Ná kusi̱í-iniyó xíʼin ña̱ xa̱a̱ kúúmiíyó ni kǒo xu̱ʼúnyó

“YAʼVINÍ ki̱xáʼana íxi̱kóna ña̱ʼa xa̱ʼa̱ ña̱kán ki̱xáʼaña íxayo̱ʼvi̱ña xíʼinndi̱ ñuu nu̱ú xi̱ndoondi̱. Xa̱ʼa̱ ña̱kán miíi̱ xíʼin ñá síʼíi̱ ke̱endi̱ ku̱a̱ʼa̱nndi̱ inka ñuu kachíñundi̱ ta se̱ʼendi̱ ni̱ndo̱ona ñuundi̱. Soo yo̱ʼvi̱ka i̱xaaña xíʼinndi̱ ñuu kán ta va̱ása níkivi ku̱ʼu̱n se̱ʼendi̱ koona xíʼinndi̱. Na̱ hermano na̱ xi̱ndoo ñuundi̱ ni̱ka̱ʼa̱nna xíʼinndi̱ ña̱ va̱ása níxi̱xaʼa̱nka na̱ va̱lí se̱ʼendi̱ reunión ni predicación” (Ta̱ Samuel).a

Ku̱a̱ʼání na̱ ndásakáʼnu Ndióxi̱ íyona ñuu nu̱ú kǒo chiñu á nu̱ú íyoní ña̱ nda̱ʼví xa̱ʼa̱ ña̱ kán ku̱a̱ʼánína xáʼa̱n káchíñu inka ñuu ta sándakoona ñá síʼina xíʼin na̱ va̱lí se̱ʼena, soo kǒo ndákanixi̱nína xa̱ʼa̱ ña̱ kundoʼona. Inkana kéʼéna negocio ña̱ kúni̱na kama koo xu̱ʼúnna soo ku̱a̱ʼáka tu̱ndóʼo kíxi nu̱úna, tá ndeéní ndíʼi̱-iniún xa̱ʼa̱ xu̱ʼún, ¿ndáaña chindeétáʼan xíʼún ña̱ vií koo ña̱ ndaka̱xiún keʼún?

¿NDÁAÑA CHINDEÉTÁʼAN XÍʼINYÓ ÑA̱ KUSI̱Í-INIYÓ?

Ta̱ apóstol Pablo ni̱ka̱ʼa̱nra ña̱ sa̱kúaʼara kusi̱í-inira xíʼin loʼo ña̱ xi̱kuumiíra. Ta̱yóʼo ni̱ka̱ʼa̱nra: “Va̱ʼa kutakui̱ ni ku̱a̱ʼá ña̱ʼa kúúmiíi̱ á loʼoña kúúmiíi̱. Ni nda̱a̱ ndáaka ña̱ yáʼi̱ nu̱ú, sa̱kuaʼi̱ keʼíi̱ iin ña̱ʼa ña̱ loʼoní na̱ yiví xíni̱ keʼé, ni íyo ku̱a̱ʼá ña̱ kuxui̱ á ni kǒoña íyo, ña̱ kuumiíi̱ ku̱a̱ʼá ña̱ʼa á ña̱ kǒo ni loʼo ña̱ʼa kuumiíi̱ ta sa̱kuaʼi̱ ña̱ va̱ʼa kunii̱ xíʼin ña̱yóʼo” (Filip. 4:11, 12).

Yóʼo ku̱ndaa̱-iniyó ña̱ sa̱kúaʼa ta̱ Pablo ku̱si̱í-inira xíʼin loʼo ña̱ xi̱kuumiíra. Ná kotoyó ku̱mí texto ña̱ chindeétáʼan xíʼún keʼún táʼan ña̱ ke̱ʼéra.

Texto ña̱ nu̱ú: “Kǒo kutóoníndó kuumiíndó xu̱ʼún, va̱ʼaka kusi̱í-inindó xíʼin ña̱ʼa ña̱ xa̱a̱ kúúmiíndó. Saáchi ta̱kán káchira: ‘Nda̱a̱ ni iin yichi̱ va̱ása sandákoi̱ yóʼó ta nda̱a̱ ni iin yichi̱ va̱ása sañándaʼíi̱ yóʼó’” (Heb. 13:5).

