¿Ndáaña kundoʼo ña̱ religión? | ¿Ndáaña káʼa̱n Biblia xa̱ʼa̱ ña̱yóʼo?

¿Á ndákava-iniún á sáa̱-iniún xíniún religión? Sava religión chíndeétáʼanvaña xíʼin sava na̱ yiví á xíʼin sava ñuu, soo saátu xa̱a̱ ku̱a̱ʼání ña̱ kini kéʼéna ti̱xin sava religión. Iin enciclopedia ña̱ káʼa̱n xa̱ʼa̱ guerra xíʼin xa̱ʼa̱ religión káchiña: “Xa̱ʼa̱ ña̱ xa̱a̱ síín síín ña̱ sánáʼa̱na ti̱xin religión xa̱a̱ ku̱a̱ʼání guerra ña̱ ndeé íyo” (Encyclopedia of Religion and War). Ku̱a̱ʼání na̱ níʼi yichi̱ ti̱xin veʼe-ñu̱ʼu nu̱úka ña̱ sanáʼa̱na xa̱ʼa̱ Ndióxi̱ xa̱ʼa̱ políticava káʼa̱nna xíʼin na̱ yiví, ta saátu tíin kúíʼnána na̱ yiví á íxandúxa̱na xíʼinna ña̱ ku̱su̱nna xíʼinna ta ku̱a̱ʼání xu̱ʼún íxakuíʼnana ta chíse̱ʼé-yuʼúna xa̱ʼa̱ ña̱yóʼo.

Tá ndákava iniún xíʼin ña̱ kéʼé na̱ religión sana ndákanixi̱níún ndáaña ndákanixi̱ní Ndióxi̱ xa̱ʼa̱ na̱yóʼo. Biblia káʼa̱nña ña̱ kúndasíní Ndióxi̱ xínira ku̱a̱ʼání religión xa̱ʼa̱ ña̱ kéʼéna ta saátu íyo profecía ña̱ káʼa̱n xa̱ʼa̱ ña̱ keʼéra xíʼin ndiʼi religión yóʼo. Ndióxi̱ chítáʼanra religión xíʼin inkaka ña̱ʼa ta Biblia káʼa̱nña ndáaña keʼéra xíʼin ndiʼi religión ña̱ íyo ñuyǐví.

¿Ndáaña káʼa̱n Biblia xa̱ʼa̱ ña̱ kundoʼo ndiʼi religión?

Profecía: Tutu ña̱ Apocalipsis káʼa̱nña xa̱ʼa̱ iin ñaʼá ñá kísi̱ xíʼin ku̱a̱ʼání ta̱a ta ñáyóʼo naníñá Babilonia ña̱ káʼnu ta xíkundúʼuñá sa̱tá iin kití yukú tí color kúáʼa ña̱ yéʼe̱ní. Soo tá yáʼa tiempo, xáʼnírí ñaʼá ñá kísi̱ xíʼin ku̱a̱ʼání ta̱a (Apocalipsis 17:3, 5, 16).

Ña̱ kúni̱ kachiña: Ñaʼá ñá kísi̱ xíʼin ku̱a̱ʼání ta̱a ñá naní Babilonia ña̱ káʼnu ndánaʼa̱ñá ndiʼi religión vatá, ña̱yóʼo kúú ndiʼi religión ña̱ kúndasí Ndióxi̱ xínira.a Kití yukú tí color kúáʼa ña̱ yéʼe̱ní ndánáʼa̱rí ña̱ Organización de las Naciones Unidas (ONU).b ¿Ndáaña kúni̱ kachi ña̱ níndúʼu ñaʼá ñá kísi̱ xíʼin ku̱a̱ʼání ta̱a sa̱tá kití yukú tí color kúáʼa ña̱ yéʼe̱ní? Ña̱yóʼo kúni̱ kachiña ña̱ va̱ʼání kítáʼan veʼe-ñu̱ʼu vatá xíʼin na̱ ONU ta nda̱a̱ kúni̱ñá kaʼndañá chiñu nu̱úna. Ta tá káʼa̱nña xa̱ʼa̱ kití yukú ña̱ xáʼnirí ñaʼá ñá kísi̱ xíʼin ku̱a̱ʼání ta̱a, ña̱yóʼo kúni̱ kachiña na̱ ONU xíʼin ndiʼika país na̱ kítáʼan xíʼinña sandíʼi-xa̱ʼa̱na ndiʼi religión vatá. Ndiʼi veʼe-ñu̱ʼu vatá ndiʼi-xa̱ʼa̱ ta kǒo nda̱a̱ ni iinkaña kindo̱o.

