tá tiempo vitin kǒo xíniso̱ʼoyó ña̱ káʼa̱nna ta kǒo kándíxayóna, ixayo̱ʼvi̱ña xíʼinyó kandíxayó ña̱ ka̱ʼa̱nna xíʼinyó tá ná kundikaa̱ ña̱ gran tribulación. w24.09 11 párr. 11, 12

Su̱ví xa̱ʼa̱ ña̱ kándíxaún Ndióxi̱ kúni̱ kachiña ña̱ saátu na̱ va̱lí se̱ʼún kándíxanara. Xa̱ʼa̱ ña̱kán iin ña̱ va̱ʼava kúúña tá kíxáʼa na̱ va̱lí se̱ʼún ndáka̱tu̱ʼunna táʼan pregunta yóʼo: “¿Nda̱chun va̱ʼa xíni̱i̱ ña̱ ndixa íyo Ndióxi̱? ¿Á kivi kandíxai̱ ña̱ káʼa̱n Biblia?”. Ña̱ Biblia káʼa̱nña xíʼinyó ña̱ ná nandukúyó xa̱ʼa̱ ndiʼi ña̱ʼa tasaá kunda̱a̱-iniyó ndáaña kúú ña̱ nda̱a̱ (Rom. 12:1; 1 Tes. 5:21). Soo, ¿ndáa ki̱ʼva chindeétáʼanndó xíʼin na̱ va̱lí se̱ʼendó ña̱ va̱ʼa kandíxakana Ndióxi̱? Ka̱ʼa̱nndó xíʼinna ña̱ ná nandukúna xa̱ʼa̱ ña̱ sákuaʼayó xa̱ʼa̱ Ndióxi̱, tasaá kotona ña̱ nda̱a̱ kúúña. Tá ndáka̱tu̱ʼun na̱ va̱lí se̱ʼendó ndóʼó, sanáʼa̱ndóna ña̱ nandukúna nu̱ú tutu ña̱ tává na̱ ñuu Ndióxi̱ xa̱ʼa̱ ña̱ kúni̱na kunda̱a̱-inina xa̱ʼa̱. Ta ña̱yóʼo kúú Índice de las publicaciones Watch Tower ta nu̱ú ña̱ Guía de estudio para los testigos de Jehová kivi ki̱ʼvina nu̱ú káʼa̱nña “La Biblia” ta nandukúna ña̱ káʼa̱n “Inspirada por Dios”, ta yóʼo ndani̱ʼína ña̱ káʼa̱n nda̱chun su̱ví ña̱ ndákanixi̱ní na̱ yiví kúú ña̱ níka̱ʼyi̱ nu̱ú Biblia chi ña̱ ndákanixi̱ní Ndióxi̱va kúúña (1 Tes. 2:13). w24.12 14, 15 párr. 4, 5

¿Ndáa ki̱ʼva kundiku̱n na̱ anciano yichi̱ ta̱ Jesús? Ña̱ kivi keʼéna kúú ña̱ sanáʼa̱na na̱ hermano ta chindeétáʼanna xíʼinna. Ta na̱ xíniñúʼu chindeétáʼankana xíʼin kúú na̱ va̱lí ña̱ va̱ʼa keʼéna ku̱a̱ʼáka chiñu ti̱xin ñuu Ndióxi̱. Kǒo xíniñúʼu kundatu na̱ anciano ña̱ viíní ná keʼé na̱ hermano ndiʼi chiñu. Ta saátu xíniñúʼu viíní taxina consejo ndaʼa̱ na̱ va̱lí ta sanáʼa̱nana ndáa ki̱ʼva keʼéna iin chíñu, saátu xíniñúʼu sanáʼa̱nana ña̱ vitá koo inina, ña̱ kundaa-ini inkanana ta saátu ña̱ koo tu̱ʼvana ña̱ chindeétáʼanna xíʼin inkana (1 Tim. 3:1; 1 Ped. 5:5). Kǒo níka̱ʼa̱n kuití ta̱ Jesús xíʼin na̱ discípulora ña̱ natúʼunna xíʼin na̱ yiví xa̱ʼa̱ Ndióxi̱ chi saátu ni̱ka̱ʼa̱nra xíʼinna ña̱ sanáʼa̱nana. Sana nda̱kanixi̱nína ña̱ kǒo kuchiñuna keʼéna chiñu yóʼo. Soo ta̱ Jesús xi̱kunda̱a̱-inira ña̱ kuchiñuvana ta nda̱a̱ ni̱ka̱ʼa̱nra xíʼinna: “Nda̱a̱ táki̱ʼva chi̱ndaʼá yivái̱ yi̱ʼi̱, saátu yi̱ʼi̱ chíndaʼíi̱ ndóʼó” (Juan 20:21). w24.10 16 párr. 15; 17 párr. 17

