Septiembre

Tá xa̱a̱ xíni̱yó ku̱a̱ʼá ña̱ʼa xa̱ʼa̱ Jehová ná chika̱a̱yó ndee̱ ña̱ sakúaʼakayó ku̱a̱ʼá ña̱ʼa xa̱ʼa̱ra. Ña̱kán, ná kǒo ndakanixi̱níyó ña̱ xa̱a̱ xíni̱níyó (1 Cor. 10:12). Ná kíʼinyó kuenta xíʼin ña̱ kéʼéyó tasaá kunda̱a̱-iniyó á chíka̱a̱yó ndee̱ ña̱ sakúaʼakayó xa̱ʼa̱ Jehová. Carta ña̱ kaʼyí ta̱ apóstol Pablo ku̱a̱ʼa̱n nu̱ú na̱ Colosenses ni̱ka̱ʼa̱nra xíʼinna ña̱ xíniñúʼu chika̱a̱na ndee̱ ña̱ kuxa-inina xíʼin tu̱ʼun Ndióxi̱. Ta saátu ña̱ kǒo sandákoona ña̱ sakúaʼana xa̱ʼa̱ra. Ta ni xa̱a̱ xi̱xini̱níva na̱ cristiano kán xa̱ʼa̱ Jehová, soo ni̱ka̱ʼa̱nra xíʼinna ña̱ kiʼinnína kuenta ña̱ kǒo taxina sandáʼvi na̱ yiví miína (Col. 2:​6-10). Ta̱ Epafras xi̱kaʼa̱nníra xíʼin Ndióxi̱ xa̱ʼa̱ na̱yóʼo ña̱ va̱ʼa ndakú koo inina nda̱a̱ táki̱ʼva íyo na̱ yiví na̱ xu̱xa-ini (Col. 4:12). ¿Ndáaña sákuaʼayó xíʼin ña̱yóʼo? Ña̱ xíniñúʼu chikaa̱yó ndee̱ ña̱ kuxa-iniyó xíʼin tu̱ʼun Ndióxi̱ ta kǒo sandákooyó ña̱ keʼéyó ña̱yóʼo ta miíra chindeétáʼan xíʼinyó. Ta̱ apóstol Pablo xíʼin ta̱ Epafras xi̱kuni̱na ña̱ ndakúní koo ini na̱ cristiano Colosenses ni xi̱yaʼana nu̱ú ku̱a̱ʼá tu̱ndóʼo. w24.04 6, 7 párr. 16, 17

Ña̱ yi̱ʼvíyó kuniyó Jehová kúni̱ kachiña ña̱ kǒo keʼéyó nda̱a̱ ni iin ña̱ʼa ña̱ kúndasíra xínira saáchi kúʼvi̱ní-iniyó xíniyóra. Kúni̱yó sakúaʼayó ndakuniyó ndáaña kúú ña̱ va̱ʼa ta ndáaña kúú ña̱ va̱ása va̱ʼa, ndáaña kúú ña̱ nda̱a̱ ta ndáaña kúú ña̱ vatá chi saá kúú ña̱ kindo̱o-ini Jehová xíʼin ña̱ kéʼéyó (Prov. 2:​3-6; Heb. 5:14). Tá ná yi̱ʼvíkayó kuniyó na̱ yiví nu̱úka ña̱ yi̱ʼvíyó kuniyó Ndióxi̱, kivi kixáʼayó kandíxayó ña̱ vatá ña̱ káʼa̱nna xa̱ʼa̱ Jehová tasaá va̱ása kandíxakayó ña̱ nda̱a̱ ña̱ káʼa̱n Jehová xíʼinyó. Ná ndakanixi̱níyó xa̱ʼa̱ na̱ 12 ta̱a na̱ ni̱xa̱ʼa̱n xi̱tona̱ní á xi̱toniʼnivíxí ñuu ña̱ ni̱ka̱ʼa̱n Jehová taxira ndaʼa̱ na̱ ñuu Israel. U̱xu̱ na̱yóʼo ni̱yi̱ʼvínína xi̱nina na̱ cananeo nu̱úka ña̱ kuʼvi̱-inina kunina Jehová, xa̱ʼa̱ ña̱kán ni̱ka̱ʼa̱nna ña̱yóʼo: “Va̱ása kivi ku̱ʼu̱nyó kanitáʼanyó xíʼin na̱ yiví kán chi ndakúníkavana nu̱úyó” (Núm. 13:​27-31). Ndakúníva ni̱xi̱yo na̱ cananeo, soo tá ni̱ka̱ʼa̱n u̱xu̱ ta̱a yóʼo ña̱ kǒo kuchiñuna kanitáʼanna xíʼin na̱ cananeo na̱ndósó-inina ña̱ íyova Jehová ña̱ chindeétáʼanra xíʼinna, ta ña̱ xi̱niñúʼu keʼé kuitína kúú ña̱ ndakaʼánna ndáaña xi̱kuni̱ Jehová keʼéna. w24.07 9 párr. 5, 6

Kivi kandíxayó ña̱ ndiʼi tiempo nda̱kúní ndátiin Jehová ku̱a̱chi xíʼin na̱ yiví. Kivi ka̱ʼa̱nyó nda̱a̱ táki̱ʼva ni̱ka̱ʼa̱n ta̱ Abrahán ña̱ nda̱kúní ndátiin Jehová ku̱a̱chi ña̱ kúndáʼviní-inira xínira na̱ yiví ta ndíchiníra. Jehová ta̱xira chiñu ndaʼa̱ se̱ʼera ta̱ Jesús ña̱ nda̱kúní ndatiinra ku̱a̱chi xíʼin na̱ yiví ta va̱ʼaní sa̱náʼa̱rara ndáa ki̱ʼva keʼéraña (Juan 5:22). Jehová xíʼin ta̱ Jesús kúnda̱a̱-inina ndáaña ndíkaa̱ níma̱ na̱ yiví, ña̱kán ndiʼi ña̱ keʼéna va̱ʼaní kooña (Mat. 9:4). Ndiʼi tiempo ná kandíxayó Jehová ta saátu ña̱ ndáka̱xinra keʼéra. Miíyó kǒo xíni̱yó ndáa ki̱ʼva ndatiinyó ku̱a̱chi xíʼin na̱ yiví soo Jehová va̱ʼaníva kéʼéra ña̱yóʼo (Is. 55:​8, 9). Xíni̱yó ña̱ nda̱kúní ndátiin Jehová xíʼin ta̱ Jesús ku̱a̱chi ña̱kán kándíxaníyóna. Ta̱ Jesús kéʼéra nda̱a̱ táki̱ʼva kéʼé yivára chi nda̱kúní íyo ña̱ kéʼéra ta saátu kúndáʼviní-inira xínira na̱ yiví (Isa. 11:​3, 4). w24.05 7 párr. 18, 19

Ndáyáʼviní ña̱ ka̱ʼa̱nyó nina ña̱ nda̱a̱, ná kotoyó ndáa ña̱ ku̱u tá xi̱ni ta̱ Jesús ta̱ Natanael. Tá ni̱xa̱a̱ ta̱ Felipe xíʼin ta̱ Natanael nu̱ú ta̱ Jesús ku̱u iin ña̱ʼa ña̱ ndáyáʼviní, ta̱ Jesús kǒo níxi̱xini̱ra ta̱ Natanael soo tá xi̱nirara ni̱ka̱ʼa̱nra: “Kotondó, iin ta̱ ñuu Israel ta̱ kǒo sándaʼvi” (Juan 1:47). Ta̱ Jesús xi̱kunda̱a̱-inira ña̱ va̱ʼaní ni̱xi̱yo-ini ta̱ Natanael chi kǒo sándáʼvira na̱ yiví. Nda̱a̱ táki̱ʼva íyo miíyó saá ni̱xi̱yo ta̱ Natanael chi ta̱ ku̱a̱chi xi̱kuura soo xi̱chika̱a̱níra ndee̱ ña̱ ka̱ʼa̱nra nina ña̱ nda̱a̱. Ta xa̱ʼa̱ ña̱kán va̱ʼaní ni̱ka̱ʼa̱n ta̱ Jesús xa̱ʼa̱ra. Ña̱ Salmo 15 káʼa̱nña xa̱ʼa̱ ki̱ʼva ña̱ xíniñúʼu kooyó á keʼéyó xíʼin inkana. Salmo 15:3 káʼa̱nña ña̱ ndiʼi na̱ kána Jehová veʼera va̱ása káʼa̱nna ña̱ síkí ta “kǒo kéʼéna ña̱ va̱ása va̱ʼa xíʼin inkana ta kǒo káʼa̱nna ña̱ va̱ása va̱ʼa xa̱ʼa̱ na̱ migona”. Tá kǒo kíʼinyó kuenta xíʼin ña̱ káʼa̱nyó kivi sandákavayó-ini inkana (Sant. 1:26). w24.06 10 párr. 7, 9; 11 párr. 10

