Ná na̱ʼa̱yó ña̱ ndixa kúúyó migo inkana

¿Á XA̱A̱ sava yichi̱ yáʼún nu̱ú iin tu̱ndóʼo ta túviún ña̱ kǒo iin na̱ chindeétáʼan xíʼún? Xa̱ʼa̱ ña̱ ndóoyó iin tiempo ña̱ yo̱ʼvi̱ní, kivi kixáʼayó kusuchíní-iniyó ta ndakanixi̱níyó ña̱ íyo mitúʼunyó ta kǒo na̱ chindeétáʼan xíʼinyó tá yáʼayó nu̱ú tu̱ndóʼo (2 Tim. 3:1). Ña̱ Biblia káʼa̱nña ña̱ na̱ ndixa kúú migoyó kúú na̱ kivi chindeétáʼan xíʼinyó tá yáʼayó nu̱ú tu̱ndóʼo (Prov. 17:17).

¿NDÁAÑA KIVI KEʼÉYÓ ÑA̱ NA̱ʼA̱YÓ ÑA̱ NDIXA KÚÚYÓ MIGO INKANA?

Ta̱ apóstol Pablo ni̱xi̱yo na̱ migora na̱ ni̱xi̱ka xíʼinra ta xi̱chindeétáʼannína xíʼinra (Col. 4:​7-11). Tá xi̱ndikaa̱ra veʼeka̱a chí ñuu Roma, na̱yóʼo chi̱ndeétáʼannína xíʼinra ña̱ ke̱ʼéna sava ña̱ʼa ña̱ kǒo níxi̱kivi keʼéra. Tá kúú ta̱ Epafrodito ni̱xa̱ʼa̱nra nda̱koora ña̱ʼa ña̱ xi̱xiniñúʼu ta̱ Pablo, ña̱ chi̱ndaʼá na̱ hermano na̱ ñuu Filipos ndaʼa̱ra (Filip. 4:18). Ta ta̱ Tíquico kúú ta̱ nda̱taʼví carta ña̱ ka̱ʼyi ta̱ Pablo ku̱a̱ʼa̱n nu̱ú xa̱a̱ síín síín na̱ congregación (Col. 4:7).a Xa̱ʼa̱ ña̱ chi̱ndeétáʼan na̱ migo ta̱ Pablo xíʼinra, va̱ʼa sa̱xínura chiñu ña̱ xi̱kuumiíra ni xi̱ndasira ini veʼera chí ñuu Roma ta saátu ni xi̱ndikaa̱ra veʼeka̱a. Ta miíyó, ¿ndáa ki̱ʼva kivi na̱ʼa̱yó ña̱ ndixa kúúyó migo inkana?

Tiempo vitin ku̱a̱ʼání na̱ hermano náʼa̱na xíʼin ña̱ kéʼéna ña̱ ndixa kúúna migo inkana. Ná kotoyó ña̱ ndo̱ʼo iin ñá hermana ñá naní Elísabet, ñáyóʼo kúúñá precursora regular ta íyoñá chí España. Tá ni̱ka̱ʼa̱n na̱ doctor xíʼin siʼí ñá Elísabet ña̱ kúúmiíñá cáncer ta si̱lóʼoní tiempo kíndo̱o ña̱ kutakuñá, iin ñá hermana ni̱na̱ʼa̱ñá ña̱ ndixa kúúñá miga ñá Elísabet saáchi xi̱chindaʼá ni̱ʼiñá mensaje ña̱ liviní ndaʼa̱ñá ña̱ xi̱kuumií texto ña̱ va̱xi nu̱ú Biblia. Ñá Elísabet káchiñá: “Mensaje yóʼo va̱ʼaní chi̱ndeétáʼanña xíʼi̱n ña̱ va̱ása kuni mitúʼi̱n ta ta̱xiníña ndee̱ ndaʼíi̱ ña̱ kundeé-inii̱ ya̱ʼi̱ nu̱ú tu̱ndóʼo yóʼo ki̱vi̱ tá ki̱vi̱” (Prov. 18:24).

Kivi va̱ʼaníka xa̱a̱yó kutáʼanyó xíʼin na̱ hermanoyó tá ná chindeétáʼanyó xíʼinna ña̱ ku̱ʼu̱nna reunión á predicación. Tá kúú, ¿á kivi ka̱ʼa̱nyó xíʼin iin na̱ hermano na̱ xa̱a̱ chée ña̱ ku̱ʼu̱nyó ndakiʼinyóna ña̱ ku̱ʼu̱nna xíʼinyó reunión á predicación? Tá ná keʼéyó ña̱yóʼo saá kúú ña̱ kivi chikaa̱yó ndee̱ xíʼin táʼanyó (Rom. 1:12). Soo íyo sava na̱ hermano na̱ va̱ása kívi kee veʼena, ¿ndáa ki̱ʼva kivi na̱ʼa̱yó ña̱ ndixa kúúyó migo na̱yóʼo?

