Ná taváyó tiempo ña̱ koo mitúʼunyó

JEHOVÁ ni̱ka̱ʼa̱nra xíʼin ta̱ Josué: “Va̱ása xíniñúʼu sandákoún ña̱ kaʼviún ña̱ káʼa̱n Ley yóʼo. Ñuú xíʼin káʼñu xíniñúʼu kaʼviúnña ta ndakanixi̱níún xa̱ʼa̱ ña̱ káʼa̱nña, ña̱ va̱ʼa viíní keʼún ndiʼi ña̱ ni̱ka̱ʼyi̱ nu̱úña” (Jos. 1:8). Saátu miíyó xíniñúʼu kaʼviyó Biblia ña̱ va̱ʼa kuyatinkayó nu̱ú Jehová (Sant. 4:8).

Va̱ása xíniñúʼu kaʼvi kuitíyó Biblia, chi saátu xíniñúʼu ndakanixi̱níyó xa̱ʼa̱ ña̱ káʼviyó ña̱ va̱ʼa chindeétáʼanña xíʼinyó. Ña̱ va̱ʼa kaʼviyó xíniñúʼu kooyó lugar nu̱u kǒo na̱ yiví á ña̱ kivi kasi nu̱úyó, tasaá koo ku̱a̱ʼá tiempo nu̱úyó ña̱ ka̱ʼa̱nyó xíʼin Jehová ta kǒo ña̱ sandíʼi̱-iniyó.

ÑA̱ NI̱XI̱YO MITÚʼUN TA̱ JESÚS XI̱NDAYÁʼVINÍÑA NU̱ÚRA

Ta̱ Jesús xi̱tavára tiempo ña̱ koo mitúʼunra. Tá kúú iin yichi̱ ni̱xi̱yo mitúʼunra soo ku̱a̱ʼání na̱ yiví ni̱xa̱ʼa̱n nu̱úra. ¿Ndáaña ke̱ʼéra? Ta̱vára tiempo ña̱ sa̱ndáʼara na̱ xi̱kuumií kue̱ʼe̱ saátu ke̱ʼéra milagro ña̱ ta̱xira xi̱xi ku̱a̱ʼání na̱ yiví (Mat. 14:13, 14, 19, 20).

Soo, ¿á xa̱ʼa̱ ña̱yóʼo va̱ása níkivika koo mitúʼunra? Va̱ásaví. Saáchi Biblia káʼa̱nña tándi̱ʼi ta̱xira xi̱xi ku̱a̱ʼání na̱ yiví: “Nda̱a mitúʼunra chí yuku̱ ña̱ va̱ʼa ka̱ʼa̱nra xíʼin Ndióxi̱. Ta kán ni̱xi̱yo mitúʼunra nda̱a̱ tá ku̱ñuú”. Ndi̱kóra ka̱a u̱ni̱ naʼa á ka̱a i̱ñu̱ xi̱ta̱a̱n (Mat. 14:23-25).

Ta̱ Jesús ta̱vára tiempo ña̱ ka̱ʼa̱nra xíʼin Jehová ta saátu ña̱ ndakanixi̱níra xa̱ʼa̱ ña̱ kítáʼanra xíʼinra. Ta̱yóʼo kǒo ku̱a̱chi níxikuumiíra soo ta̱vára tiempo ña̱ ni̱ka̱ʼa̱nra xíʼin yivára nu̱ú kǒo na̱ yiví. Miíyó xíniñúʼu tavákayó tiempo ña̱ ka̱ʼa̱nyó xíʼin Jehová xa̱ʼa̱ ña̱ kúúyó na̱ yiví ku̱a̱chi.

¿NDA̱CHUN ÍXAYO̱ʼVI̱ÑA XÍʼIN SAVANA ÑA̱ KOO MITÚʼUNNA?

Ndóoyó ñuyǐví nu̱ú íyo ku̱a̱ʼání ña̱ kivi kasi nu̱úyó. Ni tá íyo mitúʼunyó nu̱ú celular ña̱ kúúmiíyó kivi kixaa̱ iin mensaje nu̱úyó ta kuni̱yó kotoyóña, tá ná ndaʼvayóña kivi kixáʼayó ndakanixi̱níyó: “Sana ka̱ʼa̱n iinna xíʼi̱n á kúni̱na ka̱ʼa̱nna xa̱ʼa̱ iin ña̱ʼa ña̱ númi̱, va̱ása xíniñúʼu ndaʼvavíi̱ ña̱yóʼo”.

