Agosto

Ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ natúʼunyó xíʼin na̱ yiví xa̱ʼa̱ra tasaá ndasakáʼnunara. Soo, ¿ndáaña kundoʼo na̱ yiví á na̱ veʼeyó na̱ kǒo xíín sakúaʼa xa̱ʼa̱ Ndióxi̱? Sana sáka̱ku Jehová na̱ yiví na̱ ndikó-ini tá ná kunina ndiʼi-xa̱ʼa̱ Babilonia ña̱ káʼnu. Xíʼin ña̱yóʼo sákuaʼayó ña̱ xíniñúʼu chika̱a̱níyó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱ chi xa̱a̱ ku̱nu̱míní kixaa̱ ki̱vi̱ káʼnu Jehová. Ndiʼi ña̱ nátúʼunyó xíʼin na̱ yiví tiempo vitin sananí ndakaʼánna xa̱ʼa̱ña chí nu̱únínu (kivitu nandukún ña̱ káʼa̱n Ezequiel 33:33). Sana ndakaʼánna xa̱ʼa̱ ña̱ xa̱a̱ sa̱náʼa̱yóna ta ña̱yóʼo kivi chindeétáʼanña xíʼinna ña̱ sakúaʼana xa̱ʼa̱ Jehová tasaá ka̱kuna. Nda̱a̱ táki̱ʼva ke̱ʼé iin ta̱a ta̱ xi̱ndikaa̱ veʼeka̱a ña̱ ñuu Filipos ki̱xáʼara sa̱kúaʼara xa̱ʼa̱ Ndióxi̱ tá xi̱nira ña̱ ndeéní ni̱ta̱an. Tiempo vitin íyo sava na̱ yiví na̱ kǒo xíín sakúaʼa xa̱ʼa̱ Ndióxi̱, soo tá ná kunina ña̱ ndi̱ʼi-xa̱ʼa̱ Babilonia ña̱ káʼnu kuni̱na sakúaʼana xa̱ʼa̱ Jehová (Hech. 16:​25-34). w24.05 17 párr. 9, 10

Saátu ku̱a̱ʼání ña̱ kivi sakúaʼayó xíʼin carta ña̱ chi̱ndaʼá ta̱ apóstol Pablo ku̱a̱ʼa̱n nu̱ú na̱ cristiano hebreo. Savana kǒo níxi̱chikaa̱kana ndee̱ ña̱ sakúaʼakana xa̱ʼa̱ Ndióxi̱, ña̱kán ni̱ka̱ʼa̱nra xíʼinna: “Tuku xíniñúʼu koʼondó leche nu̱úka ña̱ kuxundó ña̱ʼa ña̱ téʼé” (Heb. 5:12). Kǒo níxi̱chikaa̱kana ndee̱ ña̱ sakúaʼana ña̱ʼa xa̱á ña̱ xi̱sanáʼa̱ Jehová miína ti̱xin congregación (Prov. 4:18). Tá ni̱xi̱ʼi̱ ta̱ Jesús saá ndi̱ʼi̱-xa̱ʼa̱ ley ta̱ Moisés, soo ni xa̱a̱ ni̱ya̱ʼa 30 ku̱i̱ya̱ na̱ cristiano judío xi̱kuni̱kavana keʼéna ña̱ xi̱kaʼa̱n ley ta̱ Moisés (Tito 1:10). Ña̱kán, ta̱ apóstol Pablo chi̱ndaʼára carta yóʼo ku̱a̱ʼa̱n nu̱úna ña̱ va̱ʼa kunda̱a̱-inina xíʼin ña̱ káʼa̱n tu̱ʼun Ndióxi̱. Ña̱ ni̱ka̱ʼa̱nra xíʼinna kúú ña̱ xi̱niñúʼu kunda̱a̱-inina mií tiempo saá ta ña̱yóʼo va̱ʼaní chi̱ndeétáʼanña xíʼinna ña̱ kunda̱a̱-inina ndáa ki̱ʼva kúni̱ Jehová ña̱ ndasakáʼnunara. Saátu chi̱ndeétáʼanña xíʼinna ña̱ ndakú koo inina ta kǒo sandákoona ña̱ natúʼunna xa̱ʼa̱ Ndióxi̱ (Heb. 10:​19-23). w24.04 6 párr. 15

Nani tá xi̱niso̱ʼo ta̱ Adán xíʼin ñá Eva ña̱ ni̱ka̱ʼa̱n ta̱ Ndi̱va̱ʼa ta kǒo níxiniso̱ʼokana ña̱ káʼa̱n Jehová, xa̱a̱ ku̱a̱ʼání na̱ yiví xíʼi̱. ¿Ndáaña kuu xíʼin na̱ yiví yóʼo? (1 Cor. 15:26). Ndióxi̱ nda̱kaxinra 144,000 na̱ yiví na̱ nda̱kúní íyo ini xíʼinra ña̱ va̱ʼa koona chí ndiví ta kǒo kuvikana (Apoc. 14:1). Ta ku̱a̱ʼání na̱ ta̱a xíʼin ná ñaʼá na̱ va̱ʼaní xi̱ndasakáʼnu Jehová ndatakuna ta kivi kutakuna ndiʼi saá tiempo tá ná kandíxana ña̱ káʼa̱n ta̱ Jesús ti̱xin ña̱ mil ku̱i̱ya̱ ta saátu tá ná kixi prueba ña̱ so̱ndíʼi (Dan. 12:13; Heb. 12:1). Suvi mií tiempo saá Jehová sandátakura na̱ yiví na̱ kǒo níndasakáʼnu miíra ni ke̱ʼéna ña̱ kini, ña̱ va̱ʼa xa̱a̱na sakúaʼana xa̱ʼa̱ra ta nasamana ki̱ʼva ña̱ íyona (Juan 5:29; Luc. 23:​42, 43). Soo ni̱xi̱yo sava na̱ yiví na̱ ndi̱va̱ʼaní ni̱xi̱yo ini ña̱kán Jehová kǒo sandátakura na̱ yiví kán (Luc. 12:​4, 5). w24.05 2 párr. 3; 5 párr. 15; 6 párr. 17

Salmo 15:2 káʼa̱nña ña̱ ndiʼi na̱ kána Jehová veʼera nina ña̱ nda̱a̱ xíniñúʼu ka̱ʼa̱nna. Kǒo kúni̱ Jehová sandáʼviyó inkana chi kúni̱ra ña̱ nina ña̱ va̱ʼa keʼéyó (Heb. 13:18). Ndáyáʼviní ña̱yóʼo saáchi Jehová kúndasíra xínira na̱ sándaʼvi, soo va̱ʼaní kítáʼanra xíʼin na̱ káʼa̱n ña̱ nda̱a̱ (Prov. 3:32). Savana va̱ʼaní kéʼéna tá íyona xíʼin na̱ hermano, soo tá íyo mitúʼunna kéʼéna ña̱ kǒo kútóo Jehová. Soo na̱ íyo veʼe Jehová ndiʼi tiempo kéʼéna na̱ va̱ʼa. Miíyó kǒo kúni̱yó keʼéyó nda̱a̱ táki̱ʼva kéʼé sava na̱ yiví. Soo, ¿ndáa ki̱ʼva kíxáʼana kéʼéna ña̱yóʼo? Sana kíxáʼana xíka-inina xíʼin ña̱ káʼa̱n Jehová, saáchi ndákanixi̱nína ña̱ kǒo chíndeétáʼanví consejo ña̱ káʼa̱nra xíʼinna (Sant. 1:​5-8). Sava yichi̱ ndákanixi̱nína ña̱ kǒo xíniñúʼu kuniso̱ʼovína ña̱ káʼa̱n Jehová, chi túvina ña̱ su̱ví ña̱ ndeéví kúú ña̱ kúni̱na keʼéna, ta tá xítona ña̱ kǒo tu̱ndóʼo va̱xi nu̱úna xa̱ʼa̱ ña̱ ke̱ʼéna, kíxáʼa kéʼéna ku̱a̱chi ña̱ ndeéka nu̱ú Ndióxi̱. Xa̱ʼa̱ ña̱kán ni káʼa̱nnívana ña̱ ndásakáʼnuna Ndióxi̱ soo kǒo kíndo̱o inira xíʼin ña̱ kéʼéna (Ecl. 8:11). Soo, miíyó kúni̱yó ka̱ʼa̱nyó nina ña̱ nda̱a̱ ta kǒo kúni̱yó sandáʼviyó. w24.06 10 párr. 7, 8

