Ndiʼivayó kivi nda̱ka̱tu̱ʼun

Ñá Mary xíʼin ta̱ Johna ndóona iin ñuu nu̱ú xáa̱ ku̱a̱ʼání na̱ yiví na̱ kée chí Filipinas ña̱ va̱ʼa kachíñuna, ta na̱yóʼo chíkaa̱nína ndee̱ ña̱ nátúʼunna xíʼin na̱ yiví yóʼo xa̱ʼa̱ Ndióxi̱. Tá xi̱ndikaa̱ kue̱ʼe̱ ña̱ COVID-19, ñá Mary ki̱xáʼañá káʼviñá xíʼin ku̱a̱ʼání na̱ yiví na̱ inka ñuu ta su̱ví nda̱saa xíʼin kuití na̱ ndóo ñuuñá. ¿Ndáa ki̱ʼva ke̱ʼéñá ña̱yóʼo?

Ñá Mary xi̱ndaka̱tu̱ʼunñá na̱ xi̱kaʼviñá xíʼin: “¿Á xíni̱ún inka na̱ kúsi̱í-ini kaʼvi Biblia?”. Tá na̱yóʼo xi̱kaʼa̱nna ña̱ xíni̱vana iinna, ñáyóʼo xi̱kaʼa̱nñá xíʼinna ña̱ ná ka̱ʼa̱nna xíʼinñá ndáana kúúna. Xa̱ʼa̱ ña̱ xi̱ndaka̱tu̱ʼunñá ña̱yóʼo, ku̱a̱ʼání yichi̱ xi̱chindeétáʼanña xíʼinñá. ¿Nda̱chun? Saáchi na̱ yiví na̱ kútóo sakúaʼa xa̱ʼa̱ Ndióxi̱ kúni̱na ña̱ ná kunda̱a̱-ini na̱ veʼena xíʼin na̱ migona xa̱ʼa̱ ña̱ sákuaʼana. Ná kotoyó ña̱ ke̱ʼé ñá Mary.

Iin ñá xi̱kaʼvi ñá Mary xíʼin ñá xi̱naní Jasmin ni̱ka̱ʼa̱nñá xíʼinñá ña̱ íyo ku̱mí na̱ yiví na̱ kúni̱ sakúaʼa xa̱ʼa̱ Biblia. Iin ñáyóʼo xi̱naníñá Kristine, xa̱ʼa̱ ña̱ xi̱kutóoníñá ña̱ káʼviñá ni̱ka̱ʼa̱nñá ña̱ kúni̱ñá kaʼviñá u̱vi̱ yichi̱ ti̱xin iin semana. Tá ni̱nda̱ka̱tu̱ʼun ñá Mary ñá Kristine á xíni̱ñá inkaka na̱ kúni̱ sakúaʼa xa̱ʼa̱ Biblia, ñáyóʼo ka̱chiñá: “Íyova sava ná migai̱”. Tá ni̱ya̱ʼa sava semana, ñá Kristine ni̱ka̱ʼa̱nñá xíʼin ñá Mary ña̱ kúni̱va ku̱mí ná migañá sakúaʼaná xa̱ʼa̱ Biblia. Ña̱kán ki̱xáʼa ñá Mary káʼviñá xíʼinná chí nu̱ú Internet á xíʼin videollamada. Soo tá ni̱ya̱ʼa loʼo tiempo, ñá Kristine ni̱ka̱ʼa̱nñá xíʼin ñá Mary ña̱ íyo inkaka na̱ migoñá na̱ kúni̱ sakúaʼa xa̱ʼa̱ Biblia, ña̱kán ki̱xáʼatu ñá Mary káʼviñá xíʼin na̱yóʼo chí nu̱ú Internet á xíʼin videollamada. Ta sava na̱yóʼo ni̱ka̱ʼa̱nna xíʼin ñá Mary ña̱ xíni̱na inkaka na̱ yiví na̱ kúni̱ sakúaʼa.

