¿Á íyo nu̱ú ku̱a̱ʼa̱nyó tá xa̱a̱ xíʼi̱yó?

Ña̱ káʼa̱n Biblia xa̱ʼa̱ ña̱yóʼo

Biblia káchiña: “Na̱ táku kúnda̱a̱-inina ña̱ kuvina, soo na̱ ni̱xi̱ʼi̱ va̱ása kúnda̱a̱-inina xa̱ʼa̱ nda̱a̱ ni iin ña̱ʼa” (Eclesiastés 9:5; Salmo 146:4). Ña̱kán tá xíʼi̱ iin na̱ yiví kǒo nu̱ú ku̱a̱ʼa̱nna. Na̱ ni̱xi̱ʼi̱ kǒo ndákanikaxi̱nína, kǒoka ña̱ kéʼéna ta ni kǒoka ña̱ kúnda̱a̱-inina.

“Ñuʼú nduuvaún”

Ndióxi̱ ni̱ka̱ʼa̱nra xíʼin ta̱ Adán ndáaña ndóʼoyó tá xíʼi̱yó. Tá i̱xaso̱ʼo ta̱ Adán, Ndióxi̱ ni̱ka̱ʼa̱nra ña̱yóʼo xíʼinra: “Saáchi xíʼin ñuʼú ku̱vaʼún ta ñuʼú nduuvaún” (Génesis 3:19). Ta̱ʼán kutakuví ta̱ Adán tá kúma̱níka ixava̱ʼa Ndióxi̱ miíra xíʼin “ñuʼú” (Génesis 2:7). Ta tá ni̱xi̱ʼi̱ra ndu̱u tukura ñuʼú ta va̱ása níxi̱takukara.

Ta saátu ndóʼo miíyó tiempo vitin. Tu̱ʼun Ndióxi̱ káʼa̱nña ña̱yóʼo xa̱ʼa̱ na̱ yiví ta saátu xa̱ʼa̱ kití: “Ndiʼina ku̱vaʼana xíʼin ñuʼú ta ndiʼina ndúuna ñuʼú” (Eclesiastés 3:19, 20).

Íyova ña̱ ndátu na̱ ni̱xi̱ʼi̱ ndakiʼinna

Biblia chítáʼanña ña̱ xíʼi̱yó xíʼin ña̱ ku̱su̱n naayó (Salmo 13:3; Juan 11:11-14; Hechos 7:60). Na̱ kísi̱ naa va̱ása kúnda̱a̱-inina ndáaña kúu, saátu na̱ ni̱xi̱ʼi̱ kǒoka ña̱ xínitúni̱na. Soo Biblia káʼa̱nña ña̱ kiviva sandátaku Ndióxi̱ miína (Job 14:13-15). Íyo iin ña̱ va̱ʼaní ndakiʼin na̱ sandátaku Ndióxi̱.