¿Ndáaña kivi keʼíi̱ ña̱ va̱ʼa koi̱ migo Ndióxi̱?

Ña̱ káʼa̱n Biblia xa̱ʼa̱ ña̱yóʼo

Tá kúni̱ún koún migo Ndióxi̱ siʼna xíniñúʼu chika̱ún ndee̱ ña̱ kuxini̱únra ta keʼún ña̱ʼa ña̱ kútóora. Tá ná keʼún ña̱yóʼo saá kuyatin Ndióxi̱ nu̱ún (Santiago 4:8). Biblia káʼa̱nña xíʼinyó ña̱ “va̱ása xíká íyora nu̱ú iin iinyó” (Hechos 17:27).

• ¿Ndáaña kivi keʼún ña̱ va̱ʼa koún migo Ndióxi̱?

• Ña̱ ndákanixi̱ní na̱ yiví xa̱ʼa̱ ña̱ kooyó migo Ndióxi̱

¿Ndáaña kivi keʼún ña̱ va̱ʼa koún migo Ndióxi̱?

Kaʼvi Biblia

• Ña̱ káʼa̱n Biblia: “Ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña” (2 Timoteo 3:16).

• Ña̱ kúni̱ kachiña: Mií Ndióxi̱ kúú ta̱ ni̱ka̱ʼa̱n ña̱ ni̱ka̱ʼyi̱ nu̱úña. Miíra ni̱ka̱ʼa̱n xíʼin sava ta̱a ña̱ va̱ʼa kaʼyíraña, nu̱ú tu̱ʼunra ña̱ Biblia káʼa̱nra xíʼinyó ndáa ki̱ʼva kúni̱ra ná kooyó ta saátu káʼa̱nra xíʼinyó ndáa ki̱ʼva íyora tá kúú ña̱ kúni̱níra xínira miíyó, nda̱kúní ndátiinra ku̱a̱chi ta kúndáʼvi-inira xínira miíyó (Éxodo 34:6; Deuteronomio 32:4).

• Ña̱ kivi keʼún: Kaʼvi Biblia ndiʼi ki̱vi̱ (Josué 1:8). Ndakanixi̱ní xa̱ʼa̱ ña̱ xa̱a̱ ka̱ʼviún. Ndakanixi̱ní xa̱ʼa̱ ña̱yóʼo: “¿Ndáaña sánáʼa̱ ña̱yóʼo yi̱ʼi̱ xa̱ʼa̱ Ndióxi̱?” (Salmo 77:12).

  Kivi keʼún ña̱yóʼo, kaʼvi Jeremías 29:11 tándi̱ʼi ndakanixi̱ní xa̱ʼa̱ ña̱yóʼo: “¿Ndáaña kúni̱ Ndióxi̱ ná kundoʼi̱? ¿Ña̱ koo va̱ʼi̱ á ña̱ koo tu̱ndóʼo nu̱úi̱? ¿Á ta̱ ku̱a̱chi-ini kúú Ndióxi̱? ¿Á kúni̱ra ña̱ vií ná kana ndiʼi ña̱ kéʼíi̱?”.

Koto ña̱ i̱xava̱ʼara

• Ña̱ káʼa̱n Biblia: “Ña̱ va̱ʼa ña̱ kúúmiíra kǒo kívi kuniyóña soo kiviva kunda̱a̱-iniyó xa̱ʼa̱ña tá ná sakúaʼayó ndáa ki̱ʼva i̱xava̱ʼara ñuyǐví” (Romanos 1:20).

• Ña̱ kúni̱ kachiña: Tá xítoyó iin na̱ʼná kivi kunda̱a̱-iniyó ndáa ki̱ʼva íyo na̱ nda̱kaʼyíña á tá xítoyó iin máquina kivi kunda̱a̱-iniyó ndáa ki̱ʼva íyo na̱ i̱xava̱ʼanú, ki̱ʼva saátu ña̱ʼa ña̱ i̱xava̱ʼa Ndióxi̱ chíndeétáʼanña xíʼinyó ña̱ kunda̱a̱-iniyó ndáa ki̱ʼva íyora tá kúú, xa̱ʼa̱ ña̱ va̱ʼaní na̱kuva̱ʼa meke xi̱níyó kíʼinyó kuenta ña̱ ndíchiní Ndióxi̱. Ta saátu tá xítoyó ñu̱ʼu á ña̱ ka̱ndii xíʼin ki̱mi, kíʼinyó kuenta ña̱ íyoní ndee̱ra (Salmo 104:24; Isaías 40:26).

