Febrero

Na̱ hermano na̱ va̱ʼaní kéʼé ña̱ káʼa̱n Ndióxi̱, kúúna iin bendición ti̱xin congregación. Ta̱ hermano ta̱ kúú anciano kǒo xíniñúʼu ndakanixi̱níra ña̱ xíniñúʼu keʼéna nda̱saa ña̱ káʼa̱n mií kuitíra, saáchi chíndeétáʼanra xíʼin inkana ña̱ vií kutáʼanna. Ña̱kán ña̱ kivi keʼún kúú ña̱ kuniso̱ʼún ña̱ káʼa̱n inkana ta kǒo kundatún ña̱ keʼéna ña̱ kúni̱ miíún. Tá kúú ndakanixi̱ní ña̱ kúúmiíún reunión na̱ anciano, ta inka na̱ anciano ndáka̱xinna inka ña̱ʼa soo kǒo kíndo̱o-iniún xíʼinña, ¿ndáaña kivi keʼún? ¿Á keʼún ña̱ nda̱kaxinna? Ndakaʼán chi iin ta̱ anciano va̱ása xíniñúʼu ndakanixi̱níra ña̱ nina ña̱ káʼa̱n miíra xíniñúʼu keʼéna, saáchi ndákunira ña̱ va̱ʼaníkava kána iin chiñu tá ku̱a̱ʼána táxi consejo (Gén. 13:​8, 9; Prov. 15:22). Nu̱úka ña̱ kue̱ʼe̱ní koora, va̱ʼaka vií ná ka̱ʼa̱nra xíʼin na̱ hermano ta va̱ʼa koo-inira xíʼinna. Tá íyo iin na̱ kéʼé ña̱ va̱ása va̱ʼa xíʼinra ndi̱ku̱n ndásaviíra ku̱a̱chi xíʼinna chi kǒo kútóora ku̱a̱chi (Sant. 3:​17, 18). To̱ʼó káʼa̱nra xíʼin na̱ yiví, ta tá káʼa̱nna xíʼinra ña̱ su̱ví ña̱ ndixa kúú ña̱ kándíxara Ndióxi̱, vií ndákuiinra yuʼúna tasaá ndíʼi ku̱a̱chi (Juec. 8:​1-3; Prov. 25:15; Mat. 5:​23, 24). w24.11 23 párr. 13

Iinva yichi̱ ni̱xi̱ʼi̱ ta̱ Cristo soo íyokava ña̱ kéʼéra xa̱ʼa̱yó (Rom. 6:10). Tá kúú, ndákundeéra káchíñura xa̱ʼa̱yó ña̱ va̱ʼa ni̱ʼíyó ku̱a̱ʼání ña̱ va̱ʼa xa̱ʼa̱ ña̱ ni̱xi̱ʼi̱ra xa̱ʼa̱yó. Ná ndakanixi̱níyó xa̱ʼa̱ ndiʼi ña̱ kéʼéra xa̱ʼa̱ ña̱ kúúra Rey, su̱tu̱ káʼnu ta saátu xa̱ʼa̱ ña̱ níʼira yichi̱ nu̱ú na̱ congregación (1 Cor. 15:25; Efes. 5:23; Heb. 2:17). Kúúmiíra chiñu ña̱ sandátakara na̱ ku̱ʼu̱n chí ndiví ta saátu na̱ kundoo nu̱ú ñuʼú yóʼo ta sandíʼira keʼéra chiñu yóʼo tá kúma̱níka ndiʼi ña̱ gran tribulación (Mat. 25:32). Ta saátu tiempo so̱ndíʼi ña̱ ndóoyó vitin táxira ña̱ xíniñúʼuyó ña̱ va̱ʼa ndakundeéyó kachíñuyó nu̱ú Jehová ta sakúaʼayó xa̱ʼa̱ra (Mat. 24:45). Tá ná kaʼndachíñura ti̱xin ña̱ mil ku̱i̱ya̱ ndakundeévara chindeétáʼanra xíʼinyó. Ña̱kán tá ta̱xi Jehová se̱ʼera, va̱ása nítaxi kuitírara ña̱ kuvira xa̱ʼa̱yó chi saátu ta̱xirara ña̱ va̱ʼa keʼéra inkaka ña̱ʼa xa̱ʼa̱yó. w25.01 24 párr. 12

Tá íxakáʼnu-ini Jehová xa̱ʼa̱yó, ndóo ku̱a̱chiyó ta kǒo ndákaʼánkara xa̱ʼa̱ña. Xa̱ʼa̱ ña̱yóʼo kivi kutáʼan va̱ʼa tukuyó xíʼinra. Ta ná ndakaʼányó chi iin regalo ña̱ va̱ʼaní ña̱ táxi Jehová ndaʼa̱yó kúú ña̱ íxakáʼnu-inira xa̱ʼa̱yó saáchi kúni̱níra xínira miíyó. Ni kúúyó na̱ yiví ku̱a̱chi, va̱ʼaní-inira xíʼinyó. Táxiníyó tíxa̱ʼvi ndaʼa̱ Jehová chi ndixa íxakáʼnu-inira xa̱ʼa̱yó (Sal. 130:4; Rom. 4:8). Soo tá kúni̱yó ña̱ ixakáʼnu-ini Jehová xa̱ʼa̱yó xíniñúʼu kuniso̱ʼoyó ña̱ ni̱ka̱ʼa̱n ta̱ Jesús tá ka̱chira: “Tá kǒo íxakáʼnu-inindó xa̱ʼa̱ ku̱a̱chi inkana, yivándó ta̱ íyo chí ndiví va̱ása ixakáʼnu-inira xa̱ʼa̱ ku̱a̱chindó” (Mat. 6:​14, 15). Ña̱kán xíniñúʼu ixakáʼnu-iniyó xa̱ʼa̱ inkana nda̱a̱ táki̱ʼva kéʼé Jehová. w25.02 13 párr. 18, 19

Ta, ¿ndáaña kivi ka̱ʼa̱nyó xa̱ʼa̱ na̱ yiví na̱ xi̱ndoo ñuu Sodoma xíʼin Gomorra? Xíni̱yó ña̱ ñuu kán ni̱xi̱yo ta̱ Lot ta̱ nda̱kúní ni̱xi̱yo-ini xíʼin Jehová. Soo kǒo xíni̱yó á na̱túʼunra xíʼin ndiʼi na̱ yiví na̱ ni̱xi̱yo ñuu kán xa̱ʼa̱ Jehová. Biblia káʼa̱nña ña̱ kininí xi̱keʼé na̱ yiví na̱ ni̱xi̱yo ñuu kán. Soo, ¿á xi̱kunda̱a̱-ini ndiʼina ndáaña kúú ña̱ va̱ʼa ta ndáaña kúú ña̱ va̱ása va̱ʼa? Sana va̱ásaví, saáchi Biblia káʼa̱nña ña̱ iin tiʼvi na̱ ta̱a na̱ ñuu Sodoma xi̱kuni̱na ku̱su̱nna xíʼin na̱ ta̱a na̱ ni̱xa̱ʼa̱n xi̱to ta̱ Lot. Savana nda̱a̱ na̱ va̱lí xi̱kuuna ta sana kǒo níxi̱kunda̱a̱-inina ña̱ kininí ni̱xi̱yo ña̱ xi̱keʼéna (Gén. 19:4; 2 Ped. 2:7). Kúndáʼviní-ini Jehová xínira na̱ yiví ña̱kán, ¿á kivi ka̱ʼa̱nyó ña̱ kǒo sandátakura nda̱a̱ ni iin na̱ yiví kán? Jehová ni̱ka̱ʼa̱nra ña̱ ni u̱xu̱ na̱ yiví na̱ kéʼé ña̱ va̱ʼa kǒo níxi̱yo ñuu kán (Gén. 18:32). Sana kǒo níxa̱a̱ na̱ yiví kán sakúaʼana xa̱ʼa̱ Jehová ña̱kán ke̱ʼéna ña̱ va̱ása va̱ʼa ta sa̱ndíʼi-xa̱ʼa̱rana. Soo, ¿á kivi ka̱ʼa̱nyó ña̱ nda̱a̱ ni iin na̱ yiví kán kǒo ndataku tá ná sandátaku Jehová na̱ kǒo níndasakáʼnu miíra xa̱ʼa̱ ña̱ kǒo nísakúaʼana xa̱ʼa̱ra? Kǒo xíni̱yó ndáaña keʼé Jehová. w24.05 2 párr. 3; 3 párr. 8