Iin rey ta̱ va̱ʼaní xi̱kuu ta̱ David, saáchi va̱ʼaní xi̱ndasakáʼnura Jehová, xi̱sakáʼara yaa, xi̱taaraña, xi̱xaʼa̱nra nu̱ú ku̱a̱chi ta saátu xi̱kuura profeta. Ta saátu ku̱a̱ʼání tu̱ndóʼo ni̱ya̱ʼara nu̱ú. Ku̱a̱ʼání ku̱i̱ya̱ xi̱xinura xi̱xikara nu̱ú ta̱ rey Saúl. Tá xa̱a̱ kúúra rey, xi̱nura ku̱a̱ʼa̱nra, saáchi se̱ʼera ta̱ Absalón xi̱kuni̱ra kaʼnírara chi xi̱kuni̱ra koora rey. Soo ni ke̱ʼé ta̱ David ku̱a̱ʼání ña̱ va̱ása va̱ʼa ta ni̱ya̱ʼara nu̱ú ku̱a̱ʼání tu̱ndóʼo, nda̱kúva ni̱xi̱yo inira xíʼin Jehová nda̱a̱ tá ni̱xi̱ʼi̱ra. Jehová ni̱ka̱ʼa̱nra ña̱ xi̱sakúsi̱íní ta̱ David inira. Ña̱kán xíniñúʼu kuniso̱ʼoyó consejo ña̱ ta̱xi ta̱ David (1 Rey. 15:5). Ná ka̱ʼa̱nyó xa̱ʼa̱ ña̱ ni̱ka̱ʼa̱n ta̱ David xíʼin se̱ʼera ta̱ Salomón. Jehová nda̱kaxinra ta̱ Salomón ña̱ chindeétáʼanra xíʼin na̱ ñuu ña̱ sakúaʼana xa̱ʼa̱ Jehová ta saátu ña̱ ixava̱ʼara iin templo (1 Crón. 22:5). Ku̱a̱ʼáníva tu̱ndóʼo ya̱ʼa ta̱ Salomón nu̱ú, ña̱kán ná kotoyó ndáa consejo ta̱xi ta̱ David ndaʼa̱ra. Ta̱ David ni̱ka̱ʼa̱nra xíʼin se̱ʼera ta̱ Salomón, ña̱ kuniso̱ʼora ndiʼi ña̱ káʼa̱n Jehová xíʼinra tasaá vií kana ndiʼi ña̱ keʼéra (1 Rey. 2:2,3). w24.11 10 párr. 9-11

