¿Ama ni̱ka̱ʼyi̱ ña̱ káʼa̱n xa̱ʼa̱ ta̱ Jesús?

Ña̱ káʼa̱n Biblia xa̱ʼa̱ ña̱yóʼo

Nu̱ú Evangelio ña̱ ka̱ʼyi ta̱ apóstol Juan ni̱ka̱ʼa̱nra ña̱yóʼo: “Ta̱ xi̱ni ña̱yóʼo káʼa̱nra xa̱ʼa̱ña ta ña̱ nda̱a̱ kúú ña̱ káʼa̱nra, ta kúnda̱a̱-inira ña̱ kúúña ña̱ nda̱a̱, ña̱kán va̱ʼa kandíxatu ndóʼóva” (Juan 19:35).

Ña̱ ni̱ka̱ʼyi̱ nu̱ú ña̱ Evangelio kivi kandíxayóña chi ña̱ nda̱a̱ kúú ña̱ káʼa̱nña xa̱ʼa̱ ta̱ Jesús, saáchi tá ka̱ʼyi ta̱ Mateo, ta̱ Marcos, ta̱ Lucas xíʼin ta̱ Juan ña̱yóʼo tákukavana yiví na̱ xi̱ni ndiʼi ña̱ ku̱u. Savana káʼa̱nna ña̱ tá xa̱a̱ ni̱ya̱ʼa u̱na̱ ku̱i̱ya̱ ña̱ ni̱xi̱ʼi̱ ta̱ Jesús kúú ña̱ ka̱ʼyi ta̱ Mateo Evangeliora, ta ña̱yóʼo ku̱uña ku̱i̱ya̱ 41 tiempo vitin. Soo ku̱a̱ʼá na̱ káʼvi va̱ʼa káʼa̱nna ña̱ tá xa̱a̱ ni̱ya̱ʼa ku̱a̱ʼáka loʼo tiempo saá ka̱ʼyiraña. Soo ndiʼivana káʼa̱n ña̱ ndiʼi tutu ña̱ va̱xi nu̱ú Escrituras Griegas Cristianas ndi̱ʼi ni̱ka̱ʼyi̱ña tá kúma̱ní loʼo ndiʼi siglo nu̱ú.

Na̱ yiví na̱ xi̱ni ta̱ Jesús tá ni̱xi̱yora nu̱ú ñuʼú yóʼo, ta ni̱xi̱ʼi̱ra ta saátu tá nda̱takura xi̱kunda̱a̱-inina ña̱ nda̱a̱ kúú ña̱ xi̱kaʼa̱n Evangelio, soo saátu xi̱kivi ka̱ʼa̱nna á xi̱kuma̱ní kaʼyi iin ña̱ʼa nu̱úña. Xa̱ʼa̱ ña̱kán iin ta̱ káʼvi va̱ʼa xa̱ʼa̱ Biblia ta̱ naní Frederick F. Bruce káchira: “Xa̱ʼa̱ ña̱ xi̱xini̱ na̱ yiví xa̱ʼa̱ ta̱ Jesús kǒo níxi̱yiʼvína na̱ apóstol tá xi̱xaʼa̱nna xi̱natúʼunna xíʼinna xa̱ʼa̱ra, ta ni kǒo níxi̱ka-inina keʼéna ña̱yóʼo. Na̱ apóstol kǒo ni̱ka̱ʼa̱n kuitína ‘xi̱nindi̱ ña̱ ku̱u’, saáchi nda̱a̱ ni̱ka̱ʼa̱nna, ‘nda̱a̱ miíndó xi̱ni ña̱ ku̱u’” (Hechos 2:22).