Ndóʼó na̱ xa̱a̱ ti̱ndaʼa̱ chikaa̱ndó ndee̱ ña̱ viíka kutáʼanndó

1. ¿Nda̱chun iin regalo Jehová kúú na̱ migoyó?

NA̱ KÚÚ migoyó iin regalo ña̱ táxi Jehová ndaʼa̱yó kúú na̱yóʼo (Sant. 1:17). Kúʼvi̱-inina xínina miíra ta saátu miíyó, tá kúsi̱í-iniyó nda̱a̱ na̱kán kúsi̱í-ini. Sándi̱kona-iniyó tá kúsuchí-iniyó ta saátu táxina consejo ndaʼa̱yó tá xíniñúʼuyóña, nda̱kú íyo inina xíʼin Ndióxi̱ ta ndáa-iniyóna ta sákusi̱ína-iniyó (Prov. 27:9).

2. ¿Nda̱chun ndáyáʼviní chikaa̱ na̱ xa̱a̱ ti̱ndaʼa̱ ndee̱ ña̱ vií kutáʼanna? (Mateo 19:6).

² Na̱ xa̱a̱ ti̱ndaʼa̱ ndáyáʼviní chikaa̱na ndee̱ ña̱ va̱ʼa vií kutáʼanna. Va̱ása xíniñúʼu kuxíkána nu̱ú táʼanna chi ndiʼi tiempo xíniñúʼu chikaa̱na ndee̱ ña̱ vií kutáʼanna. Saáchi tá kǒo kéʼéna saá kivi kuni mitúʼunna, ndi̱ʼi-inina ta nda̱a̱ sa̱a̱na. Soo tá chíkaa̱na ndee̱ ña̱ vií kutáʼanna kusi̱íní-inina ta viíní kundoona (kaʼvi Mateo 19:6). Nu̱ú artículo yóʼo kotoyó ndáaña kúú ña̱ kivi keʼé ta̱ xa̱a̱ ti̱ndaʼa̱ xíʼin ñá xa̱a̱ ti̱ndaʼa̱ ña̱ va̱ʼa viíka kutáʼanna. Soo siʼna kunda̱a̱-iniyó ndáaña kivi chindeétáʼan xíʼin iin ta̱ cristiano ta̱ kúa̱an ña̱ va̱ʼa vií ndaka̱xinra ñá kitáʼan xíʼinra ndiʼi tiempo.

NDÁA KI̱ʼVA NDAKA̱XINYÓ NA̱ KITÁʼAN XÍʼINYÓ NDIʼI TIEMPO

3, 4. ¿Ndáaña kivi chindeétáʼan xíʼinyó ña̱ ndani̱ʼíyó iin na̱ va̱ʼa tindaʼa̱ xíʼinyó? (Proverbios 18:22).

³ Sava ña̱ ndáka̱xinyó keʼéyó kivi sáxo̱ʼvi̱ña miíyó ndiʼi tiempo á va̱ása. Ña̱kán ná ndakani vií xi̱niyó tá kuma̱níka ndaka̱xinyó keʼéyó iin ña̱ʼa. Ná ka̱ʼa̱nyó xa̱ʼa̱ ndáaña kivi kundoʼoyó xíʼin ña̱ va̱ása kivi kundoʼoyó.

⁴ Iin ña̱ ndáyáʼviní ndakani vií xi̱niyó xa̱ʼa̱ kúú ña̱ ndaka̱xinyó ndáana kúú na̱ tindaʼa̱ xíʼinyó. Saáchi na̱ koo xíʼinyó kúú na̱ kitáʼan xíʼinyó ndiʼi tiempo. Jehová kúú ta̱ chi̱ndúʼú xa̱ʼa̱ ña̱ tindaʼa̱na, ña̱kán ndáyáʼviní kundiku̱nyó yichi̱ra tá xa̱a̱ ndáka̱xinyó keʼéyó iin ña̱ʼa. Jehová kúni̱ra ña̱ ná ndani̱ʼíyó iin na̱ tindaʼa̱ xíʼinyó, saáchi kúnda̱a̱-inira ndáaña kúú ña̱ va̱ʼa ña̱ xíniñúʼuyó (kaʼvi Proverbios 18:22;a Is. 48:17, 18). Texto ña̱ va̱xi nu̱ú tu̱ʼunra kúú ña̱ kivi chindeétáʼan xíʼin iin ta̱ cristiano ña̱ ndani̱ʼíra iin ñá tindaʼa̱ xíʼinra.