Ñaʼá ñá káʼa̱n tutu ña̱ Apocalipsis xa̱ʼa̱ ñá kísi̱ xíʼin ku̱a̱ʼání ta̱a nínduʼúñá sa̱tá tí kití yukú tí color kúáʼa ña̱ yéʼe̱ní. Chí xiyo yitin tí kití yukú níndichi veʼe na̱ Naciones Unidas ta chí xiyo kúaʼa ndíta ku̱a̱ʼá veʼe-ñu̱ʼu.

¿Ndáa ki̱ʼva ndiʼi-xa̱ʼa̱ religión vatá?

Profecía: Biblia káʼa̱nña: “Ta 10 ndiki̱ ña̱ xi̱niún ta saátu tí kití yukú, sa̱a̱ní-inina kunina ñá ñaʼá ñá kísi̱ xíʼin ku̱a̱ʼání ta̱a ta sandíʼi-xa̱ʼa̱nañá [...], ta kaʼmi níínañá xíʼin ñuʼu̱. Saáchi mií Ndióxi̱ [chi̱kaa̱-ini na̱ chíñu] ña̱ keʼéna ña̱ ndákanixi̱níra xa̱ʼa̱, ña̱yóʼo kúni̱ kachiña ña̱ saxínuna ña̱ inkáchi kúni̱na keʼéna, ña̱ ndataxina nda̱yí ña̱ kúúmiína ña̱ kúúna rey ndaʼa̱ tí kití yukú”. Ta káʼa̱nkaña: “Xa̱ʼa̱ ña̱kán, iin kuití ki̱vi̱ kixi tu̱ndóʼo nu̱úñá, koo so̱ko nu̱úñá, kusuchí-iniñá ta kuviñá, ta koko nííñá xíʼin ñuʼu̱. Saáchi Jehovác Ndióxi̱ ta̱ nda̱tiin ku̱a̱chi xíʼinñá ndakúníra” (Apocalipsis 17:16, 17; 18:8).

Ña̱ kúni̱ kachiña: Ndióxi̱ chikaa̱ra-ini na̱ chíñu náʼnu ña̱ keʼéna ña̱ kúni̱ra, ta taxina nda̱yí ña̱ kúúmiína ndaʼa̱ na̱ ONU ña̱ va̱ʼa kaʼndachíñuna. Ta xa̱ʼa̱ ña̱ kuumií na̱ ONU ndee̱ ña̱ taxi na̱ chíñu ndaʼa̱na kixáʼana sandíʼi-xa̱ʼa̱na ndiʼi religión vatá. Ta xa̱ʼa̱ ña̱ kamaní sandíʼi-xa̱ʼa̱na ndiʼi religión vatá, nda̱a̱ táki̱ʼva koo ña̱ kuu iin ki̱vi̱ kuití saá kooña. Ndakanda̱ní-ini na̱ yiví tá ná kuu ña̱yóʼo chi kǒo ndátuna kuuña (Apocalipsis 18:21).

¿Nda̱chun ndiʼi-xa̱ʼa̱ ndiʼi religión vatá?

Profecía: “Saáchi ku̱a̱chiña ku̱a̱ʼání kúúña ta nda̱a̱ ndiví ni̱xa̱a̱ña, ta Ndióxi̱ nda̱kaʼánra xa̱ʼa̱ ña̱ va̱ása va̱ʼa ña̱ ke̱ʼéña” (Apocalipsis 18:5).

