Nani tá loʼovíi̱ sa̱náʼa̱ Jehová miíi̱

Soo siʼna ná ka̱ʼi̱n xíʼinndó ndáa ki̱ʼva ku̱ndaa̱-inii̱ xa̱ʼa̱ ña̱ nda̱a̱. Ka̱kui̱ tá ni̱xi̱yo Segunda Guerra Mundial ñuu Calgary (Canadá). Tá xa̱a̱ kúyatin ndiʼi ku̱i̱ya̱ 1940, iin ta̱ loʼo ta̱ xi̱kuu precursor ta̱ xi̱naní Donald Fraser ni̱xa̱ʼa̱nra veʼendi̱ ña̱ na̱túʼunra xíʼinndi̱ xa̱ʼa̱ Ndióxi̱, siʼíi̱ ki̱xáʼañá káʼviñá Biblia. Ñáyóʼo ni̱kusi̱íní-iniñá tá ki̱xáʼañá sákuaʼañá xa̱ʼa̱ ña̱ nda̱a̱, soo va̱ása níxi̱kivi ku̱ʼu̱nñá ndiʼi reunión xa̱ʼa̱ ña̱ xi̱kuumiíñá iin kue̱ʼe̱. Tá ku̱i̱ya̱ 1950 nda̱kuchiñá, soo tá ni̱ya̱ʼa u̱vi̱ ku̱i̱ya̱ ni̱xi̱ʼi̱vañá. Tiempo saá, yivái̱ ta̱ʼán koora testigo Jehová, soo ta̱xivara ña̱ ná taxina iin discurso xa̱ʼa̱ siʼíi̱ tá ni̱xi̱ʼi̱ñá.

Tá ni̱ya̱ʼa loʼo ki̱vi̱ ña̱ ni̱xi̱ʼi̱ siʼíi̱, iin ñá hermana ñá xa̱a̱ chée ñá xi̱naní Alice, iin ñá ungida xi̱kuu ñákán, ni̱ka̱ʼa̱nñá xíʼi̱n ña̱ ná ku̱ʼi̱n reunión. Ñáyóʼo xi̱xiniñá yi̱ʼi̱ tá xi̱xaʼa̱nndi̱ xíʼin siʼíi̱ sava reunión ña̱ xi̱xiyo sábado á domingo. Ni̱ka̱ʼi̱n xíʼin yivái̱ á kivi ku̱ʼi̱n reunión. Ta̱kán ni̱ka̱ʼa̱nra xíʼi̱n ña̱ kiviva ku̱ʼi̱n ta nda̱a̱ ni̱xa̱ʼa̱nra xíʼi̱n ña̱ va̱ʼa taxira tíxa̱ʼvi ndaʼa̱ ta̱ hermano ta̱ ta̱xi discurso xa̱ʼa̱ siʼíi̱ tá ni̱xi̱ʼi̱ñá. Reunión ña̱ ni̱xi̱yo ki̱vi̱ saá liviní ni̱xi̱yoña ta ku̱tóoní yivái̱ña. Ña̱ ni̱ka̱ʼa̱nna ti̱xin reunión kán, kúú ña̱ ni̱ka̱ʼa̱nna ndáa ki̱ʼva ka̱ʼa̱nyó xíʼin na̱ yiví, ta nda̱kanda̱ní-inira xíʼin ña̱ xi̱niso̱ʼora. Ta nani saá ki̱xáʼara xíkara reunión.

Iin ki̱vi̱ ta̱ hermano ta̱ xi̱kiʼin kuenta xíʼin reunión, ki̱xáʼara káʼa̱nra ndiʼi ki̱vi̱ na̱ íyo matriculado ta na̱kán xi̱kaʼa̱nna: “Presente”. Ta iin ñuú ni̱ka̱ʼi̱n xíʼin ta̱ hermano kán ña̱ ná ka̱ʼa̱nra ki̱víi̱ tá ná koo inka reunión. Ku̱si̱íní-inira tá ni̱ka̱ʼi̱n xíʼinra, soo kǒo níka̱ʼa̱nra xíʼi̱n ndáa xa̱ʼa̱ kúú ña̱ xi̱kaʼa̱nra ki̱vi̱na.

Ña̱ xi̱kuni̱ kuitíi̱ kúú ña̱ ná ka̱ʼa̱nna ki̱víi̱, soo kǒo níxi̱kunda̱a̱-inii̱ ña̱ xi̱xiniñúʼu taxii̱ discurso. Tá ni̱ya̱ʼa iin semana ni̱ka̱ʼa̱nna ki̱víi̱ ta ndeéní ni̱ka̱ʼi̱n: “Presente”. Tándi̱ʼi reunión, ndiʼina ni̱kusi̱íní-ini xíʼi̱n. Tá ni̱ya̱ʼa iin semana ta̱xina iin tutu ndaʼíi̱ nu̱ú va̱xi ki̱víi̱ ña̱ taxii̱ iin asignación, ta ña̱yóʼo kúú ña̱ xa̱a̱ ni̱ka̱ʼi̱n xíʼinndó.

