Ndáa ki̱ʼva chíndeé libro ta̱ Job xíʼinyó ña̱ vií taxiyó consejo

1, 2. ¿Ndáaña i̱xayo̱ʼvi̱ xíʼin ta̱ Elihú ta saátu xíʼin inkaka u̱ni̱ na̱ migo ta̱ Job?

TA̱ JOB iin ta̱a ta̱ ku̱i̱ká ni̱xi̱yora, ku̱a̱ʼání na̱ yiví xi̱xini miíra, tándi̱ʼi xa̱ʼa̱ ndiʼi ña̱ xi̱kuumiíra kamaní ku̱ndaa̱-ini na̱ yiví xa̱ʼa̱ ña̱yóʼo. Tá ku̱ndaa̱-ini na̱ migora xa̱ʼa̱ ña̱yóʼo, tá kúú ta̱ Elifaz, ta̱ Bildad xíʼin ta̱ Zofar, ni̱xa̱ʼa̱nna chí ñuu Uz ña̱ va̱ʼa sandíkona inira. Tá ni̱xa̱a̱na kán nda̱kanda̱ní-inina xíʼin ndiʼi ña̱ xi̱nina.

² Ná ndakanixi̱níyó ña̱ nda̱a̱ ni iin ña̱ʼa kǒo kúúmiíka ta̱ Job. Ndiʼi camello, ndikachi, si̱ndi̱ki̱ xíʼin burro sa̱na̱ra ni̱xi̱ʼi̱rí á savarí i̱xakúiʼnana. Saátu xa̱ʼnína na̱ xi̱kachíñu nu̱úra, ta ni̱xi̱ʼi̱ ndiʼi na̱ se̱ʼera tá ndu̱va veʼe sa̱tána. Ta ta̱ Job ndeéní ndóʼora ta kúúmiíra ndi̱ʼi táʼyi. Tá ku̱yatin u̱ni̱ na̱ migora nu̱úra xi̱ninara ña̱ kánduʼúra nu̱ú ya̱a̱ ta iinlá miíra íyo. ¿Ndáaña ke̱ʼé na̱yóʼo? Xi̱ndoona yatin nu̱ú íyora ta u̱xa̱ ki̱vi̱ ni̱xi̱yona kán ta nda̱a̱ ni iin ña̱ʼa kǒo níka̱ʼa̱nna xíʼinra (Job 2:12, 13). Tándi̱ʼi ni̱xa̱a̱ iin ta̱ loʼo ta̱ naní Elihú ta xi̱ndúʼura yatin kán. Ta̱ Job ki̱xáʼara káʼa̱n ndi̱va̱ʼara xa̱ʼa̱ ki̱vi̱ ña̱ ka̱kura ta xi̱kuni̱ra kuvira (Job 3:1-3, 11). Xi̱xiniñúʼu chindeétáʼan na̱ migora xíʼinra. Sana na̱ ta̱a kán xi̱ ixayo̱ʼvi̱ña xíʼinna ña̱ ka̱ʼa̱nna tu̱ʼun va̱ʼa xíʼinra, saáchi ña̱ ka̱ʼa̱nna á ña̱ keʼéna na̱ʼa̱ña á ndixa kúúna migora ta saátu á ndixa ndíʼi̱-inina xa̱ʼa̱ra. Ná kotoyó ña̱ ku̱u.

3. ¿Ndáaña kotoyó nu̱ú artículo yóʼo?

