Ná sakúaʼakayó xa̱ʼa̱ Ndióxi̱

1. ¿Ndáa ki̱ʼva i̱xava̱ʼa Jehová miíyó ta ndáaña xíniñúʼuyó? (Mateo 5:3).

JEHOVÁ i̱xava̱ʼara na̱ yiví ta kúnda̱a̱-inira ndáaña xíniñúʼuyó. Tá kúú ndiʼiyó xíniñúʼuyó ña̱ kuxuyó, ti̱ko̱to̱ kundixiyó xíʼin nu̱ú kooyó. Ndiʼi ña̱yóʼo ndáyáʼviníña, ña̱kán ni loʼo tiempo ná kuma̱níña nu̱úyó ixayo̱ʼvi̱nívaña xíʼinyó ña̱ kutakuyó. Saátu i̱xava̱ʼa Jehová miíyó ña̱ kuni̱yó sakúaʼayó xa̱ʼa̱ra, kandíxayóra xíʼin ña̱ kuniʼira yi̱chi̱ nu̱úyó (kaʼvi Mateo 5:3). Tá kúni̱yó ndixa si̱í kooyó xíniñúʼu ndakuniyó ña̱ xíniñúʼuyó ña̱ kuniʼira yichi̱ nu̱úyó.

2. ¿Ndáaña kúni̱ kachi ña̱ xíniñúʼuyó Ndióxi̱? Ka̱ʼa̱n xa̱ʼa̱ iin ejemplo.

² ¿Ndáaña xi̱kuni̱ kachi ta̱ Jesús tá ni̱ka̱ʼa̱nra xa̱ʼa̱ na̱ “kúnda̱a̱-ini ña̱ xíniñúʼuna Ndióxi̱”? Tu̱ʼun griego káʼa̱nña xa̱ʼa̱ iin na̱ yiví na̱ ndúkú ña̱ ná chindeétáʼan Ndióxi̱ xíʼinna. Ña̱ va̱ʼa kunda̱a̱ka-iniyó xíʼin ña̱yóʼo ná ndakanixi̱yó xa̱ʼa̱ iin ta̱a ta̱ ndáʼviní, íyora calle, ni̱nda̱ta̱ ndiʼi ti̱ko̱to̱ra, ta ndeéní niʼní nu̱ú íyora. Ta tá xi̱kuaá ndeéní vi̱xin ta ku̱vitára chi kǒo ña̱ kuxura. Ta xa̱ʼa̱ ña̱ kininí náʼa̱ra kǒo xíín na̱ yiví kuyatinna nu̱úra, ta̱yóʼo kúnda̱a̱-inira ña̱ xíniñúʼura ña̱ chindeétáʼanna xíʼinra. Ki̱ʼva saá íyo na̱ kúnda̱a̱-ini ña̱ xíniñúʼu sakúaʼana xa̱ʼa̱ Ndióxi̱, chi ndíʼi̱ní-inina xa̱ʼa̱ ki̱ʼva ña̱ íyona ta xíniñúʼuna ña̱ chindeétáʼanna xíʼinna. Xa̱ʼa̱ ña̱kán kúni̱nína ndakiʼinna ndiʼi ña̱ va̱ʼa ña̱ táxi Jehová ndaʼa̱ na̱ kúʼvi̱-inira xínira.

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Nu̱ú artículo yóʼo siʼna ka̱ʼa̱nyó xa̱ʼa̱ ñaʼá ñá ñuu Fenicia ñá xa̱kundáʼvi nu̱ú ta̱ Jesús ña̱ ná chindeétáʼanra xíʼinñá. Saátu kunda̱a̱-iniyó xa̱ʼa̱ u̱ni̱ ña̱ va̱ʼa ña̱ ni̱na̱ʼa̱ñá, ña̱yóʼo chindeétáʼan xíʼin na̱ ndákuni ña̱ xíniñúʼuna Ndióxi̱. Saátu ka̱ʼa̱nyó xa̱ʼa̱ u̱ni̱ ta̱a ta̱ nda̱kúní ni̱xi̱yo ini xíʼin Ndióxi̱: ta̱ apóstol Pedro, ta̱ Pablo xíʼin ta̱ rey David.

