¿Ndáa ki̱ʼva nda̱kú koo iniyó tá yáʼayó nu̱ú tu̱ndóʼo?

1, 2. ¿Ndáaña ku̱u tá sa̱náʼa̱ ta̱ Jesús chí Capernaúm?

“SU̱VÍ ña̱ va̱ʼa kúú ña̱ káʼa̱nra ¿ndáana kivi kuniso̱ʼo ña̱ káʼa̱nra?” (Juan 6:60). Ña̱yóʼo kúú ña̱ ni̱ka̱ʼa̱n ku̱a̱ʼání na̱ discípulo ta̱ Jesús tá xi̱niso̱ʼona ña̱ sa̱náʼa̱ra chí Capernaúm. Ña̱yóʼo ka̱chira: “Tá kǒo xíxindó ku̱ñu ta̱ kúú se̱ʼe ta̱a ta ni kǒo xíʼindó ni̱i̱ra va̱ása kutakundó”. Ta saátu ka̱chira: “Na̱ xíxi ku̱ñui̱ ta xíʼina ni̱íi̱ kutakuna ndiʼi tiempo, ta yi̱ʼi̱ sandátakui̱na kivi nu̱ú ndíʼi” (Juan 6:53, 54).

² Na̱ yiví kán ni̱sa̱a̱nína xa̱ʼa̱ ña̱ ni̱ka̱ʼa̱n ta̱ Jesús ta va̱ása níxiinkana kundiku̱nnara. Xa̱ʼa̱ ña̱ ke̱ʼéna yóʼo, ¿á kúni̱ kachiña ña̱ ni loʼo kǒo níxi̱kandíxanara? Savana xi̱kandíxavanara saáchi tá ke̱ʼéra iin milagro ni̱ka̱ʼa̱nna ña̱yóʼo xa̱ʼa̱ra: “Náʼa̱ káxi miívaña ta̱yóʼo kúú ta̱ Profeta ta̱ xi̱niñúʼu kixi ñuyǐví yóʼo” (Juan 6:14). Soo tá xi̱niso̱ʼona ña̱ ni̱ka̱ʼa̱nra va̱ása níkandíxakanara.

3. ¿Ndáaña ke̱ʼé na̱ apóstol xíʼin ña̱ ni̱ka̱ʼa̱n ta̱ Jesús ta nda̱chun? (Koto na̱ʼná).

³ ¿Ndáaña ke̱ʼé na̱ apóstol? Na̱yóʼo síínva ke̱ʼéna. Tá ni̱nda̱ka̱tu̱ʼun ta̱ Jesús miína á sandákoona miíra, ta̱ Pedro ka̱chira: “Táta, ¿ndáana ku̱ʼu̱nndi̱ nu̱ú? Yóʼó níʼi tu̱ʼun ña̱ taxi kutakuna ndiʼi tiempo. Ndi̱ʼi̱ kándíxandi̱ ta xíni̱ndi̱ yóʼó kúú ta̱ Santo ta̱ chi̱ndaʼá Ndióxi̱” (Juan 6:68, 69). Yóʼo kúnda̱a̱-iniyó ta̱ Pedro va̱ása níka̱ʼa̱nra ña̱ miíra xíʼin inkaka na̱ apóstol ku̱ndaa̱ káxi-inina xíʼin ña̱ ni̱ka̱ʼa̱n ta̱ Jesús xa̱ʼa̱ ña̱ kuxuna ku̱ñura xíʼin ña̱ koʼona ni̱i̱ra. Soo nisaá nda̱kú ni̱xi̱yo inina xíʼin ta̱ Jesús, ¿nda̱chun? Saáchi xi̱kandíxana ta Jesús kúú ta̱ Cristo ta̱ chi̱ndaʼá Ndióxi̱ (Luc. 9:20, 35).

4. ¿Ndáa prueba kivi kundoʼoyó xa̱ʼa̱ ña̱ nda̱kú íyo iniyó xíʼin Jehová?

