Vií va̱ʼa ná kuniso̱ʼoyó ña̱ káʼa̱nna ti̱xin reunión

1, 2. a) ¿Ndáaña táxi Jehová ndaʼa̱yó tiempo vitin? (Salmo 23:1, 2, 5). b) ¿Ndáaña ka̱ʼa̱nyó xa̱ʼa̱ nu̱ú artículo yóʼo?

TIEMPO vitin Jehová ku̱a̱ʼání ña̱ʼa táxira ndaʼa̱yó ña̱ va̱ʼa kuyatinkayó nu̱úra. Sana ndóʼoyó nda̱a̱ táki̱ʼva ndo̱ʼo ta̱ David tá xi̱tara: “Nda̱a̱ táki̱ʼva ndáa iin pastor ndikachi sa̱na̱ra saá ndáa Jehová yi̱ʼi̱. Kǒo kuma̱ní nda̱a̱ ni iin ña̱ʼa nu̱úi̱” (kaʼvi Salmo 23:1, 2, 5).a

² Iin ki̱ʼva ña̱ sánáʼa̱ Jehová miíyó kúú ña̱ xíniso̱ʼoyó ti̱xin reunión. Ti̱xin reunión yóʼo ku̱a̱ʼá yichi̱ xíniso̱ʼoyó ña̱ xa̱a̱ xíni̱yó xa̱ʼa̱. Ni xa̱a̱ nda̱kú íyo iniyó xíʼin Ndióxi̱ xíniñúʼuyó ña̱ sándakaʼánna miíyó xa̱ʼa̱ ña̱yóʼo (2 Ped. 1:12). ¿Á ixayo̱ʼvi̱ña xíʼinyó ña̱ vií va̱ʼa kuniso̱ʼoyó ña̱ xa̱a̱ xíni̱yó xa̱ʼa̱? Artículo yóʼo va̱ʼaní chindeétáʼanña xíʼinyó kunda̱a̱-iniyó ndáana kúú na̱ sánáʼa̱ miíyó tá xáʼa̱nyó reunión, ta saátu nda̱chun vií xíniñúʼu kuniso̱ʼoyó ña̱ káʼa̱nna, ta ndáaña xíniñúʼu keʼé na̱ táxi discurso ña̱ va̱ʼa chindeétáʼanna xíʼinyó ña̱ vií kuniso̱ʼoyó ña̱ káʼa̱nna, ta ndáaña kivi keʼéyó ña̱ va̱ʼa vií kuniso̱ʼoyó.

¿NDÁANA SÁNÁʼA̱ MIÍYÓ?

3. ¿Ndáa ki̱ʼva ka̱ʼa̱n Jehová xíʼinyó, ta ndáa ki̱ʼva xíniñúʼu na̱ hermano tu̱ʼunra?

³ Jehová káʼa̱nra xíʼinyó nu̱ú tu̱ʼunra ña̱ Biblia (2 Tim. 3:16, 17). Ta̱ Jesús xi̱xini̱ra ña̱yóʼo, xa̱ʼa̱ ña̱kán xi̱xiniñúʼura tu̱ʼun Ndióxi̱ ña̱ va̱ʼa sa̱náʼa̱ra ná yiví. Sava na̱ yiví yóʼo ka̱china: “¿Nda̱chun va̱ʼaní xíni̱ ta̱ ta̱a yóʼo xa̱ʼa̱ tu̱ʼun Ndióxi̱, ta kǒo níxa̱ʼa̱nra escuela?” (Juan 7:15). Sava na̱ yiví xi̱kutóonína kuniso̱ʼona ña̱ xi̱sanáʼa̱ ta̱ Jesús ña̱ va̱xi nu̱ú tu̱ʼun Ndióxi̱. Sava na̱ cristiano na̱ ni̱xi̱yo tá siglo nu̱ú tá kúú ta̱ Pablo xíʼin ta̱ Apolos, xi̱xiniñúʼunína tu̱ʼun Ndióxi̱ ña̱ va̱ʼa sanáʼa̱na inka na̱ yiví (Hech. 17:2, 3; 18:24, 28). Miíyó na̱ testigo Jehová nu̱ú Biblia kána ndiʼi tutu ña̱ xíniñúʼuyó, discurso ña̱ táxina, programa ña̱ JW Broadcasting® xíʼin video. Ku̱a̱ʼání na̱ yiví na̱ xáʼa̱n reunión ndákanda̱ní-inina chi ndiʼi tiempo xíniñúʼuyó Biblia. Na̱ yáʼa ti̱xin reunión xíniñúʼuna tu̱ʼun Ndióxi̱ ña̱ va̱ʼa sanáʼa̱na ta va̱ása káʼvi kuitínaña, chi saátu káʼa̱nna ndáa ki̱ʼva keʼéyó ña̱ va̱xi nu̱úña (Luc. 24:32).