Kǒo níkunda̱a̱-inii̱ ndáaña keʼíi̱, tiempo saá va̱ása níxi̱yaʼana ña̱ kaʼvina Biblia; saáchi ña̱ xi̱keʼéna kúú ña̱ xi̱yaʼa iinna ña̱ xi̱taxina iin discurso ña̱ i̱ñu̱ á u̱na̱ minuto. Yivái̱ chi̱ndeétáʼanra xíʼi̱n ña̱ tavái̱ discurso kán ta 20 yichi̱ sa̱kuaʼi̱ña. Tándi̱ʼi ta̱xii̱ discurso kán, va̱ʼaní consejo ta̱xina ndaʼíi̱. Tá ni̱ya̱ʼa ku̱i̱ya̱, Jehová xi̱niñúʼura yivái̱ ña̱ va̱ʼa sanáʼa̱ra yi̱ʼi̱, saátu xi̱niñúʼura na̱ hermano xíʼin ná hermana ña̱ chi̱ndeétáʼanna xíʼi̱n.

NDA̱A̱ VITIN SÁKUAʼAKAVAI̱

Ñá Alice ñá xa̱a̱ ni̱ka̱ʼi̱n xa̱ʼa̱, chi̱ndeétáʼanñá xíʼi̱n ña̱ natúʼi̱n xíʼin na̱ yiví xa̱ʼa̱ Ndióxi̱. Tiempo saá xi̱kaʼa̱nna xíʼinndi̱ ña̱ ná kaʼvindi̱ u̱ni̱ texto nu̱ú na̱ yiví, tasaá taxindi̱ libro ndaʼa̱na. Siʼna ñákán xi̱kaʼa̱n xíʼinna, tándi̱ʼi xi̱kaʼa̱nñá xíʼi̱n ña̱ kaʼvii̱ texto ña̱ nu̱ú, tasaá kíxáʼíi̱ nátúʼi̱n xíʼin na̱ yiví ta káʼvii̱ inka u̱vi̱ texto nu̱úna, ta xi̱taxii̱ libro ndaʼa̱na. Tá ni̱ya̱ʼa tiempo, sa̱kúaʼi̱ ña̱ miíi̱ ki̱xáʼa nátúʼun xíʼin na̱ yiví. Tá kúyatin ndiʼi ku̱i̱ya̱ 1954, nda̱kuchi yivái̱, ta nani saá ki̱xáʼara chíndeétáʼanra xíʼi̱n ña̱ natúʼi̱n xíʼin na̱ yiví xa̱ʼa̱ Ndióxi̱. Xi̱chikaa̱ra ndee̱ ña̱ sanáʼa̱ra yi̱ʼi̱ xa̱ʼa̱ ña̱ nda̱a̱ ta ndiʼi tiempo xi̱xaʼa̱nra reunión ta saátu xi̱kee ni̱ʼira predicación. Ña̱kán xa̱a̱ xíni̱vandi̱ ndáaña keʼéndi̱ tá xíyo reunión ma̱ʼñú semana ta saátu sábado xíʼin domingo tá xi̱ta̱a̱n.

12 Kuití ku̱i̱ya̱ ka̱ʼvii̱ escuela, soo chi̱ndeétáʼanvaña xíʼi̱n ña̱ keʼíi̱ sava ña̱ʼa. Tá kúú, sa̱kúaʼi̱ tavái̱ suma xíʼin ña̱ sa̱kúaʼava̱i̱ tu̱ʼun ña̱ káʼi̱n. Ña̱ sa̱kúaʼi̱ yóʼo va̱ʼaníva chíndeétáʼanña xíʼi̱n ña̱ keʼíi̱ chiñu ti̱xin Departamento ña̱ Redacción.

Ku̱a̱ʼá yichi̱ ndáka̱tu̱ʼunna miíi̱ ndáa ki̱ʼva ki̱xáʼíi̱ kútói̱ yaa. Na̱ yivái̱ xi̱kutóonína ña̱yóʼo. Tá xi̱kuumiíi̱ u̱xa̱ ku̱i̱ya̱, ni̱ki̱ʼvii̱ iin escuela nu̱ú sákuaʼana sákaʼana tú piano, soo ñá xi̱sanáʼa̱ miíi̱ ni̱ka̱ʼa̱nñá ña̱ va̱ása kuchiñui̱ sakáʼi̱ tú piano. Tasaá ni̱ka̱ʼa̱nñá xíʼin yivái̱ ña̱ ná va̱ása taxikara ku̱ʼi̱n escuela kán. Ta tiempo saá va̱ása níxi̱kutói̱ sakáʼi̱ tú piano.

