Noviembre

Na̱ anciano xíniñúʼu chikaa̱na ndee̱ ña̱ kundiku̱nna yichi̱ Jehová ta kundáʼvi-inina kunina na̱ ke̱e ti̱xin congregación. Tá kúú tá xi̱ ixaso̱ʼo na̱ israelita nu̱ú Jehová, va̱ása níxi̱ndatura ña̱ ná ndikó miína nu̱úra chi siʼna miíra kúú ta̱ xi̱kuni̱ chindeétáʼan xíʼinna ni va̱ása níxi̱naʼa̱na ña̱ kúni̱na ndikó-inina. Jehová xi̱niñúʼura ña̱ ndo̱ʼo ta̱ profeta Oseas ña̱ va̱ʼa na̱ʼa̱ra ña̱ kúndáʼvi-inira xínira na̱ ñuura. Ni̱ka̱ʼa̱nra xíʼin ta̱ Oseas ña̱ ná ndakiʼin tukura ñá síʼira ni xi̱kiʼviñá ku̱a̱chi (Os. 3:1; Mal. 3:7). Na̱ anciano ndíku̱nna yichi̱ Jehová, saáchi xíʼin ndiʼi níma̱na kúni̱na ná ndikó-ini na̱ ni̱ki̱ʼvi ku̱a̱chi ta ná ndikóna ñuura. Ta chíndeétáʼanna xíʼinna ña̱ va̱ása ixayo̱ʼvi̱ña xíʼinna ndikóna nu̱ú Jehová. Tá ni̱ka̱ʼa̱n ta̱ Jesús xa̱ʼa̱ ta̱ loʼo ta̱ nda̱ñúʼu, tá xi̱ni yivárara “xínura ni̱xa̱ʼa̱nra nda̱a̱ nu̱ú va̱xi ta̱ loʼo (se̱ʼera) kán ta nu̱mirara ta chi̱tóra nu̱úra” (Luc. 15:20). Xa̱ʼa̱ ña̱ xi̱kuʼvi̱ní-inira xi̱xinira se̱ʼera, kǒo níxi̱ndatura ña̱ ndukúra ña̱ káʼnu-ini nu̱úra ta siʼnaka miíra ku̱yatin nu̱ú se̱ʼera. w24.08 28 párr. 7, 8

Táki̱ʼva káchi versículo yóʼo ndíchiní Jehová ta va̱ʼaní-inira chi táxiraña ndaʼa̱yó, ta tá táxira ña̱ ndíchi ndaʼa̱yó kǒo káʼa̱nra xa̱ʼa̱ña ta ni kǒo ndáʼyi̱ra nu̱úyó. Ta kǒo sándakavara-iniyó tá káʼa̱nyó xíʼinra ña̱ chindeétáʼanra xíʼinyó nu̱úka ña̱yóʼo káʼa̱nra xíʼinyó ña̱ ná ndukúyó ña̱ ndíchi nu̱úra (Prov. 2:​1-6). Ta miíyó, ¿á kivi keʼéyó nda̱a̱ táki̱ʼva kéʼé Jehová ta sanáʼa̱yó inkana ña̱ xíni̱yó? (Sal. 32:8). Kiviva keʼéyóña, chi íyoníva na̱ kivi chindeétáʼanyó xíʼin. Tá kúú, kivi sanáʼa̱yó na̱ publicador xa̱á ndáa ki̱ʼva natúʼunna xíʼin na̱ yiví xa̱ʼa̱ Ndióxi̱. Ta saátu na̱ anciano va̱ʼaní chíndeétáʼanna xíʼin na̱ siervo ministerial á xíʼin inkaka na̱ hermano ña̱ va̱ʼa viíní keʼéna chiñu ti̱xin congregación. Ta ku̱a̱ʼání na̱ ñaniyó xíʼin ná ku̱ʼvayó na̱ xíni̱ ixava̱ʼa veʼe, sánáʼa̱na inkana ña̱ va̱ʼa viíní keʼéna chiñu yóʼo ti̱xin salón ta saátu ti̱xin inkaka veʼe ña̱ kúúmií na̱ ñuu Ndióxi̱. w24.09 28, 29 párr. 11, 12

Ña̱ va̱ʼa xa̱a̱ iin ta̱ hermano koora anciano, xíniñúʼu viíní keʼéra ndiʼi ña̱ʼa ña̱ va̱ʼa kǒo ka̱ʼa̱nna ña̱ va̱ása va̱ʼa xa̱ʼa̱ra (1 Tim. 3:2). Ña̱yóʼo kúni̱ kachiña ña̱ ndiʼi na̱ hermano xíniñúʼu ka̱ʼa̱n va̱ʼana xa̱ʼa̱ra, ta saátu nda̱a̱ na̱ kǒo ndásakáʼnu Ndióxi̱ xíniñúʼu ka̱ʼa̱n va̱ʼa xa̱ʼa̱ra. Sana sava na̱ yiví ka̱ʼa̱nvana ña̱ va̱ása va̱ʼa xa̱ʼa̱ra xa̱ʼa̱ ña̱ ndásakáʼnura Ndióxi̱. Soo ña̱ kǒo xíniñúʼu keʼéra kúú ña̱ sandáʼvira á ña̱ keʼéra ña̱ kini, chi tá ná keʼéra ña̱yóʼo saá kúú ña̱ kixáʼana ka̱ʼa̱nna ña̱ va̱ása va̱ʼa xa̱ʼa̱ Ndióxi̱ (Dan. 6:​4, 5). Ndakanixi̱ní xa̱ʼa̱ pregunta yóʼo: “¿Á va̱ʼa káʼa̱n na̱ hermano xíʼin inka na̱ yiví xa̱ʼíi̱?”. Xíniñúʼu keʼún ña̱ va̱ʼa. Ña̱yóʼo kúni̱ kachiña, kotoún ña̱ va̱ʼa ña̱ kéʼé inkana ta ka̱ʼún xíʼinna ña̱ va̱ʼaní kéʼéna (Tito 1:8). Saátu kúni̱ kachiña ña̱ kusi̱í-iniún tá kéʼún ña̱ va̱ʼa xa̱ʼa̱ inkana. Ta sava yichi̱ nda̱a̱ kivi keʼún ku̱a̱ʼáka ña̱ʼa xa̱ʼa̱na, ña̱ kǒo níndakanixi̱nína keʼún xa̱ʼa̱na. ¿Nda̱chun ndáyáʼviní ña̱ koo na̱ anciano saá? Saáchi xíniñúʼu tavána tiempo ña̱ va̱ʼa kundaana na̱ congregación ta saátu ña̱ kundaana na̱ veʼena (1 Ped. 5:​1-3). Tá ná keʼéna ña̱yóʼo saá kúú ña̱ kusi̱íníka-inina (Hech. 20:35). w24.11 20, 21 párr. 3-5

Ndáyáʼviní chiñu ña̱ kéʼé na̱ siervo ministerial ti̱xin congregación. Xi̱ndayáʼviní na̱ siervo ministerial nu̱ú ta̱ apóstol Pablo ña̱kán tá ka̱ʼyira carta ku̱a̱ʼa̱n nu̱ú na̱ cristiano na̱ ñuu Filipos chi̱ndeéra na̱ siervo ministerial xíʼin na̱ anciano (Filip. 1:1). Ku̱a̱ʼání ta̱ hermano ta̱ xa̱a̱ nda̱kuchi kúsi̱íní-inira ña̱ kúúra siervo ministerial. Ni loʼo á ku̱a̱ʼá ku̱i̱ya̱na kiviva xa̱a̱na koona siervo ministerial. Tá kúú ta̱ Devan, 18 ku̱i̱ya̱ xi̱kuumiíra tá ndu̱ura siervo ministerial, soo ta̱ Luis yáʼaka 50 ku̱i̱ya̱ xi̱kuumiíra tá ndu̱ura siervo ministerial. Ta̱ Luis káʼa̱nra: “Kúsi̱íní-inii̱ ña̱ kúi̱ siervo ministerial. Ta va̱ʼaní kúnii̱ chi kúʼvi̱ní-ini na̱ hermano xínina yi̱ʼi̱”. Tá xa̱a̱ nda̱kuchiún ta ta̱ʼán koún siervo ministerial, ¿á kúni̱ún koún siervo ministerial? w24.11 14 párr. 1-3

