Ná chindeétáʼanyó xíʼin inkana ña̱ ná kuxini̱na Jehová

1. ¿Ndáaña ndóʼoyó tá xítoyó na̱ sánáʼa̱yó xa̱ʼa̱ Biblia chíkaa̱na ndee̱ ña̱ sákuaʼana xa̱ʼa̱ Jehová?

¿NDÁAÑA ndóʼoyó tá xítoyó na̱ sánáʼa̱yó xa̱ʼa̱ Biblia chíkaa̱na ndee̱ ña̱ sákuaʼana xa̱ʼa̱ Jehová? Tá xáʼa̱nna yichi̱ nu̱ú ña̱ reunión, táxina comentariona, kéena nátúʼunna xíʼinyó xa̱ʼa̱ Ndióxi̱ ta ndákuchina, kúsi̱íní-iniyó tá xítoyó ña̱ kéʼéna ña̱yóʼo. Jehová kúú ta̱ chíndeétáʼan xíʼin na̱ yiví ña̱ kúyatinna nu̱úra, ña̱kán xíniñúʼu iinlá miíra ndukáʼnu (1 Cor. 3:5-9; 3 Juan 3, 4).

2. ¿Ndáaña kúú ña̱ kúni̱ Jehová? (1 Timoteo 2:3, 4).

² Ña̱ kúni̱ Jehová “kúú ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra” (kaʼvi 1 Timoteo 2:3, 4). Jehová kúni̱ra ña̱ ndiʼi na̱ yiví ná “kunda̱a̱ káxi inina” xa̱ʼa̱ra ta saátu xa̱ʼa̱ ña̱ kúni̱ra keʼéra (Jer. 9:24). Iin ta̱ káʼvi va̱ʼa xa̱ʼa̱ Biblia ni̱ka̱ʼa̱nra ña̱ tu̱ʼun griego ña̱ “kunda̱a̱ káxi iniyó” va̱ása kúni̱ kachiña ña̱ kunda̱a̱ kuití iniyó xa̱ʼa̱ na̱ yiví, chi xíniñúʼu kuxini̱ va̱ʼayóna. Tá iin na̱ káʼviyó xíʼin xáa̱na kúnda̱a̱ va̱ʼa-inina xa̱ʼa̱ Jehová, ña̱yóʼo chíndeétáʼanña xíʼinna ña̱ nasamana ña̱ kéʼéna tasaá kivi xa̱a̱na “kutakuna ndiʼi tiempo” (Juan 17:3).

3. ¿Ndáa pregunta ndakuiinyó nu̱ú artículo yóʼo?

³ Jehová ta̱xira iin chiñu ña̱ liviní ndaʼa̱yó, ña̱ chindeétáʼanyó xíʼin inkana ña̱ kunda̱a̱-inina xa̱ʼa̱ra. Nu̱ú artículo yóʼo ndakuiinyó pregunta yóʼo: ¿Nda̱chun xíniñúʼu kuxini̱ va̱ʼa na̱ sánáʼa̱yó xa̱ʼa̱ Jehová? ¿Ndáa ki̱ʼva kivi sánáʼa̱yóna? Ta, ¿ndáa ki̱ʼva kivi chindeétáʼanyó xíʼinna ña̱ keʼéna ña̱ xa̱a̱ xíni̱na xa̱ʼa̱ Jehová?