Miíyó na̱ ndásakáʼnu Jehová kúʼvi̱ní-iniyó xíniyó ña̱ nda̱a̱ ña̱ va̱xi nu̱ú tu̱ʼunra, saáchi ña̱yóʼo kúú ña̱ chíndeétáʼan xíʼinyó ña̱ kandíxakayóra (Rom. 10:17). Kúnda̱a̱-iniyó ña̱ mií Jehová kúú ta̱ ni̱ka̱ʼa̱n ña̱ koo iin congregación tá siglo nu̱ú, ta na̱yóʼo kúú na̱ xi̱natúʼun ña̱ nda̱a̱ xa̱ʼa̱ Jehová (1 Tim. 3:15). Ta̱ Ndi̱va̱ʼa kǒo kúni̱ra ná kandíxayó ña̱ káʼa̱n Biblia ta saátu kǒo kúni̱ra ña̱ kuniso̱ʼoyó ña̱ káʼa̱n na̱ ñuu Ndióxi̱ xíʼinyó (Efes. 4:14). Nu̱ú si̱lóʼoní tiempo ta̱ Ndi̱va̱ʼa kixáʼara ka̱ʼa̱nra ku̱a̱ʼání ña̱ vatá á ña̱ to̱ʼón xa̱ʼa̱ Jehová, xa̱ʼa̱ ña̱yóʼo na̱ yiví na̱ íyo iníísaá nu̱ú ñuʼú kixáʼana sa̱a̱-inina kunina Jehová (Apoc. 16:​13, 14). Ta saátu kúnda̱a̱-iniyó ña̱ ta̱ Ndi̱va̱ʼa kuni̱ra sandáʼvira ku̱a̱ʼáníka na̱ ndásakáʼnu Jehová (Apoc. 12:9). Ña̱kán ndáyáʼviní ndakuniyó ndáaña kúú ña̱ nda̱a̱ ña̱ sánáʼa̱ Jehová ta ndáaña kúú ña̱ vatá ña̱ káʼa̱n ta̱ Ndi̱va̱ʼa, tasaá kúú ña̱ kuniso̱ʼoyó ña̱ nda̱a̱ ña̱ sánáʼa̱ Jehová miíyó (Rom. 6:17; 1 Ped. 1:22). Ña̱yóʼo kúú ña̱ xíniñúʼu keʼéyó ña̱ va̱ʼa ka̱kuyó ti̱xin ña̱ gran tribulación. w24.07 8 párr. 1-3

Tá ni̱xa̱a̱ na̱ ñuu Israel ndu̱una na̱ ñuu Jehová ke̱ʼéra iin trato xíʼinna. Jehová ni̱ka̱ʼa̱nra ña̱ kundaarana ta taxira ña̱ va̱ʼa ndaʼa̱na. Soo tá ná ixaso̱ʼona nu̱úra, tá kúú tá ná ndasakáʼnuna inka ndióxi̱ va̱ása kusi̱íka-inira xíʼinna ta kixi ku̱a̱ʼá tu̱ndóʼo nu̱úna soo ña̱yóʼo va̱ása kúni̱ kachiña ña̱ sa̱ndákoondaʼa̱ Jehová na̱yóʼo saáchi ley xi̱kaʼa̱nña ña̱ kiviva ndikóna nu̱ú Jehová ta kuniso̱ʼona ña̱ káʼa̱nra (Deut. 30:​1-3, 17-20). Ña̱kán kiviva ndikó-inina. Tasaá kivi kuyatin Jehová nu̱úna ta taxira ku̱a̱ʼá ña̱ va̱ʼa ndaʼa̱na. Ku̱a̱ʼání yichi̱ i̱xaso̱ʼo na̱ ñuu Israel nu̱ú Jehová. Ta xa̱ʼa̱ ña̱yóʼo ki̱xi ku̱a̱ʼání tu̱ndóʼo nu̱úna. Soo chi̱ndeétáʼan Jehová xíʼinna ña̱ ndikó tukuna kachíñuna nu̱úra, saáchi chi̱ndaʼára ku̱a̱ʼání na̱ profeta ña̱ va̱ʼa ka̱ʼa̱nna xíʼinna ña̱ ndikó-inina ta ndikó tukuna nu̱úra (2 Rey. 17:​13, 14). w24.08 9 párr. 4, 5

Na̱ hebreo na̱ xi̱ndoo chí Jerusalén ta saátu chí Judea, ni̱ya̱ʼana nu̱ú tu̱ndóʼo tá xa̱a̱ ni̱xi̱ʼi̱ ta̱ Jesús. Tá sa̱kán ki̱xáʼa íyo congregación chí Jerusalén, ndeéní ki̱xáʼana íxandi̱va̱ʼana xíʼinna. Ta tá xa̱a̱ ni̱ya̱ʼa 20 ku̱i̱ya̱, na̱ cristiano na̱ xi̱ndoo chí Judea ni̱ya̱ʼana nu̱ú tu̱ndóʼo, saáchi xi̱kuma̱ní ña̱ kuxuna ta kǒo xu̱ʼún níxi̱yo ndaʼa̱na (Hech. 11:​27-30). Tá ku̱i̱ya̱ 61 va̱ʼava xi̱ndoona soo kixaa̱ iin tiempo ña̱ ixandi̱va̱ʼanína xíʼinna. Ta mií tiempo saá nda̱kiʼinna iin carta ña̱ chi̱ndaʼá ta̱ apóstol Pablo ndaʼa̱na ta va̱ʼaní chi̱ndeétáʼan ña̱yóʼo xíʼinna ña̱ va̱ʼa koo tu̱ʼvana. Mií tiempo ña̱ kuniñúʼu na̱ hebreo carta yóʼo kúú ña̱ ni̱xa̱a̱ña ndaʼa̱na, saáchi xa̱a̱ ku̱nu̱mí kixaa̱ tiempo ña̱ xo̱ʼvi̱na ta nu̱ú carta yóʼo ta̱ Pablo ta̱xira consejo ndaʼa̱na ña̱ chindeétáʼan xíʼinna ña̱ kundeé-inina xíʼin tu̱ndóʼo ña̱ ya̱ʼana nu̱ú. w24.09 8 párr. 1, 2

Tá xóʼvi̱yó na̱ hermanoyó kivi sandíkona-iniyó. Jehová xíniñúʼura na̱ hermano ña̱ va̱ʼa na̱ʼa̱ra nu̱úyó ña̱ kúni̱níra xínira miíyó. Na̱yóʼo kúnda̱a̱-inina xíʼin ña̱ ndóʼoyó ta íyona xíʼinyó tá yáʼayó nu̱ú tu̱ndóʼo tasaá sándi̱kona-iniyó. Ta sava yichi̱ sándi̱kona-iniyó tá káʼvina iin texto ña̱ Biblia nu̱úyó á kéʼéna oración xíʼinyó (Rom. 15:4). Sana iin ta̱ hermano á iin ñá hermana sándakaʼánna miíyó ndáa ki̱ʼva ndákanixi̱ní Jehová xa̱ʼa̱ sava ña̱ʼa. Ta ña̱yóʼo chindeétáʼanña xíʼinyó ña̱ kǒo ndi̱ʼiní-iniyó tasaá ndi̱ko-iniyó. Ta saátu kivi keʼéna inkaka ña̱ʼa xa̱ʼa̱yó, tá kúú ña̱ taxina ña̱ kuxuyó. Tá kúni̱ún ña̱ chindeétáʼanna xíʼún sana xíniñúʼu ka̱ʼún xíʼinna ña̱ keʼénaña. (Prov. 17:17). Soo sana kǒo xíni̱na ndáaña ndóʼún á ndáaña xíniñúʼún (Prov. 14:10). Ka̱ʼa̱n xíʼin na̱ migoún xa̱ʼa̱ ña̱ ndóʼún ta kivi ka̱ʼún xíʼinna ndáaña kivi keʼéna xa̱ʼún, ta saátu kivi natúʼún xíʼin iin á u̱vi̱ na̱ anciano na̱ va̱ʼaní kítáʼún xíʼin. Ta sava ná hermana va̱ʼaníka kúniná tá nátúʼunná xíʼin inka ná hermana ná xa̱a̱ chée xa̱ʼa̱ ña̱ ndóʼoná. w24.10 10 párr. 15, 16

