Vií ná sanáʼa̱yó na̱ yiví xa̱ʼa̱ Ndióxi̱

1. ¿Ndáaña xíniñúʼu keʼéyó ta nda̱chun? (2 Timoteo 4:2; koto na̱ʼná).

TA̱ JESÚS ni̱ka̱ʼa̱nra ña̱yóʼo xíʼin na̱ xi̱ndiku̱n miíra: “Kúáʼanndó nu̱ú ndiʼi na̱ yiví [...]. Sanáʼa̱ndóna ná keʼéna ndiʼi ña̱ʼa ña̱ sa̱náʼi̱ ndóʼó” (Mat. 28:19, 20). Xíʼin ña̱ ni̱ka̱ʼa̱nra yóʼo kúnda̱a̱-iniyó ña̱ ndiʼi miíyó na̱ cristiano xíniñúʼu vií sanáʼa̱yó. Jehová chíndeétáʼanra xíʼin na̱ yiví na̱ ndixa kúni̱ kunda̱a̱-ini xa̱ʼa̱ra, ta na̱ ángel chíndeétáʼanna xíʼinyó ña̱ ndani̱ʼíyó na̱yóʼo (Hech. 13:48; Juan 6:44; Apoc. 14:6). Soo miíyó ná chikaa̱yó ndeé ña̱ vií sanáʼa̱yóna. Ná ndakanixi̱níyó xa̱ʼa̱ ña̱ ke̱ʼé ta̱ apóstol Pablo xíʼin ta̱ Bernabé. Biblia káʼa̱nña tá na̱túʼunna xíʼin na̱ yiví chí sinagoga ña̱ ñuu Iconio, “va̱ʼakaví ni̱ka̱ʼa̱nna, ña̱kán ku̱a̱ʼání na̱ judío xíʼin na̱ griego ni̱xa̱a̱na ka̱ndíxana” (Hech. 14:1). U̱vi̱ saá na̱yóʼo va̱ʼaní xi̱sanáʼa̱na na̱ yiví (kaʼvi 2 Timoteo 4:2). Ndiʼi miíyó na̱ cristiano ná keʼéyó nda̱a̱ táki̱ʼva ke̱ʼé na̱yóʼo.

2. ¿Nda̱chun savana ndákanixi̱nína ña̱ va̱ása vií xa̱a̱na sanáʼa̱na?

² Savana ndákanixi̱nína ña̱ va̱ása kuchiñuna sanáʼa̱ viína na̱ yiví. Nda̱a̱ kivi ka̱ʼa̱nna ña̱yóʼo: “Miíi̱ va̱ása níka̱ʼvi va̱ʼi̱” á “va̱ása kivi sanáʼa̱ viíi̱”. Saá ndo̱ʼo sava na̱ káʼa̱n Biblia xa̱ʼa̱ (Éx. 4:10; Jer. 1:6). Sana saátu íyo sava na̱ ndákava-ini ta káʼa̱nna ña̱yóʼo: “Kǒo kuchiñui̱ sanáʼi̱ nda̱a̱ táki̱ʼva kéʼé inka na̱ hermano”. Su̱ví ndiʼi na̱ yiví kuni̱ kuniso̱ʼo tu̱ʼun va̱ʼa ña̱ nátúʼunyó xíʼinna, soo tá va̱ʼa xíniso̱ʼona miíyó su̱ví ndee̱ miíyó kúúña. Nda̱a̱ táki̱ʼva xa̱a̱ ku̱ndaa̱-iniyó, Jehová xíʼin na̱ ángel chíndeétáʼanna xíʼinyó ña̱ ndani̱ʼíyó na̱ yiví na̱ kúni̱ kunda̱a̱-ini xa̱ʼa̱ra. Ta miíyó kúni̱yó ña̱ vií ná koo ña̱ sanáʼa̱yóna. Ná kotoyó u̱ni̱ ña̱ kivi chindeé miíyó ña̱ viíka sanáʼa̱yó.

NÁ KUNDI̱ʼI̱-INIYÓ XA̱ʼA̱NA

3. ¿Nda̱chun va̱ʼaní xi̱chindeétáʼan ña̱ xi̱natúʼun ta̱ Jesús xíʼin na̱ yiví?

