“Iin regalo Jehová kúú se̱ʼendó”

¿NDÁAÑA ndákanixi̱níndó tá xíniso̱ʼondó tu̱ʼun herencia? Sana ndákanixi̱níndó xa̱ʼa̱ xu̱ʼún, xa̱ʼa̱ iin veʼe á xa̱ʼa̱ iin ña̱ʼa ña̱ ndáyáʼviní ña̱ sa̱yáʼa iin na̱ veʼendó ndaʼa̱ndó. Nda̱a̱ ndáaka herencia kúú ña̱ nda̱kiʼinyó, sana viíníva kiʼinyó kuenta xíʼin ña̱yóʼo saáchi ndáyáʼviníña nu̱úyó.

Biblia káʼa̱nña “iin regalo Jehová kúú se̱ʼendó” (Sal. 127:3). Na̱ íyo se̱ʼe na̱ ndásakáʼnu Jehová, iin regalo ña̱ ndáyáʼviní ta̱xira ndaʼa̱na kúú na̱ va̱lí se̱ʼena. Ña̱kán va̱ʼaní ndáana na̱yóʼo ña̱ va̱ʼa kǒo kundoʼona nda̱a̱ ni iin ña̱ʼa, ña̱ kusi̱í-inina ta saátu ña̱ sakúaʼana xa̱ʼa̱ Ndióxi̱.

Soo tiempo vitin, na̱ íyo se̱ʼe kǒo xítona na̱ va̱lí se̱ʼena ña̱ kúúna iin regalo ña̱ ta̱xi Ndióxi̱ ndaʼa̱na (Is. 49:15; 2 Tim. 3:1-3). Inkana ndíʼi̱va-inina xa̱ʼa̱ se̱ʼena soo íxayo̱ʼvi̱ña xíʼinna ña̱ kundaana na̱yóʼo, saáchi íyoní ña̱ sándi̱ʼi̱-inina. ¿Ndáaña kúú sava ña̱yóʼo? ¿Ndáaña kúni̱ Jehová ná keʼé na̱ íyo se̱ʼe? ¿Ndáaña keʼéna ña̱ va̱ʼa vií sakúaʼnuna se̱ʼena?

ÑA̱ ÍXAYO̱ʼVI̱ XÍʼINNA

Ña̱ íxandúxa na̱ veʼena xíʼinna á na̱ yiví na̱ íyo nu̱ú ndóona. Sava ñuu na̱ yiví íxato̱ʼókana na̱ íyo ku̱a̱ʼá se̱ʼe. Sava na̱ ti̱ndaʼa̱, na̱ veʼena á na̱ ndóo yatin xíʼinna kúú na̱ sándi̱ʼi̱-inina ña̱ ná koo ku̱a̱ʼá se̱ʼena.
Ndíʼi̱-inina xa̱ʼa̱ ña̱ kivi kundoʼona chí nu̱únínu. Sava na̱ ti̱ndaʼa̱ íyona ñuu nu̱ú xíʼi̱ ku̱a̱ʼání na̱ va̱lí xa̱ʼa̱ ña̱ kǒo ña̱ kuxuna, ña̱ káni kue̱ʼe̱ miína á ña̱ kǒo ta̱tán koʼona. Sana ndákanixi̱nína, tá ku̱a̱ʼáka se̱ʼena ná koo, savana kuaʼnuvana. Ta inkana íyo ku̱a̱ʼá se̱ʼena ña̱ va̱ʼa kundaa iin na̱yóʼo miína tá xa̱a̱ ná kuchéena, ta kéʼéna saá tá íyona ñuu nu̱ú kǒo chíndeétáʼan na̱ gobierno xíʼin na̱ xa̱a̱ ku̱chée.
Íxayo̱ʼvi̱ña xíʼinna ña̱ lo’o se̱ʼena koo. Sava ñuu, íxayo̱ʼvi̱ña xíʼin na̱ ti̱ndaʼa̱ ña̱ ndukúna ta̱tán ña̱ va̱ʼa loʼo se̱ʼena koo. Íyova inka ña̱ kivi kuniñúʼuna, soo va̱ása va̱ʼa ña̱yóʼo ta na̱ yiví yíʼvina kuniñúʼunaña chi sana kivi taxiña inka kue̱ʼe̱ ndaʼa̱na. Ta inka ñuu íyova ta̱tán koʼona ña̱ va̱ʼa va̱ása ku̱a̱ʼá se̱ʼena koo, soo va̱ása sátánaña xa̱ʼa̱ ña̱ yaʼviníña.a