5. ¿Nda̱chun ndáyáʼviní ndaka̱xinyó iin na̱ kúú testigo na̱ xa̱a̱ nda̱kuchi tindaʼa̱ xíʼinyó?

⁵ Tá nda̱kuchiyó ni̱xa̱a̱yó ndu̱uyó migo Jehová (Sal. 25:14). Ña̱kán tá kúni̱ún tindaʼún xíniñúʼu ndaka̱xiún iin na̱ kúú migo Jehová (1 Cor. 7:39). Tá saá ná keʼún na̱ʼún ña̱ íxato̱ʼún Jehová, ta kotoún na̱ tindaʼa̱ xíʼún nda̱a̱ táki̱ʼva iin bendición ña̱ táxira ndaʼún (Prov. 19:14). Tá ná tindaʼún xíʼin na̱ kǒo ndásakáʼnu Ndióxi̱, koo ku̱a̱ʼá tu̱ndóʼo nu̱ún (2 Cor. 6:14). Tá ná kakaún xíʼin iin na̱ kǒo kúú Testigo, na̱ʼún ña̱ va̱ása vií ndákanixi̱níún, saáchi sana ndakanixi̱níún ña̱ kǒo nda̱a̱ ni iin na̱ Testigo kivi tindaʼa̱ xíʼún. Ta saátu va̱ása va̱ʼa ndakanixi̱níún tá ná ya̱ʼa tiempo xa̱a̱va na̱ yiví kán ndasakáʼnuna Ndióxi̱.

6, 7. ¿Ndáaña kivi nda̱ka̱tu̱ʼún miíún tá kúni̱ún xa̱ún kunitáʼún xíʼin iinna?

⁶ Kǒo ndakanixi̱níún ña̱ xa̱a̱ nda̱kuchi iin na̱ yiví kiviva xa̱ún tindaʼún xíʼinna. Tá kúni̱ún xa̱ún kuniún iinna nda̱ka̱tu̱ʼún ña̱yóʼo miíún: “¿Ndáa ki̱ʼva kéʼéna xíʼin na̱ veʼena? ¿Á to̱ʼó inina ta saátu á vií kéʼéna xíʼin inkana? ¿Ndáa na̱ yiví kúú na̱ migona? ¿Ndáa ki̱ʼva kéʼéna tá va̱ása kíndo̱o-inina xíʼin iin ña̱ʼa? ¿Á kúni̱na keʼéna ña̱ kúni̱ miína á kíndo̱ova-inina xíʼin ña̱ káʼa̱n inkana soo kǒo yáʼandosoña ña̱ káʼa̱n Biblia? ¿Ndáa ki̱ʼva ndákanixi̱nína xa̱ʼa̱ xu̱ʼún?”.

⁷ Kivi nda̱ka̱tu̱ʼún ña̱yóʼo miíún: “¿Á náʼa̱na ña̱ kúʼvi̱-inina xínina Jehová? ¿Á chíkaa̱na ndee̱ ña̱ vií koo ña̱ kéʼéna?¿Á chindeétáʼanna xíʼi̱n ña̱ kachíñukai̱ nu̱ú Jehová? ¿Á inkáchi meta kúúmiíndi̱? ¿Á kivi xa̱a̱ndi̱ ña̱ viíní kutáʼanndi̱?” (Col. 3:9, 10). Ñá hermana kivi nda̱ka̱tu̱ʼunñá miíñá á ta̱kán kúú ta̱ kivi tindaʼa̱ xíʼinñá ta á kivi kuniʼira yichi̱ nu̱úñá ña̱ ndasakáʼnuñá Jehová (1 Cor. 11:3). Ta̱ hermano xíniñúʼu ndakanixi̱níra á kandíxa ñá tindaʼa̱ xíʼinra ña̱ ná kuniʼira yichi̱ nu̱úñá ni kúúra ta̱ yiví ku̱a̱chi. Ña̱ va̱ʼa ndakuiinna pregunta yóʼo xíniñúʼu ku̱a̱ʼá tiempo ya̱ʼa ña̱ va̱ʼa kunda̱a̱-inina xa̱ʼa̱ña. Ña̱kán nani kúúndó novio, chikaa̱ndó ndee̱ ña̱ va̱ʼa kunda̱a̱-inindó ndáa ki̱ʼva íyo iin tá iinndó.