• Ña̱ kivi keʼún: Tavá tiempo ña̱ kotoún ndiʼi ña̱ i̱xava̱ʼa Ndióxi̱, ta koto ndáaña sákuaʼún xíʼinña. Tándi̱ʼi ndakanixi̱ní xa̱ʼa̱ ña̱yóʼo: “Tá xítoi̱ ndiʼi ña̱ i̱xava̱ʼa Ndióxi̱, ¿ndáaña sákuaʼi̱ xa̱ʼa̱ra?”.a Ku̱a̱ʼání ña̱ʼa kivi sakúaʼayó xa̱ʼa̱ ta̱ i̱xava̱ʼa miíyó tá ná kotoyó ndiʼi ña̱ i̱xava̱ʼara, soo tá ná kaʼviyó Biblia saá kúú ña̱ ku̱a̱ʼáníka ña̱ʼa sakúaʼayó xa̱ʼa̱ra.

Kuniñúʼu ki̱vi̱ Ndióxi̱

• Ña̱ káʼa̱n Biblia: “Kundai̱ra saáchi xíni̱ra ki̱víi̱. Kanara yi̱ʼi̱ ta ndakuiinvai̱ yuʼúra” (Salmo 91:14, 15).

• Ña̱ kúni̱ kachiña: Ndióxi̱ naníra Jehová, ta kíʼinníra kuenta xíʼin na̱ xíni̱ ki̱vi̱ra ta íxato̱ʼónañab (Salmo 83:18; Malaquías 3:16). Nu̱ú Biblia káʼa̱n Ndióxi̱ xíʼinyó ndáaña kúú ki̱vi̱ra: “Yi̱ʼi̱ kúú Jehová. Ña̱yóʼo kúú ki̱víi̱” (Isaías 42:8).

• Ña̱ kivi keʼún: Tá xa̱a̱ káʼún xa̱ʼa̱ Ndióxi̱ kuniñúʼu ki̱vi̱ra, chi Jehová naníra.

Ka̱ʼa̱n xíʼin Jehová

• Ña̱ káʼa̱n Biblia: “Jehová íyo yatinra xíʼin ndiʼi na̱ kána miíra” (Salmo 145:18).

• Ña̱ kúni̱ kachiña: Jehová kúyatinra nu̱ú na̱ káʼa̱n xíʼinra xíʼin ndinuʼu-inina. Xa̱ʼa̱ ña̱ íxato̱ʼóníyó Ndióxi̱ káʼa̱nyó xíʼinra ta saá ndásakáʼnuyóra.

• Ña̱ kivi keʼún: Ndiʼi ki̱vi̱ ka̱ʼún xíʼin Ndióxi̱ (1 Tesalonicenses 5:17). Natúʼún xíʼinra xa̱ʼa̱ ña̱ ndóʼún ta saátu xa̱ʼa̱ ña̱ sándi̱ʼi̱-iniún (Salmo 62:8).c

Kandíxa Ndióxi̱

• Ña̱ káʼa̱n Biblia: “Tá iinna kǒo kándíxana Ndióxi̱ va̱ása kíndo̱o-inira xíʼinna” (Hebreos 11:6).

• Ña̱ kúni̱ kachiña: Tá kúni̱ún kuyatiún nu̱ú Ndióxi̱ xíniñúʼu kandíxaúnra. Biblia káʼa̱nña xíʼinyó ña̱ kǒo xíniñúʼu kandíxa kuitíyó Ndióxi̱ ta xa̱a̱ va̱ʼa, chi saátu kúni̱ kachiña ña̱ kundaa-iniyóra ña̱ sáxi̱nura ndiʼi ña̱ ni̱ka̱ʼa̱nra ta ndiʼi ña̱ ka̱ʼa̱nra xíʼinyó ña̱ va̱ʼa miíyó kúúña. Tá kúni̱yó kooyó migo Ndióxi̱ xíniñúʼu kundaaní-iniyóra.

• Ña̱ kivi keʼún: Ña̱ va̱ʼa kandíxaúnra xíniñúʼu sakúaʼún xa̱ʼa̱ra (Romanos 10:17). Tá káʼviún Biblia saá kunda̱a̱-iniún ña̱ kiviva kundaa-iniún Ndióxi̱ ta saátu consejo ña̱ táxira. Na̱ testigo Jehová kivi chindeétáʼanna xíʼún ña̱ kunda̱a̱ va̱ʼaka-iniún xa̱ʼa̱ Biblia.d

Keʼé ña̱ kútóo Ndióxi̱

• Ña̱ káʼa̱n Biblia: “Tá kúʼvi̱-iniyó xíniyó Ndióxi̱ keʼévayó chiñu ña̱ xáʼndara nu̱úyó” (1 Juan 5:3).