Tá xi̱kuumií ta̱ rey Ezequías ta̱ ñuu Judá 39 ku̱i̱ya̱, ki̱ʼinra iin kue̱ʼe̱ ña̱ ndeéní. Tasaá, Jehová ni̱ka̱ʼa̱nra xíʼin ta̱ profeta Isaías ña̱ ka̱ʼa̱nra xíʼin ta̱ Ezequías ña̱ kuvira (2 Rey. 20:1). Tá ni̱ka̱ʼa̱nra xíʼin ta̱ Ezequías ña̱ kuvira, ki̱xáʼara xákuníra ta ki̱xáʼara káʼa̱n-ndáʼvira xíʼin Jehová ña̱ ná chindeétáʼanra xíʼinra. Nda̱kanda̱ní-ini Jehová tá xi̱niso̱ʼora ña̱ ni̱ka̱ʼa̱n ta̱ Ezequías xíʼinra ta saátu tá xi̱nira ña̱ xákuníra. Ña̱kán Jehová ni̱ka̱ʼa̱nra xíʼin ta̱ Isaías ña̱ ka̱ʼa̱nra ña̱yóʼo xíʼin ta̱ Ezequías: “Xi̱niso̱ʼi̱ ña̱ ni̱ka̱ʼún xíʼi̱n ta xi̱nii̱ ña̱ xa̱kún, ña̱kán sandáʼi̱ yóʼó”. Ku̱ndáʼvi-ini Jehová xi̱nira ta̱ Ezequías ta ni̱ka̱ʼa̱nra ña̱ taxira ña̱ ku̱a̱ʼáka ku̱i̱ya̱ kutakura. Saátu ni̱ka̱ʼa̱nra xíʼinra ña̱ sakǎkura na̱ ñuu Israel nu̱ú na̱ asirio (2 Rey. 20:​4-6). ¿ Ndáaña kivi keʼún tá ni̱ka̱ʼa̱nna xíʼún ña̱ kúúmiíún iin kue̱ʼe̱ ña̱ ndeéní? Kivi ka̱ʼún xíʼin Jehová ta nda̱a̱ kivitu kuakún nu̱úra. Biblia káʼa̱nña xíʼinyó ña̱ kúndáʼviní-ini Jehová xínira miíyó ta sándi̱kora-iniyó tá yáʼayó nu̱ú tu̱ndóʼo (2 Cor. 1:​3, 4). w24.12 24 párr. 15-17

Tá ná ndataku na̱ ni̱xi̱ʼi̱, kusi̱íní-iniyó ndakiʼinyóna. Saátu kusi̱íní-iniyó ndakundeéyó sakúaʼayó xa̱ʼa̱ Jehová, ta saátu ndakundeéyó sakúaʼayó xa̱ʼa̱ ña̱ i̱xava̱ʼara (Sal. 104:24; Is. 11:9). Ta inka ña̱ va̱ʼaníka ndakiʼinyó kúú ña̱ kǒo keʼékayó nda̱a̱ ni iin ña̱ va̱ása va̱ʼa, ña̱kán kivi ndasakáʼnuyó Jehová ta va̱ása kundi̱ʼi-iniyó xa̱ʼa̱ ña̱yóʼo. Nu̱úka ña̱ keʼéyó ña̱ sákusi̱í-iniyó loʼo kuití tiempo ta ki̱ʼviyó ku̱a̱chi, va̱ʼaka ná chikaa̱yó ndee̱ ña̱ ndakiʼinyó ndiʼi ña̱ va̱ʼa yóʼo chí nu̱únínu (Heb. 11:25). Va̱ʼaníka ña̱ ndakiʼinyó chí nu̱únínu nu̱ú ña̱ kivi taxi ñuyǐví yóʼo ndaʼa̱yó tiempo vitin. Ná ndakaʼányó chi kixaa̱ iin ki̱vi̱ ña̱ va̱ása kundatukayó ndakiʼinyó ña̱ va̱ʼa yóʼo, saáchi xa̱a̱ xi̱nuvaña tiempo saá. Ta kivi ndakiʼinyó ndiʼi ña̱yóʼo saáchi Jehová kúú ta̱ ni̱kuʼvi̱ní-ini xi̱ni miíyó ña̱kán ta̱xira se̱ʼera ni̱xi̱ʼi̱ra xa̱ʼa̱yó. w25.01 29 párr. 12

Tutu Hebreos káʼa̱nña xa̱ʼa̱ ku̱a̱ʼání na̱ yiví na̱ xi̱kandíxa Jehová. Ta iin na̱yóʼo xi̱kuu ta̱ Moisés, saáchi ta̱yóʼo va̱ʼaní xi̱kandíxara Jehová ta va̱ʼaní yichi̱ sa̱ndákoora nu̱úyó (Heb. 3:​2-5; 11:​23-25). Ta va̱ʼaníva ke̱ʼéra ña̱ xi̱ndaa-inira Jehová, saáchi mií Jehová ta̱xi ña̱ xi̱xi na̱ ñuu Israel tá ni̱xi̱kana nu̱ú ñuʼú yi̱chí ta saátu ta̱xira ti̱kui̱í xi̱ʼina (Éx. 15:​22-25; Sal. 78:​23-25). Tá ni̱ya̱ʼa ki̱ʼva iin ku̱i̱ya̱ ña̱ ke̱e na̱ ñuu Israel chí Egipto, Jehová ni̱ka̱ʼa̱nra ña̱ taxira ku̱ñu kuxuna. Ni xi̱kandíxaníva ta̱ Moisés Jehová, soo ni̱xi̱ka-inira xíʼin ña̱yóʼo saáchi i̱xayo̱ʼvi̱ña xíʼinra ndakanixi̱níra ndáa ki̱ʼva taxi Jehová ku̱ñu kuxu ku̱a̱ʼání na̱ yiví chí nu̱ú ñuʼú yi̱chí. Xa̱ʼa̱ ña̱kán ni̱nda̱ka̱tu̱ʼun Jehová ña̱yóʼora: “¿Á va̱ása kivi keʼé Jehová ña̱yóʼo túviún?” (Núm. 11:​21-23). Ña̱ xi̱kuni̱ Jehová ka̱ʼa̱nra xíʼin ta̱ Moisés kúú ña̱yóʼo: “¿Á ndákanixi̱níún ña̱ va̱ása kuchiñui̱ keʼíi̱ ña̱ ni̱ka̱ʼi̱n keʼíi̱?”. w25.03 26 párr. 1, 2