Tá xa̱a̱ ya̱chi̱ka káʼviún ña̱ kúni̱ún natúʼún xíʼin na̱ yiví saá kǒo yi̱ʼvíún ña̱ natúʼún xíʼinna. Siʼna sa̱náʼa̱ ta̱ Jesús na̱ discípulora tasaá ni̱ka̱ʼa̱nra xíʼinna ña̱ ku̱ʼu̱nna natúʼunna xíʼin na̱ yiví (Luc. 10:​1-11). Ta xa̱ʼa̱ ña̱ ke̱ʼéna ña̱ ni̱ka̱ʼa̱n ta̱ Jesús xíʼinna ni̱kusi̱íní-inina chi va̱ʼaní xi̱niso̱ʼo na̱ yiví ña̱ na̱túʼunna. ¿Ndáaña kivi keʼéyó ña̱ va̱ʼa koo tu̱ʼvayó tá xa̱a̱ ku̱a̱ʼa̱nyó predicación? Xíniñúʼu ndakanixi̱níyó ndáa ki̱ʼva ka̱ʼa̱nyó xíʼin na̱ yiví xa̱ʼa̱ Ndióxi̱. Ta ná ndakanixi̱níyó ndáaña kivi ka̱ʼa̱n na̱ yiví xíʼinyó ña̱ va̱ʼa ndakuiinyó yuʼúna, ta ña̱yóʼo chindeétáʼanña xíʼinyó ña̱ kusi̱í-iniyó ka̱ʼa̱nyó xíʼinna tá xa̱a̱ ndáka̱tu̱ʼunna miíyó. w24.04 16 párr. 6, 7

Xa̱ʼa̱ ña̱ kúʼvi̱ní-iniyó xíniyó Jehová nátúʼunyó xa̱ʼa̱ra xíʼin na̱ yiví tasaá ndásakáʼnuyó ki̱vi̱ra. Ta káʼa̱nyó nda̱a̱ táki̱ʼva káʼa̱n na̱ ángel: “Yóʼó kúú ta̱ xíniñúʼu ndukáʼnu, yóʼó kúú ta̱ xíniñúʼu ixato̱ʼóna, yóʼó kúú ta̱ kúúmií ndiʼi ndee̱”. ¿Ndáa ki̱ʼva ndásakáʼnuyó Jehová ta íxato̱ʼóyóra? Ndásakáʼnuyóra ta íxato̱ʼóyóra tá nátúʼunyó xíʼin na̱ yiví ña̱ miíra kúú ta̱ i̱xava̱ʼa ndiʼi ña̱ʼa ña̱ íyo nu̱ú ñuʼú yóʼo ta saátu ta̱xira ña̱ tákuyó. Ta, ¿ndáa ki̱ʼva táxiyó ndee̱yó ndaʼa̱ra? Táxiyóña tá xíniñúʼuyó tiempoyó, ndee̱yó xíʼin ña̱ kúúmiíyó ña̱ va̱ʼa natúʼunyó xa̱ʼa̱ra xíʼin na̱ yíví (Mat. 6:33; Luc. 13:24; Col. 3:23). Kúsi̱íní-iniyó nátúʼunyó xa̱ʼa̱ra saáchi kúʼvi̱ní-iniyó xíniyora, ta saátu kúni̱yó natúʼunyó xíʼin na̱ yiví xa̱ʼa̱ ki̱vi̱ra ta ndáaña kúni̱ kachi ña̱yóʼo. w24.05 17 párr. 11

Jehová táxira bendición ndaʼa̱ na̱ ndásakáʼnu miíra. Ndióxi̱ chindeétáʼanra xíʼinyó ña̱ kǒo ndi̱ʼi̱-iniyó, ta saátu ña̱ kusi̱í-iniyó, ta chí nu̱únínu taxira kutakuyó ndiʼi tiempo. Kúnda̱a̱-iniyó ña̱ kúni̱ra taxira bendición ndaʼa̱yó, ta kúúmiívara ndee̱ ña̱ keʼéraña. Ña̱yóʼo chíndeétáʼan xíʼinyó ña̱ kachíñuyó nu̱ú Jehová nda̱a̱ táki̱ʼva ke̱ʼé na̱ xi̱ndasakáʼnu miíra tá xi̱naʼá. Ná ka̱ʼa̱nyó xa̱ʼa̱ ña̱ ndo̱ʼo ta̱ Timoteo (Heb. 6:​10-12). Ta̱ Timoteo ka̱ndíxara ña̱ káʼa̱n Jehová ta saátu kǒo níxi̱ka-inira ña̱ taxira ku̱a̱ʼání bendición ndaʼa̱ra (1 Tim. 4:10). Ña̱kán va̱ʼaní ka̱chíñura nu̱ú Jehová ta va̱ʼaní chi̱ndeétáʼanra xíʼin na̱ hermano. ¿Ndáaña ke̱ʼéra? Ta̱ apóstol Pablo ni̱ka̱ʼa̱nra xíʼinra ña̱ viíka sanáʼa̱ra na̱ yiví ta viíka taxira discurso, ni̱ka̱ʼa̱ntura xíʼinra ña̱ chinúura iin ejemplo ña̱ va̱ʼaní nu̱ú na̱ va̱lí xíʼin nu̱ú na̱ xa̱a̱ chée. Saátu ni̱ka̱ʼa̱nra xíʼinra ña̱ xi̱niñúʼu viíní taxira consejo ndaʼa̱ na̱ hermano soo xi̱niñúʼu káxiní ka̱ʼa̱nra xíʼinna (1 Tim. 4:​11-16; 2 Tim. 4:​1-5). Xi̱kunda̱a̱va-inira ña̱ xi̱kiʼinva Jehová kuenta xíʼin ña̱yóʼo (Rom. 2:​6, 7). w24.06 22, 23 párr. 10, 11

Jehová xi̱chindaʼára na̱ profetara nu̱ú na̱ ñuura ña̱ ka̱ʼa̱nna xíʼinna ndáaña kundoʼona tá va̱ása násamana ña̱ kéʼéna ta saátu ña̱ taxina consejo ndaʼa̱na. Tá kúú, xi̱niñúʼura ta̱ Jeremías ña̱ ka̱ʼa̱nra tu̱ʼun yóʼo: “Ndóʼó na̱ ñuu Israel na̱ kǒo xíín kuniso̱ʼo, ndikóndó nu̱úi̱ […]. Va̱ása sa̱íi̱ xíʼinndó saáchi nda̱kúva íyo inii̱ […]. Su̱ví ndiʼi tiempoví sa̱íi̱ xíʼinndó. Ndakuni kuitíún ña̱ kúúmiíún ku̱a̱chi saáchi ni̱xa̱ún íyoún contra Jehová” (Jer. 3:​12, 13). Saátu xi̱niñúʼu Jehová ta̱ profeta Joel ña̱ ka̱ʼa̱nra ña̱yóʼo: “Ndikóndó nu̱úi̱ xíʼin ndiʼi níma̱ndó” (Joel 2:​12, 13). Ta saátu xi̱niñúʼura ta̱ Isaías ña̱ va̱ʼa ka̱ʼa̱nra ña̱yóʼo: “Ndasandiindó miíndó; kǒo kúni̱i̱ kotokai̱ ña̱ va̱ása va̱ʼa kéʼéndó; sandákoondó keʼéndó ña̱ va̱ása va̱ʼa” (Is. 1:​16-19). Saátu ni̱ka̱ʼa̱n Jehová xíʼin ta̱ Ezequiel ná ka̱ʼa̱nra ña̱yóʼo: “Va̱ása kúsi̱íví-inii̱ tá xíʼi̱ iin na̱ ndi̱va̱ʼa-ini […], ña̱ kúnii̱ kúú ña̱ ná sandákoona keʼéna ña̱ va̱ása va̱ʼa ta ná kutakuna”. “Va̱ása kúsi̱í-inii̱ tá xíʼi̱ iin na̱ yiví […]. Ña̱kán, ndikóndó nu̱úi̱ ta kutakundó” (Ezeq. 18:​23, 32). Kúsi̱í-ini Jehová tá ndíkó-ini iin na̱ yiví xa̱ʼa̱ ku̱a̱china chi kúni̱ra ná kutakuna ndiʼi tiempo. w24.08 9 párr. 5, 6