NÁ CHINDEÉTÁʼANYÓ XÍʼIN NA̱ SÁNÁʼA̱YÓ ÑA̱ KUXINI̱ VA̱ʼANA JEHOVÁ

4. Nda̱a̱ táki̱ʼva káchi Marcos 12:30, ¿ndáa xa̱ʼa̱ kúú ña̱ sánáʼa̱yó na̱ yiví?

⁴ Ta̱ Jesús ni̱ka̱ʼa̱nra ley ña̱ ndáyáʼvi va̱ʼaka kúú ña̱ kuʼvi̱-iniyó kuniyó Jehová xíʼin ndiʼi níma̱yó, xíʼin ndiʼi ña̱ tákuyó, xíʼin ndiʼi xi̱níyó ta saátu xíʼin ndiʼi ndee̱yó (kaʼvi Marcos 12:30). Ndiʼi na̱ sánáʼa̱yó xa̱ʼa̱ Biblia va̱ása kívi ku̱ʼvi̱-inina kunina Jehová tá va̱ása xíninara. Kúni̱yó ná xa̱a̱na ndakuchina xa̱ʼa̱ ña̱ kúni̱na kachíñuna nu̱ú Jehová. Ta va̱ása kúni̱yó keʼéna ña̱yóʼo xa̱ʼa̱ ña̱ kúni̱ kuitína koona migoyó á ña̱ kundikaa̱na ti̱xin ñuu Jehová, á xa̱ʼa̱ ña̱ kútóo kuitína sava ña̱ sánáʼa̱ Biblia. Sánáʼa̱yó na̱ yiví chi kúni̱yó chindeétáʼanyó xíʼinna ña̱ kuxini̱na Jehová ta ku̱ʼvi̱-inina kuninara.

5. Tá na̱ káʼviyó xíʼin kúʼvi̱-inina xínina Jehová, ¿ndáaña xa̱a̱na keʼéna?

⁵ Ña̱ kuniso̱ʼoyó xíʼin ña̱ ku̱ʼvi̱-iniyó kuniyó inkana iin kítáʼan ña̱yóʼo. Tá iin na̱ káʼviyó xíʼin kúnda̱a̱ va̱ʼa-inina xa̱ʼa̱ Jehová ta kúʼvi̱-inina xíninara, ña̱yóʼo chindeétáʼanña xíʼinna ña̱ xa̱a̱na kandíxanara. Ta̱ Jesús ni̱ka̱ʼa̱nra ña̱yóʼo: “Ña̱ va̱ʼa ná kunda̱a̱-ini na̱ ñuyǐví ña̱ kúʼvi̱-inii̱ xínii̱ yivái̱, kéʼíi̱ nda̱a̱ táki̱ʼva íyo chiñu ña̱ xa̱ʼndara nu̱úi̱” (Juan 14:31). Ña̱ chindeétáʼan xíʼin na̱ káʼviyó xíʼin ña̱ xa̱a̱na keʼéna ña̱ kúni̱ Jehová ta nda̱kú koo inina xíʼinra, kúú ña̱ ku̱ʼvi̱-inina kuninara (1 Juan 5:3).

6. Ka̱ʼa̱n xa̱ʼa̱ iin ejemplo ndáaña xíniñúʼu keʼé na̱ káʼviyó xíʼin ña̱ va̱ʼa kuxini̱ va̱ʼana Jehová.

⁶ Tá na̱ káʼviyó xíʼin kúnda̱a̱ va̱ʼa-inina xa̱ʼa̱ Jehová vií koo ña̱ ndaka̱xinna keʼéna. Ña̱ va̱ʼa kunda̱a̱-iniyó ná ka̱ʼa̱nyó xa̱ʼa̱ iin ejemplo. Tá iinna kúni̱na sákuaʼana kavana carro, xíniñúʼu ku̱a̱ʼá tiempo sákuaʼana kavananú tasaá loʼo tá loʼo vií kixáʼana kavananú. Ki̱ʼva saá íyo na̱ sánáʼa̱yó xa̱ʼa̱ Biblia, ña̱ va̱ʼa xa̱a̱na kuxini̱ va̱ʼana Jehová su̱ví nda̱saa kaʼvi kuitína xa̱ʼa̱ra, chi saátu xíniñúʼu keʼéna ña̱ sákuaʼana ta kuniñúʼuna ña̱ káʼa̱n tu̱ʼun Ndióxi̱ ña̱ va̱ʼa vií koo ña̱ ndaka̱xinna keʼéna. Saáchi tá sákuaʼa va̱ʼana xa̱ʼa̱ Jehová ta kíʼinna kuenta ndáa ki̱ʼva xa̱a̱ chíndeétáʼanra xíʼinna, ña̱ ndaka̱xinna keʼéna vií kooña.

7. ¿Ndáaña chi̱ndeétáʼan xíʼin ta̱ José ña̱ vií ni̱xi̱yo ña̱ nda̱kaxinra ke̱ʼéra?