¿Á kivi ka̱ʼa̱nyó ña̱ ndiʼi ña̱ ku̱u tá ki̱xi Diluvio ndánaʼa̱ña ña̱ kuu tiempo vitin? Va̱ásaví chi kǒo káʼa̱n Biblia xa̱ʼa̱ña. Ta̱ Jesús chi̱táʼanra “tiempo ña̱ ni̱xi̱yo ta̱ Noé” xíʼin tiempo so̱ndíʼi ña̱ ndóoyó vitin, soo kǒo níxi̱kuni̱ kachira ña̱ ndiʼi ña̱ ku̱u tá ki̱xi Diluvio ndánaʼa̱ña ña̱ kuu chí nu̱únínu, tá kúú ña̱ nda̱kasi Jehová yéʼé tú arca (Mat. 24:​37-39). ¿Ndáaña ke̱ʼé ta̱ Noé tá ni̱ka̱ʼa̱n Jehová xíʼinra xa̱ʼa̱ ña̱ kuu? Ta̱ Noé ka̱ndíxara ña̱ ni̱ka̱ʼa̱n Jehová ña̱ kixi Diluvio ta i̱xava̱ʼara tú arca (Heb. 11:7; 1 Ped. 3:20). Saátu tiempo vitin, na̱ yiví na̱ kándíxa Ndióxi̱ xíniñúʼu na̱ʼa̱na ña̱yóʼo xíʼin ña̱ kéʼéna (Hech. 3:​17-20). Ta̱ Pedro ni̱ka̱ʼa̱nra xa̱ʼa̱ ta̱ Noé ña̱ va̱ʼaní na̱túʼunra xíʼin na̱ yiví xa̱ʼa̱ Ndióxi̱. Tiempo vitin chíkaa̱níyó ndee̱ ña̱ natúʼunyó xíʼin ndiʼi na̱ yiví xa̱ʼa̱ Ndióxi̱. Soo, ni chíkaa̱níyó ndee̱ ña̱ natúʼunyó xíʼin na̱ yiví, kǒo kuchiñuvíyó natúʼunyó xíʼin ndiʼina xa̱ʼa̱ Ndióxi̱ tá kúma̱níka kixaa̱ ña̱ Armagedón. w24.05 9, 10 párr. 3-5

Xíniñúʼu ixato̱ʼóyó na̱ ndásakáʼnu Jehová, xa̱ʼa̱ ña̱kán va̱ʼa iniyó xíʼin na̱ kúú migora ta íxato̱ʼóyóna (Rom. 12:10). ¿Ndáa ki̱ʼva keʼéyó ña̱yóʼo? Nu̱ú ña̱ Salmo 15:4 káʼa̱nña ña̱ na̱ íyo veʼe Jehová sáxi̱nuna ña̱ ki̱ndoona keʼéna ni sava yichi̱ íxayo̱ʼvi̱ña xíʼinna. Tá va̱ása sáxi̱nuyó ña̱ ki̱ndooyó keʼéyó kivi sandákavayó-ini inkana (Mat. 5:37). Jehová kúni̱ra ña̱ ná saxínu na̱ ti̱ndaʼa̱ voto ña̱ ke̱ʼéna ki̱vi̱ ña̱ ti̱ndaʼa̱na, saátu kúni̱ra ña̱ ná saxínu ña̱ íyo se̱ʼe ña̱ káʼa̱nna xíʼin na̱ va̱lí se̱ʼena. Xa̱ʼa̱ ña̱ kúʼvi̱-iniyó xíniyó Jehová xíʼin na̱ yiví chíkaa̱yó ndee̱ ña̱ sáxi̱nuyó ña̱ káʼa̱nyó. Inka ki̱ʼva ña̱ na̱ʼa̱yó ña̱ íxato̱ʼóyó na̱ migo Jehová kúú ña̱ va̱ʼa koo iniyó xíʼinna (Rom. 12:13). Tá kánayó na̱ ñaniyó xíʼin ku̱ʼvayó ña̱ ku̱ʼu̱n si̱ína xíʼinyó, saá kúú ña̱ va̱ʼaní kítáʼanyó xíʼina ta saátu xíʼin Jehová. Tá va̱ʼa iniyó xíʼinna kéʼéyó nda̱a̱ táki̱ʼva kéʼé Jehová. w24.06 12 párr. 15, 16

Jehová sánáʼa̱ra na̱ yiví na̱ vitá-ini ña̱ va̱ʼa kunda̱a̱-inina ndáaña kúú ña̱ nda̱a̱ (Mat. 11:25). Tá sa̱kúaʼayó ña̱ nda̱a̱ xa̱ʼa̱ Jehová, vitá ni̱xi̱yo iniyó ta ta̱xiyó ña̱ chi̱ndeétáʼan inkana xíʼinyó (Hech. 8:​30, 31). Nisaá, xíniñúʼu kiʼinyó kuenta ña̱ kǒo kixáʼa ni̱nu kuniyó. Tá ná kixáʼayó ni̱nu kuniyó sana ndakanixi̱níyó ña̱ ndáyáʼviníka ña̱ ndákanixi̱ní miíyó nu̱úka ña̱ káʼa̱n tu̱ʼun Ndióxi̱ xíʼin ña̱ káʼa̱n na̱ ñuura xíʼinyó. ¿Ndáaña chindeétáʼan xíʼinyó ña̱ vitá koo iniyó? Ña̱ ndakaʼányó ña̱ íyoníva ndee̱ Jehová, ta miíyó kǒovíña kúúmiíyó (Sal. 8:​3, 4). Saátu ná ka̱ʼa̱nyó xíʼin Jehová ña̱ chindeétáʼanra xíʼinyó ña̱ vitá koo iniyó tasaá kuniso̱ʼoyó ña̱ sánáʼa̱ra miíyó. Ta miíra chindeétáʼan xíʼinyó ña̱ kuniso̱ʼoyó ña̱ káʼa̱nra xíʼinyó nu̱ú tu̱ʼunra, ta saátu ña̱ káʼa̱n na̱ ñuura ta kǒo keʼéyó ña̱ ndákanixi̱ní miíyó. Tá káʼviún Biblia, nandukú texto ña̱ káʼa̱n xa̱ʼa̱ Jehová ña̱ kúni̱níra xínira na̱ vitá-ini ta kúndasíníra xínira na̱ ni̱nu kúni, na̱ so̱ʼoní. Saátu, tá táxina iin chiñu ndaʼún ti̱xin ñuu Ndióxi̱, vitá koo iniún. w24.07 10 párr. 8, 9

Tá ku̱i̱ya̱ 1919 ta̱ Jesús nda̱kaxinra iin tiʼvi loʼo na̱ ungido na̱ ka̱ʼa̱n ndáa ki̱ʼva koo ña̱ predicación ta saátu ndáa ki̱ʼva sakúaʼayó xa̱ʼa̱ Ndióxi̱ (Luc. 12:42). Ta xítoyó ña̱ mií Jehová chíndeétáʼan xíʼinna ña̱ keʼéna chiñu yóʼo (Is. 65:​13, 14). Tá ná kǒo na̱ kuniʼi yichi̱ nu̱úyó ti̱xin ñuu Ndióxi̱, kǒo kivi saxínuyó chiñu ña̱ ni̱ka̱ʼa̱n ta̱ Jesús xíʼinyó (Mat. 28:​19, 20). Tá kúú, tá ná kǒo ka̱ʼa̱nna xíʼinyó ndáa territorio natúʼunyó xíʼin na̱ yiví, sana ndiʼiyó keʼéyó ña̱ kúni̱ miívayó. Tasaá iin territorio ku̱a̱ʼá yichi̱ ku̱ʼu̱nyó natúʼunyó xíʼin na̱ yiví ta inkaña kǒo ku̱ʼu̱nyó. ¿Ndáaña va̱ʼa ndákiʼinyó tá viíní kéʼéyó chiñu ña̱ káʼa̱nna xíʼinyó? Tiempo vitin ta̱ Jesús va̱ʼaní níʼira yichi̱ nu̱ú na̱ ñuu Ndióxi̱ nda̱a̱ táki̱ʼva ke̱ʼéra xíʼin na̱ discípulora tiempo xi̱naʼá. w24.04 8, 9 párr. 2-4