¿NDÁAÑA KÚNI̱ JEHOVÁ KEʼÉ NA̱ ÍYO SE̱ʼE?

Iin na̱ familia sasíkína chí parque. Iin ta̱ íyo se̱ʼe xíniso̱ʼora ña̱ káʼa̱n ñá loʼo se̱ʼera xíʼinra, ta ñá síʼira sasíkíñá xíʼin ta̱ loʼo. — Tavándó tiempo ña̱ koondó xíʼin iin tá iin se̱ʼendó.

Taxindó ña̱ xíniñúʼu se̱ʼendó. Jehová ta̱xira chiñu ndaʼa̱ na̱ íyo se̱ʼe ña̱ taxina ña̱ xíniñúʼu na̱ va̱lí se̱ʼena. Kúni̱ra ná kachíñuna ña̱ va̱ʼa taxina ña̱ kuxu na̱ va̱lí se̱ʼena, ti̱ko̱to̱ kundixina xíʼin nu̱ú koona ta saátu ña̱ vií sanáʼa̱nana. Ña̱kán na̱ cristiano na̱ íyo se̱ʼe va̱ása táxina ña̱ ná ku̱ʼu̱n mií se̱ʼena kaʼvina iin escuela ña̱ internado. Ña̱ kéʼéna kúú ña̱ ná koo se̱ʼena xíʼinna nda̱a̱ ná kuaʼnuna ña̱ va̱ʼa kiʼinna kuenta xíʼin miína tá kǒokana íyo xíʼin na̱ yivána. Ta saátu távána tiempo ña̱ koona xíʼin iin tá iin se̱ʼena tasaá kíʼin na̱ va̱lí yóʼo kuenta ña̱ kúni̱nína xínina miína. Jehová kúnda̱a̱va-inira xíʼin ña̱ ndóʼo na̱ íyo se̱ʼe ta kǒo káʼa̱nra xíʼinna ña̱ kuumiína ku̱a̱ʼá xu̱ʼún. Tá kúú, nda̱kaxinra iin na̱ matrimonio ña̱ va̱ʼa kundaana se̱ʼera ta̱ Jesús, ni ndáʼviníva ni̱xi̱yo na̱kán soo va̱ʼaníva xi̱kachíñuna (Mat. 13:55, 56; Luc. 2:24).

Texto ña̱ va̱xi nu̱ú Biblia: “Tá iinna va̱ása táxina ña̱ xíniñúʼu na̱ veʼena ta ni va̱ása táxina ña̱ xíniñúʼu na̱ ndóo ti̱xin veʼe miína, na̱yóʼo va̱ása kándíxakana ña̱ kándíxayó, ta kinika íyo ña̱ kéʼéna nu̱ú iin na̱ yiví na̱ va̱ása kándíxa Ndióxi̱” (1 Tim. 5:8).

Tá xa̱a̱ kúchée na̱ íyo se̱ʼe, Jehová kúnda̱a̱-inira ña̱ xíniñúʼu kundaana na̱yóʼo. Ta iin ki̱ʼva ña̱ na̱ʼa̱ na̱ va̱lí ña̱ íxato̱ʼóna yivána kúú ña̱ kotona ndáa ki̱ʼva kivi chindeétáʼanna xíʼinna tá xa̱a̱ ná kuchéena (Éx. 20:12; 1 Tim. 5:4). Kúsi̱íní-ini Jehová xíʼin na̱ íyo se̱ʼe, na̱ ndíʼi̱-ini ndáa ki̱ʼva kundaana se̱ʼena nu̱úka ña̱ kundi̱ʼi̱-inina ndáa ki̱ʼva kundaa na̱ va̱lí yóʼo miína (2 Cor. 12:14).