ÑA̱ KIVI SAKÚAʼAYÓ XÍʼIN ÑA̱ KE̱ʼÉ ÑAʼÁ ÑÁ ÑUU FENICIA

4. ¿Ndáaña xi̱kuni̱ ñaʼá ñá ñuu Fenicia ña̱ ná keʼé ta̱ Jesús xa̱ʼa̱ñá?

⁴ Iin ñaʼá ñá ñuu Fenicia ni̱xa̱ʼa̱nñá nu̱ú ta̱ Jesús saáchi se̱ʼeñá xi̱kuumiíñá ta̱chí ndi̱va̱ʼa ta xi̱ ixandi̱va̱ʼaní ña̱yóʼo xíʼinñá (Mat. 15:21-28). Ñáyóʼo ku̱yatinñá nu̱ú ta̱ Jesús, xi̱kuxítíñá ta ni̱ka̱ʼa̱nñá xíʼinra ña̱ ná chindeétáʼanra xíʼinñá. Ñáyóʼo ni̱na̱ʼa̱ñá sava ña̱ va̱ʼa ña̱ ndáyáʼviní. Ná kotoyó ndáaña kúú ña̱yóʼo.

5. ¿Ndáaña ndáyáʼviní ni̱na̱ʼa̱ ñá ñaʼá ñá ñuu Fenicia, ta ndáaña ke̱ʼé ta̱ Jesús? (Koto na̱ʼná).

⁵ Ñá ñaʼá ñá ñuu Fenicia ni̱na̱ʼa̱ñá ña̱ ndixa vitá ni̱xi̱yo iniñá. ¿Nda̱chun va̱ʼa kúnda̱a̱-iniyó ña̱yóʼo? Ñáyóʼo va̱ása nísa̱a̱ñá tá chi̱táʼan ta̱ Jesús miíñá xíʼin iin ti̱na loʼo tí xi̱kuumií na̱ yiví na̱ va̱ása kúú judío. Tá miíyó ná ndoʼo táʼan ña̱yóʼo, ¿ndáaña keʼéyó? ¿Á sa̱a̱yó ta ndíkóyó ku̱ʼu̱nyó ta kǒo ka̱ʼa̱nkayó xíʼinra ña̱ chindeétáʼanra xíʼinyó? Ñá ñaʼá ñá ñuu Fenicia kǒo níkeʼéñá saá, vitá ni̱xi̱yo iniñá ta ku̱a̱ʼá yi̱chi̱ ni̱ka̱ʼa̱n-ndáʼviñá xíʼin ta̱ Jesús ña̱ ná chindeétáʼanra xíʼinñá. ¿Nda̱chun ke̱ʼéñá saá? Saáchi xi̱kandíxañá ña̱ chindeétáʼanvara xíʼinñá, ta xa̱ʼa̱ ña̱kán ke̱ʼéra iin ña̱ ndáyáʼviní xa̱ʼa̱ñá. Ni̱ka̱ʼa̱nra xíʼinñá ña̱ va̱xira chindeétáʼanra xíʼin nda̱saa na̱ ñuu Israel, soo ni saá chi̱ndeétáʼanvara xíʼinñá ña̱ ta̱vára ta̱chí ndi̱va̱ʼa ini ñá loʼo se̱ʼeñá.

6. ¿Ndáaña sákuaʼayó xíʼin ña̱ ke̱ʼé ñá ñaʼá ñá ñuu Fenicia?

⁶ Ña̱ va̱ʼa na̱ʼa̱yó ña̱ xíniñúʼuyó Ndióxi̱ xíniñúʼu keʼéyó nda̱a̱ táki̱ʼva ke̱ʼé ñá ñaʼá ñá ñuu Fenicia. Vitá ná koo iniyó, ná ka̱ʼa̱nyó xíʼin Ndióxi̱ ña̱ ná chindeétáʼanra xíʼinyó ta saátu ná kandíxaníyóra. Tá vitá íyo iniyó kǒo sandákooyó ña̱ ka̱ʼa̱nyó xíʼin Ndióxi̱ ña̱ ná chindeétáʼanra xíʼinyó. Ndáyáʼviní kandíxayó ta̱ Jesús ta saátu ná kandíxayó na̱ nda̱kaxinra ña̱ kuniʼina yichi̱ nu̱úyó (Mat. 24:45-47). Jehová xíʼin ta̱ Jesús kúsi̱í-inina tá vitá íyo iniyó, saátu tá ndúkúyó ña̱ ná chindeétáʼanna xíʼinyó ta kandíxayóna. Tá saá kéʼéyó chindeétáʼanna xíʼinyó ña̱ kuniʼina yichi̱ nu̱úyó (chitáʼanña xíʼin Santiago 1:5-7). Ná kotoyó ndáa ki̱ʼva níʼi Jehová yichi̱ nu̱úyó ta táxira ña̱ xíniñúʼuyó ña̱ va̱ʼa si̱í kooyó, ta ndáaña xíniñúʼu keʼéyó ña̱ va̱ʼa ndakiʼinyó ña̱yóʼo. Saátu kunda̱a̱-iniyó ndáaña ke̱ʼé ta̱ Pedro, ta̱ Pablo xíʼin ta̱ David.