Xa̱ʼa̱ ña̱ kúma̱ní xu̱ʼún, savana sándakoona na̱ veʼena ña̱ va̱ʼa ku̱ʼu̱nna kachíñuna inka ñuu, soo tá yáʼa tiempo kíʼinna kuenta ña̱ va̱ása va̱ʼa íyo ña̱ nda̱kaxinna keʼéna. Xa̱ʼa̱ ña̱kán tá kúma̱níka ndaka̱xiún á kiʼún iin chiñu, va̱ása xíniñúʼu ndakani kuití xi̱níún xa̱ʼa̱ nda̱saa xu̱ʼún chaʼvina yóʼó chi saátu xíniñúʼu ndakanixi̱níún á chindeétáʼan ña̱ ndaka̱xiún keʼún xíʼin miíún ta saátu xíʼin na̱ veʼún ña̱ viíka kutáʼanndó xíʼin Ndióxi̱ (Luc. 14:28). Ndakanixi̱ní xa̱ʼa̱ ña̱yóʼo: “Tá ná kiʼii̱n chiñu ña̱ xíká kíndo̱o, ¿á sakúxíkaña yi̱ʼi̱ nu̱ú yiíi̱ á ñá síʼi̱? ¿Á kasiña nu̱úi̱ ña̱ ku̱ʼi̱n ndiʼi reunión, ña̱ ku̱ʼi̱n predicación ta saátu ña̱ tavái̱ tiempo ña̱ koi̱ xíʼin na̱ hermano?”. Tá íyo se̱ʼún saátu xíniñúʼu ndakanixi̱níún xa̱ʼa̱ ña̱yóʼo: “¿Ndáa ki̱ʼva sakúaʼnui̱ na̱ va̱lí se̱ʼi̱ ta kuniʼii̱ yichi̱ nu̱úna nda̱a̱ táki̱ʼva kúni̱ Jehová tá kǒi̱ íyo xíʼinna?” (Efes. 6:4). Tá kúma̱níka ndaka̱xiún ña̱ keʼún, koto ndáaña ndákanixi̱ní Jehová xa̱ʼa̱ ña̱yóʼo ta kǒo kundiku̱ún ña̱ káʼa̱n na̱ veʼún á na̱ migoún na̱ va̱ása ndíku̱n ña̱ káʼa̱n Biblia. w25.03 29 párr. 12

Na̱ cristiano na̱ kǒo chíkaa̱ ndee̱ ña̱ sakúaʼakana xa̱ʼa̱ Jehová kándíxana ña̱ káʼa̱n na̱ vatá á na̱ to̱ʼón ta táxina ña̱ sandáʼvinana ta saátu kivi kandíxana ña̱ káʼa̱n na̱ apóstata. Sana kixáʼana kuu i̱ni̱-inina á kukúini̱-inina xíʼin inkana á kutóona na̱ána á ña̱ kamaní sa̱a̱na á ña̱ kuni̱na keʼéna ña̱ kini (1 Cor. 3:3). Biblia chítáʼanña ña̱ sákuaʼayó xa̱ʼa̱ Ndióxi̱ xíʼin ña̱ xáʼnu iin na̱ yiví (Efes. 4:15). Na̱ va̱lí kǒo xíni̱na ku̱a̱ʼání ña̱ʼa, ña̱kán xíniñúʼuna ña̱ kundaanana. Ná kachiyó ña̱ iin ñaʼá ku̱a̱ʼa̱nñá xíʼin se̱ʼeñá chí calle. Ta káʼa̱nñá xíʼin ñá loʼo se̱ʼeñá ña̱ tiinñá ndaʼa̱ñá ña̱ va̱ʼa ya̱ʼañá. Soo tá xa̱a̱ xa̱ʼnuka ñá loʼo yóʼo, siʼíñá káʼa̱nñá xíʼinñá ña̱ kivi ya̱ʼa miíñá chí calle soo ná kotoñá u̱vi̱ saá xiyo á kǒo carro va̱xi. Ña̱kán tá xa̱a̱ ku̱chéeñá, xa̱a̱ xíni̱vañá ndáaña xíniñúʼu keʼéñá. Na̱ cristiano na̱ xa̱a̱ xu̱xa-ini xíʼin tu̱ʼun Ndióxi̱, kǒo xíniñúʼuna ña̱ ka̱ʼa̱nna xíʼinna ndáaña xíniñúʼu keʼéna saáchi nándukú miína xa̱ʼa̱ sava ña̱ʼa nu̱ú tu̱ʼun Ndióxi̱ ta ña̱yóʼo chíndeétáʼanña xíʼinna ña̱ vií koo ña̱ ndaka̱xinna keʼéna. w24.04 3 párr. 5, 6

Ku̱a̱ʼání ku̱i̱ya̱ iinlá ta̱ Jesús xíʼin na̱ ángel xi̱kuu migo Jehová, soo tá ni̱ya̱ʼa tiempo ka̱nara sava na̱ yiví ña̱ ku̱ʼu̱nna veʼera á ña̱ koona migora. Sava na̱yóʼo xi̱kuu ta̱ Enoc, ta̱ Noé, ta̱ Abrahán, xíʼin ta̱ Job. Ña̱ Biblia káʼa̱nña xa̱ʼa̱ na̱yóʼo ña̱ va̱ʼaní xi̱kitáʼanna xíʼin Ndióxi̱ ta xi̱kuuna migora (Gén. 5:24; 6:9; Job 29:4; Is. 41:8). Tá ni̱ya̱ʼa ku̱a̱ʼá ku̱i̱ya̱, Jehová ka̱nara inkakana ña̱ ku̱ʼu̱nna veʼera. Ná ka̱ʼa̱nyó xa̱ʼa̱ profecía ña̱ va̱xi nu̱ú Ezequiel 37:​26, 27, Ndióxi̱ kúni̱níra ña̱ ndiʼi na̱ ndásakáʼnu miíra ná xa̱a̱na koona migora, ta ña̱yóʼo kúú ña̱ sákuaʼayó xíʼin profecía yóʼo. Jehová ni̱ka̱ʼa̱nra keʼéra iin trato xíʼin na̱ ñuura ña̱ viíní kutáʼanra xíʼinna. Ña̱ profecía yóʼo xi̱nuña tá inkáchi ná ndakutáʼan na̱ ungido xíʼin na̱ yiví na̱ kundoo nu̱ú ñuʼú yóʼo ña̱ ndasakáʼnuna Jehová ta nda̱a̱ táki̱ʼva íyo na̱ ndi̱ʼvi ini veʼera saá koona (Juan 10:16). Ta ña̱yóʼo kúú ña̱ kúu tiempo vitin. w24.06 2 párr. 2, 4; 3 párr. 5