Ku̱a̱ʼání na̱ yiví kíʼinna kuenta xíʼin ña̱ xíxina ta saátu kéʼéna ejercicio chi kǒo kúni̱na kiʼinna kue̱ʼe̱. Soo ni saá, ndákanixi̱nína ña̱ kixaa̱ iin ki̱vi̱ ña̱ kuvina saáchi kǒo ndátuna ña̱ kutakuna ndiʼi tiempo. Soo ta̱ Jesús ni̱ka̱ʼa̱nra nu̱ú Juan 3:16 xíʼin 5:24 ña̱ kiviva xa̱a̱yó kutakuyó ndiʼi tiempo. Iin ki̱vi̱, ta̱ Jesús ke̱ʼéra iin milagro ta xi̱niñúʼura loʼo kuití si̱ta̱váʼa xíʼin ti̱a̱ká ña̱ sa̱kúxura ku̱a̱ʼání na̱ yiví. Ndákanda̱ní-iniyó xíʼin ña̱ ke̱ʼéra, soo ña̱ ni̱ka̱ʼa̱nra tá ni̱ya̱ʼa inka ki̱vi̱ kúú ña̱ ndáyáʼviníka. Ta̱ Jesús nda̱kiʼinra ku̱a̱ʼa̱nra ñuu Capernaúm, chí yuʼú tá mar ña̱ Galilea ta ndiʼi na̱ yiví kán xi̱ndiku̱nna ni̱xa̱ʼa̱nna sa̱tára, ta kán ni̱ka̱ʼa̱nra xíʼinna ña̱ kivi ndataku na̱ yiví ta kutakuna ndiʼi tiempo (Juan 6:​39, 40). Ña̱ ni̱ka̱ʼa̱n ta̱ Jesús sánáʼa̱ña miíyó ña̱ ku̱a̱ʼání na̱ yiví na̱ xa̱a̱ ni̱xi̱ʼi̱ ndatakuna, ta miíún xíʼin na̱ veʼún á na̱ táʼún kivi kutakundó ndiʼi saá tiempo. w24.12 8 párr. 1, 2

Nu̱ú iin informe ña̱ sa̱kán ke̱ʼé na̱ Organización Mundial de la Salud káʼa̱nña ña̱ ku̱a̱ʼání na̱ ta̱a na̱ xa̱a̱ ti̱ndaʼa̱ kánina ñá síʼina, káʼa̱n-ndi̱va̱ʼana xíʼinñá ta sándakavana-iniñá xíʼin ña̱ kéʼéna. Sana viíníva kéʼéna xíʼinñá nu̱ú íyo ku̱a̱ʼá na̱ yiví, soo tá xa̱a̱ ndóo mitúʼunna íxandi̱va̱ʼana xíʼin ñá síʼina. ¿Nda̱chun íxandi̱va̱ʼa sava na̱ ta̱a na̱ xa̱a̱ ti̱ndaʼa̱ xíʼin ñá síʼina? Saáchi sana yivána xi̱ ixandi̱va̱ʼara xíʼin ñá síʼira, xa̱ʼa̱ ña̱kán nani tá válívína ki̱xáʼana ndákanixi̱nína ña̱ su̱ví ña̱ ndeéví kúú ña̱ ixandi̱va̱ʼana xíʼin ñá síʼina. Inkatu ta̱ xa̱a̱ ti̱ndaʼa̱ ndákanixi̱níra ña̱ xíniñúʼu ixandi̱va̱ʼara xíʼin ñá síʼira ña̱ va̱ʼa na̱ʼa̱ra nu̱úñá ña̱ miíra kúú ta̱ xáʼndachíñu ti̱xin veʼena. Á sanatu na̱ yivára kǒo nísanáʼa̱nara ña̱ ixato̱ʼóra ná ñaʼá. Savatu ta̱ ta̱a xíto ni̱ʼira pornografía á nu̱ú kée na̱ yiví chálá, ta xa̱ʼa̱ ña̱kán kíxáʼara ndákanixi̱níra ña̱ ná ñaʼá íyo kuitíná ña̱ va̱ʼa ku̱su̱nra xíʼinná ta va̱ása ndáyáʼviná. Ku̱a̱ʼání na̱ káʼvi va̱ʼa káʼa̱nna ña̱ xa̱ʼa̱ ña̱ xi̱ndikaa̱ kue̱ʼe̱ ña̱ COVID-19, ku̱a̱ʼáníka na̱ ta̱a ki̱xáʼana íxandi̱va̱ʼana xíʼin ñá síʼina. Soo ni nda̱a̱ ndáaka ki̱ʼva xa̱ʼnu ta̱ xa̱a̱ ti̱ndaʼa̱, va̱ása xíniñúʼu ixandi̱va̱ʼara xíʼin ñá síʼira. w25.01 8 párr. 2, 3

Ta̱ Jesús ni̱ka̱ʼa̱nra ndáa ley ña̱ ta̱xi Jehová ndaʼa̱ ta̱ Moisés kúú ña̱ xi̱ndayáʼviníka tá ka̱chira: “Kuʼvi̱-iniún kuniún Jehová Ndióxi̱ún xíʼin ndiʼi níma̱ún, xíʼin ndiʼi ña̱ tákún, xíʼin ndiʼi xi̱níún ta xíʼin ndiʼi ndeún” (Mar. 12:30). Xa̱ʼa̱ ña̱kán xíniñúʼu kuʼvi̱-iniyó kuniyó Jehová xíʼin ndiʼi níma̱yó á xíʼin ndiʼi ña̱ kúúmiíyó. Ña̱yóʼo kúni̱ kachiña ña̱ xíniñúʼu ndasakáʼnuyóra xíʼin ndiʼi ndee̱yó ta saátu chikaa̱yó ndee̱ keʼéyó ndiʼika ña̱ kivi keʼéyó ña̱ ndasakáʼnuyó iinlá miíra. Ta saátu náʼa̱yó ña̱ kúʼvi̱-iniyó xíniyó Jehová tá vií íyo ña̱ ndákanixi̱níyó. Ni va̱ása kiviví xa̱a̱yó kunda̱a̱ káxi iniyó xa̱ʼa̱ ndiʼi ña̱ ndákanixi̱ní Jehová, soo kiviva chikaa̱yó ndee̱ ña̱ ndakanixi̱níyó nda̱a̱ táki̱ʼva ndákanixi̱níra. Ta iin ña̱ kivi chindeétáʼan xíʼinyó kúú ña̱ kunda̱a̱-iniyó ndáa ki̱ʼva ndákanixi̱ní ta̱ Cristo, saáchi ta̱yóʼo va̱ʼaní ni̱na̱ʼa̱ra ndáa ki̱ʼva ndákanixi̱ní yivára xa̱ʼa̱ iin tá iin ña̱ʼa (1 Cor. 2:16). w25.03 8 párr. 1