³ Biblia káʼa̱nña ta̱ Jesús “xi̱kunda̱a̱va-inira ña̱ ndíka̱a̱-ini iin na̱ yiví” (Juan 2:25). Ña̱yóʼo kúni̱ kachina ña̱ xi̱kunda̱a̱-inira ndáaña xi̱ndakanixi̱nína ta saátu ndáaña xi̱kuni̱na keʼéna. Xa̱ʼa̱ ña̱ xi̱kunda̱a̱-inira xíʼin ña̱ xi̱ndoʼona va̱ʼaní xi̱chindeétáʼanra xíʼinna. Ta̱ Jesús xi̱xinira ña̱ xi̱xiniñúʼu kunda̱a̱-ini na̱ yiví xa̱ʼa̱ Ndióxi̱ ta saátu xi̱xoʼvi̱na, saáchi na̱ su̱tu̱ ku̱a̱ʼání ña̱ʼa xi̱kaʼa̱nna xíʼinna ña̱ ná keʼéna (Mat. 9:36; 23:4). Ta̱ Jesús ni̱ka̱ʼa̱nra xa̱ʼa̱ ña̱yóʼo xíʼin na̱ yiví chí yuku̱ ta ku̱a̱ʼání na̱ yiví xi̱kutóona kuniso̱ʼona ña̱ xi̱kaʼa̱nra saáchi xi̱ndayáʼviníña nu̱úna.

4. ¿Ndáa ki̱ʼva na̱ʼa̱yó ña̱ ndíʼi̱-iniyó xa̱ʼa̱ na̱ yiví? (Koto na̱ʼná).

⁴ ¿Ndáa ki̱ʼva na̱ʼa̱yó ña̱ ndíʼi̱-iniyó xa̱ʼa̱ na̱ yiví? Ná chikaa̱yó ndee̱ ña̱ kunda̱a̱-iniyó ndáaña kúú ña̱ sándi̱ʼi̱-inina. Nu̱ú ñuyǐví ña̱ xáʼnda chíñu ta̱ Ndi̱va̱ʼa yóʼo, ndiʼina xóʼvi̱. Ta ña̱yóʼo chíndeétáʼanña xíʼinyó ña̱ kúnda̱a̱-iniyó xíʼin ña̱ ndóʼo na̱ yiví na̱ nátúʼunyó xíʼin xa̱ʼa̱ Ndióxi̱. Tá kúú, nu̱ú noticia káʼa̱nna xa̱ʼa̱ ña̱ʼa ña̱ sándi̱ʼi̱ka-ini na̱ yiví. Na̱ íyo se̱ʼe ndíʼi̱-inina xa̱ʼa̱ se̱ʼena na̱ xáʼa̱n escuela chi kivi kundoʼona tu̱ndóʼo á ndíʼi̱-inina xa̱ʼa̱ ña̱ kǒo chiñu ñuu nu̱ú íyona. Xa̱ʼa̱ ña̱kán ná ndakanixi̱níyó xa̱ʼa̱ ña̱ ndóʼo na̱ yiví tiempo vitin na̱ kǒo kúnda̱a̱-ini xa̱ʼa̱ ña̱ sanáʼa̱ Biblia (2 Tim. 3:1; Is. 65:13, 14).

5. ¿Nda̱chun síín xi̱keʼé ta̱ Jesús nu̱ú na̱ fariseo? (Mateo 11:28-30).

⁵ Ta̱ Jesús xi̱ndi̱ʼi̱-inira xa̱ʼa̱ na̱ yiví, ta na̱kán xi̱kiʼinna kuenta saáchi viíní xi̱keʼéra xíʼinna. Síín ni̱xi̱yora nu̱ú na̱ fariseo, chi na̱kán xi̱ndakanixi̱nína ña̱ xi̱ndayáʼvikana nu̱ú na̱ yiví ta va̱ása vií níxi̱keʼéna xíʼinna (Mat. 23:13; Juan 7:49). Soo ta̱ Jesús va̱ʼa ni̱xi̱yo inira xíʼin na̱ yiví ta xi̱ ixato̱ʼórana. Xa̱ʼa̱ ña̱ vitá ni̱xi̱yo inira, ña̱yóʼo kúú ña̱ chi̱ndeétáʼan xíʼinra ña̱ va̱ʼaní xi̱sanáʼa̱ra na̱ yiví (kaʼvi Mateo 11:28-30). Saátu miíyó xíniñúʼu vií keʼéyó xíʼin na̱ yiví ta ixato̱ʼóyóna.