Miíyó na̱ ndásakáʼnu Jehová, iinlá Reinora kúú ña̱ ndíku̱nyó. Soo ña̱ va̱ʼa keʼéyó ña̱yóʼo xíniñúʼu ndakú koo iniyó (Mat. 6:33). Xíniñúʼu ndakú koo iniyó ña̱ va̱ʼa keʼéyó ña̱ káʼa̱n Jehová xíʼinyó ta saátu ña̱ natúʼunyó xíʼin na̱ yiví xa̱ʼa̱ Reinora. Saátu tiempo vitin ku̱a̱ʼání na̱ yiví káʼa̱n xa̱ʼa̱ ña̱ política ta kivi ixayo̱ʼvi̱ña xíʼinyó ña̱ nda̱kú koo iniyó xíʼin Jehová (Juan 18:36). Xa̱a̱ ku̱a̱ʼání na̱ testigo Jehová íxandi̱va̱ʼana xíʼinna ta táannana veʼeka̱a xa̱ʼa̱ ña̱ kǒo xíínna ki̱ʼvina xíʼin ña̱ política á xa̱ʼa̱ ña̱ kǒo xíínna ku̱ʼu̱nna nu̱ú ku̱a̱chi. Tá sákuaʼayó xa̱ʼa̱ na̱ va̱ʼaní nda̱sakáʼnu Ndióxi̱ tiempo xi̱naʼá, ña̱yóʼo chindeétáʼan xíʼinyó ña̱ ndakú koo iniyó ta kǒo yi̱ʼvíyó ña̱ ndasakáʼnuyó Jehová. Tá ni̱xi̱yo ta̱ Jesús nu̱ú ñuʼú yóʼo kǒo níxiinra ki̱ʼvira xíʼin ña̱ política (Mat. 4:​8-11; Juan 6:​14, 15). Ndiʼi tiempo xi̱ndaa-inira ña̱ chindeétáʼan Jehová xíʼinra. w24.07 3 párr. 4; 4 párr. 7

Jehová ta̱xira ña̱ ná ka̱ʼyi̱ ña̱ ku̱u yóʼo nu̱ú Biblia tasaá kunda̱a̱-iniyó xa̱ʼa̱ iin ña̱ʼa ña̱ ndáyáʼviní: ña̱ kúndasíníra xínira ku̱a̱chi. Ku̱a̱chi yóʼo sákuxíkáña miíyó nu̱ú Jehová ta xíʼi̱yó xíʼinña (Is. 59:2). Xa̱ʼa̱ ña̱yóʼo kúú ña̱ kútóoní ta̱ Ndi̱va̱ʼa ná ki̱ʼviyó ku̱a̱chi. Ña̱kán kúú ña̱ sa̱ndáʼvira ta̱ Adán xíʼin ñá Eva ta saátu kéʼéra xíʼin miíyó. Sana nda̱kanixi̱ní ta̱ Ndi̱va̱ʼa ña̱ ku̱chiñura sa̱sira nu̱ú Ndióxi̱. Soo va̱ása níxi̱kunda̱a̱-inira ña̱ kúʼvi̱ní-ini Jehová xínira miíyó. Chi va̱ása nínasama Jehová ña̱ xi̱kuni̱ra keʼéra xa̱ʼa̱ na̱ se̱ʼe ta̱ Adán xíʼin ñá Eva. Jehová kúʼvi̱ní-inira xínira na̱ yiví, ña̱kán ndi̱ku̱n ndu̱kúra ki̱ʼva ña̱ chindeétáʼanra xíʼinna (Rom. 8:​20, 21). Xi̱kunda̱a̱-inira ña̱ koo sava na̱ kuʼvi̱ní-ini kuni miíra ta ka̱ʼa̱nna xíʼinra ña̱ ná chindeétáʼanra xíʼinna ña̱ va̱ása ki̱ʼvina ku̱a̱chi. Ta xa̱ʼa̱ ña̱ va̱ʼaní-ini Jehová taxira ná kuyatinna nu̱úra tasaá ka̱kuna ta va̱ása kuumiíkana ku̱a̱chi. w24.08 3 párr. 3, 4

Ku̱a̱ʼání miíyó na̱ ndásakáʼnu Jehová íyoní chiñu nu̱úyó. Xíniñúʼu kachíñuyó ña̱ va̱ʼa ni̱ʼíyó ña̱ xíniñúʼuyó ta saátu taxiyó ña̱ xíniñúʼu na̱ veʼeyó (1 Tim. 5:8). Ku̱a̱ʼání na̱ hermano ndáana na̱ veʼena na̱ ndeéndóʼo á na̱ xa̱a̱ ku̱chée. Ta ndiʼiyó xíniñúʼu kundaayó miíyó ña̱ va̱ʼa kǒo kiʼin kue̱ʼe̱ miíyó. Saátu íyo chiñu nu̱úyó ti̱xin congregación. Ta iin ña̱ ndáyáʼviní kúú ña̱ natúʼunyó xa̱ʼa̱ tu̱ʼun Ndióxi̱. Ndáyáʼviní kaʼviyó Biblia, ña̱kán xíniñúʼu chikaa̱yó ndee̱ ña̱ kaʼviyóña. Nu̱ú kíxáʼa libro ña̱ Salmo káchiña ña̱ na̱ yiví na̱ si̱í-ini “ña̱ kútóokana kaʼvina kúú ley Jehová, ñuú xíʼin káʼñu káʼvinaña ta ndákanixi̱nína xa̱ʼa̱ña” (Sal. 1:​1, 2). Ña̱kán xíniñúʼu taváyó tiempo ña̱ kaʼviyóña. ¿Ndáa hora kúú ña̱ va̱ʼaka kaʼviyó Biblia? Miíyó kúú na̱ xíniñúʼu ndaka̱xin ndáa hora kúú ña̱ va̱ʼaka kaʼviyóña, soo ndáyáʼviní ña̱ kaʼvi ni̱ʼiyóña. w24.09 3 párr. 5, 6

Nda̱a̱ na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ xíniñúʼuna ña̱ chindeétáʼan inkana xíʼinna. Na̱ cristiano na̱ kúma̱ní kuxa-ini xíʼin tu̱ʼun Ndióxi̱ ndátuna ña̱ ka̱ʼa̱n inkana xíʼinna ndáaña xíniñúʼu keʼéna. Soo na̱ xa̱a̱ xu̱xa-ini xíʼin tu̱ʼun Ndióxi̱ ndúkúvana consejo nu̱ú inkana, soo miína ndáka̱xin ndáaña keʼéna saáchi kúnda̱a̱-inina ña̱ iin tá iinyó ndakuiinyó xa̱ʼa̱ ña̱ kéʼéyó. Ndiʼi na̱ yiví tá xáʼnuna xa̱a̱ síín síín náʼa̱na. Saátu na̱ hermano na̱ xa̱a̱ xu̱xa-ini xíʼin tu̱ʼun Ndióxi̱ xa̱a̱ síín síín ña̱ va̱ʼa kúúmiína. Tá kúú savana ndíchinína ta inkatuna ndakúní-inina, savana va̱ʼaní-inina ta inkatuna va̱ʼaní kúnda̱a̱-ini xíʼin ña̱ ndóʼoyó. Ná kachiyó ña̱ u̱vi̱ na̱ cristiano kúni̱na keʼéna iin ña̱ʼa, soo su̱ví inkáchi íyo ña̱ ndáka̱xinna, soo ña̱ va̱ʼa kúú ña̱ nda̱kaxin u̱vi̱ saávana keʼéna. Xa̱ʼa̱ ña̱kán, kǒo káʼa̱n kúáchina á kánitáʼanna xa̱ʼa̱ ña̱ nda̱kaxinna keʼéna, ta chíkaa̱na ndee̱ ña̱ vií kutáʼanna (Rom. 14:10; 1 Cor. 1:10). w24.04 4 párr. 7, 8