NÁ NDAKUNDEÉYÓ SAKÚAʼAYÓ XA̱ʼA̱ NDIÓXI̱ NDA̱A̱ TÁKI̱ʼVA KE̱ʼÉ TA̱ PEDRO

7. ¿Ndáa chiñu nda̱kiʼin ta̱ Pedro ta ndáaña xi̱niñúʼu keʼékara? (Hebreos 5:14–6:1).

⁷ Ná ndakanixi̱níyó xa̱ʼa̱ ña̱ ke̱ʼé ta̱ apóstol Pedro. Ta̱yóʼo xi̱kuura judío ta nda̱kunira ña̱ kúú ta̱ Jesús ta̱ Mesías. Xi̱kunda̱a̱-inira ña̱ mií Jehová xi̱niñúʼu ta̱ Jesús ña̱ sanáʼa̱ra na̱ yiví “tu̱ʼun ña̱ taxi kutakuna ndiʼi tiempo” (Juan 6:66-68). Tá kúma̱níka ku̱ʼu̱n ta̱ Jesús chí ndiví ni̱ka̱ʼa̱nra xíʼin ta̱ Pedro: “Taxi ña̱ kuxu ndikachi válí sa̱na̱i̱” (Juan 21:17). Viíní sa̱xínu ta̱ apóstol yóʼo chiñura ta nda̱a̱ xi̱niñúʼu Jehová ta̱yóʼo ña̱ ka̱ʼyira u̱vi̱ carta ña̱ va̱xi nu̱ú Biblia. Soo ta̱ Pedro xi̱xiniñúʼu sakúaʼakara xa̱ʼa̱ Ndióxi̱. Tá kúú ka̱ʼvira carta ña̱ ka̱ʼyi ta̱ Pablo. Ta̱ Pedro xi̱kunda̱a̱-inira ña̱ ni̱xi̱yo sava ña̱ xi̱ ixayo̱ʼvi̱ xíʼinra kunda̱a̱-inira xíʼin (2 Ped. 3:15, 16). Soo xi̱kandíxara ña̱ chindeétáʼanva Jehová xíʼinra ña̱ kunda̱a̱-inira xíʼin ña̱yóʼo, tasaá ke̱ʼéra ña̱ ka̱ʼyi ta̱ Pablo (kaʼvi Hebreos 5:14–6:1).

8. ¿Ndáaña ke̱ʼé ta̱ Pedro tá ku̱ndaa̱-inira xa̱ʼa̱ iin ña̱ xa̱á ña̱ ni̱ka̱ʼa̱n Jehová xíʼinra?