³ Jehová ni̱ka̱ʼa̱nra xíʼin ta̱ Moisés ña̱ ná kaʼyíra ña̱ ke̱ʼé u̱ni̱ na̱ migo ta̱ Job ta saátu ña̱ ke̱ʼé ta̱ Elihú. Ña̱ ni̱ka̱ʼa̱n ta̱ Elihú, mií Jehová kúú ta̱ ta̱xi ña̱ ka̱ʼa̱nra saá, soo sava ña̱ ni̱ka̱ʼa̱n ta̱ Elifaz ta̱chí ndi̱va̱ʼa kúú ña̱ ta̱xi ka̱ʼa̱nra saá (Job 4:12-16; 33:24, 25). Libro ña̱ káʼa̱n xa̱ʼa̱ ta̱ Job va̱ʼaní consejo va̱xi nu̱úña, soo saátu va̱xi consejo ña̱ va̱ása va̱ʼa. Nu̱ú artículo yóʼo kunda̱a̱-iniyó ndáa ki̱ʼva chindeétáʼan relato yóʼo xíʼinyó tá ná taxiyó consejo ndaʼa̱ iinna. Siʼna ka̱ʼa̱nyó xa̱ʼa̱ ña̱ va̱ása va̱ʼa ke̱ʼé u̱ni̱ na̱ migo ta̱ Job, tándi̱ʼi ka̱ʼa̱nyó xa̱ʼa̱ ña̱ va̱ʼa ña̱ ke̱ʼé ta̱ Elihú. Ta kotoyó ndáa ki̱ʼva chi̱ndeétáʼan ña̱yóʼo xíʼin na̱ israelita ta ndáa ki̱ʼva chindeétáʼanña xíʼin miíyó tiempo vitin.

CONSEJO ÑA̱ TA̱XI TA̱ ELIFAZ, TA̱ BILDAD XÍʼIN TA̱ ZOFAR

4. ¿Nda̱chun va̱ása níkivi sandíko u̱ni̱ na̱ migo ta̱ Job inira? (Koto na̱ʼná).

⁴ Biblia káʼa̱nña tá ku̱ndaa̱-ini u̱ni̱ na̱ migo ta̱ Job xa̱ʼa̱ ña̱ ndo̱ʼora, “inkáchi nda̱kutáʼanna ni̱xa̱ʼa̱nna ña̱ va̱ʼa sandíkona-ini ta̱ Job” (Job 2:11). Soo íyo u̱ni̱ ña̱ siʼna ke̱ʼéna. Ña̱ nu̱ú ndi̱ku̱n nda̱kanixi̱nína ña̱ va̱ása va̱ʼa xa̱ʼa̱ra. Saáchi nda̱kanixi̱nína mií Ndióxi̱ kúú ta̱ ta̱xi castigo ndaʼa̱ ta̱ Job xa̱ʼa̱ ku̱a̱chi ña̱ ni̱ki̱ʼvira (Job 4:7; 11:14).a Ña̱ u̱vi̱, consejo ña̱ ta̱xina va̱ása ní chindeétáʼanña xíʼinra ta sa̱ndákavana-inira. Ña̱ ni̱ka̱ʼa̱n u̱ni̱ saá na̱yóʼo xíʼinra, nda̱kanixi̱nína ña̱ chindeétáʼanvaña xíʼinra soo su̱ví saá níxi̱yoña (Job 13:12). Va̱ása níkunda̱a̱-ini ta̱ Bildad xíʼin ña̱ xi̱ndoʼora saáchi nda̱a̱ ni̱ka̱ʼa̱nra ña̱ kúáchiní yuʼú ta̱ Job (Job 8:2; 18:2). Ta̱ Zofar ni̱ka̱ʼa̱nra xíʼinra ña̱ kúúra iin ta̱ kíʼvi (Job 11:12). Ña̱ u̱ni̱, va̱ása nínda̱ʼyi̱na nu̱úra soo xíʼin ki̱ʼva ña̱ ni̱ka̱ʼa̱nna xíʼinra ni̱na̱ʼa̱na ña̱ miíra ndíso ku̱a̱chi xa̱ʼa̱ ña̱ xi̱ndoʼora (Job 15:7-11). Míí ña̱ nda̱a̱, na̱ ta̱a kán va̱ása níxiku̱ni̱vína sandíkona-ini ta̱ Job ni ña̱ chikaa̱na ndee̱ xíʼinra ña̱ kandíxakara Ndióxi̱ chi ña̱ xi̱kuni̱na kúú ña̱ ná ndakanixi̱níra ña̱ ku̱a̱chi miívara kúúña.

