Sakuaʼaka ña̱ va̱ʼa sanáʼa̱kaún: Kuniñúʼu teléfono ña̱ natúʼún xa̱ʼa̱ Ndióxi̱

¿NDA̱CHUN XÍNIÑÚʼU KEʼÉYÓÑA? Va̱ʼaní ña̱ kuniñúʼuyó teléfono ña̱ natúʼunyó xa̱ʼa̱ Ndióxi̱ xíʼin na̱ yiví (Hch 20:24).a Chi ña̱yóʼo chíndeétáʼanña xíʼinyó ña̱ natúʼunyó xíʼinna tá va̱ása kúchiñu ku̱ʼu̱nyó nda̱a̱ veʼena.

¿NDÁA KI̱ʼVA KEʼÉYÓÑA?

• 

  Xa̱a̱ kaʼvi kúeún. Ndaka̱xin iin tema ña̱ kutóo na̱ yiví kuniso̱ʼona. Ta tándi̱ʼi, kaʼyí ña̱ kúni̱ún ka̱ʼún xíʼinna. Ndakanixi̱ní ndáa ki̱ʼva ka̱ʼún tá kǒona níndakuiin yuʼún chi ña̱ nda̱kuiin yuʼún kúú iin tu̱ʼunna ña̱ nda̱koona ti̱xin teléfono kán. Xa̱a̱ ya̱chi̱ka ná koo tu̱ʼva tutu nu̱ú va̱xi ña̱ ka̱ʼún xa̱ʼa̱ xíʼinna, ta saátu xa̱a̱ ná koo tu̱ʼva celular á tableta tú kuniñúʼún, tú kúúmií JW Library^® á jw.org^®.

• 

  Va̱ása ndi̱ʼi-iniún. Xíʼin tu̱ʼun miíún ka̱ʼún xíʼinna. Si̱í kuniún ña̱ ka̱ʼún xíʼinna ta nda̱a̱ táki̱ʼva ka̱ʼún xíʼin iin na̱ yiví na̱ níndichi yatin nu̱ún saá ka̱ʼún xíʼinna. Viíní ka̱ʼún xíʼinna, va̱ʼaníka tá ná ka̱ʼún xíʼin inkana ña̱ chindeétáʼanna xíʼún ña̱ natúʼun xa̱ʼa̱ Ndióxi̱. Tá na̱ yiví kán ndáka̱tu̱ʼunna yóʼo, kivi tuku ka̱ʼún ña̱ pregunta ña̱ ni̱ka̱ʼa̱nna xíʼún ña̱ va̱ʼa kuniso̱ʼo na̱ chíndeétáʼan xíʼún ña̱ nandukúna respuesta.

• 

  Viíní ka̱ʼún xíʼinna ña̱ va̱ʼa kuniso̱ʼona yóʼó tá ná natúʼun xíʼinna inka yichi̱. Tá na̱ yiví kán kúni̱kana kunda̱a̱-inina, va̱ʼa ndakoún iin pregunta ña̱ ka̱ʼún xa̱ʼa̱ inka yichi̱. Saátu kivi ka̱ʼún xíʼinna ña̱ kúni̱ún taxiún iin tutu ña̱ kúúmiíyó ndaʼa̱na ta ka̱ʼún xíʼinna á kivi chindaʼúnña ndaʼa̱na xíʼin correo á chí nu̱ú Internet ta á kivitu ku̱ʼún taxiúnña ndaʼa̱na. Ta ka̱ʼún xíʼinna ña̱ kivitu chindaʼún iin video ndaʼa̱na á inkaka tutu ña̱ kúúmiíyó ndaʼa̱na ti̱xin iin correo á ti̱xin iin mensaje. Tá va̱ʼa túviún, ka̱ʼa̱n xíʼinna ná ki̱ʼvina nu̱ú sitio ña̱ kúúmiíyó nu̱ú Internet.