¿Ndáaña xíniñúʼu keʼéyó ña̱ va̱ʼa kunda̱a̱-iniyó xíʼin ña̱ káʼa̱n Biblia?

Ña̱ káʼa̱n Biblia xa̱ʼa̱ ña̱yóʼo

Mií Biblia kúú ña̱ káʼa̱n xíʼinyó ndáaña xíniñúʼu keʼéyó ña̱ va̱ʼa kunda̱a̱-iniyó xíʼin ña̱ káʼa̱nña. Ndiʼivayó kivi kunda̱a̱-ini xíʼin ña̱ káʼa̱n tu̱ʼun Ndióxi̱ saáchi va̱ása yo̱ʼvi̱nívíña (Deuteronomio 30:11).

Ña̱ kivi keʼéyó

1. Vií ndakanixi̱níyó. Ndáyáʼviní ña̱ vitá koo iniyó ta ndakuniyó ña̱ tu̱ʼun Ndióxi̱ kúú Biblia. Ndióxi̱ kǒo kúsi̱í-inira xíʼin ña̱ kéʼé na̱ yiví na̱ ni̱nu kúni (1 Tesalonicenses 2:13; Santiago 4:6). Va̱ása xíniñúʼu kandíxa kuitíyó ña̱ xíniso̱ʼoyó á ña̱ káʼviyó chi xíniñúʼu nandukú va̱ʼayó xa̱ʼa̱ña (Romanos 12:1, 2).

2. Ná ka̱ʼa̱nyó xíʼin Ndióxi̱ ña̱ taxira ña̱ ndíchi ndaʼa̱yó. Proverbios 3:5 káʼa̱nña ña̱yóʼo: “Va̱ása kundaa-iniún ña̱ ndákanixi̱ní miíún”. Ndáyáʼviní ña̱ ka̱ʼa̱nyó xíʼin Ndióxi̱ ña̱ taxira ña̱ ndíchi ndaʼa̱yó ña̱ va̱ʼa kunda̱a̱-iniyó xíʼin tu̱ʼunra (Santiago 1:5).

3. Xíniñúʼu kaʼvi ni̱ʼiyóña. Va̱ʼaníka kunda̱a̱-iniyó xíʼin ña̱ káʼa̱n Biblia tá ndiʼi ki̱vi̱ ná kaʼviyóña nu̱úka ña̱ kaʼviyóña tá xa̱a̱ ndákaʼán kuitíyó (Josué 1:8).

4. Iin tá iin ña̱ʼa ná kaʼviyó xa̱ʼa̱. Iin ña̱ kivi chindeétáʼan xíʼinyó ña̱ kunda̱a̱-iniyó xa̱ʼa̱ ña̱ sánáʼa̱ Biblia kúú ña̱ kaʼviyó xa̱ʼa̱ iin tá iin ña̱ʼa. Tá kúú, kivi kixáʼayó kaʼviyó xa̱ʼa̱ ña̱ʼa ña̱ va̱ása yo̱ʼvi̱ní, tasaá loʼo tá loʼo kixáʼayó kaʼviyó xa̱ʼa̱ ña̱ʼa ña̱ yo̱ʼvi̱ka (Hebreos 6:1, 2). Tá ná chitáʼanyó texto ña̱ va̱xi nu̱ú Biblia xíʼin inkaña, kiʼinyó kuenta ña̱ va̱ʼaní kítáʼan ña̱ káʼa̱nña ta kiviva kunda̱a̱-iniyó xíʼin ña̱ʼa ña̱ yo̱ʼvi̱ní ña̱ va̱xi nu̱úña (2 Pedro 3:16).

5. Ná ka̱ʼa̱nyó xíʼin inkana ña̱ chindeétáʼanna xíʼinyó. Ña̱ Biblia káʼa̱nña ña̱ ná taxiyó ña̱ chindeétáʼan inka na̱ xíni̱ka xíʼinyó ña̱ kunda̱a̱-iniyó xíʼin ña̱ káʼa̱nña (Hechos 8:30, 31). Na̱ testigo Jehová sánáʼa̱na na̱ yiví xa̱ʼa̱ Biblia ta kǒo xu̱ʼún kíʼinna ndaʼa̱na. Kéʼéna nda̱a̱ táki̱ʼva xi̱keʼé na̱ cristiano na̱ ni̱xi̱yo tá siglo nu̱ú, xíniñúʼuna ku̱a̱ʼá texto ña̱ va̱xi nu̱ú Biblia ña̱ va̱ʼa chindeétáʼanna xíʼin na̱ yiví ña̱ kunda̱a̱ káxi inina xa̱ʼa̱ ña̱ sánáʼa̱ Biblia (Hechos 17:2, 3).

Ña̱ va̱ása xíniñúʼuyó

1. Va̱ása xíniñúʼu koovíyó iin na̱ ka̱ʼvi va̱ʼa. Na̱ 12 apóstol ta̱ Jesús va̱ʼava xi̱kunda̱a̱-inina xíʼin ña̱ xi̱kaʼa̱n Biblia ta xi̱sanáʼa̱na inkana xa̱ʼa̱ ña̱ káʼa̱nña, ni xi̱kaʼa̱n na̱ yiví ña̱ xi̱kuuna ta̱a na̱ va̱ása ndíchi ta ni va̱ása níkaʼvi va̱ʼana (Hechos 4:13).

2. Va̱ása xíniñúʼu kuumiívíyó ku̱a̱ʼání xu̱ʼún. Va̱ása xíniñúʼu chaʼvivíyó ña̱ va̱ʼa kunda̱a̱-iniyó xa̱ʼa̱ ña̱ sánáʼa̱ Biblia. Ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Va̱ása níchaʼvindó xa̱ʼa̱ ña̱yóʼo, ña̱kán va̱ása ndukúndó ña̱ʼa nu̱úna” (Mateo 10:8).