Ndiʼi tiempo kundaa Jehová ndiʼi na̱ ñuura, taxira ña̱ sakúaʼana xa̱ʼa̱ra ta kuniʼira yichi̱ nu̱úna. Inka ki̱ʼva ña̱ náʼa̱ Jehová ña̱ kǒo ndáka̱xinra na̱ yiví kúú ña̱ xa̱a̱ ku̱a̱ʼání nu̱ú tu̱ʼun íyo ña̱ Biblia ña̱ va̱ʼa kunda̱a̱-ini ndiʼi na̱ yiví xa̱ʼa̱ra. Tá tiempo xi̱naʼá tu̱ʼun Ndióxi̱ ni̱ka̱ʼyi̱ña tu̱ʼun hebreo, arameo xíʼin griego. Soo, ¿á nda̱saa na̱ xíni̱ kaʼvi tu̱ʼun hebreo, arameo xíʼin griego kúú na̱ kivi kuyatin nu̱ú Jehová? Va̱ásaví (Mat. 11:25). Kúsi̱íva-ini Jehová xíʼinyó ni kǒo níkaʼvi va̱ʼayó escuela á ni kǒo xíni̱yó ka̱ʼa̱nyó tu̱ʼun ña̱ ni̱ka̱ʼyi̱ Biblia xi̱naʼá. Su̱ví iinlá na̱ yiví na̱ ka̱ʼvi va̱ʼa táxi Jehová ña̱ ndíchi ndaʼa̱ chi saátu táxiraña ndaʼa̱ ndiʼi na̱ yiví na̱ íyo nu̱ú ñuʼú yóʼo, ni ka̱ʼvina á kǒo níkaʼvi va̱ʼana. Xa̱a̱ ku̱a̱ʼání nu̱ú tu̱ʼun kána ña̱ Biblia, ña̱kán ndiʼi na̱ yiví kivi xa̱a̱na sakúaʼana ña̱ va̱xi nu̱ú ña̱ Biblia ta koona migo Ndióxi̱ (2 Tim. 3:​16, 17). w24.06 6, 7 párr. 13-15

Xa̱a̱ ku̱nu̱mí ndiʼi-xa̱ʼa̱ ñuu Jerusalén nda̱a̱ táki̱ʼva ni̱ka̱ʼa̱n ta̱ Jesús. Xi̱niñúʼu viíní kuniñúʼu na̱ cristiano tiempo kán ña̱ va̱ʼa kandíxakana Ndióxi̱ ta ndakúka koo inina, tasaá koo tu̱ʼvana tá ná kixi tu̱ndóʼo nu̱úna (Heb. 10:25; 12:​1, 2). Saátu miíyó xa̱a̱ ku̱nu̱mí ya̱ʼayó nu̱ú iin tu̱ndóʼo ña̱ ndeéníka ña̱ ni̱ya̱ʼa na̱ cristiano hebreo nu̱ú (Mat. 24:21; Apoc. 16:​14, 16). Consejo ña̱ ta̱xi Jehová ndaʼa̱ na̱ cristiano kán kivi chindeétáʼanña xíʼin miíyó. Ta̱ apóstol Pablo chi̱ndaʼára carta ku̱a̱ʼa̱n nu̱ú na̱ hebreo, ni̱ka̱ʼa̱nra xíʼinna ná kaʼvina tu̱ʼun Ndióxi̱ ta ná ndakanixi̱nína xa̱ʼa̱ña (Heb. 5:14–6:1). Xi̱niñúʼura Escrituras Hebreas ña̱ va̱ʼa sa̱náʼa̱rana ña̱ va̱ʼaníka ndásakáʼnu na̱ cristiano Ndióxi̱ nu̱úka ña̱ xi̱keʼé na̱ judío. Ta̱ Pablo ni̱ka̱ʼa̱nkara xíʼin na̱ cristiano ña̱ ná sakúaʼakana xa̱ʼa̱ Ndióxi̱ ta ná kunda̱a̱-inina xíʼinña chi saá kúú ña̱ kunda̱a̱-inina ndáaña kúú ña̱ vatá ta kǒo kandíxanaña. w24.09 8, 9 párr. 2, 3; 10 párr. 6

Xi̱niñúʼu chikaa̱na ndee̱ xíʼin na̱ discípulo ta̱ Jesús. ¿Nda̱chun? Saáchi savana sa̱ndákoona veʼena, chiñu ña̱ xi̱kuumiína xíʼin na̱ veʼena ña̱ va̱ʼa ndiʼi tiempo kakana xíʼin ta̱ Jesús (Mat. 19:27). Ta inkana xi̱kundasína xi̱xininana xa̱ʼa̱ ña̱ ndu̱una discípulo ta̱ Jesús (Juan 9:22). Ke̱ʼéna ña̱yóʼo saáchi ta̱ Jesús xi̱kuu ta̱ Mesías ta̱ xi̱ndatuna kixi (Mat. 16:16). Soo tá xa̱ʼnína ta̱ Jesús nda̱kavaní-inina ta nda̱kanixi̱nína ña̱ kǒo xi̱nukaví ña̱ xi̱ndatuna kuu. Xi̱kunda̱a̱va-ini ta̱ Jesús ña̱ xi̱kusuchí-ini na̱ discípulora xa̱ʼa̱ ña̱ ni̱xi̱ʼi̱ra. Ta su̱ví xa̱ʼa̱ ña̱ kǒo níxi̱kandíxana Ndióxi̱ níxi̱kuuña. Ña̱kán mií ki̱vi̱ nda̱takura ki̱xáʼa chíkaa̱ra ndee̱ xíʼin na̱ migora. Ki̱tara nu̱ú ñá María Magdalena tá xákuñá níndichiñá nu̱ú sa̱ndúxu̱nnara (Juan 20:​11, 16). Ki̱tara nu̱ú u̱vi̱ na̱ discípulo na̱ ni̱xa̱ʼa̱n chí ñuu Emaús ta saátu ki̱tara nu̱ú ta̱ apóstol Pedro. w24.10 13 párr. 5, 6

