Jehová chi̱ndeétáʼanra xíʼi̱n ña̱ viíka xa̱i̱ kachíñui̱ nu̱úra

Ndiʼi chiñu ña̱ xi̱keʼéna kán nda̱kanda̱ní-inii̱ xíʼinña, soo ña̱ xi̱ndakanda̱ka-inii̱ xíʼin kúú ña̱ xi̱keʼé na̱ yiví kán. Ku̱a̱ʼání na̱ hermano xíʼin ná hermana xi̱keʼéna chiñu yóʼo ndiʼi ki̱vi̱ ta va̱ása níxi̱nasa̱ma ña̱ xi̱keʼéna. Nda̱a̱ ni iin na̱yóʼo va̱ása níxi̱ndatuna ña̱ ka̱ʼa̱n va̱ʼana xa̱ʼa̱na, xi̱kusi̱íníva-inina xi̱keʼéna chiñu yóʼo. Va̱ʼaní xi̱naʼa̱na ña̱ vitá xi̱xiyo inina ña̱ xi̱kachíñuna nu̱ú Ndióxi̱.

Ndiʼi ku̱i̱ya̱ yóʼo Jehová xa̱a̱ chíndeétáʼanra xíʼi̱n ña̱ viíka kachíñui̱ nu̱úra. Soo siʼna ná ka̱ʼi̱n xíʼinndó tá ya̱chi̱ budista ni̱xi̱yoi̱ ta xi̱kuni̱i̱ kunda̱a̱-inii̱ xa̱ʼa̱ ña̱ nda̱a̱.

NDA̱A̱ TÁ LOʼOVÍI̱ XI̱NANDUKÚI̱ NDIÓXI̱

Chí ñuu Chicago (Illinois) ka̱kui̱ ta kán xa̱ʼnui̱, ku̱mí xi̱kuundi̱ ta yi̱ʼi̱ kúú ta̱ chéeka. Na̱ yivái̱ na̱ ñuu Japón kúúna ta ki̱xaa̱na chí Estados Unidos saáchi xi̱kuni̱na chindeétáʼanna xíʼinndi̱ ña̱ va̱ʼa kaʼvi va̱ʼandi̱ ta kuumiíndi̱ iin chiñu va̱ʼa.

Na̱ yivái̱ budista xi̱kuuna, siʼíi̱ xa̱nuñá iin veʼe nu̱ú xi̱ndikaa̱ templo ña̱ budista, yiváñá xíʼin u̱vi̱ na̱ ki̱ʼvañá monje xi̱kuuna ña̱kán tá loʼovíi̱ xaʼnui̱ ti̱xin religión yóʼo. Tá xi̱ndikói̱ veʼi̱ tá xi̱xaʼi̱n escuela ña̱ siʼna xi̱keʼíi̱ kúú ña̱ xi̱ndakaʼmii̱ ñu̱ʼu nu̱ú Ndióxi̱ ña̱ buda ta xi̱kanindichii̱ arroz xíʼin ti̱kui̱í nu̱úña. Tá domingo xi̱xaʼa̱nndi̱ ta xi̱xitandi̱ yaa ini templo nu̱ú mií ña̱ imagen yóʼo soo káʼnuka ni̱xi̱yo ña̱ xi̱ndichi kán ta xi̱kuumiíña oro.

Iin ki̱vi̱ tá xi̱kuumiíi̱ siete ku̱i̱ya̱, ki̱xáʼíi̱ xítoi̱ nu̱ú ña̱ imagen ña̱ xi̱ndichi veʼendi̱, ta ni̱nda̱ka̱tu̱ʼíi̱n miíi̱: “¿Ndáaña kuu tá ná kuvii̱?”. Sa̱náʼa̱na yi̱ʼi̱ ña̱ tá ná kuvii̱ kundika̱i̱ iin lugar ta koi̱ nda̱a̱ táki̱ʼva íyo iin espíritu. Ki̱ʼii̱n kuenta ña̱ kixaa̱ iin ki̱vi̱ ña̱ kuvivai̱, ni ná xa̱i̱ koi̱ iin espíritu nda̱a̱ táki̱ʼva xi̱kaʼa̱nna xíʼi̱n va̱ása kusi̱íví-inii̱ nda̱a̱ táki̱ʼva kéʼíi̱ vitin. Ña̱ nda̱kanixi̱níi̱ xa̱ʼa̱ ña̱yóʼo ku̱suchíní-inii̱.