6. ¿Ndáaña chindeétáʼan xíʼinyó ña̱ va̱ʼa koo iniyó ta to̱ʼó ka̱ʼa̱nyó xíʼin na̱ kǒo xíín kuniso̱ʼo miíyó?

⁶ Savana kǒo xíínna kuniso̱ʼona tu̱ʼun va̱ʼa ña̱ nátúʼunyó xíʼinna. ¿Ndáaña keʼéyó tá ndóʼoyó saá? Ta̱ Jesús ni̱ka̱ʼa̱nra tá ná ixandi̱va̱ʼana xíʼinyó ná kundeé-iniyó, ta saátu ni̱ka̱ʼa̱nra ña̱yóʼo: “Vií keʼéndó xíʼin na̱ kúndasí xíni ndóʼó, ka̱ʼa̱nndó xíʼin Ndióxi̱ xa̱ʼa̱ na̱ kúni̱ ña̱ ná kundoʼondó ña̱ va̱ása va̱ʼa ta ka̱ʼa̱nndó xíʼinra xa̱ʼa̱ na̱ káʼa̱n-ndi̱va̱ʼa xíʼinndó” (Luc. 6:27, 28). Tá va̱ʼa iniyó va̱ása ixayo̱ʼvi̱ña xíʼinyó ña̱ natúʼunyó xíʼin na̱ yiví xa̱ʼa̱ Ndióxi̱. Sava na̱ yiví va̱ása kúni̱na kuniso̱ʼona ña̱ káʼa̱nyó xíʼinna. Ta inkana va̱ása vií kéʼéna xíʼinyó xa̱ʼa̱ ña̱ ndíʼi̱ní-inina, á ña̱ íyo tu̱ndóʼo nu̱úna xíʼin na̱ veʼena. Á sana ni̱xa̱a̱yó nu̱úna míí ki̱vi̱ ña̱ íyo tu̱ndóʼo nu̱úna. Soo nda̱a̱ ndáaka ña̱ ndóʼona ná kundiku̱nyó consejo yóʼo: “Nda̱a̱ táki̱ʼva ndúya̱si̱n iin ña̱ʼa ña̱ xíxina tá kíta ñi̱i̱ xíʼinña saá xíniñúʼu koo tu̱ʼun ña̱ ka̱ʼa̱nndó, viíní ná kooña ña̱ va̱ʼa kunda̱a̱-inindó ndáa ki̱ʼva ndakuiinndó yuʼú iin iinna” (Col. 4:6). Tá ná chikaa̱yó ndee̱ ña̱ kunda̱a̱-iniyó xíʼin ña̱ ndóʼo na̱ yiví, ña̱yóʼo chindeétáʼanña xíʼinyó ña̱ va̱ása kama sa̱a̱yó ta vií sanáʼa̱yóna.

KUNIÑÚʼU BIBLIA TÁ SÁNÁʼÚN INKANA

7. ¿Ndáa ki̱ʼva ni̱na̱ʼa̱ ta̱ Jesús ña̱ xi̱xiniñúʼura tu̱ʼun Ndióxi̱ tá xi̱sanáʼa̱ra na̱ yiví? (Juan 7:14-16).