⁴ Íyo ku̱a̱ʼáva prueba ña̱ kivi kundoʼoyó ta kivi ixayo̱ʼvi̱ña xíʼinyó ña̱ nda̱kú koo iniyó xíʼin Jehová. Ná ka̱ʼa̱nyó xa̱ʼa̱ sava ejemplo, sana na̱ ñuu Ndióxi̱ nasamana ki̱ʼva ña̱ xa̱a̱ kúnda̱a̱-iniyó xíʼin iin texto á nasamana ki̱ʼva ña̱ nátúʼunyó xíʼin na̱ yiví. Á kivi ixayo̱ʼvi̱ña xíʼinyó ña̱ kunda̱a̱-iniyó nda̱chun táxi Jehová ña̱ yáʼayó nu̱ú tu̱ndóʼo, á iin na̱ hermano na̱ kúni̱níyó xíniyó ni̱ka̱ʼa̱nna iin ña̱ sa̱xóʼvi̱ miíyó á iin na̱ íxato̱ʼóníyó va̱ása vií kéʼéna xíʼinyó. ¿Ndáaña keʼéyó tá ná kundoʼoyó nda̱a̱ ndáaka ña̱yóʼo?

5. Ka̱ʼa̱n xa̱ʼa̱ iin ejemplo nda̱chun ndáyáʼviní kandíxayó Ndióxi̱ (Colosenses 1:23).

⁵ Ña̱ va̱ʼa nda̱kú koo iniyó tá yáʼayó nu̱ú prueba xíniñúʼu kandíxaníyó Ndióxi̱. Tá kúú iin veʼe xíniñúʼu viíva̱ʼa keʼéna xa̱ʼa̱ña ña̱ va̱ʼa kǒo nduvaña tá ná ta̱an á tá ná kuun kini sa̱vi̱. Ki̱ʼva saá kivi keʼéyó tá yáʼayó nu̱ú prueba táʼan ña̱ xa̱a̱ ni̱ka̱ʼa̱nyó xa̱ʼa̱ nu̱ú párrafo ña̱ ni̱ya̱ʼa, xíniñúʼu kandíxaníyó Ndióxi̱. Ndáyáʼviní chikaa̱yó ndee̱ ña̱ kandíxaníyóra chi saá kúú ña̱ nda̱kú koo iniyó ya̱ʼayó nu̱ú nda̱a̱ ndáaka tu̱ndóʼo (1 Cor. 15:58; Kaʼvi Colosenses 1:23).

6. ¿Ndáaña chi̱ndeétáʼan xíʼin na̱ apóstol ña̱ nda̱kú ni̱xi̱yo inina xíʼin ta̱ Jesús?

⁶ ¿Ndáaña chi̱ndeétáʼan xíʼin na̱ apóstol ña̱ nda̱kú ni̱xi̱yo inina xíʼin ta̱ Jesús tá sa̱ndákoo inkana miíra? Xi̱kandíxana ña̱ iinlá Jehová xíniñúʼu ndasakáʼnuna xa̱ʼa̱ ña̱ ke̱ʼéra ndiʼi ña̱ʼa, ta ta̱ Jesús kúú se̱ʼera ta ta̱yóʼo kúú ta̱ níʼi tu̱ʼun ña̱ “taxi kutakuna ndiʼi tiempo”. Ta saátu xi̱kunda̱a̱-inina ña̱ xi̱kusi̱íva-ini Jehová xíʼin ña̱ xi̱keʼé ta̱ Jesús. Nu̱úka ña̱ ka̱ʼa̱nyó xa̱ʼa̱ ndiʼi prueba ña̱ kivi ya̱ʼayó nu̱ú xa̱ʼa̱ ña̱ kándíxayó Ndióxi̱, ña̱ ka̱ʼa̱nyó xa̱ʼa̱ kúú u̱ni̱ ña̱ʼa ña̱ chindeétáʼan xíʼinyó ña̱ kandíxaníyó Ndióxi̱ ta saátu chindeétáʼanña xíʼinyó ña̱ nda̱kú koo iniyó xíʼinra: 1) Jehová kúú ta̱ i̱xava̱ʼa ndiʼi ña̱ʼa, 2) tu̱ʼun mií Jehová kúú ña̱ va̱xi nu̱ú Biblia 3) Jehová chíndeétáʼanra xíʼin na̱ ñuura tiempo vitin. Tá xíʼin ndinuʼu-iniyó kándíxayó u̱ni̱ saá ña̱yóʼo kuchiñuvayó ya̱ʼayó nu̱ú nda̱a̱ ndáaka prueba.