5. Consejo ña̱ ta̱xi ta̱ Elifaz, ta̱ Bildad xíʼin ta̱ Zofar, ¿á chi̱ndeétáʼanña xíʼin ta̱ Job?

⁵ Consejo ña̱ ta̱xi u̱ni̱ na̱ ta̱a kán ndaʼa̱ ta̱ Job va̱ása níchindeétáʼanña xíʼinra chi sa̱ndákavakana-inira (Job 19:2). Xa̱ʼa̱ ña̱ ndo̱ʼora xi̱kuni̱ra ndakiʼinra tu̱ʼunra ta xa̱ʼa̱ ña̱ nda̱kiʼinra tu̱ʼunra nda̱a̱ ni̱ka̱ʼa̱nra tu̱ʼun ña̱ va̱ása va̱ʼa (Job 6:3, 26). Ta̱ Elifaz, ta̱ Bildad xíʼin ta̱ Zofar kǒo níka̱ʼa̱nna nda̱a̱ táki̱ʼva ndákanixi̱ní Jehová ni kǒo níkundáʼvi-inina kunina ta̱ Job. Xa̱ʼa̱ ña̱ ke̱ʼéna ña̱kán ta̱ Ndi̱va̱ʼa xi̱niñúʼura na̱yóʼo ña̱ sa̱ndákavana-ini ta̱ Job (Job 2:4, 6). ¿Ndáa ki̱ʼva kivi chindeétáʼan relato yóʼo xíʼin na̱ israelita ta ndáa ki̱ʼva chindeétáʼanña xíʼin miíyó?

6. ¿Ndáaña xi̱kivi sákuaʼa na̱ anciano na̱ ñuu Israel xíʼin ña̱ va̱ása va̱ʼa ke̱ʼé ta̱ Elifaz, ta̱ Bildad xíʼin ta̱ Zofar?

⁶ Ña̱ kivi chindeétáʼan xíʼin na̱ israelita. Tá ni̱xa̱a̱ na̱ israelita ndu̱una iin ñuu, Jehová nda̱kaxinra sava na̱ ta̱a na̱ xa̱a̱ ku̱a̱ʼá ku̱i̱ya̱ ndásakáʼnu miíra ña̱ va̱ʼa ndatiinna ku̱a̱chi xíʼin na̱ ñuu nda̱a̱ táki̱ʼva káʼa̱n tu̱ʼunra (Deut. 1:15-18; 27:1). Na̱ xi̱kuu juez á anciano xi̱xiniñúʼu viíní kuniso̱ʼona ña̱ xi̱ka̱ʼa̱nna xíʼinna tá kúma̱níka ndatiinna ku̱a̱chi xíʼin iinna á ña̱ taxina consejo ndaʼa̱na (2 Crón. 19:6). Saátu xi̱xiniñúʼu nandukú va̱ʼana xa̱ʼa̱ iin ña̱ ku̱u ta nda̱ka̱tu̱ʼúnna xa̱ʼa̱ ña̱yóʼo ta kǒo ndakanixi̱nína ña̱ xa̱a̱ xíni̱na xa̱ʼa̱ ndiʼi ña̱ʼa (Deut. 19:18). Tá iinna xi̱xa̱ʼa̱nna nu̱úna ña̱ ná chindeétáʼanna xíʼinna, xi̱xiniñúʼu vií ka̱ʼa̱nna xíʼinna ta kǒo nda̱ʼyi̱na nu̱úna. ¿Nda̱chun? Saáchi tá va̱ása vií ní xi̱ka̱ʼa̱nna xíʼinna, na̱ yiví kán va̱ása ka̱ʼa̱nvína xíʼinna xa̱ʼa̱ ña̱ xi̱ndoʼona (Éx. 22:22-24). Ku̱a̱ʼáníva ña̱ xi̱kivi sákuaʼa na̱ anciano na̱ ñuu Israel xíʼin relato ña̱ káʼa̱n xa̱ʼa̱ ta̱ Job.