⁸ Ta̱ Pedro ni̱na̱ʼa̱ra ña̱ xi̱kandíxara Jehová saáchi xi̱keʼéra ña̱ xi̱kaʼa̱nra xíʼinra. Ná ndakanixi̱níyó xa̱ʼa̱ visión ña̱ xi̱nira chí ñuu Jope. Iin ta̱ ángel ni̱ka̱ʼa̱n xíʼinra ña̱ ná kaʼníra sava kití tí xi̱kaʼa̱n Ley ta̱ Moisés ña̱ kúúrí tí yaku̱a̱ ta ná kuxurarí. Nu̱ú na̱ judío iin ña̱ yaku̱a̱ní xi̱kuu ña̱ keʼéna ña̱yóʼo. Xa̱ʼa̱ ña̱kán ni̱ka̱ʼa̱n ta̱ Pedro ña̱yóʼo: “Va̱ása táta. Chi va̱ása xíxii̱ kití tí yaku̱a̱”. Soo ta̱ ángel ni̱ka̱ʼa̱nra ña̱yóʼo xíʼinra: “Va̱ása ka̱ʼún ña̱ yaku̱a̱ xíʼin ña̱ʼa ña̱ xa̱a̱ ndu̱u limpio i̱xaa Ndióxi̱” (Hech. 10:9-15). Tándi̱ʼi xi̱nira visión yóʼo, ni̱xa̱a̱ u̱ni̱ na̱ ta̱a ta ni̱ka̱ʼa̱nna xíʼinra ña̱ kúni̱ ta̱ Cornelio ña̱ ná ku̱ʼu̱n ta̱ Pedro veʼera ña̱ va̱ʼa natúʼunra xíʼinra. Tá kúma̱níka kuni ta̱ Pedro visión yóʼo sana va̱ása ku̱ʼu̱nvíra nu̱ú ta̱ Cornelio chi su̱ví ta̱ judío níxi̱kuura, saáchi na̱ judío xi̱ndakanixi̱nína ña̱ na̱ yaku̱a̱ xi̱kuu na̱ yiví na̱ inka ñuu (Hech. 10:28, 29). ¿Á na̱sama ta̱ Pedro ña̱ xi̱ndakanixi̱níra? Na̱samavaraña, saáchi ku̱ndaa̱-inira ña̱ ni̱na̱ʼa̱ Jehová iin ña̱ xa̱á nu̱úra ta ndi̱ku̱n ka̱ndíxavara ña̱ ni̱ka̱ʼa̱nra xíʼinra (Prov. 4:18). Na̱túʼunra xíʼin ta̱ Cornelio xa̱ʼa̱ tu̱ʼun Ndióxi̱ ta saátu xíʼin ndiʼi na̱ veʼera ta ku̱si̱íní-inira ña̱ ka̱ndíxana ña̱ nda̱a̱, nda̱kiʼinna espíritu santo ta nda̱kuchina (Hech. 10:44-48).

9. ¿Ndáa u̱vi̱ ña̱ va̱ʼa ndákiʼinyó tá chíkaa̱yó ndee̱ ña̱ sakúaʼakayó xa̱ʼa̱ Ndióxi̱?

⁹ Nda̱a̱ táki̱ʼva ke̱ʼé ta̱ Pedro, saá kúú ña̱ xíniñúʼu keʼé miíyó ña̱ kunda̱a̱ka-iniyó xíʼin tu̱ʼun Ndióxi̱. Ta saátu ndáyáʼviní kunda̱a̱-iniyó xa̱ʼa̱ ña̱ nda̱a̱ ña̱ íxayo̱ʼvi̱ xíʼinyó kunda̱a̱-iniyó xíʼin. Xíniñúʼuyó tiempo xíʼin ndee̱yó ña̱ va̱ʼa kunda̱a̱ka-iniyó xa̱ʼa̱ ña̱yóʼo. Tá ná nandukú va̱ʼayó xa̱ʼa̱ ña̱yóʼo, ku̱a̱ʼání ña̱ va̱ʼa ndakiʼinyó. Ná ka̱ʼa̱nyó xa̱ʼa̱ u̱vi̱ ña̱yóʼo. Ña̱ nu̱ú, ña̱ sakúaʼakayó xa̱ʼa̱ Jehová chíndeétáʼanña xíʼinyó ña̱ kuni̱kayóra ta ixato̱ʼókayóra. Ña̱ u̱vi̱, kuni̱kayó ka̱ʼa̱nyó xíʼin inkana xa̱ʼa̱ yiváyó ta̱ íyo chí ndiví (Rom. 11:33; Apoc. 4:11). Soo íyo inka ña̱ sákuaʼayó xíʼin ña̱ ke̱ʼé ta̱ Pedro: tá násama na̱ ñuu Ndióxi̱ ki̱ʼva ña̱ kúnda̱a̱-inina xíʼin iin ña̱ káʼa̱n tu̱ʼun Ndióxi̱, ná chikaa̱yó ndee̱ ña̱ kama kixáʼayó kandíxayó ña̱yóʼo. Tá ná keʼéyó ña̱yóʼo, saá kúú ña̱ taxiyó ña̱ kuniʼi Jehová yichi̱ nu̱úyó ta kivi kachíñukayó nu̱úra.

