¿Á Ndióxi̱ ke̱ʼé ta̱ Ndi̱va̱ʼa?

Ña̱ káʼa̱n Biblia xa̱ʼa̱ ña̱yóʼo

Biblia káʼa̱nña ña̱ va̱ása ní ixava̱ʼa Jehová ta̱ Ndi̱va̱ʼa, saáchi iin ángel ta̱ va̱ʼava ni̱xi̱yora. Deuteronomio 32:3-5 káʼa̱nña xa̱ʼa̱ Ndióxi̱, ta ña̱yóʼo káchiña: “Ndiʼi ña̱ kéʼéra va̱ʼaníña, saáchi nda̱kúní íyo yichi̱ra. Kúúra iin Ndióxi̱ ta̱ nda̱kúní-ini. Nda̱kúní ndátiinra ku̱a̱chi, va̱ása sándaʼvira”. Xíʼin ña̱yóʼo kúnda̱a̱-iniyó ta̱ Ndi̱va̱ʼa iin ta̱ va̱ʼa ni̱xi̱yora ta se̱ʼe Ndióxi̱ xi̱kuura.

Nu̱ú Juan 8:44, ta̱ Jesús ni̱ka̱ʼa̱nra ta̱ Ndi̱va̱ʼa kǒo “níxindiku̱nra ña̱ nda̱a̱”, xíʼin ña̱yóʼo kúnda̱a̱-iniyó ña̱ kǒo ña̱ va̱ása va̱ʼa níxi̱keʼéra tá ya̱chi̱.

Jehová ta̱xira ña̱ ná ndaka̱xin mií na̱ ángel ndáaña keʼéna ta kotona ndáaña kúú ña̱ va̱ʼa xíʼin ña̱ va̱ása va̱ʼa, ta nda̱a̱ ta̱ ángel yóʼo kivi ndaka̱xinra ndáaña keʼéra. Ña̱kán, tá kǒo níxiniso̱ʼokara Ndióxi̱ sa̱ndáʼvira ta̱ Adán xíʼin ñá Eva, tasaá ni̱xa̱a̱ra ndu̱ura ta̱ Ndi̱va̱ʼa, ta ki̱vi̱ra kúni̱ kachiña ta̱ “íyo contra xíʼin Ndióxi̱” (Génesis 3:1-5; Apocalipsis 12:9).