Ña̱ kúni̱ kachiña: Xa̱a̱ ku̱a̱ʼání ku̱i̱ya̱ kéʼé na̱ religión vatá ku̱a̱chi. Xa̱ʼa̱ ku̱a̱chi yóʼo sandíʼi-xa̱ʼa̱ Ndióxi̱ religión vatá:

Na̱ʼná iin ta̱ político chíndeéra iin ta̱ níʼi yichi̱ nu̱ú na̱ veʼe-ñu̱ʼu.

Kíʼvina xíʼin ña̱ política. Ta̱ Jesús sa̱náʼa̱ra na̱ discípulora ña̱ ná kǒo ki̱ʼvina xíʼin ña̱ política ta iinlá Reino Ndióxi̱ ná kundaa-inina, gobierno yóʼo íyoña chí ndiví ta sandíʼi-xa̱ʼa̱ña ndiʼi gobierno ña̱ íyo ñuyǐví yóʼod (Daniel 2:44; Mateo 6:9, 10; Juan 6:15; 18:36). Soo na̱ religión vatá su̱ví saáví kéʼéna, saáchi ku̱a̱kiʼvina xíʼin ña̱ política nu̱úka ña̱ nda̱kú koo inina xíʼin Reino Ndióxi̱. Ña̱kán profecía ña̱ va̱xi nu̱ú Apocalipsis káʼa̱nña xa̱ʼa̱ Babilonia ña̱ káʼnu ña̱ kíʼviña “ku̱a̱chi kini” ta saátu káʼa̱nña xa̱ʼa̱ña ña̱ kúúñá “ñá kísi̱ xíʼin ku̱a̱ʼání ta̱a” (Apocalipsis 17:1, 2; Santiago 4:4).

Na̱ʼná iin ta̱ níʼi yichi̱ nu̱ú na̱ veʼe-ñu̱ʼu, níʼira iin cruz ta chíkaa̱ra bendición sa̱tá na̱ soldado na̱ ku̱ʼu̱n nu̱ú ku̱a̱chi.

Kánitáʼanna. Biblia káʼa̱nña xa̱ʼa̱ na̱ veʼe-ñu̱ʼu vatá ña̱ ndísona ku̱a̱chi xa̱ʼa̱ “ndiʼi na̱ xa̱ʼnína nu̱ú ñuʼú” (Apocalipsis 18:24). Ku̱a̱ʼání religión vatá kǒo sánáʼa̱na na̱ yiví ña̱ vií kitáʼan xíʼin táʼanna, ta nda̱a̱ chíndeétáʼanna xíʼin na̱ xáʼa̱n nu̱ú guerra ta saátu káʼa̱nna xíʼinna ná ku̱ʼu̱nna kanitáʼanna.

Na̱ʼná iin ta̱ níʼi yichi̱ nu̱ú na̱ veʼe-ñu̱ʼu níʼira ku̱a̱ʼání xu̱ʼún.

Kútóona kuumiína ku̱a̱ʼání ña̱ʼa. Na̱ religión vatá ni loʼo kǒo kúkaʼan nu̱úna ña̱ kúúmiína ku̱a̱ʼání ña̱ ku̱i̱ká (Apocalipsis 17:4; 18:7). Ku̱a̱ʼání na̱yóʼo kítáʼanna xíʼin na̱ ku̱i̱ká ña̱ va̱ʼa ndukúikána, ta Ndióxi̱ ni loʼo kǒo kútóora ña̱ kéʼéna ña̱yóʼo (Tito 1:7).

Na̱ʼná iin ta̱ níʼi yichi̱ ti̱xin veʼe-ñu̱ʼu káʼa̱nra.