Sanáʼa̱ndó se̱ʼendó xa̱ʼa̱ Jehová: Na̱ cristiano na̱ íyo se̱ʼe saátu xíniñúʼu sanáʼa̱na se̱ʼena ña̱ ku̱ʼvi̱-inina kunina Jehová ta saátu ña̱ ndasakáʼnunara. Nu̱ú Jehová ndáyáʼviní keʼéna ña̱yóʼo (Deut. 6:6, 7).

Texto ña̱ va̱xi nu̱ú Biblia: “Sakúaʼnundóna ta taxindó yichi̱ nu̱úna nda̱a̱ táki̱ʼva kúni̱ mií Jehová” (Efes. 6:4).

JEHOVÁ KÚNI̱RA ÑA̱ VIÍ SAKÚAʼNUNDÓ SE̱ʼENDÓ

Iin na̱ xa̱a̱ ti̱ndaʼa̱ nátúʼun táʼanna ta kánú Biblia nu̱ú mesa. — Natúʼun táʼanndó nda̱saa se̱ʼendó koo.

Ndakanixi̱níndó nda̱saa se̱ʼendó koo. Tá ndákanixi̱níndó ña̱ koo se̱ʼendó, viíní ndakanixi̱níndó. Tá kúú, tá ku̱a̱ʼá se̱ʼendó koo, ¿á nani xu̱ʼúnndó ña̱ va̱ʼa satándó ña̱ kuxu ndiʼi na̱ se̱ʼendó, ti̱ko̱to̱ kundixina ta saátu ña̱ ku̱ʼu̱nna escuela? Tá va̱ása kuchiñundó túvindó, va̱ʼaka vií ndakanixi̱níndó nda̱saa se̱ʼendó koo ta saátu kiʼinndó kuenta ndáa ki̱ʼva káʼa̱n Jehová xíʼinndó ña̱ kundaandó iin tá iin na̱yóʼo. Jehová kúnda̱a̱va-inira ña̱ su̱ví ndiʼiví ña̱ ndákanixi̱níndó keʼéndó kanaña nda̱a̱ táki̱ʼva kúni̱ndó (Ecl. 9:11). Soo kǒo nandósondó ña̱ taxiva Jehová bendición ndaʼa̱ndó xa̱ʼa̱ ña̱ chíkaa̱ndó ndee̱ ña̱ sakúaʼnundó se̱ʼendó nda̱a̱ táki̱ʼva kúni̱ra.

Texto ña̱ va̱xi nu̱ú Biblia: “Na̱ va̱ʼaní káchíñu viíní kana ña̱ kúni̱na keʼéna; soo na̱ kamaní kúni̱ keʼé iin ña̱ʼa ndundáʼvina” (Prov. 21:5).

“¿Ndáa ndóʼó kúni̱ keʼé iin veʼe á va̱ása siʼna kundoondó ta tavándó ki̱ʼva á kita xu̱ʼúnndó ña̱ saxínundóña?” (Luc. 14:28).

Siʼnaka Jehová kundi̱ʼi-inindó xa̱ʼa̱. Inkáchi ndasakáʼnundó Jehová xíʼin na̱ veʼendó ta ná kundayáʼvi ña̱yóʼo nu̱úndó. Tá xa̱a̱ íyo se̱ʼendó, chikaa̱ndó ndee̱ ña̱ sanáʼa̱ndó na̱yóʼo ña̱ ku̱ʼvi̱-inina kunina Jehová. Chindeétáʼanndó xíʼinna ña̱ kuniso̱ʼona ña̱ yáʼa ti̱xin reunión. Kaʼvindó xíʼin na̱ veʼendó ndiʼi semana ta sanáʼa̱ndó se̱ʼendó ña̱ natúʼunna xa̱ʼa̱ Ndióxi̱. Tá íyo se̱ʼendó na̱ chée, su̱ví na̱yóʼo kúú na̱ xíniñúʼu kundaa se̱ʼendó na̱ válíka á inkaka na̱ veʼendó. Xíniñúʼu chikaa̱ndó ndee̱ ta saátu tavándó tiempo ña̱ va̱ʼa sanáʼa̱ndó se̱ʼendó ña̱ ku̱ʼvi̱-inina kunina Jehová, ndáyáʼviní keʼéndó ña̱yóʼo.