¿Nda̱chun va̱ʼaní chindeétáʼan texto yóʼo xíʼinyó? Na̱ kútóoní kuumií xu̱ʼún chitáʼanna ña̱ kúúmiína xíʼin ña̱ kúúmií inkana ta kúni̱na koo ku̱a̱ʼáníka ña̱ʼana, xa̱ʼa̱ ña̱yóʼo kǒo kúsi̱íka-inina. Tá kúsi̱í-iniyó xíʼin loʼo ña̱ kúúmiíyó va̱ása ndi̱ʼi̱ní-iniyó.

¿Ndáaña kivi keʼún? Nu̱úka ña̱ kotoún ki̱ʼva ña̱ íyo inkana, va̱ʼaka kusi̱í-ini xíʼi ña̱ xa̱a̱ kúúmiíún, ndakaʼán ña̱ káʼa̱n Jehová taxira ña̱ xíniñúʼun na̱ kéʼé siʼna chiñu nu̱úra ta su̱ví na̱ ndíʼi̱-ini xa̱ʼa̱ xu̱ʼún (Mat. 6:24, 33). Ndiʼi tiempo taxiún tíxa̱ʼvi ndaʼa̱ Jehová xa̱ʼa̱ ña̱ táxira ña̱ xíniñúʼún. Ta̱ Pablo ni̱ka̱ʼa̱nra: “Nani íyo loʼo ña̱ kuxuyó xíʼin ti̱ko̱to̱yó ña̱ kundixiyó ná kusi̱í-iniyó xíʼin ña̱yóʼo” (1 Tim. 6:8).

Iin na̱ matrimonio ndítana xíʼin tú exhibidor. Ta̱ hermano chíndeéra iin ta̱a. — Siʼnaka chiñu Jehová kundi̱ʼi̱-iniún xa̱ʼa̱.

Texto ña̱ u̱vi̱: “Nda̱a̱ ni iin yichi̱ kǒo kundi̱ʼi̱ní-inindó ta ni va̱ása ka̱ʼa̱nndó: ‘¿Ndáaña kuxuyó?’, á ‘¿Ndáaña koʼoyó?’, á ‘¿Ndáaña kundixiyó?’. Chi na̱ ñuyǐví yóʼova kúú na̱ ndíʼi̱ní-ini xa̱ʼa̱ ña̱yóʼo. Yivándó ta̱ íyo chí ndiví xíni̱vara ña̱ xíniñúʼundó ndiʼi ña̱yóʼo” (Mat. 6:31, 32).

¿Nda̱chun va̱ʼaní chindeétáʼan texto yóʼo xíʼinyó? Tá ndáa-iniyó Jehová ña̱ kundaara miíyó ta chindeétáʼanra xíʼinyó, va̱ása yi̱ʼvíyó ña̱ koo chí nu̱únínu ta ni va̱ása kundi̱ʼi̱-iniyó ña̱ ndakanixi̱níyó xa̱ʼa̱ táʼan pregunta yóʼo. “¿Ndáaña keʼíi̱ tá chí nu̱únínu yo̱ʼvi̱ka kooña?”. “¿Á Kǒo kivi taxii̱ ña̱ kuniñúʼu na̱ veʼi̱?”. Ki̱ʼva saá xi̱ndakanixi̱ní ta̱ Eric ta̱ íyo chí ñuu Ghana. ¿Ndáaña chi̱ndeétáʼan xíʼinra ña̱ ki̱xáʼa ndákanivíxi̱níra vitin? Ta̱yóʼo káchira: “Ña̱ kusi̱í-iniyó kǒo kúni̱ kachiña ña̱ kǒo tu̱ndóʼo nu̱úyó, chi ña̱ kúni̱ kachiña kúú ña̱ kúsi̱í-iniyó xíʼin ña̱ kúúmiíyó ta kéʼéyó ña̱ kivi keʼé kuitívayó”.