4. ¿Ndáaña kúni̱ kachi ña̱ vií va̱ʼa kuniso̱ʼoyó?

⁴ Nu̱ú Biblia ku̱a̱ʼá yichi̱ va̱xi tu̱ʼun vií va̱ʼa kuniso̱ʼoyó, ta ña̱yóʼo kúni̱ ka̱chiña ña̱ keʼéyó ña̱ káʼa̱nña. Ti̱xin reunión Jehová káʼa̱nra xíʼinyó nu̱ú tu̱ʼunra, tá kúnda̱a̱-iniyó ña̱ káʼa̱nra xíʼinyó va̱ása ixayo̱ʼvi̱ña xíʼinyó keʼéyó ña̱ káʼa̱nra. Tá vií va̱ʼa xíniso̱ʼoyó ña̱ káʼa̱nna ti̱xin reunión ta kéʼéyó ña̱ káʼa̱nna kúsi̱íní-ini Jehová xíʼinyó (Prov. 27:11).

¿NDA̱CHUN XÍNIÑÚʼU VIÍ KUNISO̱ʼOYÓ TI̱XIN REUNIÓN?

5. ¿Ndáaña keʼéyó tá kúʼvi̱-iniyó xíniyó Jehová? (Juan 4:23, 24; 1 Juan 5:3).

⁵ Saáchi kúʼvi̱-iniyó xíniyó Jehová (Mat. 22:37). Tá sákuaʼakayó xa̱ʼa̱ Jehová kuʼvi̱ka-iniyó kuniyóra. Ña̱yóʼo chindeétáʼanña xíʼinyó ña̱ kuni̱kayó kuniso̱ʼoyó ña̱ káʼa̱nra ta ndasakáʼnuyóra nda̱a̱ táki̱ʼva kúni̱ miíra (kaʼvi Juan 4:23, 24; 1 Juan 5:3).

6. ¿Ndáaña sákuaʼayó ti̱xin reunión?

⁶ Saáchi kúʼvi̱-iniyó xíniyó na̱ yiví (Mat. 22:39). Ti̱xin reunión Jehová sánáʼa̱ra miíyó ña̱ chindeétáʼanyó xíʼin na̱ hermano ta saátu na̱ yiví na̱ kǒo xíni̱ xa̱ʼa̱ra. Tá kúú folleto ña̱ naní Sánáʼa̱yó na̱ yiví chi kúʼvi̱-iniyó xíniyóna, va̱ʼaní chíndeétáʼanña xíʼinyó ña̱ viíka natúʼunyó xíʼin na̱ yiví. ¿Á íxayo̱ʼvi̱ña xíʼinyó ña̱ vií natúʼunyó xíʼin na̱ yiví? Tasaá íyoña vií va̱ʼa kotoún ndáa ki̱ʼva yáʼana ti̱xin reunión ña̱ xíyo ma̱ʼñú semana.

7. ¿Nda̱chun ndáyáʼviní kuniso̱ʼoyó Jehová?

⁷ Saáchi kúni̱yó si̱í kooyó ndiʼi tiempo. Nda̱a̱ táki̱ʼva ni̱ka̱ʼa̱n Jehová xíʼin na̱ xi̱ndasakáʼnu miíra tiempo xi̱naʼá, xíniñúʼu kuniso̱ʼoyó ña̱ káʼa̱nra xíʼinyó nu̱ú tu̱ʼunra ña̱ va̱ʼa si̱í kooyó tiempo vitin ta kivi kutakuyó ndiʼi tiempo (Deut. 32:44-47). Tá vií va̱ʼa xíniso̱ʼoyó ña̱ káʼa̱nna ti̱xin reunión chikaa̱ña ndee̱ xíʼinyó ña̱ nda̱kú koo iniyó kundatuyó nda̱a̱ ná kixaa̱ ñuyǐví xa̱á (Rom. 8:25). Ndáyáʼviní kuniso̱ʼoyó Jehová tiempo nu̱ú ndíʼi vitin ta saátu ña̱ vií ná kutáʼanyó xíʼinra (Mat. 24:42-44; Apoc. 1:3).