• Ña̱ kúni̱ kachiña: Tá kúʼvi̱-iniún xíniún Jehová ta chíka̱ún ndee̱ ña̱ kuniso̱ʼúnra, saá kuyatinra nu̱ún.

• Ña̱ kivi keʼún: Tá ná chika̱ún ndee̱ ña̱ kaʼviún Biblia kunda̱a̱-iniún ndáa ña̱ʼa kúú ña̱ kútóo Ndióxi̱ ta ndáaña kúú ña̱ kǒo kútóora. Ndakanixi̱ní xa̱ʼa̱ ña̱yóʼo: “¿Ndáa ña̱ʼa xíniñúʼu nasamai̱ ña̱ va̱ʼa sakúsi̱íi̱-ini Ndióxi̱?” (1 Tesalonicenses 4:1).

Kuniso̱ʼo consejo ña̱ táxi Ndióxi̱ tasaá kuniún ña̱ kúni̱níra xínira yóʼó

• Ña̱ káʼa̱n Biblia: “Kotondosóndó ta kotondó ña̱ va̱ʼaní-ini Jehová” (Salmo 34:8).

• Ña̱ kúni̱ kachiña: Ña̱ kúni̱ Ndióxi̱ kúú ña̱ miíún ná xa̱a̱ kiʼin kuenta ña̱ va̱ʼaní-inira. Tá ná xa̱ún kiʼún kuenta ña̱ kúʼvi̱ní-inira xínira yóʼó, kuni̱kaún kuyatiún nu̱úra.

• Ña̱ kivi keʼún: Tá xa̱a̱ káʼviún Biblia chikaa̱ ndee̱ ña̱ keʼún ña̱ sákuaʼún, saá kotoún ña̱ va̱ʼaní chindeétáʼanña xíʼún (Isaías 48:17, 18). Saátu koto ndáa ki̱ʼva xa̱a̱ chíndeétáʼan Ndióxi̱ xíʼin na̱ yiví na̱ sákuaʼa xa̱ʼa̱ra ña̱ ya̱ʼana nu̱ú tu̱ndóʼo, ña̱ viíní kitáʼanna xíʼin na̱ veʼena ta saátu ña̱ si̱íní koona.e

Ña̱ ndákanixi̱ní na̱ yiví xa̱ʼa̱ ña̱ kooyó migo Ndióxi̱

Ña̱ ndákanixi̱ní savana: Kǒo kivi kooyó migo Ndióxi̱ saáchi va̱ása xíniyó ndáa ki̱ʼva íyora.

Ña̱ nda̱a̱: Íyo sava ña̱ʼa ña̱ íxayo̱ʼvi̱ xíʼinyó kunda̱a̱-iniyó xíʼin xa̱ʼa̱ Ndióxi̱, tá kúú ña̱ kǒo kívi kuniyóra saáchi kúúra iin espíritu. Soo ni saá, kiviva kooyó migo Ndióxi̱. Biblia káʼa̱nña xíʼinyó ña̱ tá kúni̱yó kooyó ndiʼi tiempo xíniñúʼu kuxini̱yó Ndióxi̱ (Juan 17:3). Va̱ása yo̱ʼvi̱ví kunda̱a̱-iniyó xíʼin ña̱ káʼa̱n Biblia xa̱ʼa̱ Ndióxi̱, káʼa̱nña xíʼinyó ndáa ki̱ʼva íyora, ndáa ki̱ʼva kúni̱ra kooyó xa̱ʼa̱ ña̱kán táxira consejo ndaʼa̱yó ta saátu káʼa̱nña ndáa ki̱ʼva kúni̱ra koo nu̱ú ñuʼú yóʼo (Isaías 45:18, 19; 1 Timoteo 2:4). Ta ndáa táki̱ʼva xa̱a̱ xi̱toyó, nu̱ú Biblia káʼa̱nña xíʼinyó ndáaña kúú ki̱vi̱ Ndióxi̱ (Salmo 83:18). Xa̱ʼa̱ ña̱kán kiviva kooyó migo Ndióxi̱, ta su̱ví iinlá kuití ña̱ kuxini̱yóra (Santiago 4:8).