¿Ndáaña kivi keʼún? Ka̱ʼa̱n xíʼin Jehová xa̱ʼa̱ ña̱ xíniñúʼún, ta ndukú ña̱ ndíchi nu̱úra (Sant. 1:5). Ka̱ʼa̱n xíʼin na̱ hermano na̱ va̱ʼaní ndásakáʼnu Ndióxi̱ xa̱ʼa̱ ña̱ ndóʼún, ta nda̱ka̱tu̱ʼun miína ndáaña ke̱ʼéna tá ni̱ya̱ʼana nu̱ú tu̱ndóʼo táʼan ña̱ ndóʼún (Prov. 20:18). Kiʼin kuenta ndáa ki̱ʼva chíndeétáʼan Jehová xíʼún ndiʼi ki̱vi̱. Ña̱yóʼo chindeétáʼan xíʼún ña̱ kǒo kundi̱ʼi̱ní-iniún xa̱ʼa̱ ña̱ kixi chí nu̱únínu (Mat. 6:25-30, 34). Va̱ása nandóso-iniún xa̱ʼa̱ ña̱ ka̱ʼyi ta̱ David: “Ku̱a̱ʼání tu̱ndóʼo íyo nu̱ú na̱ kéʼé ña̱ nda̱kú, soo Jehová sáka̱kurana nu̱ú ndiʼi ña̱yóʼo” (Sal. 34:19).

Texto ña̱ u̱ni̱: “Na̱ viíní ndákanixi̱ní xítona ndáaña i̱yo kundoʼona ta xíko̱ose̱ʼéna; soo na̱ kíʼví va̱ása xíko̱ose̱ʼéna nu̱úña ta xóʼvi̱na” (Prov. 27:12).

¿Nda̱chun va̱ʼaní chindeétáʼan texto yóʼo xíʼinyó? Sana nu̱ú anuncio á nu̱ú internet ka̱ʼa̱nna ndáaña kivi keʼún ña̱ va̱ʼa kama ndukúikáún ta sana kuni̱ún keʼún ña̱yóʼo tá íxama̱ní xu̱ʼún nu̱ún, soo ku̱a̱ʼání na̱ kéʼé negocio yóʼo xáa̱na ndákava-inina chi kǒo xínu ña̱ kúni̱na (Prov. 18:11; 1 Tim. 6:9). Ña̱ ndíchi chindeétáʼan xíʼún ña̱ va̱ʼa kǒo taxiún ña̱ sandáʼvina yóʼó.

¿Ndáaña kivi keʼún? Tá iinna káʼa̱nna xíʼún ña̱ ku̱a̱ʼání xu̱ʼún chaʼvina yóʼo tá ná keʼún iin chiñu, kiʼin kuenta xíʼin ña̱yóʼo ndáa xa̱ʼa̱ kúú ña̱ kúni̱na chaʼvina ku̱a̱ʼání xu̱ʼún yóʼó. Ndakaʼán ña̱ káʼa̱n Biblia ña̱yóʼo: “Na̱ kíʼví kándíxana ndiʼi ña̱ káʼa̱nna xíʼinna, soo na̱ ndíchi viíní ndákanixi̱nína ndáaña keʼéna” (Prov. 14:15). Kǒo taxiún ña̱ sandáʼvina yóʼó, ta kǒo keʼún chiñu nu̱ú kivi sandáʼviún na̱ yiví (Prov. 28:6, 20; Jer. 17:9).

Iin ta̱ loʼo ndáya̱kúnra escalera. — Kǒo kukaʼan nu̱ún keʼún sava chiñu.

Texto ña̱ ku̱mí: “¿Ndáa ndóʼó kúni̱ keʼé iin veʼe á va̱ása siʼna kundoondó ta tavándó ki̱ʼva á kita xu̱ʼúnndó ña̱ saxínundóña?” (Luc. 14:28).

¿Nda̱chun va̱ʼaní chindeétáʼan texto yóʼo xíʼinyó? Ña̱ chaʼvi va̱ʼana miíyó kivi chindeétáʼanña xíʼinyó ña̱ kitayó nu̱ú iin tu̱ndóʼo, soo kivi kixi inkaña nu̱úyó. Ña̱ va̱ʼa vií koo ña̱ ndaka̱xinyó keʼéyó, siʼna ná ndakanivíxi̱níyó xa̱ʼa̱ ndiʼi ña̱ʼa ña̱ kivi kundoʼoyó.