7. ¿Ndáaka na̱ xi̱kivi taxi consejo ndaʼa̱ inkana, ta ndáaña xi̱kivi sákuaʼana xíʼin relato ña̱ káʼa̱n xa̱ʼa̱ ta̱ Job? (Proverbios 27:9).

⁷ Su̱ví nda̱saa na̱ anciano kúú na̱ xi̱kivi taxi consejo ndaʼa̱ na̱ ñuu Israel. Ndiʼivana xi̱kivi taxi consejo ndaʼa̱ na̱ xi̱xiniñúʼuña ni kúúna na̱ va̱lí á na̱ xa̱a̱ chée, ña̱ va̱ʼa kuyatinkana nu̱ú Jehová á ña̱ nasamana ña̱ va̱ása va̱ʼa xi̱keʼéna (Sal. 141:5). Saá kúú ña̱ xíniñúʼu keʼé iin na̱ migoyó na̱ ndixa (kaʼvi Proverbios 27:9).b Tá níndákanixi̱ní na̱ ñuu Israel xa̱ʼa̱ ña̱ va̱ása va̱ʼa ke̱ʼé u̱ni̱ na̱ migo ta̱ Job, na̱yóʼo kiviva sakúaʼana ndáaña kúú ña̱ va̱ása xíniñúʼu ka̱ʼa̱nna á keʼéna tá xi̱xiniñúʼu taxina consejo ndaʼa̱ inkana.

8. ¿Ndáaña kǒo xíniñúʼu keʼéyó tá táxiyó consejo? (Koto na̱ʼná).

⁸ Ña̱ kivi chindeétáʼan xíʼin miíyó. Tá yáʼa iin na̱ hermanoyó nu̱ú iin tu̱ndóʼo ndi̱ku̱n kúni̱yó chindeétáʼanyó xíʼinna. Soo kǒo xíniñúʼu keʼéyó nda̱a̱ táki̱ʼva ke̱ʼé u̱ni̱ na̱ migo ta̱ Job. Ña̱ nu̱ú, tá kúma̱níka ka̱ʼa̱nyó siʼnaka ná kunda̱a̱-iniyó xíʼin ña̱ ndóʼona ta kǒo ndakanixi̱níyó ña̱ va̱ása va̱ʼa xa̱ʼa̱na. Ña̱ u̱vi̱, ndiʼi ña̱ ka̱ʼa̱nyó xíʼinna nu̱ú tu̱ʼun Ndióxi̱ ná kanaña ta su̱ví ña̱ ndákanixi̱ní miíyó á ña̱ xíni̱yó keʼéyó chi saá kúú ña̱ ke̱ʼé ta̱ Elifaz (Job 4:8; 5:3, 27). Ña̱ u̱ni̱, ná kǒo ka̱ʼa̱nyó tu̱ʼun ña̱ kivi sandákava-inina á ña̱ ka̱ʼa̱n ndaayó xa̱ʼa̱na. Ná ndakaʼányó, chi sava ña̱ ni̱ka̱ʼa̱n ta̱ Elifaz xíʼin na̱ xi̱kitáʼan xíʼinra ña̱ nda̱a̱va kúú sava ña̱ ni̱ka̱ʼa̱nna, nda̱a̱ ta̱ apóstol Pablo xíniñúʼura tu̱ʼun ña̱ ni̱ka̱ʼa̱n na̱yóʼo nu̱ú carta ña̱ ka̱ʼyíra (chitáʼan Job 5:13 xíʼin 1 Corintios 3:19). Ku̱a̱ʼání ña̱ ni̱ka̱ʼa̱n na̱yóʼo xa̱ʼa̱ Ndióxi̱ ña̱ vatá xi̱kuuña ta sa̱ndákavana-ini ta̱ Job, xa̱ʼa̱ ña̱kán Jehová ni̱ka̱ʼa̱nra ña̱ su̱ví ña̱ nda̱a̱ kúú ña̱ ni̱ka̱ʼa̱nna (Job 42:7, 8). Tá xa̱a̱ táxiyó consejo ndaʼa̱ iinna, kǒo kúni̱yó na̱ʼa̱yó ña̱ kǒo kúnda̱a̱-ini Jehová xíʼin ña̱ ndóʼona á ña̱ kǒo kúni̱ra xínirana. Ná kotoyó ndáaña kivi sakúaʼayó xíʼin ña̱ ke̱ʼé ta̱ Elihú.