⁷ Ña̱ xi̱xini va̱ʼa ta̱ José Jehová chi̱ndeétáʼanña xíʼinra ña̱ kǒo ki̱ʼvira ku̱a̱chi kini xíʼin ñá síʼi ta̱ Potifar. Sana tá loʼora na̱túʼunna xíʼinra xa̱ʼa̱ ta̱ Adán xíʼin ñá Eva ta saátu xa̱ʼa̱ ta̱ Abrahán xíʼin ñá Sara (Gén. 2:24; 20:3, 6). Ta xa̱ʼa̱ ña̱yóʼo, ta̱ José ku̱ndaa̱-inira ndáaña ndákanixi̱ní Ndióxi̱ xa̱ʼa̱ ña̱ tíndaʼa̱na xíʼin ña̱ kísi̱ xíʼin táʼanna. Xa̱ʼa̱ ña̱ xi̱xini va̱ʼara Jehová xi̱kunda̱a̱-inira ndáaña kútóora ta ndáaña va̱ása kútóora ta saátu ndáaña sáxo̱ʼvi̱-inira. Ña̱kán viíní ni̱xi̱yo ña̱ nda̱kaxinra ke̱ʼéra ta ni̱ka̱ʼa̱nra xíʼin ñá síʼi ta̱ Potifar: “¿Nda̱chunví keʼíi̱ ña̱ va̱ása va̱ʼa yóʼo ta ki̱ʼvii̱ ku̱a̱chi nu̱ú Ndióxi̱?” (Gén. 39:7-9). Tá chíndeétáʼanyó xíʼin na̱ sánáʼa̱yó xa̱ʼa̱ Biblia ña̱ kuxini̱ va̱ʼana Jehová, ña̱ kunda̱a̱-inina ndáa ña̱ʼa kúú ña̱ kútóora ta ndáa ña̱ʼa kúú ña̱ va̱ása kútóora, saá kúú ña̱ vií koo ña̱ ndaka̱xinna keʼéna ta sakúsi̱ína-inira.

NÁ SANÁʼA̱YÓNA NDÁA KI̱ʼVA ÍYO JEHOVÁ

8. ¿Ndáa ki̱ʼva kuniñúʼuyó libro Kivi koo si̱íún vitin ta saátu chí nu̱únínu ña̱ va̱ʼa sanáʼa̱yó na̱ káʼviyó xíʼin xa̱ʼa̱ Jehová?

⁸ ¿Ndáa ki̱ʼva sanáʼa̱yó na̱ káʼviyó xíʼin ndáa ki̱ʼva íyo Jehová? Ná nda̱ka̱tu̱ʼunyóna. Nda̱a̱ mií Jehová ke̱ʼéra ña̱yóʼo. Tá kúú, ña̱ va̱ʼa chindeétáʼanra xíʼin ta̱ Job ña̱ kuxini̱ va̱ʼara miíra yáʼaka 50 yichi̱ ni̱nda̱ka̱tu̱ʼunrara (Job 38:1–41:34). Saá ná keʼé miíyó vitin. Kúúmiíyó libro ña̱ naní Kivi koo si̱íún vitin ta saátu chí nu̱únínu, ña̱yóʼo kúúmiíña ku̱a̱ʼá pregunta ña̱ kivi keʼéyó xíʼin na̱ sánáʼa̱yó ña̱ va̱ʼa kuxini̱na ndáa ki̱ʼva íyo Jehová (koto recuadro ña̱ naní “Pregunta ña̱ kuniñúʼuyó ña̱ va̱ʼa kunda̱a̱-inina ndáa ki̱ʼva íyo Jehová”). Ndáyáʼviní keʼéyó pregunta yóʼo xíʼinna ña̱ va̱’a kuxini̱nara.

9, 10. a) ¿Ndáaña chindeétáʼan xíʼin na̱ káʼviyó xíʼin ña̱ kunda̱a̱-inina xíʼin ña̱ va̱xi nu̱ú Biblia? (Santiago 5:11). b) ¿Ndáa ki̱ʼva kaʼvina iin relato ña̱ va̱ʼa kuxini̱ va̱ʼana Jehová? Ka̱ʼa̱n xa̱ʼa̱ iin ejemplo.