⁷ Tá xi̱sanáʼa̱ ta̱ Jesús na̱ yiví, kǒo níka̱ʼa̱nra xíʼinna xa̱ʼa̱ ña̱ xi̱ndakanixi̱ní miíra, chi xi̱kaʼa̱nra xíʼinna xa̱ʼa̱ ña̱ va̱xi nu̱ú tu̱ʼun Ndióxi̱ ta va̱ása yo̱ʼvi̱ nísanáʼa̱ra ña̱ va̱ʼa kunda̱a̱-inina xíʼinña ta ndakaʼánna xa̱ʼa̱ ña̱ xi̱sanáʼa̱ra. Biblia káʼa̱nña ña̱yóʼo: “Nda̱kanda̱ní-ini ndiʼi na̱ yiví kán xa̱ʼa̱ ña̱ va̱ʼaní sánáʼa̱ra, saáchi sánáʼa̱ra táki̱ʼva sánáʼa̱ iin na̱ xáʼndachíñu, ta su̱ví táki̱ʼva sánáʼa̱ na̱ maestro na̱ sánáʼa̱ ley” (Mar. 1:22; koto nota ña̱ estudio “no como los escribas”). Tá tiempo ta̱ Jesús, na̱ escriba xi̱xiniñúʼuna ña̱ xi̱sanáʼa̱ na̱ maestro na̱ xi̱ ixato̱ʼónína tiempo saá. Soo ta̱ Jesús xi̱sanáʼa̱ra ña̱ va̱xi nu̱ú tu̱ʼun Ndióxi̱. Ni xi̱xini̱ra ku̱a̱ʼá ña̱ʼa xa̱ʼa̱ ña̱ ni̱xi̱yora chí ndiví xíʼin yivára, va̱ása níxi̱kaʼa̱nra xa̱ʼa̱ ña̱yóʼo ña̱ va̱ʼa ndakanda̱-ini na̱ yiví xíʼinña ta ndakanixi̱nína ña̱ va̱ása xíni̱na. Chi ña̱ ke̱ʼéra kúú ña̱ xi̱niñúʼura tu̱ʼun Ndióxi̱ ña̱ va̱ʼa sanáʼa̱ra na̱ yiví ndáaña kúú ña̱ kúni̱ Ndióxi̱ ná keʼéna (kaʼvi Juan 7:14-16). Va̱ʼaní yichi̱ sa̱ndákoora nu̱ú ndiʼi miíyó na̱ cristiano.

8. ¿Ndáa ki̱ʼva xi̱ndiku̱n ta̱ apóstol Pedro yichi̱ ta̱ Jesús?

⁸ Na̱ discípulo ta̱ Jesús xi̱ndiku̱nna yichi̱ra ta xi̱xiniñúʼuna tu̱ʼun Ndióxi̱ ña̱ va̱ʼa sanáʼa̱na na̱ yiví. Ná kotoyó ña̱ ke̱ʼé ta̱ apóstol Pedro. Ta̱yóʼo va̱ása níka̱ʼvi va̱ʼara, soo tá Pentecostés ña̱ ku̱i̱ya̱ 33 chi̱ndeétáʼanra xíʼin na̱ yiví ta xi̱niñúʼura tu̱ʼun Ndióxi̱ ña̱ va̱ʼa nda̱kanira nu̱úna xa̱ʼa̱ profecía ña̱ ni̱xi̱nu xa̱ʼa̱ ta̱ Jesús (Hech. 2:14-37). ¿Ndáaña ke̱ʼé na̱ yiví kán? “Ndiʼi na̱ va̱ʼaní xi̱niso̱ʼo ña̱ na̱túʼunra nda̱kuchina. Ki̱vi̱ saá ki̱ʼva 3,000 kúú na̱ nda̱kutáʼan xíʼin na̱ discípulo” (Hech. 2:41).

9. ¿Nda̱chun xíniñúʼu kuniñúʼuyó Biblia tá sánáʼa̱yó na̱ yiví?

⁹ Iinlá tu̱ʼun Ndióxi̱ kúú ña̱ va̱ʼaní chíndeétáʼan xíʼinyó ña̱ va̱ʼa sanáʼa̱yó na̱ yiví ña̱ ná xa̱a̱ ña̱ nda̱a̱ níma̱na (Heb. 4:12). Ndáyáʼviní kuniñúʼuyó tu̱ʼun Ndióxi̱ tá sánaʼa̱yó na̱ yiví ta su̱ví ña̱ ndákanixi̱ní miíyó (2 Tim. 4:2). Proverbios 2:6 káchiña: “Jehová kúú ta̱ táxi ña̱ ndíchi ndaʼa̱ na̱ yiví, ta ña̱ káʼa̱nra chíndeétáʼanña xíʼinna ña̱ sakúaʼana ta vií ndakanixi̱nína”. Tá xíniñúʼuyó Biblia tá sánáʼa̱yó na̱ yiví, saá kúú ña̱ táxiyó ña̱ káʼa̱n Jehová xíʼinna (Mal. 2:7). Kúni̱yó ña̱ ná kunda̱a̱-ini na̱ yiví ña̱ ndíchiníka ña̱ va̱xi nu̱ú Biblia ta su̱víka ña̱ ndákanixi̱ní na̱ ñuyǐví yóʼo. Mií Ndióxi̱ ta̱xi ña̱ ná ka̱ʼyi ña̱yóʼo, ta sánaʼa̱ña miíyó ndáaña xíniñúʼu keʼéyó ña̱ va̱ʼa sakúsi̱íyó inira tasaá si̱í kooyó (2 Tim. 3:16, 17).