Xa̱ʼa̱ ña̱ íyoní chiñu nu̱ú na̱ yiví va̱ása kúni̱na koo mitúʼunna, chi ndiʼi tiempo kúni̱na kúúmiína celular á inkaka ña̱ʼa. Sava na̱ yiví íxayo̱ʼvi̱ña xíʼinna ña̱ koo mitúʼunna ta ndakanixi̱nína xa̱ʼa̱ iin ña̱ʼa. Iin ñá socióloga ñá naní Sherry Turkle ni̱ka̱ʼa̱nñá ña̱yóʼo: “Íxayo̱ʼvi̱níña xíʼin na̱ yiví tavána tiempo ña̱ ndakanixi̱nína”. ¿Ndáaña kivi keʼéyó ña̱ va̱ʼa kundiku̱nyó yichi̱ ta̱ Jesús tasaá taváyó tiempo ña̱ koo mitúʼunyó ta ka̱ʼa̱nyó xíʼin Jehová?

¿NDÁA KI̱ʼVA TAVÁYÓ TIEMPO ÑA̱ KOO MITÚʼUNYÓ?

Nda̱a̱ táki̱ʼva xa̱a̱ ni̱ka̱ʼa̱nyó ta̱ Jesús ta̱vára tiempo ña̱ ni̱xi̱yo mitúʼunra. Ná kotoyó ndáaña ke̱ʼéra.

Ña̱ nu̱ú, Biblia káʼa̱nña ña̱ ni̱ka̱ʼa̱nra xíʼin na̱ yiví ña̱ ná ku̱ʼu̱nna (Mat. 14:22). Kiviva sandáʼara ku̱a̱ʼáka na̱ yiví, saátu kivi sanáʼa̱kara xa̱ʼa̱ Ndióxi̱. Ndiʼi tiempova xi̱xiniñúʼuna ña̱ chindeétáʼanra xíʼinna, soo xi̱niñúʼu tavára tiempo ña̱ koo mitúʼunra. Tá va̱ása nítavára tiempo ña̱ ka̱ʼa̱nra xíʼin yivára sana va̱ása kiviví chindeétáʼanra xíʼin na̱ yiví.

Ña̱ u̱vi̱, Biblia káʼa̱nña: “Ni̱ka̱ʼa̱nra xíʼin na̱ discípulora ña̱ ná ndaana barco ta ya̱ʼana inka xiyo” (Mat. 14:22). Tu̱ʼun griego ña̱ ni̱ka̱ʼyi̱ nu̱ú Biblia “ni̱ka̱ʼa̱nra” ña̱yóʼo kúni̱ kachiña ña̱ i̱xandúxara xíʼinna ña̱ ná ku̱ʼu̱nna. Ta̱ Jesús xi̱kunda̱a̱-inira ña̱ kǒo kívi koo mitúʼunra xa̱ʼa̱ ña̱kán ke̱ʼéra iin ña̱ʼa, ni̱ka̱ʼa̱nra xíʼin na̱ discípulora ña̱ ná ku̱ʼu̱nna inka xiyo.

Nda̱a̱ táki̱ʼva ke̱ʼé ta̱ Jesús, ná taváyó tiempo ña̱ koo mitúʼunyó. Tá ndiʼi tiempo kítáʼanyó xíʼin na̱ migoyó á kéʼéyó chiñu ti̱xin congregación, ta ni kǒoka tiempo nu̱úyó ña̱ koo mitúʼunyó ña̱ va̱ʼa ka̱ʼa̱nyó xíʼin Ndióxi̱ á ndakanixi̱níyó xa̱ʼa̱ ña̱ sákuaʼayó, xíniñúʼu keʼéyó iin ña̱ʼa. Su̱ví ndiʼiví nu̱ú kánana miíyó xíniñúʼu ku̱ʼu̱nyó, ta ná kǒo ndakava-iniyó tá kǒo kívi chindeétáʼanyó xíʼin inkana ndiʼi tiempo. To̱ʼó ná ka̱ʼa̱nyó xíʼinna ña̱ kǒo kivi keʼéyó sava ña̱ʼa.

Ná taváyó tiempo ña̱ koo mitúʼunyó nda̱a̱ táki̱ʼva ke̱ʼé ta̱ Jesús. Tá táváyó tiempo ña̱ kaʼviyó Biblia ta ndákanixi̱níyó xa̱ʼa̱ ña̱yóʼo, saá kúú ña̱ keʼéyó ña̱ʼa ña̱ ndáyáʼviní, ña̱ kutáʼan va̱ʼayó xíʼin Jehová (Filip. 1:10).