Ta̱ Caín xi̱kuu se̱ʼenu̱ú ta̱ Adán xíʼin ñá Eva. Ta xa̱ʼa̱ ña̱ ndu̱u ta̱yóʼo ta̱ yiví ku̱a̱chi, Biblia káchiña ña̱ “xi̱keʼéra ña̱ va̱ása va̱ʼa” (1 Juan 3:12). Ta xa̱ʼa̱ ña̱kán tá ni̱so̱kóra iin ña̱ʼa nu̱ú Jehová “kǒo níkindo̱o-inira xíʼin ta̱ Caín ni ña̱ ni̱so̱kóra nu̱úra”. Ta nu̱úka ña̱ nasamara ña̱ xi̱keʼéra “ni̱sa̱a̱níra ta nda̱kava-inira”. Xa̱ʼa̱ ña̱kán ni̱ka̱ʼa̱n Jehová xíʼinra (Gén. 4:​3-7). Viíní ni̱ka̱ʼa̱n Jehová xíʼinra ta ni̱ka̱ʼa̱nra xíʼinra ña̱ taxira ña̱ va̱ʼa ndaʼa̱ra tá ná keʼéra ña̱ va̱ʼa, ta saátu ni̱ka̱ʼa̱nra xíʼinra ña̱ xo̱ʼvi̱ra tá kǒo násamara ña̱ kéʼéra. Ta̱ Caín va̱ása níxiniso̱ʼora ña̱ ni̱ka̱ʼa̱n Jehová ta va̱ása nítaxira ña̱ chindeétáʼanra xíʼinra ña̱ ndikó-inira. ¿Ndáaña ke̱ʼé Jehová tá va̱ása níxiin ta̱ Caín nasa̱mara? ¿Á nda̱kanixi̱ní Jehová ña̱ va̱ása chindeétáʼankara xíʼin nda̱a̱ ni iin na̱ yiví ña̱ ndikó-inina? Va̱ásaví. w24.08 10 párr. 8

Ku̱a̱ʼání ña̱ va̱ʼa xi̱ndatu na̱ ñuu Israel ndakiʼinna. Mií Jehová taxi bendición ndaʼa̱na ta ku̱a̱ʼání tiempo kundoona nu̱ú ñuʼú ña̱ ni̱ka̱ʼa̱nra taxira ndaʼa̱na. Ta, ¿ndáa ki̱ʼva ni̱xi̱yo ñuʼú kán? Va̱ʼaní ni̱xi̱yoña ta va̱ʼaní xi̱kana ña̱ʼa nu̱úña. Ta̱ Moisés ni̱ka̱ʼa̱nra xíʼin na̱ ñuu Israel ndáa ki̱ʼva ni̱xi̱yo ñuʼú yóʼo, ka̱chira: “Iin ñuʼú nu̱ú íyo ñuu náʼnu ña̱ va̱ʼaní ña̱ va̱ása ní ixava̱ʼandó, nu̱ú íyo veʼe ña̱ kúúmií ku̱a̱ʼání ña̱ʼa ña̱ va̱ʼa ña̱ kǒo níkachíñundó xa̱ʼa̱, pozo ña̱ va̱ása níkaandó, tú uva xíʼin tú olivo tú va̱ása níchiʼindó” (Deut. 6:​10, 11). Saátu ni̱ka̱ʼa̱n ta̱ Moisés xíʼin na̱ israelita, ña̱ tá xi̱kuni̱na kundoona nu̱ú ñuʼú kán xi̱niñúʼu kuniso̱ʼona ña̱ káʼa̱n Jehová. Ta̱ Moisés ni̱ka̱ʼa̱nra xíʼinna ña̱ xíniñúʼu kuniso̱ʼona ña̱ káʼa̱n Jehová tasaá kutakuna (Deut. 30:20). Soo na̱ israelita kǒo níxiniso̱ʼona ña̱ ni̱ka̱ʼa̱n Jehová. Ña̱kán Jehová ta̱xira ña̱ ku̱chiñu na̱ ñuu Asiria ka̱nitáʼanna xíʼinna ta nda̱kiʼinnana ku̱a̱ʼa̱n xíʼinna. Ta tá ni̱ya̱ʼa loʼo tiempo, saátu ke̱ʼé na̱ ñuu Babilonia xíʼinna (2 Rey. 17:​6-8, 13, 14; 2 Crón. 36:​15-17, 20). w24.11 9 párr. 5, 6

Ku̱a̱ʼání na̱ yiví na̱ káʼa̱n kúú cristiano, káʼa̱nna ña̱ xíniñúʼu keʼé kuitíyó kúú ña̱ kundikaa̱ ta̱ Jesús níma̱yó tasaá ka̱kuyó (Juan 6:29). Soo na̱ yiví na̱ xi̱niso̱ʼo ña̱ ni̱ka̱ʼa̱n ta̱ Jesús chí ñuu Galilea, iin tiempo ka̱ndíxanara soo tá ndi̱ʼi sa̱ndákoovanara. ¿Nda̱chun ke̱ʼéna ña̱yóʼo? Ku̱a̱ʼání na̱ yiví na̱ xi̱xaʼa̱n xi̱xito ta̱ Jesús, xi̱kuni̱ kuitína ña̱ ná taxira ña̱ kuxuna, ña̱ sandáʼarana ta saátu ña̱ ka̱ʼa̱nra xíʼinna xa̱ʼa̱ nda̱saa ña̱ xi̱kuni̱na kuniso̱ʼona. Soo ta̱ Jesús ni̱ka̱ʼa̱nra xíʼinna ña̱ xíniñúʼu keʼéna inka ña̱ʼa ña̱ va̱ʼa kundiku̱nnara. Saáchi ta̱ Jesús kǒo níkixi kuitíra taxira ña̱ kuxu na̱ yiví á ña̱ sandáʼarana. Chi ña̱ xi̱niñúʼu keʼé na̱ yiví kúú ña̱ kuniso̱ʼona ña̱ káʼa̱n ta̱ Jesús ta keʼéna ndiʼi ña̱ sánáʼa̱rana (Juan 5:40). w24.12 12 párr. 12, 13

¿Ndáaña kivi chindeétáʼan xíʼin iin ta̱a ta̱ ndásakáʼnu Ndióxi̱ ta̱ xa̱a̱ ti̱ndaʼa̱, ña̱ va̱ása keʼéra iin ña̱ʼa ña̱ kivi saxóʼvi̱ ñá síʼira? Xíniñúʼu chikaa̱níra ndee̱ ña̱ keʼéra nda̱a̱ táki̱ʼva ke̱ʼé ta̱ Jesús. Va̱ʼaní xi̱keʼéra xíʼin na̱ discípulora xa̱ʼa̱ ña̱kán va̱ʼaní yichi̱ sa̱ndákoora nu̱ú na̱ xa̱a̱ ti̱ndaʼa̱. Ná kotoyó ndáaña kivi sakúaʼa ta̱a ta̱ íyo ñá síʼi xíʼin ki̱ʼva ña̱ ke̱ʼé ta̱ Jesús xíʼin na̱ apóstolra ta saátu xíʼin ki̱ʼva ña̱ xi̱kaʼa̱nra xíʼinna. Ndiʼi tiempo va̱ʼaní ke̱ʼé ta̱ Jesús xíʼin na̱ apóstolra ta saátu i̱xato̱ʼónírana, ta nda̱a̱ ni iin yichi̱ va̱ása ní ixandi̱va̱ʼara xíʼinna. Ta̱ Jesús kǒo níxiniñúʼura ndee̱ ña̱ xi̱kuumiíra ña̱ va̱ʼa ixandi̱va̱ʼara xíʼinna, saáchi vitáníva ni̱xi̱yo inira xíʼinna ta chi̱ndeétáʼanníra xíʼinna (Juan 13:​12-17). Ta̱ Jesús ni̱ka̱ʼa̱nra xíʼin na̱ discípulora: “Sakúaʼandó nu̱úi̱, saáchi va̱ása ndeé-inii̱ chi vitáva-inii̱. Tá ná kixindó nu̱úi̱ ndakindee̱ndó” (Mat. 11:​28-30). Iin na̱ yiví na̱ vitá-ini su̱ví na̱ kǒo ndee̱ kúúmií kúúna á va̱ása ndáyáʼvina, chi na̱yóʼo xíni̱na ka̱ʼnu̱-inina xíʼin ña̱ kéʼé inkana xíʼinna ta saátu ña̱ káʼa̱nna xíʼinna. w25.01 10 párr. 10, 11