Tá ni̱ya̱ʼa yo̱o̱, yivái̱ ndu̱kúra inka ñá maestra ña̱ va̱ʼa sanáʼa̱ñá yi̱ʼi̱. Xíʼin ñáyóʼo sa̱kúaʼi̱ sákaʼi̱ piano ta saátu ña̱ katai̱. Tá ni̱xi̱yo loʼi̱ va̱ʼaníva xi̱xitai̱ ta ku̱a̱ʼání concurso xi ixaganai̱. Ña̱ xi̱kuni̱i̱ kúú ña̱ kaʼvi va̱ʼi̱ xíʼin ña̱yóʼo, ta saá kuumiíi̱ iin chiñu ña̱ va̱ʼa sanáʼi̱ inkana ta koi̱ precursor. Tá xa̱a̱ ku̱a̱ʼá tiempo ndíka̱i̱ sákuaʼi̱, ki̱ʼii̱n kuenta ña̱ ku̱a̱ʼání tiempo kaʼvii̱ ña̱ va̱ʼa keʼíi̱ exámen xa̱ʼa̱ yaa yóʼo. Tasaá va̱ása níkaʼvikai̱ ta ki̱xáʼíi̱ kúii̱ precursor regular. Ña̱yóʼo xi̱kuuña ku̱i̱ya̱ 1963.

KÚSI̱ÍNÍ-INIYÓ TÁ KÚÚYÓ PRECURSOR

Tá ni̱ya̱ʼa iin ku̱i̱ya̱ ña̱ xi̱kui̱ precursor regular, saá ni̱ka̱ʼa̱nna xíʼi̱n ña̱ koi̱ precursor especial ta chi̱ndaʼána miíi̱ chí Kapuskasing (Ontario). Ta̱ ni̱xa̱ʼa̱n xíʼi̱n xi̱kuu ta̱ Daniel Skinner ta chéeka xi̱kuu ta̱yóʼo nuíi̱. Ta̱yóʼo sa̱náʼa̱ra miíi̱ ndáa ki̱ʼva íyo chiñu ti̱xin congregación. Tá xi̱kuumiíi̱ 20 ku̱i̱ya̱, xi̱ndikai̱ xíʼin na̱ Comité ña̱ Servicio ti̱xin Congregación, ta ku̱a̱ʼání ña̱ʼa xi̱xiniñúʼu sakúaʼi̱. Vitin kúsi̱íní-inii̱ xítoi̱, na̱ ñuu Ndióxi̱ tuku ki̱xáʼana sánáʼa̱na na̱ va̱lí kúa̱an ña̱ va̱ʼa keʼékana chiñu nu̱ú Ndióxi̱. Tá chíkaa̱na ndee̱ ña̱ kachíñuna nu̱úra, Jehová kivi kuniñúʼura na̱yóʼo ni loʼo ku̱i̱ya̱na.

Chí ñuu Kapuskasing ndeéní vi̱xin xi̱xiyo. Ta̱ Dan xíʼin yi̱ʼi̱ xi̱xiniñúʼu ku̱ʼu̱n xáʼa̱nndi̱ nu̱ú xi̱kuni̱ndi̱ ku̱ʼu̱nndi̱, ta iin ña̱ xi̱sakúsi̱í-inii̱ ñuu kán, kúú ña̱ xi̱nitáʼi̱n xíʼin iin ñá hermana ñá naní Linda Cole, tá ni̱ya̱ʼa tiempo ni̱xa̱a̱ñá ndu̱uñá ñá síʼi̱.

Ñá Linda xi̱kutóoníñá natúʼunñá xa̱ʼa̱ Ndióxi̱ ta saátu xi̱kuumiíñá revisita. Ñáyóʼo va̱ʼaní ni̱xi̱yo iniñá ta saátu va̱ʼaní xi̱kitáʼanñá xíʼin na̱ yiví. Siʼíñá xi̱naníñá Goldie ta nda̱kúní ni̱xi̱yo iniñá xíʼin Jehová. Tá xa̱ʼa̱, yiváñá ta̱ Allen ni̱xi̱yora contra xíʼin na̱ testigo Jehová. Ni ni̱xi̱yora contra, ñá Goldie xi̱niʼiñá ñá Linda, ta̱ John xíʼin ta̱ Gordon ki̱ʼvañá ña̱ xi̱xaʼa̱nna reunión ta saátu sa̱náʼa̱ñána ndáa ki̱ʼva natúʼunna xíʼin na̱ yiví. U̱ni̱ saá na̱yóʼo xi̱kuuna precursor. Tá ni̱ya̱ʼa ku̱i̱ya̱, yiváñá ta̱ Allen nda̱kuchira ta ki̱xáʼara kéʼéra ku̱a̱ʼá chiñu ti̱xin congregación.