¿Ndáaña keʼún tá ndákanikaxi̱níún ña̱ kǒo ndáyáʼviún? Kaʼvi texto ña̱ va̱xi nu̱ú Biblia ña̱ káʼa̱n ña̱ ndáyáʼviníún nu̱ú Jehová ta ndakanixi̱ní xa̱ʼa̱ña. Tá kǒo níkivi sáxi̱nún ña̱ xi̱kuni̱ún keʼún á tá kǒo kívi keʼún ku̱a̱ʼání chiñu nda̱a̱ táki̱ʼva kéʼé inkana, kǒo ndakava-iniún ta ni kǒo ndakanixi̱níún ña̱ kǒo ndáyáʼviún. Kúnda̱a̱va-ini Jehová xíʼin ña̱ ndóʼún ta kǒo íxandúxara xíʼún keʼún iin ña̱ʼa ña̱ kǒo kúchiñún keʼún (Sal. 103:​13, 14). Tá i̱xandi̱va̱ʼana xíʼún á tá ti̱in kúíʼnána yóʼó kǒo ndakanixi̱níún ña̱ ku̱a̱chi miíún kúúña. Ndakaʼán chi Jehová ndatiinra ku̱a̱chi xíʼin na̱ yiví na̱ kéʼé ña̱ kini ta su̱ví xíʼin na̱ xóʼvi̱ (1 Ped. 3:12). Ni sava yichi̱ ndákava-iniún, soo Jehová kivi kuniñúʼura yóʼó ña̱ chindeétáʼún xíʼin inkana. Ta̱xira iin chiñu ña̱ ndáyáʼviní ndaʼún ña̱ natúʼún xíʼin na̱ yiví xa̱ʼa̱ra (1 Cor. 3:9). Sana xa̱ʼa̱ ña̱ ndo̱ʼún tá ya̱chi̱ vitin va̱ʼaníka kúnda̱a̱-iniún xíʼin ña̱ ndóʼó na̱ yiví ta sana va̱ʼaní chíndeétáʼún xíʼinna. w24.10 7, 8 párr. 6, 7

Kíʼinníva Jehová kuenta xíʼin ña̱ ndóʼoyó, chi nda̱kúníva ndátiinra ku̱a̱chi (Sal. 37:28). Ta̱ Jesús ni̱ka̱ʼa̱nra ña̱ mií Ndióxi̱ chindeétáʼan xíʼin na̱ ndásakáʼnu miíra ña̱ nda̱kúní ndatiinna ku̱a̱chi xíʼinna mií tiempo ña̱ xíniñúʼunaña. Si̱lóʼoní kúma̱ní ta sandíʼi-xa̱ʼa̱ Jehová ndiʼi ña̱ sáxo̱ʼvi̱ miíyó, ta kǒo taxikara ña̱ ixandi̱va̱ʼana xíʼinyó (Sal. 72:​1, 2). Nani ndátuyó kixaa̱ ñuyǐví xa̱á, Jehová káʼa̱nra xíʼinyó ndáaña kivi keʼéyó tá íxandi̱va̱ʼana xíʼinyó (2 Ped. 3:13). Tá kúú, káʼa̱nra xíʼinyó ndáaña kivi keʼéyó ña̱ va̱ʼa kǒo ndukáʼnuka ku̱a̱chi. Saátu káʼa̱nra xíʼinyó ña̱ viíní ná kundiku̱nyó yichi̱ se̱ʼera ta̱ Jesús, ta nu̱ú Biblia va̱xi ku̱a̱ʼání consejo ña̱ kivi chindeétáʼan xíʼinyó tá íxandi̱va̱ʼana xíʼinyó. w24.11 2, 3 párr. 3, 4

Ta̱ Jesús ni̱ka̱ʼa̱nra ña̱ taxina kuxu ndiʼi na̱ yiví kán soo ¿ndáa míí kiʼinna ña̱ kuxu ndiʼi na̱ yiví kán? Saáchi 5,000 xi̱kuu nina ta̱a ta saátu ni̱xi̱yo ná si̱ʼí xíʼin na̱ va̱lí, ta ndiʼina ki̱ʼva 15,000 xi̱kuuna (Mat. 14:21). Ta̱ Andrés ni̱ka̱ʼa̱nra: “Yóʼo xíka iin ta̱ loʼo ta kúúmiíra u̱ʼu̱n si̱ta̱váʼa ña̱ cebada xíʼin u̱vi̱ ti̱a̱ká válí. Soo ña̱yóʼo va̱ása naniña kuxu ndiʼina” (Juan 6:9). Ndiʼina xi̱xini̱ si̱ta̱váʼa ña̱ cebada ta va̱ása yaʼvi níxi̱yoña ta sana ti̱a̱ká yi̱chí tí o̱ʼva̱ xi̱kuurí. Soo nisaá kǒo nanivíña taxina kuxu ndiʼi na̱ yiví kán. Xa̱ʼa̱ ña̱ va̱ʼaní ni̱xi̱yo ini ta̱ Jesús, ni̱ka̱ʼa̱nra xíʼin na̱ yiví kán ña̱ ná kundoona nu̱ú ku̱ʼu̱ (Mar. 6:​39, 40; Juan 6:​11-13). Biblia káʼa̱nña ña̱ ta̱xi ta̱ Jesús tíxa̱ʼvi ndaʼa̱ yivára xa̱ʼa̱ si̱ta̱váʼa xíʼin xa̱ʼa̱ ti̱a̱ká válí. Iin ña̱ va̱ʼaníva kúú ña̱ ke̱ʼé ta̱ Jesús oración, saáchi yivára kúú ta̱ ta̱xi ña̱ xi̱xina. Ña̱yóʼo sándakaʼánña miíyó ña̱ xíniñúʼu keʼéyó táki̱ʼva ke̱ʼé ta̱ Jesús ta ka̱ʼa̱nyó xíʼin Jehová tá xa̱a̱ kuxuyó. Tándi̱ʼi, ta̱ Jesús ni̱ka̱ʼa̱nra xíʼin na̱ discípulora ña̱ ná ndataʼvína ña̱ kuxuna ta ndiʼi na̱ yiví kán xi̱xina nda̱a̱ chu̱tú ti̱xinna. w24.12 2, 3 párr. 3, 4