8, 9. ¿Ndáaña chindeétáʼan xíʼin iin na̱ kúni̱ tindaʼa̱ ña̱ vií koo ña̱ ndaka̱xinna keʼéna á tindaʼa̱na á va̱ása? (Koto na̱ʼná).

⁸ Tá xa̱a̱ kúúndó novio, iin ña̱ va̱ʼa chindeétáʼan xíʼún ña̱ va̱ʼa vií koo ña̱ ndaka̱xiún keʼún kúú ña̱ kunda̱a̱-iniún ndáa ki̱ʼva ndixa íyo na̱ yiví kán. Nda̱ka̱tu̱ʼún inkana ndáaña ndákanixi̱nína xa̱ʼa̱na ta ndáaña va̱ʼa kúú ña̱ kúúmiína. Tá kúú, á vitá íyo inina, á va̱ʼa inina ta saátu á vií ndákanixi̱nína. Iin ñá hermana ñá íyo chí ñuu Guayana Francia ñá naní Sarah, ti̱ndaʼa̱ñá xíʼin ta̱ hermano ta̱ naní Daniel, káchiñá: “Ni̱nda̱ka̱tu̱ʼíi̱n savana ndáaña ndákanixi̱nína xa̱ʼa̱ ta̱ Daniel. Ni̱nda̱ka̱tu̱ʼíi̱n iin ta̱ precursor ta̱ va̱ʼaní xi̱kitáʼan xíʼinra, ni̱nda̱ka̱tu̱ʼíi̱n iin ta̱ anciano ta̱ xi̱ndika̱a̱ ti̱xin congregación nu̱ú xi̱ndika̱a̱ra, na̱ migondi̱ ta saátu ná hermana ná xi̱ñuʼu ti̱xin congregaciónra”. Ta saátu kivi nda̱ka̱tu̱ʼúnna ndáaña kúú ña̱ ke̱ʼéna tá ya̱chi̱ ta saátu ña̱ kéʼéna vitin ña̱ kivi kunda̱a̱-iniún xa̱ʼa̱, saáchi kivi koo ña̱ kivi taxi tu̱ndóʼo ndaʼa̱ndó tá xa̱a̱ ná tindaʼa̱ndó.

⁹ Tá íyo iin ña̱ xíka-iniún xa̱ʼa̱ na̱ yiví kán, á ña̱ ni̱ka̱ʼa̱n iin na̱ migoún xíʼún ña̱ íyo iin ña̱ va̱ása va̱ʼa kéʼé na̱ yiví kán túvina, kiʼin va̱ʼa kuenta xíʼin ña̱ káʼa̱nna. Ña̱yóʼo chindeétáʼanña xíʼún á tindaʼún xíʼin na̱ yivá kán á va̱ása.b Vitin ka̱ʼa̱nyó ndáaña kivi keʼé na̱ xa̱a̱ ti̱ndaʼa̱ ña̱ va̱ʼa viíka kutáʼanna.