NÁ NA̱ʼA̱YÓ ÑA̱ NDIXA KÚÚYÓ MIGO NA̱ KǑO KÍVI KEE VEʼE

Íyo sava na̱ hermano na̱ kǒo kívi ku̱ʼu̱n reunión ti̱xin salón xa̱ʼa̱ ña̱ kúúmiína iin kue̱ʼe̱ á xa̱ʼa̱ ña̱ ndóʼona inkaka ña̱ʼa. Ña̱yóʼo kúú ña̱ ndo̱ʼo iin ta̱ hermano ta̱ naní David. Na̱ doctor ni̱ka̱ʼa̱nna xíʼinra ña̱ kúúmiíra cáncer ta xa̱ʼa̱ ña̱yóʼo xi̱niñúʼu ndakiʼinra quimioterapia yáʼaka i̱ñu̱ yo̱o̱. Xa̱ʼa̱ ña̱ xi̱ndakiʼinra quimioterapia yóʼo, miíra xíʼin ñá síʼira ñá Lidia xi̱kiʼvina reunión chí nu̱ú Internet ni xi̱ndoona nda̱a̱ veʼena.

¿Ndáa ki̱ʼva chi̱ndeétáʼan na̱ congregación xíʼin na̱ hermano yóʼo? Tá xi̱ndiʼi reunión, sava na̱ hermano na̱ xi̱ñuʼu chí salón xi̱tavána loʼo tiempo ña̱ va̱ʼa ka̱ʼa̱nna xíʼin na̱ hermano yóʼo xa̱ʼa̱ ña̱ xi̱ñuʼuna reunión chí nu̱ú Internet. Ta tá xi̱taxi ta̱ David xíʼin ñá Lidia comentario ti̱xin reunión, na̱ hermano xi̱chindaʼána mensaje ndaʼa̱na ña̱ va̱ʼa chikaa̱kana ndee̱ xíʼinna. ¿Ndáa ki̱ʼva chi̱ndeétáʼan ña̱yóʼo xíʼin ta̱ David ta saátu ñá Lidia? Va̱ʼaní ku̱nina saáchi xi̱naʼa̱ na̱ migona ña̱ xi̱kuʼvi̱ní-inina xi̱xininana.

Kivi ndukúyó ki̱ʼva ña̱ va̱ʼa inkáchi natúʼunyó xa̱ʼa̱ Ndióxi̱ xíʼin iin na̱ hermano na̱ kǒo kívi kita veʼe. Kivi nasamayó sava ña̱ kéʼéyó ña̱ va̱ʼa chindeétáʼanyó xíʼin na̱ hermanoyó tasaá na̱ʼa̱yó ña̱ va̱ása nínandóso-iniyó xa̱ʼa̱na (Prov. 3:27). ¿Á kivi inkáchi keʼéyó carta xíʼinna á natúʼunyó xíʼin na̱ yiví xíʼin teléfono? Saátu na̱ anciano kivi ndaka̱xinna keʼéna reunión ña̱ kéʼéna tá kúma̱níka keena predicación chí nu̱ú Internet, ña̱ va̱ʼa ki̱ʼvi na̱ hermano na̱ va̱ása kívi kee veʼe. Tá kúú ta̱ David xíʼin ñá Lidia ni̱kusi̱íní-inina xa̱ʼa̱ ña̱ ke̱ʼé na̱ anciano ña̱yóʼo xa̱ʼa̱na. Ta̱ David káchira: “Xa̱ʼa̱ ña̱ xi̱kiʼvindi̱ reunión yóʼo xíʼin na̱ grupondi̱ ña̱ va̱ʼa natúʼunndi̱ xa̱a̱ sava ña̱ káʼa̱n Biblia ta saátu ña̱ inkáchi keʼéndi̱ oración, va̱ʼaní chi̱kaa̱ña ndee̱ xíʼinndi̱”. Tá íyo iin na̱ sánáʼa̱yó xa̱ʼa̱ Biblia, ¿á kivi ka̱ʼa̱nyó xíʼinna ña̱ ná ku̱ʼu̱nna veʼe iin na̱ hermano na̱ kǒo kívi kita ña̱ va̱ʼa inkáchi kaʼviyó xíʼinna? Soo ná nda̱ka̱tu̱ʼunyó na̱ hermano kán á kivi keʼéyó ña̱yóʼo veʼena.