Tá ni̱xi̱yo ta̱ Jesús nu̱ú ñuʼú yóʼo, ku̱a̱ʼání ki̱ʼva nda̱sakáʼnura yivára. Tá kúú, tá xi̱keʼé ta̱ Jesús milagro xi̱kaʼa̱nra xíʼin na̱ yiví ña̱ xíʼin ndee̱ mií Jehová xi̱keʼéraña (Mar. 5:​18-20). Saátu xi̱ndasakáʼnu ta̱ Jesús yivára xíʼin ki̱ʼva ña̱ xi̱kaʼa̱nra xíʼin inkana xa̱ʼa̱ra ta saátu xíʼin ki̱ʼva ña̱ xi̱keʼéra xíʼin inkana. Iin yichi̱, tá ndíkaa̱ ta̱ Jesús ini iin sinagoga sánáʼa̱ra na̱ yiví ta tañu na̱ yiví kán ndíkaa̱ iin ñaʼá ñá xa̱a̱ 18 ku̱i̱ya̱ kúúmií ta̱chí ndi̱va̱ʼa. Xa̱ʼa̱ ña̱ xi̱kuumiíñá ta̱chí ndi̱va̱ʼa yóʼo ku̱toso ndiʼiñá ta va̱ása níxi̱kivi ndaka̱ñá. Xi̱xoʼvi̱nívañá xa̱ʼa̱ ña̱yóʼo. Tá xi̱ni ta̱ Jesús ña̱ xóʼvi̱ní ñá ñaʼá yóʼo, ku̱ndáʼviní-inira xi̱nirañá ta ni̱ka̱ʼa̱nra xíʼinñá: “Xa̱a̱ ku̱a̱ʼa̱nva kue̱ʼe̱ ña̱ kúúmiíún”. Tasaá “chi̱núu ndaʼa̱ra sa̱táñá ta ndi̱ku̱n ndu̱nda̱kúñá ta ki̱xáʼañá ndásakáʼnuñá Ndióxi̱” (Luc. 13:​10-13). Ñá ñaʼá yóʼo nda̱sakáʼnuñá Jehová xa̱ʼa̱ ña̱ ke̱ʼéra xa̱ʼa̱ñá ta saátu miíyó xíniñúʼu ndasakáʼnuyó Jehová xa̱ʼa̱ ña̱ kéʼéra xa̱ʼa̱yó. w25.01 2, 3 párr. 3, 4

Xíniñúʼuyó na̱ chindeétáʼan xíʼinyó ña̱ va̱ʼa ndikó tukuyó kooyó táki̱ʼva ni̱xi̱yo ta̱ Adán xíʼin ñá Eva (Sal. 49:​7-9). Xa̱ʼa̱ ña̱ chi̱ndeétáʼan Ndióxi̱ xíʼinyó, kivi kooyó ndiʼi tiempo ta saátu kivi ndataku na̱ ni̱xi̱ʼi̱. Saáchi tá kǒo níchindeétáʼanra xíʼinyó, kundoʼoyó nda̱a̱ táki̱ʼva ndóʼo ndiʼi kití chi tá xíʼi̱rí ndíʼi-xa̱ʼa̱varí (Ecl. 3:19; 2 Ped. 2:12). Kúʼvi̱ní-inira xínira miíyó, ta̱xira iin regalo ña̱ va̱ʼaní ndaʼa̱yó ña̱ va̱ʼa chaʼvira xa̱ʼa̱ ndiʼi ku̱a̱chi ña̱ sa̱ndákoo ta̱ Adán ndaʼa̱yó. Ña̱yóʼo kúú ña̱ ni̱ka̱ʼa̱n ta̱ Jesús xa̱ʼa̱ ña̱yóʼo: “Ndióxi̱ ni̱kuʼvi̱ní-inira xi̱nira na̱ ñuyǐví ta nda̱taxira se̱ʼera ta̱ mitúʼun xa̱ʼa̱na, ña̱ va̱ʼa ndiʼi na̱ kándíxa miíra kǒo ndiʼi-xa̱ʼa̱na chi kutakuna ndiʼi tiempo” (Juan 3:16). Xa̱ʼa̱ ña̱ ta̱xi Jehová regalo yóʼo ndaʼa̱yó, kivi kutáʼan viíyó xíʼinra. Ku̱a̱ʼá ña̱ va̱ʼa ndákiʼinyó xa̱ʼa̱ ña̱ íxakáʼnu-ini Jehová xa̱ʼa̱ ku̱a̱chiyó. w25.02 3 párr. 3-6

¿Ndáaña chi̱ndeétáʼan xíʼin ta̱ Saulo ña̱ va̱ʼa ni̱xa̱a̱ra nda̱kuchira? Tá xi̱niso̱ʼo ta̱ Saulo ña̱ ni̱ka̱ʼa̱n ta̱ Jesús xíʼinra chí ndiví, iin nda̱ye̱ʼe̱ ñuʼu̱ ta ki̱ndoo kúáa ta̱ Saulo (Hech. 9:​3-9). U̱ni̱ ki̱vi̱ kǒo níxixi ta̱ Saulo ta sana nda̱kaniníxi̱níra xa̱ʼa̱ ña̱ ndo̱ʼora. Ta ni̱xa̱a̱ra ku̱ndaa̱-inira ña̱ ta̱ Jesús kúú ta̱ Mesías ta na̱ cristiano kúú na̱ xi̱ndiku̱n religión ña̱ nda̱a̱. Ku̱a̱ʼání ña̱ kivi sakúaʼayó xíʼin ña̱ ke̱ʼé ta̱ Saulo. Xa̱ʼa̱ ña̱ ni̱nuní xi̱kuni̱ra ta saátu xa̱ʼa̱ ña̱ xi̱yiʼvíra xi̱xinira na̱ yiví kivi kasiña nu̱úra ña̱ ndakuchira, soo kǒo nítaxira ña̱ kasi nda̱a̱ ni iin ña̱yóʼo nu̱úra. Nda̱kaxinra ña̱ kundiku̱nra ta̱ Jesús ni xi̱kunda̱a̱-inira ña̱ kundiku̱nna sa̱tára ta ixandi̱va̱ʼana xíʼinra (Hech. 9:​15, 16; 20:​22, 23). Tándi̱ʼi nda̱kuchira, xi̱kandíxaníkavara ña̱ chindeétáʼanva Jehová xíʼinra ña̱ ya̱ʼara nu̱ú nda̱a̱ ndáaka tu̱ndóʼo (2 Cor. 4:​7-10). Tá ná xa̱ún ndakuchiún ta xa̱ún koún testigo Jehová, sana ya̱ʼún nu̱ú sava tu̱ndóʼo. Sana ixandi̱va̱ʼana xíʼún á kasina nu̱ún ña̱ kachíñún nu̱ú Jehová, soo va̱ása ya̱ʼa mitúʼun nu̱ú ña̱yóʼo saáchi Jehová xíʼin ta̱ Jesús chindeétáʼanna xíʼún (Filip. 4:13). w25.03 4 párr. 8, 9