Ndóʼó na̱ íyo se̱ʼe chindeétáʼanndó xíʼin na̱ va̱lí se̱ʼendó ña̱ va̱ʼa kuchiñuna ka̱ʼa̱nna xíʼin inkana xa̱ʼa̱ ña̱ kándíxana Ndióxi̱. Kivi kaʼvindó xíʼin na̱ va̱lí se̱ʼendó artículo ña̱ va̱xi nu̱ú jw.org ña̱ naní “¿Creación o evolución? Primera parte, segunda parte, tercera parte xíʼin cuarta parte” ta kivi ndani̱ʼíndóña nu̱ú táʼví ña̱ naní “Los jóvenes preguntan”. Tándi̱ʼi, nda̱ka̱tu̱ʼunndóna ndáaña kuniñúʼuna ña̱ va̱ʼa ka̱ʼa̱nna xíʼin inkana ña̱ íyova iin ta̱ i̱xava̱ʼa ndiʼi ña̱ʼa, ta ndanundó xíʼinna ña̱ va̱ʼa sakúaʼana ndáa ki̱ʼva ka̱ʼa̱nna xa̱ʼa̱ ña̱yóʼo. Soo tá iinna kúni̱na kunda̱a̱ka-inina xa̱ʼa̱ ña̱yóʼo viíní ná ndakanina nu̱úna ña̱ va̱ʼa kunda̱a̱-inina. Tá kúú, iin na̱ káʼvi xíʼinna kivi ka̱ʼa̱nna xíʼinna: “Yi̱ʼi̱ kándíxa kuitíi̱ ña̱ xítoi̱ soo ta̱ʼán kunivíi̱ Ndióxi̱ ña̱kán kǒo kándíxai̱ra”. Ta na̱ va̱lí na̱ ndásakáʼnu Ndióxi̱ kivi ka̱ʼa̱nna ña̱yóʼo xíʼinna: “Ndakanixi̱ní ña̱ ku̱a̱ʼún iin yuku̱ nu̱ú kǒo nda̱a̱ ni iin na̱ yiví tasaá nda̱ni̱ʼún iin veʼe ña̱ liviní ku̱vaʼa, ¿á su̱ví íyo iin na̱ i̱xava̱ʼaña? Ña̱kán tá íyo iin na̱ i̱xava̱ʼa veʼe yóʼo saátu íyo iin na̱ i̱xava̱ʼa ndiʼi ña̱ʼa”. w24.12 18 párr. 16

Ndiʼiyó xíniñúʼu ña̱ chindeétáʼanna xíʼinyó ña̱ va̱ʼa ndaka̱xinyó ña̱ keʼéyó. Ta na̱ anciano xíʼin inka na̱ hermano na̱ xu̱xa-ini xíʼin tu̱ʼun Ndióxi̱ kúú na̱ kivi chindeétáʼan xíʼinyó. Ná kǒo ndakanixi̱níyó ña̱ kǒo chindeétáʼankaví consejona xíʼinyó chi xa̱a̱ yatáníña. Saáchi Jehová kúni̱ra ña̱ ná sakúaʼayó xíʼin ña̱ ndo̱ʼo na̱ xa̱a̱ chée, saáchi na̱yóʼo xa̱a̱ ku̱a̱ʼání ku̱i̱ya̱na xa̱ʼa̱ ña̱kán xíni̱nína ta ndíchinína. Tiempo xi̱naʼá, Jehová xi̱niñúʼura na̱ ta̱a na̱ xa̱a̱ chée na̱ nda̱kú ni̱xi̱yo ini xíʼinra ña̱ va̱ʼa chikaa̱na ndee̱ xíʼin na̱ ñuura ta saátu ña̱ kuniʼina yichi̱ nu̱úna. Ná ndakaʼányó xa̱ʼa̱ ta̱ Moisés, ta̱ David xíʼin ta̱ apóstol Juan. Xa̱a̱ síín tiempo ni̱xi̱yo iin tá iinna ta xa̱a̱ síín tu̱ndóʼo ni̱ya̱ʼana nu̱ú, ña̱kán tá xa̱a̱ ku̱nu̱mí kuvina va̱ʼaní consejo ta̱xina ndaʼa̱ na̱ válíka. U̱ni̱ saá na̱ ta̱a yóʼo ni̱ka̱ʼa̱nna ña̱ ndáyáʼviní kuniso̱ʼoyó Jehová, kúúyó na̱ xa̱a̱ chée á na̱ va̱lí (Rom. 15:4; 2 Tim. 3:16). w24.11 8 párr. 1, 2

Nda̱a̱ tá tiempo ña̱ ni̱xi̱yo ta̱ Noé, Ndióxi̱ ni̱ka̱ʼa̱nra xíʼin na̱ yiví ña̱ kǒo xíniñúʼu kuxuna ni̱i̱ (Gén. 9:​3, 4). Ta tá ni̱ya̱ʼa tiempo, ta̱xira Ley ndaʼa̱ na̱ ñuu Israel nu̱ú ni̱ka̱ʼa̱nra xíʼinna ña̱ va̱ása xíniñúʼu kuxuna ni̱i̱. Ta ndiʼi na̱ xi̱yaʼandoso Ley yóʼo ta xi̱xixina ni̱i̱, xi̱xiniñúʼu kuvina (Lev. 7:27). Ta̱ Jesús ni̱ka̱ʼa̱nra xíʼin na̱ judío ña̱ ná ixato̱ʼóna Ley ña̱ ta̱xi Jehová ndaʼa̱ ta̱ Moisés (Mat. 5:​17-19). Ña̱kán kǒo níka̱ʼa̱nví ta̱ Jesús xíʼin na̱ yiví ña̱ kuxuna ku̱ñura á ña̱ koʼona ni̱i̱ra. Ta̱ Jesús kǒo níxikuni̱ kachira xíʼin na̱ yiví na̱ xi̱niso̱ʼo ña̱ ni̱ka̱ʼa̱nra chí Capernaúm, ña̱ tá níxixina ku̱ñura á koʼona ni̱i̱ra ni̱ʼína ña̱ kutakuna ndiʼi tiempo. Chi saá xi̱keʼéva ta̱ Jesús chi xi̱xiniñúʼura ejemplo tá xi̱sanáʼa̱ra na̱ yiví. Ná ndakaʼányó xa̱ʼa̱ ña̱ ni̱ka̱ʼa̱nra xíʼin ñá samaritana ñá ni̱xa̱ʼa̱n ta̱vá ti̱kui̱í ini pozo, tá ni̱ka̱ʼa̱nra: “Na̱ ná koʼo ti̱kui̱í tá táxii̱ va̱ása yi̱chi̱ka-inina. [...] Kutakuna ndiʼi tiempo” (Juan 4:​7, 14). Ta̱ Jesús kǒo níkuni̱ kachira ña̱ tá ná koʼo ñá ñaʼá kán ti̱kui̱í ini iin pozo xa̱a̱ñá kutakuñá ndiʼi tiempo. Ta saátu tá ni̱ka̱ʼa̱nra xíʼin na̱ yiví na̱ ñuu Capernaúm xa̱ʼa̱ ku̱ñura xíʼin ni̱i̱ra kǒo níkuni̱ kachira ña̱ kuxuna ña̱yóʼo ña̱ va̱ʼa ni̱ʼína ña̱ kutakuna ndiʼi tiempo. w24.12 9 párr. 4-6

Na̱ ta̱a na̱ xa̱a̱ ti̱ndaʼa̱ na̱ ndásakáʼnu Ndióxi̱ xíniñúʼu kiʼinnína kuenta ña̱ va̱ása ndakanixi̱nína nda̱a̱ táki̱ʼva ndákanixi̱ní na̱ ñuyǐví yóʼo xa̱ʼa̱ ná ñaʼá. ¿Nda̱chun? Saáchi tá ndákanixi̱nína xa̱ʼa̱ iin ña̱ʼa ña̱ va̱ása va̱ʼa kivi xa̱a̱na keʼéna ña̱yóʼo. Ná ndakanixi̱níyó xa̱ʼa̱ congregación ña̱ ni̱xi̱yo ñuu Roma tá siglo nu̱ú, ti̱xin congregación yóʼo ni̱xi̱yo ku̱a̱ʼání na̱ hermano na̱ ku̱ʼu̱n chí ndiví. Tá xa̱a̱ ni̱ya̱ʼa loʼo tiempo ña̱ ki̱xáʼa íyo ña̱ congregación yóʼo, ta̱ Pablo ni̱ka̱ʼa̱nra ña̱yóʼo xíʼinna: “Va̱ása taxindó ña̱ nasama ña̱ ñuyǐví yóʼo miíndó” (Rom. 12:​1, 2). Xíʼin tu̱ʼun ña̱ ni̱ka̱ʼa̱nra yóʼo táxiña kunda̱a̱-iniyó ña̱ savaka na̱ hermano kán xi̱ndiku̱nkana costumbre na̱ ñuu kán ta saátu ki̱ʼva ña̱ xi̱keʼéna. Xa̱ʼa̱ ña̱kán ni̱ka̱ʼa̱n ta̱ Pablo xíʼinna ña̱ nasamana ki̱ʼva ña̱ ndákanixi̱nína xíʼin ña̱ kéʼéna. Ta consejo ña̱ ta̱xi ta̱ Pablo ndaʼa̱ na̱yóʼo kivitu chindeétáʼanña xíʼin na̱ ta̱a na̱ xa̱a̱ ti̱ndaʼa̱. Tiempo vitin sava na̱ ta̱a na̱ ndásakáʼnu Ndióxi̱ kíxáʼana ndákanixi̱nína nda̱a̱ táki̱ʼva ndákanixi̱ní na̱ ñuyǐví yóʼo ta íxandi̱va̱ʼana xíʼin ñá síʼina. w25.01 9 párr. 4