Sándaʼvina. Ti̱xin religión vatá sánáʼa̱na na̱ yiví ña̱ keʼéna ña̱ʼa ña̱ kúndasí Ndióxi̱ xínirae xa̱ʼa̱ ña̱kán kándíxanana ta kéʼénaña. Xa̱ʼa̱ ña̱ sándaʼvina na̱ yiví ta íxandúxana xíʼinna ña̱ keʼéna ña̱ʼa ña̱ íxayaku̱a̱ ki̱vi̱ Ndióxi̱, xa̱ʼa̱ ña̱kán ña̱ profecía káʼa̱nña ña̱ Babilonia ña̱ káʼnu kúúña “siʼí ndiʼi ña̱ʼa yaku̱a̱ ña̱ íyo nu̱ú ñuʼú yóʼo” (Apocalipsis 17:5; 18:23).

**¿Á ndiʼi-xa̱ʼa̱ ndiʼi religión?**

Su̱ví ndiʼivíña ndiʼi-xa̱ʼa̱, ná kotoyó nda̱chun. Biblia káʼa̱nña ña̱ koo iin tiempo ña̱ naní gran tribulación. Ta tiempo kán kúú ña̱ ndiʼi-xa̱ʼa̱ ndiʼi religión vatá xíʼin ndiʼi na̱ sáa̱-ini xíni Ndióxi̱. Tutu ña̱ Apocalipsis káʼa̱nña xa̱ʼa̱ ku̱a̱ʼání na̱ yiví na̱ ka̱ku, ndiʼi ñuu ke̱ena “tá ndíxina ti̱ko̱to̱ yaa ña̱ náni̱”. Ta ña̱yóʼo kúni̱ kachiña ña̱ nda̱kú íyo inina xíʼin Ndióxi̱ ta iinlá miíra ndásakáʼnuna (Apocalipsis 7:9, 13, 14; 19:11, 19-21). Na̱ yiví na̱ ku̱a̱ʼání yóʼo ñúʼuna ti̱xin religión ña̱ nda̱a̱ ta koona ndiʼi tiempo.f

Xítoyó ku̱a̱ʼání na̱ yiví ta kúsi̱íní-inina xíkana ku̱a̱ʼa̱nna. Chí sa̱tána túvi ndíta veʼe-ñu̱ʼu ña̱ xa̱a̱ ndi̱ʼi-xa̱ʼa̱ ta kǒoka na̱ yiví iniña. — Tá ná ndiʼi-xa̱ʼa̱ ndiʼi religión vatá, ku̱a̱ʼání na̱ yiví na̱ ñúʼu ti̱xin religión ña̱ nda̱a̱ ka̱kuna.

¿Ndáa ki̱ʼva kúniún xa̱ʼa̱ ña̱ ndiʼi-xa̱ʼa̱ ndiʼi religión vatá?

Sana va̱ʼaníva kúniún xa̱ʼa̱ ña̱ kúnda̱a̱-iniún ña̱ kǒo kíndo̱o-ini Ndióxi̱ xíʼin ndiʼi ña̱ kini ña̱ kéʼé na̱ veʼe-ñu̱ʼu vatá, ta sana kúsi̱íní-iniún xa̱ʼa̱ ña̱ kúnda̱a̱-iniún ña̱ chí nu̱únínu kǒoka religión vatá koo chi sáxo̱ʼvi̱nína miíyó ta kǒo íxato̱ʼóna Ndióxi̱.

Ta saátu kiviva ndasakáʼnuyó Ndióxi̱ nda̱a̱ táki̱ʼva kúni̱ra. Biblia káʼa̱nña “na̱ ndásakáʼnu Ndióxi̱, ndasakáʼnunara nda̱a̱ táki̱ʼva náʼa̱ ña̱ espíritu santo yichi̱ nu̱úna ta saátu nda̱a̱ táki̱ʼva íyo ña̱ nda̱a̱ ña̱ sa̱kuaʼana xa̱ʼa̱ra. Chi Ndióxi̱ nándukúra na̱ íyo saá ña̱ ndasakáʼnunara” (Juan 4:23). Ndióxi̱ káʼa̱nra: “Keendó ti̱xinña [ti̱xin Babilonia ña̱ káʼnu] ndóʼó na̱ ñuu miíi̱, tá kǒo kúni̱ndó kuisondó ku̱a̱chi xíʼinña ta kǒo kúni̱ndó ndakiʼinndó tu̱ndóʼo ña̱ ndakiʼinña” (Apocalipsis 18:4, 5). Ndióxi̱ kánara na̱ yiví ña̱ ná ndasakáʼnunara nda̱a̱ táki̱ʼva sánáʼa̱ ña̱ Biblia (1 Timoteo 2:3, 4). Ta káʼa̱nra ña̱ ndiʼi na̱ ndásakáʼnu miíra, kutakuna ndiʼi tiempo (1 Juan 2:17).