NÁ NA̱ʼA̱YÓ ÑA̱ VA̱ʼA ÑA̱ SÁKUSI̱Í-INI NDIÓXI̱ NDA̱A̱ TÁKI̱ʼVA KE̱ʼÉ TA̱ PABLO

10. Nda̱a̱ táki̱ʼva káchi Colosenses 3:8-10, ¿ndáaña xíniñúʼu keʼéyó ña̱ va̱ʼa sakusi̱íyó-ini Jehová?

¹⁰ Jehová sánáʼa̱ra miíyó ndáaña xíniñúʼu keʼéyó ña̱ va̱ʼa sakúsi̱íyó-inira. ¿Ndáa ki̱ʼva sánáʼa̱ra miíyó? Ta̱ apóstol Pablo ta̱xira consejo yóʼo: “Sandákoondó ki̱ʼva ña̱ ni̱xi̱yondó tá ya̱chi̱”. Ta saátu ni̱ka̱ʼa̱nra: “Xíniñúʼu kixáʼandó ndasaxa̱ándó ki̱ʼva ña̱ kéʼéndó” (kaʼvi Colosenses 3:8-10). Ña̱ va̱ʼa ndasaxa̱áyó ki̱ʼva ña̱ kéʼéyó xíniñúʼu chikaa̱yó ndee̱. Ná ndakanixi̱níyó xa̱ʼa̱ ta̱ Pablo, nda̱a̱ tá loʼovíra xi̱chikaa̱níra ndee̱ ña̱ va̱ʼa sakúsi̱íra-ini Ndióxi̱ (Gál. 1:14; Filip. 3:4, 5). Soo xa̱ʼa̱ ña̱ va̱ása níxi̱kunda̱a̱-inira xa̱ʼa̱ ña̱ xi̱kuni̱ Ndióxi̱, kǒo níxi̱keʼéra nda̱a̱ táki̱ʼva xi̱kuni̱ Ndióxi̱. Tá kúú va̱ása níxi̱kunda̱a̱-inira xa̱ʼa̱ ña̱ xi̱sanáʼa̱ ta̱ Jesús, ni̱nuní xi̱kunira xa̱ʼa̱ ña̱kán va̱ása níxi̱keʼéra nda̱a̱ táki̱ʼva xi̱kuni̱ Ndióxi̱ (1 Tim. 1:13).

11. ¿Ndáaña xi̱ ixayo̱ʼvi̱ xíʼin ta̱ Pablo nasamara?

¹¹ Tá kúma̱níka nduu ta̱ Pablo cristiano, kamaní xi̱saa̱ra. Biblia káʼa̱nña ña̱ xi̱saa̱ní-inira xi̱xinira na̱ xi̱ndiku̱n ta̱ Jesús, xi̱ ixandi̱va̱ʼara xíʼinna “ta xi̱kuni̱ra kaʼnírana” (Hech. 9:1). Tá ku̱ndaa̱-inira xa̱ʼa̱ Ndióxi̱, ki̱xáʼara ndásakáʼnurara ta chi̱kaa̱níra ndee̱ ña̱ nasamara ña̱ va̱ása va̱ʼa xi̱keʼéra (Efes. 4:22, 31). Iin yichi̱ xa̱a̱ síín síín ña̱ xi̱kuni̱ ta̱ Pablo xíʼin ta̱ Bernabé keʼéna, ña̱kán ndeéní ni̱sa̱a̱na nu̱ú táʼanna (Hech. 15:37-39). Tá ndo̱ʼo ta̱ Pablo ña̱yóʼo va̱ása níkeʼéra nda̱a̱ táki̱ʼva xi̱kuni̱ Ndióxi̱, soo chi̱kaa̱nívara ndee̱ ña̱ nasamara ña̱ va̱ása va̱ʼa xi̱keʼéra ña̱ va̱ʼa sakúsi̱íra-ini Jehová (1 Cor. 9:27).

12. ¿Ndáa ki̱ʼva na̱sama ta̱ Pablo ña̱ va̱ása va̱ʼa xi̱keʼéra?