⁹ Tá xa̱a̱ sánáʼa̱yó iin na̱ yiví xa̱ʼa̱ Biblia, káʼa̱nyó xíʼinna ña̱ ná kaʼvina Biblia ndiʼi ki̱vi̱.a ¿Ndáa ki̱ʼva chindeétáʼanyó xíʼinna ña̱ vií kunda̱a̱-inina xíʼin ña̱ káʼvina? Kivi ka̱ʼa̱nyó xíʼinna tá xa̱a̱ káʼvina iin relato ña̱ va̱xi nu̱ú Biblia ná nda̱ka̱tu̱ʼunna miína, ¿nda̱chun ta̱xi Jehová ña̱ ná ka̱ʼyi ña̱yóʼo nu̱ú tu̱ʼunra, ta ndáa ki̱ʼva náʼa̱ versículo yóʼo ki̱ʼva ña̱ íyora? Ña̱yóʼo kúú ña̱ ke̱ʼé ta̱ discípulo Santiago tá ni̱ka̱ʼa̱nra xa̱ʼa̱ ña̱ ndo̱ʼo ta̱ Job. Va̱ása níka̱ʼa̱n kuitíra xa̱ʼa̱ ña̱ nda̱kú ni̱xi̱yo ini ta̱yóʼo xíʼin Ndióxi̱, chi saátu ni̱ka̱ʼa̱nra xa̱ʼa̱ ña̱ va̱ʼa-ini Jehová ta kúndáʼvi-inira xínira inkana (kaʼvi Santiago 5:11).

¹⁰ Kúni̱yó na̱ sánáʼa̱yó xa̱ʼa̱ Biblia ná kunda̱a̱-inina ndáaña sánáʼa̱ iin tá iin relato miína, ndáaña kúú ña̱ kútóo Jehová xíʼin ña̱ va̱ása kútóora. Ná kachiyó na̱ káʼviyó xíʼin xítona táʼví ña̱ naní “Kaʼvi Biblia ndiʼi ki̱vi̱” ña̱ va̱xi nu̱ú libro ña̱ naní Kivi koo si̱íún vitin ta saátu chí nu̱únínu ta kúni̱na kaʼvina ña̱ káʼa̱n xa̱ʼa̱ ta̱ Daniel tá xi̱ndikaa̱ra nu̱ú xi̱ñuʼu tí león. Kivi ka̱ʼa̱nyó xíʼinna ña̱ ná ndakanixi̱nína xa̱ʼa̱ pregunta yóʼo: “¿Nda̱chun sa̱káku Jehová ta̱ Daniel? ¿Ndáaña sánáʼa̱ ña̱yóʼo yi̱ʼi̱ xa̱ʼa̱ ña̱ kútóo Jehová? (Dan. 6:10, 22). ¿Ndáaña ndo̱ʼo na̱ ta̱a na̱ ni̱ka̱ʼa̱n ña̱ vatá xa̱ʼa̱ ta̱ Daniel? ¿Ndáaña sánáʼa̱ ña̱yóʼo yi̱ʼi̱ xa̱ʼa̱ ña̱ kǒo kútóo Jehová?” (Dan. 6:4, 5, 24). Saátu kivi ka̱ʼa̱nyó xíʼinna ña̱ ná kotona ndáa inka ña̱ va̱ʼa ña̱ kúúmií Jehová káʼa̱n relato yóʼo xa̱ʼa̱ (Dan. 6:26, 27).

11. ¿Ndáaña xíniñúʼu sandákaʼányó na̱ sanáʼa̱yó?

¹¹ Kúsi̱íní-iniyó tá iin na̱ sanáʼa̱yó kíʼinna kuenta ndáa ki̱ʼva chíndeétáʼan ña̱ va̱xi nu̱ú Biblia xíʼinna. Sana taxina tíxa̱ʼvi ndaʼa̱yó xa̱ʼa̱ ki̱ʼva ña̱ sanáʼa̱yóna, ta iin ña̱ va̱ʼava kúú ña̱ keʼéna ña̱yóʼo. Soo xíniñúʼu sandákaʼányóna ta̱ sánáʼa̱ miína kúú Jehová ta iinlá ta̱yóʼo xíniñúʼu ndukáʼnu (Is. 30:20, 21).