Saátu tiempo vitin ku̱a̱ʼání chiñu kéʼé na̱ anciano, saáchi sánáʼa̱na na̱ yiví xa̱ʼa̱ Ndióxi̱ (2 Tim. 4:5). Xítona ndáa territorio ku̱ʼu̱nyó natúʼunyó xíʼin na̱ yiví, kéena xíʼinyó predicación ta saátu sánáʼa̱na miíyó ndáa ki̱ʼva natúʼunyó xíʼin na̱ yiví tá sánáʼa̱yóna. Saátu nda̱kúní ndátiinna ku̱a̱chi ta kúndáʼvi-inina xínina miíyó. Tá iinna ni̱ki̱ʼvina ku̱a̱chi ndeé chíndeétáʼanna xíʼinna ña̱ va̱ʼa ndikó tukuna vií kutáʼanna xíʼin Jehová. Ta saátu chíndeétáʼanna xíʼin na̱ hermano ña̱ kǒo keʼéna ña̱ kini (1 Cor. 5:​12, 13; Gál. 6:1). Ndíʼi̱ní-inina xa̱ʼa̱yó ta va̱ʼaní ndáana miíyó (1 Ped. 5:​1-3). Viíní káʼa̱nna xa̱ʼa̱ ña̱ va̱xi nu̱ú Biblia tá táxina discurso, chíkaa̱na ndee̱ ña̱ kuxini̱na ndiʼi na̱ hermano ta saátu kéʼéna visita ña̱ pastoreo. Sava na̱ anciano káchíñuna nu̱ú kúva̱ʼa veʼe nu̱ú ndátakayó, ta savana káchíñuna ña̱ va̱ʼa nduviíña ta saátu íxatu̱ʼvana ndiʼi ña̱ʼa ña̱ va̱ʼa koo asamblea regional, saátu káchíñuna xíʼin na̱ Comité de Enlace con los Hospitales. Savatuna ñúʼuna ti̱xin grupo na̱ xáʼa̱n xíto na̱ kúúmií kue̱ʼe̱ á kéʼéna inkaka chiñu. Ña̱kán, ku̱a̱ʼáníva chiñu kéʼéna xa̱ʼa̱yó. w24.10 20 párr. 9

Ña̱ Biblia káʼa̱nña, xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi sa̱ñáyó ndaʼa̱ ku̱a̱chi. Siaʼa íyo ña̱ ni̱ka̱ʼa̱n ta̱ apóstol Pedro: “Saáchi ndóʼó kúnda̱a̱-inindó ña̱ su̱ví oro á plata kúú ña̱ níxiniñúʼura ña̱ sakǎkura ndóʼó chi ña̱ ndíʼi-xa̱ʼa̱va kúú ña̱yóʼo, nu̱úka ña̱yóʼo xi̱niñúʼura ni̱i̱ ta̱ Cristo ña̱ ndáyáʼviní, ña̱ íyo nda̱a̱ táki̱ʼva íyo ni̱i̱ iin tí ndikachi” (1 Ped. 1:​18, 19). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi sa̱ñáyó ndaʼa̱ ku̱a̱chi ta va̱ása kuvikayó (Rom. 5:21). Táxiníyó tíxa̱ʼvi ndaʼa̱ Jehová xíʼin ta̱ Jesús, saáchi xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó kivi ndoo ku̱a̱chiyó. w25.02 5 párr. 15, 16

¿Ndáaña kivi keʼéyó ña̱ va̱ʼa kǒo ki̱ʼviyó ku̱a̱chi? Ná kotoyó ndáaña kivi sakúaʼayó xíʼin ña̱ va̱xi nu̱ú Proverbios capítulo 7. Yóʼo káʼa̱nña xa̱ʼa̱ iin ta̱ loʼo ta̱ ni̱ki̱ʼvi ku̱a̱chi kini saáchi ni̱ki̱si̱ra xíʼin iin ñaʼá ñá kísi̱ xíʼin ku̱a̱ʼá ta̱a. Versículo 22 káʼa̱nña ña̱ iin kama ni̱xa̱ʼa̱nra nu̱ú íyoña. Tá ná kaʼviyó ndiʼi versículo saá kunda̱a̱-iniyó ña̱ ke̱ʼévara ku̱a̱ʼá ña̱ʼa tasaáví ni̱xa̱a̱ra veʼeñá. ¿Ndáaña ke̱ʼéra? Tá xa̱a̱ ku̱ñuú ni̱ya̱ʼara chí calle nu̱ú íyoñá, tasaá nda̱kiʼinra ku̱a̱ʼa̱nra chí nu̱ú níndichi veʼeñá (Prov. 7:​8, 9). Tá xi̱nirañá kǒo níxinura nu̱úñá chi ta̱xira ña̱ chi̱tóñá yuʼu̱ra ta ni̱ka̱ʼa̱nñá xíʼinra ña̱ xa̱a̱ ni̱so̱kóñá ña̱ʼa nu̱ú Ndióxi̱, saáchi xi̱kuni̱ñá sáxi̱nuñá-inira ña̱ kúúñá iin ñaʼá ñá va̱ʼa (Prov. 7:​13, 14, 21). Tá kǒo níxa̱ʼa̱n ta̱ loʼo yóʼo nu̱ú íyoñá, sana kǒo ki̱ʼvivíra ku̱a̱chi xíʼinñá. w24.07 16 párr. 8, 9; 19 párr. 19

Jehová ta̱xira ña̱ ka̱ʼyi̱ nu̱ú tu̱ʼunra ña̱ ku̱u ti̱xin congregación ña̱ Corinto ña̱ va̱ʼa sanáʼa̱ra miíyó (Rom. 15:4). Xíʼin ña̱yóʼo sákuaʼayó ña̱ va̱ása táxi Jehová ña̱ kuñuʼu na̱ kíʼvi ku̱a̱chi ndeé ti̱xin ñuura. Savana ndákanixi̱nína ña̱ xa̱ʼa̱ ña̱ íxakáʼnu-ini Jehová xa̱ʼa̱ ku̱a̱chiyó kivi taxira ña̱ kuñuʼukayó ti̱xin congregación ni kǒo ndándikó-iniyó xa̱ʼa̱ ku̱a̱chi ña̱ ni̱ki̱ʼviyó soo su̱ví ña̱ nda̱a̱ kúú ña̱yóʼo. Íxakáʼnuva-ini Jehová xa̱ʼa̱yó soo va̱ása táxira ña̱ keʼéyó ña̱ kúni̱ miíyó, ta kǒo násamara ña̱ káʼa̱n tu̱ʼunra xa̱ʼa̱ ndáaña kúú ña̱ va̱ʼa ta ndáaña kúú ña̱ va̱ása va̱ʼa (Jud. 4). Tá ná taxi Jehová ña̱ kuñuʼu na̱ kíʼvi ku̱a̱chi ti̱xin congregación, va̱ása chindeétáʼan ña̱yóʼo xíʼin congregación ta saátu va̱ása na̱ʼa̱ Jehová ña̱ va̱ʼa-inira (Prov. 13:20; 1 Cor. 15:33). Xíʼin ña̱ ku̱u ti̱xin congregación ña̱ Corinto sákuaʼayó ña̱ va̱ása kúni̱ Jehová ndiʼi-xa̱ʼa̱ nda̱a̱ ni iinna chi ña̱ kúni̱ra kúú ña̱ ka̱ku ndiʼi na̱ yiví. Ña̱kán íxakáʼnu-inira xa̱ʼa̱ na̱ kíʼvi ku̱a̱chi tá násamana ña̱ kéʼéna ta chíkaa̱na ndee̱ ña̱ kachíñuna nu̱úra (Ezeq. 33:11; 2 Ped. 3:9). Ña̱kán tá nda̱ndikó-ini ta̱ ta̱a ta̱ ñuu Corinto ta sa̱ndákoora ña̱ va̱ása va̱ʼa xi̱keʼéra, Jehová xi̱niñúʼura ta̱ apóstol Pablo ña̱ ka̱ʼa̱nra xíʼin na̱ congregación ña̱ ná ixakáʼnu-inina xa̱ʼa̱ ta̱ ta̱a yóʼo ta ndakiʼin tukunara. w24.08 17 párr. 7; 18, 19 párr. 14, 15