Tá kúyatinka ki̱vi̱ ña̱ ndiʼi-xa̱ʼa̱ ñuyǐví yóʼo, sana ixayo̱ʼvi̱níkaña xíʼinyó ña̱ kuumiíyó ña̱ xíniñúʼuyó. Kivi ixayo̱ʼvi̱ña xíʼinyó tá nása̱ma na̱ chíñu, tá íyo guerra tá ndeéní kúún sa̱vi̱ á tá kúú inkaka tu̱ndóʼo ta saátu tá kíxáʼa íyo inka kue̱ʼe̱ ña̱ xíkun. Sana kivi tavána miíyó nu̱ú káchíñuyó, kivi ndiʼi-xa̱ʼa̱ ndiʼi ña̱ʼa ña̱ kúúmiíyó á nda̱a̱ xíniñúʼu sandákooyó veʼeyó. ¿Ndáaña kivi chindeétáʼan xíʼinyó ña̱ vií ndaka̱xinyó ña̱ keʼéyó tasaá na̱ʼa̱yó ña̱ kándíxayó ña̱ chindeétáʼanva Jehová xíʼinyó? Iin ña̱ kivi chindeétáʼan xíʼinyó kúú ña̱ ka̱ʼa̱nyó xíʼin Jehová xa̱ʼa̱ ndiʼi ña̱ sándi̱ʼi̱-iniyó. Ná ka̱ʼa̱nyó xíʼinra ña̱ taxira ña̱ ndíchi ndaʼa̱yó ña̱ vií koo ña̱ ndaka̱xinyó keʼéyó ta saátu ña̱ ná chindeétáʼanra xíʼinyó ña̱ va̱ása kundi̱ʼiní-iniyó (Luc. 12:​29-31). Ná ka̱ʼa̱nyó xíʼinra ña̱ chindeétáʼanra xíʼinyó ña̱ kusi̱í-iniyó xíʼin ña̱ʼa ña̱ xa̱a̱ kúúmiíyó (1 Tim. 6:​7, 8). Ná nandukúyó nu̱ú tutu ña̱ tává na̱ ñuu Ndióxi̱ ña̱ kivi chindeétáʼan xíʼinyó tá kúma̱ní xu̱ʼún nu̱úyó. Tá kúú nu̱ú jw.org va̱xi video xíʼin artículo ña̱ káʼa̱nka xa̱ʼa̱ ña̱yóʼo, ta xa̱a̱ va̱ʼaní chíndeétáʼan ña̱yóʼo xíʼin ku̱a̱ʼánína. w25.03 28, 29 párr. 10, 11

Xa̱a̱ ki̱xaa̱va tiempo ña̱ ni̱ka̱ʼa̱n Jehová ña̱ kiviva xa̱a̱ na̱ inka ñuu koona táʼan na̱ ñuura. Xa̱ʼa̱ ña̱kán ni̱ka̱ʼa̱nra xíʼin ta̱ apóstol Pedro ña̱ ná ku̱ʼu̱nra natúʼunra xíʼin ta̱ Cornelio, ta ta̱yóʼo kúú ta̱ nu̱ú ni̱xa̱a̱ ndu̱u cristiano ni su̱ví judío níxikuura. Soo sana i̱xayo̱ʼvi̱vaña xíʼin ta̱ Pedro keʼéra chiñu yóʼo, saáchi na̱ judío va̱ása níxikitáʼanna xíʼin na̱ va̱ása kúú judío. Soo tá ku̱ndaa̱-inira ndáaña kúú ña̱ kúni̱ Jehová, na̱samavara ki̱ʼva ña̱ xi̱ndakanixi̱níra. Tá ni̱ka̱ʼa̱n ta̱ Cornelio xíʼin ta̱ Pedro ña̱ ná ku̱ʼu̱nra kotorara, ndi̱ku̱n ni̱xa̱ʼa̱nvara (Hech. 10:​28, 29). Ta na̱túʼunra xíʼin ta̱ Cornelio ta saátu xíʼin na̱ veʼera, ta ndiʼi na̱yóʼo ni̱xa̱a̱na nda̱kuchina (Hech. 10:​21-23, 34, 35, 44-48). Tá ni̱ya̱ʼa tiempo, ta̱ Pedro ta̱xira consejo yóʼo ndaʼa̱ na̱ cristiano: “Inkáchi ná koo ki̱ʼva ña̱ ndákanixi̱níndó” (1 Ped. 3:8). Ña̱ va̱ʼa inkáchi ndakanixi̱ní miíyó na̱ testigo Jehová, xíniñúʼu sakúaʼayó ndakanixi̱níyó nda̱a̱ táki̱ʼva ndákanixi̱ní mií Jehová ta nu̱ú tu̱ʼunra kivi sakúaʼayó xa̱ʼa̱ ña̱yóʼo. w25.03 9, 10 párr. 7, 8

Síínní íyo ña̱ kéʼé na̱ ñuyǐví yóʼo ta saátu ña̱ ndákanixi̱nína saáchi va̱ása kítáʼanña xíʼin ña̱ ndákanixi̱ní Jehová (Prov. 17:15). Ña̱kán xíniñúʼu kiʼinníyó kuenta ña̱ kǒo ndakanixi̱níyó nda̱a̱ táki̱ʼva ndákanixi̱ní na̱ ñuyǐví yóʼo ta ná kǒo taxiyó sakúxíkána miíyó nu̱ú Jehová. Ta̱ apóstol Pablo ni̱ka̱ʼa̱nra xíʼin na̱ cristiano ña̱ ná chikaa̱na ndee̱ ña̱ xa̱a̱na koona na̱ yiví na̱ xu̱xa-ini ta saátu xíniñúʼu keʼé miíyó. ¿Ndáa ki̱ʼva keʼéyó ña̱yóʼo? Xíniñúʼu viíní kaʼviyó tu̱ʼun Ndióxi̱ chi saá kúú ña̱ xa̱a̱yó kunda̱a̱ va̱’a iniyó ndáa ki̱ʼva ndákanixi̱níra ta xa̱a̱yó kuxini̱va̱ʼakayóra. Ta xíniñúʼu keʼékayó ña̱yóʼo ni xa̱a̱ nda̱kuchiyó. Ña̱kán ndiʼiyó xíniñúʼu kaʼvi ni̱ʼiyó tu̱ʼun Ndióxi̱ ta ndakanixi̱níyó xa̱ʼa̱ña ni loʼo á xa̱a̱ ku̱a̱ʼá ku̱i̱ya̱ ndásakáʼnuyó Ndióxi̱ (Sal. 1:2). Tá ná kaʼvi ni̱ʼiyó Biblia ña̱yóʼo chindeétáʼanña xíʼinyó ña̱ kandíxakayó Ndióxi̱ ta ña̱yóʼo kúú ña̱ ni̱ka̱ʼa̱n ta̱ apóstol Pablo xíʼin na̱ cristiano keʼéna (Heb. 11:​1, 6). w24.09 10 párr. 7, 8