¹² ¿Ndáa ki̱ʼva na̱sama ta̱ Pablo ña̱ va̱ása va̱ʼa xi̱keʼéra? Va̱ása níndakanixi̱níra ña̱ kuchiñu miíra keʼéra ña̱yóʼo (Filip. 4:13). Ke̱ʼéra nda̱a̱ táki̱ʼva ke̱ʼé ta̱ Pedro, chi ta̱xira ña̱ ná chindeétáʼan Ndióxi̱ xíʼinra (1 Ped. 4:11). Soo sava yichi̱ xi̱keʼéra ña̱ va̱ása va̱ʼa ta xi̱ndakava-inira. Tá xi̱ndoʼora ña̱yóʼo, xi̱ndakanixi̱níra xa̱ʼa̱ ndiʼi ña̱ va̱ʼa ña̱ xi̱keʼé Jehová xa̱ʼa̱ra tasaá xi̱chikaa̱kara ndee̱ ña̱ keʼéra ña̱ va̱ʼa (Rom. 7:21-25).

13. ¿Ndáa ki̱ʼva kundiku̱nyó yichi̱ ta̱ Pablo?

¹³ Ni loʼo á xa̱a̱ ku̱a̱ʼá tiempo ndásakáʼnuyó Jehová, ndiʼiyó xíniñúʼu kundiku̱n yichi̱ ta̱ Pablo. ¿Ndáa ki̱ʼva keʼéyóña? Ná chikaa̱yó ndee̱ ña̱ kǒo keʼékayó ña̱ va̱ása va̱ʼa ta ná keʼéyó ña̱ kútóo Jehová. Soo tá ke̱ʼéyó ña̱ va̱ása va̱ʼa, tá kúú ña̱ kamaní ni̱sa̱a̱yó á ni̱ka̱ʼa̱nyó ña̱ va̱ása va̱ʼa, ná kǒo ndakanixi̱níyó ña̱ va̱ása nasa̱mavíyó. Va̱ʼaka ná chikaa̱yó ndee̱ ña̱ nasamayó ña̱ kéʼéyó xíʼin ña̱ ndákanixi̱níyó (Rom. 12:1, 2; Efes. 4:24). Soo íyo iin ña̱ ndáyáʼviní ña̱ kǒo xíniñúʼu nandósóyó xa̱ʼa̱, tá kúni̱yó viíka kixáʼayó keʼéyó sava ña̱ʼa xíniñúʼu kunda̱a̱-iniyó ndáaña kúni̱ Jehová ná keʼéyó.

NÁ TAXIYÓ KUNDAA JEHOVÁ MIÍYÓ NDA̱A̱ TÁKI̱ʼVA KE̱ʼÉ TA̱ DAVID

14, 15. ¿Ndáa ki̱ʼva ndáa Jehová na̱ ñuura tiempo vitin? (Salmo 27:5; koto na̱ʼná ña̱ va̱xi chí nu̱ú kíxáʼa tutu yóʼo).

¹⁴ Ña̱ va̱ʼa kusi̱í-iniyó xíniñúʼu taxiyó ña̱ ná kundaa Jehová miíyó. Ná kotoyó ndáa ki̱ʼva kéʼéra ña̱yóʼo ta ndáaña xíniñúʼu keʼéyó ña̱ va̱ʼa kundaara miíyó.

¹⁵ Ta̱ rey David xi̱kunda̱a̱-inira ña̱ kiviva kundaa Jehová miíra (kaʼvi Salmo 27:5).a ¿Ndáa ki̱ʼva ndáa Jehová na̱ ñuura tiempo vitin? Va̱ása táxira ña̱ kasina nu̱ú na̱ ñuura ña̱ va̱ʼa ndasakáʼnunara. Jehová káʼa̱nra ña̱ ni nda̱a̱ ndáaka ña̱ ná keʼéna xíʼinyó, va̱ása kuchiñuvína (Sal. 34:7; Is. 54:17). Ta̱ Ndi̱va̱ʼa, na̱ ta̱chí ndi̱va̱ʼa ta saátu na̱ sáa̱-ini xíni miíyó íyova ndee̱na, soo va̱ása kuchiñuna sandíʼi-xa̱ʼa̱na miíyó. Ni ná kaʼnínana miíyó, sandátakuva Jehová miíyó (1 Cor. 15:55-57; Apoc. 21:3, 4). Ta saátu chíndeétáʼanra xíʼinyó ña̱ va̱ása kundi̱ʼi̱ní-iniyó tasaá va̱ʼa kachíñukayó nu̱úra (Prov. 12:25; Mat. 6:27-29). Xa̱ʼa̱ ña̱ kúni̱níra xínira miíyó, táxira na̱ hermanoyó ña̱ va̱ʼa chindeétáʼanna xíʼinyó ta saátu na̱ anciano na̱ ndáa miíyó (Is. 32:1, 2). Ta ti̱xin reunión sákuaʼayó ndáa inkaka ki̱ʼva ndáa Jehová miíyó (Heb. 10:24, 25).