Tándi̱ʼi ni̱ka̱ʼa̱n ñá Kristine xíʼin ñá Mary ndáaná kúú ná migañá ná kúni̱ káʼvi, saátu ni̱ka̱ʼa̱nñá xíʼinñá ña̱ kúni̱ñá ña̱ ná kunda̱a̱-ini na̱ veʼeñá na̱ ndóo chí Filipinas xa̱ʼa̱ ña̱ káʼa̱n Biblia. Xa̱ʼa̱ ña̱kán ni̱ka̱ʼa̱nñá xíʼin se̱ʼeñá ñá Andrea á kúni̱ñá sakúaʼañá xa̱ʼa̱ Biblia. Tá xa̱ʼa̱, ñá Andrea nda̱kanixi̱níñá: “Va̱ása va̱ʼaví íyo religión na̱ testigo Jehová, kǒo kándíxana ta̱ Jesús ta iinlá kuití ña̱ Antiguo Testamento xíniñúʼuna”. Soo tá sa̱kán ki̱xáʼañá káʼviñá, ki̱ʼinñá kuenta ña̱ va̱ása va̱ʼaví íyo ña̱ ndákanixi̱níñá. Tá xi̱kaʼviñá xi̱kachiñá: “Tá ña̱ Biblia káʼa̱n xa̱ʼa̱ ña̱yóʼo, ña̱ ndixa kúúvaña”.

Tá ni̱ya̱ʼa loʼo tiempo, ñá Andrea ni̱ka̱ʼa̱nñá xíʼin ñá Mary ña̱ íyo inka u̱vi̱ ná migañá ná kúni̱ sakúaʼa xa̱ʼa̱ Biblia ta saátu iin ñá káchíñu xíʼinñá. Ta ni̱ka̱ʼa̱nñá xíʼin ñá Mary ña̱ kivitu kaʼviñá xíʼin náyóʼo chí nu̱ú Internet á xíʼin videollamada, xa̱ʼa̱ ña̱kán saátu náyóʼo ki̱xáʼana káʼviná. Saátu ni̱xi̱yo iin xixi ñá Andrea ñá xi̱naní Angela, ñáyóʼo kǒo níxi̱kivi kotoñá. Ta tá xi̱kaʼvi ñá Mary xíʼin ñá Andrea, ñáyóʼo xi̱xiyoñá xi̱xiniso̱ʼoñá ña̱ xi̱kaʼa̱nná, soo ñá Mary kǒo níxi̱kunda̱a̱-iniñá xa̱ʼa̱ ña̱yóʼo. Iin ki̱vi̱, ñá Angela ni̱ka̱ʼa̱nñá xíʼin ñá Andrea ña̱ ná ka̱ʼa̱nñá xíʼin ñá Mary ña̱ kúni̱ñá sakúaʼañá xa̱ʼa̱ Biblia. Ña̱kán ki̱xáʼatu ñá Mary káʼviñá xíʼin ña̱yóʼo chí nu̱ú Internet á xíʼin videollamada. Ku̱tóoní ñá Angela ña̱ ki̱xáʼañá sákuaʼañá xa̱ʼa̱ Jehová. Ni ta̱ʼán xi̱nu iin yo̱o̱ ta xa̱a̱ xi̱xiniñá ku̱a̱ʼání texto xíʼin xi̱níñá ta saátu ni̱ka̱ʼa̱nñá ña̱ kúni̱ñá kaʼviñá ku̱mí yichi̱ ti̱xin iin semana. Xa̱ʼa̱ ña̱ xi̱chindeétáʼan ñá Andrea xíʼin ñá Angela ki̱xáʼañá kíʼvi ni̱ʼiñá reunión ña̱ xíyo nu̱ú Internet.