JEHOVÁ KÚÚ TA̱ I̱XAVA̱ʼA NDIʼI ÑA̱ʼA

7. a) ¿Ndáaña sándakaʼán Apocalipsis 4:11 miíyó? b) ¿Ndáaña kivi kundoʼoyó tá xíka-iniyó xíʼin ña̱ káʼa̱n ña̱yóʼo?

⁷ (Kaʼvi Apocalipsis 4:11). Texto yóʼo sándakaʼánña miíyó Jehová kúú ta̱ i̱xava̱ʼa ndiʼi ña̱ʼa ta xa̱ʼa̱ ña̱kán xíniñúʼu ndasakáʼnuyóra. Tá ndákanixi̱níyó xa̱ʼa̱ ndee̱ ña̱ kúúmiíra, chíndeétáʼanña xíʼinyó ña̱ kandíxayó ña̱ chindeétáʼanvara xíʼinyó tá ná ya̱ʼayó nu̱ú tu̱ndóʼo. Soo ta̱ Ndi̱va̱ʼa chíkaa̱ra xi̱ní na̱ yiví ña̱ ná kaka-inina ña̱ kǒoví Ndióxi̱ íyo. Na̱ científico káʼa̱nna ña̱ kǒo na̱ ní ixava̱ʼa miíyó. Tá xíka-iniyó ña̱ su̱ví Jehová ní ixava̱ʼa ndiʼi ña̱ʼa ta kǒo kúʼvi̱-inira xínira miíyó, nda̱a̱ kivi ndakanixi̱níyó ña̱ kǒora íyo ta va̱ása chíndeétáʼanra xíʼinyó tá yáʼayó nu̱ú tu̱ndóʼo (Heb. 11:6).

8, 9. ¿Ndáaña kivi keʼún tá xíka-iniún ña̱ ndixa íyo Jehová? (Koto na̱ʼná).

⁸ Tá xíka-iniún ña̱ kǒo Jehová íyo, ¿ndáaña kivi keʼún? Nandukú nu̱ú tutu ña̱ tává na̱ ñuu Ndióxi̱ ña̱ káʼa̱n Ndióxi̱ kúú ta̱ i̱xava̱ʼa ndiʼi ña̱ʼa. Kivi ndani̱ʼún ku̱a̱ʼání ña̱ kivi chindeétáʼan xíʼún ña̱ kandíxakaún Ndióxi̱. Tá kúú, folleto ña̱ naní ¿Es la vida obra de un Creador? xíʼin ña̱ naní El origen de la vida. Cinco cuestiones dignas de análisis, saátu kivi ki̱ʼviún nu̱ú jw.org nu̱ú táʼví ña̱ naní “¿Á íyo iin na̱ i̱xava̱ʼaña?”. Iin ñá hermana ñá naní Jessica ñá íyo ñuu Estados Unidos, káchiñá: “Tá ka̱ʼvii̱ folleto ña̱ naní El origen de la vida, ki̱xáʼa kándíxakai̱ ña̱ íyova iin na̱ i̱xava̱ʼa ndiʼi ña̱ʼa. Xi̱kunda̱a̱va-inii̱ xa̱ʼa̱ ña̱yóʼo soo tándi̱ʼi ka̱ʼvi va̱ʼi̱ folleto yóʼo, va̱ása níxikaka-inii̱”. Libro ña̱ naní Kivi koo si̱íún vitin ta saátu chí nu̱únínu, lección 6 xíʼin 7, xa̱a̱ chíndeétáʼanña xíʼin ku̱a̱ʼání na̱ hermano. Sana xa̱a̱ ka̱ʼviún ndiʼi libro yóʼo soo kivi ndikó tukún kaʼviúnña.