16. ¿Ndáa ki̱ʼva xi̱ndaa Jehová ta̱ David?

¹⁶ Tá ka̱ndíxa ta̱ David ña̱ ni̱ka̱ʼa̱n Jehová xíʼinra, ña̱yóʼo chi̱ndeétáʼanña xíʼinra ña̱ vií koo ña̱ ndaka̱xinra keʼéra tasaá kǒo níndoʼora nda̱a̱ táki̱ʼva xi̱ndoʼo na̱ kǒo íxato̱ʼó ña̱ káʼa̱n Ndióxi̱ (chitáʼanña xíʼin Proverbios 5:1, 2). Tá kǒo níxiniso̱ʼoka ta̱ David ña̱ xi̱kaʼa̱n Jehová, ku̱a̱ʼá tu̱ndóʼo ki̱xi nu̱úra (2 Sam. 12:9, 10). ¿Ndáaña ke̱ʼé ta̱ David tá ni̱xo̱ʼvi̱ra xa̱ʼa̱ ku̱a̱chi ña̱ ke̱ʼé inkana? Xi̱keʼéníra oración ta mií Jehová sa̱ndíko-inira, xi̱ndaarara ta saátu ni̱ka̱ʼa̱nra xíʼinra ña̱ kúni̱níra xínirara (Sal. 23:1-6).

17. ¿Ndáa ki̱ʼva kundiku̱nyó yichi̱ ta̱ David?

¹⁷ Ndíku̱nyó yichi̱ ta̱ David tá káʼa̱nyó xíʼin Jehová ña̱ chindeétáʼanra xíʼinyó tá kúma̱níka ndaka̱xinyó ña̱ keʼéyó. Saátu kúnda̱a̱-iniyó ña̱ tá va̱ása va̱ʼa íyo ña̱ ndáka̱xinyó keʼéyó, Jehová va̱ása kundaavíra miíyó nu̱ú tu̱ndóʼo ña̱ kivi kixi nu̱úyó (Gál. 6:7, 8). Tá xóʼvi̱yó xa̱ʼa̱ ña̱ kéʼé inkana ña̱ va̱ása va̱ʼa, kivi ka̱ʼa̱nyó xíʼin Jehová ña̱ ná chindeétáʼanra xíʼinyó, saá sandíkora-iniyó ta na̱ʼa̱ra ña̱ kúni̱ra xínira miíyó (Filip. 4:6, 7).

NÁ NDAKUNDEÉYÓ SAKÚAʼAYÓ XA̱ʼA̱ NDIÓXI̱

18. ¿Ndáaña kéʼé na̱ yiví tiempo vitin ta ndáaña xíniñúʼu keʼéyó ña̱ va̱ʼa sakúaʼakayó xa̱ʼa̱ Ndióxi̱? (Koto na̱ʼná).

¹⁸ Texto ña̱ ku̱i̱ya̱ 2026 káchiña: “Si̱íní íyo na̱ kúnda̱a̱-ini ña̱ xíniñúʼuna Ndióxi̱”. Tiempo vitin kúú ña̱ xíniñúʼu keʼéyó ña̱ káʼa̱n ña̱yóʼo. Ndóoyó iin ñuyǐví nu̱ú va̱ása si̱í íyo na̱ yiví saáchi kǒo ndákunina ña̱ xíniñúʼuna Ndióxi̱, ta ndásakáʼnunara nda̱a̱ táki̱ʼva kúni̱ miína á kéʼéna ña̱ ndákanixi̱ní na̱ ñuyǐví. Va̱ása kúni̱yó keʼéyó nda̱a̱ táki̱ʼva kéʼé na̱yóʼo, ña̱kán ná chikaa̱yó ndee̱ ña̱ sakúaʼakayó xa̱ʼa̱ Ndióxi̱, ná keʼéyó ña̱ kútóora ta ná taxiyó ña̱ kundaara miíyó.