Ta̱ Jesús ni̱ka̱ʼa̱nra ña̱ tá ná kixaa̱ tiempo ña̱ ndatiinra ku̱a̱chi xíʼin iin tá iin na̱ yiví, kotora á chi̱ndeétáʼanna xíʼin na̱ ñanira na̱ ungido (Mat. 25:​31-46). ¿Ama kúú ña̱ ka̱ʼa̱n ta̱ Jesús ña̱ iin na̱ yiví kúúna ndikachi á ti̱xúʼú? Ka̱ʼa̱nraña tá xa̱a̱ ná kundikaa̱ ña̱ gran tribulación tá si̱lóʼo kúma̱ní ña̱ kixáʼa Armagedón (Mat. 24:21). Nda̱a̱ táki̱ʼva kéʼé iin ta̱ pastor ta̱ ndátaʼví ndikachi xíʼin ti̱xúʼú, saá keʼé ta̱ Jesús, chi ndataʼvíra na̱ chíndeétáʼan xíʼin na̱ ungido xíʼin na̱ kǒo chíndeétáʼan xíʼinna. Jehová nda̱kaxinra ta̱ Jesús ña̱ koora juez, ta Biblia káʼa̱nña ña̱ nda̱kúní ndatiin ta̱ Jesús ku̱a̱chi (Is. 11:​3, 4). Ta̱ Jesús kíʼinra kuenta xíʼin ña̱ ndákanixi̱ní na̱ yiví, ña̱ káʼa̱nna xíʼin ña̱ kéʼéna ta saátu xítora ndáa ki̱ʼva kéʼéna xíʼin na̱ ñanira na̱ ungido (Mat. 12:​36, 37). Kunda̱a̱-inira ndáana chi̱ndeétáʼan xíʼin na̱ ungido ña̱ ke̱ʼéna chiñu ña̱ ta̱xina ndaʼa̱na. Iin ña̱ ndáyáʼviní kivi keʼéyó ña̱ va̱ʼa chindeétáʼanyó xíʼin na̱ ungido kúú ña̱ natúʼunyó xíʼin na̱ yiví xa̱ʼa̱ tu̱ʼun Ndióxi̱. w24.09 20, 21 párr. 3, 4

Ná kiʼinyó kuenta á inkáchi íyo ña̱ ndákanixi̱níyó xíʼin ña̱ káʼa̱n Biblia. Tá kúú, sana iin ta̱ loʼo kíxáʼa xíka-inira ta ndákanixi̱níra ña̱ kǒo kíʼin Jehová kuenta xíʼin ña̱ kéʼéra, ¿ndáaña xíniñúʼu keʼéra? Ña̱ xíniñúʼu keʼéra kúú ña̱ nandukúra nu̱ú Biblia ndáaña ndákanixi̱ní Jehová. Tá káʼviyó Biblia nda̱a̱ táki̱ʼva íyo ña̱ káʼa̱n mií Jehová xíʼinyó saá íyoña. Soo ña̱ va̱ʼa kuniso̱ʼoyó ña̱ káʼa̱nra xíʼinyó xa̱ʼa̱ ña̱ xíka-iniyó xíniñúʼu keʼéyó inka ña̱ʼa. Xíniñúʼu nandukúyó texto ña̱ va̱xi nu̱ú Biblia ña̱ káʼa̱n xa̱ʼa̱ ña̱ sándi̱ʼi̱-iniyó, ta saátu kuniñúʼuyó ña̱ táxi na̱ ñuu Ndióxi̱ ndaʼa̱yó ña̱ va̱ʼa nandukúyó xa̱ʼa̱ ña̱ kúni̱yó kunda̱a̱-iniyó (Prov. 2:​3-6). Iin ña̱ ndáyáʼvi keʼéyó kúú ña̱ ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ ndani̱ʼíyó ña̱ kúni̱yó kunda̱a̱-iniyó xa̱ʼa̱. Tá xa̱a̱ nda̱ni̱ʼíyó ña̱ káʼa̱n Biblia ná kotoyó ndáa ki̱ʼva kuniñúʼuyóña. w24.10 25 párr. 4, 5

Kǒo taxiví Jehová bendición ndaʼa̱ na̱ yiví na̱ ni̱nu kúni á na̱ kúni̱ ndukáʼnu nu̱ú inkana (1 Cor. 10:​24, 33; 13:​4). Sava yichi̱ nda̱a̱ na̱ migo ta̱ Jesús xi̱kuni̱na kuumiína iin chiñu ña̱ káʼnuní. Soo, xi̱kuni̱na kuumiína ña̱yóʼo xa̱ʼa̱ ña̱ ni̱nuní xi̱kuni̱na. Ña̱yóʼo kúú ña̱ ku̱u xíʼin ta̱ Santiago ta saátu xíʼin ta̱ Juan. Na̱yóʼo ni̱ka̱ʼa̱nna xíʼin ta̱ Jesús ña̱ ná taxira iin chiñu ña̱ ndáyáʼviní ndaʼa̱na ti̱xin Reinora. Soo nu̱úka ña̱ ka̱ʼa̱n ta̱ Jesús xíʼin ta̱ Santiago ta saátu xíʼin ta̱ Juan ña̱ va̱ʼaní ni̱xi̱yo ña̱ xi̱kuni̱na keʼéna, ña̱yóʼo ni̱ka̱ʼa̱nra xíʼin u̱xu̱ u̱vi̱ saá na̱ apóstolra: “Na̱ kúni̱ koo na̱ káʼnuka nu̱ú inkana va̱ʼaka ná kachíñuna nu̱ú inkana, ta nda̱a̱ ndáaka na̱ kúni̱ koo na̱ nu̱ú nu̱úndó siʼna ná kachíñuna nu̱ú ndiʼindó” (Mar. 10:​35-37, 43, 44). Soo na̱ hermano na̱ chíkaa̱ ndee̱ ña̱ kuumiína iin chiñu xa̱ʼa̱ ña̱ kúni̱na chindeétáʼanna xíʼin na̱ hermano, iin bendición kúú na̱yóʼo ti̱xin congregación (1 Tes. 2:8). w24.11 15, 16 párr. 7, 8