⁹ Tá ná nandukún prueba ña̱ náʼa̱ ña̱ ndixa íyo Ndióxi̱, chindeétáʼanña xíʼún ña̱ kandíxaúnra ta saátu kunda̱a̱ va̱ʼa iniún ndáa ki̱ʼva íyo Jehová (Rom. 1:20). Ña̱ sákuaʼún kivi chindeétáʼanña xíʼún ña̱ chindeétáʼún xíʼin na̱ xíka-ini ña̱ va̱ása íyo Ndióxi̱. Ku̱a̱ʼání ña̱ʼa náʼa̱ Jehová nu̱úyó ña̱ va̱ʼa kandíxayó ña̱ ndixa íyora.

Nebulosa: IAC/RGO/David Malin Images; ti̱a̱ká xíʼin carro: Mercedes-Benz USA; avión: Kristen Bartlett/University of Florida

TU̱ʼUN JEHOVÁ KÚÚ ÑA̱ VA̱XI NU̱Ú BIBLIA

10. ¿Ndáaña ndákanixi̱níyó xa̱ʼa̱ Biblia? (2 Timoteo 3:16, 17).

¹⁰ (Kaʼvi 2 Timoteo 3:16, 17). Nu̱ú Biblia va̱xi tu̱ʼun Ndióxi̱ ña̱ kivi chindeétáʼan xíʼin na̱ yiví. Saátu ndákuiinña pregunta ña̱ ndáyáʼviní tá kúú, ¿ndáa ki̱ʼva ki̱xáʼayó tákuyó? ¿Ndáaña kúni̱ Ndióxi̱ ná keʼéyó? Tu̱ʼun Jehová kúú ña̱ va̱xi nu̱ú Biblia ña̱kán ndáyáʼviní libro yóʼo nu̱úyó. Ña̱kán chíkaa̱yó ndee̱ ña̱ kunda̱a̱-iniyó xíʼin ña̱ káʼa̱nña ta keʼéyó ña̱ sákuaʼayó.

11. ¿Nda̱chun kándíxaún tu̱ʼun Ndióxi̱ kúú ña̱ va̱xi nu̱ú Biblia?

¹¹ ¿Nda̱chun kándíxayó tu̱ʼun Jehová kúú ña̱ va̱xi nu̱ú Biblia? Íyo ku̱a̱ʼání ña̱ chíndeétáʼan xíʼinyó ña̱ kandíxayó ña̱ káʼa̱nña. Tá kúú, Biblia káxiní káʼa̱nña xa̱ʼa̱ iin ña̱ʼa ña̱ xa̱a̱ ku̱u (Luc. 3:1, 2). Ta saátu káxiní káʼa̱nña xa̱ʼa̱ ña̱ʼa ña̱ íyo nu̱ú ñuʼú yóʼo (Job 26:7). Ña̱yóʼo kúú iin libro ña̱ kúúmií ku̱a̱ʼání na̱ yiví ta xa̱a̱ ku̱a̱ʼání nu̱ú tu̱ʼun sa̱ndáya̱ʼanaña ni xi̱kuni̱ ta̱ Ndi̱va̱ʼa sandíʼi-xa̱ʼa̱raña. Ni 40 na̱ ta̱a ka̱ʼyiña ta ti̱xin 1,600 ku̱i̱ya̱ sa̱ndíʼina ka̱ʼyinaña, va̱ása nása̱ma ña̱ káʼa̱nña. Nani tá ni̱ka̱ʼyi̱ña, consejo ña̱ va̱xi nu̱úña xa̱a̱ chíndeétáʼanña xíʼin ku̱a̱ʼání na̱ yiví nda̱a̱ tiempo vitin (Prov. 13:20; 15:21; Mat. 7:12). Ta saátu ku̱a̱ʼání profecía ña̱ va̱xi nu̱úña xa̱a̱ xínuña (Jos. 23:14). Xa̱ʼa̱ ña̱kán kándíxayó tu̱ʼun Ndióxi̱ kúú ña̱ va̱xi nu̱ú Biblia.

12. ¿Ndáaña keʼéyó tá xíka-iniyó ña̱ va̱xi nu̱ú Biblia su̱ví tu̱ʼun Ndióxi̱ kúúña?