¿Ndáaña kivi keʼún? Vií va̱ʼa ndakanixi̱níún tá káʼa̱nna ña̱ chaʼvina ku̱a̱ʼání xu̱ʼún yóʼo. Sana inka ñuu ku̱a̱ʼáva xu̱ʼún cháʼvina, soo saátu yaʼviní ña̱ʼa ñuu kán. Ta saátu tá ñá síʼún kǒo kivi ku̱ʼu̱nñá xíʼún á na̱ va̱lí se̱ʼún, ndakanixi̱ní xa̱ʼa̱ ña̱ kivi kundoʼona ta nda̱ka̱tu̱ʼún ña̱yóʼo miíún, ¿á va̱ʼaka xa̱a̱ndi̱ ndasakáʼnundi̱ Ndióxi̱ saá? Tá ná keʼún chiñu yóʼo, ¿á kivi keʼún chiñu nu̱ú Jehová xíʼin ndinuʼu-iniún? (Luc. 10:27).

Ta̱ hermano ta̱ xi̱niyó nu̱ú na̱ʼná ña̱ ni̱ya̱ʼa káʼvira xíʼin na̱ veʼera. — Xíniñúʼu koún xíʼin na̱ veʼún ña̱ va̱ʼa kiʼún kuenta xíʼinna.

ÑA̱ VA̱ʼA NDAKIʼÚN

Tá kúsi̱í-iniyó xíʼin loʼo ña̱ kúúmiíyó saá kiʼinyó kuenta ña̱ ndáa Jehová miíyó ta kúni̱ra xínira miíyó (Sal. 34:8). Ná taxiyó tíxa̱ʼvi ndaʼa̱ra xa̱ʼa̱ ndiʼi ña̱ táxira ndaʼa̱yó ndiʼi ki̱vi̱.

Ña̱ yóʼo kúú ña̱ ndo̱ʼo ta̱ Samuel ta̱ xa̱a̱ ni̱ka̱ʼa̱nyó xa̱ʼa̱. Ta̱yóʼo káchira: “Ni̱ka̱ʼa̱nndi̱ xíʼin Jehová ña̱ ná taxira ña̱ ndíchi ndaʼa̱ndi̱, tasaá ndi̱kói̱ xíʼin ñá síʼi̱ ñuundi̱, ta ki̱xáʼandi̱ káchíñundi̱ chiñu ña̱ xi̱kachíñundi̱ tá ya̱chi̱ ta saátu ña̱ kíʼinndi̱ kuenta xíʼin na̱ va̱lí se̱ʼendi̱ ta ki̱xáʼandi̱ káʼvindi̱ Biblia xíʼin iin tá iin na̱ va̱lí se̱ʼendi̱, xáʼa̱nna xíʼinndi̱ reunión ta saátu predicación. Xa̱ʼa̱ ña̱ ndíʼi̱ka-inii̱ xa̱ʼa̱ chiñu Ndióxi̱ va̱ása ndíʼi̱ka-inii̱ ña̱ kuumií ku̱a̱ʼáka ña̱ʼa, kúsi̱íníva-inindi̱ ña̱ ndi̱kóndi̱”.

Ná kǒo nandósóyó ña̱ káchíñuyó nu̱ú “Ndióxi̱ ta̱ si̱í-ini” ta espíritu santora kivi chindeétáʼan xíʼinyó ña̱ kusi̱í-iniyó ni yáʼayó nu̱ú tu̱ndóʼo (1 Tim. 1:11; Gál. 5:22, 23). Si̱lóʼo kúma̱ní ta kixaa̱ ñuyǐví xa̱á. Jehová taxira ku̱a̱ʼání ña̱ʼa ndaʼa̱ na̱ yiví ña̱ va̱ʼa kusi̱í-inina (Sal. 72:16; 145:16).

a Na̱sama ki̱vi̱ra.