Ta̱ Jesús xi̱kuura iin ta̱a ta̱ kǒo ku̱a̱chi kúúmií, nda̱a̱ táki̱ʼva ni̱xi̱yo ta̱ Adán tá kúma̱níka ki̱ʼvira ku̱a̱chi (1 Cor. 15:45). Ña̱kán, xa̱ʼa̱ ña̱ ni̱xi̱ʼi̱ra xa̱ʼa̱yó ndo̱o ku̱a̱chi ña̱ sa̱ndákoo ta̱ Adán ndaʼa̱yó, tasaá kivi ndikó tukuyó kuumiíyó ña̱ sa̱ndíʼi-xa̱ʼa̱ ta̱ Adán (Rom. 5:19). Xa̱ʼa̱ ña̱yóʼo, ta̱ Jesús kúú ta̱ ni̱xa̱a̱ ku̱u “ta̱ Adán ta̱ ki̱xi nu̱ú ndíʼi”. Ña̱kán kǒo xíniñúʼu kuvi tuku inka na̱ kǒo ku̱a̱chi kúúmií xa̱ʼa̱yó. Saáchi ta̱ Jesús “iin yichi̱ nda̱taxira miíra ndaʼa̱ Ndióxi̱ ta va̱ása ndikókara keʼéra ña̱yóʼo” (Heb. 7:27; 10:12). Ña̱ ndoo ku̱a̱chiyó kúni̱ kachiña ña̱ i̱xatu̱ʼva Ndióxi̱ iin ña̱ʼa ña̱ va̱ʼa ndakutáʼan vií tukuyó xíʼinra. Soo ña̱ va̱ʼa ndoo ña̱yóʼo xi̱niñúʼu chaʼvina xa̱ʼa̱yó, ta ta̱ cha̱ʼvi xa̱ʼa̱ ku̱a̱chiyó kúú ta̱ Jesús tá ni̱xi̱ʼi̱ra xa̱ʼa̱yó (Heb. 9:14). w25.02 5 párr. 12, 13

Tá yáʼayó nu̱ú tu̱ndóʼo xíniñúʼu ndakaʼányó ndáaña kúú ña̱ ndáyáʼvika. Ta̱ Ndi̱va̱ʼa káʼa̱nra ña̱ tá ná ya̱ʼayó nu̱ú tu̱ndóʼo saá kúú ña̱ sandákooyó ña̱ ndasakáʼnuyó Jehová. Ña̱kán, tá kúndeé-iniyó yáʼayó nu̱ú iin tu̱ndóʼo saá kúú ña̱ sákusi̱íníyó-ini Jehová (Job 1:​10, 11; Prov. 27:11). Tá nda̱kú íyo iniyó xíʼin Jehová saá kúú ña̱ kúʼvi̱-iniyó xíniyóra ta saátu náʼa̱yó nu̱ú ta̱ Ndi̱va̱ʼa ña̱ su̱ví ña̱ ndixa kúú ña̱ káʼa̱nra. Soo, ¿á sási na̱ chíñu nu̱ún ña̱ natúʼún xa̱ʼa̱ Ndióxi̱? ¿Á kúma̱ní xu̱ʼún nu̱ún? ¿Á kǒo xíín na̱ yiví kuniso̱ʼona ña̱ nátúʼún tá ku̱a̱ʼún predicación? ¿Á yáʼún nu̱ú inkaka tu̱ndóʼo? Tá yáʼún nu̱ú ndiʼi ña̱yóʼo kivi nda̱kú koo iniún xíʼin Jehová tasaá sakúsi̱íún-inira, saáchi chindeétáʼanvara xíʼinyó ya̱ʼayó nu̱ú tu̱ndóʼo. Mií Jehová taxi ndee̱ ndaʼún ña̱ kundeé-iniún. w24.06 22 párr. 9

¿Á xíni̱ún ndáa tentación kúú ña̱ kivi sandákava yóʼó? Ná kǒo ndakanixi̱níyó ña̱ nda̱a̱ ni iin ki̱vi̱ kǒo ki̱ʼviyó ku̱a̱chi (1 Juan 1:8). Ta̱ apóstol Pablo ni̱ka̱ʼa̱nra ña̱ nda̱a̱ na̱ va̱ʼaní ndásakáʼnu Jehová xíniñúʼu kiʼinna kuenta ña̱ va̱ʼa kǒo ndakavana ndaʼa̱ ku̱a̱chi (Gál. 6:1). Ña̱kán, xíniñúʼu vitá koo iniyó ta ndakuniyó ndáa ña̱ʼa kúú ña̱ íxayo̱ʼvi̱ xíʼinyó (2 Cor. 13:5). Tá xa̱a̱ xíni̱yó tentación ña̱ kivi sandákava miíyó, ¿ndáaña kivi keʼéyó? Xíniñúʼu ndakú koo iniyó ta kǒo keʼéyó ña̱yóʼo. Ná ndakanixi̱níyó xa̱ʼa̱ ña̱yóʼo, tiempo xi̱naʼá súkunní ni̱xi̱yo sava nama̱ ña̱ ni̱xi̱yo sa̱tá sava ñuu, soo ni súkunní ni̱xi̱yoña kiviva ki̱ʼvina chí yéʼé ta kaʼnína na̱ yiví. Ña̱kán, nu̱ú xi̱niñúʼu kundaanína kúú yéʼé. Ki̱ʼva saá xíniñúʼu keʼéyó, tá kúni̱yó keʼéyó iin ña̱ʼa soo kúnda̱a̱-iniyó ña̱ su̱ví ña̱ va̱ʼa kúúña ná kundaaníyó níma̱yó chi kivi sandákava miíyó ndaʼa̱ ku̱a̱chi (1 Cor. 9:27). w24.07 15 párr. 5-7

Nda̱a̱ táki̱ʼva káchi texto ña̱ ki̱vi̱ vitin, tá xa̱a̱ nátúʼunyó xíʼin na̱ yiví xa̱ʼa̱ Ndióxi̱ saá kúú ña̱ kéʼéyó ña̱ va̱ʼa. Tá xa̱a̱ káʼviyó tu̱ʼun Ndióxi̱ ta ndákanixi̱níyó xa̱ʼa̱ña saá kúú ña̱ xáa̱yó kándíxakayó Jehová. Tasaá kúnda̱a̱-iniyó nda̱chun kúú ña̱ ndáyáʼviní ña̱ natúʼunyó xíʼin na̱ yiví xa̱ʼa̱ra. Ña̱ va̱ʼa sakúaʼakayó xa̱ʼa̱ ña̱ káʼa̱n tu̱ʼun Ndióxi̱ kǒo xíniñúʼu kamaní kaʼviyóña chi xíniñúʼu taváyó tiempo ña̱ vií kaʼviyóña ta saátu ña̱ ndakanixi̱níyó xa̱ʼa̱ña. ¿Ndáaña kivi keʼún tá nda̱ni̱ʼún iin texto ña̱ kǒo kúnda̱a̱-iniún xíʼin? Ña̱ kivi keʼún kúú ña̱ nandukún xa̱ʼa̱ ña̱yóʼo nu̱ú Índice de las publicaciones Watch Tower á nu̱ú ña̱ Guía de estudio para los testigos de Jehová. Tá táváún tiempo ña̱ nandukún xa̱ʼa̱ ña̱ káʼviún saá kúú ña̱ kandíxakaún ña̱ káʼa̱n tu̱ʼun Ndióxi̱ (1 Tes. 5:21). Ta xa̱ʼa̱ ña̱ kándíxakaún ña̱ káʼa̱n Biblia saá kúú ña̱ kusi̱íníka-iniún ña̱ ka̱ʼún xíʼin inka na̱ yiví xa̱ʼa̱ ña̱ kándíxaún. w24.04 15 párr. 4, 5