Tá ku̱i̱ya̱ 1965, ka̱nana yi̱ʼi̱ ña̱ ku̱ʼi̱n Escuela del Ministerio del Reino. Escuela yóʼo chí Betel ña̱ ñuu Canadá ni̱xi̱yoña ta iin yo̱o̱ ni̱xi̱yoñá. Ti̱xin escuela kán ni̱ka̱ʼa̱nna xíʼi̱n ña̱ ná sandákutúi̱n iin solicitud ña̱ va̱ʼa ku̱ʼi̱n Galaad. Kǒo níndakanixi̱níi̱ ña̱ ku̱ʼi̱n escuela kán, saáchi nda̱kanixi̱níi̱ ña̱ kǒo kuchiñui̱ soo nisaá sa̱ndákutúvai̱ solicitud. Ka̱nana yi̱ʼi̱ ña̱ ni̱xi̱yoi̱ clase número 42. Ta ti̱xin escuela ña̱ Galaad xi̱kaʼa̱nna xíʼin iin tá iinndi̱ ndáa ki̱ʼva ku̱a̱ʼa̱nndi̱. Ña̱ nu̱ú ña̱ ni̱ka̱ʼa̱nna xíʼi̱n kúú ña̱ ná sakúaʼa va̱ʼi̱ xa̱ʼa̱ na̱ ñuu Ndióxi̱. Va̱ʼaní consejo ta̱xina ndaʼi̱ tá xi̱kuumiíi̱ 21 ku̱i̱ya̱.

Iin ña̱ sa̱kuaʼi̱ ti̱xin escuela ña̱ Galaad kúú, ndáa ki̱ʼva natúʼunndi̱ xíʼin na̱ tává periódico, na̱ ndáka̱tu̱ʼun ña̱ yáʼa nu̱ú tele xíʼin radio. Ku̱tóoníi̱ ña̱ sa̱kuaʼi̱ yóʼo ta va̱ʼaní chi̱ndeétáʼanña xíʼi̱n. Ná ka̱ʼa̱nkai̱ xíʼinndó xa̱ʼa̱ ña̱yóʼo.

CHI̱NDAʼÁNA YI̱ʼI̱ CHÍ SENEGAL

Tándi̱ʼi ka̱ʼvindi̱ escuela yóʼo, chi̱ndaʼána yi̱ʼi̱ xíʼin ta̱ Michael Höhle ña̱ koondi̱ misionero chí Senegal, país ña̱ ndíkaa̱ chí África. Tiempo saá ki̱ʼva 100 na̱ publicador ni̱xi̱yo ñuu kán.

Tá ni̱ya̱ʼa loʼo yo̱o̱, ni̱ka̱ʼa̱nna xíʼi̱n ña̱ kachíñui̱ iin ki̱vi̱ ti̱xin semana Betel ña̱ ndíkaa̱ ñuu kán. Ta Betel kán, iin veʼe nu̱ú ni̱xi̱yo na̱ misionero ni̱xi̱yoña. Ni loʼoní ni̱xi̱yo veʼe kán, ta̱ hermano Emmanuel Paterakis ta̱ xi̱kiʼin kuenta xíʼinña, ndiʼi tiempo ni̱ka̱ʼa̱nra xíʼi̱n ña̱ veʼe loʼo kán xi̱ndanaʼa̱ña na̱ ñuu Ndióxi̱. Iin yichi̱ ni̱ka̱ʼa̱nra xíʼinndi̱ ña̱ ná kaʼyíndi̱ carta ña̱ ku̱ʼu̱n ndaʼa̱ ndiʼi na̱ misionero ña̱ va̱ʼa chikaa̱ndi̱ ndee̱ xíʼinna. Tiempo saá yaʼviní xi̱kiʼinna tá xi̱tavána copia, xa̱ʼa̱ ña̱kán xi̱xiniñúʼu kaʼyíndi̱ iin tá iin carta xíʼin máquina tú xi̱kaʼyí ndaʼa̱na. Ku̱a̱ʼání chiñu xi̱kuu ña̱yóʼo saáchi kǒo níxi̱kivi ndakatandi̱ letra tá va̱ása va̱ʼa níka̱ʼyi̱ña.

Míí ki̱vi̱ saá tá xa̱a̱ ndi̱ʼi ka̱chíñundi̱ tá xa̱a̱ ku̱nu̱mí ndikói̱ veʼi̱, ta hermano Paterakis ta̱xira iin carta ndaʼi̱ ta ni̱ka̱ʼa̱nra xíʼi̱n: “David, na̱ Betel chi̱ndaʼá ña̱yóʼo ndaʼún”. Tá xu̱nái̱ carta yóʼo, ki̱ʼii̱n kuenta ña̱ ka̱ʼyi miívai̱ kúúña. Ña̱yóʼo chi̱ndeétáʼanña xíʼi̱n ña̱ ixato̱ʼíi̱ na̱ ñuu Ndióxi̱ ni loʼo á káʼnu kúú Betel ña̱ kúúmií na̱ ñuu Ndióxi̱.