Tá xi̱kaʼvi ñá Mary xíʼin ñá Kristine, yii̱ ñáyóʼo ta̱ xi̱naní Joshua xi̱xiyora yatin kán ta xi̱xiniso̱ʼora ña̱ xi̱kaʼa̱nná. Tá ki̱ʼin ñá Mary kuenta xa̱ʼa̱ ña̱yóʼo, ni̱nda̱ka̱tu̱ʼunñára á kúni̱ra kaʼvira xíʼinna. Ta̱yóʼo ka̱chira: “Va̱ʼava, soo kúni̱ kuitíi̱ kuniso̱ʼi̱. Ña̱kán va̱ása nda̱ka̱tu̱ʼunndó nda̱a̱ ni iin ña̱ʼa yi̱ʼi̱ chi tá ná nda̱ka̱tu̱ʼunndó yi̱ʼi̱ ndakiʼii̱n ku̱ʼi̱n”. Soo ni ta̱ʼán ya̱ʼaka 5 minuto ta xa̱a̱ ku̱a̱ʼání ña̱ʼa ni̱nda̱ka̱tu̱ʼunra ñá Mary nu̱úka ñá Kristine. Ta saátu ni̱ka̱ʼa̱nra ña̱ kúni̱ra kaʼvira Biblia.

Xa̱ʼa̱ ña̱ xi̱nda̱ka̱tu̱ʼun ñá Mary na̱ xi̱kaʼviñá xíʼin, ku̱a̱ʼáníka na̱ yiví ki̱xáʼa káʼvi Biblia. Ñá Mary ni̱ka̱ʼa̱nñá xíʼin sava na̱ hermano ña̱ chindeétáʼanna xíʼinñá ña̱ kaʼvina xíʼin sava na̱yóʼo. Ndiʼi na̱ xi̱kaʼvi ñá Mary xíʼin xi̱kuuna 28, ta xa̱a̱ síín síín ñuuna.

Ñá Jasmin ñá siʼnaka ki̱xáʼa ñá Mary káʼviñá xíʼin, nda̱kuchiñá tá abril ña̱ ku̱i̱ya̱ 2021. Ta ñá Kristine nda̱kuchiñá tá mayo ña̱ ku̱i̱ya̱ 2022 ta vitin íyo tukuñá chí Filipinas xíʼin na̱ veʼeñá. Ta saátu nda̱kuchi inka u̱vi̱ ná ni̱ka̱ʼa̱n ñá Kristine xa̱ʼa̱ xíʼin ñá Mary. Ta tá ni̱ya̱ʼa loʼo yo̱o̱, nda̱kuchitu ñá Angela ta vitin ki̱xáʼañá kúúñá precursora regular. Ta yii̱ ñá Kristine ta̱ naní Joshua xíʼin se̱ʼeñá ñá Andrea ta saátu inkaka na̱ káʼvi ñá Mary xíʼin chíkaa̱nína ndee̱ ña̱ sákuaʼakana.

Tá siglo nu̱ú, tá xi̱xaa̱ iin na̱ yiví xi̱kunda̱a̱-inina xa̱ʼa̱ Ndióxi̱ ndi̱ku̱n xi̱natúʼunna xíʼin na̱ veʼena ta saátu xíʼin na̱ migona xa̱ʼa̱ ña̱yóʼo (Juan 1:​41, 42a; Hech. 10:​24, 27, 48; 16:​25-33). Chikaa̱ ndee̱ ña̱ nda̱ka̱tu̱ʼún ña̱yóʼo na̱ káʼviún xíʼin á inkaka na̱ yiví na̱ kúni̱ kunda̱a̱-ini xa̱ʼa̱ Ndióxi̱: “¿Á xíni̱ún inka na̱ kúsi̱í-ini kaʼvi Biblia?”. Tá ná nda̱ka̱tu̱ʼunyó ña̱yóʼo, sana ku̱a̱ʼáníva na̱ yiví kivi kixáʼayó kaʼviyó xíʼin.