Tá xi̱kuumiíi̱ 15 ku̱i̱ya̱ nda̱kanixi̱níi̱ ña̱ ndiʼi ña̱ xi̱keʼéndi̱ ña̱ xi̱kuundi̱ budista va̱ása ndáyáʼvivíña. Tá xi̱ndika̱i̱ religión yóʼo va̱ása níxi̱kusi̱í-inii̱ (Mat. 5:3). Xi̱kunda̱a̱-inii̱ ña̱ íyova iin Ndióxi̱ ta̱ táku ta̱ kúúmií ndiʼi ndee̱ ta xi̱kuni̱i̱ kunda̱a̱-inii̱ xa̱ʼa̱ra. Nda̱kanixi̱níi̱ ña̱ sana chindeétáʼanva Biblia xíʼi̱n ña̱ kunda̱a̱-inii̱ xa̱ʼa̱ sava pregunta ña̱ xi̱kuumiíi̱, ña̱kán sa̱tái̱ iin Biblia ña̱ xi̱naní King James, ta sa̱tái̱ña tá xi̱ke̱ʼéna vikó xa̱ʼa̱ Ndióxi̱ ña̱ xi̱ndasakáʼnu na̱ veʼi̱.

Tá xi̱kuumií 17 ku̱i̱ya̱ tá ku̱a̱ʼi̱n xíʼin ti̱na sa̱nái̱ chí calle, nda̱kutáʼi̱n xíʼin ta̱ hermano ta̱ naní Wilson Bashou. Ni̱nda̱ka̱tu̱ʼunra yi̱ʼi̱: “¿Á xíniún ña̱ káʼa̱n Ndióxi̱ koo chí nu̱únínu?” Ni̱ka̱ʼa̱nra xíʼi̱n xa̱ʼa̱ ña̱ va̱xi nu̱ú Biblia. Ta̱ Wilson ka̱ʼvira Apocalipsis 17:1 nu̱úi̱ ta ni̱nda̱ka̱tu̱ʼunra yi̱ʼi̱: “¿Ndáaña kúni̱ kachi ti̱kui̱í nu̱ú íyo ñá ñaʼá ñá kísi̱ xíʼin ku̱a̱ʼání ta̱a?” Kǒo níxi̱kunda̱a̱-inii̱ ndáaña kúni̱ kachiña. Tasaá ka̱ʼvira versículo 15 nu̱úi̱ ta ña̱yóʼo káʼa̱nña ti̱kui̱í yóʼo ndánaʼa̱rá na̱ yiví. Nda̱kanda̱ní-inii̱ saáchi na̱ testigo Jehová xíniñúʼuna Biblia ña̱ va̱ʼa ka̱ʼa̱nna xa̱ʼa̱ iin ña̱ʼa ña̱ ndáyáʼviní ña̱ kǒo kúnda̱a̱-iniyó xíʼin. Ta̱ Wilson ta̱xira iin libro ndaʼíi̱ ña̱ naní La verdad que lleva a vida eterna. Libro yóʼo va̱ʼaní chi̱ndeétáʼanña xíʼi̱n.

