Diciembre

Na̱ discípulo ta̱ Jesús xi̱kandíxana ña̱ káʼa̱n tu̱ʼun Ndióxi̱ ta xi̱chikaa̱na ndee̱ keʼéna ña̱ káʼa̱nña (Juan 17:6). Soo kǒo níxi̱kunda̱a̱-inina nda̱chun xa̱ʼnína ta̱ Jesús nda̱a̱ táki̱ʼva kéʼéna xíʼin iin ta̱ kui̱ʼná. Na̱ discípulo xi̱kandíxavana Ndióxi̱, soo ta̱ Jesús ki̱ʼinra kuenta ña̱ xi̱niñúʼu viíka kunda̱a̱-inina xíʼin tu̱ʼun Ndióxi̱ (Luc. 9:​44, 45; Juan 20:9). Xa̱ʼa̱ ña̱kán chi̱ndeétáʼanra xíʼinna ña̱ kunda̱a̱-inina xíʼin ña̱ xi̱kaʼvina. Ná kotoyó ña̱ ke̱ʼéra tá ki̱tara nu̱ú u̱vi̱ na̱ discípulo na̱ ku̱a̱ʼa̱n chí ñuu Emaús. Tá ki̱ta ta̱ Jesús nu̱ú u̱vi̱ na̱ discípulo chí Emaús kǒo ndi̱ku̱n níka̱ʼa̱nra xíʼinna ndáa ta̱ xi̱kuura. ¿Nda̱chun ke̱ʼéra saá? Saáchi xi̱kuni̱ra ná ka̱ʼa̱nna xa̱ʼa̱ ña̱ xi̱ndoʼona xíʼin ña̱ xi̱ndakanixi̱nína. Ta saá ke̱ʼévana chi ni̱ka̱ʼa̱nna xíʼinra ña̱ xi̱kuni̱na ña̱ ná sakǎkura na̱ ñuu Israel nu̱ú na̱ ñuu Roma (Luc. 24:​18-27). Ta̱ Jesús xi̱niñúʼura tu̱ʼun Ndióxi̱ ña̱ va̱ʼa ka̱ʼa̱nra xíʼinna ña̱ xa̱a̱ ni̱xi̱nu ku̱a̱ʼá profecía. Mií xi̱kuaá saá ta̱ Jesús nda̱kutáʼanra xíʼin inkaka na̱ discípulo ta saátu ni̱ka̱ʼa̱nra xíʼin na̱yóʼo ndáaña xi̱kuni kachi profecía kán (Luc. 24:​33-48). w24.10 14 párr. 9, 10

Va̱ʼaní sa̱kúaʼa ta̱ Jesús ndáaña ka̱ʼa̱nra ta ndáaña keʼéra chi Jehová sa̱náʼa̱ miíra. Ta saátu na̱ ñuu Ndióxi̱ tá kúni̱na sanáʼa̱na iin ña̱ʼa á tá kúni̱na taxina iin consejo, nina nu̱ú Biblia távánaña (2 Tim. 3:​16, 17). Ta saátu ndiʼi tiempo káʼa̱nna xíʼinyó ña̱ ná kaʼviyó Biblia ta keʼéyó ña̱ sákuaʼayó. Tá xíniñúʼuyó tutu ña̱ tává na̱ ñuu Ndióxi̱ tá xa̱a̱ káʼviyó Biblia, va̱ʼaní kúnda̱a̱-iniyó xíʼinña. Saáchi kivi chitáʼanyó ña̱ káʼa̱n Biblia xíʼin ña̱ káʼa̱n na̱ ñuu Ndióxi̱ xíʼinyó. Tá kíʼinyó kuenta ña̱ ndiʼi ña̱ káʼa̱nna xí’inyó nu̱ú Biblia távánaña saá va̱ʼaníka kándíxayó ña̱ káʼa̱nna (Rom. 12:2). Ta̱ Jesús na̱túʼunra tu̱ʼun va̱ʼa xa̱ʼa̱ reino Ndióxi̱ (Luc. 4:​43, 44). Saátu ni̱ka̱ʼa̱nra xíʼin na̱ discípulora ña̱ saá keʼéna (Luc. 9:​1, 2; 10:​8, 9). Ta ki̱ʼva saá kéʼé na̱ ñuu Ndióxi̱ tiempo vitin saáchi ni nda̱a̱ ndáaka ñuu ndóona chíkaa̱na ndee̱ ña̱ natúʼunna xa̱ʼa̱ reino Ndióxi̱ xíʼin na̱ yiví. w24.04 9 párr. 5-7

Ndiʼi tiempo ná kuniso̱ʼoyó ña̱ káʼa̱n na̱ ñuu Jehová xíʼinyó. Jehová xi̱niñúʼura ta̱ Moisés xíʼin ta̱ Josué ña̱ va̱ʼa ka̱ʼa̱nra xíʼin na̱ ñuu Israel ndáaña xi̱kuni̱ra keʼéna (Jos. 1:​16, 17). Ña̱kán, tá xi̱xiniso̱ʼo na̱ ñuu ña̱ xi̱ka̱ʼa̱n ta̱ Josué xíʼin ta̱ Moisés ku̱a̱ʼání ña̱ va̱ʼa xi̱ndakiʼinna. Tá ni̱ya̱ʼa ku̱a̱ʼá ku̱i̱ya̱, tá ki̱xáʼa íyo ña̱ congregación cristiana na̱ 12 apóstol kúú na̱ xi̱ka̱ʼa̱n xíʼinna ndáaña keʼéna (Hech. 8:​14, 15). Ta saátu ndaka̱xinna sava na̱ anciano na̱ ñuu Jerusalén ña̱ va̱ʼa chindeétáʼanna xíʼin na̱ apóstol. Xa̱ʼa̱ ña̱ va̱ʼaní xi̱xiniso̱ʼo na̱ cristiano na̱ ni̱xi̱yo siglo nu̱ú ña̱ xi̱ka̱ʼa̱nna xíʼinna, ndiʼina va̱ʼaníka ki̱xáʼa kándíxana Ndióxi̱ ta ndiʼi ki̱vi̱ ku̱a̱ʼáka xi̱nduuna (Hech. 16:​4, 5). Ta saátu tiempo vitin, ku̱a̱ʼání ña̱ va̱ʼa ndákiʼinyó tá xíniso̱ʼoyó ña̱ káʼa̱n na̱ ñuu Ndióxi̱ xíʼinyó. w24.07 10 párr. 10

Jehová xi̱kuʼvi̱ní-inira xi̱xinira ta̱ rey David. Ni̱ka̱ʼa̱nra ña̱yóʼo xa̱ʼa̱ra: “Iin ta̱a ta̱ sákusi̱íní-inii̱ kúúra”. Soo ta̱ David ni̱ki̱ʼvira ku̱a̱chi ña̱ ndeéní, ni̱ki̱si̱ra xíʼin ñá síʼi inka ta̱a ta xa̱ʼníra yii̱ ñáyóʼo, ta xi̱niñúʼu kuvira xa̱ʼa̱ ña̱yóʼo nda̱a̱ táki̱ʼva xi̱kaʼa̱n Ley ta̱ Moisés (Lev. 20:10; Núm. 35:31). Soo xa̱ʼa̱ ña̱ va̱ʼaní-ini Jehová, chi̱ndaʼára ta̱ profeta Natán ña̱ ka̱ʼa̱nra xíʼin ta̱ David ni ta̱ʼánví ndikó-ini ta̱ David xa̱ʼa̱ ña̱ ke̱ʼéra. Ta̱ Natán xi̱niñúʼura iin ejemplo ña̱ va̱ʼa chindeétáʼanra xíʼin ta̱ David ña̱ kunda̱a̱-inira ña̱ ndeéní ku̱a̱chi ni̱ki̱ʼvira. Tasaá ku̱ndaa̱-ini ta̱ David ña̱ ni̱ki̱ʼvira ku̱a̱chi nu̱ú Jehová ta ndi̱kó-inira (2 Sam. 12:​1-14). Ka̱ʼyira iin salmo ña̱ ni̱na̱ʼa̱ ña̱ ndixaní ndi̱kó-inira xa̱ʼa̱ ña̱ ke̱ʼéra (Sal. 51, encabezamiento). Xa̱a̱ ku̱a̱ʼání na̱ yiví na̱ ku̱a̱kiʼvi ku̱a̱chi va̱ʼaní chíndeétáʼan salmo yóʼo xíʼinna ña̱ ndikó-inina xa̱ʼa̱ ku̱a̱chi ña̱ ni̱ki̱ʼvina. Kúsi̱íní-iniyó tá sákuaʼayó ña̱ viíní chi̱ndeétáʼan Jehová xíʼin ta̱ David ña̱ ndikó-inira. w24.08 10 párr. 9