Tá kándíxayó ña̱ kúú Jehová iin Ndióxi̱ ta̱ táku, saá kǒo ixayo̱ʼvi̱ña xíʼinyó nda̱kú koo iniyó xíʼinra. Ña̱yóʼo kúú ña̱ ke̱ʼé ta̱ José chi nda̱kaʼánra ña̱ ndásakáʼnura Ndióxi̱ ta̱ táku ta ña̱yóʼo chi̱ndeétáʼan xíʼinra ña̱ kǒo níkeʼéra ña̱ kini (Gén. 39:9). Ña̱ va̱ʼa ndakaʼányó ña̱ ndásakáʼnuyó Ndióxi̱ ta̱ táku xíniñúʼu taváyó tiempo ña̱ ka̱ʼa̱nyó xíʼinra ta saátu ña̱ kaʼviyó tu̱ʼunra, tasaá va̱ʼaníka kitáʼanyó xíʼinra. Ña̱kán, tá viíní kítáʼanyó xíʼin Jehová nda̱a̱ táki̱ʼva ke̱ʼé ta̱ José saá kúú ña̱ kǒo keʼéyó ni iin ña̱ʼa ña̱ kǒo kútóora. Na̱ nándósó-ini ña̱ kúú Jehová iin Ndióxi̱ ta̱ táku kivi xa̱a̱na kuxíkána nu̱úra. Ná ka̱ʼa̱nyó xa̱ʼa̱ ña̱ ndo̱ʼo na̱ israelita tá ni̱xi̱yona nu̱ú ñuʼú yi̱chí. Xi̱kunda̱a̱va-inina ña̱ iin Ndióxi̱ táku kúú Jehová, soo ki̱xáʼa xíka-inina chi nda̱kanixi̱nína ña̱ kǒo taxira ña̱ xíniñúʼuna (Éx. 17:​2, 7). Tándi̱ʼi, kǒo níxiinkana kuniso̱ʼona ña̱ xi̱kaʼa̱n Jehová xíʼinna. Ña̱kán, miíyó kǒo kúni̱yó keʼéyó nda̱a̱ táki̱ʼva ke̱ʼé na̱kán (Heb. 3:12). w24.06 24 párr. 14, 15

Xa̱a̱ ki̱vi̱ so̱ndíʼi kúú ña̱ ndóoyó, ña̱kán ya̱ʼavayó nu̱ú tu̱ndóʼo ña̱ yo̱ʼvi̱ní ta nda̱a̱ sakúakuña miíyó sava yichi̱. Jehová xítora tá xákuyó ta kúnda̱a̱va-inira xíʼin ña̱ ndóʼoyó. Ndákaʼánva Jehová xa̱ʼa̱ iin tá iin yichi̱ ña̱ xákún, ña̱kán tá ná ya̱ʼún nu̱ú iin tu̱ndóʼo ka̱ʼa̱n xíʼin Jehová xa̱ʼa̱ ña̱ ndóʼún. Ta va̱ása kuxíkáún nu̱ú na̱ hermano chi kúni̱nína xínina yóʼó ta nu̱ú Biblia nandukún ña̱ káʼa̱n Jehová ña̱ va̱ʼa sandíkora-iniún. Ña̱kán tá ná kundeé-iniún ku̱a̱ʼání ña̱ va̱ʼa taxi Jehová ndaʼún. Si̱lóʼoní kúma̱ní ta kixaa̱ ki̱vi̱ ña̱ sandíʼi-xa̱ʼa̱ Jehová ndiʼi ña̱ sáxo̱ʼvi̱ miíyó (Apoc. 21:4). Ta nu̱ú ñuyǐví xa̱á kǒo kuakukayó chi na̱ kusi̱í-iniva kooyó. w24.12 20 párr. 3; 25 párr. 19

Jehová nda̱kaxinra miíyó ña̱ kooyó testigora (Is. 43:​10, 11). Ta káʼa̱nra ña̱ chindeétáʼanra xíʼinyó ña̱ ndakú koo iniyó. Ná ka̱ʼa̱nyó xa̱ʼa̱ ku̱mí ki̱ʼva ña̱ chíndeétáʼanra xíʼinyó. Ña̱ nu̱ú, ta̱ Jesús íyora xíʼinyó tá nátúʼunyó xíʼin na̱ yiví (Mat. 28:​18-20). Ña̱ u̱vi̱, Jehová ta̱xira chiñu ndaʼa̱ na̱ ángel ña̱ chindeétáʼanna xíʼinyó (Apoc. 14:6). Ña̱ u̱ni̱, Jehová táxira espíritu santora ndaʼa̱yó ta ña̱yóʼo chíndeétáʼanña xíʼinyó ña̱ ndakaʼányó xa̱ʼa̱ ña̱ xa̱a̱ sa̱kúaʼayó (Juan 14:​25, 26). Ña̱ ku̱mí, Jehová xíniñúʼura na̱ hermano ña̱ va̱ʼa keena xíʼinyó predicación. Jehová xíʼin na̱ ñuura chíndeétáʼanna xíʼinyó ña̱ kǒo yi̱ʼvíkayó natúʼunyó xa̱ʼa̱ra xíʼin na̱ yiví. Kǒo ndákava-iniún tá kǒo na̱ yiví ndáni̱ʼún tá ku̱a̱ʼún veʼena, iin ña̱ kivi keʼún kúú ña̱ ndakanixi̱níún ndáa míí ñúʼuna hora kán, á na̱ ku̱a̱ʼa̱n kachíñu kúúna á na̱ ku̱a̱ʼa̱n satá kúúna (Hech. 16:13). w24.04 17 párr. 10, 11

Ña̱ va̱ʼa xa̱a̱ iin ta̱ hermano ta̱ xa̱a̱ ti̱ndaʼa̱ koora anciano, xíniñúʼu chinúu na̱ veʼera iin yichi̱ va̱ʼa nu̱ú inkana. Xa̱ʼa̱ ña̱kán Biblia káʼa̱nña ña̱ xíniñúʼu viíní kuniʼira yichi̱ nu̱ú na̱ veʼera. Ndiʼina xíniñúʼu kuni ña̱ kúʼvi̱ní-inira xínira na̱ veʼera ta táxira ña̱ xíniñúʼuna. Miíra kúú ta̱ siʼna xíniñúʼu chikaa̱ ndee̱ ña̱ kundi̱ʼi̱-inira xa̱ʼa̱ chiñu Ndióxi̱. Tá íyo na̱ va̱lí se̱ʼéra ná kuniso̱ʼona ña̱ káʼa̱nra xíʼinna ta viíní ná keʼéna (1 Tim. 3:4). Tá vií sánáʼa̱ra na̱ va̱lí se̱ʼera, va̱ʼaníva kuniso̱ʼonara ta to̱ʼó koo inina ta vií keʼéna xíʼin inkana. Ta saátu xíniñúʼu chindeétáʼanra xíʼin se̱ʼera ña̱ va̱ʼa vií kutáʼanna xíʼin Jehová tasaá kuniso̱ʼona ña̱ káʼa̱n Jehová ta xa̱a̱na ndakuchina. w24.11 22 párr. 10, 11

Tá ku̱a̱ʼáka tiempo ná keeyó natúʼunyó xa̱ʼa̱ Ndióxi̱ saá kúú ña̱ kiʼinkayó kuenta ndáa ki̱ʼva chíndeétáʼan Jehová xíʼinyó tasaá xa̱a̱yó kandíxaníkayóra (1 Cor. 3:9). Ndakaʼán chi va̱ása chítáʼan Jehová ña̱ kéʼún xíʼin ña̱ kéʼé inkana. Chi ña̱ xíto ta̱kán kúú ña̱ ndíkaa̱ níma̱ún, ta kúsi̱íní-inira xíʼún saáchi kúnda̱a̱-inira ña̱ táxiníún tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼún (1 Sam. 16:7; Mar. 12:​41-44). Tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó va̱ʼa íxakáʼnu-ini Jehová xa̱ʼa̱ ku̱a̱chiyó, saátu kivi kooyó migora ta kivi kutakuyó ndiʼi tiempo. Ndiʼi tiempo ná na̱ʼa̱yó ña̱ táxiyó tíxa̱ʼvi ndaʼa̱ Jehová xa̱ʼa̱ ña̱ kúʼvi̱-inira xínira miíyó chi xa̱ʼa̱ ña̱yóʼo kúú ña̱ ta̱xira ku̱a̱ʼání ña̱ va̱ʼa ndaʼa̱yó (1 Juan 4:19). Ta saátu ná na̱ʼa̱yó ña̱ táxiníyó tíxa̱ʼvi ndaʼa̱ ta̱ Jesús xa̱ʼa̱ ña̱ ni̱kuʼvi̱ní-inira xi̱nira miíyó ta ni̱xi̱ʼi̱ra xa̱ʼa̱yó. w25.01 31 párr. 16-18