Tá ni̱ya̱ʼa 10 ki̱vi̱ ni̱xa̱ʼi̱n yichi̱ nu̱ú reunión. Kǒo nándóso-inii̱ xa̱ʼa̱ ña̱ va̱ʼaní nda̱kiʼin na̱ hermano yi̱ʼi̱. Nani saá kǒo nísandákoi̱ ña̱ ku̱ʼi̱n reunión. Ta̱ Wilson ki̱xáʼara sánáʼa̱ra yi̱ʼi̱ xa̱ʼa̱ Biblia ta xa̱ʼa̱ ña̱ xi̱kutóoníi̱ sákuaʼi̱ nda̱a̱ 8 hora xi̱kaʼvindi̱. Tá ku̱ndaa̱-ini na̱ yivái̱ ña̱ ki̱xáʼíi̱ káʼvii̱ xíʼin ta̱yóʼo, ni̱ndi̱ʼi̱ní-inina ta va̱ása ní xi̱kuni̱kana ná kaʼvii̱. Tá ku̱a̱ʼáka yichi̱ xi̱kaʼvii̱ xi̱kunda̱a̱-inii̱ ña̱ nda̱a̱ kúú ña̱ xi̱sakúaʼi̱ xa̱ʼa̱. Ndakuchi tá ku̱i̱ya̱ 1983.

SA̱NDÁKOI̱ UNIVERSIDAD TA KI̱XÁʼÍI̱ KÚI̱ PRECURSOR

Tá nda̱kuchii̱, xa̱ʼa̱ medicina xi̱kaʼvii̱ tiempo saá. Na̱ yivái̱ xi̱kachíñunína ña̱ va̱ʼa sandíʼii̱ kaʼvii̱. Xa̱ʼa̱ ña̱ xi̱kuni̱i̱ kachíñui̱ nu̱ú Jehová ku̱a̱ʼáka tiempo, sa̱ndákoi̱ ña̱ kaʼvii̱.

Yivái̱ ni̱ka̱ʼa̱nra xíʼi̱n tá ná sandákoi̱ ña̱ kaʼvii̱ universidad, taxínra yi̱ʼi̱ ta va̱ása kookai̱ xíʼinra. Xi̱ndakavaní-inii̱ ta kǒo níxi̱kundaa̱-inii̱ ndáaña keʼíi̱. Kúni̱nívai̱ xínii̱ na̱ yivái̱ ta kǒo níxi̱kuni̱i̱ sandákavai̱-inina, xa̱ʼa̱ ña̱kán ku̱a̱ʼá yichi̱ xi̱kitai̱ tá ñuú ta xi̱kaʼi̱n xíʼin Jehová. Ni̱ka̱ʼi̱n xíʼinra. “Chindeétáʼan xíʼi̱n ña̱ vií koo ña̱ ndaka̱xii̱n keʼíi̱”. Sa̱ndákovai̱ ña̱ universidad ta yivái̱ ta̱xínvara yi̱ʼi̱. Ni̱ka̱ʼi̱n xíʼin ta̱ Wilson xa̱ʼa̱ ña̱yóʼo ta ta̱kán nda̱kiʼinra yi̱ʼi̱ ña̱ koi̱ veʼera. Ti̱xin iin bolsa chi̱kai̱ ndiʼi ña̱ʼa ña̱ xi̱kuumiíi̱ ta nda̱ai̱ iin autobús ta nda̱kiʼii̱n ku̱a̱ʼi̱n veʼera. Va̱ʼaní ku̱nii̱ chi ku̱ndaa̱-inii̱ ña̱ nda̱kaxii̱n keʼíi̱, va̱ʼavaña.

Tá ku̱i̱ya̱ 1984 ki̱xáʼíi̱ kúi̱ precursor tasaá ki̱xáʼíi̱ káchíñui̱ nu̱ú Jehová ndiʼi tiempo.

Ndiʼi tiempo ña̱ ni̱xi̱yoi̱ precursor ku̱a̱ʼání ña̱ va̱ʼa sa̱náʼa̱ Jehová yi̱ʼi̱, tá kúú ña̱ kúee koo inii̱. Iin yichi̱ nda̱kava-inii̱ saáchi xi̱kuni̱i̱ ku̱ʼi̱n natúʼi̱n xíʼin na̱ yiví tá xi̱kuaá ta kǒo na̱ ku̱ʼu̱n xíʼi̱n. Soo nisaá ni̱xa̱ʼa̱n iinlá miíi̱ na̱túʼi̱n xíʼin na̱ yiví. Tá ni̱ya̱ʼa u̱vi̱ hora ña̱ na̱túʼi̱n xíʼin na̱ yiví, xi̱kuni̱i̱ ya̱ʼi̱ inka edificio. Ku̱naáníi̱ ta ki̱xáʼa kúni̱ kuun sa̱vi̱ tasaá nda̱kanixi̱níi̱ á ku̱ʼu̱nkai̱ inka veʼe kán á va̱ása. Soo nani tá ku̱a̱ʼi̱n inka piso, nda̱kutáʼi̱n xíʼin iin ta̱ loʼo ta̱ ñuu Filipinas ta nda̱kanixi̱níi̱: “Sana va̱ása kuniso̱ʼovíra”. Soo su̱ví saáví níxi̱yoña chi ka̱ndíxavara kaʼvira ta nda̱a̱ ni̱xa̱a̱ra nda̱kuchira.