Iin ta̱a ta̱ káni ñá síʼi á káʼa̱n-ndi̱va̱ʼara xíʼinñá, xíniñúʼu chikaa̱ra ndee̱ ña̱ ndakutáʼan viíra xíʼinñá ta saátu xíʼin Jehová. Ña̱ nu̱ú, xíniñúʼu ndakunira ña̱ kúúmiíra iin ku̱a̱chi ndeé. Saáchi Jehová xítovara ndiʼi ña̱ kúu ta kǒo nda̱a̱ ni iin ña̱ʼa íyo se̱ʼé nu̱úra (Sal. 44:21; Ecl. 12:14; Heb. 4:13). Ña̱ u̱vi̱, xíniñúʼu sandákoora ña̱ ixandi̱va̱ʼara xíʼin ñá síʼira ta saátu xíniñúʼu nasamara ki̱ʼva ña̱ kéʼéra (Prov. 28:13). Ña̱ u̱ni̱, xíʼin ndinuʼu-inira xíniñúʼu ndukúra ña̱ káʼnu-ini nu̱ú ñá síʼira xa̱ʼa̱ ña̱ ke̱ʼéra xíʼinñá ta saátu xíniñúʼu ka̱ʼa̱nra xíʼin Jehová ña̱ ixakáʼnu-inira xa̱ʼa̱ra (Hech. 3:19). Xíniñúʼu ka̱ʼa̱n-ndáʼvira xíʼin Jehová ña̱ ná chindeétáʼanra xíʼinra ña̱ kiʼinra kuenta xíʼin ña̱ ndákanixi̱níra, ña̱ káʼa̱nra xíʼin ña̱ kéʼéra ta saátu xíniñúʼu ka̱ʼa̱nra xíʼin Jehová ña̱ chindeétáʼanra xíʼinra ña̱ nasamara ki̱ʼva ña̱ íyora (Sal. 51:​10-12; 2 Cor. 10:5; Filip. 2:13). Ña̱ ku̱mí, xíniñúʼu keʼéra nda̱a̱ táki̱ʼva íyo ña̱ ni̱ka̱ʼa̱nra xíʼin Jehová tá ke̱ʼéra oración, saátu xíniñúʼu chikaa̱ra ndee̱ ña̱ kǒo ka̱ʼa̱nra tu̱ʼun ña̱ sáxo̱ʼvi̱-ini ñá síʼira ta kǒo xíniñúʼu keʼétura inkaka ña̱ʼa ña̱ ixandi̱va̱ʼara xíʼinñá (Sal. 97:10). Ña̱ u̱ʼu̱n, ndi̱ku̱n kama xíniñúʼu ka̱ʼa̱nra xíʼin na̱ anciano ti̱xin congregación ña̱ ná chindeétáʼanna xíʼinra saáchi na̱yóʼo kúʼvi̱ní-inina xíninara (Sant. 5:​14-16). Ña̱ i̱ñu̱, xíniñúʼu kaʼyira ndiʼi ña̱yóʼo ña̱ va̱ʼa chindeétáʼanña xíʼinra ña̱ kǒo ndikó tukura keʼéra ña̱ va̱ása va̱ʼa. w25.01 11 párr. 14

¿Á kúʼvi̱-iniún xíniún Jehová ta̱ ta̱xi ña̱ tákún xíʼin ndiʼika ña̱ sákusi̱í-iniún? ¿Á kúni̱ún na̱ʼún ña̱ kúʼvi̱-iniún xíniúnra? Iin ki̱ʼva ña̱ va̱ʼaní na̱ʼún ña̱yóʼo kúú ña̱ ndataxiún miíún ndaʼa̱ra ta ndakuchiún. Tá ná keʼún ña̱yóʼo, saá xa̱ún koún táʼan na̱ veʼe Jehová ta saátu xa̱ún koún kuenta miíra. Ta xa̱ʼa̱ ña̱ koún migora kuniʼira yichi̱ nu̱ún ta kundaara yóʼó (Sal. 73:24; Is. 43:​1, 2). Ta saátu tá ná ndataxiún miíún ndaʼa̱ra ta ndakuchiún kivi xa̱ún ndakiʼún ña̱ kutakún ndiʼi tiempo (1 Ped. 3:21). Sana íyo sava ña̱ íxayo̱ʼvi̱ xíʼún ña̱ xa̱ún ndakuchiún, soo kǒo kundi̱ʼi-iniún chi su̱ví iinlá yóʼó ndóʼo saá. Saátu ku̱a̱ʼání na̱ yiví xi̱niñúʼu nasamana ña̱ kéʼéna xíʼin ña̱ ndákanixi̱nína ña̱ va̱ʼa xa̱a̱na ndakuchina ta vitin kúsi̱íní-inina káchíñuna nu̱ú Jehová. w25.03 2 párr. 1, 2