Texto ña̱ va̱xi nu̱ú Biblia: “Kúsi̱íní-inii̱ tá xíniso̱ʼi̱ xa̱ʼa̱ na̱ va̱lí se̱ʼi̱ ña̱ ndákundeéna ndíku̱nna ña̱ nda̱a̱” (3 Juan 4).b

Kundaa-inindó Jehová. Tá xa̱a̱ ndákanixi̱níndó ña̱ koo se̱ʼendó á xa̱a̱ íyo se̱ʼendó, ndakaʼánndó chi ña̱ ndáyáʼvika kúú ña̱ káʼa̱n Jehová ta su̱ví ña̱ kundiku̱nndó costumbre ña̱ íyo ñuu nu̱ú íyondó.

Ña̱ xítoyó nu̱ú na̱ʼná: 1. Iin na̱ familia inkáchi ndóona xíʼin ta̱ loʼo se̱ʼena ti̱xin reunión ña̱ congregación. Ta̱ loʼo yóʼo ndániʼira ndaʼa̱ra ña̱ taxira comentario. 2. Iin na̱ familia nátúʼunna xa̱ʼa̱ Ndióxi̱. Iin ta̱ íyo se̱ʼe ke̱era xíʼin ñá loʼo se̱ʼera ña̱ predicación ta ñá síʼira ke̱eñá xíʼin se̱ʼeñá na̱ válika. — Xíniñúʼu chikaa̱ndó ndee̱ ta saátu tavándó tiempo ña̱ va̱ʼa sanáʼa̱ndó se̱ʼendó ña̱ ku̱ʼvi̱-inina kunina Jehová.

Tá loʼo se̱ʼendó ná koo, kivi kandíxandó ña̱ kundaava Jehová ndóʼó tá xa̱a̱ ná kuchéendó. Kǒo ndakanixi̱níndó táki̱ʼva ndákanixi̱ní na̱ yiví ña̱ xíniñúʼu koo se̱ʼena ña̱ va̱ʼa kundaana na̱yóʼo tá xa̱a̱ ná kuchéena. Kǒo kundi̱ʼiní-inindó xa̱ʼa̱ ña̱ kǒo na̱ kundaa ndóʼó tá xa̱a̱ ná kuchéendó, chi Jehová káʼa̱nra ña̱ kundaavara miíndó ta ndiʼi tiempo sáxi̱nura ña̱ káʼa̱nra (Jos. 23:14).

Texto ña̱ va̱xi nu̱ú Biblia: “Xíʼin ndiʼi níma̱ún kundaa-iniún Jehová ta va̱ása kundaa-iniún ña̱ ndákanixi̱ní miíún. Ni nda̱a̱ ndáaka ña̱ kéʼún, kiʼin kuenta xíʼin ña̱ ndákanixi̱níra, ta taxira ña̱ vií ná kana ndiʼi ña̱ kéʼún” (Prov. 3:5, 6).

“Ta̱ loʼova xi̱kui̱ ta vitin xa̱a̱ ku̱chéi̱, soo ta̱ʼán kunii̱ sandákoondaʼa̱ Ndióxi̱ na̱ kéʼé ña̱ nda̱kú ta ni ta̱ʼán kunii̱ kaka se̱ʼena ndukúna ña̱ kuxuna” (Sal. 37:25).