NÁ CHINDEÉTÁʼANYÓ XÍʼIN INKANA ÑA̱ VIÍ KUNISO̱ʼONA

8. ¿Nda̱chun xíniñúʼu chikaa̱ na̱ hermano ndee̱ ña̱ viíka taxina discurso?

⁸ Na̱ hermano na̱ táxi discurso xíniñúʼu chikaa̱na ndee̱ ña̱ viíní sanáʼa̱na. Tá iin ta̱ hermano xa̱a̱ ya̱chi̱ka sákuaʼa kúeera discurso ña̱ taxira, ta kíʼinra kuenta ndiʼi ña̱ ka̱ʼa̱nra ná kixiña nu̱ú Biblia. Ña̱yóʼo kivi chindeétáʼanña xíʼin na̱ yiví ña̱ kunda̱a̱-inina xa̱ʼa̱ ña̱ nda̱a̱ ta saátu chindeétáʼanña xíʼin na̱ hermano ña̱ nda̱kúka koo inina xíʼin Ndióxi̱. Ndiʼi na̱ yáʼa ti̱xin reunión xíniñúʼu kiʼinna kuenta ndiʼi ña̱ káʼa̱nna kivi chindeétáʼanña xíʼin inkana. Tá yáʼún ti̱xin reunión kiʼi̱n kuenta ndáa ki̱ʼva kundiku̱ún ña̱ ka̱ʼa̱nyó xa̱ʼa̱ yóʼo. Na̱ ka̱ʼa̱nyó xa̱ʼa̱ yóʼo kúú na̱ táxi discurso soo saátu kivi chindeétáʼanña xíʼin ndiʼiyó nda̱a̱ ndáaka ña̱ táxiyó ti̱xin reunión (2 Tim. 4:2; Tito 1:9).

9. ¿Nda̱chun ndáyáʼviní káxi ta vií ná kutáʼan ndiʼi ña̱ ka̱ʼún xa̱ʼa̱?

⁹ Káxi na̱ koo ña̱ ka̱ʼún xa̱ʼa̱ ta vií ná kutáʼan ndiʼiña. Tá va̱ása káxi íyo ña̱ káʼún xa̱ʼa̱ sana va̱ása kunda̱a̱-inina xíʼin ña̱ káʼún. Tá kúni̱ún ña̱ viíní ná kuniso̱ʼona ña̱ ka̱ʼún, ¿ndáaña xíniñúʼu keʼún? 1) Tá kuma̱níka kixáʼún taxiún discurso ka̱ʼa̱n xíʼinna ndáaña ka̱ʼún xa̱ʼa̱. 2) Ka̱ʼa̱n xa̱ʼa̱ iin tá iinña, tá xa̱a̱ káʼún xa̱ʼa̱ iin tá iin punto ña̱ ndáyáʼvi, kivi kundatu loʼún ta ka̱ʼún xa̱ʼa̱ inka punto ña̱ ka̱ʼún xa̱ʼa̱. 3) Sándakaʼánna ña̱ ni̱ka̱ʼún xa̱ʼa̱ tá xa̱a̱ ná sandíʼún.

10. ¿Nda̱chun ndáyáʼviní kusi̱í-iniyó tá táxiyó discurso?

¹⁰ Kusi̱í-ini xíʼin ña̱ ka̱ʼún xa̱ʼa̱. Tá ndákanixi̱níún xa̱ʼa̱ texto ña̱ va̱xi nu̱ú ña̱ taxiún, ña̱yóʼo chindeétáʼanña xíʼún ña̱ ka̱ʼún xíʼin ña̱ si̱í-ini (Prov. 2:4, 5). Tá ná taxiún discurso va̱ása ixayo̱ʼvi̱ña xíʼún ña̱ ka̱ʼún xíʼinna (Hech. 4:20). Iin ta̱ hermano ta íyo chí Estados Unidos ta̱ kúúmií 70 ku̱i̱ya̱, tá ni̱xi̱yo loʼora xi̱niso̱ʼora iin discurso ña̱ ta̱ʼán nandóso-inira xa̱ʼa̱. Ta̱yóʼo káchira: “Ndákaʼíi̱n discurso ña̱ ta̱xi ta hermano kán va̱ʼaní chi̱kaa̱ña ndee̱ xíʼi̱n ña̱ ndakanixi̱níi̱ xa̱ʼa̱ ña̱ káʼa̱n Biblia. Káxiní ni̱ka̱ʼa̱nra ndáa ki̱ʼva keʼéyóña ta xíʼin ndinuʼu-inira ta̱xira discurso kán. Ku̱tóoníi̱ discurso ña̱ ta̱xira, chi̱ndeétáʼanníña xíʼi̱n ña̱ kaʼvii̱ Biblia ta saátu ña̱ vií kutáʼi̱n xíʼin Jehová”.

