¿Ndáaña káʼa̱n Biblia xa̱ʼa̱ kue̱ʼe̱ xíkun?

Ña̱ káʼa̱n Biblia xa̱ʼa̱ ña̱yóʼo

Biblia ni̱ka̱ʼa̱nña ña̱ kooní kue̱ʼe̱ tiempo so̱ndíʼi, tá kúú kue̱ʼe̱ xíkun ta ku̱a̱ʼání ñuu kooña (Lucas 21:11). Su̱ví Ndióxi̱ kúú ta̱ táxi kue̱ʼe̱ yóʼo. Chi ña̱ keʼéra kúú ña̱ kuniñúʼura Reinora ña̱ va̱ʼa sandíʼi-xa̱ʼa̱ra ndiʼi nu̱ú kue̱ʼe̱.

¿Á ni̱ka̱ʼa̱n Biblia ña̱ koo kue̱ʼe̱ xíkun?

Va̱ása káʼa̱n káxiví Biblia xa̱ʼa̱ kue̱ʼe̱ xíkun tá kúú COVID-19, sida á ña̱ káʼa̱nna xíʼin gripe española, soo ni̱ka̱ʼa̱nva Biblia ña̱ “kooní kue̱ʼe̱ ña̱ xíkun” ña̱ kaʼní na̱ yiví (Lucas 21:11; Apocalipsis 6:8). Kue̱ʼe̱ yóʼo náʼa̱ña ña̱ ndóoyó tiempo so̱ndíʼi (2 Timoteo 3:1; Mateo 24:3).

¿Á xa̱a̱ táxi Ndióxi̱ castigo ndaʼa̱ na̱ yiví xíʼin kue̱ʼe̱?

Biblia káʼa̱nña ña̱ ta̱xiva Ndióxi̱ castigo ndaʼa̱ na̱ yiví xíʼin kue̱ʼe̱ sava yichi̱. Tá kúú ta̱xira kue̱ʼe̱ lepra ndaʼa̱na (Números 12:1-16; 2 Reyes 5:20-27; 2 Crónicas 26:16-21). Soo su̱ví ndiʼiví na̱ yiví nítaxira kue̱ʼe̱ yóʼo ndaʼa̱, chi nda̱saa na̱ i̱xaso̱ʼo nu̱úra kúú na̱ ta̱xira kue̱ʼe̱ yóʼo ndaʼa̱.

¿Á castigo Ndióxi̱ kúú kue̱ʼe̱ xíkun?

Va̱ásaví. Sava na̱ yiví káʼa̱nna ña̱ xíniñúʼu Ndióxi̱ kue̱ʼe̱ xíkun á inkaka kue̱ʼe̱ ña̱ va̱ʼa taxira castigo ndaʼa̱ na̱ yiví. Soo su̱ví saá íyo ña̱ káʼa̱n Biblia. ¿Nda̱chun va̱ʼa xíni̱yó ña̱yóʼo?

Sava na̱ yiví na̱ nda̱kúní ni̱xi̱yo ini xíʼin Ndióxi̱ tiempo xi̱naʼá ta saátu sava na̱ ndóo tiempo vitin kíʼinvana kue̱ʼe̱. 1 Timoteo 5:23 káʼa̱nña xa̱ʼa̱ ta̱ Timoteo ña̱ xi̱kiʼinní kue̱ʼe̱ra. Soo va̱ása káʼa̱n Biblia ña̱ xi̱ndoʼora ña̱yóʼo xa̱ʼa̱ ña̱ xi̱saa̱ Ndióxi̱ xíʼinra. Ta saátu kúú tiempo vitin, sava na̱ yiví na̱ nda̱kúní íyo ini xíʼin Ndióxi̱ kíʼinva kue̱ʼe̱ miína. Kíʼinna kue̱ʼe̱ saáchi ndiʼina iin sana kíxaa̱ tu̱ndóʼo nu̱úna (Eclesiastés 9:11).

Biblia káʼa̱nña ña̱ kúma̱níva kixaa̱ tiempo ña̱ taxi Ndióxi̱ castigo ndaʼa̱ na̱ yiví na̱ ndi̱va̱ʼa-ini. Ndóoyó tiempo ña̱ kána Ndióxi̱ na̱ yiví ña̱ kuyatinna nu̱úra tasaá kivi ka̱kuna (2 Corintios 6:2). Ta iin ki̱ʼva ña̱ kánara na̱ yiví kúú ña̱ nátúʼunna xíʼinna xa̱ʼa̱ Reinora (Mateo 24:14).

¿Á kixaa̱ iin ki̱vi̱ ña̱ va̱ása kooka kue̱ʼe̱ xíkun?

Kixaa̱va iin ki̱vi̱ ña̱ va̱ása kooka kue̱ʼe̱ xíkun. Biblia káʼa̱nña ña̱ kixaa̱ iin tiempo ña̱ kǒoka na̱ kuumií kue̱ʼe̱. Tá ná kaʼndachíñu Reino Ndióxi̱ va̱ása taxikara koo kue̱ʼe̱ (Isaías 33:24; 35:5, 6). Va̱ása taxika Ndióxi̱ xo̱ʼvi̱yó ta ni va̱ása kuviyó (Apocalipsis 21:4). Saátu sandátakura na̱ ni̱xi̱ʼi̱ ta kǒoka kue̱ʼe̱ kiʼin miína tá ná koona nu̱ú ñuyǐví xa̱á (Salmo 37:29; Hechos 24:15).

Texto ña̱ káʼa̱n xa̱ʼa̱ kue̱ʼe̱

Mateo 4:23: “Ta̱ Jesús ni̱xa̱ʼa̱nra iníí chí Galilea ña̱ sa̱náʼa̱ra chí sinagoga, ta na̱túʼunra tu̱ʼun va̱ʼa xa̱ʼa̱ Reino Ndióxi̱ xíʼinna. Ta sa̱ndúva̱ʼara na̱ ndeéndóʼo saátu na̱ kúúmií inka kue̱ʼe̱”.

Ña̱ kúni̱ kachiña: Milagro ña̱ ke̱ʼé ta̱ Jesús ni̱na̱ʼa̱ña ndáaña kúú ña̱ keʼé Reino Ndióxi̱ xa̱ʼa̱ na̱ yiví.

Lucas 21:11: “Kooní kue̱ʼe̱ ña̱ xíkun”

Ña̱ kúni̱ kachiña: Biblia ni̱ka̱ʼa̱nña ña̱ tiempo so̱ndíʼi kooní kue̱ʼe̱ xíkun.

Apocalipsis 6:8: “Ta xi̱nii̱ iin kuáyi̱ tí ndáʼviní náʼa̱ color, ta ta̱ yósó tíyóʼo naníra Ña̱ xáʼní, ta Ya̱vi̱ nu̱ú ñúʼu na̱ ni̱xi̱ʼi̱ yatinní ndíku̱nñara. Ta nda̱kiʼinna nda̱yí ña̱ kaʼnína na̱ yiví [...] xíʼin kue̱ʼe̱ ña̱ ndeéní”.

Ña̱ kúni̱ kachiña: Profecía ña̱ káʼa̱n xa̱ʼa̱ ku̱mí na̱ yósó kuáyi̱ na̱ káʼa̱n Apocalipsis xa̱ʼa̱, náʼa̱ña ña̱ kooní kue̱ʼe̱ xíkun tiempo vitin.