Biblia káʼa̱nña, ku̱a̱chi ña̱ kíʼviyó íyoña nda̱a̱ táki̱ʼva íyo ña̱ʼa ña̱ ve̱ení ndísoyó. Tá kúú ta̱ rey David ni̱ka̱ʼa̱nra: “Ña̱ va̱ása va̱ʼa ke̱ʼíi̱ sándi̱ʼiníña-inii̱; táki̱ʼva íyo iin ña̱ʼa ña̱ ve̱ení ndísoi̱ saá íyoña nu̱úi̱” (Sal. 38:4). Soo Salmo 25:18 xíʼin 32:5 káʼa̱nña ña̱ íxakáʼnuva-ini Jehová xa̱ʼa̱ na̱ ndándikó-ini xa̱ʼa̱ ku̱a̱china. Nu̱ú versículo yóʼo, tu̱ʼun hebreo ña̱ xíniñúʼuna ña̱ sándaya̱ʼana ña̱ tu̱ʼun “ixakáʼnu-ini” kúni̱ kachiña ña̱ “ndakiʼinnaña” ku̱ʼu̱n xíʼinna á ña̱ “ndaniʼinaña”. Jehová ndakúníra ña̱kán ni ve̱ení ku̱a̱chi ña̱ ndísoyó, va̱ʼa ndákiʼinraña á sáku̱taʼaraña sa̱táyó. ¿Ndáa míí xáʼa̱n Jehová ndákoora ku̱a̱chiyó? Nu̱ú Salmo 103:12 ndáni̱ʼíyó inka ña̱ chíndeétáʼan xíʼinyó ña̱ va̱ʼa kunda̱a̱-iniyó xa̱ʼa̱ña, nu̱ú Salmo yóʼo káchiña: “Nda̱a̱ táki̱ʼva xíká kíndo̱o nu̱ú kána ñu̱ʼu xíʼin nu̱ú kíʼviña, saá xíká ndákoora ku̱a̱chiyó”. Nu̱ú kána ñu̱ʼu á ña̱ ka̱ndii xíkání kíndo̱oña chí nu̱ú kíʼviña. Ña̱kán versículo yóʼo sánáʼa̱ña miíyó ña̱ tá íxakáʼnu-ini Jehová xa̱ʼa̱yó xíkání ku̱a̱ʼa̱nra xíʼin ku̱a̱chiyó ta va̱ʼaní kúniyó ña̱ kúnda̱a̱-iniyó xa̱ʼa̱ ña̱yóʼo. w25.02 9 párr. 5, 6

Ta̱ apóstol Pedro sa̱kúaʼara vitá koo inira nda̱a̱ táki̱ʼva ni̱xi̱yo ta̱ Jesús. Tá xa̱a̱ ndi̱kó ta̱ Jesús chí ndiví, ta̱ Pedro ke̱ʼéra iin milagro ta sa̱ndáʼara iin ta̱a ta̱ va̱ása níxi̱kivi kaka nani tá ka̱kura (Hech. 1:​8, 9; 3:​2, 6-8). Xa̱ʼa̱ ña̱ káʼnuní milagro ke̱ʼéra, ku̱a̱ʼání na̱ yiví nda̱kanda̱-ini xíʼin ña̱yóʼo (Hech. 3:11). ¿Ndáaña ke̱ʼé ta̱ Pedro xa̱ʼa̱ ña̱yóʼo? Ná ndakaʼányó chi tá tiempo ña̱ ni̱xi̱yo ta̱ Pedro xi̱ndayáʼviní ña̱ kindo̱o va̱ʼa iinna nu̱ú na̱ yiví. Xa̱ʼa̱ ña̱kán, ¿á xi̱kuni̱ ta̱ Pedro kindo̱o va̱ʼara nu̱ú na̱ yiví xa̱ʼa̱ ña̱ ke̱ʼéra milagro yóʼo? Va̱ásaví, saáchi vitá ni̱xi̱yo inira ta ni̱ka̱ʼa̱nra ña̱ mií Jehová xíʼin ta̱ Jesús kúú na̱ chi̱ndeétáʼan xíʼinra ña̱ ke̱ʼéra ña̱yóʼo. Ta ña̱yóʼo kúú ña̱ ni̱ka̱ʼa̱nra xa̱ʼa̱ ta̱ Jesús: “Xa̱ʼa̱ ki̱vi̱ ta̱ Jesús xíʼin xa̱ʼa̱ ña̱ kándíxandi̱ ki̱vi̱ra kúú ña̱ va̱ʼa nda̱ʼa ta̱a ta̱ xítondó yóʼo ta̱ xíni̱ndó” (Hech. 3:​12-16). Saátu miíyó kivi sakúaʼayó vitá koo iniyó nda̱a̱ táki̱ʼva ke̱ʼé ta̱ Pedro. Xa̱ʼa̱ ña̱ kúʼvi̱-iniyó xíniyó Jehová ta saátu na̱ yiví kúú ña̱ chíndeétáʼanyó xíʼinna, ta su̱ví xa̱ʼa̱ ña̱ kúni̱yó kindo̱o va̱ʼayó nu̱úna kúúña. Tá kúsi̱í-iniyó káchíñuyó nu̱ú Jehová ta chíndeétáʼanyó xíʼin na̱ hermano, va̱ása kundatuvíyó ña̱ ná koto inkana ña̱ kéʼéyó chi saá na̱ʼa̱yó ña̱ vitá íyo iniyó (Mat. 6:​1-4). w25.03 10, 11 párr. 11, 12

