¿Á xa̱a̱ xíni̱ún xa̱ʼa̱ ña̱yóʼo?
¿Ndáa ki̱ʼva xi̱ndixi na̱ soldado na̱ xi̱ndaa ta̱ rey ñuu Roma?
Ta̱ César Augusto ta̱ xi̱kuu rey ñuu Roma nda̱kaxinra sava na̱ soldado ña̱ va̱ʼa kundaana miíra tá ku̱i̱ya̱ 27 tiempo xi̱naʼá. Nani tá tiempo saá na̱ soldado yóʼo ki̱xáʼana ndáana na̱ xi̱kuu rey xíʼin na̱ veʼena.
Iin ta̱ soldado ndíxira iin capa ta inkara kǒoña ndíxira.
Tá xi̱ndoo na̱ soldado yóʼo ñuu Roma xi̱ndixina nda̱a̱ táki̱ʼva xi̱ndixi na̱ yiví ñuu kán. Xi̱ndixina iin ti̱ko̱to̱ xíʼin iin capa ta ndíka̱ ni̱xi̱yoña ña̱ va̱ʼa ka̱nda̱na xíʼinña. Ta tá xi̱ndaana ta̱ rey chí ñuu Roma xi̱ndixina ti̱ko̱to̱ náni̱ ña̱ va̱ʼa náʼa̱ ta nda̱saa ta̱a xi̱ndixi ña̱yóʼo.
Xi̱ndakuni na̱ yiví na̱yóʼo xa̱ʼa̱ ña̱ xi̱niʼina espada xíʼin yuchu̱. Iin tutu ña̱ káʼa̱n xa̱ʼa̱ ña̱ ku̱u xi̱naʼá káʼa̱nña: “Tá xi̱ndoo na̱ soldado ñuu Roma xi̱ndixina nda̱a̱ táki̱ʼva xi̱ndixi na̱ yiví ñuu kán, ta xi̱niʼina espada xíʼin yuchu̱” (Brill’s New Pauly: Encyclopaedia of the Ancient World). Xi̱ndikaa̱ cinturón tokóna nu̱ú xi̱tikaa yuchu̱ xíʼin espada.
Na̱ soldado xi̱ndixina ti̱ko̱to̱ náni̱ ña̱ va̱ʼa náʼa̱, tá xi̱ndaana iin na̱ yiví na̱ ndáyáʼvi.
Sana na̱ soldado na̱ xi̱ndaa ta̱ apóstol Pablo tá xi̱ndasira u̱vi̱ ku̱i̱ya̱ chí ñuu Roma xi̱kuu na̱ soldado na̱ xi̱ndaa na̱ rey. Ta̱ Pablo ndu̱kúra iin veʼe nu̱ú koora nani ndátura ndatiinna ku̱a̱chi xíʼinra ta veʼe kán nda̱kasinara, soo va̱ʼava xi̱xaʼa̱nna xi̱xitonara. Ta xi̱natúʼunra xíʼin ndiʼi na̱ xi̱xaʼa̱n xi̱xito miíra xa̱ʼa̱ Ndióxi̱, xi̱xiniñúʼura tu̱ʼun Ndióxi̱ ña̱ va̱ʼa ka̱ʼa̱nra xíʼinna ña̱ xi̱kuu ta̱ Jesús ta̱ Mesías ta xi̱kaʼa̱nra xíʼinna ña̱ iinlá Reino Ndióxi̱ kúú ña̱ kivi chindeétáʼan xíʼin na̱ yiví (Hech. 28:16, 23, 30, 31).
Ta̱ Pablo ni̱ka̱ʼa̱nra: “Ndiʼi na̱ soldado na̱ ndáa yéʼéchíñu ta̱ rey ñuu Roma xíʼin ndiʼika na̱ yiví, kúnda̱a̱-inina ña̱ ndíka̱i̱ veʼeka̱a xa̱ʼa̱ ta̱ Cristo” (Filip. 1:12, 13). Xíʼin ña̱yóʼo kúnda̱a̱-iniyó ña̱ ku̱a̱ʼání xi̱kuu na̱ soldado na̱ xi̱ndaa na̱ rey. Tá xi̱ndasi ta̱ Pablo, Jehová chi̱ndeétáʼanra xíʼinra ña̱ na̱túʼunra xíʼin ku̱a̱ʼání na̱ yiví.