¿Á ña̱ ndákanixi̱ní mií na̱ ta̱a kúú ña̱ ka̱ʼyina nu̱ú Biblia?

Ña̱ káʼa̱n Biblia xa̱ʼa̱ ña̱yóʼo

Ndáyáʼviníkava ña̱ va̱xi nu̱ú Biblia chi va̱ása káʼa̱n kuitíña xa̱ʼa̱ ña̱ʼa ña̱ ndíchi. Mií Biblia káʼa̱n ña̱yóʼo: “Ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña” (2 Timoteo 3:16). Ta íyo ku̱a̱ʼání ña̱ náʼa̱ ña̱ ndixa kúúña tu̱ʼun Ndióxi̱. Ña̱yóʼo kúú savaña:

• Ndiʼi historia ña̱ káʼa̱n Biblia xa̱ʼa̱, ña̱ nda̱a̱va kúúña.

• Ndiʼi na̱ ka̱ʼyi Biblia kǒo níchise̱ʼéna xa̱ʼa̱ nda̱a̱ ni iin ña̱ʼa, saáchi nda̱a̱ ku̱a̱chi ña̱ ni̱ki̱ʼvi miína ka̱ʼyina xa̱ʼa̱. Xa̱ʼa̱ ña̱kán kiviva kandíxayó ña̱ nina ña̱ nda̱a̱ kúú ña̱ va̱xi nu̱ú Biblia.

• Ndiʼi ña̱ káʼa̱n Biblia va̱ʼaní kítáʼanña, tá kúú ña̱ káʼa̱nña xa̱ʼa̱ ndáa ki̱ʼva kúú ña̱ na̱ʼa̱ Ndióxi̱ ña̱ miíra kúú ta̱ kúúmií derecho ña̱ kaʼndachíñura nu̱ú ndiʼi na̱ yiví ta saátu ndáa ki̱ʼva kuniñúʼura Reinora ña̱ íyo chí ndiví ña̱ va̱ʼa ndasalivira iníísaá nu̱ú ñuʼú yóʼo, tasaá saxínura ña̱ kúni̱ra.

• Ni xa̱a̱ íyo ku̱a̱ʼání ku̱i̱ya̱ ni̱ka̱ʼyi̱ ña̱ Biblia soo va̱ʼaníva kítáʼan ña̱ káʼa̱nña xíʼin ña̱ ciencia.

• Íyo ku̱a̱ʼání ña̱ náʼa̱ ña̱ xa̱a̱ ni̱xi̱nuva ku̱a̱ʼání profecía ña̱ káʼa̱n ña̱ Biblia xa̱ʼa̱.