CONSEJO ÑA̱ TA̱XI TA̱ ELIHÚ

9. ¿Nda̱chun xi̱xiniñúʼu chindeétáʼanna xíʼin ta̱ Job ta ndáa ki̱ʼva chi̱ndeétáʼan Jehová xíʼinra?

⁹ Ña̱ na̱túʼun kúáchi ta̱ Job xíʼin u̱ni̱ na̱ xi̱kuu migora ku̱a̱ʼání kúú ña̱ ni̱ka̱ʼa̱nna, saáchi 28 capítulo ña̱ va̱xi nu̱ú Biblia va̱xi ña̱ ni̱ka̱ʼa̱nna. Ta ndiʼi ña̱ ni̱ka̱ʼa̱n na̱kán náʼa̱ña ña̱ ni̱sa̱a̱nína. Xa̱ʼa̱ ña̱yóʼo xi̱ndakava-ini ta̱ Job ta xi̱xiniñúʼura iin na̱ chindeétáʼan xíʼinra ta sandíkona-inira. ¿Ndáaña ke̱ʼé Jehová ña̱ va̱ʼa chi̱ndeétáʼanra xíʼinra? Xi̱niñúʼura ta̱ Elihú ña̱ va̱ʼa taxira consejo ndaʼa̱ra. ¿Nda̱chun va̱ása kama níka̱ʼa̱n ta̱ Elihú xíʼinra? Ta̱yóʼo ka̱chira: “Ta̱ loʼova kúú yi̱ʼi̱ ta xa̱a̱ na̱ chéeva kúú ndóʼó. Ña̱kán va̱ása níka̱ʼi̱n nda̱a̱ ni iin ña̱ʼa xa̱ʼa̱ ña̱ íxato̱ʼíi̱ ndóʼó” (Job 32:6, 7). Ta̱yóʼo xi̱kunda̱a̱-inira na̱ xa̱a̱ chée kúnda̱a̱va-inina xa̱ʼa̱ ku̱a̱ʼá ña̱ʼa saáchi xa̱a̱ ku̱a̱ʼá ku̱i̱ya̱ tákuna. Soo tándi̱ʼi xi̱niso̱ʼora ña̱ ni̱ka̱ʼa̱n ta̱ Job xíʼin na̱ xi̱xini miíra, ta̱ Elihú ki̱xáʼara káʼa̱nra ta̱ káchira: “Su̱ví xa̱ʼa̱ ña̱ ku̱a̱ʼání ku̱i̱ya̱ táku iin na̱ yiví kúú ña̱ ndíchina, ta su̱ví xa̱ʼa̱ ña̱ xa̱a̱ chée iin na̱ yiví kúú ña̱ kúnda̱a̱-inina ndáaña kúú ña̱ va̱ʼa” (Job 32:9). Ná kotoyó ndáaña ni̱ka̱ʼa̱nra ta ndáa ki̱ʼva ni̱ka̱ʼa̱nraña.