11. ¿Nda̱chun ndáyáʼviní ka̱ʼa̱nyó ndáaña kivi keʼé na̱ xíniso̱ʼo miíyó tá táxiyó discurso? (1 Timoteo 4:13-16).

¹¹ Ndakanixi̱ní ndáaña xíniñúʼu na̱ káʼún xíʼin ta ka̱ʼa̱n xíʼi̱na ndáaña kivi keʼéna. Nu̱úka ña̱ ka̱ʼún xa̱ʼa̱ ku̱a̱ʼání ña̱ʼa, kuniñúʼu tu̱ʼún Ndióxi̱ ña̱ va̱ʼa chika̱ún ndee̱ xíʼinna ta ndáaña kúú ña̱ kivi keʼéna. Tá kúú ta̱ apóstol Pablo ni̱ka̱ʼa̱nra xíʼin ta̱ Timoteo ndáaña xíniñúʼu keʼéra ña̱ viíka kutáʼanra xíʼin Ndióxi̱ tá xi̱ndikaa̱ra chi ñuu Éfeso (kaʼvi 1 Timoteo 4:13-16). Ña̱kán ndakanixi̱ní ndáa ña̱ʼa kúú ña̱ xíniñúʼu na̱ káʼún xíʼin ta káxi koo ña̱ ka̱ʼún xíʼinna xa̱ʼa̱ ña̱ kivi keʼéna.

12. ¿Nda̱chun ndáyáʼviní vií koo ña̱ ka̱ʼún tá táxiún discurso?

¹² Xa̱a̱ ya̱chi̱ka sakúaʼa kúeún discurso ña̱ taxiún, ta ná kooña nda̱a̱ táki̱ʼva íyo ta̱ nátúʼun xíʼinna. Chikaa̱ ndee̱ ña̱ vií va̱ʼa taxiún discurso ta ná va̱ása na̱ʼa̱ña ña̱ káʼviúnña. Tasaá na̱ xíniso̱ʼo yóʼó va̱ása ixayo̱ʼvi̱ña xíʼinna kunda̱a̱-inina xíʼin ña̱ káʼún ta ná chindeétáʼanña xíʼinna. Folleto ña̱ naní Sákuaʼaka ña̱ vií kaʼviún ta sanáʼún káchiña: “Xíʼin tu̱ʼun miíún ka̱ʼún xíʼinna ta ndinuʼu-iniún ka̱ʼún xíʼinna, na̱ʼa̱ nu̱úna nda̱saa túviún xíʼin ña̱ káʼún xa̱ʼa̱ xíʼinna”. Tá xíʼin ndinuʼu-iniún káʼún, viíníva koo discurso ña̱ taxiún ta chikaa̱ña ndee̱ xíʼinna.

13. Tá ná taxiyó iin discurso, ¿nda̱chun ndáyáʼviní ndukúyó consejo nu̱ú iin ta̱ va̱ʼaní táxiña? (Koto na̱ʼná).

¹³ Ndukú consejo nu̱ú iin ta̱ va̱ʼaní táxi discurso. Tá kúú, na̱ʼa̱ nu̱úra ña̱ ka̱ʼún xa̱ʼa̱ tasaá kaʼyiún ña̱ ka̱ʼa̱nra xíʼún. Ta ka̱ʼa̱n xíʼinra ná kotora ndáa ki̱ʼva táxiún discurso ta ná ka̱ʼa̱nra xíʼún ndáaña kivi keʼún ña̱ va̱ʼa viíka taxiúnña (Prov. 1:5). Su̱ví ndiʼiví tiempo kíʼinyó kuenta á káxi íyo ña̱ káʼa̱nyó, xa̱ʼa̱ ña̱kán xíniñúʼu ka̱ʼa̱nyó xíʼin iinna ná chindeétáʼanna xíʼinyó. Kúni̱yó viíníka ná koo discurso ña̱ taxiyó tasaá va̱ʼaní chindeétáʼanyó xíʼin na̱ xíniso̱ʼo miíyó ña̱ kunda̱a̱-inina xíʼin ña̱ káʼa̱n Biblia.b

¿NDÁAÑA CHINDEÉTÁʼAN XÍʼINYÓ ÑA̱ VIÍ KUNISO̱ʼOYÓ?