Ku̱a̱ʼání na̱ xi̱ñuʼu ti̱xin congregación ni̱xa̱a̱na ndu̱una migoi̱ ta ndiʼi sábado xi̱kuaá xi̱ndakutáʼanndi̱. Si̱íní ni̱xi̱yondi̱ ta nda̱a̱ vitin nátúʼun xíʼin táʼanndi̱. Xa̱ʼa̱ ña̱ sa̱kuaʼi̱ tu̱ʼun francés chí ñuu Senegal, chíndeétáʼanña xíʼi̱n tá xáʼi̱n xítoi̱ inka Betel nu̱ú káʼa̱nna tu̱ʼun francés.

Tá ku̱i̱ya̱ 1968, ni̱ka̱ʼi̱n xíʼin ñá Linda ña̱ tindaʼa̱ñá xíʼi̱n. Ku̱a̱ʼá yo̱o̱ ndu̱kúi̱ chiñu ña̱ va̱ʼa koondi̱ precursor chí ñuu Senegal. Soo empresa ña̱ ni̱xi̱yo ñuu kán, nda̱saa na̱ yiví ñuu kán xi̱taxina chiñu ndaʼa̱. Tándi̱ʼi ndi̱kói̱ chí Canadá, ti̱ndaʼa̱ndi̱ ta chi̱ndaʼána ndi̱ʼi̱ ña̱ va̱ʼa koondi̱ precursor especial ti̱xin iin ñuu loʼo ña̱ ndíkaa̱ chí Nueva Brunswick ña̱ naní Edmundston ta ña̱yóʼo xi̱kindo̱oña yatin chí Quebec.

TÁ XI̱KUUNDI̱ PRECURSOR CHÍ NUEVA BRUNSWICK XÍʼIN QUEBEC

Chí ñuu Edmundston loʼova na̱ yiví xi̱kaʼvi Biblia ta kǒo na̱ publicador níxi̱yo. Ku̱a̱ʼání na̱ yiví ñuu kán xi̱ndiku̱nna ña̱ kéʼé na̱ veʼe-ñu̱ʼu. Ku̱a̱ʼání veʼe xi̱kuumiíña letrero nu̱ú xi̱kaʼa̱nña: “Va̱ása kúni̱ndi̱ ña̱ ná kixi na̱ testigo Jehová”. Tiempo saá va̱ása ní xi̱ ixato̱ʼóna ña̱ xi̱kaʼa̱n letrero kán, xa̱ʼa̱ ña̱kán va̱ása níxi̱kandíxavíndi̱ ña̱ xi̱kaʼa̱nña ta xi̱kanindaʼa̱ndi̱ yéʼé na̱ yiví. Ndiʼi semana na̱ veʼe-ñu̱ʼu católico xi̱kaʼa̱nna nu̱ú periódico ña̱yóʼo: “Ná ku̱ʼu̱nyó nandukúyó ta sandíʼi-xa̱ʼa̱yó na̱ testigo Jehová”. Ñuu kán ku̱mí kuitíva na̱ testigo Jehová ni̱xi̱yo, ta̱ Victor xíʼin ñá Velda Norberg, ñá Linda xíʼin yi̱ʼi̱. Ña̱kán ku̱ndaa̱va-inindi̱ ndáana xi̱kaʼa̱nna xa̱ʼa̱.

Ndákaʼíi̱n tá ni̱xa̱ʼa̱n ta̱ superintendente ña̱ circuito xi̱tora ndi̱ʼi̱ ña̱ yichi̱ nu̱ú. Tá ni̱ya̱ʼa iin semana ni̱ka̱ʼa̱nra ña̱yóʼo xíʼinndi̱: “Nani íyondó yóʼo, ña̱ kivi keʼéndó kúú ña̱ chindeétáʼanndó xíʼin na̱ yiví ña̱ nasamana ña̱ ndákanixi̱nína xa̱ʼa̱ na̱ testigo Jehová”. Chi̱kaa̱-inindi̱ ña̱ keʼéndi̱ ña̱yóʼo ta na̱ yiví loʼo tá loʼo ku̱ndaa̱-inina ña̱ va̱ʼaníva ini na̱ testigo Jehová nu̱ú na̱ católico. Ta vitin íyo iin congregación loʼo chí Edmundston.

Ki̱ʼva iin ku̱i̱ya̱ ni̱xi̱yondi̱ ñuu kán ta ni̱ka̱ʼa̱nna xíʼinndi̱ ña̱ ná ku̱ʼu̱nndi̱ iin congregación ña̱ ndíkaa̱ chí Quebec. I̱ñu̱ yo̱o̱ ni̱xi̱yondi̱ xíʼin na̱ hermano ñuu kán ta va̱ʼaní-inina. Tándi̱ʼi ni̱ka̱ʼa̱nna xíʼi̱n ña̱ koi̱ superintendente.

