¿Ndáaña kúni̱ Ndióxi̱ ná keʼíi̱?

Ña̱ káʼa̱n Biblia xa̱ʼa̱ ña̱yóʼo

Ndióxi̱ kúni̱ra ná sakúaʼayó xa̱ʼa̱ra, ná kooyó migora, ná kuʼvi̱-iniyó kuniyóra ta ná kachíñuyó nu̱úra xíʼin ndiʼi níma̱yó (Mateo 22:37, 38; Santiago 4:8). Kivi xa̱a̱yó kunda̱a̱-iniyó ndáaña kúni̱ Ndióxi̱ ná keʼéyó tá ná sakúaʼayó xa̱ʼa̱ ña̱ ke̱ʼé ta̱ Jesús ta saátu xa̱ʼa̱ ña̱ sa̱náʼa̱ra, chi ta̱yóʼo va̱ʼaní sa̱xínura ña̱ kúni̱ Ndióxi̱ (Juan 7:16, 17). Ta nda̱a̱ ni̱ka̱ʼa̱nra ndáa xa̱ʼa̱ kúú ña̱ ki̱xira nu̱ú ñuʼú yóʼo, ka̱chira: “Kǒo níkei̱ chí ndiví ña̱ kixii̱ keʼíi̱ ña̱ kúni̱ miíi̱, saáchi va̱xii̱ keʼíi̱ ña̱ kúni̱ mií ta̱ chi̱ndaʼá yi̱ʼi̱” (Juan 6:38).

¿Á xíniñúʼu kundatui̱ ña̱ taxi Ndióxi̱ iin señal á visión nu̱úi̱ ña̱ va̱ʼa kunda̱a̱-inii̱ ndáaña kúni̱ra ná keʼíi̱?

Va̱ásaví, chi Biblia kúú ña̱ xíniñúʼura ña̱ va̱ʼa ka̱ʼa̱nra xíʼin na̱ yiví. Nu̱ú ña̱yóʼo va̱xi ndiʼi ña̱ xíniñúʼuyó ña̱ va̱ʼa kuxini̱ va̱ʼayó keʼéyó nda̱a̱ ndáaka chiñu ña̱ kúni̱ Ndióxi̱ (2 Timoteo 3:16, 17). Ndióxi̱ kúni̱ra ná kaʼviyó Biblia ta ná ndakanixi̱níyó xa̱ʼa̱ña chi saá va̱ʼa kunda̱a̱-iniyó ndáaña kúni̱ra ná keʼéyó (Romanos 12:1, 2; Efesios 5:17).

¿Á kuchiñui̱ keʼíi̱ ña̱ kúni̱ Ndióxi̱?

Kuchiñuvaún keʼúnña, saáchi nu̱ú tu̱ʼunra káʼa̱nra xíʼinyó ña̱ va̱ása yo̱ʼvi̱ví chiñu ña̱ xáʼndara nu̱úyó (1 Juan 5:3). Ña̱ nda̱a̱va kúúña kiviva ixayo̱ʼvi̱ña xíʼinyó keʼéyó ña̱ káʼa̱n Ndióxi̱. Soo ku̱a̱ʼáva ña̱ va̱ʼa ndakiʼinyó tá ná chikaa̱yó ndee̱ keʼéyó ña̱ kúni̱ra. Ta̱ Jesús ka̱chira: “Na̱ si̱íka íyo kúú na̱ xíniso̱ʼo tu̱ʼun Ndióxi̱ ta kéʼéna ña̱ káʼa̱nña” (Lucas 11:28).