10. ¿Ndáa ki̱ʼva chindeétáʼanyó xíʼin na̱ sánáʼa̱yó ña̱ va̱ʼa kunda̱a̱-inina xíʼin ña̱ sanáʼa̱ Biblia?

¹⁰ Tá xa̱a̱ ya̱chi̱ káʼviyó xa̱ʼa̱ ña̱ ku̱ʼu̱nyó sanáʼa̱yó na̱ yiví, ná ndakanixi̱níyó ndáaña kivi keʼéyó ña̱ va̱ʼa vií kunda̱a̱-ini na̱ sanáʼa̱yó xíʼin ña̱ káʼa̱n Biblia. Na̱kán ndáyáʼviní kunda̱a̱-inina ña̱ video xíʼin na̱ʼná ña̱ va̱xi nu̱ú tutu ña̱ chíndeétáʼan kuitíva kúúña xíʼinna saáchi ña̱ va̱xi nu̱ú Biblia kúú ña̱ ndáyáʼviníka. Tá xa̱a̱ ki̱xáʼayó káʼviyó xíʼinna, ná kaʼviyó texto ña̱ káxi káʼa̱n ña̱ va̱ʼa chindeétáʼanyó xíʼinna ña̱ ndakanixi̱nína ndáaña sákuaʼana xíʼinña. Tá xa̱a̱ sanáʼa̱yó video á na̱ʼná nu̱úna ná chindeétáʼanyó xíʼinna ña̱ kunda̱a̱ va̱ʼa inina xíʼin texto ña̱ káʼa̱n xa̱ʼa̱ ña̱yóʼo. Soo kǒo kúni̱ kachiña ña̱ kaʼviyó ndiʼi texto ña̱ va̱xi nu̱ú libro ta ni ná va̱ása ka̱ʼa̱n ku̱a̱ʼáníyó xíʼinna. Va̱ʼaka ná taxiyó tiempo ndaʼa̱na ña̱ kunda̱a̱-ini miína xíʼin texto ña̱ káʼviyó nu̱úna ta nda̱a̱ kivi ndikó tukuyó kaʼviyóña, saáchi tá ná keʼéyó saá na̱ yiví kunda̱a̱ káxi inina ña̱ sákuaʼana xa̱ʼa̱ kúú ña̱ va̱xi nu̱ú Biblia su̱ví ña̱ va̱xi nu̱ú libro ni su̱ví xa̱ʼa̱ iin na̱ʼná á iin video (1 Cor. 2:13).

11, 12. a) ¿Ndáa ki̱ʼva chindeétáʼanyó xíʼin na̱ sánáʼa̱yó? (Hechos 17:1-4; koto na̱ʼná). b) ¿Ndáaña xíniñúʼu ndakaʼányó xa̱ʼa̱ sava na̱ yiví ta ndáa ki̱ʼva chindeétáʼanyó xíʼinna?