14 ku̱i̱ya̱ xi̱kui̱ superintendente ña̱ circuito chí Quebec. Chí ñuu Quebec ku̱a̱ʼání na̱ yiví ki̱xáʼana sákuaʼana xa̱ʼa̱ Ndióxi̱. Tá xi̱xaʼa̱nndi̱ xi̱xitondi̱ na̱ congregación, ku̱a̱ʼání na̱ yiví ki̱xáʼana káʼvina Biblia ña̱ va̱ʼa koona testigo Jehová.

KǑO NÁNDOSÓ-INII̱ XA̱ʼA̱ CHIÑU ÑA̱ VA̱ʼANÍ KÉʼÉ NA̱ HERMANO

Na̱ hermano na̱ káʼa̱n tu̱ʼun francés na̱ íyo chí Canadá, si̱íní-inina ta va̱ʼaní-inina. Xi̱ ixayo̱ʼvi̱níña xíʼinna chi na̱ veʼena kǒo níxi̱taxina ña̱ sakúaʼana xa̱ʼa̱ Ndióxi̱. Ta sava na̱ va̱lí kúa̱an, ña̱yóʼo kúú ña̱ xi̱kaʼa̱n na̱ yivána xíʼinna: “Tá kǒo sándakoún ña̱ kaʼviún xíʼin na̱ testigo Jehová taxindi̱ yóʼo”. Soo na̱kán nda̱kúní ni̱xi̱yo inina ta sa̱kúsi̱ínína-ini Jehová.

Ta̱ʼán nandóso-inii̱ xa̱ʼa̱ na̱ precursor na̱ ni̱xi̱yo ñuu Quebec. Ku̱a̱ʼání na̱kán inka ñuu ki̱xina ta su̱ví nda̱saa tu̱ʼun francés xi̱xiniñúʼu sakúaʼana chi saátu xi̱xiniñúʼu ka̱a̱nna cultura ña̱ kúúmií na̱ yiví ñuu kán, ta kunda̱a̱-inina ndáa ki̱ʼva ndákanixi̱ní na̱ yiví na̱ xi̱kuu católico.

Tiempo saá xi̱chindaʼána na̱ precursor ñuu nu̱ú xíka kíndo̱o nu̱ú kǒo na̱ publicador íyo. Xa̱ʼa̱ ña̱ kǒo níxikuni̱ na̱ yiví na̱ testigo Jehová, xi̱ i̱xayo̱ʼvi̱ña xíʼinna ndukúna veʼe nu̱ú koona ta saátu ña̱ ndukúna chiñu ña̱ kachíñuna loʼo ki̱vi̱. Na̱ sa̱kán ti̱ndaʼa̱ xi̱xiniñúʼu koona xíʼin ku̱mí, i̱ñu̱ á nda̱a̱ u̱na̱ na̱ yiví ña̱ va̱ʼa kǒo ku̱a̱ʼá xu̱ʼún chaʼvina saáchi va̱ása níxi̱kivi koo miína inka veʼe. Ndiʼi na̱kán va̱ʼaní xi̱keʼéna chiñu nu̱ú Jehová, tá xi̱ndani̱ʼína iin na̱ yiví na̱ kúni̱ kaʼvi xi̱ndi̱ʼi̱ní-inina xa̱ʼa̱ na̱yóʼo. Tiempo vitin ku̱a̱ʼání na̱ publicador íyo chí Quebec, ku̱a̱ʼání na̱ precursor yóʼo ku̱a̱ʼa̱nna inka ñuu nu̱ú xíniñúʼukana na̱ natúʼun xa̱ʼa̱ tu̱ʼun Ndióxi̱.

Tá xi̱kui̱ superintendente ña̱ circuito, ndiʼi sábado xi̱ta̱a̱n xi̱keendi̱ xíʼin na̱ kúa̱an, ña̱ʼa va̱ʼa ka̱ʼa̱nna xíʼinndi̱ ndáa tu̱ndóʼo kúú ña̱ yáʼana nu̱ú. Tiempo vitin sava na̱yóʼo ku̱a̱ʼa̱nna sava país ta kúúna misionero, ta inkana kéʼéna inkaka chiñu nu̱ú Ndióxi̱.

Tiempo saá su̱ví ndiʼiví na̱ congregación níxi̱kivi taxi xu̱ʼún ndaʼa̱ndi̱ ña̱ va̱ʼa chaʼvindi̱ pasaje. Sava yi̱chi̱ tá xa̱a̱ ndi̱ʼi yo̱o̱ kǒoka xu̱ʼún níxi̱kuumiíndi̱, tá xi̱ndoʼondi̱ ña̱yóʼo xi̱ndaaní-inindi̱ Jehová chi iinlá ta̱yóʼo kúú tá xi̱xini̱ ndáaña kúú ña̱ xi̱xiniñúʼundi̱. Kǒo nísandákoo ndaʼa̱ra ndi̱ʼi̱ ta xi̱ndukúndi̱ ki̱ʼva ña̱ va̱ʼa xi̱xaʼa̱nndi̱ xi̱xitondi̱ inka congregación.