10. ¿Ndáaña ke̱ʼé ta̱ Elihú tá kúma̱níka taxira consejo ndaʼa̱ ta̱ Job? (Job 33:6, 7).

¹⁰ Tá kúma̱níka ta̱xi ta̱ Elihú consejo ndaʼa̱ ta̱ Job, siʼnaka xi̱ndatura ña̱ ná ya̱ʼa ña̱ sáa̱ra ta saá ka̱ʼa̱nra xíʼinra. Saáchi Biblia káʼa̱nña ña̱ ni̱sa̱a̱va ta̱ Elihú (Job 32:2-5). Soo kǒo níxiniñúʼura tu̱ʼun ña̱ kivi sandákava-ini ta̱ Job ni kǒo níndáʼyi̱ra nu̱úra, chi ña̱ ke̱ʼéra kúú ña̱ viíní ni̱ka̱ʼa̱nra xíʼinra. Tá ña̱yóʼo ka̱chira xíʼinra: “Inkáchiva íyoyó nu̱ú Ndióxi̱ ta̱ nda̱a̱” (kaʼvi Job 33:6, 7).c Ta saá ni̱ka̱ʼa̱nra xa̱ʼa̱ sava ña̱ ni̱ka̱ʼa̱n mií ta̱ Job ta xíʼin ña̱yóʼo ni̱na̱ʼa̱ra ña̱ viíní xi̱niso̱ʼora ña̱ ni̱ka̱ʼa̱nra (Job 32:11; 33:8-11). Ta saátu ke̱ʼéra inka yichi̱ tá ta̱xira consejo ndaʼa̱ ta̱ Job (Job 34:5, 6, 9; 35:1-4).

11. ¿Ndáa ki̱ʼva ta̱xi ta̱ Elihú consejo ndaʼa̱ ta̱ Job? (Job 33:1).

¹¹ Tá ta̱xi ta̱ Elihú consejo ndaʼa̱ ta̱ Job, to̱ʼó ni̱xi̱yo inira xíʼinra ta̱ va̱ása nísandákavara-inira. Tá kúú, ni̱ka̱ʼa̱nra ki̱vi̱ra tá ni̱ka̱ʼa̱nra xíʼinra, ta na̱ inka u̱ni̱ na̱ migora kǒo níkeʼéna saá (kaʼvi Job 33:1).d Tá xi̱natúʼun kúáchi ta̱ Job xíʼin u̱ni̱ na̱ migora, sana xi̱kuni̱va ta̱ Elihú ka̱ʼa̱nra, soo tá ta̱xi mií ta̱ Elihú consejo ndaʼa̱ra ni̱ka̱ʼa̱nra xíʼinra ña̱ ná ka̱ʼa̱nra xa̱ʼa̱ ña̱ ndákanixi̱níra (Job 32:4; 33:32). Saátu ni̱ka̱ʼa̱nra xíʼinra ña̱ ná kiʼinra kuenta xíʼin ña̱ ka̱ʼa̱nra ta nda̱a̱ sa̱ndákaʼánra miíra ña̱ ndíchiní Jehová, kúúmiíníra ndee̱, nda̱kú íyo inira ta̱ kúʼvi̱-inira xínira na̱ yiví (Job 36:18, 21-26; 37:23, 24). Xa̱ʼa̱ ña̱ viíní ni̱ka̱ʼa̱n ta̱ Elihú xíʼin ta̱ Job, ta̱yóʼo xi̱niso̱ʼora consejo ña̱ ta̱xi mií Jehová ndaʼa̱ra (Job 38:1-3). ¿Ndáaña sa̱kúaʼa na̱ israelita xíʼin ña̱ ke̱ʼé ta̱ Elihú ta ndáaña kivi sákuaʼa miíyó xíʼin ña̱yóʼo?