Ku̱a̱ʼání na̱ íyo se̱ʼe káʼa̱nna, ña̱ ku̱a̱ʼání chiñu kúú ña̱ sakúaʼnuna na̱ va̱lí se̱ʼena. Ña̱kán tá íyo na̱ va̱lí se̱ʼún ta chíka̱ún ndee̱ ña̱ sanáʼúnna xa̱ʼa̱ Ndióxi̱, va̱ʼaníva chiñu kéʼún (Deut. 6:​6, 7). Soo tá xáʼnuna, kíxáʼana ndáka̱tu̱ʼunna xa̱ʼa̱ ña̱ sákuaʼayó nu̱ú Biblia ta saátu ndáka̱tu̱ʼunna ndáaña kúú ña̱ va̱ʼa keʼéyó ta ndáaña kúú ña̱ va̱ása va̱ʼa keʼéyó. Tá kíxáʼa na̱ va̱lí se̱ʼendó ndáka̱tu̱ʼunna ndóʼó, sana kíxáʼa ndíʼi̱-inindó saáchi ndákanixi̱níndó ña̱ va̱ása kándíxakana ña̱ káʼa̱n Ndióxi̱. Soo ndiʼiva na̱ va̱lí xíniñúʼu nda̱ka̱tu̱ʼunna ña̱ va̱ʼa sakúaʼana ku̱a̱ʼání ña̱ʼa (1 Cor. 13:11). Ña̱kán kǒo xíniñúʼu yi̱ʼvíndó tá ndáka̱tu̱ʼunna ndóʼó xa̱ʼa̱ ña̱ va̱xi nu̱ú Biblia, chi tá ndáka̱tu̱ʼunna ndóʼó saá kúú ña̱ kivi chindeétáʼanndó xíʼinna ña̱ va̱ʼa kunda̱a̱ka-inina xa̱ʼa̱ Ndióxi̱. w24.12 14 párr. 1, 2

Xi̱niñúʼu kandíxaní na̱ cristiano kán Ndióxi̱ ña̱ va̱ʼa kundeé-inina xa̱ʼa̱ ña̱ xa̱a̱ ku̱nu̱mí kuu Judea (Heb. 10:​37-38). Ta̱ Jesús ni̱ka̱ʼa̱nra xíʼin na̱ cristiano ña̱ ná kununa ku̱ʼu̱nna chí yuku̱ tá ná kunina ndakasi na̱ soldado satá ñuu Jerusalén. Ndiʼi na̱ cristiano xi̱niñúʼu kandíxana consejo yóʼo ni xi̱ndoona chí Jerusalén á xi̱ndoona chí yuku̱ (Luc. 21:​20-24). Tiempo saá tá xi̱kanitáʼan na̱ soldado xíʼin iin ñuu, na̱ yiví na̱ xi̱ndoo chí yuku̱ xi̱ndiʼvina iin ñuu ña̱ ndási nama̱ satá ña̱ va̱ʼa ka̱kuna. Ña̱kán xi̱niñúʼu kandíxanína Ndióxi̱ ña̱ va̱ʼa kununa ku̱ʼu̱nna chí yuku̱. Ta saátu xi̱niñúʼu kandíxaní na̱ cristiano yóʼo na̱ hermano na̱ nda̱kaxin ta̱ Jesús ña̱ kuniʼina yichi̱ nu̱ú na̱ congregación. Chi na̱ hermano yóʼo kúú na̱ ni̱ka̱ʼa̱n xíʼinna ama kúú ña̱ kununa ku̱ʼu̱nna chí yuku̱ ta ndáa ki̱ʼva keʼénaña (Heb. 13:17). w24.09 10 párr. 9, 10

Tá ni̱xi̱yo ta̱ Jesús nu̱ú ñuʼú yóʼo viíní ke̱ʼéra ndiʼi chiñu ña̱ ta̱xi yivára ndaʼa̱ra (Juan 17:4). Soo kǒo níndakanixi̱níra ña̱yóʼo: “Tá kúnii̱ ña̱ vií kana iin chiñu miíi̱ kúú ta̱ xíniñúʼu keʼéña”. Ta̱kán sa̱náʼa̱ra inkana ndáa ki̱ʼva keʼéna chiñu yóʼo. Ta̱ Jesús xi̱ndaa-inira na̱ discípulora chi ta̱xira chíñu ndaʼa̱na ña̱ ku̱ʼu̱nna sanáʼa̱na na̱ yiví xa̱ʼa̱ Ndióxi̱, ta saátu ña̱ kundaana ndikachi sana Ndióxi̱. Káxiní ni̱ka̱ʼa̱n ta̱ Jesús xíʼin na̱ discípulora ndáaña keʼéna soo viíní ni̱ka̱ʼa̱nra xíʼinna. Sava na̱kán i̱xayo̱ʼvi̱ña xíʼinna kandíxana ña̱ nda̱takura, xa̱ʼa̱ ña̱kán ni̱ka̱ʼa̱nra xíʼinna ña̱ ná kǒo kaka-inina (Luc. 24:​25-27; Juan 20:27). Ta saátu ta̱xira consejo ndaʼa̱na ña̱ ná kundi̱ʼi̱ka-inina ña̱ chindeétáʼanna xíʼin na̱ ndásakáʼnu Ndióxi̱ nu̱úka ña̱ kuni̱na kuumiína ña̱ ku̱i̱ká (Juan 21:15). Ta ni̱ka̱ʼa̱nra xíʼinna ña̱ ná kǒo chitáʼanna chiñu ña̱ kéʼéna xíʼin chiñu ña̱ kéʼé inkana (Juan 21:​20-22). Tá ki̱ʼinra kuenta ña̱ kǒo níxi̱kunda̱a̱-inina ndáaña keʼé Reino Ndióxi̱ káxi ni̱ka̱ʼa̱nra xíʼinna ndáaña keʼéña, ta chi̱ndeétáʼanra xíʼinna ña̱ ná ndakundeéna natúʼunna xa̱ʼa̱ Reino yóʼo (Hech. 1:​6-8). w24.10 15, 16 párr. 13, 14