14. ¿Nda̱chun ndáyáʼviní kundiku̱nyó yichi̱ ta̱ ka̱ʼyi̱ Salmo 119? (Salmo 119:24, 111, 167).

¹⁴ Ña̱ káʼa̱nna ti̱xin reunión ná kundayáʼviña nu̱úyó chi Jehová kúú ta̱ sánáʼa̱ miíyó. Ña̱ va̱ʼa kundeé-iniyó ya̱ʼayó nu̱ú tu̱ndóʼo tiempo ña̱ yo̱ʼvi̱ ña̱ ndóoyó vitin, xíniñúʼuyó ña̱ chindeétáʼan Jehová xíʼinyó (2 Tim. 3:1). Tá túviyó ña̱ xa̱a̱ ku̱a̱ʼání yichi̱ xíniso̱ʼoyó ña̱ káʼa̱nna xíʼinyó, ná kundiku̱nyó yichi̱ ta̱ ka̱ʼyi̱ ña̱ Salmo 119, ta̱yóʼo ta̱xira tíxa̱ʼvi ndaʼa̱ Jehová xa̱ʼa̱ ña̱ ku̱a̱ʼání yichi̱ sa̱ndákaʼánra miíra (kaʼvi Salmo 119:24, 111, 167).c

15. ¿Ndáaña chindeétáʼan xíʼinyó ña̱ kundayáʼvi ña̱ sákuaʼayó ti̱xin reunión nu̱úyó?

¹⁵ Ña̱ va̱ʼa taxiyó tíxa̱ʼvi ndaʼa̱ Jehová xa̱ʼa̱ ña̱ sánáʼa̱ra miíyó, ná ka̱ʼa̱nyó xa̱ʼa̱ ña̱ ke̱ʼé na̱ israelita tá xi̱ñuʼuna nu̱ú ñuʼú yi̱chí. Tá ta̱xi Jehová maná xi̱xina, sana ta̱xinína tíxa̱ʼvi ndaʼa̱ra chi miíra ta̱xiña ndaʼa̱na ta xi̱chindeétáʼanña xíʼinna ña̱ kutakuna ta sana ya̱si̱nní ni̱xi̱yoña (Éx. 16:15, 31). Soo xa̱ʼa̱ ña̱ xi̱xixina maná ndiʼi ki̱vi̱ kǒo níkutóokana ña̱yóʼo (Núm. 21:5). Va̱ása kúni̱yó kundoʼoyó táki̱ʼva ndo̱ʼo na̱yóʼo xíʼin ña̱ táxi Jehová ndaʼa̱yó ti̱xin reunión. Ni ku̱a̱ʼá yichi̱ xíniso̱ʼoyó ña̱ xa̱a̱ xíni̱yó xa̱ʼa̱. Ná ndakaʼányó chi Jehová kúú ta̱ táxiña ndaʼa̱yó ta xíniñúʼura na̱ ñuura ña̱ va̱ʼa taxira ña̱yóʼo ndaʼa̱yó. Ta ña̱ sákuaʼayó chíndeétáʼanña xíʼinyó ña̱ vií ndakanixi̱níyó tasaá kutakuyó ndiʼi tiempo (Prov. 3:13, 16-18; Juan 17:3).

16. ¿Ndáaña chíndeétáʼan xíʼin na̱ xa̱a̱ ku̱a̱ʼá tiempo ndasakáʼnu Ndióxi̱ ña̱ vií kuniso̱ʼona ti̱xin reunión? (koto recuadro ña̱ naní “Ña̱ kivi keʼéyó ña̱ va̱ʼa vií kuniso̱ʼoyó”).