Kusi̱íka-iniyó keeyó predicación tá ná kuʼvi̱ka-iniyó kuniyó Jehová xíʼin na̱ yiví (Mat. 22:​37-39). Kúsi̱íní-ini Jehová tá xítora ña̱ nátúʼunyó xa̱ʼa̱ra xíʼin na̱ yiví ta saátu kúsi̱íní-ini na̱ yiví tá sákuaʼana xa̱ʼa̱ra. Ta ná ndakaʼányó chi ndiʼi na̱ sákuaʼa xa̱ʼa̱ Jehová ka̱kuna (Juan 6:40). Soo, ¿ndáaña kivi keʼún tá kǒo kívi keeún natúʼún xíʼin na̱ yiví xa̱ʼa̱ Ndióxi̱? Ndakanixi̱ní ndáaña kivi keʼún ña̱ va̱ʼa na̱ʼún ña̱ kúʼvi̱-iniún xíniún Jehová xíʼin na̱ yiví. Tá xi̱ndikaa̱ COVID-19, ta̱ Samuel xíʼin ñá Dania kǒo níkivi keena veʼena, ña̱kán tiempo saá xi̱natúʼunna xíʼin na̱ yiví xíʼin teléfono, xi̱kaʼyína carta ta saátu xi̱xiniñúʼuna Zoom tá xi̱kaʼvína xíʼinna. Kǒo níxi̱kuchiñu keʼé ta̱ Samuel xíʼin ñá Dania ku̱a̱ʼání ña̱ʼa, soo xi̱chikaa̱vana ndee̱ ña̱ natúʼunna xa̱ʼa̱ Ndióxi̱ ta xa̱ʼa̱ ña̱yóʼo xi̱kusi̱íní-inina. w24.04 18 párr. 15, 16

Kǒo xíniñúʼu tindaʼa̱víyó ña̱ va̱ʼa si̱í kooyó, soo ku̱a̱ʼání na̱ hermano xíʼin ná hermana na̱ xa̱a̱ síín síín ku̱i̱ya̱ kúni̱vana tindaʼa̱na. Soo tá kúni̱ún tindaʼún siʼna xíniñúʼu kiʼún kuenta á kúúmiíún loʼo xu̱ʼún, á vií kítáʼún xíʼin Jehová ta saátu á va̱ʼa kúniún (1 Cor. 7:36). Siʼna ndakanixi̱níún ndáa ki̱ʼva kúni̱ún koo na̱ tindaʼa̱ xíʼún. Saáchi sana íyova iin na̱ va̱ʼaní ti̱ndaʼa̱ xíʼún, soo tá kǒo kíʼún kuenta kivi kixáʼún kakaún xíʼin na̱ kǒo chindeétáʼan xíʼún ña̱ ndasakáʼnún Ndióxi̱. Soo xíniñúʼu ndaka̱xiún iin ta̱ hermano á iin ñá hermana na̱ xa̱a̱ nda̱kuchi ña̱ kakana xíʼún (1 Cor. 7:39). Soo su̱ví ña̱yóʼo kúni̱ kachiña ña̱ xa̱ʼa̱ ña̱ nda̱kuchina kivi tindaʼún xíʼinna. Saáchi xíniñúʼu kiʼún kuenta xíʼin ña̱yóʼo: ¿Ndáaña kúú meta ña̱ kúúmiíi̱? ¿Ndáa ki̱ʼva kúnii̱ ná koo na̱ tindaʼa̱ xíʼi̱n? ¿Á ku̱a̱ʼání ña̱ʼa kúni̱na kuumiína? w24.05 20 párr. 1; 21 párr. 3