KU̱A̱ʼÁNÍ ÑA̱ NDÁYÁʼVI SA̱KUAʼI̱ TI̱XIN BETEL ÑA̱ BROOKLYN

Tá ni̱ya̱ʼa u̱vi̱ ku̱i̱ya̱ ña̱ ni̱xi̱yoi̱ xíʼin ta̱ Wilson, tá ku̱i̱ya̱ 1985 ka̱nana yi̱ʼi̱ ña̱ kachíñui̱ chí Betel ña̱ Brooklyn. Nda̱a̱ táki̱ʼva ni̱ka̱ʼi̱n xíʼinndó tá xa̱ʼa̱, ni̱ka̱ʼa̱nna xíʼi̱n ña̱ kachíñui̱ nu̱ú távána tutu. Iin yichi̱ tá ndíka̱i̱ káchíñui̱ xíʼin máquina tú káchíñu xíʼin tutu, íyo iin ña̱ va̱ása va̱ʼa ke̱ʼíi̱ xíʼin túyóʼo ta ku̱a̱ʼání tutu ndi̱ʼi-xa̱ʼa̱. Na̱ hermano ni̱ka̱ʼa̱nna xíʼi̱n ná ka̱ʼi̱n xíʼin ta̱ superintendente xa̱ʼa̱ ña̱ ku̱u, soo kǒo níkeʼíi̱ iin ña̱ ndáyáʼvi. Ta̱kán sa̱ndákaʼánra yi̱ʼi̱ xa̱ʼa̱ ña̱yóʼo ta ni̱ka̱ʼa̱nra xíʼi̱n: “Iin ña̱ va̱ʼa kúú ña̱ ndukúyó ña̱ káʼnu-ini”. Ku̱ndaa̱-inii̱ ña̱ ndáyáʼviní ndakuniyó ku̱a̱chiyó ta ndukúyó ña̱ káʼnu-ini xa̱ʼa̱ ña̱yóʼo.

Xa̱ʼa̱ ña̱ ki̱ʼii̱n kuenta xíʼin ña̱ xi̱keʼé na̱ hermano na̱ ku̱a̱ʼáka ku̱i̱ya̱ kúúmií, sa̱kuaʼi̱ ña̱ xíniñúʼu chindeétáʼi̱n xíʼin inkana. Iin yichi̱ tá nda̱kutáʼanndi̱ kuxundi̱, ta̱ hermano Milton Henschel, ta̱ xi̱kuu táʼan na̱ Cuerpo Gobernante, ni̱xa̱a̱ra nu̱ú mesa kán ña̱ kuxura xíʼinndi̱. Ki̱vi̱ kán ku̱a̱ʼáníka na̱ hermano ni̱xa̱a̱ kuxu, xa̱ʼa̱ ña̱kán ku̱a̱ʼání chiñu ni̱xi̱yo nu̱ú na̱ mesero. Na̱ hermano na̱ válíka ki̱xáʼa káʼa̱n kúáchindi̱ xa̱ʼa̱ ña̱ kúáchi̱nína ña̱ taxina ña̱ kuxundi̱. Ta̱ hermano Milton nda̱kundichira ta ki̱xáʼa chíndeétáʼanra xíʼin na̱ mesero. Níʼira jarra, si̱táva̱ʼa xíʼin mantequilla ku̱a̱ʼa̱nra ndakara nu̱ú mesa. Xa̱ʼa̱ ña̱ vitání ni̱xi̱yo inira, ña̱yóʼo sa̱ndákaʼánña yi̱ʼi̱ xa̱ʼa̱ ña̱ ke̱ʼé ta̱ Jesús xíʼin na̱ apóstol. Kǒo nínandóso-inii̱ xa̱ʼa̱ ña̱ ke̱ʼéra (Juan 13:3-5).