¹⁶ Ná kundiku̱nyó ña̱ ka̱ʼa̱nyó xa̱ʼa̱ yóʼo. Ná kotoyó ndáaña xa̱a̱ chíndeétáʼan xíʼin sava na̱ hermano na̱ xa̱a̱ ku̱a̱ʼá tiempo káchíñu nu̱ú Jehová na̱ viíní xíniso̱ʼo ña̱ káʼa̱nna ti̱xin reunión. Ñá Ashley xa̱a̱ yáʼaka 30 ku̱i̱ya̱ káchíñuñá nu̱ú Jehová, ñáyóʼo káchiñá: “Ndáyáʼviní ña̱ xa̱a̱ ya̱chi̱ka kaʼvi kúeeyó. Tá kǒo kéʼíi̱ ña̱yóʼo, íxayo̱ʼvi̱ña xíʼi̱n ña̱ taxii̱ comentario ta kíxáʼa ndákanixi̱níi̱ xa̱ʼa̱ inka ña̱ʼa”. Ta̱ József xa̱a̱ 52 ku̱i̱ya̱ káchíñura nu̱ú Jehová, ta̱yóʼo káchira: “Kútóoníi̱ kuniso̱ʼi̱ xa̱ʼa̱ ña̱ xa̱a̱ kúnda̱a̱-inii̱ xa̱ʼa̱ chi saá kúnda̱a̱-inii̱ inka ña̱ʼa xa̱ʼa̱ ña̱ xa̱a̱ xíni̱i̱ xa̱ʼa̱”. Ta̱yóʼo káchikara: “Tá iin ta̱ hermano ta̱ táxi discurso va̱ása vií va̱ʼa táxira ña̱yóʼo, ña̱ kíʼinkai̱ kuenta xíʼin kúú ña̱ káʼa̱nra xa̱ʼa̱ va̱xiña nu̱ú Biblia”.

17. ¿Ndáakaña kivi keʼún ña̱ va̱ʼa vií kuniso̱ʼún ña̱ káʼa̱nna xa̱ʼa̱ ti̱xin reunión? (Koto na̱ʼná).

¹⁷ Ña̱yóʼo kúú sava ña̱ kivi keʼún ña̱ va̱ʼa vií kuniso̱ʼún ña̱ káʼa̱nna ti̱xin reunión. 1) Tá kúma̱níka ku̱ʼún reunión va̱ása ku̱a̱ʼání kuxún ña̱ va̱ʼa kǒo ku̱sún. 2) Xa̱a̱ ya̱chi̱ka xa̱ún ta ndukú nu̱ú koún. 3) Sánuu volumen celular á tableta ña̱ kúúmiíún. 4) Ndakanixi̱ní xa̱ʼa̱ ña̱ ka̱ʼa̱nna xa̱ʼa̱. 5) Vií va̱ʼa kuniso̱ʼún ña̱ káʼa̱n ta̱ táxi discurso. 6) Kaʼyí ña̱ káʼa̱nna xa̱ʼa̱ á keʼé dibujo xa̱ʼa̱ ña̱yóʼo. 7) Ndakanixi̱ní xa̱ʼa̱ texto ña̱ káʼvina ta koto ndáa ki̱ʼva kítáʼanña xíʼin ña̱ káʼa̱nna xa̱ʼa̱. 8) Ndakanixi̱ní xa̱ʼa̱ ña̱yóʼo: “¿Ndáa ki̱ʼva kivi kuniñúʼi̱ ña̱yóʼo ña̱ va̱ʼa chindeétáʼi̱n xíʼin na̱ hermano ti̱xin congregación á xíʼin inka na̱ yiví?”. 9) Tá kúma̱níka ku̱ʼún asamblea koto tema ña̱ ka̱ʼa̱nna xa̱ʼa̱, título ña̱ discurso xíʼin texto ña̱ ka̱ʼa̱nna xa̱ʼa̱. 10) Ña̱ va̱ʼa vií kuniso̱ʼún, tá kúma̱níka kixáʼa asamblea xa̱a̱ ya̱chi̱ka koún nu̱ú tayi̱ ta kuniso̱ʼo video ña̱ yáʼa na̱ʼná xíʼin.

NÁ KUNISO̱ʼOYÓ ÑA̱ KÁʼA̱N JEHOVÁ

18. ¿Nda̱chun ndáyáʼviní viíní kuniso̱ʼoyó ña̱ káʼa̱nna ti̱xin reunión?

¹⁸ Xíniñúʼu vií kuniso̱ʼoyó ña̱ káʼa̱nna ti̱xin reunión saáchi saá níʼi Jehová yichi̱ nu̱úyó (Sal. 23:3; 31:3). Xíniñúʼu kuniso̱ʼoyó consejo ña̱ táxira ña̱ va̱ʼa kǒo xa̱a̱yó keʼéyó ña̱ va̱ása va̱ʼa. Ña̱kán ndáyáʼviní vií kuniso̱ʼoyó ña̱ káʼa̱nna ti̱xin reunión ta keʼéyó ña̱ sákuaʼayó (Luc. 8:18). Tá xíniso̱ʼoyó ña̱ káʼa̱n Jehová xíʼinyó, si̱íní kooyó tiempo vitin ta ni̱ʼíyó ña̱ kutakuyó ndiʼi tiempo chí nu̱únínu (Sal. 119:2, 14).