Tá ndáka̱xinyó keʼéyó iin ña̱ʼa ña̱ kúʼvi̱-iniyó xíniyó inkana kúú ña̱ chindeétáʼan xíʼinyó ña̱ kundi̱ʼi-iniyó xa̱ʼa̱na ta vií ndaka̱xinyó ti̱ko̱to̱ kundixiyó (1 Cor. 10:​23, 24, 32; 1 Tim. 2:​9, 10). Saá kúú ña̱ viíní koo ña̱ ndaka̱xinyó keʼéyó ta na̱ʼa̱yó ña̱ kúʼvi̱-iniyó xíniyó inkana ta saátu íxato̱ʼóyóna. Tá iin ña̱ ndáyáʼviní kúú ña̱ ndáka̱xiún keʼún, xíniñúʼu viíní ndakanixi̱níún ndáaña kúú ña̱ kivi keʼún ña̱ va̱ʼa saxínún ña̱yóʼo. Ta̱ Jesús sa̱náʼa̱ra miíyó ña̱ taváyó ki̱ʼva xíʼin ña̱ kéʼéyó (Luc. 14:28). Ña̱kán ndakanixi̱ní nda̱saa ndeún kuniñúʼún, nda̱saa tiempo kuniñúʼún ta saátu nda̱saa xu̱ʼún kuniñúʼún ña̱ va̱ʼa saxínún ña̱ nda̱kaxiún keʼún. Sava yichi̱ xíniñúʼu ka̱ʼún xíʼin na̱ veʼún xa̱ʼa̱ ña̱yóʼo ña̱ va̱ʼa kotona ndáaña kivi keʼéna ña̱ va̱ʼa chindeétáʼanna xíʼún ña̱ saxínún ña̱ nda̱kaxiún keʼún. ¿Nda̱chun ndáyáʼviní keʼún ndiʼi ña̱yóʼo? Saáchi ña̱yóʼo kivi chindeétáʼan xíʼún ña̱ kotoún á xíniñúʼu nasamaún sava ña̱ʼa á sanatu íyo inka ña̱ va̱ʼaka kivi keʼún. Tá ná nda̱ka̱tu̱ʼún na̱ veʼún xa̱ʼa̱ ña̱yóʼo, kuniso̱ʼo ña̱ ka̱ʼa̱nna xíʼún chi saá kúú ña̱ va̱ʼaníka chindeétáʼanna xíʼún ña̱ viíní kana ña̱ nda̱kaxiún keʼún. w25.01 18, 19 párr. 14, 15

Ta̱ Isaías káʼa̱nra ña̱ xíniñúʼu kusi̱íní-ini miíyó na̱ ndásakáʼnu Jehová, saáchi ti̱xin ñuura ñúʼuyó ta miíra kíʼin kuenta xíʼinyó (Is. 65:​18, 19). Ña̱kán, xa̱ʼndara chiñu nu̱úyó ña̱ ku̱ʼu̱nyó natúʼunyó xíʼin na̱ yiví ña̱ va̱ʼa xa̱a̱na sakúaʼana xa̱ʼa̱ra chi kǒo ña̱ʼa sákuaʼana ñuyǐví yóʼo. Soo tá xa̱a̱ kíʼvina ñuu Jehová íyoníva ña̱ sakúaʼana xa̱ʼa̱ra. Ku̱a̱ʼání bendición táxi Jehová ndaʼa̱yó ña̱kán kúni̱yó ka̱ʼa̱nyó xa̱ʼa̱ ña̱yóʼo xíʼin na̱ yiví (Jer. 31:12). Miíyó na̱ ñúʼu ti̱xin ñuu Jehová kúsi̱íní-iniyó xa̱ʼa̱ ña̱ ndátuyó ndakiʼinyó chí nu̱únínu. Biblia káʼa̱nña ña̱ ixava̱ʼa na̱ yiví veʼe ta miína kundoo iniña; chiʼina tú uva ta miína kaxí ku̱i̱ʼinú, ta ndeéní kachíñuna soo kundayáʼviva ña̱ keʼéna chi mií Jehová taxi bendición ndaʼa̱na. Jehová káʼa̱nra ña̱ kusi̱íní-iniyó, va̱ʼaní kooyó ta kǒo kundi̱ʼi̱-iniyó. (Is. 65:​20-24; Sal. 145:16). w24.04 22, 23 párr. 11, 12

Inka ki̱ʼva ña̱ na̱ʼa̱yó ña̱ ndáa-iniyó Jehová kúú ña̱ kandíxaníyóra ndiʼi tiempo. Sava yichi̱ íxayo̱ʼvi̱níña xíʼinyó kuniso̱ʼoyó ña̱ káʼa̱n Jehová, soo tá kándíxayóra ña̱ va̱ʼa miívayó kúúña (Is. 48:​17, 18). Tá xítoyó ña̱ chíndeétáʼanra xíʼinyó, saá kúú ña̱ ndáaníka-iniyóra, ta ña̱yóʼo chindeétáʼan xíʼinyó ña̱ kundeé-iniyó ya̱ʼayó nu̱ú tu̱ndóʼo ña̱ kǒo níndakanixi̱níyó kixi nu̱úyó. Nda̱a̱ táki̱ʼva íyo iin yu̱u̱ káʼnu á iin xi̱kí káʼnu va̱ása kándaña nu̱ú íyoña, ki̱ʼva saá íyo Jehová saáchi íyora ndiʼi tiempo ta saátu kǒo nása̱mavíra ta ndiʼi ña̱ káʼa̱nra keʼéra chí nu̱únínu sáxi̱nuraña (Mal. 3:6). Tá i̱xaso̱ʼo ta̱ Adán xíʼin ñá Eva, Jehová kǒo nínasamara ña̱ xi̱kuni̱ra keʼéra. Ta̱ apóstol Pablo ni̱ka̱ʼa̱nra ña̱ nda̱kúníva-ini Jehová “saáchi xa̱a̱ saá kúú ki̱ʼva ña̱ íyovara” (2 Tim. 2:13). Ña̱yóʼo kúni̱ kachiña ña̱ ni nda̱a̱ ndáaka ña̱ ná kuu sáxi̱nuva Jehová ña̱ káʼa̱nra, kǒo násamara ki̱ʼva ña̱ íyora. Ta saátu ley ña̱ táxira kǒo nása̱maña. Xa̱ʼa̱ ña̱yóʼo kándíxakayó ña̱ káʼa̱n Jehová chi kúnda̱a̱-iniyó ña̱ chindeétáʼanvara xíʼinyó tá ná ya̱ʼayó nu̱ú tu̱ndóʼo ta saátu ña̱ sáxi̱nura ña̱ káʼa̱nra keʼéra chí nu̱únínu (Sal. 62:​6, 7). w24.06 27, 28 párr. 7, 8

¿Ndáaña chindeétáʼan xíʼún ña̱ kunda̱a̱-iniún á tindaʼún xíʼin na̱ xíka xíʼún á kǒo tindaʼún xíʼinna? Vií va̱ʼa kuxini̱ún ndáa ki̱ʼva íyona. Tá kúma̱níka kixáʼún kakaún xíʼinna sana xa̱a̱ xíni̱vaún sava ña̱ʼa ña̱ kútóona. Soo, tá xa̱a̱ ki̱xáʼún xíkaún xíʼinna saá kúú ña̱ kuni va̱ʼún ndáa ki̱ʼva íyona á ndáa ki̱ʼva ndákanixi̱nína. Ta saátu kunda̱a̱-iniún ndáa ki̱ʼva kítáʼanna xíʼin Jehová. Ta kivi ndakanixi̱níún xa̱ʼa̱ pregunta yóʼo: “Tá ná tindaʼíi̱ xíʼin ta̱ hermano kán á tá ná tindaʼíi̱ xíʼin ñá hermana kán, ¿á chindeétáʼanna xíʼin ña̱ ndasakáʼnui̱ Jehová? ¿Á inkáchi ña̱ʼa kútóondi̱?” (Prov. 31:​26, 27, 30; Efes. 5:33; 1 Tim. 5:8). “¿Á kuʼvi̱-inindi̱ kuni táʼanndi̱ ta kundi̱ʼi̱-ini xa̱ʼa̱ táʼanndi̱? Ni tá kǒo kútói̱ sava ña̱ kéʼéna, ¿á kundeé-inii̱ koi̱ xíʼinna?” (Rom. 3:23). Soo, ndakaʼán chi su̱ví ña̱ ndáyáʼvika kúú ña̱ inkáchi koo ña̱ kútóondó, chi ña̱ ndáyáʼvika kúú ña̱ kunda̱a̱-ini xíʼin táʼanndó ta chindeé xíʼin táʼanndó. w24.05 27 párr. 5