Tá ná kuniso̱ʼoyó ña̱ káʼa̱n Jehová, kivi kutakuyó ndiʼi saá tiempo. Na̱ ñuu Israel xi̱niñúʼu kuniso̱ʼona ña̱ ni̱ka̱ʼa̱n Jehová xíʼinna, saáchi xa̱a̱ ku̱nu̱míní ki̱ʼvina nu̱ú ñuʼú ña̱ ni̱ka̱ʼa̱nra taxira ndaʼa̱na, ta saátu miíyó xa̱a̱ ku̱nu̱míní ki̱ʼviyó nu̱ú ñuyǐví xa̱á ña̱ ni̱ka̱ʼa̱n Jehová taxira ndaʼa̱yó. Kán kuniyó ña̱ nduliviní ñuʼú yóʼo (Is. 35:1; Luc. 23:43). Kǒoka ta̱ Ndi̱va̱ʼa xíʼin na̱ ta̱chí ndi̱va̱ʼa koo (Apoc. 20:​2, 3). Kǒoka veʼe-ñu̱ʼu vatá koo ta iinlá Jehová ndasakáʼnuyó (Apoc. 17:16). Ta ni kǒoka na̱ chíñu ixandi̱va̱ʼa xíʼin na̱ yiví (Apoc. 19:​19, 20). Saátu va̱ása kooka na̱ yiví na̱ keʼé ña̱ kini (Sal. 37:​10, 11). Ndiʼi na̱ yiví kuniso̱ʼona ta kandíxana ley ña̱ káʼa̱n Jehová, saáchi ña̱yóʼo kúú ña̱ chindeétáʼan xíʼinyó ña̱ vií kooyó ta vií kutáʼanyó. Xa̱ʼa̱ ña̱kán, ndiʼi na̱ yiví ku̱ʼvi̱-inina kunitáʼanna ta vií kundoona (Is. 11:9). Liviní ña̱ ndátuyó ndakiʼinyó chí nu̱únínu. Soo tá ná kuniso̱ʼoyó ña̱ káʼa̱n Jehová, saá kúú ña̱ kivi kutakuyó ndiʼi saá tiempo nu̱ú ñuyǐví xa̱á (Juan 3:16). w24.11 9 párr. 7

Profecía ña̱ va̱xi nu̱ú texto ña̱ ki̱vi̱ vitin xítoyó xínu ña̱yóʼo tiempo vitin. Saáchi yáʼaka 1,000 nu̱ú tu̱ʼun nátúʼunyó xa̱ʼa̱ Ndióxi̱ xíʼin na̱ yiví, ta xa̱ʼa̱ ña̱ kúúmiíyó sitio jw.org, ku̱a̱ʼání na̱ yiví na̱ ndóo iníísaá nu̱ú ñuʼú kivi ki̱ʼvina nu̱ú ña̱yóʼo ta kunda̱a̱-inina xa̱ʼa̱ Ndióxi̱. Soo, saátu ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Ña̱ nda̱a̱ káʼi̱n xíʼinndó ña̱ va̱ása sandíʼindó ka̱ʼa̱nndó xa̱ʼa̱ Ndióxi̱ ndiʼi ñuu Israel ta kixaa̱va ta̱ kúú se̱ʼe ta̱a”. Ña̱ xi̱kuni̱ kachira kúú ña̱ kǒo kivi natúʼunna xíʼin ndiʼi na̱ yiví xa̱ʼa̱ Ndióxi̱ tá kúma̱níka kixira (Mat. 10:23; 25:​31-33). Tiempo vitin ku̱a̱ʼání na̱ yiví ndóona nu̱ú kǒo táxi na̱ chíñu natúʼunyó xa̱ʼa̱ Ndióxi̱. Ta saátu ku̱a̱ʼání na̱ va̱lí káku iin tá iin minuto. Ña̱kán, ni chíkaa̱níyó ndee̱ kǒo kivi natúʼunyó xíʼin ndiʼi na̱ yiví na̱ ndóo nu̱ú ñuʼú yóʼo tá kúma̱níka kixi ki̱vi̱ káʼnu Jehová (Apoc. 14:6). w24.05 10 párr. 6, 7

Tu̱ʼun ña̱ xi̱kaʼa̱n ta̱ Jesús va̱ʼaní xi̱sandíkoña-ini inkana ta va̱ʼaní xi̱kunina. Nda̱a̱ ni iin yichi̱ kǒo nínda̱ʼyi̱ ta̱ Jesús nu̱ú na̱ discípulora (Luc. 8:​47, 48). Xíʼin ña̱ ke̱ʼé ta̱ Jesús va̱ʼaní yichi̱ sa̱ndákoora nu̱ú ta̱a ta̱ xa̱a̱ ti̱ndaʼa̱. Ta̱ Jesús ni̱ka̱ʼa̱nra xíʼin ta̱a ta̱ xa̱a̱ ti̱ndaʼa̱ ña̱ ná ixato̱ʼóra ñá síʼira. Ta ni̱ka̱ʼa̱nra tu̱ʼun ña̱ ni̱ka̱ʼa̱n yivára tá ka̱chira: “Ta̱ ta̱a [...] ndakutáʼanra xíʼin ñá síʼira” (Mat. 19:​4-6). Tu̱ʼun griego ña̱ xi̱niñúʼuna nu̱ú texto yóʼo ña̱ kúni̱ kachi “ndakutáʼanna”, káʼa̱nña xa̱ʼa̱ ña̱ viíní xíniñúʼu kutáʼan ta̱ xa̱a̱ ti̱ndaʼa̱ xíʼin ñá síʼira ta koona nda̱a̱ táki̱ʼva íyo na̱ kútu̱ní núʼni. Xa̱ʼa̱ ña̱kán tá ná taʼví táʼanna u̱vi̱ saána kivi xo̱ʼvi̱. Tá saá, ¿ndáaña xíniñúʼu keʼé ta̱ ta̱a ña̱ va̱ʼaní koora xíʼin ñá síʼira? Kǒo xíniñúʼu kotora pornografía á nu̱ú kée na̱ yiví chálá. Xíniñúʼu chikaa̱ra ndee̱ ña̱ kǒo kotora nda̱a̱ ni iin ña̱ va̱ása va̱ʼa (Sal. 119:37). Saátu xíniñúʼu chikaa̱ra ndee̱ ña̱ keʼéra nda̱a̱ táki̱ʼva ke̱ʼé ta̱ Job, ña̱ kǒo kutóora inka ñaʼá ñá su̱ví kúú ñá síʼira (Job 31:1). w25.01 10 párr. 12, 13

Sava yichi̱ kivi ixayo̱ʼvi̱ña xíʼinyó i̱xakáʼnu-iniyó xa̱ʼa̱ táʼanyó. Soo síínva íyo Jehová nu̱ú miíyó. Chi nda̱a̱ ni iin na̱ yiví kǒo kivi ixakáʼnu-inina nda̱a̱ táki̱ʼva íxakáʼnu-ini Jehová xa̱ʼa̱yó. Iin ta̱ ka̱ʼyi Salmo ni̱ka̱ʼa̱nra ña̱yóʼo xíʼin Jehová: “Yóʼó kúú ta̱ ndixa íxakáʼnu-ini xa̱ʼa̱ na̱ yiví, ña̱kán íxato̱ʼóna yóʼó” (Sal. 130:4). Iinlá Jehová kúú ta̱ ndixa íxakáʼnu-ini xa̱ʼa̱ na̱ yiví ta kǒo ña̱ kítáʼan xíʼin ña̱yóʼo. Tá kúni̱yó ndixa ixakáʼnu-iniyó xa̱ʼa̱ inkana, ná kéʼéyó nda̱a̱ táki̱ʼva kéʼé Jehová. Nu̱ú sava versículo ña̱ va̱xi nu̱ú Escrituras Hebreas xi̱niñúʼuna iin tu̱ʼun ña̱ va̱ʼa ka̱ʼa̱nna xa̱ʼa̱ ña̱ íxakáʼnu-ini Jehová xa̱ʼa̱yó, soo nda̱a̱ ni iin yichi̱ kǒo níxiniñúʼuna tu̱ʼun yóʼo ña̱ ka̱ʼa̱nna xa̱ʼa̱ ña̱ íxakáʼnu-ini iin na̱ yiví xa̱ʼa̱ inkana. Tá íxakáʼnu-ini Jehová xa̱ʼa̱ iin na̱ yiví, nándóso-inira xa̱ʼa̱ ku̱a̱china ta táxira ña̱ ná ndikó tukuna koona migora. Va̱ʼaní-ini Jehová chi íxakáʼnu-inira xa̱ʼa̱ ku̱a̱chiyó ta kǒo ndákaʼánkara xa̱ʼa̱ña. w25.02 8 párr. 1-3