¹¹ Tá na̱ káʼviyó xíʼin íxayo̱ʼvi̱ña xíʼinna ña̱ kunda̱a̱-inina xíʼin iin ña̱ʼa, ná ndakaʼányó xa̱ʼa̱ consejo ña̱ ni̱ka̱ʼa̱n ta̱ Pablo: “Natúʼun xa̱ʼa̱ tu̱ʼun Ndióxi̱ [...] ta kúee koo iniún”. Su̱ví inkáchi kúnda̱a̱-ini ndiʼina xíʼin tu̱ʼun Ndióxi̱. Kivi ndakanixi̱níyó ña̱ va̱ása yo̱ʼvi̱ví sava ña̱ va̱xi nu̱ú Biblia, soo inka na̱ yiví kúáchi̱ kúnda̱a̱-inina xíʼinña. Tá kúú chí ñuu Tesalónica, ku̱a̱ʼání yichi̱ ndi̱kó tuku ta̱ Pablo ni̱ka̱ʼa̱nra xíʼin na̱ judío xa̱ʼa̱ ña̱ sánáʼa̱ tu̱ʼun Ndióxi̱ ña̱ va̱ʼa ná kandíxana ña̱ xi̱kaʼa̱nra (kaʼvi Hechos 17:1-4).

¹² Inka ki̱ʼva ña̱ chindeétáʼanyó xíʼin na̱ sánáʼa̱yó kúú, ña̱ taxiyó tiempo ndaʼa̱na ña̱ ná ndakuiinna pregunta ña̱ kéʼéyó xíʼinna. Ná va̱ása ku̱a̱ʼání ka̱ʼa̱nyó, vií va̱ʼa ná kuniso̱ʼoyó miína ta kiʼinyó kuenta xíʼin ña̱ ndákanixi̱nína. Tándi̱ʼi, ná káʼviyó texto ña̱ chindeétáʼan xíʼinna ña̱ kunda̱a̱-inina ndáa ki̱ʼva ndákanixi̱ní Ndióxi̱. Ná ndakaʼányó chi sava na̱ yiví nda̱a̱ ni iin yi̱chi̱ ta̱ʼán kunina iin Biblia ta kǒo xíni̱na ndáaña kúú ña̱ káʼa̱nña, ña̱ kivi keʼéyó kúú ña̱ na̱ʼa̱yó nu̱úna folleto ña̱ naní “¿Ndáaña sákuaʼayó nu̱ú Biblia?”. Ta ka̱ʼa̱nyó xíʼinna ña̱ ku̱a̱ʼání ña̱ ndáyáʼvi ña̱ va̱xi nu̱ú Biblia kunda̱a̱-inina xa̱ʼa̱. Saátu kivi chindeétáʼanyó xíʼinna ña̱ kaʼviyó sava versículo ña̱ va̱xi nu̱ú pregunta 15 nu̱úna, ña̱ va̱xi nu̱ú folleto yóʼo, ña̱ káʼa̱n ndáa ki̱ʼva chíndeétáʼan Biblia xíʼinyó ña̱ va̱ʼa si̱í kooyó. Tá náʼa̱yó nu̱ú na̱ káʼviyó xíʼin ña̱ ndáyáʼviní ña̱ va̱xi nu̱ú Biblia va̱ʼaníka sanáʼa̱yó saá.

NÁ CHINDEÉYÓNA ÑA̱ KUNDA̱A̱-ININA XA̱ʼA̱ JEHOVÁ

13. Tá xa̱a̱ sánáʼa̱yó na̱ yiví, ¿ndáana kúú na̱ ndáyáʼviníka kunda̱a̱-inina xa̱ʼa̱?

¹³ Ña̱ kúni̱yó kúú ña̱ chindeétáʼanyó xíʼin na̱ yiví ña̱ ná kunda̱a̱-inina xa̱ʼa̱ Jehová ta ná kuyatinna nu̱úra (Sant. 4:8). Tá sánáʼa̱yó na̱ yiví xa̱ʼa̱ Biblia va̱ása kúni̱yó na̱ʼa̱yó nu̱úna ña̱ miíyó kúú na̱ xíni̱níka, chi ña̱ kúni̱yó kúú ña̱ ná kunda̱a̱-inina mií Jehová kúú ta̱ sánáʼa̱ miína, ta ña̱ ndákanixi̱níra kúú ña̱ ndáyáʼviníka.

14. ¿Ndáa ki̱ʼva chindeétáʼanyó xíʼin na̱ sánáʼa̱yó ña̱ sakúsi̱ína-ini Jehová?