Tá táváyó tiempo ña̱ chindeétáʼanyó xíʼin na̱ hermano na̱ kǒo kívi kita veʼe, saá kúú ña̱ va̱ʼaníka xa̱a̱yó kunda̱a̱-iniyó ndáa ki̱ʼva íyona ta saátu va̱ʼaníka xa̱a̱yó kitáʼanyó xíʼinna. Tá kúú, tá xítoyó ña̱ va̱ʼaní xíniñúʼuna Biblia ña̱ va̱ʼa chindeétáʼanna xíʼin na̱ yiví, chíndayáʼviníkayóna. Tá chíndeétáʼanyó xíʼin na̱ hermano, kivi ku̱a̱ʼáka xa̱a̱ na̱ migoyó koona (2 Cor. 6:13).

Tá ni̱ya̱ʼa ta̱ Pablo nu̱ú tu̱ndóʼo, migora ta̱ Tito ni̱xi̱yora xíʼinra ta sa̱ndíkora-inira (2 Cor. 7:​5-7). Tá káʼa̱nyó tu̱ʼun va̱ʼa xíʼin na̱ hermano va̱ʼaníva chíndeétáʼanña xíʼinna, soo saátu kivi keʼéyó nda̱a̱ táki̱ʼva ke̱ʼé ta̱ Tito ta taváyó tiempo ña̱ kooyó xíʼin na̱ hermano na̱ xóʼvi̱ ta saátu kivi ndukúyó inkaka ki̱ʼva ña̱ chindeétáʼanyó xíʼinna (1 Juan 3:18).

NÁ NA̱ʼA̱YÓ ÑA̱ NDIXA KÚÚYÓ MIGO NA̱ HERMANOYÓ TÁ ÍXANDI̱VA̱ʼANA XÍʼINNA

Va̱ʼaní yichi̱ chínúu na̱ hermanoyó na̱ ndóo chí Rusia nu̱úyó saáchi na̱yóʼo va̱ʼaní chíndeétáʼanna xíʼin táʼanna. Ná kotoyó ña̱ ndo̱ʼo ta̱ Serguéi xíʼin ñá síʼira ñá Tatiana. Na̱ policía ni̱ki̱ʼvina xi̱tona veʼena ta nda̱kiʼinna miíra xíʼin ñá síʼira ku̱a̱ʼa̱n xíʼinna ña̱ va̱ʼa nda̱ka̱tu̱ʼunnana sava ña̱ʼa. Soo tándi̱ʼi, sa̱ñávana ñá síʼira ñá Tatiana tasaá ndi̱kóñá chí veʼena. Ta̱ Serguéi nátúʼunra ndáaña ku̱u tá ndi̱kó ñá síʼira chí veʼena, káchira: “Ndi̱ku̱n tá ndi̱xaa̱ñá veʼendi̱, iin ñá hermana ni̱xa̱a̱nñá xi̱toñáñá. Tá ni̱ya̱ʼa loʼo, ni̱xa̱a̱ inkaka na̱ hermano ña̱ va̱ʼa chindeétáʼanna xíʼinndi̱ ña̱ ndasaviína veʼendi̱, saáchi na̱ policía xa̱ni ndiʼina ña̱ʼa”.

Ta̱ Serguéi káchikara: “Ndiʼi tiempo kútóoníi̱ ña̱ káʼa̱n Proverbios 17:​17, ña̱yóʼo káchiña: ‘Na̱ ndixa kúú migoyó ndiʼi tiempo kúʼvi̱-inina xínina miíyó, tá íyo tu̱ndóʼo nu̱úyó nda̱a̱ táki̱ʼva íyo ñaniyó á ku̱ʼvayó saá íyona xíʼinyó’. Xa̱ʼa̱ ña̱ íxandi̱va̱ʼaní na̱ chíñu xíʼinndi̱, vitin va̱ʼaníka kúnda̱a̱-inii̱ ña̱ ndixaní kúú ña̱ káʼa̱n texto yóʼo, saáchi va̱ása kuchiñuví iinlá miíi̱ ya̱ʼi̱ nu̱ú tu̱ndóʼo yóʼo. Jehová táxira ña̱ kuumiíi̱ na̱ migo na̱ ndakúní-ini na̱ kǒo sándakoondaʼa̱ yi̱ʼi̱”.b

Xa̱ʼa̱ ña̱ kininíka ku̱a̱ʼa̱n ndúu tiempo ña̱ ndóoyó vitin, xíniñúʼuníyó ña̱ chindeétáʼan na̱ migoyó xíʼinyó. Ta tá ná koo ña̱ gran tribulación, kuniñúʼuníkayó na̱ migoyó ña̱ chindeétáʼanna xíʼinyó. Xa̱ʼa̱ ña̱kán, vitinka ná chikaa̱níyó ndee̱ ña̱ chindeétáʼanyó xíʼin na̱ migoyó ta chikaa̱yó ndee̱ xíʼinna tasaá na̱ʼa̱yó ña̱ ndixa kúúyó migona (1 Ped. 4:​7, 8).