Ta̱ David ka̱chira: “Saáchi miíún Jehová va̱ʼaní-iniún ta íyo tu̱ʼvaún ña̱ koo káʼnu-iniún xa̱ʼa̱ na̱ yiví” (Sal. 86:5). Ta̱ Miqueas ka̱chira: “¿Ndáana íyo nda̱a̱ táki̱ʼva íyo yóʼó Ndióxi̱ miíndi̱? Yóʼó íxakáʼnu-iniún xa̱ʼa̱ ku̱a̱chi na̱ kúú herenciaún” (Miq. 7:18). Saátu ni̱ka̱ʼa̱n ta̱ Isaías ña̱yóʼo: “Ta̱a ta̱ ndi̱va̱ʼa-ini ná sandákoora ña̱ va̱ása va̱ʼa kéʼéra ta ta̱a ta̱ kéʼé ña̱ va̱ása va̱ʼa ná sandákoora ña̱ va̱ása va̱ʼa ndákanixi̱níra; ná ndikóra nu̱ú Jehová ta ta̱yóʼo kundáʼvi-inira kunirara, ná ndikóra nu̱ú Ndióxi̱yó ta ta̱yóʼo ixakáʼnu-inira xa̱ʼa̱ ku̱a̱chira” (Is. 55:7). Ña̱ va̱ʼa kundiku̱n na̱ congregación ña̱ Corinto yichi̱ Jehová, xi̱niñúʼu ixakáʼnu-inina xa̱ʼa̱ ta̱a ta̱ ni̱ki̱ʼvi ku̱a̱chi ta na̱ʼa̱na ña̱ kúni̱na xíninara. Ni loʼo yo̱o̱ kúú ña̱ ki̱ta ta̱ ta̱a yóʼo ti̱xin congregación soo ña̱yóʼo chi̱ndeétáʼanña xíʼinra ña̱ ndandikó-inira. Ña̱kán va̱ása níxiniñúʼu taxi na̱ anciano ña̱ ya̱ʼa ku̱a̱ʼání tiempo tasaá chindeétáʼanna xíʼin ta̱ ta̱a yóʼo ña̱ ndikóra ti̱xin congregación. w24.08 17, 18 párr. 12, 13

Iin tiempo ña̱ ndáyáʼviní kúú ña̱ ndóoyó. Si̱lóʼo kúma̱ní ta ta̱ Jesús ndatiinra ku̱a̱chi xíʼin na̱ ndóo iníísaá nu̱ú ñuʼú. ¿Nda̱chun va̱ʼa kúnda̱a̱-iniyó ña̱ si̱lóʼo kúma̱ní? Saáchi ta̱ Jesús ni̱ka̱ʼa̱nra ña̱ xi̱nu iin profecía ta ña̱yóʼo koo señal nu̱úyó ña̱ xa̱a̱ íyora xíʼinyó, ta saátu ña̱ xa̱a̱ ndiʼi-xa̱ʼa̱ ndiʼi ña̱ʼa ña̱ va̱ása va̱ʼa íyo nu̱ú ñuʼú yóʼo (Mat. 24:3). Kivi kaʼviyó profecía yóʼo nu̱ú Mateo capítulo 24 xíʼin 25 ta saátu nu̱ú Marcos capítulo 13 xíʼin Lucas 21. Ña̱ va̱ʼa chindeétáʼan ta̱ Jesús xíʼinyó ña̱ koo tu̱ʼvayó, ni̱ka̱ʼa̱nra xa̱ʼa̱ u̱ni̱ ilustración: ilustración ña̱ nu̱ú kúú ña̱ káʼa̱n xa̱ʼa̱ tí ndikachi xíʼin ti̱xúʼú, ña̱ u̱vi̱ kúú ña̱ káʼa̱n xa̱ʼa̱ u̱xu̱ ná si̱ʼí kúa̱an ta ña̱ u̱ni̱ kúú ña̱ káʼa̱n xa̱ʼa̱ talento. Iin tá iin ña̱yóʼo náʼa̱ña ndáa ki̱ʼva íyo na̱ yiví ta ña̱yóʼo kúú ña̱ kiʼin ta̱ Jesús kuenta xíʼin tá ná ndatiinra ku̱a̱chi xíʼinna. w24.09 20 párr. 1, 2

Ta̱ Jesús kúú ta̱ chi̱núu iin yichi̱ ña̱ va̱ʼaní nu̱úyó, ta xa̱ʼa̱ ña̱ xi̱kuʼvi̱ní-inira xi̱xinira yivára ta saátu na̱ yiví xi̱keʼéra sava chiñu ña̱ va̱ʼa chindeétáʼanra xíʼin inkana tasaá ni̱na̱ʼa̱ra ña̱ vitání-inira (Mat. 20:28; Juan 13:​5, 14, 15). Ña̱kán ñaniyó, tá kúʼvi̱-iniún xíniún Jehová ta saátu na̱ yiví, mií Jehová chindeétáʼan xíʼún ña̱ xa̱ún keʼékaún chiñu nu̱úra á ña̱ xa̱ún koún siervo ministerial (1 Ped. 5:5). Na̱ yiví na̱ kǒo ndásakáʼnu Jehová, ndásakáʼnuna inka na̱ yiví xa̱ʼa̱ ña̱ kéʼéna. Soo su̱ví saáví kéʼé na̱ ndásakáʼnu Jehová. Ta̱ hermano ta̱ ndíku̱n yichi̱ ta̱ Jesús ta kúʼvi̱-inira xínira inkana, kǒo kúni̱ra kaʼndara chiñu nu̱ú inkana ta ni kǒo kúni̱ra na̱ʼa̱ra ña̱ ndáyáʼviníra. Tá iin ta̱ hermano ni̱nu kúnira ta kúni̱ra kundayáʼvira nu̱ú inkana kǒo kivi ni̱ʼira iin chiñu ti̱xin congregación, saáchi tá ná ka̱ʼa̱nna xíʼinra keʼéra iin ña̱ʼa sana kǒo kandíxara keʼéraña ta kǒo kivi chindeétáʼanra xíʼin na̱ hermano (Juan 10:12). w24.11 15 párr. 6, 7

Ndiʼi congregación ña̱ íyo iníísaá ñuyǐví íxama̱ní ku̱a̱ʼá ta̱a ta̱ kachíñu nu̱ú Jehová (Efes. 4:8). Tá xa̱a̱ nda̱kuchiún ¿á kivi chikaún ndee̱ ña̱ kachíñu ku̱a̱ʼákaún nu̱ú Jehová? (Prov. 3:27). ¿Á xa̱a̱ chíka̱ún ndee̱ ña̱ va̱ʼa xa̱ún koún siervo ministerial? Tá xa̱a̱ kúún siervo ministerial, ¿á xa̱a̱ chíka̱ún ndee̱ ña̱ xa̱ún koún anciano? ¿Á kivi nasamaún ña̱ kéʼún ña̱ va̱ʼa ku̱ʼún escuela ña̱ naní Escuela para Evangelizadores del Reino? Tá ná ku̱ʼún escuela yóʼo, va̱ʼaníka kuniñúʼu ta̱ Jesús yóʼó ña̱ keʼún chiñu ti̱xin ñuu Jehová. Tá túviún ña̱ kǒo kúchiñún keʼúnña ka̱ʼa̱n xíʼin Jehová, ndukú espíritu santo nu̱úra ña̱ va̱ʼa viíní keʼún chiñu ña̱ taxina ndaʼún (Luc. 11:13). Ta̱ Jesús ni̱ka̱ʼa̱nra ña̱ koo na̱ ta̱a na̱ chindeétáʼan xíʼinyó tiempo nu̱ú ndíʼi vitin, ta ña̱yóʼo náʼa̱ña ña̱ viíní níʼira yichi̱ nu̱úyó (Mat. 28:20). Ta̱ Jesús ta̱ kúú Rey nu̱úyó, kúni̱níra xínira miíyó ta va̱ʼaní-inira xíʼinyó, ta xítora ndáaña xíniñúʼuyó ña̱kán táxira na̱ hermano na̱ chindeétáʼan xíʼinyó. Táxiníyó tíxa̱ʼvi ndaʼa̱na xa̱ʼa̱ chiñu ña̱ kéʼéna. w24.10 23 párr. 16, 17

¿Ndáaña kundoʼo na̱ ndásakáʼnu Ndióxi̱ na̱ ndeéní xóʼvi̱ tiempo vitin? Jehová káʼa̱nra ña̱ kǒo ndakaʼánkayó xa̱ʼa̱ ña̱ sáxo̱ʼvi miíyó tiempo vitin chi sandíʼi-xa̱ʼa̱raña (Is. 65:16) Tiempo vitin va̱ʼaní kúniyó ta kǒo ndíʼi̱-iniyó tá xáʼa̱nyó reunión, ta nda̱a̱ nándósó-iniyó xa̱ʼa̱ ndiʼi ña̱ kini ña̱ kúu nu̱ú ñuʼú yóʼo. Ña̱kán, ¿ndáaña xíniñúʼu keʼéyó tasaá viíní kutáʼanyó xíʼin na̱ hermanoyó? Xíniñúʼu kuʼvi̱-iniyó kunitáʼanyó, ña̱ si̱í koo iniyó, ña̱ táxi̱n koo iniyó, ña̱ vií koo iniyó xíʼin ña̱ va̱ʼa koo iniyó (Gál. 5:​22, 23). Kúsi̱íní-iniyó ña̱ ñúʼuyó ti̱xin ñuu Ndióxi̱. Tá ndiʼi tiempo ná ndasakáʼnuyó Jehová, saá kúúña kotoyó ña̱ saxínura ña̱ ni̱ka̱ʼa̱nra ña̱ ndasaxa̱ára ndiví ta saátu nu̱ú ñuʼú yóʼo. w24.04 22 párr. 9, 10