¿Ndáaña kivi keʼéna tá íyo ku̱a̱chi nu̱úna á tá va̱ása inkáchi íyo ña̱ ndákanixi̱nína? ¿Á ña̱yóʼo kúni̱ kachiña ña̱ su̱ví na̱kán kúú na̱ tindaʼa̱ xíʼinna? Su̱ví ña̱kán kúni̱ kachiña chi ndiʼivana íyo tu̱ndóʼo nu̱ú. Iin na̱ matrimonio kivi va̱ʼaní kutáʼanna tá chíkaa̱na ndee̱ ña̱ ndasaviína ku̱a̱chi ña̱ kúúmiína. Tá xa̱a̱ vitin ña̱ xíka xíʼin táʼanna xíni̱na ndáa ki̱ʼva ndasaviína ku̱a̱chi ña̱ kúúmiína, saátu ndasaviína ku̱a̱chi ña̱ kúúmiína tá xa̱a̱ ná tindaʼa̱na. Ndakanixi̱níndó xa̱ʼa̱ ña̱yóʼo. “Tá xa̱a̱ kúu iin ku̱a̱chi, ¿á vií káʼa̱n xíʼin táʼanndi̱? ¿Á to̱ʼó káʼa̱n xíʼin táʼanndi̱? ¿Á ndákunindi̱ ku̱a̱chindi̱ ta chíkaa̱ndi̱ ndee̱ ña̱ kǒo keʼékandi̱ña? ¿Á xáʼnu̱-inindi̱ ta ndúkundi̱ ña̱ káʼnu-ini nu̱ú táʼanndi̱ ta saátu á íxakáʼnu-inindi̱ xa̱ʼa̱ táʼanndi̱?” (Efes. 4:31). Soo, tá ndiʼi tiempo ndáʼyi̱ nu̱ú táʼanndó, saátu keʼéndó tá ná tindaʼa̱vandó. Tá kíʼún kuenta ña̱ va̱ása va̱ʼa íyo ña̱ kéʼé na̱ xíkaún xíʼin, va̱ʼaka sandákoo táʼanndó ta kǒo tindaʼa̱ndó. w24.05 29 párr. 12

Ndiʼi tiempo keʼéndó ña̱ káʼa̱n Jehová xíʼinndó. Tá ndiʼi tiempo xíniso̱ʼoyó ña̱ káʼa̱n Jehová ta vií íyo ña̱ ndáka̱xinyó keʼéyó saá kúú ña̱ chinúuyó iin yichi̱ va̱ʼaní nu̱ú na̱ hermano. Tá káʼviyó Biblia ndiʼi ki̱vi̱ saá kúú ña̱ va̱ʼaníka kandíxayó Jehová ta va̱ʼaní kitáʼanyó xíʼinra. Ña̱yóʼo chindeétáʼan xíʼinyó ña̱ kǒo kaka-iniyó ta kǒo taxiyó saká na̱ yiví xi̱níyó (Efes. 4:14; Sant. 1:​6-8). Ta saátu kivi chindeétáʼanyó xíʼin na̱ yáʼa nu̱ú tu̱ndóʼo (1 Tes. 3:​2, 3). Ná kiʼinní na̱ anciano kuenta xíʼin ña̱ kéʼéna, chi xíniñúʼu viíní ndakanixi̱nína, nda̱kúní ná koo ña̱ keʼéna ta ná kǒo ndakanixi̱nína ña̱ nina ña̱ káʼa̱n miína xíniñúʼu keʼé na̱ hermano. Xíniñúʼu viíní kuniñúʼuna tu̱ʼun Ndióxi̱ ña̱ sanáʼa̱na na̱ hermano (Tito 1:9; 1 Tim. 3:​1-3). Tá va̱ʼaní ejemplo chínúuna nu̱ú na̱ hermano ta kéʼéna visita ña̱ pastoreo xíʼin na̱ publicador saá kúú ña̱ va̱ʼaní chíndeétáʼanna xíʼinna ña̱ ku̱ʼu̱nna reunión, ña̱ keena predicación xíʼin ña̱ ndiʼi ki̱vi̱ kaʼvina tu̱ʼun Ndióxi̱. Tá yáʼa na̱ hermano nu̱ú tu̱ndóʼo ña̱ sándi̱ʼi̱ní-inina, na̱ anciano chíndeétáʼanna xíʼinna ña̱ ndakaʼánna xa̱ʼa̱ ña̱ káʼa̱n Jehová keʼéra chí nu̱únínu. w24.06 31 párr. 16-18