12. a) ¿Ndáa ki̱ʼva xi̱niñúʼu Jehová na̱ profeta ña̱ va̱ʼa chi̱ndeétáʼanra xíʼin na̱ ñuura? b) ¿Ndáaña kivi sákuaʼa na̱ israelita xíʼin ejemplo ta̱ Elihú?

¹² Ña̱ kivi chindeétáʼan xíʼin na̱ israelita. Jehová ku̱a̱ʼání yichi̱ xi̱niñúʼura na̱ profeta ña̱ va̱ʼa sanáʼa̱na na̱ israelita ndáaña kúú ña̱ kúni̱ra keʼéra ta saátu ña̱ taxina consejo ndaʼa̱na. Tá kúú, tiempo ña̱ ni̱xi̱yo na̱ juez, xi̱niñúʼura ñá profeta Débora ña̱ va̱ʼa ka̱ʼa̱nñá xíʼin na̱ ñuu Israel ndáaña kúú ña̱ xi̱xiniñúʼu keʼéna, saátu xi̱niñúʼura ta̱ profeta Samuel ni loʼoní ni̱xi̱yo ta̱yóʼo (Juec. 4:4-7; 5:7; 1 Sam. 3:19, 20). Tiempo ña̱ ni̱xi̱yo na̱ rey, Jehová chi̱ndaʼára ku̱a̱ʼá na̱ profeta ña̱ va̱ʼa ndasandakúna-ini na̱ ñuura ta saátu ña̱ chi̱ndeétáʼanna xíʼin na̱ ku̱xíká nu̱úra (2 Sam. 12:1-4; Hech. 3:24). Na̱ ta̱a xíʼin ná ñaʼá na̱ nda̱kú ni̱xi̱yo ini kivi sákuaʼana xíʼin ejemplo ta̱ Elihú, tá kúú ndáaña ka̱ʼa̱nna á ña̱ keʼéna tá xi̱xiniñúʼu taxina consejo ndaʼa̱ inkana.

13. ¿Ndáa ki̱ʼva kivi kundiku̱nyó yichi̱ ta̱ Elihú ña̱ chikaa̱yó ndee̱ xíʼin na̱ hermano?

¹³ Ña̱ kivi chindeétáʼan xíʼin miíyó. Nda̱a̱ táki̱ʼva ke̱ʼé ta̱ Elihú xíʼin na̱ profeta ñuu Israel, miíyó na̱ cristiano nátúʼunyó xíʼin na̱ yiví xa̱ʼa̱ ña̱ kúni̱ Ndióxi̱ keʼéra ta xíniñúʼuyó Biblia ña̱ sanáʼa̱yóna. Saátu tá táxiyó consejo ndaʼa̱ na̱ hermano xíniñúʼuyó tu̱ʼun ña̱ chikaa̱ ndee̱ xíʼinna (1 Cor. 14:3). Na̱ anciano kúú na̱ xíniñúʼu kiʼinka kuenta xíʼin ña̱yóʼo ña̱ vií koo tu̱ʼun ña̱ ka̱ʼa̱nna xíʼin na̱ hermano ta ná chikaa̱ña ndee̱ xíʼinna, soo sava yichi̱ xa̱ʼa̱ ña̱ xóʼvi̱ na̱ hermano káʼa̱nna tu̱ʼun ña̱ va̱ása va̱ʼa (Job 6:3; 1 Tes. 5:14).

14, 15. ¿Ndáa ki̱ʼva kivi kundiku̱n iin ta̱ anciano yichi̱ ta̱ Elihú?