Tá ndákanixi̱níún ña̱ kǒo vií íyo ña̱ nda̱kaxiún, ndakanixi̱ní xa̱ʼa̱ ña̱ ndo̱ʼo ta̱ ka̱ʼyí ña̱ Salmo 73. Ta̱yóʼo ki̱ʼinra kuenta ña̱ va̱ʼaní ni̱xi̱yo na̱ kǒo ndásakáʼnu Jehová chi kǒo kue̱ʼe̱ níxi̱kuumiína ta kúíkaní ni̱xi̱yona (Sal. 73:​3-5, 12). Xa̱ʼa̱ ña̱ va̱ʼaní ni̱xi̱yona, ta̱ ka̱ʼyí salmo yóʼo xi̱ndakanixi̱níra ña̱ kǒo ndáyáʼvi ndiʼi ña̱ xi̱keʼéra xa̱ʼa̱ Jehová, ta̱ ndiʼi ki̱vi̱ xi̱ndiʼi-inira chi ña̱yóʼo kuití xi̱ndakanixi̱níra xa̱ʼa̱ (Sal. 73:​13, 14). Soo, ¿ndáaña chi̱ndeétáʼan xíʼinra? Ta̱ ka̱ʼyí salmo yóʼo ni̱xa̱ʼa̱nra templo Jehová (Sal. 73:​16-18). Tá ni̱xa̱a̱ra kán kǒoka ña̱ nísandi̱ʼi̱-inira tasaá vií nda̱kanixi̱níra. Ki̱ʼinra kuenta ña̱ ni va̱ʼaníva íyo savana, soo kǒo ña̱ va̱ʼaví ndakiʼinna chí nu̱únínu. Ña̱kán ki̱ʼinra kuenta ña̱ siʼnaka Jehová xíniñúʼu ndasakáʼnura tasaá kǒoka ña̱ níndi̱ʼi̱-inira xa̱ʼa̱ ta chi̱kaa̱níra ndee̱ ña̱ nda̱kú koo inira xíʼin Jehová (Sal. 73:​23-28). w24.10 27 párr. 11, 12

Jehová nda̱kaxinra miíyó ña̱ kooyó testigora (Isa. 43:​10-12). Sa̱kán íyo loʼo ku̱i̱ya̱ na̱ Cuerpo Gobernante ni̱ka̱ʼa̱nna ña̱yóʼo nu̱ú iin carta: “Iin chiñu ña̱ ndáyáʼviní kúú ña̱ ta̱xi Jehová ndaʼa̱yó ña̱ kúúyó testigora”. Ná ka̱ʼa̱nyó xa̱ʼa̱ iin ejemplo. Ná kachiyó ña̱ ni̱xa̱a̱yó nu̱ú na̱ chiñu ña̱ ndatiinna ku̱a̱chi xíʼinyó, saáchi iin na̱ yiví sa̱kúísona ku̱a̱chi miíyó. Ta xíniñúʼuyó iin na̱ yiví ña̱ ndakiʼinna tu̱ʼunyó ta sana ndaka̱xinyó iin na̱ yiví na̱ va̱ʼaní xíni̱ ndáa ki̱ʼva íyoyó. Ta saátu kúni̱yó ña̱ viíní ná koo ña̱ ka̱ʼa̱n na̱yóʼo ña̱ va̱ʼa kandíxa na̱ chíñu ña̱ ka̱ʼa̱nna. Ki̱ʼva saá ke̱ʼé Jehová xíʼinyó, saáchi nda̱kaxinra miíyó ña̱ ka̱ʼa̱nyó ña̱ nda̱a̱ xa̱ʼa̱ra tasaá ndakiʼinyó tu̱ʼunra. Saáchi xíni̱ va̱ʼara ndáa ki̱ʼva íyoyó ta kándíxara miíyó. Ña̱kán, kúsi̱íní-iniyó ña̱ kúúyó testigora. Ta ndiʼi tiempo chíkaa̱yó ndee̱ ña̱ natúʼunyó xa̱ʼa̱ra xíʼin na̱ yiví. Ndásayi̱i̱yó ki̱vi̱ra tá ndákiʼinyó tu̱ʼunra saáchi ku̱a̱ʼání ña̱ vatá káʼa̱n ta̱ Ndi̱va̱ʼa xa̱ʼa̱ra tasaá sáxi̱nuyó chiñu ña̱ ta̱xira ndaʼa̱yó ña̱ kúúyó testigora (Rom. 10:​13-15). w24.05 18 párr. 13

Xi̱kusi̱íní-ini ta̱ Jesús tá xi̱sanáʼa̱ra na̱ yiví xa̱ʼa̱ Ndióxi̱. Ta kǒo nísanáʼa̱ kuití ta̱ Jesús na̱ yiví xa̱ʼa̱ tu̱ʼun Ndióxi̱ chi saátu ta̱xira ña̱ xi̱xina. Tá kúú iin yichi̱ ke̱ʼéra iin milagro ta ku̱a̱ʼání ndu̱u comida i̱xaara, ta ni̱ka̱ʼa̱nra xíʼin na̱ discípulora ña̱ taxinaña ndaʼa̱ na̱ yiví (Mar. 6:41). Xíʼin ña̱yóʼo sa̱náʼa̱ra na̱ discípulora ndáaña xíniñúʼu keʼéna ña̱ va̱ʼa chindeétáʼanna xíʼin na̱ yiví. Saátu ta̱ Jesús ni̱na̱ʼa̱ra xíʼin ña̱ ke̱ʼéra ndáa ki̱ʼva xíniñúʼu chindeétáʼanna xíʼin inkana. Ni̱kusi̱íníva-ini na̱ apóstol saáchi chi̱ndeétáʼanna xíʼin ta̱ Jesús ña̱ nda̱taʼvína ña̱ xi̱xi na̱ yiví ta ndiʼina chu̱tú-ti̱xin (Mar. 6:42). Soo ku̱a̱ʼáníkava yichi̱ ke̱ʼé ta̱ Jesús ña̱ʼa xa̱ʼa̱ inkana nu̱úka ña̱ keʼéra ña̱ kútóo miíra, ndiʼi ku̱i̱ya̱ ña̱ ni̱xi̱yora nu̱ú ñuʼú yóʼo chi̱ndeétáʼanra xíʼin na̱ yiví (Mat. 4:23). Xi̱kusi̱íní-ini ta̱ Jesús tá xi̱sanáʼa̱ra na̱ yiví xa̱ʼa̱ Ndióxi̱ ta saátu tá xi̱chindeétáʼanra xíʼinna. w24.11 16 párr. 10, 11

Kininíka ku̱a̱ʼa̱n ndúu ñuyǐví ña̱ ndóoyó tiempo vitin, ña̱kán ku̱a̱ʼání na̱ hermanoyó xóʼvi̱na ta kivi chindeétáʼanyó xíʼinna. Inka ña̱ kivi keʼéyó kúú ña̱ sándi̱koyó-ini na̱ hermanoyó xíʼin tu̱ʼun Ndióxi̱. Tá xáa̱ na̱ hermano reunión viíní ná ka̱ʼa̱nyó xíʼinna tasaá ndiʼiyó kusi̱í-ini. Kivi chindeétáʼan na̱ anciano xíʼin na̱ hermano na̱ yáʼa nu̱ú tu̱ndóʼo ña̱ yo̱ʼvi̱ní. Ta kivi keʼéna ña̱yóʼo tá ñuu nu̱ú ndóo na̱ hermano kúu iin tu̱ndóʼo á tá kúúmiína iin kue̱ʼe̱. Tá kúu ña̱yóʼo ndi̱ku̱n kama chíndeétáʼan na̱ anciano xíʼin na̱ hermano ta xíniñúʼuna tu̱ʼun Ndióxi̱ ña̱ va̱ʼa sandíkona-inina. Tá na̱ hermano xítona ña̱ iin ta̱ anciano va̱ʼaní-inira, kúnda̱a̱-inira xíʼin ña̱ ndóʼona, xíniso̱ʼorana kǒo ixayo̱ʼvi̱ña xíʼinna ka̱ʼa̱nna xíʼinra tá xa̱a̱ yáʼana nu̱ú tu̱ndóʼo. Ña̱kán tá iin ta̱ anciano kúʼvi̱-inira xínirana kǒo ixayo̱ʼvi̱ña xíʼinna kuniso̱ʼona consejo ña̱ táxira ndaʼa̱na (1 Tes. 2:​7, 8, 11). w24.06 29 párr. 12, 13