TAVANDÓ TIEMPO ÑA̱ KOO XÍʼIN TÁʼANNDÓ

10. Na̱ xa̱a̱ ti̱ndaʼa̱, ¿nda̱chun ndáyáʼviní tavána tiempo ña̱ koo xíʼin táʼanna?

¹⁰ Na̱ xa̱a̱ ti̱ndaʼa̱ xíniñúʼu tavána tiempo ña̱ koo xíʼin táʼanna ni íyoní chiñu nu̱úna. Chi ña̱yóʼo kúú ña̱ va̱ʼaní chindeétáʼan xíʼinna, tasaá kivi natúʼun táʼanna ndáaña kúú ña̱ ndákanixi̱nína á ña̱ ndóʼona, ta saátu na̱ʼa̱na ña̱ kúʼvi̱-inina xínitáʼanna ta inkáchi keʼéna ña̱ʼa ña̱ kútóona.

11. ¿Ndáaña kúú ña̱ i̱yo kivi kundoʼo na̱ xa̱a̱ ti̱ndaʼa̱?

¹¹ Tá vií kítáʼan na̱ xa̱a̱ ti̱ndaʼa̱ kuni̱kana ku̱a̱ʼáka tiempo koo xíʼin táʼanna nu̱úka ña̱ kuxíká nu̱ú táʼanna. Sava yichi̱ su̱ví ndiʼiví tiempo koo xíʼin táʼanna. Soo ña̱ ku̱a̱ʼání tiempo kuxíká nu̱ú táʼanna iin ña̱ i̱yo kúú ña̱yóʼo. Tá kúú, savana xáʼa̱nna káchíñuna inka país, ta ku̱a̱ʼání tiempo kúxíkána nu̱ú na̱ veʼena. Sana ku̱a̱ʼáva xu̱ʼún kuumiína saá, soo ña̱yóʼo kivi ndataʼvíña na̱ xa̱a̱ ti̱ndaʼa̱.

12, 13. a) ¿Ndáaña kéʼé sava na̱ ti̱ndaʼa̱ ña̱ va̱ʼa ku̱a̱ʼáka tiempo koona xíʼin táʼanna? (Koto na̱ʼná). b) ¿Nda̱chun ndáyáʼviní vií kutáʼanndó xíʼin na̱ ti̱ndaʼa̱ xíʼinndó? (Koto recuadro ña̱ naní “¿Á ndáyáʼviní ña̱ vií kutáʼi̱n xíʼin na̱ ti̱ndaʼa̱ xíʼi̱n?”).

¹² Ná kotoyó ndáaña xa̱a̱ kéʼé sava na̱ xa̱a̱ ti̱ndaʼa̱ ña̱ va̱ʼa ku̱a̱ʼá tiempo koo xíʼin táʼanna. Ñá Leah, ñá ñuu Guam, káchiñá: “Yiíi̱ xíʼin miíi̱ ku̱a̱ʼání ña̱ʼa inkáchi kútóondi̱ keʼéndi̱. Savaví yichi̱ xáʼa̱n iinlándi̱ nu̱ú kánana miíndi̱”. Ñá Roxanne, ñá ñuu Estados Unidos, káchiñá: “Ndiʼi tiempo íyoníva chiñu nu̱úndi̱, soo távándi̱ tiempo ña̱ koo xíʼin táʼanndi̱ nda̱a̱ táki̱ʼva kéʼéndi̱ xíʼin inka ña̱ʼa ña̱ ndáyáʼviní” (chitáʼanña xíʼin Amós 3:3). Iin ta̱ hermano ta̱ ñuu Francia ta̱ naní Damien káchira: “Kíʼinndi̱ kuenta ña̱ ndáyáʼviní kunda̱a̱-iniyó xíʼin ña̱ kútóo ñá síʼiyó á yii̱yó, saáchi tá yáʼa tiempo nda̱a̱ miíyó xáa̱ kútóo ña̱ kútóona” (Mat. 7:12). Ñá Katie, ñá ñuu Estados Unidos, káchiñá: “Sava yichi̱ táxi va̱ʼandi̱ celular ña̱ va̱ʼa ku̱a̱ʼá tiempo koo xíʼin táʼanndi̱”.