Tá kíxáʼa iin ta̱ hermano xíkara xíʼin iin ñá hermana kúsi̱íní-inina, soo su̱ví si̱ki kúú ña̱yóʼo chi yóʼo kúú nu̱ú kivi ndaka̱xinna á tindaʼa̱na. Ki̱vi̱ tíndaʼa̱na kéʼéna iin voto nu̱ú Jehová nu̱ú káʼa̱n xíʼin táʼanna ña̱ ixato̱ʼó táʼanna ta kuʼvi̱-inina kunitáʼanna nda̱a̱ ná kuvina. Soo, siʼna xíniñúʼu viíní ndakanixi̱nína tá xa̱a̱ kúni̱na keʼéna voto yóʼo á inkakaña. Tá kíxáʼa xíka xíʼin táʼanna ña̱yóʼo chindeétáʼan xíʼinna ña̱ kunda̱a̱-inina ndáa ki̱ʼva íyo na̱ yiví kán. Soo, tá sa̱ndákoo táʼanna su̱ví iin ku̱a̱chiví kúú ña̱yóʼo, saáchi tiempo ña̱ ni̱xi̱ka xíʼin táʼanna chi̱ndeétáʼanña xíʼinna ña̱ va̱ʼa kunda̱a̱-inina á tindaʼa̱na xíʼin na̱ yiví kán á kǒo tindaʼa̱na xíʼinna. ¿Nda̱chun xíniñúʼu kunda̱a̱-iniyó ndáa xa̱ʼa̱ kúú ña̱ xíka xíʼin táʼanna? Saáchi tá iin na̱ kúa̱an ndixa kúni̱na tinda’a̱na, saá kúú ña̱ kíxáʼana xíka xíʼin táʼanna. w24.05 26, 27 párr. 3, 4

Sava na̱ va̱lí na̱ ndásakáʼnu Ndióxi̱ sava yichi̱ kivi yíʼvina á kúkaʼan nu̱úna ka̱ʼa̱nna xa̱ʼa̱ ña̱ ndásakáʼnuna Ndióxi̱. Sana yíʼvina tá kíxáʼana káʼa̱nna xa̱ʼa̱ ña̱ evolución ti̱xin escuela. Na̱ maestrona kivi ka̱ʼa̱nna xíʼinna ña̱ ndixava kúú ña̱ evolución ta su̱ví iin cuento kúúña. ¿Ndáaña kivi keʼéndó ña̱ va̱ʼa chindeétáʼanndó xíʼin na̱ va̱lí se̱ʼendó ña̱ kǒo yi̱ʼvína ka̱ʼa̱nna xa̱ʼa̱ ña̱ kándíxana? Na̱ va̱lí se̱ʼendó va̱ása xíniñúʼu kukaʼan nu̱úna xa̱ʼa̱ ña̱ ndásakáʼnuna Ndióxi̱ ta̱ i̱xava̱ʼa ndiʼi ña̱ʼa. Ku̱a̱ʼání na̱ científico ndákunina ña̱ su̱ví iin kama níkuva̱ʼa mií ndiʼi ña̱ʼa. Xa̱ʼa̱ ña̱ viíní ku̱vaʼa ndiʼi ña̱ʼa ta ndíchiní ku̱vaʼaña, na̱ científico kúnda̱a̱-inina ña̱ íyo iin na̱ ndíchiní i̱xava̱ʼa ndiʼi ña̱yóʼo, xa̱ʼa̱ ña̱kán va̱ása kándíxana ña̱ evolución. Iin ña̱ kivi chindeétáʼan xíʼin na̱ va̱lí se̱ʼendó ña̱ kandíxakana Ndióxi̱ kúú ña̱ kunda̱a̱-inina ndáaña chi̱ndeétáʼan xíʼin inkaka na̱ hermano ña̱ ni̱xa̱a̱na ka̱ndíxana ña̱ íyo iin na̱ i̱xava̱ʼa ndiʼi ña̱ʼa. w24.12 18 párr. 14, 15

Ta̱ Jesús xi̱kandíxavara ña̱ koo sava na̱ yiví na̱ kuniso̱ʼo ña̱ xi̱natúʼunra xa̱ʼa̱ Ndióxi̱, ta ña̱yóʼo chi̱ndeétáʼan xíʼinra ña̱ ndakundeéra kusi̱íka-inira natúʼunra xíʼin na̱ yiví. Tá xa̱a̱ kúni̱ ndiʼi ña̱ ku̱i̱ya̱ 30, ta̱ Jesús ki̱ʼinra kuenta ña̱ ni̱xi̱yo ku̱a̱ʼání na̱ yiví na̱ xi̱kuni̱ kunda̱a̱-ini xa̱ʼa̱ Ndióxi̱. Ta chi̱táʼanra na̱ yiví yóʼo xíʼin ñuʼú nu̱ú chi̱ʼina trigo, ña̱ xa̱a̱ íyo tu̱ʼva ña̱ sakéenaña (Juan 4:35). Tá ni̱ya̱ʼa ki̱ʼva iin ku̱i̱ya̱, ta̱ Jesús ni̱ka̱ʼa̱nra xíʼin na̱ discípulora: “Ku̱a̱ʼání kúú ña̱ sákeeyó” (Mat. 9:​37, 38). Ta tá ni̱ya̱ʼa loʼo tiempo ndi̱kó tukura ni̱ka̱ʼa̱nra ña̱yóʼo: “Ku̱a̱ʼání kúú ña̱ sákeeyó, [...] ka̱ʼa̱nndó xíʼin ta̱ ndísochíñu xíʼin ña̱ sákeendó ña̱ ná chindaʼára ku̱a̱ʼáka na̱ sákee” (Luc. 10:2). Ta̱ Jesús xi̱kunda̱a̱-inira ña̱ kiviva xa̱a̱ ku̱a̱ʼání na̱ yiví kandíxana tu̱ʼun Ndióxi̱. Ña̱kán tá xi̱xaa̱ savana xi̱sakúaʼana xa̱ʼa̱ Jehová, xi̱kusi̱íní-inira. Ta̱ Jesús ni̱ka̱ʼa̱nra xíʼin na̱ discípulora ña̱ ná kǒo ndakava-inina ta ná ndakundeéna natúʼunna xíʼin na̱ yiví, chi kiviva xa̱a̱na sakúaʼana xa̱ʼa̱ Ndióxi̱ ta ña̱yóʼo chindeétáʼan xíʼinna ña̱ kusi̱í-inina keʼéna chiñu yóʼo. w25.03 18, 19 párr. 15, 16

