Ta̱ Jesús ni̱ka̱ʼa̱nra ña̱ vií xíniñúʼu keʼéyó xíʼin ndiʼi na̱ yiví
Ña̱ káʼa̱n Biblia xa̱ʼa̱ ña̱yóʼo
Tá ni̱ka̱ʼa̱n ta̱ Jesús chí yuku̱ ni̱ka̱ʼa̱nra ña̱yóʼo: “Keʼéndó xíʼin inkana ndiʼi ña̱ kúni̱ndó keʼéna xíʼinndó” (Mateo 7:12; Lucas 6:31). Ta ki̱ʼva saá káʼa̱n ña̱ Encyclopedia of Philosophy xa̱ʼa̱ ña̱yóʼo: “Vií keʼéndó xíʼin inkana nda̱a̱ táki̱ʼva kúni̱ndó keʼéna xíʼinndó”.
¿Ndáa ki̱ʼva xíniñúʼu vií keʼéyó xíʼin inkana?
Nda̱a̱ táki̱ʼva kéʼéyó xíʼin inkana saá kúni̱yó ná keʼéna xíʼinyó. Tá kúú, ndiʼiyó kúni̱yó ña̱ ná ixato̱ʼóna miíyó, vií ná keʼéna xíʼinyó ta saátu ña̱ na̱ʼa̱na ña̱ kúni̱na xínina miíyó. Xa̱ʼa̱ ña̱kán xíniñúʼu vií keʼéyó xíʼin ndiʼina (Lucas 6:31).
Ña̱ vií keʼéyó xíʼin inkana, ¿ndáa ki̱ʼva chíndeétáʼanña xíʼinyó?
Vií ná keʼéyó xíʼin ndiʼina. Tá kúú:
Ña̱ va̱ʼa vií kitáʼanyó xíʼin na̱ ti̱ndaʼa̱ xíʼinyó (Efesios 5:28, 33).
Ña̱ va̱ʼa vií sakúaʼnu na̱ íyo se̱ʼe na̱ va̱lí se̱ʼena (Efesios 6:4).
Ña̱ va̱ʼa vií kitáʼanyó xíʼin na̱ migoyó, xíʼin na̱ íyo yatin xíʼinyó ta saátu xíʼin na̱ káchíñu xíʼinyó (Proverbios 3:27, 28; Colosenses 3:13).
Saátu nu̱ú ña̱ Antiguo Testamento káʼa̱nña ña̱ vií xíniñúʼu keʼéyó xíʼin ndiʼina. Ta̱ Jesús ni̱ka̱ʼa̱nra ña̱ saátu káʼa̱n ley xa̱ʼa̱ ña̱yóʼo [u̱ʼu̱n libro ña̱ nu̱ú ña̱ va̱xi nu̱ú Biblia káʼa̱nña xa̱ʼa̱ña] ta saátu na̱ Profeta ni̱ka̱ʼa̱nna xa̱ʼa̱ ña̱yóʼo [libro na̱ profeta] (Mateo 7:12). Ña̱ Antiguo Testamento káʼa̱nña ná ku̱ʼvi̱-iniyó kuniyó inkana (Romanos 13:8-10).
¿Á kéʼéyó ña̱yóʼo chi saá kúni̱yó ná keʼéna xíʼinyó?
Va̱ásaví, chi ña̱ kúni̱yó kúú ña̱ vií keʼéyó xíʼin ndiʼina. Ña̱ ni̱ka̱ʼa̱nka ta̱ Jesús xa̱ʼa̱ kúú ña̱ xíniñúʼu viíka keʼéyó xíʼin na̱ sáa̱-ini xíni miíyó ta su̱ví xíʼin sava kuitína (Lucas 6:27-31, 35). Ña̱kán xíniñúʼu vií keʼéyó xíʼin ndiʼina.
¿Ndáa ki̱ʼva keʼún ña̱yóʼo?
1. Kiʼin kuenta xíʼin ña̱ ndóʼo inkana. Tá kúú, sana xi̱niún iinna ña̱ ni̱xa̱ʼa̱nna sa̱tána ta ve̱ení bolsa níʼina. Á sana ku̱ndaa̱-iniún ña̱ iin na̱ íyo yatin xíʼún ndíkaa̱na hospital á iin na̱ káchíñu xíʼún ndákava-inina. Tá ndíʼi̱-iniún xa̱ʼa̱ inkana ku̱a̱ʼáníva ña̱ kivi keʼún ña̱ va̱ʼa chindeétáʼún xíʼinna tasaá va̱ása kundi̱ʼi̱-iniún xa̱ʼa̱ mií kuitíún (Filipenses 2:4).
2. Ndakanixi̱ní ña̱ miíún kúú na̱ ndíkaa̱ ndaʼa̱ tu̱ndóʼo. ¿Ndáa ki̱ʼva kuniún? (Romanos 12:15). Tá chíka̱ún ndee̱ ña̱ kunda̱a̱-iniún xíʼin ña̱ ndóʼo inkana, saá kúú ña̱ kuni̱kaún chindeétáʼún xíʼinna.
3. Vií ndakanixi̱níún. Ndiʼiyó xa̱a̱ síín íyoyó. Ña̱ va̱ása íxayo̱ʼvi̱ xíʼún keʼún sana nu̱ú inkana íxayo̱ʼvi̱vaña xíʼinna. Ña̱kán ni ku̱a̱ʼáníva ña̱ kivi keʼún xa̱ʼa̱ iinna, chindeétáʼan xíʼinna ña̱ túvi miína va̱ʼaka nu̱úna (1 Corintios 10:24).