NA̱ HERMANO NA̱ NDA̱KÚNÍ-INI CHI̱NDEÉTÁʼANNA XÍʼI̱N

Nda̱a̱ táki̱ʼva ni̱ka̱ʼi̱n xíʼinndó chí Galaad sa̱kúaʼi̱ ndáa ki̱ʼva ka̱ʼi̱n xíʼin na̱ yiví na̱ ndáka̱tu̱ʼún miíndi̱. Chí Quebec na̱túʼunndi̱ xíʼin na̱ yiví na̱ tává periódico, na̱ káʼa̱n ti̱xin radio xíʼin tele. Ku̱a̱ʼá yi̱chi̱ ka̱chíñui̱ xíʼin ta̱ superintendente ta̱ naní Léonce Crépeault. Ta̱yóʼo va̱ʼaní xi̱ndakuiinra ña̱ xi̱nda̱ka̱tu̱ʼunna miíra, tá xi̱kaʼa̱nra xíʼin na̱ yiví na̱ ndáyáʼviní va̱ása ní xi̱ndanaʼa̱ra ña̱ xíni̱níra. Ta̱kán xi̱kaʼa̱nra xíʼinna: “Táta, na̱ ndásakáʼnu Ndióxi̱ kuitíva kúúndi̱, va̱ása xíni̱víndi̱ ka̱ʼa̱nndi̱ ti̱xin radio á nu̱ú tele. Soo ni̱ka̱ʼa̱nna xíʼindi̱ ña̱ ná natúʼunndi̱ xíʼin na̱ yiví ña̱ koo iin asamblea na̱ testigo Jehová, kusi̱íní-inindi̱ tá ná chindeétáʼún xíʼindi̱”. Xa̱ʼa̱ ña̱ viíní xi̱kaʼa̱nra xíʼinna ku̱a̱ʼánína chi̱ndeétáʼan xíʼinndi̱.

Ña̱ sa̱kuaʼi̱ escuela ña̱ Galaad xíʼin ña̱ sa̱náʼa̱ ta̱ Léonce miíi̱ va̱ʼaníva chíndeétáʼanña xíʼi̱n. Tá ni̱ka̱ʼa̱n na̱ Betel xíʼi̱n ña̱ kachíñui̱ xíʼin ta̱ hermano Glen How ta̱ kúú abogado, ta̱yóʼo xi̱kaʼa̱nra xa̱ʼa̱ ku̱a̱chi ña̱ kivi nda̱ka̱tu̱ʼún na̱ kéʼé noticia miíndi̱, ta̱yóʼo ndakúní ni̱xi̱yo inira chi xi̱ndakiʼinra tu̱ʼun na̱ ñuu Ndióxi̱ nu̱ú na̱ tribunal ta saátu xi̱kuʼvi̱ní-inira xi̱xinira Jehová.

Tá ku̱i̱ya̱ 1985 ni̱ka̱ʼa̱nna xíʼinndi̱ ña̱ ná ku̱ʼu̱nndi̱ kotondi̱ na̱ hermano chí oeste ña̱ Canadá, ña̱ va̱ʼa kundai̱ yivái̱ soo tá ni̱ya̱ʼa u̱ni̱ yo̱o̱ ni̱xi̱ʼi̱vara. Nda̱a̱ ku̱i̱ya̱ 1989 xi̱kuundi̱ na̱ superintendente ñuu kán, tasaá ni̱ka̱ʼa̱nna xíʼindi̱ ña̱ ná ku̱ʼu̱nndi̱ kachíñundi̱ ti̱xin Betel ña̱ ndíkaa̱ chí Estados Unidos. Ki̱ʼva 19 ku̱i̱ya̱ ni̱xi̱yoi̱ superintendente ta xi̱niñúʼu sandákoi̱ ña̱yóʼo. Tá xi̱kuundi̱ na̱ circuito ku̱a̱ʼání veʼe na̱ hermano ni̱xi̱yondi̱ ta̱ ku̱a̱ʼání ña̱ʼa ta̱xina xi̱xindi̱. Táxiníndi̱ tíxa̱ʼvi ndaʼa̱na xa̱ʼa̱ ña̱ va̱ʼaní-inina.