Jehová ndáara miíyó. Tá kíxáʼa ndeéní kúun sa̱vi̱ iin na̱ yiví kivi ki̱ʼvina ini iin kava̱ á ti̱xin iin yu̱u̱ káʼnu tasaá kǒo ña̱ kundoʼona. Ta saátu miíyó tá yáʼayó nu̱ú tu̱ndóʼo kivi kuyatinyó nu̱ú Jehová ta ka̱ʼa̱nyó xíʼinra ña̱ chindeétáʼanra xíʼinyó. Va̱’aní ndáara miíyó ta kǒo táxira ña̱ kundoʼoyó ña̱ʼa ña̱ kivi saxóʼvi̱ miíyó. Ta saátu chí nu̱únínu sandíʼi-xa̱ʼa̱ra ndiʼi ña̱ sáxo̱ʼvi̱ miíyó ta si̱íní kooyó (Ezeq. 34:​25, 26). Tá ndáa-iniyó Jehová, saá kúú ña̱ káʼa̱nyó xíʼinra ña̱ chindeétáʼanra xíʼinyó. Tá ná keʼéyó ña̱yóʼo Ndióxi̱ va̱ʼaní sandíkora-iniyó ta kǒo ña̱ kundi̱ʼi̱-iniyó xa̱ʼa̱ (Filip. 4:​6, 7). Jehová ndiʼi tiempo íyora ña̱ chindeétáʼanra xíʼinyó (Is. 26:​3, 4). Sáxi̱nura ña̱ káʼa̱nra xíʼinyó chi ndiʼi tiempo íyora saátu xíniso̱ʼora oración ña̱ káʼa̱nyó xíʼinra ta chíndeétáʼanra xíʼinyó. Ta kándíxayóra chi nda̱kúní íyo inira xíʼin na̱ ndásakáʼnu miíra (2 Sam. 22:26). Kǒo nándosó-ini Jehová xa̱ʼa̱ ña̱ kéʼéyó ta ndiʼi tiempo taxira ku̱a̱ʼání bendición ndaʼa̱yó (Heb. 6:10; 11:6). w24.06 27 párr. 4-6

¿Ndáaña keʼéyó ña̱ va̱ʼa kooyó nda̱a̱ táki̱ʼva ni̱xi̱yo na̱ rey na̱ nda̱kúní ni̱xi̱yo ini xíʼin Jehová ta saátu ña̱ kuʼvi̱-iniyó kuniyóra xíʼin ndiʼi níma̱yó? Kǒo xíniñúʼu keʼéyó ni iin ña̱ʼa ña̱ kivi sakúxíka miíyó nu̱ú Jehová. Tá kúú ña̱ kusíkíyó nu̱ú va̱xi ña̱ kini, ña̱ kuni̱níyó kuumiíyó ku̱a̱ʼá xu̱ʼún á ña̱ kutáʼanyó xíʼin na̱ kǒo ndásakáʼnu Jehová. Tá xa̱a̱ ndóʼoyó ña̱yóʼo ndi̱ku̱n kama ná nasamayó ña̱ kéʼéyó (Mat. 5:​29, 30). Níma̱yó kivi sandáʼviña miíyó, ña̱kán kǒo xíniñúʼu ndakanixi̱níyó ña̱ xa̱ʼa̱ ña̱ kéʼéyó ku̱a̱ʼá chiñu nu̱ú Jehová kǒo ni iin ña̱ʼa kivi sakúxíka miíyó nu̱úra. Ndakanixi̱ní ña̱ ndíka̱ún iin yuku̱ ta niʼníní, ña̱kán ña̱ va̱ʼa ndi̱ko-iniún xíʼún ti̱kui̱í. Soo, ¿ndáaña kundoʼún tá ndivíyaa ná kundika̱ún nu̱ú kaʼní? Sana kixáʼa yi̱chi̱ tuku iniún ta kuni̱ún koʼún ti̱kui̱í. ¿Ndáaña sákuaʼayó xíʼin ña̱yóʼo? Kǒo xíniñúʼu keʼé kuitíyó ña̱ʼa ña̱ kivi sakúyatin miíyó nu̱ú Jehová. Tá iníí ki̱vi̱ ná kundika̱a̱yó nu̱ú kaʼni̱ kuvitávayó, ña̱kán xíniñúʼu ndukúyó nu̱ú kivi kusa̱ʼviyó. Ta saátu xíniñúʼu keʼéyó xíʼin ña̱ ndásakáʼnuyó Jehová, ná kundaayó miíyó nu̱ú ña̱ʼa ña̱ kivi sakúxíka miíyó nu̱úra (Efes. 2:2). w24.07 21 párr. 6, 7

Ndeéní ni̱xo̱ʼvi̱ ta̱ Jesús, ni iin miíyó ta̱ʼán ya̱ʼayó nu̱ú ña̱yó’o. Ni̱xo̱ʼvi̱níra ta xi̱niñúʼu kundeé-inira. Ni i̱xandi̱va̱ʼanína xíʼin ta̱ Jesús soo va̱ása nísa̱a̱ra xíʼinna. Nu̱úka ña̱ ka̱ʼa̱nra xíʼin yivára ña̱ ná taxira castigo ndaʼa̱ na̱ soldado kán, ta̱ Jesús ni̱ka̱ʼa̱nra: “Yivá, koo káʼnu-iniún xa̱ʼa̱na saáchi kǒo xíni̱na ndáaña kéʼéna” (Luc. 23:34). Ta saátu ná keʼéyó oración xa̱ʼa̱ na̱ íxandi̱va̱ʼa xíʼinyó, chi ña̱yóʼo chindeétáʼanña xíʼinyó ña̱ va̱ása sa̱a̱níyó tasaá kǒo ndakaʼánníkayó xa̱ʼa̱ ña̱ ke̱ʼéna xíʼinyó. Va̱ása xíni̱yó ndáaña kundoʼoyó á ndáana ixandi̱va̱ʼa xíʼinyó, soo ni nda̱a̱ ndáaka ña̱ ná kuu, ná kǒo sandákooyó ña̱ ka̱ʼa̱nyó xíʼin Jehová ña̱ chindeétáʼanra xíʼinyó. Ná chikaa̱yó ndee̱ ña̱ keʼéyó táki̱ʼva ke̱ʼé ta̱ Jesús tá i̱xandi̱va̱ʼana xíʼinra, ta saátu ná keʼéyó ña̱ káʼa̱n tu̱ʼun Ndióxi̱. Tá saá ná keʼéyó, ku̱a̱ʼání bendición taxi Jehová ndaʼa̱yó (1 Ped. 3:​8, 9). w24.11 6 párr. 16; 7 párr. 17, 19

Jehová va̱ása táxira keʼéyó ndiʼi ña̱ kúni̱ miíyó ta ni va̱ása kútóora ña̱ ki̱ʼviyó ku̱a̱chi (Sal. 5:​4-6). Ta̱kán kúni̱ra ña̱ ná keʼéyó ña̱ káʼa̱n tu̱ʼunra soo kúnda̱a̱va-inira ña̱ kúúyó na̱ yiví ku̱a̱chi ta xa̱ʼa̱ ña̱kán íxayo̱ʼvi̱ña xíʼinyó ña̱ viíní keʼéyó ndiʼi ña̱ káʼa̱nra (Sal. 130:​3, 4). Soo saátu kúndasíra xínira na̱ kǒo íxato̱ʼó ña̱ káʼa̱nra ta ndákanixi̱nína ña̱ kivi keʼéna ña̱ kini ña̱ kǒo kúkaʼan nu̱úna xíʼin xa̱ʼa̱ ña̱ va̱ʼaní-inira (Jud. 4). Biblia káʼa̱nña ña̱ sandíʼi-xa̱ʼa̱va Ndióxi̱ na̱ kǒo íxato̱ʼó-ñaʼá tá ná koo ku̱a̱chi ña̱ Armagedón (2 Ped. 3:7; Apoc. 16:16). Va̱ása kúni̱ví Jehová ña̱ ndiʼi-xa̱ʼa̱ nda̱a̱ ni iin na̱ yiví. Biblia káʼa̱nña ña̱ kúni̱ra ná ndikó-ini ndiʼina (2 Ped. 3:9). Na̱ anciano ndíku̱nna yichi̱ Jehová ta kúee íyo inina chi kúni̱na chindeétáʼanna xíʼin na̱ ni̱ki̱ʼvi iin ku̱a̱chi ndeé ña̱ ndikó-inina ta kutáʼan tukuna xíʼinra. w24.08 26 párr. 1, 2