NÁ CHINDEÉTÁʼANYÓ XÍʼINNA ÑA̱ KEʼÉNA ÑA̱ XÍNI̱NA XA̱ʼA̱ JEHOVÁ

12, 13. Tá na̱ káʼviyó xíʼin kǒo kúnda̱a̱ va̱ʼa inina xíʼin sava relato ña̱ va̱xi nu̱ú Biblia, ¿ndáa ki̱ʼva chindeétáʼan ña̱ xa̱a̱ xíni̱na xa̱ʼa̱ Jehová xíʼinna? (Koto na̱ʼná).

¹² Ña̱ va̱ʼa chindeétáʼan ña̱ va̱xi nu̱ú Biblia xíʼinyó, ná kuniñúʼuyó ña̱ xa̱a̱ xíni̱yó xa̱ʼa̱ Jehová. ¿Ndáa ki̱ʼva chindeétáʼanyó xíʼin na̱ káʼviyó xíʼin ña̱ va̱ʼa keʼéna ña̱yóʼo? Ná ndakanixi̱níyó ña̱ íxayo̱ʼvi̱ña xíʼinna kunda̱a̱-inina xíʼin relato ña̱ ka̱ʼvina ña̱ va̱xi nu̱ú Biblia. Sana ndakanixi̱nína, nda̱chun xa̱ʼní Jehová sava na̱ yiví ta savana va̱ása níxaʼníra. Kivi sanáʼa̱yóna ña̱ ndakaʼánna ña̱ xa̱a̱ xíni̱na xa̱ʼa̱ Jehová. ¿Ndáa ki̱ʼva keʼéna ña̱yóʼo?

¹³ Ná chindeétáʼanyó xíʼinna ña̱ ná ndakanixi̱nína xa̱ʼa̱ pregunta yóʼo. Ña̱ tákuyó, ¿á ndáyáʼviña nu̱ú Jehová? (2 Ped. 3:9). ¿Ndáaña ke̱ʼéra ni kúúyó na̱ yiví ku̱a̱chi? (Efes. 2:4, 5). ¿Á táxira castigo ndaʼa̱ na̱ yiví va̱ʼa? ¿Á kǒo táxira castigo ndaʼa̱ na̱ kéʼé ña̱ kini? (Éx. 34:6, 7). Ta saátu ndáyáʼviní sandákaʼányó miína ña̱ sava yichi̱ va̱ása káʼa̱n káxi Biblia xa̱ʼa̱ sava ña̱ kéʼé Jehová. Soo va̱ása xíniñúʼu kunda̱a̱ ndiʼi-iniyó xa̱ʼa̱ ña̱ kúni̱ra keʼéra. Kúnda̱a̱-iniyó ña̱ ndiʼi tiempo Jehová kéʼéra ña̱ nda̱kú ta xíni̱ va̱ʼayó ndáa ki̱ʼva íyora.

14. ¿Ndáa ki̱ʼva chindeétáʼanyó xíʼin na̱ káʼviyó xíʼin tá íxayo̱ʼvi̱ña xíʼinna ña̱ vií kutáʼanna xíʼin na̱ hermano?

¹⁴ Ná ka̱ʼa̱nyó xa̱ʼa̱ inka ña̱ kivi keʼéyó ña̱ va̱ʼa chindeétáʼanyó xíʼin na̱ sanáʼa̱yó ña̱ va̱ʼa keʼéna ña̱ xa̱a̱ xíni̱na xa̱ʼa̱ Jehová. Ná ndakanixi̱níyó ña̱ xa̱a̱ xáʼa̱nna reunión, soo íxayo̱ʼvi̱ña xíʼinna ña̱ vií kutáʼanna xíʼin iin na̱ ndíkaa̱ ti̱xin congregación. Sana na̱ hermano kán ke̱ʼéna á ni̱ka̱ʼa̱nna iin ña̱ sa̱ndákava-ini na̱yóʼo. Ná chindeétáʼanyó xíʼinna ña̱ ndakanixi̱nína ndáa ki̱ʼva xíto Jehová na̱ hermano. ¿Ndáaña ke̱ʼéra ña̱ va̱ʼa ni̱na̱ʼa̱ra ña̱ kúni̱ra xínirana? (Juan 3:16). Ña̱ vií ndákutáʼan na̱ ndásakáʼnu miíra, ¿á ndáyáʼvi ña̱yóʼo nu̱úra? (Sal. 133:1). ¿Ndáaña ndóʼora tá chíkaa̱yó ndee̱ ña̱ vií kutáʼanyó xíʼin ndiʼi na̱ hermano? (2 Cor. 13:11). Ná chindeétáʼanyó xíʼinna ña̱ kunda̱a̱-inina ña̱ kúsi̱íní-ini Jehová tá xítora ña̱ kíʼinkayó kuenta xíʼin ña̱ va̱ʼa ña̱ kúúmií na̱ hermano ta su̱ví ña̱ va̱ása va̱ʼa kéʼéna.