KU̱A̱ʼA̱NNDI̱ KOONDI̱ CHÍ ESTADOS UNIDOS

Tá ni̱xa̱a̱ndi̱ chí Brooklyn ni̱ka̱ʼa̱nna xíʼi̱n ña̱ ná kachíñui̱ xíʼin Departamento ña̱ Servicio. Táxiníi̱ tíxa̱ʼvi ndaʼa̱ na̱ sa̱náʼa̱ yi̱ʼi̱, ña̱ sa̱kuaʼi̱ yóʼo kúú ña̱ xíniñúʼu kunda̱a̱-inii̱ xa̱ʼa̱ ndiʼi ña̱ʼa ta va̱ása ndakanixi̱níi̱ ña̱ xa̱a̱ xínii̱ xa̱ʼa̱ ndiʼi ña̱yóʼo. Tá ku̱i̱ya̱ 1998 na̱samana miíi̱ Departamento ña̱ Redacción ta nda̱a̱ vitin sákuaʼakai̱ ku̱a̱ʼáka ña̱ʼa. Ku̱a̱ʼá ku̱i̱ya̱ chi̱ndeétáʼi̱n xíʼin ta̱ hermano John Barr ta̱ xi̱kuu coordinador ña̱ Comité ña̱ Redacción. Ndákaʼíi̱n xa̱ʼa̱ ndiʼi ña̱ sa̱náʼa̱ra yi̱ʼi̱ ndiʼi tiempo ña̱ ka̱chíñui̱ xíʼinra, va̱ʼaní xi̱na̱ʼa̱ra ña̱ xi̱ndiku̱nra yichi̱ ta̱ Jesús.

Kúsi̱íní-inii̱ káchíñui̱ xíʼin na̱ hermano ti̱xin Departamento ña̱ Redacción chi na̱yóʼo vitání-inina. Ndiʼi tiempo káʼa̱nna xíʼin Jehová ña̱ ná chindeétáʼanra xíʼinna ña̱ va̱ʼa sáxi̱nu̱na chiñura, ta kúnda̱a̱-inina ndiʼi ña̱ kéʼéna yóʼo espíritu santo Ndióxi̱ kúú ña̱ chíndeétáʼan xíʼinna ta su̱ví xa̱ʼa̱ ña̱ xíni̱nína kúú ña̱yóʼo.

Ñá Linda xíʼin miíi̱ xa̱a̱ 110 país xáʼa̱nndi̱ xítondi̱ na̱ hermano na̱ nda̱kúní íyo ini xíʼin Jehová. Ki̱ʼinndi̱ kuenta, na̱ misionero kúʼvi̱ní-inina xínina Jehová ta saátu kéʼé na̱ hermano na̱ íyo ti̱xin Betel xíʼin inka na̱ hermano na̱ nda̱kú íyo ini. Kúsi̱íní-inindi̱ saáchi ku̱a̱ʼání na̱ publicador, siʼnaka Reino Ndióxi̱ ndíʼi̱-inina xa̱ʼa̱ ta xíʼin ña̱ si̱í-ini kéʼéna ña̱yóʼo. Nda̱kú íyo inina ni íyo guerra ñuu nu̱ú íyona, ni kúma̱ní xu̱ʼún ndaʼa̱na á ni íxandi̱va̱ʼana xíʼinna. Kúni̱ní Jehová xínira na̱yóʼo.

Ñá Linda va̱ʼaní chíndeétáʼanñá xíʼi̱n ña̱ keʼíi̱ chiñu ña̱ kúúmiíi̱. Ñáyóʼo kúʼvi̱ní-iniñá xíniñá na̱ yiví ta ndúkúñá ki̱ʼva ña̱ chindeétáʼanñá xíʼinna. Ta̱ va̱ʼaní nátúʼunñá xíʼin na̱ yiví xa̱ʼa̱ Ndióxi̱. Ta saátu xa̱a̱ chíndeétáʼanñá xíʼin na̱ hermano na̱ ku̱xíká nu̱ú Jehová ña̱ ndikóna ti̱xin congregación. Táxiníi̱ tíxa̱ʼvi ndaʼa̱ Jehová xa̱ʼa̱ ña̱ ta̱xira ñá Linda ndaʼíi̱. Vitin ña̱ xa̱a̱ ku̱chéendi̱, táxiníi̱ tíxa̱ʼvi ndaʼa̱ na̱ hermano na̱ chíndeétáʼan xíʼinndi̱ (Mar. 10:29, 30).

Táxiníi̱ tíxa̱ʼvi ndaʼa̱ Ndióxi̱ ti̱xin 80 ku̱i̱ya̱ ña̱ xa̱a̱ chíndeétáʼanra xíʼi̱n. Ndóʼi̱ nda̱a̱ táki̱ʼva ka̱chi ta̱ salmista tá ka̱chira: “Ndióxi̱ miíi̱, nda̱a̱ tá loʼovíi̱ sánáʼún yi̱ʼi̱, ta nda̱a̱ vitin káʼa̱nkai̱ xa̱ʼa̱ ña̱ʼa ña̱ ndáyáʼviní kéʼún” (Sal. 71:17). Ta ña̱yóʼo kúú ña̱ kúni̱i̱ keʼíi̱ naní tákukai̱.