Tá ni̱xi̱ka ta̱ Jesús na̱túʼunra xíʼin na̱ yiví sa̱náʼa̱rana ña̱ íxakáʼnu-ini yivára xa̱ʼa̱ na̱ kíʼvi ku̱a̱chi. Na̱túʼunra xa̱ʼa̱ iin ta̱a xíʼin se̱ʼera. Ta̱ loʼo yóʼo sa̱ndákoora veʼera ta ki̱xáʼara kéʼéra ña̱ va̱ása va̱ʼa, soo tá ni̱ya̱ʼa tiempo ki̱xáʼara vií ndákanixi̱níra ta ndi̱kóra nu̱ú yivára. ¿Ndáaña ke̱ʼé yivára? Ta̱ Jesús ni̱ka̱ʼa̱nra “Tá xíkáka va̱xira xi̱ni yivárara, ta xínura ni̱xa̱ʼa̱nra nda̱a̱ nu̱ú va̱xi ta̱ loʼo kán ta nu̱mirara ta chi̱tóra nu̱úra”. Ta̱ loʼo yóʼo xi̱kuni̱ra ka̱ʼa̱nra xíʼin yivára ña̱ ná taxira ña̱ kachíñundáʼvira nu̱úra. Soo xi̱kuni̱níva yivá ta̱ loʼo yóʼo ixakáʼnu-inira xa̱ʼa̱ra ta ndakiʼin tukurara koora xíʼinra. Ka̱chira: “Ta̱ loʼo se̱ʼi̱ yóʼo [...] ta̱ nda̱ñúʼu kúúra soo nda̱ni̱ʼíyóra” (Luc. 15:​11-32). Tá kúma̱níka kixi ta̱ Jesús nu̱ú ñuʼú yóʼo xi̱nira ña̱ ku̱a̱ʼání yichi̱ i̱xakáʼnu-ini Jehová xa̱ʼa̱ na̱ xi̱kiʼvi ku̱a̱chi tá xi̱ndikó-inina. Ejemplo ña̱ ni̱ka̱ʼa̱n ta̱ Jesús xa̱ʼa̱, va̱ʼaní sándi̱koña-iniyó ta náʼa̱ña nu̱úyó ña̱ kúndáʼviní-ini Jehová xínira miíyó. w24.08 11 párr. 11, 12

Viíní xíniñúʼu koo ña̱ ndaka̱xinyó keʼéyó tasaá na̱ʼa̱yó ña̱ ndákanixi̱níyó nda̱a̱ táki̱ʼva ndákanixi̱ní Jehová. Saátu kúni̱ kachiña ña̱ xíniñúʼu kundayáʼvika nu̱úyó kúú ña̱ kutáʼan viíyó xíʼin Jehová. Tá vií ndákanixi̱níyó, va̱ása ndakanixi̱níyó ña̱ xíni̱yó xa̱ʼa̱ ndiʼi ña̱ʼa chi kiʼinvayó kuenta xíʼin ña̱ kéʼéyó. Ta ndiʼi tiempo xíniñúʼu ka̱ʼa̱nyó xíʼin Jehová ña̱ ná kuniʼira yichi̱ nu̱úyó. Kúnda̱a̱-iniyó ña̱ ndiʼi tiempo xíniñúʼu ka̱ʼa̱n ni̱ʼiyó xíʼin Jehová ña̱ va̱ʼa ná kuniʼira yichi̱ nu̱úyó ni tá xíniñúʼu keʼéyó iin ña̱ʼa ña̱ túviyó va̱ása yo̱ʼvi̱ keʼéyó. Tá xíniñúʼu ndaka̱xinyó iin ña̱ ndáyáʼviní keʼéyó, xíniñúʼu ka̱ʼa̱n ni̱ʼiyó xíʼinra ña̱ ná chindeétáʼanra xíʼinyó saáchi kúnda̱a̱-iniyó ña̱ miíra xíni̱ ndáaña kúú ña̱ va̱ʼaka chindeétáʼan xíʼinyó. Táxiníyó tíxa̱ʼvi ndaʼa̱ Jehová saáchi va̱ʼaní i̱xava̱ʼara miíyó ta va̱ʼa náʼa̱yó ña̱ va̱ʼa ña̱ kúúmiíra (Gén. 1:26). Soo xa̱ʼa̱ ña̱ kúúyó na̱ yiví ku̱a̱chi kúnda̱a̱-iniyó ña̱ va̱ása kíviví keʼéyó nda̱a̱ táki̱ʼva kéʼéra (Is. 55:9). w25.03 11 párr. 13; 13 párr. 17, 18