¹⁴ Tá xa̱a̱ sánáʼa̱yó iinna ná chindeétáʼanyó xíʼinna ña̱ sakúsi̱ína-ini Jehová (Prov. 27:11). Va̱ása sánáʼa̱ kuitíyóna ña̱ keʼéna ña̱ va̱ʼa á ña̱ kǒo keʼéna ña̱ va̱ása va̱ʼa ña̱ va̱ʼa xa̱a̱na koona testigo Jehová, chi ña̱ kúni̱yó kúú ña̱ ná nasamana ña̱ kéʼéna ña̱ va̱ʼa xa̱a̱na sakúsi̱ína-ini Ndióxi̱. Tá kúú, tá íxayo̱ʼvi̱ña xíʼinna sandákoona ña̱ va̱ása va̱ʼa kéʼéna ná keʼéyó pregunta yóʼo xíʼinna: “¿Nda̱chun kúndasí Jehová sava ña̱ʼa? ¿Nda̱chun kúni̱ra ña̱ ná sandákoún sava ña̱ kutóún keʼún? ¿Ndáa ki̱ʼva náʼa̱ ña̱yóʼo nu̱ún ña̱ kúni̱ Jehová xínira yóʼó?”. Ná chindeétáʼanyó xíʼin na̱ káʼviyó xíʼin ña̱ ndakanixi̱nína xa̱ʼa̱ Jehová, tá ná keʼéna saá va̱ʼaníka kunda̱a̱-inina ndáa ki̱ʼva íyora tasaá xa̱a̱na keʼéna ña̱ kúni̱ra.

NÁ CHIKAA̱YÓ NDEÉ ÑA̱ VIÍKA SANÁʼA̱YÓ

15. ¿Ndáaña xíniñúʼu keʼéyó ña̱ va̱ʼa viíka sánáʼa̱yó?

¹⁵ Kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ viíka sanáʼa̱yó (1 Juan 5:14). Ndáyáʼviní kuniso̱ʼo va̱ʼayó ña̱ sánáʼa̱na ti̱xin reunión tasaá va̱ʼa keʼéyó ña̱ sakúaʼayó. Ta tá ku̱a̱ʼa̱nyó sánáʼa̱yó na̱ yiví ná ka̱ʼa̱nyó xíʼin iin ta̱ hermano á iin ñá hermana na̱ va̱ʼaní sánáʼa̱ ña̱ ku̱ʼu̱nna xíʼinyó, ta tándi̱ʼi ná ka̱ʼa̱nyó xíʼinna ndáaña kúú ña̱ kivi viíka keʼéyó. Ná ndakaʼányó chi miíyó xa̱a̱ xíni̱vayó ndáaña ka̱ʼa̱nyó xa̱ʼa̱ xíʼinna soo na̱ sánáʼa̱yó kǒo xínina xa̱ʼa̱ ña̱yóʼo. Ña̱kán ndáyáʼviní kunda̱a̱-iniyó xíʼinna, ná chindeétáʼanyó xíʼinna ña̱ kunda̱a̱-inina ña̱ ndáyáʼviní ña̱ sákuaʼana xíʼin ña̱ káʼa̱n Jehová keʼéra. Tasaá va̱ʼa xa̱a̱na koona migo Jehová ta si̱íní koona (Sal. 1:1-3).

16. ¿Nda̱chun xíniñúʼu chikaa̱níkayó ndeé ña̱ vií sanáʼa̱yó?

¹⁶ Ña̱ sánáʼa̱yó na̱ yiví xa̱ʼa̱ Jehová kúú ña̱ sákusi̱íka-iniyó. Ta nu̱ú ñuyǐví xa̱a̱ kúú ña̱ xíniñúʼu sanáʼa̱kayó na̱ yiví. Ña̱kán tá nátúʼunyó xíʼin na̱ yiví xa̱ʼa̱ tu̱ʼun va̱ʼa, ná kundi̱ʼi̱-iniyó xa̱ʼa̱na, ná kuniñúʼuyó Biblia tá sánáʼa̱yó ta saátu iinlá xa̱ʼa̱ Jehová ná ka̱ʼa̱nyó xíʼinna. Tá ná keʼéyó ndiʼi ña̱yóʼo saá kúú ña̱ viíníka sanáʼa̱yó na̱ yiví.