¹² Soo tá xíka-iniyó ña̱ su̱ví tu̱ʼun Ndióxi̱ kúú ña̱ va̱xi nu̱ú Biblia, ¿ndáaña keʼéyó? Ná ka̱ʼa̱nyó xíʼinra xa̱ʼa̱ ña̱yóʼo ta ná keʼéyó ña̱ xa̱ʼa̱ ni̱ka̱ʼa̱nyó xíʼinra. Ná kotoyó ña̱ káʼa̱n iin ta̱ loʼo ta̱ naní Jordan, ta̱yóʼo xa̱ʼnura ti̱xin ña̱ nda̱a̱. Ta̱yóʼo káchira: “Va̱ása ndi̱ku̱n kándíxai̱ ña̱ káʼa̱nna xíʼi̱n. Siʼna nándukúi̱ xa̱ʼa̱ña ña̱ va̱ʼa kunda̱a̱-inii̱ á ña̱ nda̱a̱ kúúña. Sava yichi̱ xíka loʼova inii̱ xa̱ʼa̱ ña̱yóʼo. Ña̱ kéʼíi̱ kúú ña̱ nándukú va̱ʼi̱ xa̱ʼa̱ ña̱ káʼa̱nna xíʼi̱n nu̱ú tutu ña̱ tává na̱ ñuu Ndióxi̱ ña̱ va̱ʼa kunda̱a̱-inii̱ xa̱ʼa̱ña”. Tá kándíxayó tu̱ʼun Jehová kúú ña̱ va̱xi nu̱ú Biblia, ña̱yóʼo chindeétáʼanña xíʼinyó ña̱ kandíxakayóra (1 Cor. 3:12, 13).

JEHOVÁ CHÍNDEÉTÁʼANRA XÍʼIN NA̱ ÑUURA TIEMPO VITIN

13. ¿Ndáaña keʼéyó tá xíka-iniyó á iinlá na̱ testigo Jehová kúú na̱ chíndeétáʼan Ndióxi̱ xíʼin?

¹³ Tá xíka-iniyó á iinlá na̱ testigo Jehová kúú na̱ chíndeétáʼan Ndióxi̱ xíʼin, ná ndakanixi̱níyó xa̱ʼa̱ pregunta yóʼo: “¿Ndáana kúú na̱ chíkaa̱ ndee̱ ña̱ kundiku̱nna ña̱ káʼa̱n Biblia? ¿Ndáa religión ndíku̱n ña̱ káʼa̱n tu̱ʼun Ndióxi̱? ¿Ndáana kéʼé ña̱ kúni̱ Jehová tiempo vitin?” (Mat. 7:20, 21; 2 Tim. 4:3, 4).

14. ¿Ndáa ki̱ʼva sáxi̱nu miíyó na̱ testigo Jehová ña̱ káʼa̱n Mateo 24:14?

¹⁴ Kúnda̱a̱-iniyó ña̱ kúni̱ Ndióxi̱ kúú ña̱ ná natúʼunyó xa̱ʼa̱ tu̱ʼun va̱ʼa iníísaá ñuyǐví tiempo nu̱ú ndíʼi vitin. Ña̱kán ná nda̱ka̱tu̱ʼunyó ña̱yóʼo miíyó: “¿Ndáana kéʼé chiñu yóʼo tiempo vitin?” (Mat. 24:14). Ña̱yóʼo náʼa̱ káxivaña. Jehová xíniñúʼura na̱ Testigo ña̱ va̱ʼa kéʼéna chiñu yóʼo. Iin miíyó kúú na̱ nátúʼun xa̱ʼa̱ Reino Ndióxi̱ yáʼaka 240 país xíʼin ñuu válí. Ta xa̱a̱ yáʼaka 100 ku̱i̱ya̱ kéʼéyó chiñu yóʼo. Ña̱ natúʼunyó xíʼin na̱ yiví xa̱ʼa̱ Ndióxi̱ ndáyáʼviníña nu̱úyó (Mat. 28:19, 20).

15. ¿Ndáa ki̱ʼva ndásayi̱i̱ miíyó na̱ testigo Jehová ki̱vi̱ Ndióxi̱? (Mateo 6:9; Isaías 43:10).