¹³ Tavándó tiempo ña̱ inkáchi keʼéndó chiñu nu̱ú Ndióxi̱. Ñá Myriam ñá ñuu Francia káchiñá: “Tá xi̱ta̱a̱n káʼvindi̱ Biblia, tándi̱ʼi káʼa̱nndi̱ xa̱ʼa̱ ña̱ ku̱tóokandi̱ ta saátu ndáa ki̱ʼva keʼéndi̱ ña̱ sa̱kuaʼandi̱. Tá kéʼéndi̱ ña̱yóʼo ndáyáʼviníña nu̱úndi̱”. Ñáyóʼo káchikañá: “Saátu kútóoníi̱ ña̱ inkáchi kéʼéndi̱ oración, saáchi saá xíniso̱ʼi̱ ña̱ káʼa̱n yiíi̱ ta kíʼii̱n kuenta ña̱ kúʼvi̱ní-inira xínira Jehová”. Ñá Katie ñá xa̱a̱ ni̱ka̱ʼa̱nyó xa̱ʼa̱ káchiñá: “Ña̱ kútóokandi̱ keʼéndi̱ kúú ña̱ inkáchi natúʼunndi̱ xíʼin na̱ yiví xa̱ʼa̱ Ndióxi̱. Va̱ʼaníka xáa̱ndi̱ kítáʼanndi̱ tá xíniso̱ʼondi̱ ña̱ káʼa̱n na̱ ti̱ndaʼa̱ xíʼindi̱ xa̱ʼa̱ Jehová ta ku̱a̱ʼání ña̱ʼa kúnda̱a̱-inindi̱ xa̱ʼa̱ táʼanndi̱” (Prov. 27:17).

NDIʼI TIEMPO KOO XÍʼIN TÁʼANNDÓ NI ÍYO TU̱NDÓʼO NU̱ÚNDÓ

14, 15. Na̱ xa̱a̱ ti̱ndaʼa̱, ¿nda̱chun xíniñúʼu chikaa̱na ndee̱ ña̱ ndasaviína tu̱ndóʼo ña̱ kúúmiína? Ka̱ʼa̱n xa̱ʼa̱ iin ejemplo.

¹⁴ Na̱ ti̱ndaʼa̱ xa̱ʼa̱ ña̱ kúúna na̱ yiví ku̱a̱chi ya̱ʼavana nu̱ú tu̱ndóʼo. Biblia káxiní káʼa̱nña na̱ xa̱ʼa̱ ti̱ndaʼa̱ “koo tu̱ndóʼo nu̱úna” (1 Cor. 7:28). Nda̱a̱ na̱ xa̱a̱ ti̱ndaʼa̱ na̱ va̱ʼaní kítáʼan koova tu̱ndóʼo nu̱úna. Tá ndóʼo na̱ xa̱a̱ ti̱ndaʼa̱ ña̱yóʼo xíniñúʼu chikaa̱na ndee̱ ña̱ ndasaviína ku̱a̱chi ta vií kutáʼanna. ¿Nda̱chun ndáyáʼviní keʼéna saá?

¹⁵ Tá ku̱a̱ʼa̱n ndíʼi-xa̱ʼa̱ iin veʼe ña̱ ndáyáʼviní, sana na̱ kúú kuenta xíʼin veʼe kán ndi̱ku̱n ndásaviínaña. Sana ku̱a̱ʼání xu̱ʼún xíʼin tiempo kuniñúʼuna ña̱ va̱ʼa sandáʼanaña. ¿Nda̱chun sandáʼanaña? Saáchi ndáyáʼviní veʼe kán nu̱úna. Saátu na̱ ti̱ndaʼa̱ ndáyáʼvinína. Nda̱a̱ táki̱ʼva kivi ndaʼa iin veʼe ña̱ ku̱a̱ʼa̱n ndíʼi-xa̱ʼa̱, saátu na̱ ti̱ndaʼa̱ na̱ kúúmií tu̱ndóʼo kiviva ndasaviína ku̱a̱chi ña̱ kúúmiína. Xíniñúʼu chikaa̱na ndee̱ ña̱ ndasaviína ku̱a̱chi soo Jehová kusi̱íníva-inira tá ná keʼéna ña̱yóʼo ta saátu ña̱ vií kutáʼanna (Mal. 2:16). Saá kúú ña̱ náʼa̱na ña̱ kúʼvi̱-inina xíni táʼanna ta íxato̱ʼó táʼanna ta saátu íxato̱ʼóna Jehová, ta̱ chi̱ndúʼú xa̱ʼa̱ ña̱ tíndaʼa̱na.