15, 16. a) ¿Ndáa ki̱ʼva kundiku̱n na̱ sanáʼa̱yó yichi̱ ta̱ Jesús tá xíniñúʼu ndaka̱xinna keʼéna iin ña̱ ndáyáʼvi? (Juan 8:29). b) ¿Ndáa ki̱ʼva chi̱ndeétáʼan ñá Marianne xíʼin ñá xi̱sanáʼa̱ñá? (Koto na̱ʼná).

¹⁵ Inka ki̱ʼva ña̱ chindeétáʼanyó xíʼin na̱ káʼviyó xíʼin kúú ña̱ kuniñúʼuna ña̱ xa̱a̱ xíni̱na xa̱ʼa̱ Jehová tá xa̱a̱ ndáka̱xinna ndáaña keʼéna. Kivi na̱ʼa̱yó lección 35 nu̱úna ña̱ naní “Ndáa ki̱ʼva vií koo ña̱ ndaka̱xinyó keʼéyó” ña̱ va̱xi nu̱ú libro ña̱ naní Kivi koo si̱íún vitin ta saátu chí nu̱únínu. Sana na̱ káʼviyó xíʼin xa̱a̱ ni̱ka̱ʼa̱nna xíʼin Ndióxi̱ ta na̱ndukúna xa̱ʼa̱ ña̱ kúni̱na keʼéna soo xíka-inina ndáaña keʼéna. Ta sana xa̱a̱ ku̱a̱ʼá texto nda̱ni̱ʼina soo kǒo kúnda̱a̱-inina ndáa ki̱ʼva kundiku̱nna ña̱yóʼo. Kivi ka̱ʼa̱nyó xíʼinna ná keʼéna táki̱ʼva ke̱ʼé ta̱ Jesús, ta̱yóʼo ni̱ka̱ʼa̱nra xíʼin yivára ta ka̱chira: “Ndiʼi yichi̱ kéʼíi̱ ña̱ kúni̱ra” (kaʼvi Juan 8:29). Tasaá ka̱ʼa̱nyó xíʼinna ná ndakanixi̱nína ña̱yóʼo: “Xa̱ʼa̱ ña̱ kúnda̱a̱-inii̱ xa̱ʼa̱ Jehová ta xa̱a̱ na̱ndukúi̱ xa̱ʼa̱ ña̱ kúni̱i̱ keʼíi̱, ¿ndáaña sakúsi̱í-inira?”. Nda̱a̱ ndáaka ña̱ ná keʼéyó ta sákusi̱íña-ini Jehová, iin ña̱ va̱ʼava kúúña.