Ni tá kǒo xíín na̱ yiví kuniso̱ʼona tá nátúʼunyó xíʼinna, soo xa̱a̱ sáxi̱nuvayó chiñu ña̱ nda̱kiʼinyó. ¿Nda̱chun? Saáchi ña̱ ndáyáʼvika nu̱ú Jehová xíʼin ta̱ Jesús kúú ña̱ natúʼunyó xíʼin na̱ yiví. Ña̱kán ná kǒo kundi̱ʼi̱-iniyó tá kǒo kívi ka̱ʼa̱nyó xíʼin ni iin na̱ yiví á tá kǒo xíínna kuniso̱ʼona miíyó. Va̱ʼaka ná kusi̱í-iniyó chi xíʼin ña̱ kéʼéyó sákusi̱íyó-ini yiváyó Jehová (Prov. 27:11). Saátu kivi kusi̱í-iniyó tá iin na̱ hermano ndáni̱ʼína iin na̱ yiví na̱ va̱ʼaní xíniso̱ʼo tá nátúʼunna xíʼinna xa̱ʼa̱ Ndióxi̱. Tutu Ña̱ Nátúʼun xíʼinyó chítáʼanña chiñu ña̱ kéʼéyó xíʼin ña̱ nándukúna iin ta̱ loʼo ta̱ nda̱ñúʼu. Ku̱a̱ʼání na̱ yiví nándukúnara soo xa̱a̱ síín síín lugar nándukúnara, tá xa̱a̱ nda̱ni̱ʼínara ndiʼina kúsi̱í-ini. Saátu miíyó ku̱a̱ʼáníyó kée ña̱ ku̱a̱ʼa̱nyó nátúʼunyó xíʼin na̱ yiví xa̱ʼa̱ Ndióxi̱ ta ku̱a̱ʼání ñuu xáʼa̱nyó nátúʼunyó xíʼinna. Ta ndiʼiyó kúsi̱í-ini tá iin na̱ yiví kíxáʼana xáʼa̱nna reunión. w24.04 18 párr. 13, 14

Xa̱a̱ ku̱nu̱míní kixaa̱ tiempo ña̱ va̱ʼaní, ta kúni̱yó ña̱ ku̱a̱ʼáníka na̱ yiví sakúaʼa xa̱ʼa̱ Jehová tá kúma̱níka kixaa̱ ña̱ gran tribulación. Soo saátu kúsi̱íní-iniyó chi sana ku̱a̱ʼá na̱ yiví kuni̱na sakúaʼana xa̱ʼa̱ Jehová tá xa̱a̱ ndíkaa̱ ña̱ gran tribulación. Nani ndátuyó kixaa̱ ki̱vi̱ yóʼo ná chika̱a̱yó ndee̱ ña̱ natúʼunyó xíʼin na̱ yiví xa̱ʼa̱ Ndióxi̱. Ta saátu ná natúʼunyó xíʼin na̱ yiví ña̱ xa̱a̱ ku̱yatinní kixaa̱ ña̱ ndiʼi-xa̱ʼa̱ ndiʼi ña̱ kini ña̱ íyo nu̱ú ñuʼú yóʼo. Chika̱a̱yó ndee̱ ña̱ natúʼunyó xíʼin na̱ yiví xa̱ʼa̱ Jehová nda̱a̱ ná ka̱ʼa̱n miíra xíʼinyó ña̱ kǒo natúʼunkayó xa̱ʼa̱ra. w24.05 19 párr. 14-16

Ñuú tá kúma̱níka kaʼnína ta̱ Jesús, sa̱náʼa̱ra ta̱ Pedro xíʼin inkaka na̱ apóstol ña̱ ndáyáʼviní sakúaʼana vitá koo inina. Nda̱katara xa̱ʼa̱na ta kǒo níxi̱ka-inira ña̱ keʼéra ña̱yóʼo. Nda̱kanda̱ní-ini na̱ apóstol tá xi̱nina ña̱ ta̱vá ta̱ Jesús ti̱ko̱to̱ ña̱ kánuu sa̱tára, tasaá ki̱ʼinra iin ti̱ko̱to̱ loʼo ka̱túnra tokóra ta chi̱kaa̱ra ti̱kui̱í ini xikóʼó ta ki̱xáʼara ndákatara xa̱ʼa̱na (Juan 13:​4, 5). Sana ku̱a̱ʼáva tiempo xi̱niñúʼu ta̱ Jesús ña̱ va̱ʼa nda̱katara xa̱ʼa̱ 12 saá na̱ apóstolra, nda̱a̱ ta̱ Judas ta̱ ni̱xi̱íkoñaʼá nda̱katara xa̱ʼa̱. Xíʼin ña̱ ke̱ʼé ta̱ Jesús ni̱na̱ʼa̱ra ña̱ vitání ni̱xi̱yo inira. Tándi̱ʼi, viíní ni̱ka̱ʼa̱nra ña̱yóʼo xíʼin na̱ discípulora: “¿Á kúnda̱a̱-inindó xíʼin ña̱ ke̱ʼíi̱ xíʼinndó? Ndóʼó káʼa̱nndó Maestro ta káʼa̱nndó táta xíʼi̱n, ta va̱ʼa káʼa̱nvandó chi suvi kúúvai̱. Ña̱kán, tá yi̱ʼi̱ ta̱ kúú táta xíʼin Maestro va̱ʼa nda̱katai̱ xa̱ʼa̱ndó, saátu xíniñúʼu keʼé ndóʼó xíʼin táʼanndó” (Juan 13:​12-14). w25.03 10 párr. 9-11

Ndiʼi ña̱ íyo nu̱ú ñuʼú yóʼo kǒo chíndeétáʼanña xíʼinyó ña̱ kuyatinyó nu̱ú Jehová. Ku̱a̱ʼání na̱ yiví káʼa̱nna ña̱ kǒo Ndióxi̱ íyo, ta saátu xítoyó ña̱ va̱ʼaní íyo na̱ kǒo ndásakáʼnu Jehová, ta xa̱ʼa̱ ña̱yóʼo sana kivi kixáʼa kaka-iniyó. Kándíxavayó ña̱ íyo Ndióxi̱, soo sana kivi ndakanixi̱níyó ña̱ kǒo chíndeétáʼanvíra xíʼinyó. Saá kúú ña̱ ndo̱ʼo ta̱ ka̱ʼyí ña̱ Salmo 73, saáchi xi̱nira ña̱ va̱ʼaní íyo na̱ kǒo ndásakáʼnu Jehová, ña̱kán nda̱kanixi̱níra ña̱ kǒo xíniñúʼuví nda̱kú koo inira xíʼin Jehová (Sal. 73:​11-13). ¿Ndáaña chi̱ndeétáʼan xíʼin ta̱ salmista ña̱ kǒo ndakanikaxi̱níra táki̱ʼva xi̱ndakanixi̱níra tá ya̱chi̱? Ña̱ chi̱ndeétáʼan xíʼinra kúú ña̱ nda̱kaʼánra xa̱ʼa̱ ña̱ kundoʼo na̱ yiví na̱ kúxíká nu̱ú Jehová (Sal. 73:​18, 19, 27). Saátu nda̱kanixi̱níra xa̱ʼa̱ ña̱ va̱ʼa ña̱ ndákiʼinra xa̱ʼa̱ ña̱ ndásakáʼnura Jehová. Ta saátu miíyó kivi ndakanixi̱níyó xa̱ʼa̱ ndiʼi bendición ña̱ xa̱a̱ táxi Jehová ndaʼa̱yó. w24.06 25 párr. 16, 17

