Xa̱a̱ ku̱nu̱mí kundoo va̱ʼayó

Ndiʼivayó kúni̱ va̱ʼa kooyó. Xa̱a̱ ku̱a̱ʼání ku̱i̱ya̱, na̱ kúúmií chiñu náʼnu kúni̱na sandíʼi-xa̱ʼa̱na ku̱a̱chi ña̱ íyo ñuyǐví yóʼo ña̱ va̱ʼa vií kooyó. Ta sava yichi̱ xa̱a̱ kúchiñuvana kéʼénaña soo loʼo kuitíva tiempo, saáchi tuku kíxáʼa íyo ku̱a̱chi. Soo, ¿á kixaa̱ ki̱vi̱ ña̱ kǒoka ku̱a̱chi koo ñuyǐví yóʼo? Kixaa̱vaña, koto ña̱ sa̱náʼa̱ ta̱ Jesús.

Ña̱ keʼé ta̱ Jesús chí nu̱únínu

Biblia sánáʼa̱ña miíyó ndáaña keʼé ta̱ Jesús ña̱ va̱ʼa sandíʼi-xa̱ʼa̱ra ku̱a̱chi ta vií kundooyó.

• Ta̱ Jesús ka̱ʼa̱nna xíʼinra “Ta̱ chíñu ta̱ táxi ku̱a̱ʼání ña̱ va̱ʼa. Iníísaá kaʼndachíñura ta va̱ʼaní kundoona ndiʼi tiempo” (Isaías 9:6, 7). Xa̱ʼa̱ ña̱ kúú ta̱ Jesús Rey ti̱xin Reino Ndióxi̱ taxira ña̱ va̱ʼaní kundoo na̱ yiví nu̱ú ñuʼú yóʼo ndiʼi tiempo.

• “Sakǎkura na̱ nda̱ʼví na̱ kána kóʼó ña̱ chindeétáʼanra xíʼinna [...] ta saátu xíʼin ndiʼi na̱ kǒo na̱ chindeétáʼan xíʼin” (Salmo 72:12-14). Nda̱kúní ndatiin ta̱ Jesús ku̱a̱chi, kǒoka guerra koo ta kǒoka na̱ xo̱ʼvi̱.

• “Ndiʼi na̱ ñuu va̱ása kanitáʼankana xíʼin espada ni va̱ása sakúaʼakana ku̱ʼu̱nna nu̱ú ku̱a̱chi ña̱ kanitáʼanna” (Isaías 2:4). Tá ná kaʼndachíñu ta̱ Jesús nu̱ú ñuʼú yóʼo kǒoka na̱ kanitáʼan koo, chi ndiʼi na̱ kundoo nu̱ú ñuʼú yóʼo viíní kitáʼan xíʼin táʼanna.

Tá kúni̱ún kunda̱a̱-iniún ndáaña keʼé ta̱ Jesús ña̱ va̱ʼa taxira ña̱yóʼo ndaʼa̱yó ta ndáaña kivi keʼéyó ña̱ va̱ʼa kundooyó nu̱úña, koto video ña̱ naní: ¿Ndáa ki̱ʼva kaʼndachíñu Ndióxi̱?

Ña̱ sa̱náʼa̱ ta̱ Jesús

Ña̱ sa̱náʼa̱ ta̱ Jesús chíndeétáʼankaña xíʼin na̱ yiví tiempo vitin ña̱ vií koona, ku̱a̱ʼání ña̱ kivi sakúaʼayó xíʼin discurso ña̱ ta̱xi ta̱ Jesús chí yuku̱ ña̱ kivi chindeétáʼan xíʼinyó ki̱vi̱ tá ki̱vi̱ ña̱ vií kitáʼanyó. Ná kotoyó savaña.

• “Si̱íní íyo na̱ ndúkú ndáa ki̱ʼva keʼéna ña̱ va̱ʼa kǒo ku̱a̱chi koo” (Mateo 5:9). Ta̱ Jesús ni̱ka̱ʼa̱nra xíʼin na̱ discípulora ña̱ ná kǒo sakúaʼnuna ku̱a̱chi.

• “Siʼnaka ndasaviún ku̱a̱chi xíʼin na̱ táʼún, tándi̱ʼi saá ndikóún ta taxiúnña ndaʼa̱ Ndióxi̱” (Mateo 5:23, 24). Ta̱ Jesús sa̱náʼa̱ra na̱ yiví ña̱ ndi̱ku̱n kama ná ndasaviína ku̱a̱china. Ta saátu sa̱náʼa̱rana ña̱ va̱ʼa xa̱a̱na koona migo Ndióxi̱ xíniñúʼu vií kitáʼanna xíʼin ndiʼina.

• “Va̱ása ndatiinndó ku̱a̱chi xíʼin inkana ña̱kán va̱ása ndatiin Ndióxi̱ ku̱a̱chi xíʼinndó” (Mateo 7:1). Ta̱ Jesús ni̱ka̱ʼa̱nra ña̱ i̱yoní ña̱ kooyó na̱ vatá xíʼin ña̱ ndatiinyó ku̱a̱chi xíʼin inkana saáchi sákakuña ku̱a̱chi. Ta saátu sa̱náʼa̱ra na̱ discípulora ña̱ nu̱úka ña̱ ka̱ʼa̱n kúáchina xa̱ʼa̱ inkana xi̱niñúʼu ixakáʼnu-inina xa̱ʼa̱na (Lucas 6:37).

Iníísaá ñuyǐví ku̱a̱ʼání na̱ yiví kéʼéna ña̱ sa̱náʼa̱ ta̱ Jesús. Ta nda̱a̱ nu̱ú íyoní ku̱a̱chi na̱ yiví na̱ ndíku̱n ña̱ sa̱náʼa̱ ta̱ Jesús chíkaa̱na ndee̱ ña̱ vií ndasaviína ku̱a̱chi ña̱ kúúmiína, ña̱ ixakáʼnu-inina xa̱ʼa̱ inkana ta saátu ña̱ kuʼvi̱-inina kunina na̱ íxandi̱va̱ʼa xíʼinna.

Ña̱ va̱ʼa kotoún ndáa ki̱ʼva xa̱a̱ chíndeétáʼan ña̱ sa̱náʼa̱ ta̱ Jesús xíʼin inka na̱ yiví ña̱ va̱ʼa vií koona, kaʼvi artículo ña̱ naní “Cómo sentir paz a pesar de las guerras y los conflictos armados”.