Kúni̱níyó xíniyó inkana ña̱kán chíndeétáʼanyó xíʼinna nda̱a̱ táki̱ʼva kéʼé Jehová. ¿Á xíni̱ún iin na̱ hermano na̱ kúma̱ní ña̱ kuxu á ti̱ko̱to̱ ña̱ kundixina? Kivi kuniñúʼu Jehová yóʼo ña̱ chindeétáʼún xíʼinna. Na̱ yiví xíni̱na ña̱ na̱ testigo Jehová va̱ʼa-inina ta chíndeétáʼanna xíʼin inkana tá yáʼana nu̱ú tu̱ndóʼo. Ná ka̱ʼa̱nyó xa̱ʼa̱ ña̱ ku̱u tá xi̱ndikaa̱ ña̱ pandemia COVID-19. Íyo na̱ hermano na̱ chi̱ndeétáʼan xíʼin na̱ ni̱ya̱ʼa nu̱ú tu̱ndóʼo ta ta̱xina ña̱ kuxuna, ti̱ko̱to̱ kundixina xíʼin inkaka ña̱ʼa ña̱ xíniñúʼuna. Saátu va̱ʼaní-inina chi ta̱xina donación nda̱ʼa na̱ ñuu Ndióxi̱ ña̱ va̱ʼa kuniñúʼunaña ña̱ chindeétáʼanna xíʼin na̱ ñaniyó xíʼin na̱ ku̱ʼvayó na̱ ndóo iníísaá nu̱ú ñuʼú. Ndiʼi na̱yóʼo ke̱ʼéna ña̱ káʼa̱n Hebreos 13:16: “Ta saátu kǒo nandósóndó ña̱ keʼéndó ña̱ va̱ʼa xíʼin inkana ni ña̱ taxindó ña̱ kúúmiíndó ndaʼa̱ inkana chi ña̱yóʼo nda̱a̱ táki̱ʼva íyo ña̱ sóko̱ndó ndaʼa̱ Ndióxi̱ saá íyoña ta kúsi̱íní-inira xíʼinña”. w24.09 27 párr. 6, 7

Ndakanixi̱ní ña̱ xíkaún ndúkún iin chiñu nu̱ú kachíñún ña̱ va̱ʼa taxiún ña̱ xíniñúʼu na̱ veʼún, tasaá nda̱ni̱ʼún u̱vi̱ lugar nu̱ú kivi kachíñún. Tá kúma̱níka kiʼún chiñu yóʼo xíniñúʼu ndakanixi̱níún ndáa chiñu kúúña, ndáa hora kúú ña̱ xíniñúʼu kachíñún ta saátu á yatin á xíká kíndo̱oña. Tá ki̱ʼún kuenta ña̱ kǒo yáʼandosoví u̱vi̱ saá chiñu yóʼo ña̱ káʼa̱n Biblia, sana ndaka̱xinvaún kiʼún iin chiñu yóʼo xa̱ʼa̱ ña̱ kútóúnña á xa̱ʼa̱ ña̱ ku̱a̱ʼáka xu̱ʼún chaʼvina yóʼó. Soo íyo inkaka ña̱ xíniñúʼu kiʼún kuenta xíʼin tá kúma̱níka kiʼún chiñu yóʼo. Tá ná kiʼún iin chiñu yóʼo, ¿á kasiña nu̱ú ña̱ ku̱ʼún reunión? ¿Á kasiña nu̱ún ña̱ chindeétáʼún xíʼin na̱ veʼún ta saátu ña̱ sanáʼúnna xa̱ʼa̱ Jehová? Tá ná ndakanixi̱níún xa̱ʼa̱ ña̱yóʼo, chindeétáʼanña xíʼún keʼún ña̱ ndáyáʼvika, tá kúú ña̱ ndasakáʼnún Jehová ta saátu ña̱ taxiún ña̱ xíniñúʼu na̱ veʼún, nu̱úka ña̱ kundi̱ʼiní-iniún xa̱ʼa̱ xu̱ʼún. Tasaá kúú ña̱ va̱ʼaní koo ña̱ ndaka̱xiún keʼún ta mií Jehová taxi ku̱a̱ʼání bendición ndaʼún. w25.01 17 párr. 11-13

Ni i̱xandi̱va̱ʼana xíʼún, soo kivi kandíxaún ña̱ kúni̱níva Jehová xínira yóʼó ta ndáyáʼviníún nu̱úra. Sana ndákava-iniún, soo ndakaʼán ña̱ mií Jehová xi̱to ña̱ va̱ʼa ña̱ ndíkaa̱ níma̱ún ta xi̱kuni̱ra ña̱ kachíñún nu̱úra (Juan 6:44). Ndiʼi tiempo chindeétáʼan Jehová xíʼún saáchi kúni̱níra xínira yóʼó. Ña̱ ke̱ʼé ta̱ Jesús chíndeétáʼanña xíʼinyó kunda̱a̱-iniyó ndáaña ndóʼo Jehová. Tá ni̱xi̱yo ta̱ Jesús nu̱ú ñuʼú yóʼo ki̱ʼinra kuenta ña̱ xi̱ ixandi̱va̱ʼana xíʼin na̱ yiví ta xi̱kundasína xi̱xininana, ña̱kán xi̱kundáʼvi-ini ta̱ Jesús xi̱xinirana (Mat. 9:​9-12). Iin yichi̱ iin ñaʼá ku̱yatinñá ta ti̱inñá ti̱ko̱to̱ ta̱ Jesús chi xi̱kuni̱ñá ndaʼañá, ña̱kán ta̱ Jesús sa̱ndíkora-iniñá ta ni̱ka̱ʼa̱nra xíʼinñá ña̱ va̱ʼaní ke̱ʼéñá chi kándíxañá Ndióxi̱ (Mar. 5:​25-34). Ta̱ Jesús kéʼéra ña̱ kéʼé yivára (Juan 14:9). Ña̱kán kivi kandíxaún ña̱ ndáyáʼviníún nu̱ú Jehová ta kíʼinra kuenta xíʼin ña̱ va̱ʼa ña̱ kéʼún, tá kúú ña̱ kándíxaníúnra ta saátu ña̱ kúʼvi̱ní-iniún xíniúnra. w24.10 7 párr. 4, 5

Ku̱a̱ʼání tu̱ndóʼo ña̱ yo̱ʼvi̱ní ni̱ya̱ʼa ta̱ David nu̱ú ta xa̱ʼa̱ ña̱kán xi̱xakura. Ku̱a̱ʼání kúú na̱ xi̱saa̱-ini xi̱ni ta̱ David, nda̱a̱ na̱ veʼera xíʼin na̱ migora kǒo níxiinkana kutáʼanna xíʼinra ta xi̱kuni̱na ixandi̱va̱ʼana xíʼinra (1 Sam. 19:​10, 11; 2 Sam. 15:​10-14, 30). Ta̱ David ka̱ʼyira ña̱ ndo̱ʼora: “Xa̱a̱ ku̱naaníi̱ ña̱ xákui̱; ndiʼi ñuú xákui̱, xa̱a̱ nda̱xin xi̱toi̱ xíʼin ti̱kui̱í nu̱úi̱” (Sal. 6:6). Ni ku̱a̱ʼání tu̱ndóʼo ni̱ya̱ʼa ta̱ David nu̱ú soo xi̱kunda̱a̱-inira ña̱ xi̱kuʼvi̱níva-ini Jehová xi̱xinirara. Mií ta̱ David ka̱ʼyi ña̱yóʼo: “Kuniso̱ʼova Jehová ña̱ xákui̱” (Sal. 6:8). Texto ña̱ ki̱vi̱ vitin náʼa̱ña nu̱úyó ña̱ kúni̱níva Jehová xínira miíyó ta ndíʼi̱ní-inira xa̱ʼa̱yó. Ta̱ David ni̱ka̱ʼa̱nra ña̱ nda̱a̱ táki̱ʼva íyo ña̱ ndákiʼin Jehová ti̱kui̱í nu̱úra ta táanva̱ʼarará ini iin ki̱si saá íyoña. Xi̱kunda̱a̱va-ini ta̱ David ña̱ xi̱xito Jehová ndiʼi tu̱ndóʼo ña̱ xi̱yaʼara nu̱ú ta xi̱ndakaʼánra xa̱ʼa̱ña, soo kǒo níxi̱xini̱ kuití Jehová ña̱yóʼo chi saátu xi̱kunda̱a̱-inira ndáaña xi̱ndoʼo ta̱ David. w24.12 22 párr. 11, 12