Tiempo xi̱naʼá ni̱xi̱yo na̱ xi̱satatu xu̱ʼún á na̱ xi̱taxi tóoña ndaʼa̱ na̱ nda̱ʼví, soo ku̱a̱ʼání si̱ki̱ña xi̱kiʼinna nu̱úna, ta saátu ni̱xi̱yo na̱ juez na̱ xi̱kiʼin xu̱ʼún tasaá va̱ása viíka níxi̱ndatinna ku̱a̱chi xíʼin na̱ yiví. Kúndasíní Jehová xínira ña̱ kéʼé ña̱yóʼo (Ezeq. 22:12). Ta miíyó, ¿á kútóoníyó xu̱ʼún? Ná ndakanixi̱níyó xa̱ʼa̱ pregunta yóʼo: “¿Á ndiʼi tiempo ndíʼi̱-inii̱ xa̱ʼa̱ xu̱ʼún ta kúnii̱ satái̱ á kuei̱n ku̱a̱ʼání ña̱ʼa? Tá iinna sátatu á táxi tóona xu̱ʼún ndaʼíi̱, ¿á kúachi̱níi̱ ña̱ chaʼvii̱ nu̱úna chi ndákanixi̱níi̱ ña̱ kǒo xíniñúʼunaña? ¿Á túvii̱ ña̱ ndáyáʼviníi̱ xa̱ʼa̱ ña̱ kúúmiíi̱ ku̱a̱ʼá xu̱ʼún? ¿Á íxayo̱ʼvi̱ña xíʼi̱n ña̱ va̱ʼa koo-inii̱ xíʼin inkana? Tá iin na̱ ñaniyó á ku̱ʼvayó kúúmiína ku̱a̱ʼá xu̱ʼún, ¿á ndákanixi̱níi̱ ña̱ kǒo ndíʼi̱-inina xa̱ʼa̱ chiñu Jehová ta nina xa̱ʼa̱ xu̱ʼún kuití ndíʼi̱-inina? ¿Á nina na̱ ku̱i̱ká kuití kítáʼi̱n xíʼin ta kǒo kítáʼi̱n xíʼin na̱ nda̱ʼví?”. Kúsi̱íní-iniyó ña̱ ñúʼuyó veʼe Jehová ña̱kán ná kǒo kundi̱ʼi̱ní-iniyó xa̱ʼa̱ ña̱ ku̱i̱ká. Tá saá ná keʼéyó kǒo sandákoo ndaʼa̱ Jehová miíyó. w24.06 12, 13 párr. 17, 18

Ña̱ va̱ʼa kundaayó miíyó nu̱ú ña̱ tentación, xíniñúʼu sakúaʼayó ndakanixi̱níyó xa̱ʼa̱ ña̱ va̱ʼa ta kundasíyó kuniyó ña̱ kini (Amós 5:15). Tá saá ná keʼéyó ña̱yóʼo chindeétáʼan xíʼinyó ña̱ keʼéyó nina ña̱ va̱ʼa ta kǒo ndakavayó ndaʼa̱ ku̱a̱chi. Saátu chindeétáʼanña xíʼinyó ña̱ koo tu̱ʼvayó tá xa̱a̱ va̱xi iin tentación nu̱úyó. Ná chikaa̱yó ndee̱ ña̱ kachíñu ku̱a̱ʼákayó nu̱ú Jehová. Tá xáʼa̱nyó reunión, tá kéeyó predicación saá kúú ña̱ kéʼéyó ña̱ kútóo Jehová (Mat. 28:​19, 20; Heb. 10:​24, 25). Inka ña̱ chindeétáʼan xíʼinyó ña̱ kuni̱yó keʼéyó ña̱ va̱ʼa ta kundasíyó kuniyó ña̱ kini kúú ña̱ kaʼviyó Biblia ta ndakanixi̱níyó xa̱ʼa̱ ña̱ sákuaʼayó (Jos. 1:8; Sal. 1:​2, 3; 119:97). Ta ná ndakaʼányó xa̱ʼa̱ consejo ña̱ ta̱xi ta̱ Jesús: “Ka̱ʼa̱nníndó xíʼin Ndióxi̱ ña̱ va̱ʼa ná kǒo ndakavandó ndaʼa̱ ku̱a̱chi” (Mat. 26:41). Ña̱ chíndeétáʼan Jehová xíʼinyó kúú ña̱ kuni̱kayó keʼéyó ña̱ʼa ña̱ sákusi̱í-inira (Sant. 4:8). w24.07 17, 18 párr. 14-16

Ná keʼéyó táki̱ʼva kéʼé Jehová tá xa̱a̱ sánáʼa̱yó inkana. Saáchi va̱ʼaní-inira ta táxira ña̱ ndíchi ndaʼa̱yó. Ta saátu miíyó, ña̱ xíni̱yó sánáʼa̱yóña inkana ta kǒo yíʼviyó ña̱ kindaana chiñu ndaʼa̱yó, ta ni kǒo ndákanixi̱níyó: “Ná sákuaʼa miívana, chi kǒo na̱ ní sánáʼa̱ yi̱ʼi̱”. Soo ti̱xin ñuu Jehová kǒo kívi keʼéyó ña̱yóʼo ta kǒo káʼa̱n kuitíyó xíʼinna xa̱ʼa̱ ña̱ xíni̱yó, chi saátu chíkaa̱yó ndee̱ ña̱ sanáʼa̱yóna (1 Tes. 2:8). Va̱ʼaní sánáʼa̱yóna ña̱ va̱ʼa koo tu̱ʼvana sanáʼa̱na inkana (2 Tim. 2:​1, 2). Tá ndiʼiyó sánáʼa̱yó inkana ña̱ xíni̱yó, saá si̱íní kooyó chi ndiʼiyó kunda̱a̱-ini ndáa ki̱ʼva keʼéyó iin chiñu. w24.09 29 párr. 12, 13

Sana ndákanixi̱níún ña̱ kǒo iin chiñu ña̱ va̱ʼaní xíni̱ún keʼún, soo kǒo ndakava-iniún chi íyova ña̱ kivi keʼún ña̱ va̱ʼa chindeétáʼún xíʼin na̱ hermano. Iin ña̱ kivi keʼún kúú ña̱ ka̱ʼún xíʼin Jehová, ta kaʼviún ña̱ va̱xi nu̱ú 1 Corintios 12:​12-30. Nu̱ú texto yóʼo, ta̱ Pablo ni̱ka̱ʼa̱nra ña̱ ndiʼi miíyó na̱ ndásakáʼnu Jehová íyova chiñu ña̱ ndáyáʼviní ña̱ kivi keʼéyó ti̱xin congregación. Chikaa̱ ndee̱ ña̱ viíní kachíñún nu̱ú Jehová ta saátu ña̱ chindeétáʼún xíʼin na̱ hermano. Na̱ anciano kotona ndáaña kúú ña̱ xíni̱ún keʼún, tasaá taxina iin chiñu ndaʼún ña̱ kivi keʼún (Rom. 12:​4-8). Ndiʼi miíyó na̱ ndásakáʼnu Jehová xíniñúʼu viíní kitáʼanyó xíʼinra, saátu xíniñúʼu kusi̱í-iniyó ña̱ chindeétáʼanyó xíʼin inkana, xíʼin ña̱ chinúuyó iin yichi̱ va̱ʼa nu̱úna. w24.11 17 párr. 12, 13

Ku̱a̱ʼání tu̱ndóʼo ni̱ya̱ʼa ñá Ana nu̱ú ta xi̱xakuníñá xa̱ʼa̱ ña̱yóʼo. Yii̱ñá ta̱ Elcaná ni̱xi̱yo inka ñá síʼira ñá xi̱naní Peniná ta xi̱saa̱ní-iniñá xi̱xiniñá ñá Ana ta xi̱ ixandi̱va̱ʼaníñá xíʼinñá. Ñá Ana kǒo níxi̱kivi koo se̱ʼeñá ta ñá Peniná ku̱a̱ʼá se̱ʼeñá ni̱xi̱yo (1 Sam. 1:​1, 2). Ta xa̱ʼa̱ ña̱yóʼo xi̱kusi̱kindaaníñá ñá Ana. Xi̱kusuchíní-ini ñá Ana ta xa̱ʼa̱ ña̱kán kǒo níxi̱xixiñá (1 Sam. 1:​6, 7, 10). ¿Ndáaña ke̱ʼé ñá Ana ña̱ va̱ʼa kǒo kusuchíka-iniñá? Ni̱ka̱ʼa̱nñá xíʼinra: “Koto chi xóʼvi̱níi̱” (1 Sam. 1:11). Ñá Ana ni̱ka̱ʼa̱nñá xíʼin Jehová xa̱ʼa̱ ndiʼi ña̱ xi̱sandíʼi̱-iniñá ta ku̱suchíní-inira xa̱ʼa̱ ña̱ xi̱nira xákuníñá. Ta mií Jehová xi̱nira ña̱ kúsuchíní-iniñá ta xi̱niso̱ʼora ña̱ xa̱kundáʼviñá nu̱úra, ta ta̱xira ña̱ koo se̱ʼeñá (1 Sam. 1:​19, 20; 2:21). w24.12 21 párr. 5-7