16. Nda̱a̱ táki̱ʼva káʼa̱n 1 Corintios 13:4-8a, ¿ndáaña chindeétáʼan xíʼin na̱ xa̱a̱ ti̱ndaʼa̱ tá kúúmiína iin tu̱ndóʼo ndeé? (Koto na̱ʼná ta saátu recuadro ña̱ naní “Ña̱ chindeétáʼan xíʼinndó ña̱ viíníka kutáʼanndó xíʼin na̱ ti̱ndaʼa̱ xíʼinndó”).

¹⁶ Tá yáʼandó nu̱ú tu̱ndóʼo, va̱ása ndi̱ku̱n kuxíkándó nu̱ú táʼanndó (1 Cor. 7:10, 11). Ndakanixi̱ní xa̱ʼa̱ ña̱yóʼo: “¿Ndáaña kivi keʼíi̱ ña̱ va̱ʼa viíka kutáʼi̱n xíʼin na̱ ti̱ndaʼa̱ xíʼi̱n?”. Kaʼvi ña̱ káʼa̱n Biblia xa̱ʼa̱ ña̱ ku̱ʼvi̱-inindó kuni táʼanndó ta ndakanixi̱ní ndáa ki̱ʼva viíka keʼún sava ña̱ va̱xi nu̱ú 1 Corintios 13:4-8a (kaʼviña). Nu̱úka ña̱ ndakanixi̱níún ña̱ sandákoo táʼanndó, va̱ʼaka ndakanixi̱ní ndáa ki̱ʼva kivi na̱ʼún ña̱ kúʼvi̱-iniún xíniún ñá síʼún á yii̱ún. Ndakanixi̱ní xa̱ʼa̱ ña̱ kivi keʼún ña̱ va̱ʼa nduvií ku̱a̱chi ña̱ kúúmiíndó. Ka̱ʼa̱n xíʼin Jehová ña̱ ná chindeétáʼanra xíʼún. Nandukú ña̱ kivi chindeétáʼan xíʼún nu̱ú tutu ña̱ tává na̱ ñuu Ndióxi̱ xíʼin video. Ndukú consejo nu̱ú na̱ anciano xíʼin inka na̱ hermano na̱ xa̱a̱ xu̱xa-ini xíʼin tu̱ʼun Ndióxi̱. Na̱ ndásakáʼnu Ndióxi̱ na̱ xa̱a̱ ti̱ndaʼa̱ íyona nda̱a̱ táki̱ʼva íyo yoʼo̱ ña̱ u̱ni̱ kítáʼan, ta Jehová kúú yoʼo̱ ña̱ ndakúníka ña̱kán tá u̱vi̱ saána ndáa-ininara va̱ása taʼví táʼanna (Ecl. 4:12).

17. ¿Ndáa ki̱ʼva si̱í koo na̱ xa̱a̱ ti̱ndaʼa̱ ta saátu na̱ kúni̱ tindaʼa̱?

¹⁷ Jehová kúni̱ra ndiʼi na̱ ndásakáʼnu miíra si̱í ná koona, nda̱a̱ na̱ kúni̱ tindaʼa̱ xíʼin na̱ xa̱a̱ ti̱ndaʼa̱. Tá íyo kúa̱ún ta kúni̱ún tindaʼún, vií va̱ʼa ndaka̱xiún na̱ tindaʼa̱ xíʼún, chi na̱kán koo xíʼún ndiʼi tiempo. Tá xa̱a̱ ti̱ndaʼún, chikaa̱ ndee̱ ña̱ viíka kutáʼanndó ta chikaa̱ndó ndee̱ ña̱ ndasaviíndó ku̱a̱chi ña̱ kúúmiíndó ta ndiʼi tiempo kundaa-inindó Jehová. Tá saá ná keʼún, si̱íní koún xíʼin yii̱ún á ñá síʼún (Ecl. 9:9).