¹⁶ Ná ka̱ʼa̱nyó xa̱ʼa̱ iin ñaʼá ñá ñuu Chile ñá xi̱sakúaʼa xa̱ʼa̱ Biblia. Na̱ veʼeñá xi̱kaʼa̱nna xíʼinñá ná kiʼinñá iin chiñu nu̱ú ku̱a̱ʼání xu̱ʼún chaʼvinañá soo xa̱ʼa̱ ña̱yóʼo kǒo kivi ku̱ʼu̱nñá ndiʼi reunión. ¿Ndáaña ke̱ʼéñá? Ñá xi̱sanáʼa̱ miíñá ñá naní Marianne, káchiñá: “Ni̱ka̱ʼi̱n xíʼinñá ná ndakanixi̱níñá á kusi̱í-ini Jehová á kusuchí-inira xíʼin ña̱ ndaka̱xinñá keʼéñá. Ta saátu ni̱ka̱ʼi̱n xíʼinñá ná ka̱ʼa̱nñá xíʼin Jehová xa̱ʼa̱ ndiʼi ña̱yóʼo ta ná kotoñá ndáa ki̱ʼva ndakuiinra ña̱ ni̱ka̱ʼa̱nñá. Ñákán va̱ása níkiʼinñá chiñu kán ta tá ni̱ya̱ʼa loʼo tiempo, nda̱ni̱ʼíñá iin chiñu nu̱ú xi̱taxiña tiempo ndaʼa̱ñá ña̱ ku̱ʼu̱nñá ndiʼi reunión”. ¿Á ki̱ʼinndó kuenta ndáaña ke̱ʼé ñá Marianne? Nu̱úka ña̱ ka̱ʼa̱nñá xíʼin ñá ñaʼá kán ndáaña xíniñúʼu keʼéñá, ni̱ka̱ʼa̱nñá xíʼinñá ña̱ ná ndakanixi̱níñá xa̱ʼa̱ ña̱ xa̱a̱ xíni̱ñá xa̱ʼa̱ Jehová. Xa̱ʼa̱ ña̱ ke̱ʼéñá saá, va̱ʼaníka ki̱xáʼañá kítáʼanñá xíʼin ñá Marianne ta saátu xíʼin Jehová. Ñá Marianne káchiñá: “Ñáyóʼo sa̱kuaʼañá tá siʼnaka chiñu Jehová ndíʼi̱-iniyó xa̱ʼa̱ kundaara miíyó”.

ÑA̱ VA̱ʼA NDÁKIʼINNA XA̱ʼA̱ ÑA̱ KÚNDA̱A̱-ININA XA̱ʼA̱ JEHOVÁ

17. ¿Ndáaña ndáyáʼviní xíniñúʼu sakúaʼa na̱ sánáʼa̱yó?

¹⁷ Xa̱ʼa̱ ña̱ sánáʼúnna xa̱ʼa̱ Biblia, ku̱a̱ʼání ña̱ ndáyáʼvi sákuaʼana. Tá kúú siʼna sa̱kuaʼana xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, ña̱ keʼé Reino Ndióxi̱ ta saátu ndáaña ndóʼoyó tá xa̱a̱ xíʼi̱yó. Saátu sákuaʼana xa̱ʼa̱ ña̱ kéʼé na̱ ñuu Ndióxi̱, tá kúú ndáa ki̱ʼva xíyo reunión xíʼinyó, ndáaña kéʼé na̱ anciano ta ndáana kúú na̱ Cuerpo Gobernante. Nda̱a̱ táki̱ʼva xa̱a̱ ku̱ndaa̱-iniyó, va̱ása kúni̱yó ná kunda̱a̱ kuití inina xa̱ʼa̱ ña̱ káʼvina, chi ña̱ ndáyáʼvika kúú ña̱ xa̱a̱na kuxini̱na va̱ʼana Jehová.

18. Tá xáa̱yó kúnda̱a̱ va̱ʼa iniyó xa̱ʼa̱ Jehová, ¿ndáaña va̱ʼa ndákiʼinyó?

¹⁸ Iin ña̱ ndáyáʼviní kúú ña̱ sanáʼa̱yó inkana xa̱ʼa̱ Jehová. Ndiʼi miíyó na̱ xa̱a̱ xíni̱ xa̱ʼa̱ Jehová, ndásakáʼnuyóra ta saátu ku̱a̱ʼání bendición ndákiʼinyó. Ta tiempo vitin kúsi̱í-iniyó ndásakáʼnuyóra (Sal. 25:12-15). Ta chí nu̱únínu kutakuyó ndiʼi tiempo xa̱ʼa̱ ña̱ xa̱a̱ xíni̱yó xa̱ʼa̱ Jehová (1 Juan 5:20). Biblia káʼa̱nña ña̱yóʼo: “Tá iinna kúʼvi̱-inina xínina Ndióxi̱, ta̱yóʼo xíni̱varana” (1 Cor. 8:3). Ndióxi̱ ta̱ kúúmií ndiʼi ndee̱ kíʼinra kuenta xíʼinyó ta káʼa̱nra ña̱ kúúyó migora. Ña̱yóʼo kúú iin ña̱ va̱ʼaní ndákiʼinyó nu̱ú nda̱a̱ ndáaka ña̱ʼa.