Ña̱ kaʼviyó Biblia iin ña̱ ndáyáʼviní kúúña. Tá kúni̱yó kunda̱a̱-iniyó xíʼin ña̱ káʼa̱n Biblia va̱ása xíniñúʼu kaʼvi kuitíyóña chi íyo inkaka ña̱ xíniñúʼu keʼéyó. Ná ndakanixi̱níyó xa̱ʼa̱ ejemplo yóʼo. Va̱ʼaníva chíndeétáʼan sa̱vi̱ xíʼin planta, soo tá ku̱a̱ʼání sa̱vi̱ ná kuun va̱ása chindeétáʼanvíra xíʼin planta. Va̱ʼaníka tá ná kuun yáárá chi saá kúú ña̱ kivi xi̱xinrá nu̱ú ñuʼú tasaá chindeétáʼanra xíʼin planta ña̱ kuaʼnunú. Ña̱kán tá káʼviyó Biblia va̱ása xíniñúʼu kamaní kaʼviyóña chi tá saá ná keʼéyó kivi nandósóyó xa̱ʼa̱ ña̱ ka̱ʼviyó ta va̱ása keʼéyó ña̱ káʼa̱nña (Sant. 1:24). Tá káʼviún Biblia ta kíʼún kuenta ña̱ kamaní ku̱a̱ʼún káʼviúnña. ¿Ndáaña kivi keʼún? Kivi kixáʼún kúeeka kaʼviúnña ña̱ va̱ʼa ndakanixi̱níún xa̱ʼa̱ ña̱ káʼviún. Tá íxayo̱ʼvi̱ña xíʼún ndakanixi̱níún xa̱ʼa̱ ña̱ káʼviún va̱ása ndi̱ʼi̱-iniún. Kivi taváún ku̱a̱ʼá loʼoka tiempo ña̱ ndakanixi̱níún xa̱ʼa̱ ña̱ káʼviún. w24.09 4 párr. 7-9

Na̱ anciano xíniso̱ʼona ndiʼi ña̱ káʼa̱n na̱ ñuu Ndióxi̱ xíʼinna ta chíkaa̱na ndee̱ ña̱ keʼéna ña̱yóʼo. Káʼa̱nna xíʼinna ndáa ki̱ʼva koo ña̱ reunión ta saátu ndáa ki̱ʼva keʼéna oración tá xíyo reunión. Ta káʼa̱nna xíʼinna ndáa ki̱ʼva kundaana na̱ hermano. Tá xíniso̱ʼo na̱ anciano ndiʼi ña̱ káʼa̱n na̱ ñuu Ndióxi̱ xíʼinna, va̱ʼaní kúni na̱ hermano chi kiʼinna kuenta ña̱ kúʼvi̱ní-ini Jehová xínirana ta ndáarana. Tá káʼa̱n na̱ anciano xíʼinyó ndáaña xíniñúʼu keʼéyó ná chika̱a̱yó ndee̱ ña̱ kuniso̱ʼoyó ña̱ káʼa̱nna. Saá kúú ña̱ va̱ása ixayo̱ʼvi̱ña xíʼinna keʼéna chiñu ña̱ ta̱xi Ndióxi̱ ndaʼa̱na. Biblia káʼa̱nña xíʼinyó ña̱ ná kuniso̱ʼoyó ndiʼi ña̱ káʼa̱n na̱ anciano xíʼinyó (Heb. 13:7, 17). Ta sana kivi ixayo̱ʼvi̱ña xíʼinyó ña̱ kuniso̱ʼoyó ña̱ káʼa̱n na̱ anciano xíʼinyó saáchi na̱ yiví ku̱a̱chi kúúna. Soo tá nina ña̱ va̱ása va̱ʼa kéʼéna kúú ña̱ xítoyó, saá kúú ña̱ keʼéyó ña̱ kútóo ta̱ Ndi̱va̱ʼa. ¿Nda̱chun káʼa̱nyó ña̱yóʼo? Saáchi saá kúú ña̱ kixáʼayó kaka-iniyó xa̱ʼa̱ na̱ ñuu Ndióxi̱. w24.04 10 párr. 11, 12

¿Ndáaña kuu xíʼin na̱ yiví na̱ kuvi tá ná kundika̱a ña̱ gran tribulación? ¿Á ndatakuna? Káxiníva káʼa̱n Biblia ña̱ na̱ yiví na̱ kǒo ndataku kúú na̱ kaʼní Jehová xíʼin na̱ ángelra tá ná kixi ña̱ Armagedón xa̱ʼa̱ ña̱ kǒo níxíínna kuniso̱ʼona ña̱ ni̱ka̱ʼa̱nra xíʼinna (2 Tes. 1:​6-10). Ta, ¿ndáaña kundoʼo na̱ yiví na̱ kuvi ti̱xin ña̱ gran tribulación xa̱ʼa̱ ña̱ ndo̱ʼona iin tu̱ndóʼo á xa̱ʼa̱ ña̱ xa̱ʼnínana, á xa̱ʼa̱ ña̱ ku̱chéena? (Ecl. 9:11; Zac. 14:13). ¿Á ndatakuna xíʼin na̱ yiví na̱ kǒo níxa̱a̱ kunda̱a̱-ini xa̱ʼa̱ Jehová nu̱ú ñuyǐví xa̱á? (Hech. 24:15). Mií ña̱ nda̱a̱ kǒo xíni̱yó xa̱ʼa̱ ña̱yóʼo. Soo íyo sava ña̱’a ña̱ xa̱a̱ xíniyó kuu chí nu̱únínu. Tá kúú, xíni̱yó ña̱ tá ná kixaa̱ ña̱ Armagedón, Jehová keʼéra xíʼin na̱ yiví nda̱a̱ táki̱ʼva ke̱ʼéna xíʼin na̱ ñani ta̱ Cristo (Mat. 25:40). Na̱ chíndeétáʼan xíʼin na̱ ungido ta saátu xíʼin ta̱ Cristo koona nda̱a̱ táki̱ʼva íyo ndikachi (Apoc. 12:17). w24.05 10, 11 párr. 9-11

Biblia káʼa̱nña ña̱ yo̱ʼvi̱ní tiempo ña̱ ndóoyó vitin (2 Tim. 3:1). Ndiʼi na̱ yiví yáʼa nu̱ú tu̱ndóʼo tiempo vitin, ta saátu miíyó na̱ testigo Jehová yáʼayó nu̱ú tu̱ndóʼo, soo su̱ví ña̱yóʼo kuití ndóʼoyó chi saátu íxandi̱va̱ʼana xíʼinyó xa̱ʼa̱ ña̱ ndásakáʼnuyó Ndióxi̱. Ña̱kán, ¿ndáaña kivi chindeétáʼan xíʼinyó ña̱ kǒo sandákooyó ña̱ ndasakáʼnuyó Jehová? Iin ña̱ chindeétáʼan xíʼinyó kúú ña̱ ndakaʼányó ña̱ ndásakáʼnuyó Ndióxi̱ ta̱ táku (Jer. 10:10; 2 Tim. 1:12). Ndióxi̱ ta̱ táku kúú Jehová, ña̱kán kíʼinra kuenta xíʼinyó tá yáʼayó nu̱ú tu̱ndóʼo ta ndúkúra ki̱ʼva ña̱ chindeétáʼanra xíʼinyó (2 Crón. 16:9; Sal. 23:4). Xa̱ʼa̱ ña̱ kúnda̱a̱-iniyó ña̱ kúúra Ndióxi̱ táku, ña̱yóʼo chíndeétáʼan xíʼinyó ña̱ kundeé-iniyó ya̱ʼayó nu̱ú tu̱ndóʼo. w24.06 20 párr. 1, 2