Ña̱ ni̱xi̱ʼi̱ ta̱ Jesús xa̱ʼa̱yó sánáʼa̱ña miíyó ña̱ ndíʼi̱ní-inira xa̱ʼa̱ na̱ yiví ta na̱ ndíʼi̱níka-inira xa̱ʼa̱ kúú na̱ ndíku̱n sa̱tára (Juan 13:1). Ta̱ Jesús xi̱kunda̱a̱-inira ña̱ tá ná koora nu̱ú ñuʼú yóʼo ya̱ʼara nu̱ú ku̱a̱ʼání tu̱ndóʼo ta xo̱ʼvi̱níra tá ná kuvira. Soo ni saá chi̱kaa̱ní ta̱ Jesús ndee̱ ña̱ ka̱chíñura nu̱ú Ndióxi̱ nani ni̱xi̱yora nu̱ú ñuʼú yóʼo, soo va̱ása níkeʼéra ña̱yóʼo xa̱ʼa̱ ña̱ xi̱kuni̱ kuitíra keʼéra ña̱ ni̱ka̱ʼa̱n yivára chi ke̱ʼéraña xa̱ʼa̱ ña̱ kúʼvi̱-inira xínira na̱ yiví xa̱ʼa̱ ña̱kán na̱túʼunra xíʼinna xa̱ʼa̱ Ndióxi̱, sa̱náʼa̱rana ta chi̱ndeétáʼanra xíʼinna. Ta tá xa̱a̱ ku̱nu̱mí kuvira nda̱katara xa̱ʼa̱ na̱ apóstolra, sa̱náʼa̱rana ta chi̱kaa̱ra ndee̱ xíʼinna ta saátu sa̱ndíkora-inina (Juan 13:​12-15). Ta tá xa̱a̱ tíkaara ndaʼa̱ yitu̱n ni̱ka̱ʼa̱nra xíʼin iin ta̱ kui̱ʼná ta̱ xi̱tikaa síi̱nra ña̱ koora nu̱ú ñuyǐví xa̱á ta saátu ni̱ka̱ʼa̱nra xíʼin ta̱ Juan ña̱ ná kundaara siʼíra ñá María (Luc. 23:​42, 43; Juan 19:​26, 27). Ta̱ Jesús ni̱na̱ʼa̱ra ña̱ xi̱kuʼvi̱ní-inira xi̱xinira na̱ yiví ndiʼi tiempo ña̱ ni̱xi̱kara na̱túʼunra xa̱ʼa̱ yivára ta saátu tá ni̱xi̱ʼi̱ra xa̱ʼa̱yó. w25.01 23 párr. 11

Ná ka̱ʼa̱nyó xa̱ʼa̱ inka ejemplo ña̱ chindeétáʼan xíʼinyó kunda̱a̱-iniyó ndáa ki̱ʼva ndóʼoyó tá íxakáʼnu-ini Jehová xa̱ʼa̱yó. Ndiʼiyó ñúʼuyó ndaʼa̱ ku̱a̱chi. Soo tá íxakáʼnu-ini Jehová xa̱ʼa̱yó, ndátavára miíyó ndaʼa̱ ku̱a̱chi (Rom. 6:​17, 18; Apoc. 1:5). Kúsi̱íní-iniyó chi íxakáʼnu-ini Jehová xa̱ʼa̱yó ta ndóʼoyó nda̱a̱ táki̱ʼva ndóʼo iin na̱ esclavo tá sáña̱na. Soo xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱ ku̱a̱chiyó, nda̱a̱ táki̱ʼva íyo na̱ nda̱ʼa saá íyoyó ta xa̱ʼa̱ ña̱yóʼo kivi kixáʼa tukuyó kitáʼanyó xíʼin Jehová chi tá kíʼviyó ku̱a̱chi, kúxíkáyó nu̱úra (1 Ped. 2:24). Tá ndáʼa iin na̱ yiví na̱ ndeéníndóʼo, kúsi̱íníva-inina. Ki̱ʼva saá ndóʼo miíyó tá íxakáʼnu-ini Jehová xa̱ʼa̱yó, chi kúsi̱íní-iniyó saáchi kíxáʼa tukuyó viíní kítáʼanyó xíʼinra. w25.02 11 párr. 16; 13 párr. 17

Nu̱ú ilustración yóʼo ta̱ Jesús ni̱ka̱ʼa̱nra xa̱ʼa̱ u̱vi̱ na̱ esclavo na̱ nda̱kú ni̱xi̱yo ini xíʼin ta̱ káchíñuna nu̱ú, ta saátu ni̱ka̱ʼa̱nra xa̱ʼa̱ iin ta̱ esclavo ta̱ kǒo níxi̱yo nda̱kú-ini (Mat. 25:​14-30). U̱vi̱ na̱ esclavo na̱ nda̱kú ni̱xi̱yo ini ndánaʼa̱na na̱ ungido na̱ ku̱ʼu̱n chí ndiví. Ta̱ Jesús káʼa̱nra xíʼin iin tá iin na̱yóʼo: “Naʼa ta kusi̱í-iniún xíʼi̱n”. Ña̱yóʼo kúni̱ kachiña ña̱ ku̱ʼu̱nna koona xíʼinra chí ndiví tá ná ndatakuna (Mat. 25:​21, 23; Apoc. 20:5a). Soo íyo iin ña̱ sákuaʼa na̱ ungido xíʼin ña̱ ke̱ʼé ta̱ esclavo xúxán. Ná kotoyó ndáaña kúúña. Chikaa̱ndó ndee̱ ña̱ va̱ʼaní kachíñundó. Tá ni̱ka̱ʼa̱n ta̱ Jesús xa̱ʼa̱ ilustración ña̱ talento, kǒo níxi̱kuni̱ kachira ña̱ nduu na̱ ungido na̱ xúxán. Chi nda̱a̱ táki̱ʼva ke̱ʼéra tá ni̱ka̱ʼa̱nra xa̱ʼa̱ ilustración ña̱ káʼa̱n xa̱ʼa̱ 10 ná si̱ʼí kúa̱an, iin consejova xi̱kuni̱ra taxira. Ni̱ka̱ʼa̱nra xíʼinna ña̱ tá ná sandákoona ña̱ nda̱kú koo inina xíʼinra, kǒo ki̱ʼvina ti̱xin Reino Ndióxi̱. w24.09 22 párr. 10; 23 párr. 12, 13

