U̱ni̱ ña̱ kivi keʼún ña̱ va̱ʼa ku̱a̱ʼáka tiempo keʼún oración

Iin ña̱ ndáyáʼviní kúú ña̱ ka̱ʼa̱nyó xíʼin Ndióxi̱, ta̱yóʼo kútóoníra ña̱ ná ka̱ʼa̱nyó xíʼinra (Prov. 15:8). ¿Á xa̱a̱ chínúún meta nu̱ún ña̱ va̱ʼa ku̱a̱ʼáka tiempo ka̱ʼún xíʼin Ndióxi̱? Tá saá kéʼún iin ña̱ va̱ʼaní kúú ña̱yóʼo. Sava yichi̱ ku̱a̱ʼáva tiempo xíniñúʼu ka̱ʼa̱nyó xíʼin Jehová ña̱ va̱ʼa natúʼunyó xíʼinra xa̱ʼa̱ ña̱ ndákanixi̱níyó xíʼin ña̱ ndóʼoyó (Luc. 6:12). Nu̱ú artículo yóʼo sakúaʼayó u̱ni̱ ña̱ʼa ña̱ kivi chindeétáʼan xíʼinyó ña̱ va̱ʼa ku̱a̱ʼáka tiempo ka̱ʼa̱nyó xíʼin Ndióxi̱. Ku̱a̱ʼání ña̱ va̱ʼa ndakiʼinyó tá ná chikaa̱yó ndee̱ ka̱ʼa̱nyó xíʼin Jehová chi saá kuyatinkayó nu̱úra (Filip. 1:10).

1 TAVÁ TIEMPO ÑA̱ KA̱ʼÚN XÍʼIN NDIÓXI̱

Ndiʼiyó íyoní chiñu nu̱úyó. Xa̱ʼa̱ ña̱kán loʼoní káʼa̱nyó xíʼin Jehová. Su̱ví iin ku̱a̱chiví kúú ña̱yóʼo, chi ni loʼoní tiempo ná ka̱ʼa̱nyó xíʼin Jehová kivi ka̱ʼa̱nyó xíʼinra xa̱ʼa̱ ña̱ʼa ña̱ ndáyáʼviní. Tá kúni̱ún ku̱a̱ʼáka tiempo ka̱ʼún xíʼin Jehová xíniñúʼu taváún tiempo ama kúú ña̱ keʼúnña. ¿Ndáaña chindeétáʼan xíʼún ña̱ va̱ʼa keʼúnña?

Koto ndáa hora kúú ña̱ kǒo ku̱a̱ʼá chiñu nu̱ún ña̱ va̱ʼa ka̱ʼún xíʼin Ndióxi̱. Sava yichi̱ xi̱ta̱a̱nní xi̱kaʼa̱n ta̱ Jesús xíʼin yivára ta sava yichi̱ xi̱ñuú xi̱kaʼa̱nra xíʼinra (Mat. 14:23; Mar. 1:35). Kivi keʼún táʼan ña̱ ke̱ʼéra, ya̱chi̱ ndakoún á xa̱a̱ ñuú loʼoka ku̱su̱n. Tá kúú ñá Ana siʼí ta̱ profeta Samuel, ñáyóʼo ku̱a̱ʼá tiempo xi̱kaʼa̱nñá xíʼin Ndióxi̱ tá xi̱sandíʼiñá xi̱xixiñá xíʼin na̱ veʼeñá (1 Sam. 1:9, 12). Xi̱taváñá tiempo ña̱ ka̱ʼa̱nñá xíʼin Ndióxi̱ tá kǒo ku̱a̱ʼá chiñu níxi̱xiyo nu̱úñá.

2 XA̱A̱ YA̱CHI̱KA NDAKANIXI̱NÍÚN NDAÁÑA KA̱ʼÚN XÍʼIN NDIÓXI̱

Tá xa̱a̱ nda̱kaxiún ndáa hora ka̱ʼún xíʼin Ndióxi̱, vitin ndakanixi̱ní ndáaña ka̱ʼún xíʼinra. ¿Á xa̱a̱ ndóʼún ña̱yóʼo sava yichi̱ kíxáʼún ka̱ʼún xíʼin Jehová ta nándóso-iniún ndáaña ka̱ʼún xíʼinra? ¿Á suvi ta suvi ña̱ káʼún xíʼinra ndiʼi ki̱vi̱? Ndiʼivayó kivi kundoʼo ña̱yóʼo. Ná kotoyó ndáaña kivi chindeétáʼan xíʼinyó.

Siʼna ndakanixi̱níún ndáaña kúni̱ún ka̱ʼún xíʼinra ta kaʼyíña nu̱ú iin tutu. Tá xa̱a̱ ka̱ʼún xíʼinra kaʼvi ña̱ ka̱ʼyíún nu̱ú tutu ña̱ va̱ʼa ndakaʼún ña̱ ka̱ʼún xíʼinra, saá kúú ña̱ kivi ka̱ʼún xíʼin Jehová ña̱ ndakanixi̱níún xíʼin ña̱ ndíkaa̱ níma̱ún (Sal. 19:14).

3 NDA̱KAXIN IIN LUGAR NU̱Ú KEʼÚN ORACIÓN

Tá xa̱a̱ nda̱kanixi̱níún ama ka̱ʼún xíʼin Jehová ta ndáaña ka̱ʼún xíʼinra, saátu koto ndáa lugar ka̱ʼún xíʼinra. Keʼé nda̱a̱ táki̱ʼva ke̱ʼé ta̱ Jesús, ndúkú iin lugar nu̱ú kǒo na̱ yiví ña̱ va̱ʼa ka̱ʼún xíʼinra (Luc. 5:16). ¿Ndáa lugar kivi ka̱ʼún xíʼin Jehová?

Kivi ka̱ʼún xíʼin Ndióxi̱ ini cuarto nu̱ú kǒo na̱ veʼún, iin ñá hermana ñá naní Keirsten káchiñá: “Káʼi̱n xíʼin Jehová chí ventana nu̱ú tívi xítoi̱ yo̱o̱ xíʼin ki̱mi, chi saá túvii̱ ña̱ íyo yatin Jehová xíʼi̱n ta va̱ʼaní nátúʼi̱n xíʼinra xa̱ʼa̱ ña̱ ndóʼi̱”.

Inkaka ña̱ kivi keʼún kúú ña̱ ka̱ʼún xíʼin Ndióxi̱ nda̱a̱ ndáaka nu̱ú xíkaún. Iin ñá hermana ñá naní Elizabeth káchiñá: “Kútóoníi̱ ku̱ʼi̱n iin lugar ña̱ va̱ʼa natúʼi̱n xíʼin Jehová xa̱ʼa̱ ndiʼi ña̱ ndóʼi̱”. Kivi ka̱ʼún xíʼin Jehová tá ndíka̱ún ini veʼún á nda̱a̱ ndáaka nu̱ú xíkaún, soo ndukú iin lugar nu̱ú kivi koo mitúʼún ña̱ va̱ʼa ka̱ʼún xíʼinra.