Va̱ʼaní kándíxayó ña̱ káʼa̱n na̱ ñuu Ndióxi̱ xíʼinyó chi ndiʼi tiempo kéʼéna ña̱ va̱xi nu̱ú tu̱ʼunra. Sava ña̱ xi̱kandíxayó tá ya̱chi̱ á sava chiñu ña̱ xi̱keʼéyó nu̱ú Ndióxi̱, tá nása̱maña ndi̱ku̱n kama káʼa̱n na̱ ñuu Ndióxi̱ xíʼinyó. Kéʼéna ña̱yóʼo chi kúni̱na sákusi̱ína-ini Jehová, ta ndiʼi ña̱ ndáka̱xinna keʼéna távánaña nu̱ú ña̱ Biblia tasaá xíniñúʼu keʼé ndiʼi miíyó na̱ ndásakáʼnu Jehová. Ta̱ apóstol Pablo ni̱ka̱ʼa̱nra: “Kǒo sandákoún tu̱ʼun va̱ʼa ña̱ xi̱niso̱ʼún ni̱ka̱ʼi̱n” (2 Tim. 1:13). ¿Ndáaña kúú “tu̱ʼun va̱ʼa” yóʼo? Ña̱yóʼo kúú ña̱ sákuaʼayó nu̱ú Biblia (Juan 17:17). Nu̱ú Biblia va̱xi ndiʼi ña̱ sákuaʼayó xa̱ʼa̱ Ndióxi̱ xíʼin ña̱ kándíxayó. Na̱ ñuu Ndióxi̱ káʼa̱nna xíʼinyó ña̱ ná kuniso̱ʼoyó ndiʼi ña̱ va̱xi nu̱ú Biblia tasaá si̱íní kooyó. w24.07 11, 12 párr. 12, 13

Va̱ʼaní xi̱kunda̱a̱-ini ta̱ apóstol Pedro ndáaña ndóʼoyó tá ndíkó-iniyó ta íxakáʼnu-inina xa̱ʼa̱yó. Ña̱kán va̱ʼaní sa̱náʼa̱ra inkana xa̱ʼa̱ ña̱yóʼo. Tá xa̱a̱ ni̱ya̱ʼa vikó ña̱ Pentecostés, ta̱ Pedro ni̱ka̱ʼa̱nra nu̱ú iin tiʼvi na̱ judío ña̱ miína xa̱ʼní ta̱ Mesías, ta viíní ni̱ka̱ʼa̱nra ña̱yóʼo xíʼinna: “Ndikó-inindó ta ndikóndó nu̱ú Ndióxi̱ ña̱ va̱ʼa ná ndoo ku̱a̱chindó, tasaá mií Jehová sandíkora-inindó” (Hech. 3:​14, 15, 17, 19). Xíʼin ña̱ ni̱ka̱ʼa̱nra xíʼinna xi̱kuni̱ra ná kunda̱a̱-inina ña̱ xíniñúʼu nasama na̱ ndándikó-ini ña̱ ndákanixi̱nína, sandákoona ña̱ va̱ása va̱ʼa kéʼéna ta kixáʼana keʼéna ña̱ sákusi̱í-ini Ndióxi̱. Ta̱ apóstol Pedro ni̱ka̱ʼa̱nra ña̱ tá íxakáʼnu-ini Jehová xa̱ʼa̱ ku̱a̱chiyó, nda̱a̱ táki̱ʼva íyo ña̱ ndákatara saá íyoña. Va̱ʼaní kúniyó tá íxakáʼnu-ini Jehová xa̱ʼa̱yó ni kíʼviyó ku̱a̱chi ña̱ ndeéní. w24.08 12 párr. 14

Tá ndixa kándíxayó ña̱ ndiʼi-xa̱ʼa̱ ñuyǐví yóʼo, ña̱yóʼo chindeétáʼan xíʼinyó ña̱ kǒo kuni̱yó kuumiíyó ku̱a̱ʼání ña̱ʼa. Chi ti̱xin ña̱ gran tribulación kǒo kundayáʼviví xu̱ʼún. Biblia káchiña ña̱ na̱ yiví katana plata chí calle tá ná kiʼinna kuenta ña̱ “ni plata ni oro ña̱ kúúmiína, va̱ása kivi sakǎkuñana ki̱vi̱ ña̱ ná na̱ʼa̱ Jehová ña̱ sáa̱níra xíʼinna” (Ezeq. 7:19). Nu̱úka ña̱ kundi̱ʼi-iniyó ña̱ kuumiíyó ku̱a̱ʼání xu̱ʼún va̱ʼaka ná chikaa̱-iniyó ña̱ loʼo ña̱ʼa kuumiíyó. Ta saátu ná kǒo satáyó ku̱a̱ʼání ña̱ʼa tá kǒo xu̱ʼún ndaʼa̱yó chi kivi kundi̱ʼi̱ní-iniyó xa̱ʼa̱ ña̱yóʼo ta kǒoka tiempo kindo̱o nu̱úyó ña̱ kundi̱ʼi-iniyó xa̱ʼa̱ inkaka ña̱ʼa ndáyáʼvi. Saátu ná kiʼinyó kuenta ña̱ ná kǒo kundayáʼviní ña̱ʼa ña̱ kúúmiíyó nu̱úyó (Mat. 6:​19, 24). Nani kúyatin ña̱ ndiʼi-xa̱ʼa̱ ñuyǐví yóʼo xíniñúʼu na̱ʼa̱yó á ndáa-iniyó Jehová á ña̱ʼa ña̱ kúúmiíyó. w24.09 11 párr. 13, 14

Sana kǒo ndikókavíyó keʼéyó ña̱ kini ña̱ xi̱keʼéyó tá ya̱chi̱, soo sana íyo sava ña̱ íxayo̱ʼvi̱ xíʼinyó sandákooyó keʼéyó. Ña̱yóʼo kúú ña̱ ndo̱ʼo ta̱ apóstol Pedro saáchi ni̱yi̱ʼvíra xi̱nira na̱ yiví. U̱ni̱ yichi̱ ni̱ka̱ʼa̱nra ña̱ kǒo xínira ta̱ Jesús (Mat. 26:​69-75). Tá ni̱ya̱ʼa tiempo ndakú ni̱xi̱yo inira ta ni̱ka̱ʼa̱nra xíʼin na̱ yiví na̱ ndóo sanedrín ta xíʼin ña̱yóʼo kivi ndakanixi̱níyó ña̱ kǒo níxi̱yiʼvíkara kunira na̱ yiví (Hech. 5:​27-29). Soo, tá ni̱ya̱ʼa ku̱i̱ya̱ xa̱ʼa̱ ña̱ yíʼvira xínira na̱ yiví na̱ ni̱ta̱ʼnda̱ nu̱ú yi̱i̱ kǒo níxiinkara kuxura xíʼin na̱ cristiano na̱ inka ñuu (Gál. 2:​11, 12). Xíʼin ña̱yóʼo kúnda̱a̱-iniyó ña̱ xi̱niñúʼu ndakúka koo inira chi xi̱yiʼvikavara xi̱xinira na̱ yiví. Sana saá kivi kundoʼo miíyó tá íyo iin ña̱ʼa ña̱ kúni̱yó keʼéyó soo su̱ví ña̱ va̱ʼa kúúña, ña̱ chindeétáʼan xíʼinyó kúú ña̱ keʼéyó ña̱ ni̱ka̱ʼa̱n ta̱ Jesús, ña̱ kundito va̱ʼa nu̱úyó (Mat. 26:41). Ni túviyó ña̱ kǒo ndakavayó ndaʼa̱ ku̱a̱chi ná kiʼinníyó kuenta xíʼin ña̱ kivi sandákava miíyó keʼéyó ña̱ kini. Kǒo sandákoún keʼún ña̱ chindeétáʼan xíʼún ña̱ va̱ʼa ya̱ʼún nu̱ú tentación (2 Ped. 3:14). w24.07 18, 19 párr. 17-19

