¿Ndáaña kúni̱ kachi ña̱ kooyó cristiano? | ¿Ndáaña káʼa̱n Biblia?

Iníísaá ñuyǐví ku̱a̱ʼání na̱ yiví káʼa̱nna ña̱ kúúna cristiano. Soo ña̱ kéʼéna sáxo̱ʼvi̱ña inkana, savana ni̱nuní kúnina, va̱ása nda̱kú-inina ta ni va̱ása va̱ʼa-inina. Sava na̱ xa̱a̱ ti̱ndaʼa̱ sándaʼvina na̱ tindaʼa̱ xíʼinna, xa̱ʼa̱ ña̱ kéʼéna ndiʼi ña̱yóʼo sava na̱ yiví ndákanixi̱nína ndáaña kúni̱ kachi ña̱ kooyó cristiano na̱ nda̱a̱.

¿Ndáaña kúni̱ kachi ña̱ kooyó cristiano na̱ nda̱a̱?

Va̱ása yo̱ʼvi̱ví ña̱ ka̱ʼa̱nyó ña̱ kúúyó cristiano. Biblia káʼa̱nña ña̱ kooyó cristiano kúni̱ kachiña ña̱ xa̱a̱yó kooyó discípulo ta̱ Jesús (Hechos 11:26). Ta̱ Jesús ni̱ka̱ʼa̱nra: “Tá ndíku̱nndó ña̱ sánáʼi̱ ndóʼó, mií ña̱ ndixa kúúndó discípuloi̱” (Juan 8:31). Nda̱a̱ ni iinyó va̱ása kívi keʼé ndiʼiyó ña̱ ni̱ka̱ʼa̱n ta̱ Jesús. Soo nisaá iin na̱ cristiano chíkaa̱na ndee̱ ña̱ keʼéna ña̱ sa̱náʼa̱ ta̱ Jesús ta ndiʼi ki̱vi̱ kéʼéna ña̱yóʼo. Ná kotoyó sava ejemplo.

Na̱ cristiano ndixa kúʼvi̱-inina xínina inkana

Ña̱ ni̱ka̱ʼa̱n ta̱ Jesús: “Xáʼndai̱ iin chiñu xa̱á nu̱úndó: ña̱ ná kuʼvi̱-inindó kunitáʼanndó; nda̱a̱ táki̱ʼva ni̱kuʼvi̱-inii̱ xi̱nii̱ ndóʼó, saátu kuʼvi̱-ini ndóʼó kunitáʼanndó. Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó xínitáʼanndó” (Juan 13:34, 35).

Ña̱ ke̱ʼé ta̱ Jesús: Ta̱ Jesús ndixa ni̱na̱ʼa̱ra ña̱ xi̱kuʼvi̱-inira xi̱xinira ndiʼi na̱ yiví, kúúna na̱ nda̱ʼví á nda̱a̱ ndáaka ñuu ke̱ena. Sa̱ndáʼara na̱ xi̱kuumií kue̱ʼe̱, ta̱xira xi̱xi na̱ kǒo ña̱ʼa níxikuumií ta nda̱a̱ ni̱xi̱ʼi̱ra xa̱ʼa̱ ndiʼiyó (Mateo 14:14-21; 20:28).

Ña̱ kéʼé na̱ cristiano: Náʼa̱na ña̱ kúʼvi̱-inina xínina inkana, va̱ása kúndasína miína ta íxakáʼnu-inina xa̱ʼa̱na. Ta saátu kéʼéna ku̱a̱ʼání ña̱ʼa ña̱ va̱ʼa chindeétáʼanna xíʼin na̱ xíniñúʼuña (1 Juan 3:16).

Na̱ cristiano va̱ása sándaʼvina

Ña̱ ni̱ka̱ʼa̱n ta̱ Jesús: “Yi̱ʼi̱ kúú ña̱ nda̱a̱” (Juan 14:6).