¿Á íyo religión “cristiana” ña̱ kúú kuenta Babilonia ña̱ káʼnu?

Íyovaña. Ta̱ Jesús ni̱ka̱ʼa̱nra ña̱ íyo ku̱a̱ʼá na̱ yiví na̱ ka̱ʼa̱n ña̱ kúúna cristiano, ta ka̱ʼa̱nna ña̱ kúúra tátána, soo kǒo kindo̱oví-ini Ndióxi̱ xíʼin ki̱ʼva ña̱ ndásakáʼnunara (Mateo 7:21-23). Xíʼin ña̱ kéʼéna xíʼin ña̱ sánáʼa̱na kiʼinyó kuenta ña̱ kúúna na̱ cristiano vatá (Mateo 7:18-20). Xa̱ʼa̱ ña̱yóʼo kúúna kuenta Babilonia ña̱ káʼnu.

Ku̱a̱ʼání religión káʼa̱nna ña̱ kúúna cristiano soo kǒo kíndo̱o-ini Ndióxi̱ xíʼin ña̱ kéʼéna ni xíʼin ña̱ sánáʼa̱na, ta ña̱yóʼo kúú savaña:

Sánáʼa̱na xa̱ʼa̱ ña̱ trinidad xíʼin infierno.
Kǒo sánáʼa̱na ki̱vi̱ Ndióxi̱ Jehová.
Sándaʼvina na̱ yiví xa̱ʼa̱ ña̱ ndóʼo iin na̱ yiví tá xíʼi̱na.
Xíniñúʼuna imagen ña̱ ndasakáʼnuna Ndióxi̱.

a Íyo ku̱mí ña̱ chindeétáʼan xíʼún ña̱ va̱ʼa ndakuniún ndáaña kúú Babilonia ña̱ káʼnu ta ña̱yóʼo va̱xiña nu̱ú artículo ña̱ naní “¿Ndáaña kúú Babilonia ña̱ káʼnu?”.

b Íyo i̱ñu̱ ña̱ kivi chindeétáʼan xíʼún ña̱ ndakuniún kití yukú yóʼo, ta ña̱yóʼo va̱xiña nu̱ú artículo ña̱ naní “¿Ndáa tí kúú kití yukú tí color kúáʼaní tí káʼa̱n Apocalipsis capítulo 17 xa̱ʼa̱?”.

c Jehová kúú ki̱vi̱ Ndióxi̱ (Salmo 83:18). Koto artículo ña̱ naní “¿Ndáa ta̱ kúú Jehová?”.

d Tá kúni̱kaún kunda̱a̱-iniún xa̱ʼa̱ ña̱yóʼo, koto video ña̱ naní “¿Ndáa ki̱ʼva kaʼndachíñu Ndióxi̱?”.

e Ña̱ va̱ʼa kunda̱a̱-iniún xa̱ʼa̱ ña̱yóʼo, koto recuadro ña̱ naní “¿Á íyo religión ‘cristiana’ ña̱ kúú kuenta Babilonia ña̱ káʼnu?”.

f Ña̱ va̱ʼa kunda̱a̱-iniún ndáa ki̱ʼva kivi chindeétáʼan Biblia xíʼún ña̱ ndakuniún ndáaña kúú religión ña̱ nda̱a̱, kaʼvi artículo ña̱ naní “¿Ndáa ki̱ʼva ndani̱ʼíyó religión ña̱ nda̱a̱?”.