Kǒo na̱ íyo nda̱a̱ táki̱ʼva íyo ta̱ Jesús saáchi iinlá ta̱kán kúú ta̱ va̱ʼaní-ini. Tá kúú, tá ni̱xi̱yora nu̱ú ñuʼú yóʼo xi̱niñúʼura ndee̱ ña̱ xi̱kuumiíra ña̱ ke̱ʼéra milagro tasaá chi̱ndeétáʼanra xíʼin ku̱a̱ʼání na̱ yiví (Luc. 9:​12-17). Ta iin ña̱ ndáyáʼviníka ke̱ʼéra kúú ña̱ ni̱xi̱ʼi̱ra xa̱ʼa̱yó (Juan 15:13). Ta nda̱a̱ vitin va̱ʼa-inira xíʼinyó ta nda̱a̱ táki̱ʼva ki̱ndoora xíʼinyó, káʼa̱nra xíʼin Jehová ña̱ ná kuniñúʼura espíritu santo ña̱ va̱ʼa sandíkora-iniyó ta sanáʼa̱ra miíyó (Juan 14:​16, 17; 16:13). Ta ti̱xin reunión sákuaʼayó ndáa ki̱ʼva sanáʼa̱yó na̱ yiví ña̱ va̱ʼa xa̱a̱na koona discípulo ta̱ Jesús (Mat. 28:​18-20).Ta̱ apóstol Pablo ka̱ʼyíra ña̱ tá nda̱a ta̱ Jesús ku̱a̱ʼa̱nra chí ndiví ta̱xira na̱ ta̱a ña̱ “koona iin bendición” (Efes. 4:​7, 8). Ni̱ka̱ʼa̱nra ña̱ ta̱xira na̱yóʼo ña̱ chindeétáʼanna xíʼinyó ti̱xin ña̱ congregación (Efes. 1:​22, 23; 4:​11-13). Xa̱ʼa̱ ña̱ kúúna na̱ yiví ku̱a̱chi sava yichi̱ kǒo kéʼé viína sava ña̱ʼa (Sant. 3:2). Soo tátayó Jesucristo xíniñúʼura na̱yóʼo ña̱ va̱ʼa chindeétáʼanna xíʼinyó. w24.10 18 párr. 1, 2

Ta̱ David ni̱ka̱ʼa̱nra xíʼin se̱ʼera ta̱ Salomón, nani xíniso̱ʼora ndiʼi ña̱ káʼa̱n Jehová xíʼinra, va̱ʼa kana ndiʼi ña̱ keʼéra. Soo tá xa̱a̱ ku̱chéera ki̱xáʼara káñúʼura á ndáñu̱ʼura ndióxi̱ vatá. Xa̱ʼa̱ ña̱kán kǒo níchindeétáʼanka Jehová xíʼin ta̱ Salomón ta va̱ása viíka níxaʼndachíñura nu̱ú na̱ ñuu, chi kǒoka ña̱ ndíchi níxi̱kuumiíra (1 Rey. 11:​9, 10; 12:4). ¿Ndáaña sákuaʼayó? Tá xíniso̱ʼoyó ña̱ káʼa̱n Jehová xíʼinyó, va̱ʼa kana ndiʼi ña̱ kéʼéyó (Sal. 1:​1-3). Kǒo káʼa̱nví Jehová ña̱ taxira ña̱ ndíchi xíʼin ña̱ ku̱i̱ká ndaʼa̱yó, nda̱a̱ táki̱ʼva ta̱xiraña ndaʼa̱ ta̱ Salomón. Soo tá xíniso̱ʼoyó ña̱ káʼa̱nra, taxivara ña̱ ndíchi ndaʼa̱yó ña̱ va̱ʼa vií koo ndiʼi ña̱ ndaka̱xinyó keʼéyó (Prov. 2:​6, 7; Sant. 1:5). Ña̱ va̱xi nu̱ú tu̱ʼunra va̱ʼaní chíndeétáʼanña xíʼinyó tá xa̱a̱ ndúkúyó chiñu ña̱ kachíñuyó, ña̱ ndaka̱xinyó ndáaña kaʼviyó, ña̱ kusíkíyó xíʼin ña̱ kǒo kundi̱ʼi̱ní-iniyó xa̱ʼa̱ xu̱ʼún. Tá xíniso̱ʼoyó ña̱ káʼa̱n Jehová xíʼinyó, saá kúú ña̱ va̱ása xo̱ʼvi̱yó chí nu̱únínu (Prov. 2:​10, 11). Koo na̱ migoyó na̱ chindeétáʼan xíʼinyó ta saátu si̱íní kooyó xíʼin na̱ veʼeyó. w24.11 10, 11 párr. 11, 12

Chindeétáʼanndó xíʼin na̱ va̱lí se̱ʼendó ña̱ ndani̱ʼína prueba ña̱ náʼa̱ ña̱ ndixa kúú ña̱ káʼa̱n Biblia. Ndóʼó na̱ íyo se̱ʼe kiviva ka̱ʼa̱nndó xíʼin na̱ va̱lí se̱ʼendó xa̱ʼa̱ ña̱ káʼa̱n Biblia ta saátu xa̱ʼa̱ ña̱ kándíxayó Ndióxi̱, ta kivi ku̱ʼu̱nndó ku̱a̱ʼání lugar xíʼinna ña̱ va̱ʼa ka̱ʼa̱nndó xa̱ʼa̱ ña̱yóʼo. Kivi sanáʼa̱ndó nu̱ú na̱ va̱lí se̱ʼendó ña̱ʼa ña̱ i̱xava̱ʼa Ndióxi̱, tá kúú kití, yitu̱n á inkaka ña̱ʼa. Saátu kivi ka̱ʼa̱nndó xíʼinna xa̱ʼa̱ ña̱ ku̱u tá ya̱chi̱, ña̱ va̱xi nu̱ú libro á ña̱ va̱xi nu̱ú video. Ta kivi ka̱ʼa̱nndó xíʼinna ndáa ki̱ʼva kítáʼan ña̱ káʼa̱n ña̱yóʼo xíʼin ña̱ káʼa̱n Biblia, ña̱yóʼo chindeétáʼan xíʼinna ña̱ kandíxana ña̱ nda̱a̱ kúú ña̱ káʼa̱n Biblia. Tá kúú, ¿á xíni̱ na̱ va̱lí se̱ʼendó ña̱ íyo iin nama̱ ña̱ ku̱vaʼa 3,000 ku̱i̱ya̱ chí sa̱tá ta ña̱yóʼo naníña piedra moabita ta va̱xi ki̱vi̱ Ndióxi̱ nu̱úña? Soo saátu Betel ña̱ kúúmiíyó na̱ testigo Jehová ñuu Warwick (Nueva York) ndíkaa̱ iin copia yu̱u̱ yóʼo, ta ña̱yóʼo ndíkaa̱ña nu̱ú exposición ña̱ naní “Ña̱ Biblia xíʼin ki̱vi̱ Ndióxi̱”. Ña̱ piedra moabita káʼa̱nña, ta̱ rey Mesá ta̱ ñuu Moab kǒo níxiinkara saxínura ña̱ ki̱ndoora xíʼin na̱ ñuu Israel ta ña̱yóʼo kítáʼanña xíʼin ña̱ káʼa̱n Biblia (2 Rey. 3:​4, 5). Va̱ʼaníva xa̱a̱ na̱ va̱lí se̱ʼendó kandíxana ña̱ káʼa̱n Biblia tá ná kotona ña̱ kítáʼan ña̱ káʼa̱n ña̱yóʼo xíʼin ña̱ káʼa̱n inka tutu. w24.12 14 párr. 4; 15 párr. 6