Ña̱ ke̱ʼé ta̱ Jesús: Ndiʼi tiempo ke̱ʼéra ña̱ nda̱kú ta̱ ni̱ka̱ʼa̱nra ña̱ nda̱a̱. Ta̱ Jesús nda̱a̱ ni iin yi̱chi̱ va̱ása nísandáʼvira na̱ yiví ni va̱ása níka̱ʼa̱nra ña̱ vatá. Ku̱a̱ʼání na̱ yiví xi̱xininara ña̱ xi̱kaʼa̱nra ña̱ nda̱a̱ ta xa̱ʼa̱ ña̱ xi̱na̱ʼa̱ra ña̱yóʼo ni̱ki̱ʼvira nu̱ú ku̱a̱chi (Mateo 22:16; 26:63-67).

Ña̱ kéʼé na̱ cristiano: Va̱ása káʼa̱nna ña̱ vatá ta ni va̱ása íxakuíʼnána, cháʼvina impuesto, va̱ʼa káchíñuna ta sáxi̱nuna hora ña̱ káchíñuna nu̱ú inkana (Romanos 13:5-7; Efesios 4:28). Va̱ása sándaʼvina inkana, va̱ása kéʼéna trampa tá kéʼéna exámen ni va̱ása káʼyína ña̱ vatá nu̱ú tutu ña̱ ndúkúna nu̱úna (Hebreos 13:18).

Na̱ cristiano va̱ʼa-inina xíʼin ndiʼina

Ña̱ ni̱ka̱ʼa̱n ta̱ Jesús: “Naʼandó nu̱úi̱ ndiʼi ndóʼó na̱ ndeéní káchíñu ta ve̱ení ndísondó, chi yi̱ʼi̱ taxi ndakindee̱ndó. Kixindó kachíñundó xíʼi̱n ta sakúaʼandó nu̱úi̱, saáchi va̱ása ndeé-inii̱ chi vitáva-inii̱. Tá ná kixindó nu̱úi̱ ndakindee̱ndó. Saáchi va̱ása yo̱ʼvi̱ kachíñundó xíʼi̱n ta chiñu ña̱ táxii̱ va̱ása ve̱eña” (Mateo 11:28-30).

Ña̱ ke̱ʼé ta̱ Jesús: Ta̱ Jesús va̱ʼaní ni̱xi̱yo-inira xíʼin inkana ta va̱ʼaní xi̱kunina tá xi̱xaʼa̱nna nu̱úra, xi̱kutóora koora xíʼin na̱ va̱lí ta xi̱sandíkora-ini na̱ xi̱ndakava-ini ta viíní xi̱keʼéra xíʼinna (Marcos 10:13-15; Lucas 9:11).

Ña̱ kéʼé na̱ cristiano: Viíní káʼa̱nna xíʼin ndiʼina ta ni va̱ása íxandi̱va̱ʼana xíʼinna (Efesios 4:29, 31, 32). Ndíʼi̱-inina xa̱ʼa̱ inkana ta ndúkúna ki̱ʼva ña̱ chindeétáʼanna xíʼinna (Gálatas 6:10).

Na̱ cristiano nda̱kú íyo inina xíʼin na̱ ti̱ndaʼa̱ xíʼinna

Ña̱ ni̱ka̱ʼa̱n ta̱ Jesús: “Na̱ sa̱kítáʼan Ndióxi̱ ná kǒo taʼví nda̱a̱ ni iin na̱ yivína” (Marcos 10:9).

Ña̱ ke̱ʼé ta̱ Jesús: Ni va̱ása níti̱ndaʼa̱ ta̱ Jesús, ta̱xira consejo ndaʼa̱ na̱ ti̱ndaʼa̱ ña̱ nda̱kú ná koo inina xíʼin na̱ ti̱ndaʼa̱ xíʼinna (Mateo 19:9). Saátu káxi ni̱ka̱ʼa̱nra xíʼinna xa̱ʼa̱ ña̱ʼa ña̱ kivi táʼví-táʼan na̱ xa̱a̱ ti̱ndaʼa̱ (Mateo 5:28).

Ña̱ kéʼé na̱ cristiano: Kǒo kéʼéna ña̱ʼa ña̱ náʼa̱ ña̱ kǒo íxato̱ʼókana na̱ ti̱ndaʼa̱ xíʼinna (Hebreos 13:4). Na̱ ti̱ndaʼa̱ náʼa̱na ña̱ kúʼvi̱-inina xíni táʼanna tá íxato̱ʼó táʼanna (Efesios 5:28, 33).