“Siʼnaka Reino Ndióxi̱ kundi̱ʼi̱-inindó xa̱ʼa̱ xíʼin chiñu ña̱ xáʼndara, tasaá miíra taxi ndiʼi ña̱yóʼo ndaʼa̱ndó” (Mat. 6:33).

Na̱ va̱lí se̱ʼendó iin regalo Jehová kúú na̱yóʼo. Na̱ íyo se̱ʼe sákusi̱ína-ini Jehová tá viíní kíʼinna kuenta xíʼinna, tá táxina ña̱ xíniñúʼuna, tá chíndeétáʼanna xíʼinna ña̱ kuaʼnuna xíʼin tu̱ʼun Ndióxi̱, tá viíní ndákanixi̱nína nda̱saa se̱ʼena koo ta saátu ndíku̱nna ña̱ káʼa̱nra nu̱úka ña̱ kundiku̱nna costumbre ña̱ kúúmií na̱ yiví ñuu nu̱ú íyona. Saá kúú ña̱ náʼa̱na ña̱ iin regalo ña̱ ta̱xi Jehová ndaʼa̱na kúú na̱ va̱lí se̱ʼena.

Kǒo ndíko-inina

Sava ñuu nu̱ú ndáʼviní ndóʼo na̱ yiví, na̱ ti̱ndaʼa̱ ndákanixi̱nína ña̱ va̱ʼaka koona tá ku̱a̱ʼáka se̱ʼena ná koo. ¿Á ña̱ ndixa kúú ña̱yóʼo? Ná kotoyó ña̱ káʼa̱n savana.

¿Á káʼa̱nna xíʼinndó ña̱ koo ku̱a̱ʼá se̱ʼendó?

“Sava na̱ hermano káʼa̱nvana ña̱yóʼo xíʼinndi̱. Iin na̱ matrimonio ni̱ka̱ʼa̱nna ña̱yóʼo xíʼinndi̱: ‘¿Nda̱chun iinlá kuití kúú se̱ʼendó?’ Tá ka̱ku se̱ʼendi̱ ñá u̱vi̱, xi̱kaʼa̱nkavana xíʼinndi̱ ña̱ ná koo ku̱a̱ʼá se̱ʼendi̱” (Ta̱ Jeremias).

¿Á íyo tu̱ndóʼo nu̱úndó xa̱ʼa̱ ña̱ nda̱kaxinndó loʼo se̱ʼendó koo?

“Va̱ásaví. Xa̱ʼa̱ ña̱ loʼo se̱ʼendi̱ íyo, chíndeétáʼanña xíʼinndi̱ ña̱ taxindi̱ ña̱ xíniñúʼu iin tá iin na̱ se̱ʼendi̱ ta saátu ña̱ sanáʼa̱ndi̱na xa̱ʼa̱ Ndióxi̱, chi ña̱yóʼo kúú ña̱ ndáyáʼvika. Xa̱ʼa̱ ña̱ ku̱a̱ʼání ni̱xi̱yondi̱ nu̱ú na̱ yivái̱, ndákaʼíi̱n ña̱ ni̱xo̱ʼvi̱nína ña̱ va̱ʼa sakúaʼnuna ndi̱ʼi̱ ta taxina ña̱ xi̱xiniñúʼundi̱” (Ta̱ Jeremias).

¿Ndáaña ndákanixi̱ní se̱ʼendó xa̱ʼa̱ ña̱ nda̱kaxinndó keʼéndó?

“Tá xítona ña̱ xóʼvi̱ inka na̱ familia na̱ íyo ku̱a̱ʼá se̱ʼe, va̱ʼaní kúnina saáchi xa̱ʼa̱ ña̱ va̱ása ku̱a̱ʼá kúúndi̱, kǒo ku̱a̱ʼá tu̱ndóʼo íyo nu̱úndi̱” (Ta̱ Filipe).