Ndiʼivayó kúni̱ kuumií iin chiñu nu̱ú kivi kiʼinyó xu̱ʼún ña̱ va̱ʼa kuniñúʼuyó xíʼin na̱ veʼeyó (Ecl. 7:12; 1 Tim. 5:8). Xa̱ʼa̱ ña̱kán tá ndáka̱xinyó ndáa chiñu kachíñuyó, kúni̱vayó kunda̱a̱-iniyó nda̱saa chaʼvina miíyó. Soo tá ña̱yóʼo kuití kíʼinyó kuenta xíʼin, va̱ása na̱ʼa̱yó ña̱ ndáa-iniyó Jehová. Xíniñúʼu kiʼinyó kuenta tá ndáka̱xinyó ndáa chiñu kúú ña̱ kachíñuyó chi kivi sakúxíkaña miíyó nu̱ú Jehová, tá ná keʼéyó ña̱yóʼo saá kúú ña̱ na̱ʼa̱yó ña̱ ndixa kándíxayó Ndióxi̱. Ná ndakanixi̱níyó xa̱ʼa̱ ña̱yóʼo: “¿Á kivi xa̱i̱ keʼíi̱ iin ña̱ʼa ña̱ va̱ása kútóo Jehová tá ná kiʼii̱n chiñu yóʼo? ¿Á kivi kasiña nu̱úi̱ ña̱ ndasakáʼnui̱ Jehová? Tá ná kiʼii̱n chiñu yóʼo, ¿á sandákoi̱ na̱ veʼi̱ ku̱a̱ʼá tiempo?” (Prov. 6:​16-19). Tá saá íyoña, iin ña̱ va̱ʼaka kivi keʼún kúú ña̱ kǒo kiʼún chiñu yóʼo ni íxayo̱ʼvi̱ña xíʼún ña̱ ndani̱ʼún iin chiñu nu̱ú kachíñún. Xa̱ʼa̱ ña̱ kándíxayó Jehová, náʼa̱yó xíʼin ña̱ ndáka̱xinyó keʼéyó ña̱ kándíxavayó ña̱ miíra taxi ña̱ xíniñúʼuyó (Mat. 6:33; Heb. 13:5). w25.03 21 párr. 5, 6

Ná chika̱a̱yó ndee̱ kuʼvi̱-iniyó kuniyó na̱ hermanoyó nda̱a̱ táki̱ʼva kúʼvi̱-ini Jehová xínirana. Ña̱kán ná kiʼinyó kuenta xíʼin ña̱ va̱ʼa ña̱ kéʼéna ta su̱ví ña̱ va̱ása va̱ʼa kéʼéna. Chi tá xa̱a̱ ná kooyó nu̱ú ñuyǐví xa̱á va̱ása kookavína na̱ yiví ku̱a̱chi. Ña̱kán, tá kúʼvi̱-iniyó xíniyóna saá kúú ña̱ ixakáʼnu-iniyó xa̱ʼa̱na. Ña̱kán tá kúʼvi̱-iniyó xíniyó na̱ yiví ña̱yóʼo chindeétáʼanña xíʼinna ña̱ sakúaʼana xa̱ʼa̱ Jehová ta ndasakáʼnunara. Táxiníyó tíxa̱ʼvi ndaʼa̱ Ndióxi̱ xa̱ʼa̱ ña̱ táxira ñúʼuyó ti̱xin ñuura. Ndiʼi na̱ yiví na̱ kúni̱ kusi̱í-ini ta vií koona xíniñúʼu ki̱ʼvina ti̱xin ñuu Jehová ta kixáʼana ndasakáʼnunara. Soo ná kiʼinníyó kuenta chi ta̱ Ndi̱va̱ʼa kúni̱ra sándaʼvira miíyó ta kúni̱ra sakúxíkara miíyó nu̱ú Jehová (1 Ped. 5:8; Apoc. 12:9). Soo ná kǒo taxiyó ña̱ sándaʼvina miíyó. Ná kǒo keʼéyó ña̱ kini, va̱ʼaka ná chikaa̱yó ndee̱ ña̱ vií kutáʼanyó tasaá kusi̱íní-iniyó ndasakáʼnuyó Jehová. w24.04 24, 25 párr. 18, 19

Ndóʼó na̱ íyo se̱ʼe sanáʼa̱ndó na̱ va̱lí se̱ʼendó ña̱ kuni̱na ndasakáʼnuna Jehová. Iin yichi̱ va̱ʼa chinúundó nu̱úna ta na̱ʼa̱ndó nu̱úna ña̱ siʼna chiñu Jehová xíniñúʼu kundi̱ʼi̱-inina xa̱ʼa̱, tá kúú ña̱ kaʼvindó Biblia, ña̱ ku̱ʼu̱nndó reunión xíʼin ña̱ keendó predicación. Soo tá kǒo kéʼéndó ña̱yóʼo, na̱ va̱lí se̱ʼendó kivi ka̱ʼa̱nna ña̱ kúúna testigo Jehová saáchi ndóʼó kúúndó testigo Jehová. Soo tá ná ya̱ʼa tiempo kǒo ndi̱ʼi̱ka-inina ña̱ keʼéna chiñu nu̱ú Jehová ta nda̱a̱ kivi kuxíkána nu̱úra. Tá iin na̱ yiví ki̱tana ti̱xin ñuu Jehová, ¿á kivika ndikóna nu̱úra? Kiviva ndikóna nu̱úra tá ná ndandikó-inina xa̱ʼa̱ ña̱ ke̱ʼéna ta kivi xa̱a̱ tukuna koona migora, soo xíniñúʼu vitá koo inina ta taxina ña̱ chindeétáʼan na̱ anciano xíʼinna (Sant. 5:14). Ni ná ya̱ʼana nu̱ú ña̱ kaʼan nu̱ú, soo ña̱ ndáyáʼvika kúú ña̱ kixáʼana vií tuku kutáʼanna xíʼin Jehová. w24.07 24, 25 párr. 18, 19

¿Ndáaña chindeétáʼan xíʼinndó ña̱ kǒo keʼéndó ña̱ kini tá xa̱a̱ xíka xíʼin táʼanndó? Tá xa̱a̱ yáʼa tiempo saá kúú ña̱ kúni̱níkandó xínitáʼanndó ta kíxáʼa kútóo táʼanníkandó. Soo, kǒo kúni̱víndó keʼéndó ña̱ʼa ña̱ kúndasí Jehová xínira. Ña̱kán, kǒo ka̱ʼa̱nndó xa̱ʼa̱ ña̱ ku̱su̱n xíʼin táʼanndó, ña̱ kaka mitúʼunndó á ña̱ koʼondó ndixi (Efes. 5:3). Chi tá ná keʼéndó ña̱yóʼo saá kúú ña̱ kuni̱níndó ku̱su̱n xíʼin táʼanndó ta ki̱ʼvindó ku̱a̱chi nu̱ú Ndióxi̱. Va̱ʼaka natúʼunndó xa̱ʼa̱ ña̱ʼa ña̱ kivi chindeétáʼan xíʼinndó tasaá kǒo ki̱ʼvindó ku̱a̱chi (Prov. 22:3). Tá xa̱a̱ ku̱a̱ʼá tiempo xíka xíʼin táʼanndó sana kivi na̱ʼa̱nndó ña̱ kúni̱níndó xínitáʼanndó, soo ixato̱ʼó-táʼanndó (Cant. 1:2; 2:6). Soo, tá xa̱a̱ kúni̱níndó ku̱su̱n xíʼin táʼanndó, sana kixáʼa ndi̱ʼiní-inindó xa̱ʼa̱ miíndó ta va̱ása kiʼinndó kuenta ndáa ki̱ʼva íyo na̱ xíkandó xíʼin. Ta saátu tá kǒo kíʼinndó kuenta xíʼin ki̱ʼva ña̱ kéʼéndó xíʼin táʼanndó nda̱a̱ kivi ki̱ʼvindó ku̱a̱chi (Prov. 6:27). Tá sa̱kán ki̱xáʼa xíka xíʼin táʼanndó xíniñúʼu káxi ka̱ʼa̱nndó ndáaña xíniñúʼu keʼéndó tasaá kǒo ki̱ʼvindó ku̱a̱chi nu̱ú Ndióxi̱ (1 Tes. 4:​3-7). w24.05 29 párr. 10, 11