“XÍNIÑÚʼU SAKÚAʼÚN TU̱ʼUN JAPONÉS”

Tá ku̱i̱ya̱ 1987 ni̱xa̱ʼi̱n ñuu Japón ta nda̱kanda̱ní-inii̱ saáchi na̱ publicador na̱ íyo ñuu kán vitání-inina. Xi̱kuni̱i̱ chindeétáʼi̱n xíʼinna ña̱ natúʼi̱n xíʼin na̱ yiví tu̱ʼun miína soo va̱ása ní xi̱xinii̱ tu̱ʼun yóʼo. Iin ñá hermana ñá ni̱xa̱ʼa̱n Betel ñá naní Michiko Oda, xi̱to káxiñá nu̱úi̱ ta ni̱ka̱ʼa̱nñá xíʼi̱n: “Xíniñúʼu sakúaʼún tu̱ʼun japonés”. Ta ña̱yóʼo kúú ña̱ ke̱ʼévai̱, ña̱ ni̱ka̱ʼa̱nñá chi̱ndeétáʼanníña xíʼi̱n.

Tá ni̱ya̱ʼa loʼo tiempo, na̱samai̱ iin congregación nu̱ú káʼa̱nna tu̱ʼun japonés ña̱ xi̱ndikaa̱ chí Nueva York. Xa̱ʼa̱ ña̱ sa̱kuaʼi̱ tu̱ʼun yóʼo, ku̱a̱ʼáka chiñu ki̱xáʼa kéʼíi̱ nu̱ú Jehová. Tá ku̱i̱ya̱ 1989 ni̱xa̱ʼi̱n ña̱ yichi̱ nu̱ú iin asamblea ña̱ distrito, ña̱ ni̱xi̱yo chí Los Ángeles (California). Kán xi̱nii̱ iin ñá hermana ñá naní Miwako Onami, ñá ni̱ya̱ʼa ti̱xin drama ña̱ ni̱xi̱yo kán.

Tá ku̱i̱ya̱ 1992 ti̱ndaʼa̱ndi̱ ta inkáchi ka̱chíñundi̱ ti̱xin Betel ña̱ Brooklyn. Ñá Miwako va̱ʼaní-iniñá ta ndiʼi tiempo kúni̱ñá chindeétáʼanñá xíʼin inkana. Ña̱ xi̱keʼéñá chi̱ndeétáʼanña xíʼi̱n ña̱ va̱ʼa koo inii̱ xíʼin inkana. Iin regalo ña̱ ta̱xi Jehová ndaʼíi̱ kúú ñáyóʼo saáchi chíndeétáʼanníñá xíʼi̱n ta sákusi̱íníñá-inii̱.

TÁ KA̱CHÍÑUNDI̱ BETEL CHÍ JAPÓN TA SAÁTU TÁ XI̱KUUNDI̱ PRECURSOR ESPECIAL

Tá ni̱ya̱ʼa loʼo ku̱i̱ya̱, na̱ yivá ñá Miwako, na̱ xi̱ndoo chí Japón, ka̱ni kue̱ʼe̱ miína. Na̱ hermano va̱ʼaní ni̱xi̱yo inina xíʼinndi̱ chi ni̱ka̱ʼa̱nna xíʼinndi̱ ña̱ ná ku̱ʼu̱nndi̱ Betel ña̱ ndíkaa̱ chí Japón ña̱ va̱ʼa yatin koondi̱ xíʼin na̱ si̱soi̱ ta kundaandi̱ na̱yóʼo. Tá ku̱i̱ya̱ 1999 ni̱xa̱a̱ndi̱ ñuu kán.