“Na̱ va̱lí se̱ʼendi̱ kúsi̱íní-inina saáchi kíʼinna kuenta ña̱ kúni̱níndi̱ xínindi̱na ta saátu va̱ʼaní ndáandi̱na. Ndiʼi tiempo íyondi̱ xíʼin na̱ hermano na̱ kúʼvi̱ní-ini xíni Jehová ta chíkaa̱na ndee̱ xíʼinndi̱ ña̱ ku̱a̱ʼáka chiñu keʼéndi̱ nu̱ú Jehová ta vitin xítondi̱ ña̱ kéʼé se̱ʼendi̱ ndiʼi ña̱ sa̱náʼa̱ndi̱na” (Ta̱ Carlos).

¿Ndáaña va̱ʼa ndákiʼinndó xa̱ʼa̱ ña̱ loʼo se̱ʼendó íyo?

“Xa̱ʼa̱ ña̱ kǒo ku̱a̱ʼá xu̱ʼún, va̱ʼaka ndáayó na̱ veʼeyó tá loʼo kúúna. Xi̱kuumiíi̱ iin chiñu nu̱ú ku̱a̱ʼá xu̱ʼún xi̱kiʼii̱n soo xa̱a̱ íyo u̱ni̱ ku̱i̱ya̱ kúú ña̱ ta̱vána yi̱ʼi̱. Iin ña̱ chi̱ndeétáʼan xíʼinndi̱ kúú ña̱ kǒo ku̱a̱ʼá se̱ʼendi̱ níxi̱yo ta va̱ása ní ixayo̱ʼvi̱ña xíʼindi̱ ña̱ kundaandi̱na” (Ta̱ Jeremias).

“Xa̱ʼa̱ ña̱ loʼo kúú se̱ʼendi̱, va̱ʼa ndáandi̱ iin tá iin na̱yóʼo ta saátu ña̱ sanáʼa̱ndi̱na xa̱ʼa̱ Jehová. Ta saátu va̱ʼa xáʼa̱nndi̱ inka ñuu ña̱ va̱ʼa natúʼunndi̱ xíʼin na̱ yiví xa̱ʼa̱ Ndióxi̱. Ta vitin ndiʼi na̱ se̱ʼendi̱ káchíñuna nu̱ú Jehová ta kúni̱na keʼéna ku̱a̱ʼáka chiñu nu̱úra” (Ta̱ Lenadi).

¿Á íyo inkaka ña̱ kivi ka̱ʼa̱nndó xa̱ʼa̱?

“Xítoi̱ ña̱ ndixaní kúú ña̱ káʼa̱n Salmo 34:10b: ‘Kǒo nda̱a̱ ni iin ña̱ va̱ʼa kuma̱ní nu̱ú na̱ nándukú Jehová’. Jehová xa̱a̱ táxivara ña̱ xíniñúʼi̱ ta saátu ña̱ xíniñúʼu na̱ veʼi̱” (Ta̱ Rafael).

a Iin tá iin na̱ xa̱a̱ ti̱ndaʼa̱ ndaka̱xin nda̱saa se̱ʼena koo, ama koo se̱ʼena ta saátu á kuniñúʼuna ta̱tán ña̱ va̱ása koo se̱ʼena soo su̱ví ta̱tán ña̱ sánuu se̱ʼena koo ña̱yóʼo. Kǒo xíniñúʼu natúʼun kúáchi inkana xa̱ʼa̱ ña̱ nda̱kaxin na̱ ti̱ndaʼa̱ keʼéna (Rom. 14:4, 10-13). Na̱ xa̱a̱ ti̱ndaʼa̱ kíʼinnína kuenta xíʼin consejo ña̱ va̱xi nu̱ú 1 Corintios 7:3-5.

b Nu̱ú versículo yóʼo tá ni̱ka̱ʼa̱n ta̱ Juan “se̱ʼi̱”, xa̱ʼa̱ na̱ discípulova ni̱ka̱ʼa̱nra. Ki̱ʼva saá kúsi̱í-ini na̱ íyo se̱ʼe tá ndásakáʼnu se̱ʼena Jehová.