Kúni̱yó ña̱ ka̱ʼa̱n na̱ hermano xíʼinyó ña̱ chindeétáʼanyó xíʼinna tá yáʼana nu̱ú tu̱ndóʼo (Prov. 17:17). Soo, ¿ndáaña keʼéyó ña̱ va̱ʼa kuyatinna nu̱úyó ta natúʼunna xíʼinyó xa̱ʼa̱ ña̱ ndóʼona? Kivi chikaa̱yó ndee̱ ña̱ ndiʼi ki̱vi̱ keʼéyó nda̱a̱ táki̱ʼva kéʼé Jehová. Tá kúú, tá ki̱ndooyó keʼéyó iin ña̱ʼa ná saxínuyóña, ta saátu tá ni̱ka̱ʼa̱nyó ña̱ ku̱ʼu̱nyó iin lugar ya̱chi̱ ná xa̱a̱yó. Na̱ anciano na̱ va̱ʼaní kéʼé chiñu va̱ʼaní ndáa-ini na̱ hermanona. Tá kúú, iin ta̱ anciano ta̱ kíʼin kuenta xíʼin grupo ña̱ predicación tá kama ndákuiinra yuʼú na̱ hermano tá ndáka̱tu̱ʼunnara saá kúú ña̱ va̱ʼaní kúnina. Tá ndiʼi tiempo chíndeétáʼan na̱ anciano xíʼin na̱ hermano, na̱yóʼo kíʼinna kuenta ña̱ kúʼvi̱ní-ini na̱ anciano xíninana. Tá xíniñúʼuna Biblia xíʼin tutu ña̱ tává na̱ ñuu Ndióxi̱ ña̱ taxina consejo ndaʼa̱ na̱ hermano, saá kúú ña̱ va̱ʼaníka kándíxana ña̱ káʼa̱nna. Saátu, va̱ʼaní ndáa-ini na̱ hermanona tá kǒo nátúʼunna xíʼin inkana xa̱ʼa̱ iin ña̱ ku̱u ta saátu tá sáxi̱nuna ña̱ ki̱ndoona keʼéna. w24.06 30 párr. 14, 15

Kǒo kindaaví Jehová tu̱ndóʼo ña̱ kúúmiíyó tiempo vitin, soo kúnda̱a̱-iniyó ña̱ taxivara ndee̱ ndaʼa̱yó ña̱ kundeé-iniyó (Sal. 41:3). Tá kúú, táxira espíritu santora ndaʼa̱yó ña̱ va̱ʼa chindeétáʼanña xíʼinyó ña̱ kundeé-iniyó, saátu táxira ña̱ ndíchi ndaʼa̱yó ta sándi̱kora-iniyó (Prov. 18:14; Filip. 4:13). Ta káʼa̱nra xíʼinyó ña̱ chí nu̱únínu ndiʼi kue̱ʼe̱ ña̱ kúúmiíyó tiempo vitin ndiʼi-xa̱ʼa̱vaña (Is. 33:24). Jehová ni̱ka̱ʼa̱nra ña̱ ná ka̱ʼyi̱ ña̱yóʼo ña̱ va̱ʼa chindeétáʼanña xíʼinyó tá yáʼayó nu̱ú tu̱ndóʼo (Rom. 15:4). Ná kotoyó ña̱ ndo̱ʼo iin ñá hermana ñá íyo chí África Occidental, ñáyóʼo xi̱xakuníñá saáchi ni̱ka̱ʼa̱nna xíʼinñá ña̱ kúúmiíñá kue̱ʼe̱ cáncer. Ña̱yóʼo káʼa̱nñá: “Iin texto ña̱ va̱xi nu̱ú Biblia ña̱ va̱ʼaní chíkaa̱ ndee̱ xíʼi̱n kúú Isaías 26:3. Versículo yóʼo náʼa̱ña nu̱úyó ña̱ mií Jehová kivi sandíkora-iniyó á taxira ndee̱ ndaʼa̱yó ña̱ va̱ʼa kǒo ndi̱ʼi̱ní-iniyó tá xa̱a̱ yáʼayó nu̱ú tu̱ndóʼo”. ¿Á ndákaʼún xa̱ʼa̱ iin texto ña̱ va̱xi nu̱ú Biblia ña̱ chíndeétáʼanní xíʼún tá yáʼún nu̱ú tu̱ndóʼo á tá ndíʼi̱ní-iniún? w24.12 24 párr. 17, 18

Ki̱ʼva saá ké’é na̱ anciano tá kíta iinna ti̱xin ñuu Jehová chíkaa̱nína ndee̱ ña̱ chindeétáʼanna xíʼinna ña̱ ndikóna ñuura (Luc. 15:​22-24, 32). Tá ndíkó iin na̱ ni̱ki̱ʼvi ku̱a̱chi ñuu Jehová, kúsi̱íní-inina chí ndiví ta saátu miíyó kúsi̱íní-iniyó (Luc. 15:7). Va̱ása kútóo Jehová koo na̱ kíʼvi ku̱a̱chi ti̱xin ñuura tá va̱ása ndándikó-inina. Soo kǒo sándákoondaʼa̱rana chi kúni̱ra ná ndikóna nu̱úra. Nu̱ú Oseas 14:4 sákuaʼayó ndáa ki̱ʼva kúni Jehová xíʼin na̱ ndíkó-ini: “Sandáʼi̱na tasaá va̱ása sandáʼvikana yi̱ʼi̱. Xa̱ʼa̱ ña̱ kúni̱ miíi̱ kúú ña̱ kuʼvi̱-inii̱ kunii̱na, saáchi va̱ása sa̱a̱kai̱ xíʼinna”. Ña̱kán ndáyáʼviní kiʼin na̱ anciano kuenta tá kíxáʼa iin na̱ yiví ndándikó-inina. Ta saátu ndáyáʼviní ña̱ chikaa̱ na̱ ke̱e ti̱xin ñuu Jehová ndee̱ ña̱ ndikóna nu̱úra. w24.08 28 párr. 8, 9

Soo sava yichi̱ su̱ví ndiʼina táxi tíxa̱ʼvi ndaʼa̱yó xa̱ʼa̱ ña̱ kéʼéyó xa̱ʼa̱na. Sava yichi̱ xíniñúʼuyó tiempoyó, ndee̱yó xíʼin ña̱ kúúmiíyó ña̱ va̱ʼa chindeétáʼanyó xíʼinna, soo na̱yóʼo ni loʼo va̱ása náʼa̱na ña̱ ndáyáʼviña nu̱úna. Tá kúu ña̱yóʼo, ¿ndáaña chindeétáʼan xíʼinyó ña̱ kusi̱í-iniyó ta kǒo sa̱a̱yó? Ná ndakaʼányó ni táxina tíxa̱ʼvi ndaʼa̱yó xa̱ʼa̱ ña̱ kéʼéyó xa̱ʼa̱na á ni kǒo táxinaña, soo kiviva kusi̱í-iniyó (Hech. 20:35). Ña̱kán, ná kusi̱í-iniyó taxiyó ña̱ʼa ndaʼa̱ inkana, ni túviyó ña̱ kǒo ndáyáʼvi ña̱ kéʼéyó nu̱úna. Tá táxiún ña̱ʼa ndaʼa̱ inkana, ndíku̱ún yichi̱ Jehová. Ta̱yóʼo táxira ña̱ va̱ʼa ndaʼa̱ na̱ yiví, ni ndáyáʼviña nu̱úna á ni kǒo ndáyáʼviña nu̱úna (Mat. 5:​43-48). Jehová káʼa̱nra xíʼinyó ña̱ tá táxiyó iin ña̱ʼa ndaʼa̱ inkana kǒo xíniñúʼu kundatuyó ña̱ taxinaña ndaʼa̱yó chi mií Jehová kúú ta̱ taxi ku̱a̱ʼání ña̱ʼa ndaʼa̱yó (Luc. 6:35). Ña̱kán kǒo ndakava-iniún tá kǒo táxina tíxa̱ʼvi ndaʼún xa̱ʼa̱ ña̱ kéʼún xa̱ʼa̱na. Ndakaʼán chi tá kúsi̱í-iniyó ña̱ táxiyó ña̱ʼa ndaʼa̱ inkana, mií Jehová kúú ta̱ taxi ku̱a̱ʼání ña̱ va̱ʼa ndaʼa̱yó (2 Cor. 9:7; Prov. 19:17). w24.09 29 párr. 14-16