Na̱ hermano na̱ ñúʼu Betel chí Japón va̱ʼaní nda̱kiʼinna miíndi̱. Ña̱ va̱ʼaní ni̱xi̱yo ini na̱ hermano kán chi̱ndeétáʼanña xíʼi̱n ña̱ keʼíi̱ táʼa̱n ña̱ kéʼéna. Tá kúú, xi̱taxina sava ña̱ʼa ndaʼa̱ndi̱. Ta chiñu ña̱ xi̱keʼéna xi̱ndayáʼviníña nu̱úna. Saáchi cultura ña̱ kúúmiína chíndeétáʼanña xíʼinna ña̱ inkáchi kachíñuna, ta su̱ví ña̱ kachíñu miína. Ña̱yóʼo chi̱ndeétáʼanña xíʼi̱n ña̱ vitá koo inii̱ ña̱ kachíñui̱ xíʼin inkana tasaá kíʼi̱n kuenta ña̱ chíndeétáʼi̱n xíʼin Jehová ña̱ saxínura ña̱ ni̱ka̱ʼa̱nra keʼéra ni loʼo chiñu kéʼíi̱ nu̱úra.

Xa̱ʼa̱ ña̱ síín cultura na̱yóʼo ta síín cultura xi̱kuumiíi̱, sava yichi̱ va̱ása níxi̱kunda̱a̱-inii̱ nda̱chun síín xi̱keʼéna sava ña̱ʼa. Xi̱niñúʼu kúee koo inii̱ xíʼinna xíʼin ki̱ʼva ña̱ xi̱keʼíi̱. Kiʼi̱n kuenta tá ndíku̱nyó yichi̱ ña̱ táxi na̱ ñuu Jehová ndaʼa̱yó, ni nda̱a̱ ndáaka ña̱ ndáka̱xinyó kéʼéyó táxivara bendición ndaʼa̱yó. Ta mií Jehová kúú ta̱ chíndeétáʼan xíʼinyó ña̱ vií keʼéyó ndiʼi ña̱ʼa.

Kútóoníi̱ ndakanixi̱níi̱ xa̱ʼa̱ ki̱ʼva ña̱ sa̱náʼa̱ Jehová miíi̱ tá xi̱ndikai̱ Betel, saáchi iin kítáʼanña xíʼin ki̱ʼva ña̱ sa̱náʼa̱ra ta̱ Moisés. Ta̱yóʼo ka̱ʼvi va̱ʼara, soo ti̱xin 40 ku̱i̱ya̱ ña̱ xi̱ndaara ndikachi, Ndióxi̱ sa̱náʼa̱ra miíra ña̱ xíniñúʼu vitá koo inira. Ndiʼi ku̱i̱ya̱ ña̱ xi̱ndikai̱ universidad ni̱nuní xi̱kuni̱, ta ni va̱ása níxindaa-inii̱ inkana, soo Betel sa̱náʼa̱na miíi̱ ña̱ xíniñúʼu vitá koo inii̱ ta ná kundaa-inii̱ Jehová. Ndiʼi ku̱i̱ya̱ yóʼo kúeení ni̱xi̱yo ini Jehová xíʼi̱n ta chi̱ndeétáʼanra xíʼi̱n ña̱ vitá koo inii̱ nda̱a̱ táki̱ʼva ke̱ʼéra xíʼin ta̱ Moisés.

