¿Á Ndióxi̱ kúú ta̱ kúúmií ku̱a̱chi xa̱ʼa̱ tu̱ndóʼo ña̱ ndóʼoyó?

Ña̱ káʼa̱n Biblia xa̱ʼa̱ ña̱yóʼo

Káxiní káʼa̱n Biblia ña̱ su̱ví Ndióxi̱ kúú ta̱ kúúmií ku̱a̱chi xa̱ʼa̱ tu̱ndóʼo ña̱ ndóʼoyó. Kǒo níxi̱kuni̱ Ndióxi̱ ña̱ xo̱ʼvi̱yó. Soo ta̱ Adán xíʼin ñá Eva kǒo níkandíxakana ña̱ ni̱ka̱ʼa̱n Ndióxi̱ ta ki̱xáʼana kéʼéna ña̱ kúni̱ miína, ta xa̱ʼa̱ ña̱yóʼo ki̱xi tu̱ndóʼo nu̱úna ta ni̱xi̱ʼi̱vana.

Ta vitin ndiʼi miíyó na̱ yiví xóʼvi̱yó xa̱ʼa̱ ña̱ ke̱ʼé na̱yóʼo. Ña̱kán su̱ví ku̱a̱chi Ndióxi̱ví kúú ña̱ xóʼvi̱yó.

Xa̱ʼa̱ ña̱yóʼo Biblia káʼa̱nña: “Tá yáʼa iin na̱ yiví nu̱ú iin tu̱ndóʼo, ná kǒo ka̱ʼa̱nna ña̱yóʼo: ‘Ndióxi̱ xítondosó yi̱ʼi̱’. Saáchi nda̱a̱ ni iin na̱ yiví kǒo kívi kotondosóna Ndióxi̱ ña̱ keʼéra ña̱ va̱ása va̱ʼa, ta ni ta̱yóʼo va̱ása xítondosóra nda̱a̱ ni iin na̱ yiví” (Santiago 1:13). Ndiʼi na̱ yiví yáʼana nu̱ú tu̱ndóʼo, nda̱a̱ na̱ ndásakáʼnu Ndióxi̱.