¿Á kivi kunda̱a̱ káxi iniyó ndáana ka̱ʼyi Biblia?

Ña̱ káʼa̱n Biblia xa̱ʼa̱ ña̱yóʼo

Ku̱a̱ʼání na̱ yiví káchina ña̱ kǒo kívi kunda̱a̱-iniyó ndáana ka̱ʼyi Biblia. Soo mií nu̱ú Biblia káʼa̱n káxiña ndáana kúú na̱ ka̱ʼyi iin tá iin libro ña̱ va̱xi nu̱úña. Tá kúú sava libro kíxáʼaña xíʼin tu̱ʼun yóʼo, “yi̱ʼi̱ ta̱ Nehemías [...] kúú ta̱ ni̱ka̱ʼa̱n ña̱yóʼo”, “ña̱yóʼo kúú visión ña̱ xi̱ni ta̱ Isaías”, “ña̱yóʼo kúú tu̱ʼun ña̱ ni̱ka̱ʼa̱n Jehová xíʼin ta̱ Joel” (Nehemías 1:1; Isaías 1:1; Joel 1:1).

Ku̱a̱ʼání na̱ ka̱ʼyi Biblia ni̱ka̱ʼa̱nna ña̱ tu̱ʼun mií Jehová kúú ña̱ ka̱ʼyina ta miíra xi̱niʼi yichi̱ nu̱úna. Na̱ profeta na̱ ka̱ʼyi sava libro ña̱ va̱xi nu̱ú ña̱ Escrituras Hebreas yáʼaka u̱ni̱ ciento yichi̱ ni̱ka̱ʼa̱nna ña̱yóʼo: “Ña̱yóʼo kúú ña̱ káʼa̱n Jehová” (Amós 1:3; Miqueas 2:3; Nahúm 1:12). Savatu na̱yóʼo ka̱ʼyina ña̱ ni̱ka̱ʼa̱n na̱ ángel na̱ chi̱ndaʼá Jehová (Zacarías 1:7, 9).

Ndióxi̱ xi̱niñúʼura 40 ta̱a ña̱ va̱ʼa kaʼyina Biblia ta ke̱ʼéna ña̱yóʼo ti̱xin 1,600 ku̱i̱ya̱. Sava na̱ ta̱a yóʼo ka̱ʼyina iin libro á ku̱a̱ʼákaña. Iníísaá Biblia kúúmiíña 66 libro, 39 libro yóʼo va̱xiña nu̱ú táʼví ña̱ Escrituras Hebreas ña̱ káʼa̱ntuna xíʼin Antiguo Testamento, ta 27 libro va̱xiña ti̱xin ña̱ Escrituras Griegas Cristianas, ña̱ káʼa̱ntuna xíʼin Nuevo Testamento.