Ki̱ʼva 24 ku̱i̱ya̱ xi̱ndaandi̱ na̱ yivá ñá Miwako nda̱a̱ tá ni̱xi̱ʼi̱na. Xi̱ndi̱ʼi̱ní-inindi̱ ta saátu ku̱a̱ʼání yi̱chi̱ xi̱xaʼa̱nndi̱ hospital. Si̱soi̱ ñá Masako, ndeéní ka̱ni kue̱ʼe̱ miíñá ta ni kǒo níxi̱kivika kakañá, ta xi̱ ixayo̱ʼvi̱ña xíʼinñá ña̱ ku̱ʼu̱nñá reunión ta saátu ña̱ ku̱ʼu̱nñá natúʼunñá xíʼin na̱ yiví. Soo tá kúma̱ní loʼoka kuviñá xi̱xaʼa̱nñá xi̱natúʼunñá xíʼinndi̱ xíʼin silla de rueda. Ni xi̱kuumiíñá kue̱ʼe̱ yóʼo ndiʼi tiempo xi̱kuʼvi̱-iniñá xi̱xiniñá Jehová. Tá xi̱natúʼunñá xa̱ʼa̱ Jehová, xi̱kusi̱íní-iniñá ta va̱ʼaní yichi̱ sa̱ndákooñá nu̱úi̱ ña̱ saá xíniñúʼu keʼé miíi̱ ni nda̱a̱ ndáaka ña̱ ná ndoʼi̱.

Tá ku̱i̱ya̱ 2024, keendi̱ Betel, ta yáʼaka 30 ku̱i̱ya̱ xi̱ñuʼundi̱ kán, tasaá ni̱ka̱ʼa̱nna xíʼinndi̱ ña̱ koondi̱ precursor especial ta chi̱ndaʼána miíndi̱ ña̱ ni̱xa̱ʼa̱nndi̱ iin isla ña̱ naní Okinawa, kán na̱túʼunndi̱ xíʼin na̱ yiví na̱ ni̱xi̱yo yatin nu̱ú xi̱ndoo na̱ soldado. Ndiʼi ña̱ sa̱kúaʼandi̱ ti̱xin Betel va̱ʼaní chíndeétáʼanña xíʼinndi̱ nda̱a̱ tiempo vitin ña̱ viíka sanáʼa̱ndi̱ na̱ yiví. Jehová va̱ʼaní-inira xíʼinndi̱, saáchi xa̱a̱ ku̱a̱ʼá na̱ yiví xa̱a̱ káʼvindi̱ xíʼin ta nda̱a̱ táki̱ʼva íyo na̱ veʼendi̱ saá íyona. Ta kíʼinndi̱ kuenta ña̱ ndáyáʼviní kuʼvi̱-iniyó kuniyó na̱ yiví. Ndiʼi ki̱ʼvi táxindi̱ tíxa̱ʼvi ndaʼa̱ Jehová xa̱ʼa̱ ndiʼi chiñu ña̱ táxira ndaʼa̱ndi̱.

KÚNI̱I̱ ÑA̱ NÁ SANÁʼA̱KA JEHOVÁ YI̱ʼI̱

Ni va̱ása xíín na̱ veʼi̱ kaʼvina, soo vitin va̱ása sásina nu̱úi̱ ña̱ kaʼvii̱. Ta kíʼi̱n kuenta ña̱ xínu ña̱ ni̱ka̱ʼa̱n ta̱ Jesús, ña̱ nda̱a̱ ndáaka na̱ sándakoo na̱ veʼena ña̱ kundiku̱nnara, yáʼaka 100 yichi̱ ndakiʼinna ña̱ va̱ʼa (Mar. 10:29, 30). Xa̱a̱ ku̱a̱ʼání na̱ hermano na̱ íyo iníí saá ñuyǐví va̱ʼaní ndákiʼinna miíi̱, nda̱a̱ táki̱ʼva íyo na̱ veʼi̱ saá íyona.

Kúúmiíkai̱ libro ña̱ ta̱xi ta̱ Wilson ndaʼíi̱. Tá xítoi̱ ña̱yóʼo ndákaʼíi̱n ña̱ va̱ʼaní-ini Jehová xíʼi̱n ta ta̱xira ña̱ ná kunda̱a̱-inii̱ xa̱ʼa̱ra (1 Crón. 28:9). Kúnii̱ ña̱ ná chindeétáʼanka Jehová xíʼi̱n ña̱ viíka kachíñui̱ nu̱úra ta saátu ña̱ chindeétáʼi̱n xíʼin inkana ña̱ kunda̱a̱-inina xa̱ʼa̱ ña̱ nda̱a̱ ta ni̱ʼína ña̱ kutakuna ndiʼi tiempo.