Jehová va̱ása níxiniñúʼuvíra ndee̱ra ña̱ va̱ʼa sakǎkura se̱ʼera. ¿Soo á kúni̱ kachi ña̱yóʼo ña̱ va̱ása kúsuchí-ini Jehová? Miíyó na̱ yiví kúsuchí-iniyó ta xóʼvi̱yó chi saá i̱xava̱ʼa Jehová miíyó ta Biblia káʼa̱nña ña̱ ku̱vaʼayó nda̱a̱ táki̱ʼva íyo mií Ndióxi̱, ña̱yóʼo kúni̱ kachiña ña̱ saátu ndóʼo miíra. Tu̱ʼun Ndióxi̱ káʼa̱nña ña̱ ni̱xi̱yo sava na̱ yiví na̱ sa̱xóʼvi̱-ini Jehová ta sa̱kúsuchína-inira (Sal. 78:​40, 41). Ná ndakanixi̱níyó nda̱saaví ku̱suchí-ini Jehová ta ni̱xo̱ʼvi̱-inira tá xi̱nira ndo̱ʼo se̱ʼera ndiʼi ña̱yóʼo. Ni kúni̱níva na̱ veʼeyó xíʼin na̱ migoyó xínina miíyó, soo tá ta̱xi Jehová se̱ʼera ña̱ ni̱xi̱ʼi̱ra xa̱ʼa̱yó ni̱na̱ʼa̱ra ña̱ kúni̱níkara xínira miíyó (Rom. 8:​32, 38, 39). Kúʼvi̱níka-ini Jehová xínira miíyó nu̱úka ña̱ kúʼvi̱-iniyó xíniyó miíyó. Ná ndakanixi̱níyó xa̱ʼa̱ ña̱yóʼo: ¿á kúni̱ún kutakún ndiʼi tiempo? Jehová kúni̱níkara ña̱ ná kutakún ndiʼi tiempo. ¿Á kúni̱ún ná ixakáʼnu-inira xa̱ʼa̱ ku̱a̱chiún? Jehová kúni̱níkavara ixakáʼnu-inira xa̱ʼa̱ ku̱a̱chiún. Ña̱ kúni̱ kuití Jehová ná keʼéyó kúú ña̱ na̱ʼa̱yó ña̱ táxiyó tíxa̱ʼvi ndaʼa̱ra xa̱ʼa̱ ña̱ ta̱xira se̱ʼera ni̱xi̱ʼi̱ra xa̱ʼa̱yó, saátu ña̱ ná kuniso̱ʼoyó ña̱ káʼa̱nra ta kandíxayóra. Tá ta̱xi Jehová se̱ʼera ta̱ Jesús ña̱ ni̱xi̱ʼi̱ra xa̱ʼa̱yó, saá kúú ña̱ ni̱na̱ʼa̱ra ña̱ kúʼvi̱ní-inira xínira miíyó. (Ecl. 3:11). w25.01 22, 23 párr. 8, 9

Ña̱ nda̱a̱ kúúña, sava yichi̱ tá ndáka̱xinyó ña̱ keʼéyó kíʼinyó kuenta xíʼin ña̱ xíniso̱ʼoyó, ña̱ xítoyó xíʼin ña̱ ndóʼoyó. Ña̱yóʼo su̱ví ndiʼi tiempoví chindeétáʼanña xíʼinyó. Soo tá ña̱yóʼo kuití kíʼinyó kuenta xíʼin tá ndáka̱xinyó keʼéyó iin ña̱ʼa, sana kivi xa̱a̱yó keʼéyó iin ña̱ kǒo kútóo Jehová (Ecl. 11:9; Mat. 24:​37-39). Soo tá náʼa̱yó ña̱ kándíxayó Jehová tá ndáka̱xinyó ña̱ keʼéyó, viíva kana ña̱ kúni̱yó keʼéyó ta kindo̱ova-inira xíʼinña. Tá ndíku̱nyó consejo ña̱ táxi Ndióxi̱ ndaʼa̱yó, saá kúú ña̱ kǒo kundi̱ʼi-iniyó ta kusi̱íní-iniyó (Sal. 16:​8, 9; Is. 48:​17, 18). Ta tá ná ndakundeéyó na̱ʼa̱yó ña̱ kándíxayó Ndióxi̱, kivi kutakuyó ndiʼi tiempo (2 Cor. 4:18). Ndiʼiyó xíniñúʼu ndakanixi̱ní xa̱ʼa̱ ña̱yóʼo: “¿Ndáaña táxii̱ chindeétáʼan xíʼi̱n tá ndáka̱xii̱n keʼíi̱ iin ña̱ʼa? ¿Á ña̱ xíto kuitíi̱ kúú ña̱ táxii̱ ná chindeétáʼan xíʼi̱n? ¿Á consejo ña̱ táxi Jehová kúú ña̱ táxii̱ ná chindeétáʼan xíʼi̱n?”. w25.03 20, 21 párr. 3, 4

Tá kéʼéyó ndiʼi ña̱ káʼa̱n Ndióxi̱ xíʼinyó ña̱yóʼo chindeétáʼanña xíʼin na̱ yiví ña̱ kuni̱na sakúaʼana xa̱ʼa̱ra ta ndasakáʼnunara. ¿Ndáa ki̱ʼva keʼéyó ña̱yóʼo? Ña̱ keʼéyó nda̱a̱ táki̱ʼva kéʼé Jehová. Kǒo íxandúxa̱ví Jehová xíʼin na̱ yiví ña̱ ndasakáʼnunara chi viíní kánarana ña̱ ndasakáʼnunara (Jer. 31:3; Juan 6:44). Na̱ ndixa kúni̱ sákuaʼa xa̱ʼa̱ Jehová tá xíniso̱ʼona xa̱ʼa̱ra kúni̱na kuyatinna nu̱úra. ¿Ndáaña kivi keʼéyó ña̱ va̱ʼa chindeétáʼanyó xíʼin na̱ yiví ña̱ kixáʼana ndasakáʼnuna Jehová? Ná na̱ʼa̱yó ña̱ kúʼvi̱-iniyó xíniyó na̱ hermano ta va̱ʼa koo iniyó xíʼinna. Kúni̱yó ña̱ ná ka̱ʼa̱n na̱ yiví na̱ xáʼa̱n reunión nda̱a̱ táki̱ʼva ni̱ka̱ʼa̱n na̱ yiví na̱ ni̱xa̱ʼa̱n congregación ña̱ Corinto ña̱ ni̱xi̱yo xi̱naʼá. Ña̱yóʼo ni̱ka̱ʼa̱nna: “Ña̱ ndixava kúú ña̱ íyo Ndióxi̱ xíʼinndó” (1 Cor. 14:​24, 25; Zac. 8:23). Ña̱kán, xíniñúʼu kuniso̱ʼoyó ña̱ káʼa̱n texto ki̱vi̱ vitin. w24.04 23, 24 párr. 16, 17