Vií ndakanixi̱níún xa̱ʼa̱ inkana. Tá kéʼéyó ña̱ʼa xa̱ʼa̱ inkana ta kǒo káʼa̱nna ni iin ña̱ʼa xíʼinyó kivi ndakanixi̱níyó: “¿Á kǒo ndáyáʼvi ña̱ kéʼíi̱ xa̱ʼa̱na? ¿Á na̱ndósó-inina taxina tíxa̱ʼvi ndaʼíi̱? ¿Á sana íyo ña̱ ndóʼovana ña̱kán kǒo nítaxina tíxa̱ʼvi ndaʼíi̱?”. Sana ndáyáʼviníva ña̱ ke̱ʼéyó nu̱úna, soo kǒo xíni̱na ndáa ki̱ʼva ka̱ʼa̱nna xa̱ʼa̱ ña̱yóʼo xíʼinyó. Sana kúkaʼan nu̱úna ña̱ chindeétáʼan inkana xíʼinna chi sana tá ya̱chi̱ va̱ʼa xi̱keʼéna ña̱ʼa xa̱ʼa̱ inkana, soo vitin kǒo kívika keʼénaña. Nda̱a̱ ndáaka ña̱ kúu, xa̱ʼa̱ ña̱ kúʼvi̱-iniyó xíniyóna chíndeétáʼanvayó xíʼinna ta kusi̱í-iniyó keʼéyóña (Efes. 4:2). Kǒo kundatún ña̱ kamaní taxina tíxa̱ʼvi ndaʼún. Ta̱ rey Salomón ni̱ka̱ʼa̱nra ña̱ ndáyáʼviní va̱ʼa koo iniyó xíʼin inkana, ta ni̱ka̱ʼa̱nra: “Chikaa̱ si̱táva̱ʼún nu̱ú ti̱kui̱í, chi tá ná ya̱ʼa ku̱a̱ʼá ki̱vi̱ ndani̱ʼívaúnña” (Ecl. 11:1). Tu̱ʼun yóʼo sánáʼa̱ña miíyó ña̱ sava na̱ yiví sana taxivana tíxa̱ʼvi ndaʼa̱yó tá xa̱a̱ ná ya̱ʼa ku̱a̱ʼá ki̱vi̱. w24.09 30 párr. 18, 19

Sava yichi̱ táxina anuncio ti̱xin congregación xa̱ʼa̱ iin na̱ hermano ña̱ íyo censurado na̱yóʼo. Kiviva kutáʼanyó xíʼinna saáchi nda̱ndikó-inina ta va̱ása kíʼvikana ku̱a̱chi. Na̱yóʼo ndíkaa̱kavana xíʼinyó ti̱xin congregación ta xíniñúʼu chindeétáʼanyó xíʼinna ña̱ keʼéna ña̱ va̱ʼa (Heb. 10:​24, 25). Soo síínva kúu tá távána iin yiví ti̱xin congregación. Saáchi va̱ása kivi kutáʼankayó xíʼin na̱yóʼo ta ni va̱ása kivi kuxuyó xíʼinna (1 Cor. 5:11). ¿Á kúni̱ kachi ña̱yóʼo ña̱ tá távána iin na̱ yiví ti̱xin congregación ni loʼoví va̱ása xíniñúʼu ka̱ʼa̱nyó xíʼinna? Va̱ásaví. Xa̱a̱ kúnda̱a̱va-iniyó ña̱ va̱ása xíniñúʼu kutáʼanyó xíʼinna. Soo xa̱ʼa̱ ña̱ xa̱a̱ sákuaʼayó nu̱ú Biblia iin tá iinyó kivi ndaka̱xinyó á ka̱ʼa̱nyó xíʼin na̱ ta̱vána ti̱xin congregación ña̱ ku̱ʼu̱nna reunión, kúúna na̱ veʼeyó á iin na̱ migoyó. w24.08 30 párr. 13, 14