¹⁵ (Kaʼvi Mateo 6:9 xíʼin Isaías 43:10). Nu̱ú miíyó ndáyáʼviní ña̱ naníyó testigo Jehová. Kúsi̱íní-iniyó saáchi na̱ yiví ndákunina miíyó ña̱ níʼiyó ki̱vi̱ Ndióxi̱. Tiempo vitin ku̱a̱ʼání na̱ yiví va̱ása xíni̱na ki̱vi̱ Jehová, soo miíyó chi̱kaa̱yó ki̱vi̱ra nu̱ú Biblia nu̱ú xíniñúʼu kixiña. Yáʼaka 7,000 yichi̱ va̱xiña nu̱ú Biblia ña̱ Traducción del Nuevo Mundo.

16. ¿Nda̱chun káʼa̱nyó ña̱ miíyó na̱ testigo Jehová sáxi̱nuyó ña̱ káʼa̱n Juan 13:34, 35? (Koto na̱ʼná).

¹⁶ (Kaʼvi Juan 13:34, 35). Ñuyǐví yóʼo kininí íyoña ta na̱ yiví ndátaʼví táʼanna, soo miíyó na̱ ñuu Jehová kúʼvi̱ní-iniyó xínitáʼanyó ta inkáchi kítáʼanyó. Ni xa̱a̱ síín ñuu ke̱eyó, ni xa̱a̱ síín xa̱ʼnuyó, xíʼin cultura ña̱ kúúmiíyó soo chíkaa̱yó ndee̱ ña̱ vií kítáʼanyó ta kúʼvi̱-iniyó xínitáʼanyó. ¿Á xáʼún inka congregación, tá xáʼún inka ñuu? Nda̱a̱ ndáaka nu̱ú xáʼa̱nyó kíʼinyó kuenta na̱ ndásakáʼnu Ndióxi̱ viíní kítáʼanna ta kúʼvi̱-iniyó xínitáʼanyó. Ña̱yóʼo náʼa̱ña nu̱úyó ña̱ xíniñúʼu Jehová miíyó ña̱ va̱ʼa xi̱nu ña̱ kúni̱ra. Ña̱yóʼo chindeétáʼanña xíʼinyó ña̱ nda̱kú koo iniyó tá ná kixi prueba nu̱úyó.

NÁ KǑO SANDÁKOOYÓ JEHOVÁ

17, 18. ¿Ndáa prueba kivi ya̱ʼayó nu̱ú ta ndáaña kivi kachiyó?

¹⁷ Xa̱ʼa̱ ña̱ ndóoyó ki̱vi̱ nu̱ú ndíʼi, ndiʼivayó ya̱ʼa nu̱ú tu̱ndóʼo (2 Tim. 3:1, 13). Tá kúú, xíniñúʼu kundeé-iniyó ya̱ʼayó nu̱ú tu̱ndóʼo xa̱ʼa̱ ña̱ kándíxayó Ndióxi̱. Sana na̱ ñuu Ndióxi̱ keʼéna iin ña̱ʼa ña̱ kǒo kúnda̱a̱-iniyó xíʼin. Á sana túviyó ña̱ iin na̱ hermano ke̱ʼéna á ni̱ka̱ʼa̱nna iin ña̱ va̱ása va̱ʼa xíʼinyó. Á sana yáʼayó nu̱ú tu̱ndóʼo ta va̱ása xíni̱yó ndáaña keʼéyó á kǒo kúnda̱a̱-iniyó ndáa xa̱ʼa̱ kúú iin ña̱ʼa.

¹⁸ Ni yáʼayó nu̱ú tu̱ndóʼo ña̱ yo̱ʼvi̱ní, kiviva nda̱kú koo iniyó xíʼin Jehová ndiʼi tiempo ta kándíxayó ña̱ miíra kúú ta̱ i̱xava̱ʼa ndiʼi ña̱ʼa, ta tu̱ʼun miíra kúú ña̱ va̱xi nu̱ú Biblia ta miíyó na̱ testigo Jehová kúúyó na̱ ñuura. Ta kivi ka̱ʼa̱nyó nda̱a̱ tá ki̱ʼva ni̱ka̱ʼa̱n ta̱ Pedro xíʼin ta̱ Jesús ta ka̱ʼa̱nyó ña̱yóʼo xíʼin Jehová: “¿Ndáana ku̱ʼu̱nndi̱ nu̱ú? Yóʼó níʼi tu̱ʼun ña̱ taxi kutakuna ndiʼi tiempo”.