¹⁴ Ná ndakanixi̱níyó xa̱ʼa̱ ña̱yóʼo. Iin ta̱ anciano ku̱ndaa̱-inira ña̱ iin ñá hermana ndákavaní-iniñá, tasaá ni̱ka̱ʼa̱nra xíʼin inka ta̱ hermano ña̱ va̱ʼa ku̱ʼu̱nna veʼeñá ña̱ va̱ʼa chikaa̱na ndee̱ xíʼinñá. Tá ni̱xa̱ʼa̱nna veʼeñá, ñá hermana ni̱ka̱ʼa̱nñá sava ña̱ va̱ása va̱ʼa ña̱ ndákanixi̱níñá. Ñáyóʼo káchiñá, ni xáʼa̱nñá reunión xíʼin predicación, va̱ása kúsi̱í-iniñá. ¿Ndáaña keʼé iin ta̱ anciano tá ná ya̱ʼara nu̱ú táʼa̱n ña̱yóʼo?

¹⁵ Ña̱ siʼna keʼéra kúú ña̱ kunda̱a̱-inira nda̱chun ndákava-ini ñá hermana kán. Xa̱ʼa̱ ña̱kán xíniñúʼu nda̱ka̱tu̱ʼunra miíñá ta vií kuniso̱ʼora ña̱ káʼa̱nñá. ¿Á ndákanixi̱ní ñá hermana ña̱ kǒo kúni̱ka Ndióxi̱ xínira miíñá? ¿Á ndákava-iniñá xa̱ʼa̱ ña̱ íyoní ña̱ sándi̱ʼi̱-iniñá? (Luc. 21:34). Ña̱ u̱vi̱, ta̱ anciano ndukúra ki̱ʼva ña̱ chikaa̱ra ndee̱ xíʼinñá. Tá kúú, kivi ka̱ʼa̱nra tu̱ʼun va̱ʼa xíʼinñá xa̱ʼa̱ ña̱ chíkaa̱ñá ndee̱ ña̱ xáʼa̱nñá reunión xíʼin ña̱ kítañá nátúʼunñá xíʼin na̱ yiví ni ndákava-iniñá. Ña̱ u̱ni̱, tá xa̱a̱ ku̱ndaa̱-inira ndáaña ndóʼoñá ta nda̱chun ndákava-iniñá, kivi kuniñúʼura Biblia ña̱ va̱ʼa na̱ʼa̱ra nu̱úñá ña̱ kúni̱va Jehová xínira miíñá (Gál. 2:20).

NÁ SAKÚAʼAKAYÓ XA̱ʼA̱ LIBRO TA̱ JOB

16. ¿Ndáaña xíniñúʼu keʼéyó ña̱ va̱ʼa sakúaʼakayó xíʼin libro ña̱ káʼa̱n xa̱ʼa̱ ta̱ Job?

¹⁶ Ku̱a̱ʼání ña̱ sa̱kúaʼayó xíʼin libro ña̱ káʼa̱n xa̱ʼa̱ ta̱ Job. Nu̱ú artículo ni̱ya̱ʼa sa̱kúaʼayó nda̱chun táxi Ndióxi̱ xóʼvi̱yó, ta saátu ku̱ndaa̱-iniyó ndáa ki̱ʼva kundeé-iniyó. Ta nu̱ú artículo yóʼo sa̱kúaʼayó ndáa ki̱ʼva vií taxiyó consejo ta ná kǒo keʼéyó nda̱a̱ táki̱ʼva ke̱ʼé u̱ni̱ na̱ xi̱kuu migo ta̱ Job ta va̱ʼaka ná keʼéyó nda̱a̱ táki̱ʼva ke̱ʼé ta̱ Elihú. Tá ná taxiyó consejo ndaʼa̱ iinna ná kundiku̱nyó ña̱ sa̱kúaʼayó nu̱ú relato yóʼo. Soo tá xa̱a̱ ku̱a̱ʼá tiempo ta̱ʼán kaʼviyó ña̱ káʼa̱n xa̱ʼa̱ ta̱ Job, ná ndikó tukuyó kaʼviyó ña̱yóʼo. Tá ná keʼéyó saá, kunda̱a̱-iniyó ña̱ relato ña̱ káʼa̱n xa̱ʼa̱ ta̱ Job ndáyáʼviníña nda̱a̱ tiempo vitin.