Nda̱a̱ táki̱ʼva xa̱a̱ sa̱kúaʼayó iin ku̱a̱chi ña̱ ndeéní ni̱ki̱ʼvi ta̱ rey David, soo tá ni̱ka̱ʼa̱n ta̱ Natán xíʼinra xa̱ʼa̱ ña̱ ke̱ʼéra, vitá ni̱xi̱yo inira ta nda̱ndikó-inira (Sal. 51:​3, 4, 17, encabezamiento). Saátu ta̱ rey Ezequías ni̱ki̱ʼvira ku̱a̱chi nu̱ú Jehová. (2 Crón. 32:25). Nda̱a̱ táki̱ʼva ke̱ʼé ta̱ David saátu ke̱ʼé ta̱ rey Ezequías chi vitá ni̱xi̱yo inira ta nda̱ndikó-inira (2 Crón. 32:26). Tándi̱ʼi Jehová ni̱ka̱ʼa̱nra xa̱ʼa̱ra ña̱ nda̱kúní ni̱xi̱yo-inira xíʼinra. Ña̱ Biblia káʼa̱nña: “Ta̱yóʼo ke̱ʼéra ña̱ va̱ʼa nu̱ú Jehová” (2 Rey. 18:3). ¿Ndáaña sákuaʼayó? Ña̱ xíniñúʼu ndandikó-iniyó xa̱ʼa̱ ku̱a̱chi ña̱ kéʼéyó ta kǒo xíniñúʼu keʼékayóña. Tá táxi na̱ anciano consejo ndaʼa̱yó, ¿ndáaña kǒo xíniñúʼu keʼéyó? Ná kǒo ndakanixi̱níyó ña̱ kǒo kúsi̱íka-ini Jehová xíʼinyó á ña̱ sáa̱-ini na̱ anciano xínina miíyó. Ná ndakaʼányó chi nda̱a̱ na̱ rey na̱ xi̱ndasakáʼnu Jehová na̱ ni̱xi̱yo ñuu Israel ta̱xina consejo ndaʼa̱na tá xi̱keʼéna ña̱ va̱ása va̱ʼa (Heb. 12:6). Ña̱kán tá táxina consejo ndaʼa̱yó, ¿ndáaña xíniñúʼu keʼéyó? 1) Xíniñúʼu vitá koo iniyó, 2) nasamayó ña̱ kéʼéyó, ta 3) kǒo sandákooyó ña̱ ndasakáʼnuyó Jehová xíʼin ndiʼi níma̱yó. Tá ndixa ndándikó-iniyó xa̱ʼa̱ ña̱ va̱ása va̱ʼa ke̱ʼéyó ixakáʼnuva-ini Jehová xa̱ʼa̱yó (2 Cor. 7:​9, 11). w24.07 21 párr. 8; 22 párr. 9, 11

Tá iin na̱ yiví ni̱ki̱ʼvina iin ku̱a̱chi ndeé ta va̱ása ndíkó-inina, tává miína ti̱xin congregación saáchi kǒo nítaxina ña̱ chindeétáʼan na̱ anciano xíʼinna (2 Rey. 17:​12-15). Xíʼin ña̱ kéʼé na̱ yiví yóʼo náʼa̱na ña̱ xa̱a̱ nda̱kaxinna ña̱ kǒo kúni̱kana keʼéna ña̱ káʼa̱n Jehová (Deut. 30:​19, 20). Tasaá táxina iin anuncio ña̱ va̱ʼa kunda̱a̱-ini ndiʼi na̱ congregación ña̱ su̱víka testigo Jehová kúúna. Soo va̱ása kéʼéna ña̱yóʼo xa̱ʼa̱ ña̱ kúni̱na sakúkaʼanna nu̱úna chi kéʼénaña ña̱ va̱ʼa ná kundiku̱n na̱ congregación ña̱ káʼa̱n Biblia ña̱ kǒo kutáʼankana xíʼinna ta ni va̱ása ndakutáʼanna xíʼinna ña̱ kuxuna (1 Cor. 5:​9-11). Ta ña̱ va̱ʼava kúú ña̱ káʼa̱n Jehová ña̱yóʼo xíʼinyó saáchi ta̱ apóstol Pablo ka̱ʼyira: “¿Á va̱ása xíni̱ndó ña̱ loʼo ña̱ sáxi̱ya̱ yuxa̱n sáxi̱ya̱ña ndiʼi yuxa̱n?” (1 Cor. 5:6). Tá ná taxina kundikaa̱ na̱ yiví na̱ ni̱ki̱ʼvi ku̱a̱chi ta va̱ása ndíkó-inina ti̱xin congregación, sana inka na̱ hermano va̱ása chikaa̱vína ndee̱ ña̱ kundiku̱nna ña̱ káʼa̱n Jehová (Prov. 13:20; 1 Cor. 15:33). w24.08 27 párr. 3, 4

Kiviva kuniñúʼuyó tiempoyó ña̱ chindeétáʼanyó xíʼin na̱ hermanoyó. Tá kúú tá xíni̱yó na̱ hermano na̱ xa̱a̱ chée á na̱ kúúmií kue̱ʼe̱. ¿Á kivi chindeétáʼanyó xíʼinna ña̱ ku̱ʼu̱nyó kuenyó á sa̱táyó sava ña̱ʼa ña̱ xíniñúʼuna á ña̱ ndaya̱kúnyó veʼena? ¿Á kivi ku̱ʼu̱nyó kachíñuyó salón tá xa̱a̱ xíyo limpieza? Saátu tu̱ʼun ña̱ káʼa̱nyó kivi chindeétáʼanña xíʼin inkana. ¿Á xíni̱ún iin na̱ ñaniyó á na̱ ku̱ʼvayó na̱ yáʼa nu̱ú tu̱ndóʼo, ta kivi sandíkoún inina á ña̱ ka̱ʼún tu̱ʼun va̱ʼa xíʼinna? Tá xíni̱únna, ¿á kivi ka̱ʼún xíʼinna? ¿Á kivi ku̱ʼún kotoúnna á ka̱ʼún xíʼinna xíʼin teléfono á kaʼyíún iin carta nu̱úna á kivitu chindaʼún iin mensaje nu̱úna? Kǒo xíniñúʼuví ka̱ʼún ku̱a̱ʼá tu̱ʼun xíʼinna soo ña̱ ka̱ʼún xíʼinna níma̱ún ná kanaña, saáchi tá vií ná ka̱ʼún xíʼinna ña̱yóʼo kivi chindeétáʼanña xíʼinna ña̱ nda̱kú koo inina xíʼin Jehová ta saátu ña̱ va̱ʼa kunina (Prov. 12:25; Efes. 4:29). w24.09 28 párr. 8-10

Tá xa̱a̱ ku̱a̱ʼá tiempo kúún siervo ministerial, sana xa̱a̱ kéʼévaún ku̱a̱ʼá ña̱ʼa ña̱ kivi chindeétáʼan xíʼún ña̱ va̱ʼa xa̱ún koún anciano. Soo, ¿á kivi chikaa̱ loʼokaún ndee̱ ña̱ va̱ʼa xa̱ún keʼún chiñu ña̱ kéʼé na̱ anciano? ¿Ndáa chiñu kúú ña̱ kéʼé iin ta̱ anciano? Siʼna mií na̱ anciano chínúu iin yichi̱ va̱ʼa nu̱ú inkana ña̱ keena predicación, ndáana na̱ hermano, sánáʼa̱nana ta chínúuna iin yichi̱ va̱ʼaní nu̱úna ña̱ va̱ʼa viíka ndasakáʼnuna Jehová. Ña̱kán Biblia káʼa̱nña xa̱ʼa̱ na̱ anciano ña̱ kúúna iin bendición (Efes. 4:8). ¿Ndáaña xíniñúʼu keʼé iin ta̱ hermano ña̱ va̱ʼa xa̱a̱ra koora anciano? Tá ndúkúyó iin chiñu ña̱ kachíñuyó ndúkúna requisito nu̱úyó, ta sana kǒo xíni̱víyó keʼéyó ku̱a̱ʼá ña̱ʼa, soo nisaá táxivana chiñu kán ndaʼa̱yó. Soo síínva íyo requisito ña̱ xíniñúʼu sandákutú na̱ anciano, ña̱kán iin ta̱ hermano sana va̱ʼaníva sánáʼa̱ra ta kéera predicación, soo ña̱yóʼo kǒo kúni̱ kachiña ña̱ xa̱a̱ va̱ʼa xa̱a̱ra koora anciano chi xíniñúʼu keʼéra ña̱ káʼa̱n 1 Timoteo 3:​1-7 xíʼin Tito 1:​5-9. w24.11 20 párr. 1-3